Яман бир падишаниң Мисирға һөкүмран болуши

БУ АДӘМЛӘР әву кишиләрни зорлап, җапалиқ ишқа селиватиду. Қараңа! Әву адәм бир ишчини қамча билән уруватиду. Мошу ишчилар Яқуп пәйғәмбәрниң кейинки әвлатлири болуп, исраиллар, дәп аталған еди. Уларни уруп, мәҗбурий ишқа селиватқанлар болса мисирлиқ адәмләр. Исраиллар мисирлиқларға қул болуп ишләватиду. Ундақта, улар қандақ болуп қулға айлинип қалди?

Яқупниң чоң аилиси нурғун жиллар Мисирда теч-аман турмуш кәчүрди. Мисирда фирәвндин кейин қалсила, Йүсүп пәйғәмбәр әң муһим шәхс еди. У бу чоң аилидин хәвәр алатти. Амма, Йүсүп өлүп кәтти. Кейин исраилларни яхши көрмәйдиған йеңи бир фирәвн Мисирға падиша болди.

Шуниң билән, бу залим падиша исраилларни қул қилған еди. У бир қисим залим вә рәһимсиз кишиләрни исраилларни башқурушқа қойди. Улар исраилларни, фирәвн үчүн шәһәр бена қилишқа мәҗбурлап җапалиқ ишқа салди. Амма, исраилларниң сани барғансири көпәйди. Узун өтмәй, мисирлиқлар исраилларниң саниниң көпийип, күчиниң зор болуп кетишидин қорқти.

Шу сәвәп, фирәвнниң немә иш қилғанлиғини биләмсиз? У исраил аяллириниң бала туғушиға ярдәм беридиған туғут анилириға: “Силәр чоқум барлиқ туғулған оғул бовақларни өлтүрүветиңлар”, дәп буйруқ қилди. Амма, улар яхши аяллар еди, бовақларни өлтүрмиди.

Шуңа, фирәвн барчә Мисир хәлқигә: “Исраилларниң барлиқ оғул бовақлирини өлтүрүп, пәқәт қиз бовақлирини һаят қалдуруңлар”, дәп буйруқ чүшәрди. Бу немә дегән қорқунчлуқ буйруқ?! Биз бирликтә, бир оғул бовақниң қандақ һаят қалғанлиғини көрүп бақайли.