So Ɛho Hia sɛ Mekɔ so Sakra Mu?

Yɛn Ahenni Som biara a ɛba no de Kyerɛwnsɛm mu nsɛm horow a yebetumi aka akyerɛ bere a yɛredi adanse no ma. Adawurubɔfo pii a wɔyɛ nnam pɛ sɛ wonya nsɛm foforo na wɔfa akwan afoforo so. Yɛn Ahenni Som no de nea wɔpɛ no ma denam nyansahyɛ pii a ɛde ma ɔsram biara no so.

Nanso, ebia wonte nka sɛ ɛho hia sɛ wɔkɔ so sakra nea wode di dwuma no. Ebia nnɔnhwerew kakraa bi pɛ na wunya ɔsram biara de yɛ afie afie adwuma no bi. Mfe a atwam no mu no, ebia woahyehyɛ nsɛm bi a woka kyerɛ a wote nka sɛ ɛyɛ mmerɛw sɛ wode bedi dwumadi, na ɛsow aba bere a wode di dwuma no. Ebia wode wo ho to kyerɛw nsɛm bi a wotaa de di dwuma so, a Dwom 37:9-11, 2 Petro 3:13, Adiyisɛm 21:4, ne afoforo ka ho. Sɛ saa a, ɛnyɛ nhyɛ sɛ wobɛsakra no mpɛn pii de foforo adi dwuma. Yɛn botae titiriw ne sɛ yɛbɛka Ahenni anidaso no akyerɛ afoforo aboa wɔn ma wɔahu nea ɛsɛ sɛ wɔyɛ na wɔanya Yehowa nhyira. Sɛ wuhu nsɛm a wɔka kyerɛ a ɛfata na ɛkanyan anigye wɔ Reasoning nhoma no mu a wopɛ sɛ wode bedi dwuma, na nnipa pii tie a, ntwentwɛn wo nan ase sɛ wode bedi dwuma.