Hokwan A Wowɔ Sɛ Wubekari Asiane Ne Mfaso Horow A Ɛwɔ So Ahwɛ

WO NIPADUA yɛ wo de. Wo nkwa yɛ wo de. Ebia ɛte sɛ nea nsɛm yi yɛ nea wote ase yiye, nanso ɛkyerɛ sɛ hokwan a wowɔ no yɛ nea ɛka aduru a wɔde bɛyɛ wo no. Ɛno ne hokwan a wowɔ sɛ wubesi nea wɔde bɛyɛ wo no ho gyinae. Nnipa pii de saa hokwan yi di dwuma denam obi foforo adwene a wobisa na afei wɔasi gyinae no so; afoforo pow aduruyɛ pɔtee bi. Nhwehwɛmu bi a Ɔbenfo Loren H. Roth yɛe wo 1938 mu no daa no adi sɛ, ‘ayarefo a wogu ayaresabea ɔha biara mu 20 pow aduruyɛ.’

Nanso sɛ anka woyare anaa woapira a, wobɛyɛ dɛn atumi asi gyinae? Esiane sɛ wonyɛ oduruyɛfo nti, wobɛyɛ dɛn ahu aduruyɛ a eye sen biara? Mpɛn pii no, yɛdan kɔ abenfo, nnuruyɛfo a wɔn ho akokwaw a wɔwɔ osuahu na ɛyɛ wɔn pɛ sɛ wɔbɛboa nnipa no nkyɛn. Ɛsɛ sɛ oduruyɛfo ne ɔyarefo no nyinaa kari “asiane ne mfaso a ɛwɔ so no hwɛ.” Ɛno ne dɛn?

Ma yɛmfa no sɛ woyare wo nkotodwe. Oduruyɛfo bi kamfo oprehyɛn a wobɛyɛ kyerɛ wo. Nanso asiane ahorow bɛn na ɛwɔ aduru bi a ɛma wo nipadua no yɛ sɛnea awu ne oprehyɛn no mu, anaa asiane ahorow bɛn na ɛbɛba wɔ sɛnea wo nan no bɛyɛ akyiri yi no mu? Wɔ ɔkwan foforo so no, dɛn ne mfaso ahorow a ebetumi aba, ne titiriw no nea ebetumi aba wɔ wo fam no ho? Bere a wɔakyerɛkyerɛ asiane ne mfaso a ɛwɔ ho no mu no, wowɔ hokwan sɛ wusi gyinae; sɛ woapene so anaa worepow saa aduruyɛ no.

Asiane ne Mfaso Horow a Wubekari Ahwɛ

Susuw kari a wubekari asiane ne mfaso a ɛwɔ so no ho ahwɛ wɔ tebea a ɛyɛ paara mu no ho, nea ɛfa Giuseppe ne Consiglia Oneda ho a yɛadi kan aka ho asɛm no he hwɛ.

Na wɔn babea a wɔfrɛ no Isabella yaredenneennen, na nnuruyɛfo kamfo kyerɛe (hyɛe mpo) sɛ wɔmma no mogya wɔ bere ne bere mu, N’awofo a wɔwɔ ɔdɔ no pow eyi esiane Bible mu mmara ho nimdeɛ a wɔwɔ nti. Nanso ɔkwan bɛn so na kari a wobɛkari pɛ wɔ asiane ne mfaso a ɛwɔ ho no mu no betumi anya nneɛma so tumi?

Ɛnnɛ, nnipa pii susuw sɛ mogya a wɔde ma ayarefo yɛ aduruyɛ a asiane nni ho na etu mpɔn. Nanso ɛnsɛ sɛ yɛn werɛ fi sɛ wɔ afeha a ɛto so 17 no mu no, na asuan yɛ nea wɔde di dwuma de sa mpanyimfo ne mmofra nyinaa yare, na na mpɛn pii owu tumi fi mu ba. Asɛm bɛn na anka ebesi wɔ saa bere no mu, sɛ ɔwofo bi paw sɛ ɔremma wɔmfa asuan nni dwuma nsa ne ba yare a?

Asuan aba so ‘pɛn; mprempren nnuruyɛfo pene mogya a wɔde ma nkurɔfo so. Ɛwom sɛ nnuruyɛfo ayɛ pii wɔ nnansa yi mfe yi mu de, nanso ɛsɛ sɛ wohu sɛ asiane wɔ mogya a wɔde ma nkurɔfo no mu, ɔbenfo Joseph Bove (a ɔyɛ Amerika Mogya Korabea Fekuw no boayikuw a ɛhwɛ nyarewa a wonya fi mogya mu nsɛm so titrani no) kae nnansa yi sɛ mmerɛbo mu yare a wonya fi mogya mu no ho asɛm sɔree nea edi kan wɔ 1943 mu. Ɔde kaa ho sɛ:

“Mprempren, bɛyɛ mfirihyia 40 akyi no, mmerɛbo mu yare a wonya denam anyɛ yiye koraa no, mogya mu nyarewa ahorow anan so no yɛ mogya a wɔde ma nkurɔfo mu asiane a wɔahu, na nsanyare afoforo pii yɛ nea wɔaka ho asɛm sɛ ɛyɛ nea wonya fi mogya ne nneɛma a wɔde mogya ayeyɛ mu.”​—The New England Journal of Medicine, January 12, 1984.

Sɛ ɛba sɛ wokari nsɛm a ɛfa wo akwahosan ne nkwa ho, anaa nea ɛfa w’abusua de ho hwɛ a, anka ɔyare ahorow a ɛtete sɛɛ yɛ hu dɛn? Nnuruyɛfo mpo rentumi nkyerɛ, efisɛ nyarewa a ɛtete sɛɛ betumi akum obi bere a wɔde mogya ama no no akyi bere tenten. Fa mmerɛbo mu yare biako,a wɔfrɛ no borɔfo mu hepatitis (B) a wɔatumi asiw ano fã ne fã bi no sɛ nhwɛso. Nsɛm ho amanneɛbɔ bi (January 10, 1984) kae sɛ:

“Sɛnea Nyarewa a Wosiw Ano Dwumadibea a ɛwɔ Atlanta kyerɛ no, mmerɛbo mu yare yi yɛɛ Amerikafo bɛyɛ 200,000 wɔ 1982 mu; wɔde nnipa 15,000 koguu ayaresabea esiane wɔn yare no mu a ɛyɛɛ den nti, na 112 wuwui. Wɔn mu 4,000 foforo wuwui esiane nyarewa ahorow a wontumi nsa a ɔyare no de bae nti.

Afoforo a wɔwɔ Italy, Germany, Japan ne mmeae afoforo baahe na mmerɛbo mu yare a ɛnam mogya a wɔde ma nkurɔfo so ba akunkum wɔn? Yiw, wu a nnipa wuwu esiane mogya a wɔde ma wɔn nti no yɛ asiane kɛse a ɛsɛ sɛ wosusuw ho.

Bio nso no, wɔ kari a wɔkari asiane ne mfaso a ɛwɔ mogya a wɔde ma nkurɔfo mu hwɛ no mu no, asiane a ɛwɔ mu no renya nkɔanim. Ɔbenfo Giorgio Veneroni (a ɔwɔ Milan) kae wɔ May 1982 mu sɛ: “Bere a yɛn nimdeɛ renya nkɔanim no, yehu asiane ahorow pii wɔ obi mogya a ɛne ne de di nsɛ a wɔde ma no mu no.” Ade biako a wɔahu a ɛma nnuruyɛfo suro ne ɔyare foforo bi a wɔfrɛ AIDS a nipadua no ntumi nko ntia a ekum nnipa ntɛmntɛm no. Ɔbenfo Bove kɔɔ so sɛ:

“Wɔ wɔn a wogye mogya fam no, ɛsɛ sɛ nnuruyɛfo de asiane a ɛwɔ mogya a wɔde ma nkurɔfo mu no toto mfaso a wɔhwɛ kwan sɛ ebefi mu aba no ho hwɛ.’ Eyi nyɛ adwene foforo, nanso ɛho abehia kɛse esiane sɛ obiara nni hɔ a obetumi ahyɛ ɔyarefo a wahaw no bɔ sɛ ɔrennya AIDS mfi mogya a wɔde ama no no mu nti.”

Nnuruyɛfo ne Oneda abusua no ansusuw asiane a ɛte saa ho wɔ 1978 mu; na wonnim ɛno saa bere no. Nanso mprempren yi de yenim. So ɛnsɛ sɛ asiane kɛse a ɛwɔ mogya a wɔde ma nkurɔfo mu ho nimdeɛ a ɛte sɛɛ ma kasa a wɔkasa tia Oneda abusua no gyinae a wosii no yɛ kakraa bi?

Ɛsɛ Sɛ Awofo Kari Asiane ne Mfaso a Ɛwɔ So Hwɛ

Sɛ́ ɔpanyin no, wowɔ hokwan sɛ wukari asiane ne mfaso ahorow a ɛwɔ mogya a wɔde ma nkurɔfo, ne aduruyɛ biara ho hwɛ. “Wobu ɔpanyin biara sɛ ɔfata sɛ ɔyɛ ne nipadua no wura. Ebia obetumi de adi dwuma wɔ nyansa mu anaa wɔ ɔkwan a nyansa nni mu so. Ebia obetumi apow ayaresa a ebegye no nkwa mpo, na ɛno nyɛ obiara asɛm. Nokwarem no, ɛnyɛ ɔman no asɛm.” (Willard Gaylin, M. D., a ɔyɛ Hasting Dwumadibea no titrani no) Nanso hena na ɔbɛkari asiane ne mfaso horow a ɛwɔ ho no ahwɛ ama abofra?

Osuahu kyerɛ sɛ ɛyɛ awofo a wɔwɔ ɔdɔ no. Sɛ nhwɛso no, dɛn na wobɛyɛ bere a wo ba nipadua mu akwaa bi a ɛwɔ ne menewa mu ahon na wɔkyerɛ sɛ wɔbɛyɛ no oprehyɛn no. So wobɛpɛ sɛ wubehu asiane anaa mfaso horow a ɛwɔ akwaa no a wobetwa afi hɔ no ho? Nea edi hɔ no, wubetumi de ɛno atoto asiane anaa mfaso a ɛwɔ aduru a ekum nipadua mu nyarewa a wɔnam so de sa yare no ho nsɛm a wo nsa aka so no ho. Afei wubetumi asi gyinae sɛnea awofo pii ayɛ no.

Hwɛ tebea a emu yɛ den yi. Nnuruyɛfo ma wotee awerɛhosɛm bi a ɛne sɛ akisikuru bi a wontumi nsa aka wo ba a wodɔ no no. Wɔka sɛ wɔbɛma no aduru bi a ano yɛ den a etumi kunkum mmoawa nketenkete yi a wɔde ɔyare yi ba no, nanso aduru no bɛma wo ba no ayare kɛse na ɛkame ayɛ sɛ yɛ a ɛbɛyɛ yiye sɛ wɔbɛsa saa ɔyare yi wɔ saa bere yi mu no ho yɛ den. So worennya hokwan sɛ wubesi eyi ho gyinae a ɛtwa to?

Yiw, ne mmuae a wubenya afi asɛm bi a Ɔbenfo Terrenee F. Ackerman kyerɛwee no mu.a Ogye toom sɛ wɔagye ahyɛde ahorow pii afi asennibea esiane ka a wɔka sɛ ɛsɛ sɛ ɔman no bɔ mmofra ho ban nti. Nanso wɔ nsɛm no pii mu no, M.D. Anderson Hospital and Tumor Institute a agye din no dii ‘nhyehyɛe a ɛne sɛ wɔrennye ahyɛde a efi asennibea a ɛhyɛ sɛ wɔmfa mogya mma obi’ akyi. Dɛn ntia? Ne fã bi ne sɛ, efisɛ “ɔyare a emu yɛ den na abɔ saa mmofra yi mu biara, na yɛrentumi nka sɛ ne ho bɛtɔ no.” So na ɛno nyɛ nokware nso wɔ Isabella fam?

Ackerman sii bo a “obu a wobenya ama tumi a awofo wɔ sɛ wɔbɛyɛn wɔn mma wɔ ɔkwan a wosusuw sɛ ɛfata so no som so dua.” Ɔkyerɛɛ mu sɛ: “Ɛyɛ nokwasɛm a ɛwɔ mmofra aduruyɛ mu sɛ, oduruyɛfo no wɔ abrabɔ mu asɛyɛde bi sɛ ɔbɛboa awofo ne abusuafo no. Sa a wɔbɛsa yare bi a emu yɛ den a abɔ abofra no de dadwen kɛse to awofo so. Sɛ ɛba sɛ awofo ma eyi haw wɔn ka nea wogye di sɛ ɛyɛ Onyankopɔn mmara a wɔato no ho a, ɛbɛma tumi a wobetumi adi wɔn asɛyɛde ho dwuma no ayɛ den bio. Bio nso, abusua no yiyedi ka abofra a ɔyare no yiyedi tẽe.”

Akwan Afoforo a Wɔfa So

Sɛnea ɛbɛyɛ a wɔbɛkwati asiane ahorow a ɛwɔ mogya a wɔde ma mu no, nnuruyɛfo fa akwan afoforo bi so yɛ oprehyɛn a mogya ho nhia kɛse. Nokwarem no, Adansefo no gyinae a wɔasi wɔ mogya ho no ahyɛ nhwehwɛmu a ɛte sɛɛ ho nkuran. Wɔ 1983 awiei no, atesɛm nkrataa a ɛwɔ United States kaa amanneɛbɔ bi a wɔde too gua wɔ American Heart Association nhyiam bi ase no ho asɛm: Wɔamfa mogya anni dwuma wɔ mmofra 48 a wɔadi fi asram abiɛsa kosi mfe awotwe a wɔyɛɛ wɔn koma oprehyɛn no mu. Wɔma ɔyarefo no aduru bi ma ne ho yɛ nwini sɛnea ɛsɛ na wɔde nnuru ahorow bi a ɛte sɛ nsu fra ne mogya mu. Nanso wɔamfa mogya biara amma wɔn. Mfiase no na wɔnam saa kwan yi so yɛ Yehowa Adansefo mma nkutoo oprehyɛn. Bere a nnuruyɛfo no hui sɛ Adansefo mma no nya nkwa bere a wɔyɛ wɔn oprehyɛn a ɛte sɛɛ sen wɔn a wɔnam ɔkwan a wɔtaa fa so no so yɛ wɔn oprehyɛn no, wosiigyinae sɛ wɔbɛfa saa kwan no so ayɛ wɔn ayarefo nyinaa oprehyɛn.

Ɛyɛ nea yɛte ase sɛ nyarewa ahorow bi wɔ hɔ a nnuruyɛfo susuw sɛ mogya a wɔde bɛma wɔ yare no a wɔbɛsa mu no yɛ nea worentumi nkwati. Nanso yebetumi aka ma afata sɛ: (1) Nnuruyɛfo pii mpo gye tom sɛ wɔ nyarewa ahorow a wogye di sɛ mogya a wɔde bɛma ho hia kɛse wɔ sa a wɔbɛsa mu no yɛ nea wɔntaa nhu bi; (2) su a enye bi wɔ hɔ a ɛne mogya a wɔde bɛma bere a ɛho nhia; (3) asiane ahorow a ɛwɔ mogya a wɔde ma mu no mma entumi nyɛ yiye sɛ wɔbɛyɛ katee wɔ asiane ne mfaso a ɛwɔ ho a wokari hwɛ no mu. Enti ayaresabea ahorow bɔ amanneɛ sɛ wɔn a wɔnyɛ Yehowa Adansefo mpo ka sɛ wɔmpɛ mogya.

Anidaso Wɔ Hɔ Daakye

Nea ɛyɛ anigye no, wɔretwe adwene asi hokwan ahorow ne obu a obi wɔ no so kɛse. Aman ahorow a wɔn ani abue te sɛ Italy rebɔ mmɔden sɛ wobɛma obi anya ahofadi kɛse, a ahofadi a obi wɔ sɛ obesi nnuruyɛ ho gyinae a egyina ho asɛm a wonim so ka ho. Nhomawa bi a Amerika Nnuruyɛfo Fekuw no tintimii kyerɛ mu sɛ: “Ɛsɛ sɛ ɔyarefo no na osi gyinae a etwa to sɛ ebia ɔbɛsɔ aduruyɛ anaasɛ oprehyɛn a oduruyɛfo no akamfo akyerɛ no ahwɛ anaasɛ ɔbɛtra ase a ɔmma wɔnnyɛ no aduru no. Ɛno ne hokwan a onipa no wɔ, na ɛno nso na mmara no ma ho kwan.”

Eyi nso ho hia wɔ mmofra fam. Sɛ woyɛ ɔwofo a, ɛsɛ sɛ wunya kyɛfa wɔ aduruyɛ ho gyinaesi ahorow a ɛfa wo mma ho mu. Atemmufo bagua bi a ɛwɔ United States kyerɛwee wɔ “Guides to the Judge in Medical Orders Affecting Children” mu sɛ:

“Sɛ ɛba sɛ ɛsɛ sɛ wɔpaw ɔkwan a wɔfa so sa yare​—sɛ nhwɛso no, sɛ oduruyɛfo kamfo ɔkwan bi a wɔfa so sa yare bi kyerɛ a ɛyɛ nea eye na mfaso kɛse wɔ so nanso awofo no mpene ɛno so, na awofo no pene ɔkwan bi a sɛ wɔfa so a ebia ɛrenyɛ yiye kɛse so a,​—ɛsɛ sɛ oduruyɛfo no de aduruyɛ a asiane wɔ ho nanso awofo no pene so no di dwuma.”

Afotu a ɛte sɛɛ betumi ayɛ nea ntease wom kɛse, sɛ wuhu hokwan a wowɔ​—yiw wo asɛyɛde​—sɛ wo nsa bɛka aduruyɛ ho nsɛm a edi mu no a. Mpɛn pii no, ɛyɛ nea nyansa wom sɛ wubenya ho adwene foforo bio. Bisa akwan horow a wobetumi afa so adi aduruyɛ ho ɔhaw ho dwuma ne asiane ne mfaso ahorow a ebetumi aba wɔ aduruyɛ no mu biara ho. Afei, bere a woahu asiane ne mfaso a ɛwɔ ho no, wubetumi asi aduruyɛ ho gyinae a egyina ho nsɛm a wunim so. Mmara no kyerɛ sɛ wowɔ saa hokwan no. Onyankopɔn ne w’ahonim ka kyerɛ wo sɛ, wowɔ saa asɛyɛde no.

[Box on page 18]

“Na ɔkra teasefo biara a ɛka ne ho baabiara a asu a ɛboro so yi bɛkɔ hɔ no benya nkwa na emu nam bɛdɔɔso bebree pa, efisɛ nsu yi bɛkɔ hɔ, na wɔasa po no nsu yare, na ade nyinaa anya nkwa, nea asu no kɔ. Na apopofo begyina so, efi En-Gedi kosi En-Eglaim bɛyɛ asawu hatabea; emu mpataa bɛyɛ ahorow, sɛ ɛpo kɛse mu nam bebree pa. Ɛho dontori ne atɛkyɛ de, wɔrensa, wɔde bɛma ayɛ nkyene. Na nsu no kɔn so ha ne ha na nnua a wodi ahorow nyinaa befifi; n’ahaban rempo, na n’aba rensã, ɛbɛsosow n’asram so, efisɛ ne nsu no, kronkronbea na efi sen; na n’aba bɛyɛ aduan, na n’ahaban ayɛ aduru.​—Hesekiel 47:9-12.

[Ase hɔ nsɛm]