Mame ayuk bin ya yakʼ xnamajat ta stojol te Jehová

1. ¿Bintik bendición ya jtatik te bitʼil ayotik ta organización yuʼun te Jehová?

¡TSEʼEL KOʼTANTIK te ayotik ta organización yuʼun te Jehová! Te bitʼil ayotikix ta slajibal kʼajkʼal yak ta batsʼejel te jwokoltik. Ya kalbeytik wokol te Jehová te ayotik ta jun familia te banti jun-nax ya kichʼtik ta mukʼ (Sal. 133:1). Te tojobtesel ya yakʼbotik te Dios ya skoltayotik ta stael tseʼel oʼtanil ta jfamiliatik (Efes. 5:33–6:1). Jaʼnix jich ya yakʼbotik jpʼijiltik yuʼun ya jtatik tseʼel oʼtanil sok ma jnoptik te bin ya schebajtes koʼtantik.

2. ¿Bin ya skʼan ya jpastik, sok bin yuʼun?

² Yuʼun maba ya xchebaj koʼtantik ta abatinel ta stojol te Jehová ay baeltik te ya skʼan ya jpastik tulan. ¿Bin yuʼun? Jaʼ ta swenta te ayniwan ma lek ya kaʼiytik te bin ya spasik o te bin ya yalik te yantik. Jaʼnix jich ya xjuʼ ya schebajtes koʼtantik teme ay bin ma lek ya jpastike, kʼaxtoxan-a teme bayal buelta jich ya xkʼot ta pasele. Te artículo ini ya skoltayotik yuʼun maba ya jkom jbatik ta abatinel ta stojol te Jehová kʼalal ay bin ya jsitintaytik: 1) kʼalal ay bin ma lek ya yal ta jtojoltik jtul hermano, 2) kʼalal te jmamalaltik o kinamtik ya yakʼ jmel koʼtantik sok 3) kʼalal ay bin ma lek ya jpastik te ya yakʼ jmel koʼtantik. Ta jujunchajp ya xbajt kiltik te bin ya yakʼ jnoptik te ejemploetik yuʼun j-abatetik yuʼun Dios ta namey kʼinal.

KʼALAL AY BIN MA LEK YA YAL TA JTOJOLTIK JTUL HERMANO

3. ¿Bin ya sitintayik te j-abatetik yuʼun Jehová?

³ Te bin ya xkʼot ta pasel. Ay hermanoetik te ay bin ya spasik te ma lek ya kiltik. Ay yantikxan te ya xjuʼ ya schebajtes koʼtantik o te ma xyichʼotik ta wenta. Jaʼnix jich ay baeltik te ancianoetik ay bin ma lek ya spasik. Ta swenta-abi ayniwan machʼatik ya snopik te ma jaʼuk jun organización yuʼun Dios. Ma skʼanikix te «jun-nax ya yichʼik ta mukʼ» te Jehová sok te yermanotak, yaniwan yijkitayik skʼoponel te machʼa ay bin pasbot yuʼun o ma xbajtikix ta tsoblej (Sof. 3:9). ¿Lekbal te jich ya yichʼ pasele? Kiltik bin ya yakʼ jnoptik jun ejemplo te ya yalbey skʼoplal te Biblia te jich kʼax ta stojol-euk.

4. ¿Bin wokolil la sitintay te jpuk-kʼop Pablo?

⁴ Te machʼa ya yichʼ albeyel skʼoplal ta Biblia. Te jpuk-kʼop Pablo snaʼoj te maba toj te yermanotak. Jich bin-utʼil, te kʼalal kʼot ta congregación ta Jerusalén, bayal machʼatik ma lek la yilik sok la xiʼik (Hech. 9:26). Ta patil, bayal machʼatik jajchik ta kʼop ta stojol (2 Cor. 10:10). Te Pablo la yil jtul hermano te yijubenix schʼuunel yoʼtan te ay bin ma lek la sta ta nopel spasel te juʼniwan la yakʼ skʼojchin yok te yantik jchʼuunjeletik (Gál. 2:​11, 12). Jaʼnix jich la smel yoʼtan ta stojol te Marcos, te jaʼ jtul sjoy ta scholel te skʼop Dios (Hech. 15:​37, 38). Te Pablo juʼniwan te maba la sjokinix te hermanoetik te ay bin pasbot yuʼune, pero ma jichuk la spas. Jun yoʼtan abatin ta stojol te Jehová. ¿Bin koltayot yuʼun?

5. ¿Bin koltayot te Pablo yuʼun maba ya xnamaj ta stojol te yermanotak? (Colosenses 3:​13, 14; jaʼnix jich ilawil te dibujo).

⁵ Te Pablo kʼux ta yoʼtan te yermanotak, ma jaʼuk la yil te ban ya xchʼayik, jaʼ bajt ta yoʼtan te tʼujbil taleliletik yuʼunik. Jaʼ koltayot yuʼun te kʼuxul oʼtanil ta spasel perdón, jich bin-utʼil la yal ta Colosenses 3:​13, 14 (kʼopona). ¿Labal schajpan te kʼop te jajchem yuʼun sok te Marcos? La, la schajpan. Manchukme te Marcos la yijkitay te Pablo kʼalal been ta scholel skʼop Dios ta sbabial buelta, te Pablo maba la skʼej yilinba ta stojol te Marcos. Ta patil la stsʼibay jun carta ta stojol te congregación te ay ta Colosas banti la yal te bayal skʼoplal sok te ya x-akʼbot smukʼul yoʼtan yuʼun te Marcos (Col. 4:​10, 11). Jaʼnix jich, te kʼalal chukul ta Roma-a, la skʼan te ya xkoltayot yuʼun te Marcos (2 Tim. 4:11). Te Pablo maba la snop te maʼyukix bin ya xjuʼ ya spasikix te yermanotak. ¿Bin ya yakʼ jnoptik te ejemplo yuʼun te Pablo?

6, 7. ¿Bin ya skoltayotik yuʼun ya kakʼbeytik yil skʼuxul koʼtantik te kermanotaktik manchukme ay banti ya xchʼayik? (1 Juan 4:7).

⁶ Te bin ya yakʼ jnoptik. Te Jehová ya skʼan te kʼuxuk ta koʼtantik te kermanotaktik (kʼopona 1 Juan 4:7). Teme ay machʼa ta congregación ay bin ma lek ya spasbotik, ya xjuʼ ya jnoptik te ma spasemaluk yoʼtan te jich la spas sok te yak ta spasel tulan ta slekubtesel te stalel (Prov. 12:18). Manchukme jmulawilotik, kʼuxotik ta yoʼtan te Jehová. Ma swalakʼpatiyotik te kʼalal ya jta jmultik sok ma skʼej slab yoʼtan (Sal. 103:9). Mukʼ skʼoplal te ya jkʼayinbeytik stalel te jTatik Jehová sok te yakuk jpasbeytik perdón te yantik (Efes. 4:32–5:1).

⁷ Ma skʼan ya xchʼay ta koʼtantik te bitʼil nopolix te slajibal kʼajkʼal, ya skʼan te junuk ayotik sok te kermanotaktik. Jnaʼojtik te ya kichʼtik kontrainel sok te ya xjuʼ ya kichʼtik chukel. Ta yorail-abi ya jkʼantik te nopol ayotik sok te kermanotaktik (Prov. 17:17). Jich kʼax ta stojol jtul anciano ta España te Josep sbiil.a Ta skaj te ma la schʼik sba ta spasel te bin maba lek, la yichʼ otsesel ta cárcel sok yantik hermanoetik. Jich ya yal: «Te bitʼil jun-nax ban ayotik, aynix ya kilintay jbatik sok te kermanotaktik. Jich yuʼun ya jpastik tulan yuʼun ya xkujch kuʼuntik sok ya jpasbey jbatik perdón sok yutsil koʼtantik. Jaʼ la skoltayotik yuʼun jun-nax ya x-ayinotik sok talel kʼaxel ya jkanantay jbatik ta stojol te machʼatik maba Testigoetik. Yato xjul ta koʼtan te kʼalal la jta jwokol ta jkʼab te ma xjuʼ ya jtij. Te bitʼil maʼyuk bin ya xjuʼ ya jpas, jtul hermano ya sakʼbon te jkʼuʼ jpakʼ sok bayal bin-utʼil la skoltayonxan. Kʼotxan ta koʼtan te bin-nix-a te smelelil kʼuxul oʼtanil». ¡Mukʼ skʼoplal te yakuk jchajpantik ta ora te kʼopetik ya xjajch sok te kermanotaktik!

KʼALAL TE JMAMALALTIK O KINAMTIK YA YAKʼ JMEL KOʼTANTIK

8. ¿Bintik wokolil ya sitintayik te machʼatik nujpunemik?

⁸ Te bin ya xkʼot ta pasel. Te machʼatik nujpunemik «yame sta swokolik ta skuxlejalik», jich bitʼil ya yal ta jamal te Biblia (1 Cor. 7:28). ¿Bin yuʼun? Melel te mamalalil sok te inamil ma tojil ants winikuk. Ma pajaluk te stalelik sok te bin ya smulanik. Yanwan stsʼumbalik sok yanyantik bin-utʼil la yichʼik chʼitesel. Sok yaniwan sta yorail te ya xjajch yilik te stalelik te maba la yilik te kʼalal slekol sbaik-ae. Spisil-abi yaniwan yakʼ sta swokolik yuʼun. Ma xkʼot ta yoʼtanik te jaʼ smul ta schebalik sok te jun pajal ya skʼan ya schajpanik te kʼope, ya yakʼbey sba smulinik sok ya xjajch snopik te jaʼ lek te ya yijkitay sbaik ta jkʼaxel. ¿Jaʼbal lek te jich ya spasike?b Kiltik jun ejemplo ta Biblia te ya yakʼ kiltik te maba chebaj yoʼtan, manchukme la sta bayal wokolil ta snujpunel.

9. ¿Bin wokolil la sitintay te Abigaíl?

⁹ Te machʼa ya yichʼ albeyel skʼoplal ta Biblia. Te Abigaíl nujpunem sok te Nabal, te jaʼ jtul winik te tulan yoʼtan sok chopol stalel (1 Sam. 25:3). Wokol kuxinel sok te machʼa jich stalele. Te Abigaíl juʼniwan slajinbeyel skʼoplal te snujpunel, melel te David te tsabil yuʼun ya x-och ta ajwalil ta Israel, kʼan smil te Nabal ta skaj te bolkʼoptayot yuʼun sok te swiniktak (1 Sam. 25:​9-13). Te Abigaíl juʼniwan te an bael sok te ya yakʼ te ya spas te bin ya skʼan te David. Pero ma jichuk la spas, te bin la spase jaʼ te kʼopoj sok te David sok la yalbey te yakuk spasbey perdón te Nabal (1 Sam. 25:​23-27). ¿Bin tijbot yoʼtan yuʼun jich ya spas?

10. ¿Bin tijbot yoʼtan te Abigaíl yuʼun maba ya xchebaj yoʼtan ta swenta te snujpunel manchukme ay swokol?

¹⁰ Te Abigaíl kʼux ta yoʼtan te Jehová sok mukʼ skʼoplal ta yoʼtan te bin ya snop ta swenta te nujpunel. Snaʼoj ta lek te bin la yal te Jehová kʼalal la snujpuntes te Adán sok te Eva (Gén. 2:24). Te Abigaíl snaʼoj ta lek te chʼultesbil yuʼun Jehová te nujpunel. Te bitʼil la skʼan te lek ya x-ilot yuʼun te Jehová tijbot yoʼtan ta skoltayel te smamalal sok te machʼatik ay ta sna. Te Abigaíl ay bin la spas ta oranax sok la skʼanbey perdón te David, manchukme ma jaʼuk smul swenta yuʼun maba ya yichʼ milel te Nabal. Ya jnaʼtik te kʼux ta yoʼtan Jehová te ants ini te maba xiw sok te la slokʼes sba ta yoʼtan. ¿Bin ya snopik te inamiletik sok te mamalaliletik ta swenta te Abigaíl? Akʼa kiltik.

11. 1) ¿Bin ya skʼan Jehová te yakuk spas te machʼatik nujpunemik? (Efesios 5:33). 2) ¿Bin ya anop ta swenta te ejemplo yuʼun te Carmen? (Jaʼnix jich ilawil te fotoetik).

¹¹ Te bin ya yakʼ jnoptik. Te Jehová ya skʼan te yakuk yichʼik ta mukʼ te nujpunel te machʼatik nujpunemik, manchukme tulan yoʼtan te mamalalil o te inamile. Te Dios kʼax tseʼel yoʼtan kʼalal ya yil te ya spasik tulan ta schajpanel te kʼop, te kʼux ya yaʼiy sbaik sok te ya yichʼ sbaik ta mukʼ te machʼatik nujpunemik (kʼopona Efesios 5:33). Kiltik te bin kʼax ta stojol te Carmen te ayix wakeb jaʼbil snujpunel-a te kʼalal jajch snop te Biblia sok te Testigoetik sok la yichʼ jaʼ. Jich ya yal: «Te jmamalal ma la smulan te bin la jta ta nopel. Ilin ta stojol te Jehová, la yuton sok la yal te ya yijkitayon». Manchukme jich-abi, te Carmen maba chebaj yoʼtan. 50 jaʼbil la spas tulan yuʼun ya yichʼ ta mukʼ te smamalal sok te ya skʼuxultay. Jich ya yalxan: «Kʼalal kʼax bael te jaʼbil kʼot ta koʼtan te bin yaʼiyel ya yaʼiy sba te jmamalal sok jajch jkʼopon sok yutsil koʼtan. Jnaʼoj te chʼultesbil ta sit Jehová te nujpunele, jaʼ yuʼun la jpas tulan yuʼun maba ya xlaj skʼoplal te jnujpunel. Te skʼuxul koʼtan ta stojol te Jehová la skoltayon yuʼun maʼyuk bin-ora ya xchebaj koʼtan».c Kʼalal ya xkʼax wokol ta anujpunel, akʼa schʼuun awoʼtan te Jehová ya skoltayat yuʼun maba ya xchebaj awoʼtan.

KʼALAL AY BIN MA LEK YA JPASTIK TE YA YAKʼ JMEL KOʼTANTIK

12. ¿Binwan yaʼiyel ya kaʼiy jbatik teme ay ya jpastik jun tulan mulil?

¹² Te bin ya xkʼot ta pasel. Te kʼalal ya jpastik jun tulan mulil, jichniwan ya kaʼiytik te ma xtuunotikix. Te Biblia jamal ya yal te ya yakʼ jmel koʼtantik sok te ya spichʼ sba koʼtantik ta skaj te jmultike (Sal. 51:17). Jich kʼax ta stojol te Robert, jtul hermano te la spas tulan yuʼun ya x-och ta siervo ministerial. Pero la spas jun tulan mulil ta stojol te Jehová. Jich ya yal: «Kʼax bayal jmul la kaʼiy, jich la kaʼiy te la stenon bayal ladrilloetik. Ta patil, ma lek la kaʼiy jba, jajchon ta okʼel sok la jkʼopon te Jehová. Ya xjul ta koʼtan te la jnop te maʼyuk bin-ora ya yaʼiybon jkʼop te Jehová, melel la kakʼbey smel yoʼtan». Kʼalal ya jpastik jun tulan mulil, yaniwan jnoptik te la yijkitayotikix te Jehová sok te maʼyukix skʼoplal te ya x-abatinotik ta stojol (Sal. 38:4). ¿Aybal jich awaʼiyoj aba? Teme jiche, ya xbajt skoltayat te ejemplo yuʼun jtul j-abat yuʼun Jehová ta namey te jun yoʼtan abatin ta stojol te Dios, manchukme la spas jun tulan mulil.

13. ¿Bin tulan mulil la spas te Pedro, sok bin yuʼun te jich kʼot ta stojole?

¹³ Te machʼa ya yichʼ albeyel skʼoplal ta Biblia. Junxan ajkʼabal ma xlaj-a te Jesús, te jpuk-kʼop Pedro bayal bintik ma lek la spas ta skuxlejal. Ta sbabial la smukʼulin sba yoʼtan, melel la yal te jun yoʼtan ya yakʼ sba, manchukme te yantik jpuk-kʼopetik ya yijkitayik te Jesús (Mar. 14:​27-29). Ta patil, tey ta jardín yuʼun Getsemaní, bayal buelta och swayel (Mar. 14:​32, 37-41). Patil, te kʼalal la yichʼ tsakel te Jesús, lokʼ bael ta anel (Mar. 14:50). Ta slajibal, te Pedro la smuk ta yoʼtan oxeb buelta te Jesús sok la yal ta jamal te ma snaʼbey sba (Mar. 14:​66-71). ¿Bin yaʼiyel la yaʼiy sba te Pedro kʼalal la snaʼ te la spas jun tulan mulil? La spichʼ sba yoʼtan sok jajch ta tulan okʼel (Mar. 14:72). ¿Yabal xkʼot ta awoʼtan bin yaʼiyel la yaʼiy sba kʼalal la yil te la yichʼ jijpanel ta teʼ te Jesuse? Kʼax maniwan lek la yaʼiy sba.

14. ¿Bin koltayot te Pedro yuʼun maba ya xnamaj ta stojol te Jehová? (Ilawil te dibujo ta yelaw te revista).

¹⁴ Te Pedro ma la yijkitay te Jehová sok abatinxan ta stojol. ¿Bin koltayot yuʼun? Maba la spit sba, la sjokin te yermanotak te akʼbot smukʼul yoʼtan yuʼun (Luc. 24:33). Jaʼnix jich, kʼalal chaʼkuxajemix-a te Jesús, chiknaj ta stojol te Pedro yuʼun-niwan ya yakʼbey smukʼul yoʼtan (Luc. 24:34; 1 Cor. 15:5). Te Jesús ma jaʼuk la yalbey te Pedro te banti chʼay, la yalbey te ya yichʼ bayal yaʼtel (Juan 21:​15-17). Te Pedro snaʼoj-a te bin maba lek la spas, pero ma chebaj yoʼtan. ¿Bin yuʼun? Snaʼoj te maba chʼaybil ta oʼtanil yuʼun te Jesús sok te ya xkoltayot yuʼun te yermanotak. Kiltik te bin ya yakʼ jnoptik te ejemplo yuʼun te Pedro.

15. ¿Bin ya skʼan Jehová te ya schʼuun koʼtantik? (Salmo 86:5; Romanos 8:​38, 39; jaʼnix jich ilawil te foto).

¹⁵ Te bin ya yakʼ jnoptik. Te Jehová ya skʼan te yakuk schʼuun koʼtantik te kʼuxotik ta yoʼtan sok te ya spasbotik perdón (kʼopona Salmo 86:5; Romanos 8:​38, 39). Melelnix-a te ma lek ya kaʼiy jbatik te kʼalal ya jpastik jun mulil, pero maʼyuk bin-ora ya skʼan ya jnoptik te ma kʼuxotikix ta yoʼtan te Jehová sok te ma spasbotik perdón. Ya skʼan ya jletik koltayel ta oranax. Te Robert, te la kalbeytik skʼoplal ta párrafo 12, jich ya yal: «Te bin la yikʼon bael ta spasel mulil jaʼ te la jmukʼul oʼtantay jba te ya xjuʼ ya jpʼaj ta jtukelnax ta prueba». Pero la snaʼ te ya skʼan ya xkʼopoj sok te ancianoetik. Te Robert jich ya yal: «Te kʼalal jich la jpas, la skoltayonik ta yilel te kʼuxon ta yoʼtan te Jehová. Te ancianoetik maba la snopik te ma xtuunonix. La yakʼbonik kil te ma yijkitayojon te Jehová». Jich bin-utʼil te Robert, ya skʼan ya schʼuun koʼtantik te kʼuxotik ta yoʼtan te Jehová sok te ya spasbotik perdón teme ya sujtes koʼtantik, ya jletik koltayel sok ya jpastik tulan swenta maba ya jpastikix te mulil (1 Juan 1:​8, 9). Teme ya jnoptik te kʼuxotik ta yoʼtan te Jehová ya skoltayotik yuʼun maba ya xchebaj koʼtantik kʼalal ya jkʼojchin koktik o ya xyalotik ta mulil.

16. ¿Bin yuʼun ma skʼan te ma xchebaj awoʼtan ta abatinel ta stojol te Jehová?

¹⁶ Te bitʼil ayotik ta kuxinel ta slajibal kʼajkʼal, te Jehová mukʼ skʼoplal ya yil te bin ya jpastik ta yichʼel ta mukʼ. Ya skoltayotik yuʼun ma xchebaj koʼtantik sok te ya xnamajotik ta stojol. Ya xjuʼ ya kakʼbeytik yichʼ yip te skʼuxul koʼtantik ta stojol te kermanotaktik sok te ya jpasbeytik perdón kʼalal ay bin ma lek ya spas ta jtojoltik. Ya xjuʼ ya kakʼbeytik yil te Jehová te kʼux ta koʼtantik sok te ay skʼoplal ta koʼtantik te nujpunel kʼalal ya jpastik tulan ta schajpanel te kʼop te ya xjajch sok te jmamalaltik o te kinamtik. Teme ya jpastik jun tulan mulil, jletik te koltayel yuʼun Jehová, kichʼtik ta wenta te skʼuxul yoʼtan sok te ya spasbotik perdón, sok abatinukotik ta stojol. «Jich yuʼun mame jkom jbatik ta spasel te bin leke», melel ya jnaʼtik te ya yakʼbotik bayal bendición te Jehová (Gál. 6:9).