Исһақниң яхши бир қизға өйлиниши

СИЗ биләмсиз, бу рәсимдики қиз ким? Униң исми Рибәқа. У келип көрүшмәкчи болған бу киши Исһақ. Рибәқа Исһақ билән той қилмақчи еди. Бу иш қандақ йүз бәргән?

Исһақниң атиси Ибраһим пәйғәмбәр өз оғлиға яхши бир қизни аяллиққа елип бәрмәкчи болди. У Исһақниң қананлиқ қизлардин биригә өйлинишини халимиған еди. Чүнки, қананлиқ кишиләр ялған илаһларға ибадәт қилатти. Шуңа, Ибраһим бир чакарни чақирип: “Сән мениң туққанлирим турған җай Һаранға берип, шу йәрдин бир қизни оғлум Исһақ үчүн аяллиққа елип бәр”, деди.

Ибраһимниң чакири дәрһал он төгини елип, узун сәпәргә чиқти. У Ибраһимниң туққанлири туридиған җайға йеқин келип, бир қудуқниң йенида тохтиди. Бу күн петип қалған чағ болуп, шәһәрдики қизлар қудуққа су алғили чиқидиған вақит еди. Шуңа, Ибраһимниң чакири Йәһваға: “Маңа вә төгиләргә су бәргән шу қиз, Исһақ үчүн таллап бәргиниң болсун”, дәп дуга қилди.

Узун өтмәй, Рибәқа су алғили кәлди. У чакар униңдин су сориғанда, қиз чакарға су бәрди. Андин йәнә, барлиқ уссап кәткән төгиләргиму су әкелип бәрди. Бу наһайити җапалиқ иш еди. Чүнки, төгиләр бәк көп су ичиду.

Рибәқа төгиләргә су бәргәндин кейин, Ибраһимниң чакири униңдин атисиниң исмини сориди. У йәнә уларниң өйидә бир кечә қонушни өтүнди. У: “Атамниң исми Бетуел, бизниң өйдә силәр қонғидәк җай бар”, деди. Ибраһимниң чакири, Бетуелниң Ибраһимниң қериндиши Наһорниң оғли екәнлигини биләтти. Шуңа, у тизлинип сәҗдә қилип, Йәһваниң уни Ибраһимниң туққанлириниң қешиға башлап кәлгәнлигигә рәхмәт ейтти.

Шу ахшими, Ибраһимниң чакири өзиниң немә сәвәптин кәлгәнлигини, Бетуел вә Рибәқаниң акиси Лабанға ейтип бәрди. Улар иккиси Рибәқаниң берип, Исһақ билән той қилишиға қошулди. Улар Рибәқадин сориғанда, у немә дәп җавап бәрди? У: “Болиду”, деди. У беришқа қошулди. Шуңа, иккинчи күни улар төгигә минип, Қанан зиминиға қайтиш үчүн узун сәпәргә атланди.

Улар йетип кәлгән вақитта, кәчқурун болуп қалған еди. Рибәқа бир кишиниң далада меңип жүргинини көрди. У дәл Исһақ еди. У Рибәқани көрүп бәк хошал болди. Униң аниси Сарә үч жил бурун өлүп кәткәндин кейин, шу иш сәвәплик һәсрәт чекип жүрәтти. Мана әнди, Исһақ Рибәқани бәкму яхши көрүп қалди вә униң хошаллиғи қайта башланди.