Albil ti staik-o xichʼik beiltasel echʼel ta snioʼal kuxlejale
«Li Chʼium Chij[e] jaʼ ch-icʼ[van] batel ta nioʼ sventa cuxlejal.» (APO. 7:17.)
1. ¿Kʼuxi chalbe skʼoplal buchʼutik tʼujbilik li Vivliae, xchiʼuk kʼusi yabtel akʼbatik yuʼun Jesús?
LI SKʼOP Diose chalbe skʼoplal li yajtsʼaklomtak Cristo tʼujbilik ti jaʼ li buchʼutik yichʼojik ta venta li kʼusitik yuʼun Cristo li ta Balumile, ti jaʼ kʼotemik ta «jʼabtel ti jun [«tukʼ», NM] yoʼnton [...], ti lec bije». Kʼalal la skʼel li «jʼabtel» ta 1918 li Jesús, li Yajval abtelale, laj yakʼ venta ti tukʼ yakal «ta smacʼlin xchiʼiltac ta abtel ti cʼalal yorail ta xveʼique», jaʼ yuʼun ta sjunul yoʼonton laj yakʼbe sbain li «cʼusitic oy yuʼun[e]» (kʼelo Mateo 24:45-47). Jaʼ yuʼun li buchʼutik tʼujbilike chtunik ta stojolal li yermanotakik ta Balumil yoʼ to mu xbat yichʼ smotonik ta vinajele.
2. ¿Kʼusitik te smakoj li kʼusitik yuʼun Jesucristoe?
2 Jun yajval abtele oy sderecho sventa tstunes kʼuyelan tskʼan yoʼonton li kʼusitik yuʼune. Li kʼusitik yuʼun Jesuse, li Ajvalil vaʼanbil yuʼun Jeovae, te smakoj skotol li kʼusitik sventa Ajvalilal yuʼun Dios ta Balumile. Taje te tsakal skʼoplal li «epal cristianoetic» ti laj yil ta xchʼulel jtakbol Juane xchiʼuk ti xi laj yalbe skʼoplale: «Laj quil te oy epal cristianoetic liquemic tal ta jujun banamil, ta jujuchop stsʼunubalic, ta jujun lum, xchiʼuc ta jujuchop cʼop. Batsʼi ep ta jyalel, mu xlaj ta atel. Te vaʼajtic yoʼ bu chotol li Diose xchiʼuc ta stojol li Chʼium Chije. Puru sac scʼuʼ slapoj scotolic, xchiʼuc stsacanojic yanal xan», xi (Apo. 7:9).
3, 4. ¿Kʼusitik kʼupil sba matanal tstaik li epal krixchanoetike?
3 Li epal krixchanoetike, ti te tsakal skʼoplalik ta yantik chijetik ti la sloʼilta Jesuse, spatoj yoʼonton chkuxiik sbatel osil ta paraiso balumil (Juan 10:16). Jech noxtok, xchʼunojik ti «ch-icʼatic batel ta nioʼ sventa cuxlejal» yuʼun li Jesuse xchiʼuk ti «tscusbat yaʼlel satic yuʼun li Diose». Jaʼ yuʼun «laj yaqʼuic ta chuqʼuel ti scʼuʼique, xchiʼuc laj yaqʼuic ta sacubtasel ta sventa xchʼichʼel ti jcot ta Uni Chije» (Apo. 7:14, Ch, 17). Ta sventa ti yakʼoj xchʼunel yoʼontonik li ta slajel Jesuse, ta sat Diose sakil kʼuʼil slapojik yilel. Jech kʼuchaʼal ilat yuʼun Dios li Abrahame, li Diose tukʼ chalbe skʼoplal kʼuchaʼal yamigotak ek.
4 Ta skoj ti tukʼ albil skʼoplalike, li epal krixchanoetik ti jaʼ yantik chijetik eke spatoj yoʼontonik ti xuʼ kuxul chkomik kʼalal chichʼ lajesel li choplejal ta mukʼta vokolile (Sant. 2:23-26). Xuʼ xnopajik ta stojolal Jeova xchiʼuk oy kʼusi alakʼ sba smalaojik, jaʼ ti kuxul chkomik mi echʼ li Armagedone (Sant. 4:8; Apo. 7:15). Pe mu me jtsopikuk-o ti te tskʼel sba stukike. Moʼoj, ta sjunul yoʼonton chtunik ta stojolal Dios ti jaʼ beiltasbilik yuʼun li Ajvalil ta vinajele xchiʼuk li yermanotak Ajvalil ti liʼ to oyik ta Balumile.
5. ¿Kʼuxi tskoltabeik yermanotak Cristo li epal krixchanoetike?
5 Li buchʼutik tʼujbil chbatik ta vinajele nopajtik noʼox tsnuptanik tsatsal nutsel li ta slumal Satanase. Pe koltabilik yuʼun li xchiʼiltakik ti jaʼik li ta yan chijetike. Akʼo mi jutukik xa liʼ ta Balumil li buchʼutik tʼujbil chbatik ta vinajele, li epal krixchanoetike ta smilal noʼox chchʼamik krixchanoetik jujun jabil. Li buchʼutik tʼujbilike mu onoʼox xkʼel yuʼun stukik chaʼiik ta jujuntal li sien mil tsobobbailetik ti oy ta sjunul balumile. Jaʼ yuʼun chkoltavan li epal krixchanoetike, chakʼik viniketik ti lek chanemike, ti chichʼik vaʼanel ta jkʼelvanejetik ta tsobobbailetike. Tskolta sbaik ta skʼelel li kʼusi chtun yuʼunik li smiyonal noʼox jchʼunolajeletik ti akʼbil sbain skʼelel li «jʼabtel ti jun [«tukʼ», NM] yoʼnton [...], ti lec bije».
6. ¿Kʼuxi onoʼox yichʼoj alel ti chkoltaatik yuʼun yantik chijetik li jchankʼopetik ti tʼujbilike?
6 Li tukʼil koltael chakʼik li yantik chijetik ta stojolal li buchʼutik tʼujbile albil xa onoʼox ta stojolal j-alkʼop Isaías, yuʼun xi la stsʼibae: «Li Mucʼul Diose jech chalbe li Israele: “Li jʼabteletic [«muʼyuk tojbilik», NM] ta Egiptoe, li jmanulajel jchonolajeletic ta Etiopiae, xchiʼuc li sebaetic ti lec natil viniquetique ta xlic ochicuc ta acʼob, jaʼ amozotac chcʼotic. Xnaʼplajetic batel ta apat”», xi (Isa. 45:14). Li yajtsʼaklomtak Cristo ti spatoj yoʼonton chkuxiik ta Balumile chanavik ta spat yaʼeluk li j-abtel xchiʼuk li Jtsop Jbeiltasvanej yuʼune, ti chchʼunbeik li beiltasel chakʼe. Jech kʼuchaʼal «jʼabteletic [«muʼyuk tojbilik», NM]», li yantik chijetike ta sjunul yoʼonton tstunes yipalik xchiʼuk kʼusitik oy yuʼunik sventa tskolta sbaik li ta chol mantal ti la skʼubanbe ta Balumil Cristo li jtsʼaklometik ti tʼujbilike (Hech. 1:8; Apo. 12:17).
7. ¿Kʼusi sventa yakal chichʼ chapanel li epal krixchanoetike?
7 Kʼalal jaʼo tskolta li yermanotakik ti tʼujbilike, li yantik chijetike yakal chichʼik chanubtasel sventa jaʼ chkʼotik ta yoyal li krixchanoetik ti chkuxiik ta Balumil kʼalal echʼem xaʼox Armagedone. Li yoyal taje, o li yibele, skʼan me lekuk tsots, staojuk-o yav xchiʼuk maʼuk noʼox me skʼan xchʼunik li kʼusitik ch-albatik yuʼun yajvalike, moʼoj, yuʼun skʼan spas ta slekil yoʼontonik noxtok. Akʼbilutik yorail sventa chkakʼtik ta ilel ti kʼuyepal jtunelutik ta stojolal li Ajvalil Jesucristoe. Mi chkakʼ ta ilel xchʼunel koʼontontik xchiʼuk mi tukʼ koʼonton chkakʼ jbatik li avie, ta me xkakʼtik ta ilel ti ta jchʼuntik noxtok li mantaletik chkichʼtik ta achʼ balumile.
Chakʼ ta ilel xchʼunel yoʼonton li epal krixchanoetike
8, 9. ¿Kʼuxi chakʼ ta ilel xchʼunel yoʼonton li epal krixchanoetike?
8 Li xchiʼiltakik li buchʼutik tʼujbilike ep ta tos kʼuyelan chakʼ ta ilel xchʼunel yoʼontonik. Ti kʼusi baʼyele jaʼ ti tskolta sbaik ta xcholel li lekil aʼyej sventa Ajvalilal yuʼun Diose (Mat. 24:14; 28:19, 20). Li ta xchibale jaʼ ti chchʼunbeik lek smantal li Jtsop Jbeiltasvaneje (Heb. 13:17; kʼelo Zacarías 8:23).
9 Li ta yoxibale jaʼ ti jech kuxulik kʼuchaʼal chal li beiltaseletik yuʼun Diose, ti jaʼ jech chakʼik ta ilel xtok ti tskoltaik li yermanotakik ti tʼujbilike. Chakʼ yipalik ta yakʼel ta ilel li kʼusi xi chal li Vivliae: «Ta jcʼanan jbatic, xcuxet noʼox coʼntontic, jun noʼox coʼnton jcotoltic, oy smucʼul coʼntontic, lec noʼox chijcʼopojutic, oy slequil coʼntontic, oy xchʼunojel coʼntontic, mu jtoybauticuc [xchiʼuk] jnaʼtic spajesel jbatic» ti xie (Gál. 5:22, 23). Melel onoʼox chaʼa, li talelaletik taje muʼyuk tajmek li avi kʼakʼale, yuʼun jaʼ mas ep chichʼ pasel li kʼusitik jaʼ «yabtel jbecʼtaltique». Akʼo mi jech, li epal krixchanoetike mu skʼan spasik «mulivajel, spasel cʼusitic toj chopol, spasel cʼusitic cʼupil chaʼay jbecʼtaltic, yichʼel ta mucʼ cʼusitic mu jaʼuc Dios, acʼchamel, contrainvanej, liquesejcʼop, tiʼoʼntavanej, sbicʼtal oʼntonal, tsalbail, vocʼbail, saʼel cʼusi lec ta chʼunel chcaʼitic, xpichʼetel oʼntonal, yacubel, spasel cʼusiuc noʼox ta qʼuinetic, xchiʼuc scotol li cʼusitic yan coʼol sba jech chac leʼe» (Gál. 5:19-21).
10. ¿Kʼusi oy ta yoʼonton tspas ta melel li epal krixchanoetike?
10 Ta skoj ti naka jsaʼ mulilutike mu toj kʼunuk chkaʼitik li xchʼiesel yabtel chʼul espiritue, ti mu jpastik li kʼusi tskʼan bekʼete xchiʼuk ti xkuch kuʼuntik li kʼusi tsujvan ta spasel slumal Satanase. Akʼo mi jech, mu xkakʼ jbatik ta tsalel; muʼyuk bu chkakʼtik xchibajes koʼontontik li jkʼuniltike, li kʼusi chmak-o koktike xchiʼuk li kʼusi mu xa xuʼ kuʼuntik spasele, vaʼun muʼyuk chkʼunib li xchʼunel koʼontontike xchiʼuk li kʼanelal kuʼuntik ta stojolal Jeovae. Jnaʼojtik ta melel ti tspas li kʼusi yaloj Jeovae, ti tspoj li epal krixchanoetik kʼalal mi tal li tsatsal vokolile.
11. ¿Kʼusi smanyail stunesoj Satanás sventa tskʼunibtasbe xchʼunel yoʼonton li yajtsʼaklomtak Cristoe?
11 Akʼo mi jech, ta onoʼox me jchabi jbatik, yuʼun jnaʼojtik ti jaʼ mero jkontratik li Diabloe xchiʼuk ti mu xlubtsaj ta anil maʼ li stuke (kʼelo 1 Pedro 5:8). Jech kʼuchaʼal liʼe, stunesoj jvalopatinvanejetik ta mantal xchiʼuk yantik kʼusitik sventa chakʼ jchʼuntik ti jecheʼ la li kʼusi chchanubtasvan li j-abtele. Pe li kʼusi tstunesan taje muʼyuk kʼusi mas lek staoj-o. Jech noxtok, tstunes nutseletik, bakʼintike makem yuʼun li abtelale, pe li kʼusi onoʼox kʼotem ta pasel yuʼun li nutsele jaʼ ti mas tstsatsub-o xchʼunel yoʼonton li ermanoetike. Jaʼ yuʼun li Satanase oy jun smanya ti mas yakal tstunese: jaʼ li xchibajesel oʼontonale. Ti chal noʼox yileluke jaʼ la ti kʼusi mas chkʼunib-o li xchʼunel koʼontontike. Li jchʼunolajeletik ta baʼyel sigloe snaʼojik xa onoʼox ti xibal sba ti chchibaj koʼontontike. Albilik ti akʼo snopik lek ti kʼuyelan stalelal li Cristoe, yuʼun ikuch yuʼun ti «laj yichʼ vocol yuʼun jpasmulil cristianoeti[ke]». ¿Kʼu yuʼun skʼan jech spasik? Sventa mu xlaj stsatsal yoʼontonik xchiʼuk sventa mu xchibaj yoʼontonik (Heb. 12:3).
12. ¿Kʼusi mantaletik ta Vivlia chkoltaat sventa stsak yipal li buchʼu chibajem yoʼontone?
12 ¿Mi oy chchibaj xa avoʼonton laj avaʼi junuk velta? ¿Mi oy bateltik ti mu kʼusi lek kʼotem ta pasel avuʼun chavaʼie? Mi jaʼ jeche, mu me xavakʼ akʼo stunes Satanás li kʼusi yakal cha nuptane ti tskʼan tsmak ta be li avabtel ta stojolal Jeovae. Akʼo avipal ta xchanel li Vivliae, paso orasion ta sjunul avoʼonton, batan ta stekel li tsobajeletike xchiʼuk saʼo avamigotak ta stojolal ermanoetik. Stekel taje jaʼ me tstsatsubtasot xchiʼuk jaʼ me tskoltaot sventa mu xchibaj avoʼonton. Li Jeovae yaloj ti tskolta yajtuneltak sventa stsak yipalike xchiʼuk mu stselpʼuj li kʼusi chale (kʼelo Isaías 40:30, 31). Oyuk-o me kʼusi cha pas ta sventa li Ajvalilal yuʼun Diose; mu xa chʼay-o avoʼonton li kʼusi chchʼaybot akʼakʼale; jaʼ akʼo ta avoʼonton skoltael li yantike. Jaʼ me jech cha ta li avipal sventa chkuch avuʼune, manchuk mi oy chchibaj avoʼonton (Gál. 6:1, 2).
Chlokʼik ta tsatsal vokolil vaʼun ch-ochik ta achʼ balumil
13. ¿Kʼusi abtelal tspasik li buchʼutik kuxul chkomik ta Armagedone?
13 Kʼalal mi echʼ xaʼox li Armagedone ta smilal noʼox krixchanoetik ti muʼyuk tukʼike ta xchaʼkuxiik, vaʼun skotolik me skʼan xichʼ akʼbel yilik li smantaltak Jeovae (Hech. 24:15). Maʼuk noʼox chkakʼbetik snaʼik kʼusi jaʼ li matanal pojelal laj yakʼ Jesuse; moʼoj, yuʼun skʼan jchanubtastik xtok ti akʼo yakʼ xchʼunel yoʼontonik ta sventa taje, yuʼun me jaʼ noʼox xuʼ jech stabeik sbalil mi jech tspasike. Skʼan skomtsanik li kʼusitik jecheʼ xchʼunojike xchiʼuk ti kʼu toʼox yelanil xkuxlejalike. Jech noxtok skʼan slapik li achʼ talelalile ti jaʼ ojtikinbilik-o li melel yajtsʼaklomtak Cristoe (Efe. 4:22-24; Col. 3:9, 10). Li buchʼutik kuxul chkomik ta Armagedone ep me tajmek abtelal skʼan spasik. Jaʼ me jun muyubajel chkaʼitik spasbel li yabtel Jeova taje yuʼun muʼyuk xa tsujutik xchiʼuk muʼyuk xa bu tsmakutik ta spasel li chopol balumil liʼe.
14, 15. ¿Kʼusi xuʼ xchanik ta jtojolaltik li tukʼil krixchanoetik chchaʼkuxiik tale, xchiʼuk kʼusi xuʼ jchantik ta stojolalik ek?
14 Li yajtuneltak Dios ti ichamik kʼalal skʼan toʼox xtal xchol mantal ta Balumil li Jesuse ep me tajmek kʼusi skʼan xchanik ek kʼalal mi chaʼkuxiike. Ta xojtikinbeik lek skʼoplal li Mesías albil onoʼoxe, ti smalaojik toʼox tajmeke pe ti muʼyuk bu xojtikinike. Li ta xkuxlejalik ta voʼnee, yakʼojik xa onoʼox ta ilel ti tskʼanik chanubtasel yuʼun Jeovae. ¿Mi xnop xa noʼox avuʼun kʼu to yelan muyubajel chkaʼitik xchiʼuk ti jaʼ jun matanal ti ta jchapbetik yaʼi Daniel kʼuxi kʼot ta pasel li albil kʼopetik la stsʼibae, pe ti muʼyuk xaʼibe smelolale? (Dan. 12:8, 9.)
15 Melel onoʼox ti ep kʼusitik chchanik ta jtojolaltik li buchʼutik tukʼik ti chchaʼkuxiik tale, pe jech noxtok un oy kʼusi ta jchantik ta stojolalik ek. Ta melel, ta onoʼox stakʼbutik li kʼusitik ta jakʼtik ta sventa li loʼiletik ta Vivlia ti jutukik noʼox chalbe skʼoplale. ¡Nopo xa noʼox avaʼi kʼu to yutsil kʼalal chalbutik stuk ta sventa sprimo Jesús li Juan J-akʼvanej ta voʼe! Jech, stekel li kʼusitik ta jchantik yuʼun li tukʼil testigoetik taje jaʼ me chkaʼibetik-o mas smelolal li sKʼop Diose. Li yajtuneltak Jeova ti ichamik ta voʼne xchiʼuk li buchʼutik jaʼik li epal krixchanoetik ti chchamik ta yorail slajebal kʼakʼale jaʼ me tstaik «ti chaʼcuxiel ti xʼechʼ to yutsile». Stekelik taje la slikes yabtelik ta stojolal Jeova ta jun balumil ti oy ta skʼob Satanase. ¡Jaʼ jun lekilal chaʼiik ti chtunik-o echʼel ta achʼ balumil yuʼun Dios ti bu naka lek xa kʼusitik tee! (Heb. 11:35, Ch; 1 Juan 5:19.)
16. Jech kʼuchaʼal chal albil kʼopetik ta Vivliae, ¿kʼusi chkʼot ta pasel li ta sKʼakʼalil Chapanele?
16 Te van bu junukal kʼakʼal ti kʼalal jaʼo sKʼakʼalil Chapanele ta xjam balbal vunetik, jmoj xchiʼuk li Vivliae jaʼ chtun sventa chichʼik-o chapanel li buchʼutik chkuxiik ta Balumile. Jaʼ me jech te chvinaj un mi staʼo xkuxiik sbatel osil (kʼelo Apocalipsis 20:12, 13). Li ta sKʼakʼalil Chapanele, stekel li jnaklometik ta balumile oy me lek yorail yuʼunik sventa chakʼik ta ilel bu jotukal oyik ta sventa li sderecho ta ajvalilal Jeovae. Ta jujuntal me tsnopik mi chakʼ sbaik ta stojolal li Ajvalilal yuʼun Diose xchiʼuk mi tskʼan «ch-icʼatic batel ta nioʼ sventa cuxlejal» yuʼun li Chʼiom Chije, o mi jaʼ tskontrainik li Ajvalilale xchiʼuk ti muʼyuk chchʼunbeik smantale (Apo. 7:17; Isa. 65:20). Li ta stsutsebal kʼakʼal taje, stekel me krixchanoetik akʼbil xaʼox yorail ti kʼusi tsnop stukike, mu me kʼusi chmakatik-o ta snopel, yuʼun me chʼabal xaʼox li mulil jkuchojtik tale xchiʼuk muʼyuk xaʼox li chopol balumile. Muʼyuk me buchʼu xuʼ xal ti muʼyuk tukʼ li slajeb chapanel chakʼ Jeovae. Jaʼ noʼox me chichʼ lajesel sbatel osil li chopol krixchanoetike (Apo. 20:14, 15).
17, 18. ¿Kʼu yuʼun xmuyubaj smalaojik sKʼakʼalil Chapanel li buchʼutik tʼujbilike xchiʼuk li epal krixchanoetike?
17 Li yajtsʼaklomtak Cristo ti tʼujbilik ta jkʼakʼaliltike albil ti staʼo xichʼik jun ajvalilale, jaʼ yuʼun ta sjunul yoʼonton smalaojik tsventainik li Balumil kʼalal jaʼo sKʼakʼalil Chapanele. ¡Jaʼ jun lekilal ta sventaik! Li spatobil oʼontonal taje jaʼ chtijbat-o yoʼontonik ta xchʼunel li mantal akʼbatik yuʼun Pedro li yermanotakik ta baʼyel sigloe: «Aqʼuic persa ti jechuc o avoʼntonique ti jʼechʼel acʼo achʼunic o ti icʼbiloxuc, ti tʼujbiloxuc yuʼun Diose. Me jech chapasique, me jutuc mu xayalic o ta lum. Jech lec jamal tiʼna ta aventaic, jech ta jbel scʼoplal chaʼochic yoʼ bu chventainvan sbatel osil li Cajvaltique, jaʼ li Jesucristo Jcoltavanej cuʼuntique» (2 Ped. 1:10, 11).
18 Li epal krixchanoetike xmuyubajik tajmek ti jech oy spatobil yoʼonton li buchʼutik tʼujbilike xchiʼuk oy ta yoʼontonik tskoltaik. Ta sventa ti jaʼ yamigoik Diose, oy tajmek ta yoʼontonik spasel bu kʼalal xuʼ yuʼunik li ta yabtelik ta stojolal avi kʼakʼale. Li ta sKʼakʼalil Chapanele, ti jaʼo kʼalal chbeiltasatik batel yuʼun Jesús li ta nioʼ ti chakʼ kuxlejale, xmuyubaj tskolta sbaik xchiʼuk ta sjunul yoʼontonik tspasik li kʼusi chal Jeovae. ¡Jaʼ jun muyubajel chaʼiik kʼalal staʼo xa chtunik ta stojolal Jeova sbatel osil ta Balumile! (Rom. 8:20, 21; Apo. 21:1-7.)
[Lokʼol ta pajina 25]
Li epal krixchanoetike xchukʼoj skʼuʼ spokʼik xchiʼuk yakʼojik ta sakubtasel ta xchʼichʼel Chʼiom Chij
[Lokʼol ta pajina 27]
¿Kʼusi cha kʼan cha jakʼbe avaʼi li tukʼil krixchanoetik kʼalal mi ichaʼkuxiike?
[Lokʼol ta pajina 28]
¿Mi xvul ta ajol?
• ¿Kʼusitik te smakoj li kʼusitik yuʼun Jesuse?
• ¿Kʼuxi chkoltaatik yuʼun epal krixchanoetik li buchʼutik tʼujbilike?
• ¿Kʼusi matanal tskʼupin li epal krixchanoetike xchiʼuk kʼusi smalaojik?
• ¿Kʼu x-elan chavaʼi kʼalal cha nop li sKʼakʼalil Chapanele?