Li jujun kʼakʼal kuxulutike jaʼuk me sventa ta jkʼupil kʼoptatik Dios

«ACʼBUN caʼay ta jujun sob cʼu xʼelan li cʼuxubinel avuʼune [...]; acʼbun jnaʼ lec bu beal xuʼ chixanov batel», xi xvokolet la skʼan ta orasion li David ti jaʼ la stsʼiba li salmo liʼe (Sal. 143:8). Ta melel, jech kʼuchaʼal li Davide, li voʼot eke kʼalal cha tojbe ta vokol Jeova ti kuxul la asakub yuʼune, ta van xa kʼanbe ti akʼo xa skoltaot ta snopel li kʼusitike xchiʼuk ti lekuk xa pas aba bu kʼalal xuʼ avuʼune.

«Ti cʼalal chijveʼe, ti cʼalal oy cʼusi chcuchʼtique, xchiʼuc scotol li cʼusiuc noʼox ta jpastique», li yajtsʼaklomutik Cristo ti kakʼoj jkuxlejaltik ta stojolal Diose chkakʼbetik yipal spasel skotol «sventa lec chbat scʼoplal cuʼuntic li Diose» (1 Cor. 10:31). Jnaʼojtik ti xuʼ jkʼupil kʼoptatik o jchopol kʼoptatik Jeova li ta jkuxlejaltik ta jujun kʼakʼale. Oy ta joltik xtok, ti jech kʼuchaʼal chal li Vivliae, li Satanase tstikʼbe smul li yermanotak Cristoe, maʼuk noʼox taje, yuʼun tstikʼbe smul skotol li yajtuneltak Dios ta spʼejel Balumile, «ta cʼacʼal ta acʼubal» (Apo. 12:10). Jaʼ yuʼun chaʼa, jpʼel koʼontontik chkakʼtik ta ilel ti tsjut kʼop li Satanase xchiʼuk jpʼel koʼontontik ta jmuyubtabetik yoʼonton Jeova kʼalal ta jpasbetik yabtel ta «ta cʼacʼal ta acʼubal[e]» (Apo. 7:15; Pro. 27:11).

Kalbetik chaʼtos smelolal kʼuxi xuʼ jkʼupil kʼoptatik Dios skotol kʼakʼal. Li baʼyele jaʼ ti skʼan oyuk kʼusi baʼyel xkakʼ ta jkuxlejaltike, li xchibale, jaʼ ti jkʼeltik kʼusi chtun yuʼun li yantike.

Jpastik li kʼusi kalojbetik Diose

Kʼalal laj kakʼ jkuxlejaltik ta stojolal Jeovae, laj kalbetik ti oy ta koʼontontik chi jtun yuʼune. Laj kalbetik xtok ti chi jxanav ta «jujun cʼacʼal» ta sbee, jech, ta sjunul jkuxlejaltik (Sal. 61:5, 8). Vaʼun chaʼa, ¿kʼusi ta jpastik li yajtsʼaklomutik Cristo sventa chkʼot ta pasel kuʼuntik li kʼusi kalojtike? ¿Kʼuxi chkakʼtik ta ilel jujun kʼakʼal ti jkʼanojtik ta melel li Jeovae?

Li sKʼop Diose jamal chakʼ ta ilel kʼusi tskʼanbutik li Jeovae (Deu. 10:12, 13). Li rekuadro «Li kʼusitik yakʼoj ta jbatik spasel li Diose» te chichʼ alel jayibuk smantaltak Dios ti toj tsots skʼoplale (kʼelo ta pajina 22). Vaʼun chaʼa, ¿kʼuxi xuʼ jnaʼtik bu junukal skʼan pasel baʼyel kʼalal oy chib o mas ti skʼan pasel ta jmoj noʼoxe?

Li yajtsʼaklomutik Cristoe jaʼ mas tsots skʼoplal chkiltik spasel li chʼul abtelale, ti te smakoj li xchanel Vivliae, li spasel orasione, ti chi jbat ta tsobajeletike xchiʼuk ti ta jcholtik mantale (Mat. 6:33; Juan 4:34; 1 Ped. 2:9). Pe melel xtok ti mu xuʼ kuʼuntik skotol ora ta spasel li kʼusitik sventa mantale. Yuʼun skʼan xi j-abtej xtok, chi jbat ta chanun xchiʼuk ti jpastik li kabteltik ta jnatike. Akʼo mi jech, chkakʼbetik yipal bu kʼalal xuʼ kuʼuntik sventa jchapanbetik yorail li kʼusitik taje yoʼ mi junuk smak ta be ti chi jbat ta tsobajeletike o yan kʼusi jtosukal chʼul abtelal. Jech kʼuchaʼal liʼe, kʼalal ta jnop chi jbat ta vakasione, ta jkʼeltik mi mu jmojuk yorail chvulaʼanvan li jkʼelvanej ta sirkuitoe o mi mu jmojuk skʼakʼalil junuk mukʼta tsobajel ta jun, ta chib o ta oxib kʼakʼal. Bakʼintik xtoke, xuʼ jpastik ta jmoj noʼox chaʼtos ti kʼusi jbainojtike. Jech kʼuchaʼal liʼe, ¿kʼu yuʼun mu jmojuk jpastik xchiʼuk kutsʼ kalaltik li smesel xchʼubael Salon sventa Tsobobbaile, o kʼu yuʼun mu jcholbetik mantal jchiʼiltaktik ta abtel o ta chanun kʼalal jaʼo yorail veʼele? Ta melel, kʼalal oy kʼusi tsots skʼoplal skʼan jnoptike —jech kʼuchaʼal kʼalal ta jtʼuj kabteltike, kʼu to yepal ta jchantik vun o li buchʼu chkamigointike—, skʼan ta jtsaktik ta venta li kʼusi baʼyel kakʼoj ta jkuxlejaltike: li yichʼel mukʼ Jeovae, li jkʼanvanej Totil kuʼuntik ta vinajele (Ecl. 12:13).

Jkʼeltik kʼusi chtun yuʼun li yantike

Li Jeovae tskʼan ti oyuk ta koʼontontik xchiʼuk ti jpastik kʼusi lek ta stojolal li yantike. Yan li Satanase, jaʼ tskʼan ti jsaʼtik li kʼusi ta jkʼan jtuktike. Li sbalumile noj ta krixchanoetik ti «jaʼ noʼox tspasic cʼusi tscʼan stuqui[ke]» xchiʼuk ti «jaʼ batem ta yoʼntonic o li cʼusi tscʼan stuquique», xchiʼuk ti «jaʼ noʼox ta stsʼun[ik] cʼusi tscʼan sbecʼtal[ike]» (2 Tim. 3:1-5; Gál. 6:8). Jutuk mu skotoluk li krixchanoetike mu sventaik kʼusi chopol xuʼ xkʼot ta pasel ta skoj li kʼusitik tspasike. Jaʼ jech, ta buyuk noʼox xvinaj «li yabtel [bekʼtalile]» (Gál. 5:19-21).

¡Jaʼ toj jelel stalelalik li buchʼutik chakʼ akʼo xbeiltasatik yuʼun xchʼul espiritu Jeovae, yuʼun ta kʼanelal xchiʼuk ta slekil yoʼonton chilik li yantike! (Gál. 5:22.) Li Vivliae tstij koʼontontik ti jaʼuk baʼyel jsaʼtik li kʼusi chtun yuʼun yantike, ti maʼuk li kʼusi ta jkʼantike. Jaʼ yuʼun, oy ta koʼontontik li yantike, pe ta jkʼel jbatik sventa mu jtikʼ jbatik li ta xkuxlejalike (1 Cor. 10:24, 33; Fili. 2:3, 4; 1 Ped. 4:15). Li yajtsʼaklomutik Cristoe jaʼ mas chkakʼ ta koʼontontik li kermanotaktike; pe jech xtok chkakʼbetik yipal ta spasel kʼusi lek ta stojolal li buchʼutik mu jmojuk xchʼunel koʼontontike (Gál. 6:10). ¿Mi oy buchʼu xuʼ xkakʼbetik yil slekil koʼontontik li avi ta orae? (Kʼelo li rekuadro «Krixchanoetik ti sta-o oyuk ta koʼontontike», ta pajina 23.)

Maʼuk noʼox skʼan xkakʼtik ta ilel slekil koʼontontik kʼalal oy kʼusi chkʼot ta pasele o kʼalal oy vokolile (Gál. 6:2; Efe. 5:2; 1 Tes. 4:9, 10). Jaʼ lek ti jkʼeltik jujun kʼakʼal kʼuyelan oy li yantike xchiʼuk ti mu jalan jbatik ta skoltaele, akʼo mi skʼan xkil jvokoltik ta skoj. Skʼan ta jchʼak jkʼakʼaltik, xkakʼ kʼusitik oy kuʼuntik xchiʼuk li kʼusitik jnaʼtik spasele. Jech xtok, jvules ta joltik ti lek me yoʼonton ta jtojolaltik Jeova ek mi lek koʼontontike (Pro. 11:25; Luc. 6:38).

Chʼul abtelal «ta cʼacʼal ta acʼubal»

Pe ¿kʼuxi xuʼ jpastik chʼul abtelal «ta cʼacʼal ta acʼubal»? Jaʼ ti kʼalal mu xkikta jbatik xchiʼuk ti chkakʼbetik yipal spasel skotol li kʼusi chkichʼtik-o ta mukʼ Diose, jaʼ xkaltik, ti jaʼuk jtunes-o jkuxlejaltik ta spasel li chʼul abtelale (Hech. 20:31). Taje te smakojbe skʼoplal ti jkʼeltik Vivlia skotol kʼakʼale xchiʼuk ti jnopbetik skʼoplale, ti jpastik orasion skotol orae, ti xkakʼbetik yipal xi jbat ta skotol tsobajeletike xchiʼuk ti jcholtik mantal skotol orae (Sal. 1:2; Luc. 2:37; Hech. 4:20; 1 Tes. 3:10; 5:17).

¿Mi jech yakal chi jtun ta stojolal Jeova ta jujuntal? Mi jeche, chvinaj ta skotol jkuxlejaltik ti oy ta koʼontontik ta jlekubtasbetik yoʼontone xchiʼuk ti chkakʼtik ta ilel ti altik li kʼusi chal Satanase. Kakʼbetik yipal sventa lekuk skʼoplal kuʼuntik Jeova ta skotol li kʼusitik ta jpastike xchiʼuk li ta kʼusiuk ta jnuptantike. Kakʼtik akʼo sbeiltas jkʼopojeltik xchiʼuk kʼusitik ta jpastik li beiltaseletik yuʼune xchiʼuk ti akʼo sbeiltasutik kʼalal oy kʼusi ta jnop ta jpastike. Jech xtok, kakʼtik ta ilel ti ta jtojbetik ta vokol Dios ti tskoltautik xchiʼuk ti ta slekil yoʼonton chchabiutik kʼalal ta jpat sjunul koʼontontik ta stojolale xchiʼuk ti jtunes skotol kipaltik li ta yabtele. Ta yan xtoke, jchʼambetik li tojobtaseletik xchiʼuk li tukʼibtasel chakʼbutik kʼalal muʼyuk ta jchʼunbetik smantal ta skoj ti jmulavilutike (Sal. 32:5; 119:97; Pro. 3:25, 26; Col. 3:17; Heb. 6:11, 12).

Jech oxal chaʼa, li ta jujun kʼakʼal kuxulutike jaʼuk me sventa ta jkʼupil kʼoptatik Dios. Mi jech ta jpastike, «jech cux xi [koʼontontik]» xchiʼuk ta jkʼupintik-o ti chchabiutik li Jeova ti jaʼ li jkʼanvanej Totil kuʼuntik ta vinajele (Mat. 11:29; Apo. 7:16, 17).

[Rekuadro ta pajina 22]

Li kʼusitik yakʼoj ta jbatik spasel li Diose

• Jpasilantik orasion (Rom. 12:12).

• Jkʼeltik Vivlia, jchanbetik skʼoplal xchiʼuk kakʼ ta jkuxlejaltik (Sal. 1:2; 1 Tim. 4:15).

• Jkʼupil kʼoptatik Jeova ta tsobobbail (Sal. 35:18; Heb. 10:24, 25).

• Kakʼbetik kʼusitik chtun yuʼun kutsʼ kalaltik, li ta sventa mantale xchiʼuk li kʼusitik oy ta yoʼontone (1 Tim. 5:8).

• Cholel mantal xchiʼuk ti spasel ta yajtsʼaklom Cristo li krixchanoetike (Mat. 24:14; 28:19, 20).

• Jchabi jbekʼtal jtakopaltik, ti kʼuyelan oyutik ta mantale xchiʼuk li kʼusi oy ta koʼontontike, ti te smakoj ti jchʼay koʼontontik ta kʼusitik leke (Mar. 6:31; 2 Cor. 7:1; 1 Tim. 4:8, 16).

• Jpastik li kʼusi jbainojtik ta tsobobbaile (Hech. 20:28, NM; 1 Tim. 3:1).

• Lekuk oy li jnatike xchiʼuk li Salon sventa Tsobobbaile (1 Cor. 10:32).

[Rekuadro ta pajina 23]

Krixchanoetik ti sta-o oyuk ta koʼontontike

• Li mol-meʼeletik ta tsobobbaile (Lev. 19:32).

• Li buchʼutik ipike o ti chaʼiik yan chameletik jech kʼuchaʼal at-oʼontone (Pro. 14:21).

• Kʼalal oy kʼusi chtun tajek yuʼun ta anil jun ermano ti xuʼ xkakʼbetike (Rom. 12:13, Ch).

• Junuk kutsʼ kalaltik ti nopol kiloj jbatik xchiʼuke (1 Tim. 5:4, 8).

• Junuk yajtsʼaklom Cristo ti cham snup xchiʼile (1 Tim. 5:9).

• Jun mol ta tsobobbail ti yakal chakʼbe yipale (1 Tes. 5:12, 13; 1 Tim. 5:17).