ƆDE KƆMAA EFESOFO

1 Me Paul a menam Onyankopɔn pɛ so yɛ Kristo Yesu somafo no, merekyerɛw akɔma akronkronfo a wɔwɔ Efeso+ a wɔyɛ anokwafo wɔ Kristo Yesu mu:

2 Yɛn Agya Onyankopɔn ne Awurade Yesu Kristo adom ne asomdwoe nka mo.

3 Ayeyi nka yɛn Awurade Yesu Kristo Agya ne ne Nyankopɔn, efisɛ ɔde honhom fam nhyira nyinaa bi ahyira yɛn Kristo mu wɔ ɔsoro.+ 4 Ɛno nti na ɔpaw yɛn kaa ne* ho ansa na wɔrehyɛ wiase ase, sɛ yennya ɔdɔ na yɛnyɛ kronn a dɛm biara nni yɛn ho+ wɔ Onyankopɔn anim. 5 Na esiane sɛ ɛyɛ ne pɛ na ɛsɔ n’ani+ nti, ɔhyɛ too hɔ+ sɛ ɔnam Yesu Kristo so begye yɛn aba ne nkyɛn sɛ ɔno ara ne mma,+ 6 sɛnea ɛbɛyɛ a nkurɔfo bɛkamfo Onyankopɔn adom+ kɛse a ɔnam nea ɔdɔ no no+ so de adom yɛn no. 7 Ɛnam nea ɔdɔ no no mogya so+ na yɛanya ogye, kyerɛ sɛ, yɛanya bɔnefakyɛ,+ sɛnea n’adom bebrebe no te.

8 Adom yi, ɔma ɛboroo so maa yɛn wɔ nyansa ne ntease nyinaa mu. 9 Nea ɔyɛe ne sɛ, ahintasɛm kronkron+ a ɛfa n’apɛde ho no, ɔdaa no adi kyerɛɛ yɛn. Esiane sɛ ɛsɔ n’ani nti, ɔno ankasa bɔɔ ne tirim sɛ, 10 bere a wahyɛ no so a, obedi nneɛma ho dwuma* na waka nneɛma nyinaa abom bio wɔ Kristo mu, nea ɛwɔ soro ne nea ɛwɔ asaase so.+ Ne mu na ɔbɛka nneɛma nyinaa abom. 11 Ɔno na yɛne no ayɛ baako, na wɔayɛ yɛne no nyinaa adedifo,*+ efisɛ nea otumi yɛ biribiara a ɔpɛ ma n’atirimpɔw ba mu no ahyehyɛ no saa, 12 sɛnea ɛbɛyɛ a, yɛn a yɛadi kan anya Kristo mu anidaso no nti, nkurɔfo beyi Onyankopɔn ayɛ na wɔahyɛ no anuonyam. 13 Na mo nso bere a motee nokware no, kyerɛ sɛ, mo nkwagye ho asɛmpa no, munyaa anidaso wɔ ne mu. Bere a munyaa ne mu gyidi no, wɔnam no so de honhom kronkron a Onyankopɔn hyɛɛ bɔ sɛ ɛbɛba no hyɛɛ mo nsow.+ 14 Saa honhom no yɛ agyapade a yɛn nsa bɛka daakye no ho adanse a edi mu.*+ Nea enti a wɔahyɛ mo nsow ne sɛ, ɛbɛma Onyankopɔn ankasa nkurɔfo*+ anya ogye,+ na ɛde ayeyi ne anuonyam abrɛ no.

15 Eyi nti me nso, efi bere a metee sɛ mowɔ Awurade Yesu mu gyidi na moakyerɛ sɛ modɔ akronkronfo nyinaa no, 16 daa meda Onyankopɔn ase ma mo. Migu so ara bɔ mo din wɔ me mpaebɔ mu; 17 mesrɛ sɛ anuonyam Agya a ɔyɛ yɛn Awurade Yesu Kristo Nyankopɔn no bɛma mo tumi a mode behu nyansa na moate nneɛma a oyi kyerɛ yɛn no ase, na moanya nokware nimdeɛ.+ 18 Onyankopɔn abue mo komam, sɛnea ɛbɛyɛ a mubehu anidaso a ɔde ama mo, ne nneɛma pa a ɛkyɛn so a ɔde ahyɛ akronkronfo bɔ+ no, 19 na moahu sɛnea ne tumi ne n’ahoɔden yɛ kɛse boro so ma yɛn a yɛyɛ gyidifo no.+ Saa ahoɔden no da adi wɔ sɛnea ne tumi yɛ adwuma no mu; 20 Ɛno na ɔde di boaa Kristo, bere a onyan no fii awufo mu na ɔde no tenaa ne nsa nifa+ wɔ ɔsoro no; 21 ɔde no tenaa baabi a ɛkorɔn koraa sen aban, tumi, ahoɔden, ne mpanyinni nyinaa, ne edin biara,+ ɛnyɛ wiase yi* mu nko, na mmom nea ɛreba no nso mu. 22 Ɔde nneɛma nyinaa nso guu ne nan ase,+ na ɔyɛɛ no biribiara so panyin* wɔ asafo no mu;+ 23 asafo no ne ne nipadua,+ na ɔno a ɔhyɛ ade nyinaa mã no, ɔno na ɔhyɛ asafo no mã.

2 Afei nso, na moawu wɔ mo mfomso ne mo bɔne mu, nanso Onyankopɔn ama moaba nkwa mu.+ 2 Bere bi, na monantew sɛnea wiase yi te;*+ ɔpanyin a ɔde ne tumi akɛntɛn mframa a ɛrebɔ no so+ no, monantewee sɛnea ɔpɛ. Saa mframa no ne honhom+ a seesei ɛyɛ adwuma wɔ asoɔden mma mu no. 3 Yɛn nyinaa, bere bi, saa na yɛbɔɔ yɛn bra; yedii yɛn honam akɔnnɔ akyi,+ na yɛyɛɛ nea yɛn honam ne yɛn nsusuwii kyerɛɛ yɛn.+ Afei nso, na yɛyɛ abufuw mma+ fi awo mu te sɛ wɔn a wɔaka no ara. 4 Nanso Onyankopɔn a ne mmɔborɔhunu dɔɔso+ no, esiane ɔdɔ kɛse a wada no adi akyerɛ yɛn+ nti, 5 bere mpo a na yɛawu wɔ mfomso mu+ no, ɔmaa yɛne Kristo nyaa nkwa; wɔnam adom so na agye mo. 6 Bio nso, Onyankopɔn ama yɛanya nkwa, na wama yɛn baabi a yɛbɛtena wɔ ɔsoro, efisɛ wama yɛne Kristo Yesu nyinaa ayɛ baako.+ 7 Onyankopɔn yɛɛ saa sɛnea ɛbɛyɛ a wiase a ɛreba* no mu no, n’ayamye* nti, obeyi n’adom bebrebe* no adi akyerɛ yɛn a yɛne Kristo Yesu ayɛ baako no.

8 Adom yi nti wɔnam gyidi so agye mo nkwa.+ Ɛnyɛ mo ara mo mmɔdenbɔ ntia, na mmom ɛyɛ Onyankopɔn akyɛde. 9 Daabi, ennyina nnwuma a obi yɛ so,+ sɛnea ɛbɛyɛ a obiara rennya biribi nnyina so nhoahoa ne ho. 10 Yɛyɛ Onyankopɔn nsa ano adwuma, na ɔbɔɔ yɛn+ wɔ Kristo Yesu mu+ sɛ yɛnyɛ nnwuma pa, nnwuma a Onyankopɔn hyɛ too hɔ sɛ yɛnyɛ no.*

11 Enti monkae sɛ bere bi a atwam no, na moyɛ amanaman mufo fi awo mu,* na wɔn a nnipa atwa wɔn twetia* a wɔfrɛ wɔn “twetiafo” no frɛɛ mo “momonotofo.”* 12 Saa bere no, na munnim Kristo; ná moyɛ nkurɔfo a wɔne Israel man no ntam atetew; bɔhyɛ no ho apam+ ahorow no nso, na monka ho. Afei nso, na mowɔ wiase no mu a munni anidaso biara, na na munnim Onyankopɔn.+ 13 Nanso mo a bere bi na mowɔ akyirikyiri no, afei mo ne Kristo Yesu ayɛ baako, na monam Kristo mogya so abɛn Onyankopɔn. 14 Kristo na wama yɛn asomdwoe,+ na wayɛ akuw abien no baako+ adwiriw ɔfasu a na etwa wɔn ntam no agu.+ 15 Ɔde ne nipadua bɛsɛee nitan no, kyerɛ sɛ, Mmara nsɛm a ahyɛde ahorow wom no, sɛnea ɛbɛyɛ a ɔbɛma akuw abien no nyinaa ne no abom ayɛ onipa foforo,+ na ɛde asomdwoe aba; 16 ɛno bɛma wafa asɛndua* no so asiesie akuw abien no ne Onyankopɔn ntam,+ na akuw no abom wɔ nipadua koro mu, efisɛ ɔde ne nipadua kum nitan no.+ 17 Na ɔbɛkaa asomdwoe ho asɛmpa kyerɛɛ mo a bere bi na mowɔ akyirikyiri ne wɔn a na wɔbɛn Onyankopɔn no, 18 efisɛ akuw abien no nyinaa, ɔno na yɛnam no so ba Agya no nkyɛn esiane honhom koro no nti.

19 Enti afei monyɛ ahɔho ne amamfrafo bio,+ na mmom mo ne akronkronfo a wɔaka nyinaa yɛ ɔman mma,+ na moyɛ Onyankopɔn fifo,+ 20 na moayɛ sɛ ɔdan a wɔasi wɔ fapem a ɛno ne asomafo ne adiyifo no so,+ na Kristo Yesu ankasa ne ntwea so bo titiriw no.+ 21 Yɛne no ayɛ baako, na ɔdan no ho biribiara akeka asi ani pɛpɛɛpɛ+ ma ɛreyɛ asɔrefi kronkron ama Yehowa.*+ 22 Waka mo ne Kristo abom ayɛ baako, na wɔresi mo nso abom ma ayɛ baabi a Onyankopɔn nam ne honhom so bɛtena.+

3 Me Paul, Kristo Yesu ne mo a moyɛ amanaman mufo no nti na meda afiase.+ 2 Ampa ara moate sɛ Onyankopɔn de adwuma+ ahyɛ me nsa sɛ memmoa mo na munnya n’adom no so mfaso. 3 Nea ɛte ne sɛ, Onyankopɔn ayi n’ahintasɛm kronkron no adi akyerɛ me, sɛnea madi kan akyerɛw mo ɛho asɛm kakra no. 4 Enti sɛ mokenkan saa asɛm yi a, mubehu sɛ mete Kristo ahintasɛm kronkron+ no ase. 5 Awo ntoatoaso a abɛsen kɔ mu no, wɔamma nnipa mma anhu ahintasɛm yi sɛnea seesei wɔnam honhom so ayi akyerɛ n’asomafo ne adiyifo kronkron no.+ 6 Ahintasɛm no ne sɛ asɛmpa no bɛma amanaman mufo ne Kristo Yesu abɛyɛ baako, na wɔn nso abɛyɛ adedifo* ne nipadua no akwaa,+ na wɔne yɛn nyinaa abom anya bɔhyɛ no mu kyɛfa. 7 Onyankopɔn adom nti, mebɛyɛɛ ahintasɛm yi ho somfo. Akyɛde yi, ɔde maa me de kyerɛɛ sɛnea ne tumi yɛ adwuma.+

8 Akronkronfo nyinaa mu no, me a mensɛ hwee koraa+ no, me na wɔde adom yi ama me+ sɛ menka Kristo nhyira a enni ano ho asɛmpa no nkyerɛ amanaman no, 9 na memma nnipa nyinaa nhu sɛnea Onyankopɔn a ɔbɔɔ nneɛma nyinaa no reda ahintasɛm kronkron no adi;+ saa ahintasɛm no, ahintaw wɔ Onyankopɔn mu fi teteete. 10 Ne saa nti, wɔnam asafo no so+ bɛma aban ne tumi a ɛwowɔ ɔsoro ahu Onyankopɔn nyansa a ɛda adi wɔ akwan pii so no.+ 11 Eyi ne daa atirimpɔw a ɔbɔɔ ne tirim sɛ ɔnam yɛn Awurade Kristo Yesu so bedi ho dwuma no hyia;+ 12 ɔno na yɛnam no so kasa a yensuro, na ne mu gyidi a yɛwɔ nti yetumi de ahotoso kɔ Onyankopɔn anim.+ 13 Enti mesrɛ mo, mommma ahohia a mo nti merehyia no mmmu mo abam, efisɛ anuonyam na ɛde bɛbrɛ mo.+

14 Eyi nti mibu nkotodwe wɔ Agya no anim; 15 ne hɔ na abusua biara a ɛwɔ ɔsoro ne asaase so nyaa ne din fii. 16 Mebɔ mpae sɛ n’anuonyam bebrebe nti, ɔde ne honhom no tumi bɛma mo koma ne mo adwene* anya ahoɔden,+ 17 na afei mo gyidi nti, Kristo atena mo komam na ɔdɔ nso atena mo mu.+ Mesrɛ nso sɛ mubegye ntini,+ na moatim wɔ fapem no so,+ 18 na mo ne akronkronfo nyinaa atumi ahu nokware no tɛtrɛtɛ, ne tenten, ne sorokɔ, ne sɛnea emu dɔ no yiye, 19 na moahu Kristo dɔ+ a ɛkyɛn nimdeɛ no, na su a Onyankopɔn de dom nnipa no ayɛ mo ma.

20 Nea ne tumi a ɛyɛ adwuma wɔ yɛn mu+ no nti, otumi yɛ ade ma ɛboro nea yɛsrɛ anaa yesusuw koraa no,+ 21 ɔno na anuonyam mfa asafo no ne Kristo Yesu so nka no daa daa wɔ awo ntoatoaso nyinaa mu. Amen.

4 Enti me a Awurade nti meda afiase+ no, mesrɛ mo sɛ mommɔ mo bra sɛnea ɛbɛyɛ a frɛ a wɔafrɛ mo no bɛfata mo.+ 2 Momfa ahobrɛase*+ nyinaa ne odwo ne abotare+ mmɔ mo bra, na obiara ne ne yɔnko ntena wɔ ɔdɔ+ mu, 3 na monyere mo ho denneennen nkura baakoyɛ a honhom no ama moanya no mu, na montena asomdwoe a aka mo abom no mu.+ 4 Nipadua baako na ɛwɔ hɔ+ ne honhom baako,+ sɛnea wɔafrɛ mo ama moabenya anidaso baako no;+ 5 yɛwɔ Awurade baako,+ gyidi baako, asubɔ baako, 6 Onyankopɔn baako a ɔyɛ yɛn nyinaa Agya; ɔno na odi obiara so, otumi de obiara yɛ adwuma, na ne tumi yɛ adwuma wɔ obiara mu.

7 Afei yɛn nyinaa anya Onyankopɔn adom, na egyina sɛnea Kristo asusuw akyɛde no de ama yɛn mu biara+ so. 8 Enti Kyerɛwsɛm no ka sɛ: “Bere a ɔforo kɔɔ ɔsoro no, ɔde nkoa kɔe; ɔde nnipa yɛɛ akyɛde+ maa asafo no.” 9 Sɛ ɛka sɛ ‘ɔforo kɔe’ a, ɛkyerɛ dɛn? Nea ɛkyerɛ ara ne sɛ osian baa fam nso, kyerɛ sɛ, asaase so. 10 Nea osianee no, ɔno ara nso na ɔforo kɔɔ+ baabi a ɛkorɔn kyɛn ɔsoro+ nyinaa sɛnea ɛbɛyɛ a ɔbɛma nneɛma nyinaa adi mũ.

11 Na wayɛ ebinom asomafo,+ ebinom adiyifo,+ ebinom asɛmpakafo,+ ebinom ahwɛfo* ne akyerɛkyerɛfo,+ 12 sɛnea ɛbɛyɛ a wobesiesie* akronkronfo ama ɔsom adwuma no, na wɔde ahyɛ Kristo nipadua no den,*+ 13 akosi sɛ yɛn nyinaa bɛyɛ baako wɔ gyidi ne Onyankopɔn Ba no ho nokware nimdeɛ mu, ayɛ ɔbarima mua,+ na yɛadi mu sɛ Kristo pɛpɛɛpɛ. 14 Enti mommma yɛnnkɔ so nnyɛ sɛ nkokoaa a nkyerɛkyerɛ* biara+ wosow wɔn biribiri te sɛ asorɔkye de wɔn di akɔneaba no; wɔn na wɔma nnipa de nnaadaa ne adɛfɛdɛfɛsɛm to wɔn brada. 15 Mmom momma yɛnka nokware na yennya ɔdɔ. Ɛba saa a yebenyin wɔ nneɛma nyinaa mu, na yɛayɛ sɛ Kristo a ɔne nipadua no ti+ no. 16 Ɛnam no so na nipadua kwaa biara yɛ nea ehia sɛnea ɛbɛyɛ a nipadua no nyinaa+ bɛkeka asi ani pɛpɛɛpɛ, na ayɛ adwuma abom. Sɛ kwaa biara yɛ n’adwuma yiye a, ɛma nipadua no nyin, na ɛyɛ den wɔ ɔdɔ mu.+

17 Enti nea meka na midi ho adanse wɔ Awurade mu ne sɛ, ɛnsɛ sɛ mokɔ so nantew sɛnea amanaman no nantew+ wɔn adwenhunu* mu+ no bio. 18 Wɔn adwene aduru sum, na wɔatwe wɔn ho afi nkwa a Onyankopɔn de ma no ho, efisɛ wonni nimdeɛ na wɔn koma apirim. 19 Esiane sɛ wɔn ahonim* awu nti, wɔde wɔn ho maa ahohwibra*+ na wodii wɔn akɔnnɔ akyi,* na wɔde wɔn ho hyɛɛ ɔbra fĩ* nyinaa bi mu.

20 Nanso mo de, moansua sɛ saa na Kristo te, 21 efisɛ ampa ara motee ne nsɛm, na wɔnam no so kyerɛkyerɛɛ mo sɛnea nokware a ɛwɔ Yesu mu no te. 22 Wɔkyerɛɛ mo sɛ munyi suban dedaw no ngu;+ suban a kan na mowɔ mu a nnaadaa akɔnnɔ resɛe no+ no. 23 Na momma wɔnkɔ so nyɛ mo adwene* foforo,+ 24 na monhyɛ suban foforo+ a Onyankopɔn bɔɔ no sɛnea ɔpɛ no; suban a egyina trenee ne nokwaredi a edi mũ so no.

25 Enti afei a moayi nkontompo agu yi, mo mu biara nka nokware nkyerɛ ne yɔnko,+ efisɛ yɛn nyinaa yɛ akwaa a ɛbom yɛ nipadua baako.+ 26 Mo bo mfuw, nanso monnyɛ bɔne;+ mommma abufuw no nntena hɔ nnkosi sɛ owia bɛtɔ;+ 27 mommma Ɔbonsam kwan.+ 28 Mma ɔkorɔmfo nnwia ade bio, na mmom ɔnyɛ adwumaden, na ɔmfa ne nsa nyɛ adwuma pa.+ Ɛno bɛma wanya biribi ama nea ahia no.+ 29 Mommma asɛm a aporɔw mmpue mmfi mo anom,+ na mmom monka nsɛm a ɛfata na ɛhyɛ nkurɔfo den. Ɛno bɛma wɔn a wotie no anya so mfaso.+ 30 Bio nso, monnhow Onyankopɔn honhom kronkron no werɛ;+ ɛno na wɔde ahyɛ mo nsow+ ama da a wɔnam agyede so begye mo no.+

31 Munyi eyinom nyinaa mfi mo mu: ɔtan biara,+ abufuw, koko bɔne, nkekawmu, abususɛm,+ ne biribiara a enye.+ 32 Mmom no, obiara nna ayamye adi nkyerɛ ne yɔnko, nnya ayamhyehye+ mma ne yɔnko, na munyi mo yam mfa mo yɔnko bɔne nkyɛ no, sɛnea Onyankopɔn nam Kristo so yii ne yam de mo bɔne kyɛɛ mo+ no.

5 Enti munsuasua Onyankopɔn,+ efisɛ moyɛ ne mma a ɔdɔ mo, 2 na monkɔ so nnantew ɔdɔ mu+ sɛnea Kristo nso dɔɔ yɛn*+ na ɔde ne nkwa too hɔ maa yɛn* no; ɔde ne ho yɛɛ ayɛyɛde ne afɔre huamhuam maa Onyankopɔn.+

3 Aguamammɔ* ne ɔbra fĩ* biara anaa adifudepɛ* de, mommma wɔmmmɔ so mpo wɔ mo mu,+ efisɛ ɛmfata nnipa kronkron;+ 4 ɛmfata nso sɛ aniwude, ahuhusɛm anaa nsɛnkwaa a kasafĩ wom+ kɔ so wɔ mo mu. Mmom no, momfa aseda mma Onyankopɔn.+ 5 Na munim eyi, na mo ara mugye tom sɛ, oguamammɔfo* biara+ anaa obi a ɔde ne ho hyɛ ɔbra fĩ* mu anaa odifudepɛfo biara,+ kyerɛ sɛ, ɔbosonsonni, rennya kyɛfa biara wɔ Kristo ne Onyankopɔn Ahenni mu.+

6 Mommma obi mmfa nsɛnhunu nnnaadaa mo, na saa nneɛma no nti na Onyankopɔn abufuw reba asoɔden mma so. 7 Enti monhwɛ na moankodi wɔn akyi; 8 na kan no na moyɛ sum, nanso afei de moyɛ hann,+ efisɛ moyɛ Awurade dea.+ Monkɔ so nnantew sɛ hann mma, 9 efisɛ aba a hann sow ne papayɛ, trenee, ne nokware nyinaa.+ 10 Monhwɛ nhu sɛ nea moyɛ nyinaa sɔ Awurade ani;+ 11 nnwuma funu a wɔyɛ wɔ sum mu no, ɛnsɛ sɛ mode mo ho hyɛ mu,+ na mmom mompa ho ntama. 12 Nneɛma a wɔyɛ wɔ sum ase no, ɛyɛ aniwu mpo sɛ yɛbɛka ho asɛm. 13 Na nneɛma a wɔma ɛda adi* nyinaa, hann na ɛma ɛda adi, efisɛ biribiara a wɔda no adi no yɛ hann. 14 Enti Kyerɛwnsɛm no ka sɛ: “O wo a woada, sɔre, na nyan fi owu mu,+ na Kristo bɛma woahu hann.”+

15 Enti monhwɛ mo abrabɔ yiye paa na sɛnea monantew no anyɛ sɛ wɔn a wonnim nyansa na mmom sɛ anyansafo, 16 na momfa mo bere nyɛ nneɛma a ɛho hia,*+ efisɛ nna yi yɛ nna bɔne. 17 Eyi nti monnyɛ nnipa a wonni adwene, na mmom monkɔ so mpɛɛpɛɛ mu nhu Yehowa* apɛde.+ 18 Afei nso, mommmow nsã,*+ efisɛ ɛma nnipa yɛ basabasa; mmom monkɔ so mma honhom no nhyɛ mo ma. 19 Obiara mfa nnwonto ne ayeyi ne nnwom kronkron nkasa nkyerɛ ne yɔnko,* na monto nnwom+ na munyi Yehowa* ayɛ+ mo koma mu.+ 20 Daa monna yɛn Nyankopɔn ne yɛn Agya ase+ biribiara mu wɔ yɛn Awurade Yesu Kristo din mu.+

21 Esiane sɛ musuro Kristo nti, obiara mmrɛ ne ho ase mma ne yɔnko.+ 22 Ɔyerenom, mommrɛ mo ho ase mma mo ankasa mo kununom+ te sɛ nea moreyɛ ama Awurade, 23 efisɛ ɔyere ti ne ne kunu,+ sɛnea asafo no ti ne Kristo+ no; ɔno ne nipadua yi agyenkwa. 24 Enti sɛnea asafo no brɛ ne ho ase ma Kristo no, saa ara na ɔyerenom nso nyɛ mma wɔn kununom wɔ biribiara mu. 25 Okununom, monkɔ so nnɔ mo yerenom+ sɛnea Kristo nso dɔɔ asafo no na ɔde ne nkwa too hɔ maa asafo no,+ 26 sɛnea ɛbɛyɛ a ɔde asɛm no bɛyɛ nsu ahohoro asafo no ho atew ho.+ 27 Ɛno bɛma asafo no ho aba nyam wɔ n’ani so, a nkekae anaa mpomponoe anaa biribiara saa nni ho,+ na mmom ayɛ kronkron a dɛm biara nni ho.+

28 Saa ara na ɛsɛ sɛ okununom dɔ wɔn yerenom sɛ wɔn ankasa nipadua. Nea ɔdɔ ne yere no dɔ ne ho, 29 na onipa biara ntan n’ankasa nipadua;* mmom ɔhwɛ so yiye na n’ani ku ho sɛnea Kristo nso yɛ asafo no, 30 efisɛ yɛyɛ ne nipadua akwaa.+ 31 “Eyi nti na ɔbarima begyaw ne papa ne ne maame hɔ na ɔde ne ho akɔbata* ne yere ho, na wɔn baanu no ayɛ ɔhonam koro.”+ 32 Ahintasɛm kronkron+ yi so. Nea mereka ho asɛm yi fa Kristo ne asafo no ho.+ 33 Nanso mo mu biara nnɔ ne yere+ sɛ ne ho; na ɔyere de, onnya obu kɛse mma ne kunu.+

6 Mma, muntie mo awofo asɛm+ sɛnea Awurade pɛ, na eyi na ɛteɛ. 2 “Di wo papa ne wo maame ni”;+ eyi ne mmara a edi kan a bɔhyɛ yi ka ho: 3 “Ebesi wo yiye,* na woatena ase akyɛ wɔ asaase so.” 4 Agyanom nso, monnhyɛ mo mma abufuw,+ na mmom monkɔ so ntete wɔn Yehowa* nteɛso+ ne ne kasakyerɛ*+ mu.

5 Nkoa, momfa osuro ne ahopopo a efi koma nyinaa mu ntie mo wuranom a wɔwɔ asaase so,*+ sɛnea moreyɛ ama Kristo, 6 ɛnyɛ bere a nnipa rehwɛ mo nko, na ankɔyɛ sɛ nea moresɔ nnipa ani,*+ na mmom sɛ Kristo nkoa a wɔde wɔn kra* nyinaa yɛ Onyankopɔn apɛde.+ 7 Monyɛ nkoa a mode suban pa som te sɛ nea moreyɛ ama Yehowa,*+ na ɛnyɛ nnipa, 8 na munim sɛ papa a obiara bɛyɛ no, ɔyɛ akoa oo, ɔdehye oo, obenya so akatua afi Yehowa* hɔ.+ 9 Mo awuranom, mo nso monkɔ so nyɛ wɔn saa ara, na munnhunahuna wɔn, efisɛ munim sɛ wɔne mo nyinaa Wura wɔ soro,+ na ɔnyɛ animhwɛ.

10 Afei, momma Awurade mfa n’ahoɔden kɛse no nhyɛ mo den.+ 11 Nneɛma a Onyankopɔn de ama yɛn sɛ yɛmfa nkɔ ɔko no, momfa ne nyinaa nhyehyɛ mo ho,+ na moatumi agyina pintinn ako atia Ɔbonsam nnɛɛdɛe; 12 efisɛ ɛnyɛ yɛne mogya ne ɔhonam na ɛredi asi,*+ na mmom yɛne aban ahorow, atumfo, wiase yi sum mu mpanyimfo, ne ahonhommɔne dɔm+ a wɔwɔ soro. 13 Eyi nti nneɛma a Onyankopɔn de ama yɛn sɛ yɛmfa nkɔ ɔko no, momfa ne nyinaa nhyehyɛ mo ho,+ na sɛ da bɔne no ba a, moatumi ako, na mototo biribiara wie a, moagyina hɔ pintinn.

14 Enti munnyina hɔ pintinn na momfa nokware nyɛ abɔso* mmɔ mo asen,+ na momfa trenee nyɛ nkatabo,+ 15 na momfa asomdwoe asɛmpa no nyɛ mpaboa, na monyɛ krado nkɔka asɛm no.+ 16 Ne nyinaa da nkyɛn a, momfa gyidi kyɛm kɛse no;+ ɛno na mubetumi de adum ɔbɔnefo no agyan* a ɛredɛw no nyinaa.+ 17 Afei nso, monhyɛ nkwagye dade kyɛw+ na momfa honhom no sekan a ɛne Onyankopɔn asɛm+ no, 18 na momfa mpaebɔ+ ne nkotosrɛ nyinaa bi mmɔ mpae bere nyinaa wɔ honhom no tumi so.+ Ne saa nti, monwɛn daa na monkɔ so nsrɛ mma akronkronfo nyinaa. 19 Me nso mommɔ mpae mma me, na sɛ mibue m’ano a, matumi aka nsɛm a ɛfata, na mede ahotoso aka ahintasɛm kronkron a ɛfa asɛmpa no ho akyerɛ nkurɔfo;+ 20 saa asɛmpa yi, meyɛ ho ɔnanmusini*+ a meda afiase. Mepɛ sɛ mitumi de akokoduru ka ho asɛm sɛnea ɛsɛ sɛ meka no.

21 Afei nea ɛbɛyɛ na mo nso moate me ho asɛm ahu nea ɛrekɔ so no, onua dɔfo Tikiko+ a ɔyɛ ɔsomfo nokwafo Awurade mu no bɛka biribiara akyerɛ mo.+ 22 Eyi ara nti na meresoma no mo nkyɛn, na moate yɛn nka na wama mo koma atɔ mo yam.

23 Asomdwoe nka anuanom na wonnya ɔdɔ ne gyidi mfi Agya Onyankopɔn ne Awurade Yesu Kristo hɔ. 24 Wɔn a yɛn Awurade Yesu Kristo ho dɔ a wɔwɔ nsa da no, adom nka wɔn nyinaa.