Boa Adawurubɔfo a Wɔyɛ Afoforofo
1 Yehowa nkurɔfo redɔɔso wɔ wiase nyinaa. Efi 1984 besi 1985 no, yenyaa adawurubɔfo afoforo 184,909 wɔ ɔsom adwuma no mu. Aman pii kɔ so bɔ adawurubɔfo a ɛsen biara foforo ho amanneɛ. Nnipa pii renya nkɔso wɔ nokware no mu. Henanom na wobetumi aboa afoforofo yi nyinaa ma wɔanyin abɛyɛ Kristofo a wɔn ho akokwaw?—Heb. 6:1.
2 Sɛnea ɛbɛyɛ a yebetumi aboa afoforo no, ɛsɛ sɛ yɛn ankasa yɛyɛ nnipa a wɔn ho akokwaw. Ɛsɛ sɛ “yeyi Yehowa anuonyam kyerɛ te sɛ ahwehwɛ.” (2 Kor. 3:18, NW) Yɛyɛ eyi denam ɔkwan a yɛfa so tra ase ne ɔkwan a yɛfa so ka nokware ahorow a yɛasua afa Yehowa atirimpɔw ahorow ho no ho asɛm kyerɛ nnipa afoforo no so. Enti ɛho hia sɛ yɛyɛ asomfo a wɔfata.—2 Kor. 3:5.
SO WOASIESIE WO HO SƐ WOBƐBOA?
3 So wowɔ adesua ho su pa a ebetumi ama woanya nimdeɛ a wo ne afoforo bɛkyɛ? Wo ho a wubesiesie ama nhyiam ahorow no nso bɛboa ma woatumi ayɛ adwuma pa yi. Ɛtɔ bere bi a, yɛn nyinaa ani sɔ mmoa a afoforo de ma yɛn no. Bere a Yesu somaa n’asuafo no baanu baanu no, wotumi hyehyɛɛ wɔn ho wɔn ho nkuran na wɔboaa wɔn ho wɔn ho wɔ adwuma a wɔyɛe wɔ wɔn asasesin mu ne nnipa a wɔkasa kyerɛɛ wɔn no mu.—Luka 10:1.
4 Adawurubɔfo a wɔyɛ afoforofo ani sɔ mmoa a wofi ayamye mu de ma wɔn no. Hu a wobehu kɛkɛ sɛ obi ka wɔn ho a sɛ ɛho hia a ɔbɛboa wɔn wɔ nkɔmmɔbɔ no mu no ma wonya ahotoso. Mpɛn pii ɛyɛ onii a ɔne ɔdawurubɔfo foforo no suaa ade no na ɔboa no ma ofi asɛnka ase. Ɛsɛ sɛ awofo tete wɔn mma. Nanso afoforo betumi aboa; nokwarem no, Kyerɛwnsɛm no hyɛ yɛn nkuran sɛ yɛmmoa yɛn ho yɛn ho. (Mmeb. 27:17; Gal. 6: 6) Ebia wunim obi wɔ mo Asafo Nhoma Adesua kuw no mu a n’ani begye sɛ wobɛto nsa afrɛ no ma wo ne no akɔ asɛnka wɔ bere ne bere mu.
5 Sɛnea ɛbɛyɛ a Tito betumi aboa afoforo wɔ asafo no mu no, Paulo tuu no fo sɛ ‘ɔnka nsɛm a ɛfata ɔkyerɛ pa.’ Ɔretoa afotu yi so no, ɔkyerɛkyerɛɛ nea ɛsɛ sɛ “nkwakoraa” ne “mmerewa” nyinaa yɛ na ahyɛ asafo no den no mu. (Tito 2:1-4) Afoforofo ne mmofra titiriw na wohia mmoa na ama wɔatumi asiesie wɔn asetra sɛnea ɛbɛyɛ a wɔbɛsɔ Onyankopɔn ani. Bere a wɔn ho kokwaw no, wɔbɛfata sɛ wɔkyerɛkyerɛ afoforo wɔ nokware no mu. Ɛnnɛ ɛsɛ sɛ anuanom nyinaa bu wɔn Kyerɛwnsɛm mu asɛyɛde ahorow a ɛkyerɛ sɛ wɔnyɛ nhwɛso na wɔmmoa mmofra ne afoforofo wɔ asafo no mu no aniberesɛm.
BOA WO MMA
6 Awofo betumi ayɛ pii de aboa wɔn mma ma wɔanya nkɔso. Wɔn kasa a edi kan a wɔbɛma wɔ Teokrase Ɔsom Sukuu no mu a wɔbɛboa wɔn ma woasiesie na afei wɔahwɛ ma wɔn ankasa asiesie wɔn ɔkasa a wɔbɛma na wɔatumi afi koma ne ntease mu ama mmuae no yɛ ade a ɛyɛ anigye ampa. So woreboa wo mma wɔ saa kwan yi so? Sɛ wo ne wɔn yɛ adwuma bere nyinaa a saa botae ahorow no wɔ w’adwenem a, so wobetumi anya nkɔso kɛse? Susuw anigye a wubenya no ho bere a wuhu sɛ anisɔ a wo mma wɔ ma nokware no yɛ kɛse na woyi nnamyɛ adi na wotumi ka asɛmpa no kyerɛ afoforo no.
7 Ɛsɛ sɛ obiara a ɔwɔ Yehowa asafo no, mu boa sɛnea ɛbɛyɛ a asafo no muni biara benya nkɔso wɔ ɔsom adwuma no mu. Ebinom fata sɛ wɔyɛ akyerɛkyerɛfo na afoforo nso betumi aboa wɔ akwan ahorow so. (Fa toto 1 Korintofo 12:27, 28 ho.) Ebia woyɛ obi a obetumi aboa denam hyɛ a wobɛhyɛ adawurubɔfo a wɔyɛ afoforofo no nkuran na wɔaboa wɔn no so.