Asemmisa Afã

◼ Ɔkwan bɛn na ɛsɛ sɛ wɔfa so bere a wɔde tirimbɔ ahorow reto asafo no anim no?

Tirimbɔ ho hia bere a ɛsɛ sɛ wosi nneɛma a ɛho hia te sɛ agyapade a wɔbɛtɔ, Ahenni Asa a wobesiesie no anaa wobesi, ntoboa titiriw a wɔde bɛmana Asafo ti no, anaa ɔmansin sohwɛfo hwɛ ho gyinae no. Mpɛn pii no ɛyɛ papa sɛ wɔde tirimbɔ bi bɛto asafo no anim ma wɔapene so bere biara a wɔde asafo no sika yɛ ade no.

Ɛho renhia sɛ wɔyɛ saa wɔ ahiade atitiriw bi a ɛfa nnwuma anaa dwumadi a ɛho hia ho tẽẽ no ho. Sɛ nhwɛso no, ebia asafo no bɛbɔ wɔn tirim pɛnkoro sɛ wobeyi sika pɔtee bi ɔsram biara de ama Asafo ti no de aboa Ahenni adwuma. Afei nso, enhia sɛ wɔyɛ tirimbɔ wɔ Ahenni Asa ho ka a wotua daa, te sɛ nkanea, nsu ne nea wɔde siesie so no ho.

Sɛ tirimbɔ ho hia a, ɛsɛ sɛ mpanyimfo kuw no susuw asɛm no ho fefeefe. Sɛ wɔn mu dodow no ara pene so sɛ ehia sɛ wɔyɛ biribi a, ɛsɛ sɛ mpanyimfo no mu biako, ebia Asafo Ɔsom Boayikuw no muni kyerɛw tirimbɔ de to asafo no anim wɔ Ɔsom Nhyiam ase.

Ɛsɛ sɛ ɔpanyin a ɔyɛ tirimbɔ no ho guamtrani no fa ɔkwantiaa so kyerɛkyerɛ nea wohia ne nea mpanyimfo kuw no kamfo kyerɛ sɛ wɔnyɛ mfa nni ho dwuma no mu pefee. Afei wɔbɛma asafo no hokwan ma wɔabisa nsɛm a ɛho hia. Sɛ asɛm no ho gyinaesi yɛ den a, ebia ɛbɛyɛ papa sɛ wɔtwɛn kosi Ɔsom Nhyiam a edi hɔ no na ama obiara anya bere de asusuw ho ansa na wɔatow aba no. Wɔtow aba no ankasa denam nsa a wɔma so kyerɛ so.

Asafo no mufo a wɔahyira wɔn ho so abɔ asu nkutoo na wotumi tow tirimbɔ ho aba no. Ɛmfata sɛ Adansefo afoforo a wofi asafo afoforo mu tow bi.

Sɛ wogye tirimbɔ no tom a, ɛsɛ sɛ wɔkyerɛw date wɔ so na mpanyimfo a wɔredi ho dwuma no de wɔn nsa hyɛ ase na wɔde to asafo no nneɛma mu.