Kʼuxi xuʼ jkolta kalab jnichʼnabtik sventa stsal yuʼunik li vokolil tsnuptanike

TOJ ep tsnuptanik tsatsal vokolil li kerem-tsebetike. Xiʼel stsʼujik li ta chopol espiritu yuʼun sbalumil Satanase xchiʼuk skʼan stsalik xtok li «cʼusi stalel ta scʼupin li [kerem-tsebetike]» (2 Tim. 2:22; 1 Juan 5:19). Maʼuk noʼox taje, ta skoj ti chakʼbeik yipal ta svulesel ta sjolik li Mukʼta Jpasvanej yuʼunike, skʼan stsʼik yuʼunik li naʼleel —xchiʼuk li ilbajinele— yuʼun li buchʼutik tspʼajik kʼusi xchʼunoj li kerem-tsebetike (Ecl. 12:1). Jun yajtsʼaklom Cristo ti Víctor sbie, xi tsvules ta sjol kʼalal chchanunaj toʼoxe: «Oy onoʼox buchʼu te xtijtun ta jtojolal, chilbajinun o tsaʼun ta kʼop ta skoj ti yajrextikoun Jeovae. Ep ta veltae, toj tsots li ilbajinel ti mu xa jkʼan-o xi bat li ta chanune».a

Li kerem-tsebetike maʼuk noʼox skʼan stsalik li balumile, yuʼun skʼan stsalik xtok ti tskʼanik jechikuk kʼuchaʼal yantike. «Muʼyuk bu lek ta aʼiel ti jelelot cha yilik li yantike», xi chal jun chex tseb ti Katy sbie. Jun kerem yajrextiko Jeova ti Alan sbie, xi chale: «Li jchiʼiltake nopolik noʼox chalbikun ti akʼo xbat jchiʼinik ta sabado xchiʼuk domingoe, pe ta melel, ta jkʼan chi bat kaʼi». Yantike tskʼan van tajek chbatik li ta tsalbail ta tajimol tspasik ta chanob vune, pe ta skoj ti jaʼ chchiʼinik li buchʼutik chopol stalelalike, jaʼ yuʼun muʼyuk chbatik. «Toj kʼupil chkaʼi li tajimole —xi chal Tania—. Li jchanubtasvanejetik ta tajimol ta chanob vune chalilanbikun ti akʼo xi tajin ta ekipoe. Toj vokol chkaʼi ti moʼoj, xi chie».

Totil-meʼiletik, ¿kʼuxi xuʼ xa kolta avalab anichʼnabik sventa stsal yuʼunik li tsatsal vokoliletike? Jaʼ yakʼoj ta abaik Jeova ti akʼo xa beiltasike (Pro. 22:6; Efe. 6:4). Li kʼusi skʼan xavakʼ ta avoʼontonike jaʼ ti xa tsʼunbeik ta yoʼontonik xchʼunbel smantal Jeovae (Pro. 6:20-23). Vaʼun ta yoʼonton me stukik chlokʼ ta stsalel li vokoliletik ta balumile, akʼo mi muʼyuk te akʼelojik.

Muʼyuk bu kʼun ta smakʼlinel li utsʼ-alalile, li stsʼitesel alab-nichʼnabiletike xchiʼuk ti jkʼeltik xtok li kʼusitik ta tsobobbaile. Jlome stuk noʼox tspasik, yuʼun muʼyuk snup xchiʼilik o ta skoj ti chkontrainat yuʼun snup xchiʼil ti maʼuk jchʼunolajele. Pe maʼuk noʼox taje: li Jeovae tskʼan ti akʼo xchʼakbe skʼakʼalik sventa tsbeiltas xchiʼuk tskolta yalab xnichʼnabik li totil-meʼiletike. Jech oxal chaʼa, ¿kʼuxi xuʼ xa koltaik sventa stsʼik yuʼunik li kʼusi tsujatik ta spasel yuʼun xchiʼiltakike, li ilbajinele xchiʼuk li akʼel ta preva tsnuptanik skotol kʼakʼale?

Tsots skʼoplal ti lek xil sbaik xchiʼuk Jeovae

Baʼyel, li jkerem o jtsebtike skʼan me xchʼunik ti oy o ti kuxul ta melel li Jeovae. Pe skʼanik koltael sventa «[chilbeik sat] li Bochʼo mu xquil ta jsatique» (Heb. 11:27). Víctor, ti laj xa kalbetik skʼoplale, chalbutik ti koltaat yuʼun stot smeʼ sventa lekuk xil sba xchiʼuk li Jeovae. «La xchanubtasikun ti tsots skʼoplal li spasel orasione —xi chal—. Xvul ta jol ti kʼalal bikʼitun toʼox tajeke, ta jpas orasion skotol akʼobal kʼalal skʼan toʼox xi vaye. Jchʼunoj ta melel ti kuxul li Jeovae.» ¿Mi jmoj cha pasik orasion xchiʼuk li avalab anichʼnabike? ¿Mi jaʼ noʼox chchaʼalilanik li kʼusi chalike? ¿Mi xvinaj ta s-orasionik ti skʼanojik li Jeovae? Mi chavaʼibeik li s-orasionike, chavakʼik venta mi yakal chchʼiik ta mantal li avalab anichʼnabike.

Li xchanel Vivlia jtuktike jaʼ yan ti kʼuyelan chi jnopaj mas ta stojolal li Jeovae. Katy, ti laj xa kalbetik skʼoplale, xi chale: «Ti la jkʼel sliklejal Vivlia kʼalal bikʼitun toʼoxe la skoltaun sventa ta jchʼun lek ti tskoltaun Jeova akʼo mi tskontrainikun li yantike». ¿Mi xchʼakojbeik yorail sventa xchan sVivlia stukik li avalab anichʼnabike? (Sal. 1:1-3; 77:12.)

Melel onoʼox ti jelel kʼuyelan chchʼamik li beiltasel ch-akʼbat yuʼun stot smeʼik li alab-nichʼnabiletike xchiʼuk ti xuʼ chmakvan bakʼintik li sjabilalik sventa xchʼiik ta mantale. Pe mi muʼyuk chichʼik beiltasel li kerem-tsebetike, toj vokol me chaʼiik ta xchʼunel ti kuxul ta melel li Jeovae. Li totil-meʼiletike skʼan xakʼbeik xchan yalab xnichʼnabik li kʼusi chal Diose, sventa oyuk-o ta sjolik li kʼusi tsnop Diose, manchuk mi buyuk noʼox oyik (Deu. 6:6-9). Li avalab anichʼnabike skʼan xchʼunik ta melel ti oyik ta yoʼonton li Jeovae.

Chiʼinejbail ta loʼil ti oy sbalile

Ti lek ta jchiʼintik ta loʼil li kalab jnichʼnabtike tsots skʼoplal sventa ta jkoltatik. Maʼuk noʼox ti ta jkʼopontike: te smakojbe skʼoplal ti ta jakʼbetike xchiʼuk ti ta jtsʼet chikintatik lek li kʼusi tstakʼike, akʼo mi maʼuk van li kʼusi ta jkʼan chkaʼitike. Li Anne ti oy chaʼvoʼ skereme, xi chale: «Ta jakʼilanbe jaʼ to mi laj kaʼibe smelolal li kʼusi tsnopike xchiʼuk li vokoliletik tsnuptanike». ¿Mi chil avalab anichʼnabik ti cha tsʼet chikintaik li kʼusi chalike? Tania, ti laj xa kalbetik skʼoplale, xi chale: «Chchikintaik lek jtot jmeʼ li kʼusi chkale xchiʼuk xvul ta sjolik li kʼusi chkalbeike. Snaʼojik kʼusi sbi li jchiʼiltak ta chanune xchiʼuk tsjakʼik kʼuyelanik xchiʼuk tsjakʼik jlom kʼusitik ti kalojbekutik skʼoplale». Jech oxal chaʼa, sventa oyuk sbalil li chiʼinejbail ta loʼile skʼan jtsʼet chikintatik xchiʼuk jvules ta joltik.

Ep utsʼ-alaliletike yakʼojik venta ti xuʼ lek xchiʼin sbaik ta loʼil kʼalal chveʼike. «Toj tsots skʼoplal chkaʼikutik ti jmoj chi veʼkutike —xi chal li Victore—. Ti bu kʼalal xuʼ kuʼunkutike skʼan te chotolunkutik ta mexa xchiʼuk li kutsʼ kalalkutike. Kʼalal yakalunkutik ta veʼele, mu xuʼ jkʼelkutik television, yaʼiel radio mi jaʼuk skʼelel vun. Pe ta skoj ti toj lek li jloʼilkutike, li yorail veʼele jaʼ yorail jun oʼontonal ti tskoltaun sventa xchʼay ta jol li kʼusitik muʼyuk smelol chkʼot ta pasel, li kʼusitik muʼyuk noʼox smelolal ta aʼiele xchiʼuk li ilbajinel ta chanune.» Xi to chale: «Ta skoj ti nopem xkaʼi chi loʼilaj xchiʼuk jtot jmeʼ kʼalal chi veʼkutike, muʼyuk bu tsots chkaʼi chkalbeik li kʼusitik mas tsots skʼoplale».

Xi xa jakʼbe abaike: «¿Jayib velta jmoj chi veʼkutik xchiʼuk kutsʼ kalalkutik li ta xemanae?». Jech van chavaʼiik ek ti mi mas to jech cha pasike, mas to me lek cha chiʼin abaik ta loʼil xchiʼuk li avalab anichʼnabike.

Toj ep sbalil ti chichʼ akʼel ta ilel kʼusi xuʼ spasike

Ti ta jpastik jujun xemana li yichʼel ta mukʼ Jeova ta kutsʼ kalaltike chkoltavan sventa oyuk sbalil ti ta jchiʼin jbatik ta loʼile xchiʼuk tskolta sventa stsalik vokoliletik li kerem-tsebetike. Li Alan ti laj xa kalbetik skʼoplale, xi tsvules ta sjole: «Li jtot jmeʼe jaʼo tskʼelik kʼusi oy ta koʼontonkutik kʼalal ta jchankutik Vivlia ta kutsʼ kalalkutike. Jaʼ tstʼujik sventa jloʼiltakutik li kʼusitik yakal chkʼot ta jtojolalkutike». Li smeʼ Alane xi chale: «Ta jchʼakbekutik jsetʼuk yorail li ta xchanel Vivlia ta kutsʼ kalalkutik sventa jchankutik kʼusi xuʼ spasik kʼalal oy kʼusi tsnuptanike. Ti jech la jpaskutike la xchapan sventa tspakbe skʼoplal kʼusi xchʼunojik li kalab jnichʼnabkutike xchiʼuk ti xakʼik ta ilel ti melel li kʼusi xchʼunojike, jaʼ akʼbat stsatsal yoʼontonik sventa stsalik li vokoliletike».

Kʼalal chichʼik sujel yuʼun xchiʼiltakik li kerem-tsebetike, mu onoʼox baluk ti chalik ti moʼoje xchiʼuk ti tstam batel sbeike. Skʼan xalbeik smelolal kʼusi srasonal ti kʼusi xchʼunojike xchiʼuk ti jpʼeluk-o ta yoʼonton kʼusi tspasik kʼalal chnaʼleatik ta skoj srelijionike. Mi mu jechuk tspasike, muʼyuk me stsatsal yoʼontonik sventa tukʼ-o xakʼ sbaik ta stojolal li melel yichʼel ta mukʼ Diose. Ti chchanik kʼusi xuʼ spasik kʼalal oy kʼusi tsnuptanike xuʼ x-akʼbat stsatsal yoʼontonik xchiʼuk spatobil yoʼontonik.

Li ta rekuadro ta pajina 18 te chvinaj jayibuk kʼusitik xuʼ xa pasik xchiʼuk avalab anichʼnabik li ta Akʼobal sventa Yichʼel ta Mukʼ Jeova ta Kutsʼ Kalaltike. Pe sventa meleluk xa xvinaje, jakʼbeik kʼu yuʼun ti jech tstakʼike. ¿Kʼu yuʼun mu xa kʼelik xtok li kʼusitik xuʼ xichʼ chanel li ta jlom loʼiletik chal Vivliae? Ta melel, ti jech cha chapan abaik ta anaike tskolta li avalab anichʼnabik sventa stsal yuʼunik li vokolil ta chanob vun xchiʼuk ta buyuk noʼoxe.

¿Mi jaʼ jun lekil nakʼobbail li anaike?

¿Mi oy tajek ta yoʼonton tsut ta anaik li avalab anichʼnabik kʼalal chlokʼik ta chanune? Mi jaʼ jun nakʼobbail ti bu oy jun oʼontonal li ta anae, te me tstaik koltael sventa tstsal yuʼunik vokoliletik ti tsnuptanik jujun kʼakʼal li avalab anichʼnabike. Jun ermana ti chtun ta Betel avie, xi chale: «Jaʼ jun melel nakʼobbail li jnae, jaʼ jtos ti kʼusi ep la skoltaun kʼalal chi chanunaj toʼoxe. Akʼo mi tsots li vokolil ta chanob vune, jnaʼoj ti oy jun oʼontonal kʼalal mi li kʼot ta jnae». ¿Kʼu yelan oyoxuk li ta anaike? ¿Mi nopem xavaʼiik oy «sbicʼtal oʼntonal, tsalbail [xchiʼuk] vocʼbail», o mi oy kʼanbail, xkuxetel oʼontonal xchiʼuk jun oʼontonal? (Gál. 5:19-23.) Mi la avakʼik venta ti chʼabal lek jun oʼontonal ta anaike, ¿kʼu yuʼun mu xavakʼbeik yipal ta sjelel atalelalik sventa chkʼot ta jun lekil nakʼobbail sventa avalab anichʼnabik?

Yan ti kʼuxi xuʼ jkoltatik sventa stsal yuʼunik vokolil li kalab jnichʼnabtike jaʼ ti chkakʼtik akʼo xchiʼinik li buchʼutik xuʼ xkoltaatike. Jech kʼuchaʼal liʼe, ¿kʼu yuʼun mu xavikʼik batel ermanoetik ti yijik ta mantal ta tsobobbail kʼalal cha chʼay avoʼontonik xchiʼuk avutsʼ avalalike? Xuʼ van cha pasik junuk uni veʼlil ta anaik xchiʼuk ti chavikʼik ta veʼel li jkʼelvanej ta sirkuito o yan ermanoetik ti ch-abtejik ta tsʼakal orae. ¿Mi xavojtikinik jayibuk misioneroetik o buchʼutik ch-abtejik ta Betel ti xuʼ chamigoin li avalab anichʼnabike, akʼo mi jaʼ noʼox ta karta, ta correo electrónico o ti tskʼoponik ta telefono bakʼintike? Ti jech tsaʼ yamigoike chkoltaatik sventa tstamik batel tukʼil be xchiʼuk ti chakʼ ta yoʼontonik stael kʼusitik sventa mantale. Nopo avaʼi li kʼusi lek la xchanbe jtakbol Pablo li kerem Timoteoe (2 Tim. 1:13; 3:10). Ti lek laj yamigoin sbaike la skolta Timoteo sventa jaʼuk batem ta yoʼonton stael li kʼusitik sventa mantale (1 Cor. 4:17).

Kʼupil kʼoptaik li avalab anichʼnabike

Li Jeovae chmuyubaj kʼalal chil ti tspakbeik skʼoplal kʼusitik tukʼ li kerem-tsebetike, akʼo mi oy vokoliletik li ta sbalumil Satanase (Sal. 147:11; Pro. 27:11). Ta melel cha muyubajik van ek ti chavilik ti jaʼ tstʼujik li lekil bee (Pro. 10:1). Albeik ti akʼanojik li avalab anichʼnabike xchiʼuk mu xaviktaik skʼupil kʼoptael. Toj lek me ti xchanbeik stalelal Jeova li totil-meʼiletike. Kʼalal laj yichʼ voʼ li Jesuse, xi laj yalbee: «Voʼot jnichʼonot, lec jcʼanojot, lec jpatoj coʼnton avuʼun», xut (Mar. 1:11). Ta skoj li epal prevaetik tsnuptan Jesuse, ¡toj ep van tsatsubtasbat yoʼonton li kʼusi albat yuʼun sTote! Jechuk xa pasik ek: albo avalab anichʼnabik ti akʼanojike xchiʼuk ti cha muyubajik ta stojolalike.

Melel onoʼox ti muʼyuk bu chchabi avuʼunik ta skotol vokoliletik, naʼleel xchiʼuk ilbajinele. Pe xuʼ xa chanubtasik ta stsalel li vokoliletik taje. Koltaik sventa lek chil sbaik xchiʼuk li Jeovae. Akʼbeik yipal sventa oyuk lek sbalil ti cha chiʼin abaik ta loʼile. Akʼik persa ti jtuneluk li xchanel Vivlia ta avutsʼ avalalike xchiʼuk ti jaʼuk jun lekil nakʼobbail li anaike. Mi chavakʼ ta akuxlejalik li tojobtaseletik taje, chapal me avuʼunik sventa stsal yuʼunik li vokolil tsnuptan avalab anichʼnabike.

[Tsʼib ta yok vun]

[Rekuadro ta pajina 18]

CHICHʼ AKʼEL TA ILEL KʼUSI XUʼ SPASIK

Liʼ ta olone te chvinaj jlom kʼusitik ti xuʼ xa pasik li ta Akʼobal sventa Yichʼel ta Mukʼ Jeova ta Kutsʼ Kalaltike.

▸ Jun jchanubtasvanej ta tajimole chalbe atseb ti akʼo xtajin xchiʼuk jun ekipo ta chanob vune.

▸ Kʼalal tsut xa batel ta anaik li akereme chyebat sikʼolal.

▸ Jlom keremetike tsibtasik akerem ti tsakik ta majel mi laj yilik yan velta ta chol mantale.

▸ Li atsebe tstij tiʼna ta chol mantal, vaʼun chlokʼ tal jun xchiʼil ta chanun.

▸ Li atsebe ch-albat ti akʼo xalbe smelolal ta stojolal xchiʼiltak ta chanun ti kʼu yuʼun muʼyuk tspas saludar li vanderae.

▸ Jun kereme skotol ora tsnaʼle akerem ta skoj ti jaʼ yajrextiko Jeovae.

[Lokʼol ta pajina 17]

¿Mi xchʼakojbeik yorail sventa xchan sVivlia stukik li avalab anichʼnabike?

[Lokʼol ta pajina 19]

¿Mi chavikʼik batel ermanoetik ti yijik ta mantal kʼalal cha chʼay avoʼontonike?