Hokwan a Mmofra Wɔ
1 Awofo pii a wɔwɔ hɔ nnɛ no kae adwuma bi a, wɔn mmofraberem no, na wɔn ani gye ho kɛse bere a na wɔrenyin wɔ nokware no mu no—Nsɛmma Nhoma Kyekyɛ. Wofii saa adwuma no ase wɔ asafo biara mu wɔ 1949 mu. Na ɛsɛ sɛ obiara bɔ mmɔden de da koro wɔ dapɛn biara mu kɔkyekyɛ Ɔwɛn-Aban ne Nyan! wɔ mmɔnten so, afie afie, sotɔɔ ahorow mu, ne mmeae foforo. Na mmofra a wɔyɛ adawurubɔfo no titiriw wɔ ɔpɛ kɛse sɛ wɔbɛyɛ adwuma yi bi efisɛ na ɛbɛma wɔanya hokwan ayɛ adwuma koro no ara a mpanyimfo a wɔwɔ asafo no mu yɛ no bi. So na eyi te saa wɔ wo fam bere a na woyɛ abofra no?
2 Kyerɛ Wo Mma Sɛnea Wɔyɛ No: Mmofra nkumaa a wontumi mfi Kyerɛwnsɛm mu nkɔmmɔbɔ ase wɔ afie afie no mpo betumi de nsɛmma nhoma ama. Ɛhwehwɛ sɛ wosua sɛnea wɔbɛka nsɛm ntiatiaa de afi nkɔmmɔbɔ ase. Ebia nsɛmma nhoma no akyi mfonini ho asɛm kakraa bi a wɔbɛka no ara fata. Afiewuranom pii de anigye gye nsɛmma nhoma a yɛn mmofra no de ma no, na wɔtaa ka mmofra yi nokwaredi ne wɔn suban pa no ho asɛm. Ɛdenam mmoa kakraa bi a yɛde bɛma mmofra yi so no, wɔn nso betumi ayɛ adwuma yi bi, na wɔaboa ama Ahenni ho asɛm a yɛka no akɔ so. Ɛda adi sɛ bere a mmofra no renyin no, wɔn awofo bɛpɛ sɛ wɔbɛboa wɔn ma wɔn ho akokwaw kɛse wɔ adansedi adwuma no mu.
3 Manuel fii afie afie asɛnka ase bere a na wadi mfe abiɛsa. Na n’awofo kyerɛ no sɛnea ɔbɛka asɛntiaa de afi nkɔmmɔbɔ ase. Ɔne n’awofo yɛ asɛnka adwuma no denneennen, na ɔma nsɛmma nhoma, nhomawa, ne nkratawa pii. Odi nkurɔfo adanse wɔ bɔnnɔ so nso. Bere bi a n’awofo ne no kɔɔ ahomegyebea bi no, ɔbɔɔ mmɔden de nkratawa momaa nkurɔfo a na wɔwɔ hɔ no. Ɛwom sɛ Manuel da so ara yɛ abofra de, nanso sɛnea ɔbɔ asɛnka adwuma no ho mmɔden no hyɛ n’awofo ne asafo no mufo nyinaa nkuran ankasa.—Mmeb. 22:6.
4 Wɔakyerɛ wɔ 2000 Calendar of Jehovah’s Witnesses no so sɛ Memeneda biara yɛ “Nsɛmma Nhoma Kyekyɛ Da.” Awofo, yɛhyɛ mo nkuran sɛ munnya adwuma yi ho anigye, na mommoa mo mma ma wɔnyere wɔn ho nyɛ saa adwuma yi daa.