Yehowa na Ɔkyerɛkyerɛ Yɛn
1 Ɛdenam Onyankopɔn akwankyerɛ so no, amanaman ntam ɔkyerɛkyerɛ adwuma bi rekɔ so wɔ nsase 233 so. Wontumi mfa biribiara a wiase yi de ma ntoto ho. Yɛn Kyerɛkyerɛfo Kunini, Yehowa, rekyerɛkyerɛ yɛn nea ɛsɛ sɛ yɛyɛ na ayɛ mfaso ama yɛn mprempren, na ɔkyerɛkyerɛ yɛn ma daa nkwa nso.—Yes. 30:20; 48:17.
2 Ɔsoro Nkyerɛkyerɛ Ho Sukuu Ahorow: Susuw sukuu ahorow a mprempren wɔreyɛ na Yehowa nkurɔfo anya so mfaso no ho. Teokrase Ɔsom Sukuu a yɛyɛ no dapɛn biara wɔ asafo horow bɛyɛ 87,000 mu no tete Ahenni adawurubɔfo ɔpepem pii ma wɔyɛ asɛmpa no ho asomfo a wotu mpɔn. So wode wo ho ahyem? So woka anuanom mpempem pii a wɔakɔ adapɛn abien Akwampaefo Ɔsom Sukuu no bi no ho? Ebia nnɔnhwerew a wɔhwehwɛ sɛ daa akwampaefo nya a wɔatew so no betumi ama pii afata ama akwampae adwuma no na wɔakɔ sukuu yi bi. Asram abien Asomfo Ntetee Sukuu a mprempren wɔyɛ wɔ kasa atitiriw mu wɔ wiase nyinaa no retete mpanyimfo ne asafo mu asomfo a wɔnwaree ama wɔagye teokrase asɛyɛde akɛse. Wɔde ntetee titiriw bi ma mpanyimfo ne asafo mu asomfo nyinaa wɔ bere ne bere mu wɔ Ahenni Ɔsom Sukuu no mu.
3 Wɔreyɛ sukuu atitiriw abiɛsa wɔ Ɔwɛn Aban Asafo Adesuabea a ɛwɔ Patterson, New York, no na ama wɔde ntetee a ɛkɔ anim ama. Asram anum Ɔwɛn Aban Gilead Bible Sukuu no tete asomfo ma asɛmpatrɛw adwuma wɔ amannɔne nsase so. Baa Boayikuw mufo a wofi wiase nyinaa de asram abien sua ade wɔ baa dwumadibea nhyehyɛe ho. Wɔ May 1999 mu no, wɔde adesuafo 48 a wofi United States ne Canada fii asram abien adesua ma ahwɛfo akwantufo ase. Ne nyinaa mu no, Yehowa asomfo nyinaa nya mfaso a ɛfata fi ntetee a Yehowa nam sukuu ahorow yi so de ma no mu.
4 Atirimpɔw Bɛn Nti na Wɔkyerɛkyerɛ Yɛn? Sodikuw no muni bi kae sɛ: “Wɔayɛ yɛn mprempren adesua nhyehyɛe no na ama Yehowa nkurɔfo a wɔwɔ mmaa nyinaa anya ahokokwaw a ɛfata a wɔaka ho asɛm wɔ Mmebusɛm 1:1-4 no.” Ɛmmra sɛ Yehowa bɛma yɛn mu biara “asuafo tɛkrɛma.”—Yes. 50:4.