Olonepele Suku wa Viyonguile?

Etambululo vondaka yaleluka lieli liokuti—sio. Tu kũlĩhĩsi momo lie.

SUKU wayonguile okuti omanu vosi vakala ciwa kuenda vakuata esanju komuenyo wavo. Catiamẽla kokululikiwa kuomunu tutanga ndoco: “Suku wa popia hati: ‘Tu luliki omunu ukuacisetãhãi cetu, oco a viale kolõsi viovokalunga, lolonjila viovusenge, lokovinyama viovimbo, lokoluali luosi kuenda kovipuka viosi vilikoka posi.’” Eci amãla okululika ovina viosi vikasi voluali, “Suku wa limbuka okuti ovina viosi a lulika viaposoka.”—Efetikilo 1:26, 31, NW.

Otembo yilo olondaka via Suku citava okuti vipopia hati, olonepele ‘viwa’? Sio hacoko vipopia, omo okuti “Suku eye ocisola.” (1 Yoano 4:8) Kokuaye kupopiwa olondaka viokuti ‘katati omunu la umue lolonepele’ kuenje “lupange waye wa lipua. Momo olonjila viaye viosi viesunguluko. Haeye Suku yocili, ka kuete etime. Ukuesunga, wa suñama cimue.” (Esinumuĩlo 10:17; 32:4, cisokisa la Yovi 34:19.) Kuenda upostolo Petulu wamãlusula lokupopia hati: “Nda limbuka ocili, okuti Suku ka kuete ocame, puãi, volofeka viosi, wosi u sumbila loku linga esunga, u sungulukila.”—Ovilinga 10:34, 35.

Omo okuti Suku ukuacisola, wasunguluka, kuenda kakuete olonepele locame, citava ndati okuti o lulika omanu lolonepele viapiñaliwa lokukevelela oco ovo vakuate esanju? Okuecelela ombuanja pokati komanu na canena atatahãi kekalo liaye. Eye wayonguile okuti omanu vosi “vacitiwa lokukolapo kuenda vakuata ekalo limuamue liesunga.” Pole, otembo yilo ovina kavikasi ndomo eye ayonguile. Momo lie?

Koku Kuatundilila Olonepele

Ndaño Suku, omanu wavapanga oco valisoke eci hacilomboloka okuti eye wayonguile okuti ekalo liavo lilisoka kovina viosi. Ovo vapondola okulinga ovoloño alitepa, kuenda ekalo liavo lialitepavo. Ovo nda valitepa kunene wetimba kuenda okusongola kuavo nda kualitepavo. Ndeci, ulume lukãi kavalisokele kovina viosi, pole Suku walulika ukãi oco alinge “oñuatisi” yulume. (Efetikilo 2:18) Olonali kavialisokele lomãla kokusongola. Ndaño ovo kavalisokele kekalo liavo, pole, vosi yavo—cikale alume, ale akãi kuenda omãla—Suku wavalulika oco vasunguluke kuenda oco vakuate onjongo yimuamue yokutẽlisa ovihandeleko viesanju. Vosi yavo nda vakuata ekalo limuamue kovaso a Suku.

Cimuamue haico okuti, omãla va Suku vespiritu, valulikiwa tete eci omanu kavalulikiwile handi, vatambula ovopange alitepa. (Efetikilo 3:24; 16:7-11; Isaya 6:6; Yuda 9) Omo okuti, ovopange ovo vatambuile eliangiliyo limue lia Suku nda ovopange aco avanenela esanju komuenyo wavo vonepa yimue yalisoka. Omo liaco ovo vatambuile onjila yimue yasunguluka ku Suku kakuete olonepele.

Cisumuisa calua omo okuti, ocilulikilo cimue cespiritu kacasanjukile lovihandeleko via Suku kakuete olonepele. Eye wayonguile okutambula vali calua okuti eci Suku owiha cisule, kuenda wayonguile okukala pomangu yavelapo vali. Lokuamasako lonjongole yaco eyi kayasungulukile, walisuvuka la Yehova, okuti eye Ululiki wavelapo okasi pomangu yavelapo okuti eye ukuonene wosi. Noke omõla waco wa Suku wespiritu lusuanji waye, wavetiya omanu oco Suku avaihe ovina vialua okuti evi vatambuile tete cisule. (Efetikilo 3:1-6; cisokisa la Isaya 14:12-14.) Omo liaco, cosi Yehova angiliyile oco cisanjuise omanu komuenyo wavo, cakapiwa vatatahãi. Ocisuanji caco eci cespiritu, kelivulu Liesituluilo 20:2, citukuiwa okuti eye ‘Eliapu haiye Satana,’ okuti walinga ongangala yivetiya omanu oco valikuatele olonepele.

Eteke Limue Ekalo Likapongoloka?

Etambululo vondaka yaleluka lieli liokutioco!

Helie puãi opondola okupongolola ekalo? Olombiali viomanu, olohembi, vikasi okunena ovitangi vokuenda kuovita vianyamo. Cosi ovio visokiya cisulila, kuenda kavikuete epondolo liokusongola ciwa oco omanu kavakakuate vali olonepele. Pole ocisimĩlo ca Suku cilekisiwa kelivulu lia Isaya 55:10, 11; oku lipopia okuti: “Ndeci ombela la neve vi tapela ongongo loku yi yovisa, okuti yeca ombuto kukuakukũla. Kuenda okulia kukuakulia, haico ondaka yi tunda vomẽla wange; ka yi tiukila ño kokuange, puãi yi linga ndeci nda panga oku tẽlisa, leci nda yi tumĩla.”

Hesanjukuolio cinena okukũlĩha okuti Yehova Suku okasi okutusapuila catiamẽla konjongole yaye okuti omanu vosi vakakuata ekalo limuamue komuenyo kuenda vakasanjuka! Omo okuti Suku eye muẽle ukuacili, eye okatẽlisa eci alikuminya. Ocili okuti, eye okuete onjongole kuenda opondola okutẽlisa olohuminyo viaye. Okavitẽlĩsa ndati? Etambululo lisangiwa kueci Yesu alongisa kolondonge viaye viosi catiamẽla kokulikutilila hati: “A Isietu o kasi kilu. . . . Usoma wove wiye. Ocipango cove ci lingiwe posi ndeci ci lingiwa kilu.” (Mateo 6:9, 10) Ocili okuti, Usoma wa Suku owo onjila Yehova akakuama oco ‘unyõle ovosoma osi [akasiko ndeti], kuenje owo ukakala otembo yenda hũ.’—Daniele 2:44.

Pokati Kusoma wokilu, ocisoko cokaliye comanu cikatumbuluiwa. Omo liaco, upostolo Yoano wasoneha Vembimbiliya kelivulu liasulako Liesituluilo hati: “Oco nda mola ilu liokaliye longongo yokaliye, momo ilu lina liatete lia senguluka longongo yatete.” (Esituluilo 21:1) Kakukakala vali elaviso liolonepele—uhukũi, ovovei, lombuanja, kuenda ovina vikuavo vinena ohali komanu.a

Vokuenda kuovita vianyamo, Olombangi via Yehova vikasi okulekisa komanu catiamẽla Kusoma waco. (Mateo 24:14) Pokati kalivulu apangiwa kumue lekuatiso liomunu lomunu, ovo vasiata okulikolisilako lokukuatisa omanu oco vakuate ukũlĩhĩso wonjongole ya Suku ndomo casonehiwa Vembimbiliya. Omo liaco, upange wavo wokulongisa voluali luosi, kaweci lika komanu elavoko liekalo lialisoka kuenda okukuata esanju kotembo yokovaso, pole ovo vasiata ale okukuatisa omanu kokuyula ohali yitunda kolonepele. Tutali ndamupi.

[Atosi]

[Etosi liavelapo kemela 5]

Suku wayonguile okuti omanu vosi vakuata ekalo lialisoka komuenyo kuenda vasanjuka.