Deuteronomium
3 “Afei yɛdanee yɛn ho foro faa Basan kwan so. Ɛnna Basan hene Og+ boaa ne dɔm ano bɛhyiaa yɛn wɔ Edrei+ sɛ ɔne yɛn rebɛko. 2 Na Yehowa ka kyerɛɛ me sɛ, ‘Nsuro no,+ na mede ɔne ne nkurɔfoɔ nyinaa ne n’asase bɛhyɛ wo nsa na woayɛ no sɛdeɛ woyɛɛ Amorifoɔ hene Sihon a na ɔte Hesbon no.’+ 3 Enti Yehowa yɛn Nyankopɔn de Basan hene Og ne ne nkurɔfoɔ nyinaa hyɛɛ yɛn nsa, na yɛkunkum wɔn nyinaa na anka onipa baako mpo.+ 4 Yɛfaa ne nkuro nyinaa saa berɛ no. Kuro baako mpo nni hɔ a yɛannye no wɔn nsam. Yɛfaa nkuro aduosia,+ Argob+ asase nyinaa, Og ahemman a ɛwɔ Basan.+ 5 Ná ɛyɛ nkuro akɛseɛ a ɛwɔ afasuo atenten ne apono akɛseɛ a dadeɛ deda akyire. Yeinom akyi no, na nkuro nketewa pii nso wɔ hɔ. 6 Nanso yɛsɛee+ ne nyinaa pasaa sɛdeɛ yɛyɛɛ Hesbon hene Sihon no, na yɛsɛee kuro biara, mmarima, mmaa ne mmɔfra.+ 7 Na wɔn mmoa ne nneɛma foforɔ a ɛwɔ kuro no mu deɛ, yɛfaa no sɛ asadeɛ.+
8 “Saa berɛ no ara na yɛgyee asase no firii Amorifoɔ ahemfo mmienu+ a na wɔwɔ Yordan mantam mu no nsam, ɛfiri Arnon+ subɔn ho kɔsi Bepɔ Hermon+ ho. 9 (Ná Sidonfoɔ frɛ Hermon sɛ Sirion,+ na Amorifoɔ nso frɛ no Senir.)+ 10 Afei yɛfaa nkuro a ɛwowɔ asase tratra soɔ no ne Gilead ne Basan nyinaa kɔsii Saleka+ ne Edrei,+ nkuro a ɛwɔ Og ahemman mu wɔ Basan no. 11 Saa berɛ no na Basan hene Og ne Refaimni+ a waka. Na ne mpa a wɔde funu to soɔ yɛ dadeɛ mpa. Mpa yi si Ammonfoɔ kurom wɔ Raba.+ Ne tenten yɛ basafa nkron, na ne tɛtrɛtɛ yɛ basafa nnan. 12 Saa berɛ no ara na yɛfaa asase no; ɛfiri Aroer+ a ɛwɔ Arnon subɔn ho ne Gilead bepɔ no fã ne nkuro a ɛwowɔ hɔ no, mede ama Rubenfoɔ ne Gadfoɔ.+ 13 Na mede Gilead+ asase a aka ne Og ahemman a ɛwɔ Basan+ nyinaa ama Manase abusuakuo no fã. Wɔfrɛ Argob+ anaa Basan mantam hɔ nyinaa Refaim+ asase.
14 “Manase ba Yair+ faa Argob+ asase no nyinaa bɛsii Gesurfoɔ+ ne Maakatfoɔ+ hyeɛ so. Na ɔde ne din too Basan nkuraa a ɛwowɔ hɔ no frɛɛ hɔ Hawot-Yair+ bɛsi nnɛ. 15 Mede Gilead+ nso ama Makir.+ 16 Mede asase a ɛfiri Gilead+ kɔsi Arnon subɔn no mfimfini ama Rubenfoɔ+ ne Gadfoɔ. Ɛba bɛsi Yabok subɔn ho wɔ Ammonfoɔ hyeɛ so,+ 17 ne Araba ne Yordan asase no ho kɔfa Kineret+ bɛsi po a ɛwɔ Araba anaa Nkyene Po+ no ho wɔ Pisga+ bepɔ no ase wɔ apueeɛ fam.
18 “Enti meka kyerɛɛ mo sɛ, ‘Yehowa mo Nyankopɔn de asase yi ama mo sɛ momfa. Mmarima akokoɔdurofoɔ nyinaa, mobɛfa mo akodeɛ adi mo nuanom Israelfoɔ anim akɔ asase no so.+ 19 Mo yerenom ne mo mma nkumaa ne mo mmoa (mmoa nso deɛ, menim sɛ mowɔ pii), yeinom nko ara na wɔbɛtena nkuro a mede ama mo no mu+ 20 akɔsi sɛ Yehowa bɛma mo ne mo nuanom ahome na wɔafa asase a Yehowa mo Nyankopɔn de ama wɔn Yordan agya no. Ɛno akyi no, mobɛtumi asan aba asase a mede ama mo no so.’+
21 “Afei meka kyerɛɛ Yosua+ sɛ, ‘Wo ara woahunu deɛ Yehowa wo Nyankopɔn de ayɛ ahemfo mmienu no nyinaa. Saa ara na Yehowa bɛyɛ ahemman a morekɔ mu no nyinaa.+ 22 Monnsuro wɔn ɛfiri sɛ Yehowa mo Nyankopɔn bɛko ama mo.’+
23 “Na mesrɛɛ Yehowa saa berɛ no sɛ, 24 ‘O Awurade Tumfoɔ Yehowa, wo na woama w’akoa ahunu wo kɛseyɛ+ ne wo basa denden no.+ Onyame bɛn na ɔwɔ soro anaa asase so a ɔbɛtumi ayɛ wo nnwuma ne w’ahoɔdenneɛ yi bie?+ 25 Mesrɛ wo ma mentwa nkɔhwɛ asase pa+ a ɛwɔ Yordan agya no, bepɔ so+ asase fɛfɛ no ne Lebanon.’+ 26 Na mo nti Yehowa bo fuu me,+ na wantie me. Afei Yehowa ka kyerɛɛ me sɛ, ‘Twa so! Mmɔ asɛm yi so nkyerɛ me bio. 27 Foro kɔgyina Pisga+ na ma w’ani so hwɛ atɔeɛ ne atifi ne anafoɔ ne apueeɛ, na Yordan deɛ, worentwa.+ 28 Fa Yosua yɛ ɔman no kannifoɔ+ na hyɛ no nkuran na hyɛ no den, ɛfiri sɛ ɔno na ɔbɛdi ɔman yi anim atwa Yordan,+ na ɔde asase a wobɛhunu no bɛma wɔn.’+ 29 Saa berɛ yi nyinaa na yɛte bɔn mu wɔ Bet-Peor anim.+