Lùlio

Gesù el ga fato tuto pròpio compagno a so Pare, anca quando el ga doperà so poder. (Gio. 14:9) Cossa che podemo imparar dei miràcoli de Gesù? Lu e so Pare i ne ama tanto. Quando l’era nela Tera, Gesù el ga mostrà tanto amor parché el ga doperà el so poder par giutar quei che i era drio sofrir. Una volta, due òmini orbi i ghe ga domandà aiuto. Quei òmini “i ghe ga fato pecà a Gesù e lu li ga curadi”. (Mat. 20:30-34) Le parole “ghe ga fato pecà” in greco le vol dir che Gesù el ga bio un forte sentimento, come se fusse un bruto dolor, quando el ga visto el sofrimento de quei òmini. E l’è stà anca par causa de questo forte sentimento de amor che Gesù el ga curà un leproso e el ghe ga dato de magnar ale persone. (Mat. 15:32; Mar. 1:41) Alora, podemo esser pròpio sicuri che Geovà e Gesù i ne ama tanto e i sofre anca lori quando semo drio tribolar. (Luc. 1:78; 1 Pie. 5:7) Lori i ze pròpio premosi de finir col sofrimento de tute le persone! w23.04 p. 3 §§ 4, 5

No ghemo mai de leder gnanca scoltar gnente che sìpia sbalià. Invesse, ghemo de studiar la Bìblia e pensarghe sora quel che imparemo, ndar sempre ala riunion e ala predicassion. Geovà sol assarà che infrontemo quel che saremo boni de dàrghene fora. (1 Cor. 10:12, 13) Se femo cossita, podemo esser sicuri che Geovà el ndarà giutarne a dàrghene fora cola voia de far robe sbaliade. Tuti noantri ghemo de pregar a Geovà par seitar fedeli a lu in questi ùltimi giorni. Geovà el vol che ghe parlemo tuto quel che sentimo e pensemo. (Sal. 62:8) Ghemo anca de lodarlo e ringrassiarlo par tute le robe bone che lu el ne fà. Anca ne ocore domandarghe coraio par predicar, e aiuto par dàrghene fora coi problemi e cola voia de far quel che l’è sbalià. E no podemo mai assar che gnente o nissuni ne intrighe de seitar a servir a Geovà. w23.05 p. 7 §§ 17, 18

Noantri ndemo ale riunion parché volemo adorar a Geovà e incoraiar i nostri fradei che i ze drio infrontar tante brute dificoltà. (Sal. 26:12; 111:1; 1 Tes. 5:11) E lodemo a Geovà e incoraiemo i nostri fradei quando levemo su la man e femo i nostri comentari. Ma pol esser fadiga farlo. Parché? Fursi restemo massa preocupadi e con paura de comentar o no comentemo tute le volte che volarìssino parché fradel no’l ne ciama sempre che alsemo su la man. Alora, cossa pol giutarne? El apòstolo Paolo el ga scrito ai fradei ebrei che “ghemo pròpio de incoraiarse un al altro”. Ricordarte che anca un comentàrio con poche parole pol incoraiar i to fradei ndarà giutarte a no gaver tanta paura de levar su la man. E anca se no te sì bon de comentar tute le volte che te volarissi, te restarè contento de veder la fede dei altri nei so comentari. — 1 Pie. 3:8. w23.04 p. 20 §§ 1-3

Fea belche 70 ani che i israeliti i era stati menadi a Babilònia. Fursi i pensea che mai i podaria ndar via, parché Babilònia no la assea che le persone che le era state portade lì le tornesse ale so tere. (Isa. 14:4, 17) Ma, ga sucedesto una roba de gnanca creder! Nantra nassion la ga tolto el poder de Babilònia e el novo rè el ga assà i israeliti lìberi par tornar ala so tera. (Esd. 1:2-4) Sol Geovà el podea far una roba cossita. Ma tuti i israeliti i gavea una granda dessision de far. Lori i gavea de scòlier se i ndea seitar in Babilònia o se i tornaria ala so tera. Tanti israeliti deromai i era veci par far quel longo viaio. Anca ghen’era tanti che i era nassesti in Babilònia, e par lori, Israel l’era sol la tera ndove i so antenati i gavea vivesto. E pol esser che arquanti giudei i era deventadi siori in Babilònia. Alora saria fadiga assar indrio le so case e i so negossi par ndar de star nte un posto che no i cognossea mia. w23.05 p. 14 §§ 1, 2

La Bìblia la mostra che l’è importante seitar a gaver perseveransa, compassion e amor. Luca 21:19 dise: “Par causa dela vostra perseveransa, valtri gavaré la vita.” Colossensi 3:12 dise: ‘Gavé de vestirve de compassion.’ E 1 Tessalonissensi 4:9, 10 dise: ‘Dio el ve insegna a amar un al altro. Ma noantri ve domandemo de seitar a mostrar questo amor cada volta de pi.’ Tuti questi testi i ze stati scriti ai dissìpoli che belche i mostrea perseveransa, compassion e amor. Ancora cossita, lori i gavea de seitar a mostrar queste qualità, e noantri ghemo de far compagno. Alora, proa veder come che i primi dissìpoli de Cristo i ga mostrà cada una de queste tre qualità. Dopo, pensa come che te pol far compagno a lori e esser pronto par la granda tribolassion. Cossita, quando vien fora la granda tribolassion, ti te savarè cossa far e te sarè dessidio a perseverar. w23.07 p. 3 §§ 4, 8

No importa se la nostra speransa la ze viver nel cielo o qua nela Tera, tuti noantri ghemo de seitar a caminar nela “Strada dela Santità”. Cossita, seitaremo a adorar a Geovà adesso, e nel futuro gavaremo le benedission del so Regno. (Gio. 10:16) Del ano 1919 in qua, tante persone le ze drio ndar via de Babilònia, o sia, dele religion false, e le ze drio caminar nela “Strada dela Santità”. Geovà el ga parecià la strada par i israeliti quando li ga giutadi con tute le dificoltà che ghen’è stà par rivar fin Israel. (Isa. 57:14) Parché che podemo dir che Geovà el ga parecià la “Strada dela Santità” anca par noantri? Tanti ani vanti de 1919, Geovà el ga doperà diverse òmini che i gavea tanto rispeto par lu par giutar altri a vegner fora de Babilònia, la Granda. (Varda anca Isaia 40:3.) Cossita, tante altre persone bone le ga podesto ndar fora dela religion falsa par adorar a Geovà dela maniera giusta. w23.05 p. 15, 16 §§ 8, 9

Geovà el vol che noantri lo servimo con alegria e de volentiera. (2 Cor. 9:7) Ma, sarà che questo vol dir che ghemo de proar far de pi nela nostra adorassion a Dio sol quando ghemo voia? Sicuro che nò! Varda cossa che el apòstolo Paolo el ga dito: “Mi ghe dao bote nel me corpo e lo go come un schiavo.” (1 Cor. 9:25-27) Alora, Paolo el se ga sforsà de far quel che l’era giusto anca se no’l gavesse mia voia. Geovà l’è restà pròpio contento con Paolo e el ga benedio so sforso. (2 Tim. 4:7, 8) L’è pròpio bon che se sforsemo par far meio una roba nela nostra adorassion a Geovà, ancora che no ghemo mia tanta voia. Parché? Parché Geovà el resta pròpio contento de veder el nostro sforso. Lu el sa che, anca se no ne piase far quel laoro, semo drio sforsarse parché lo amemo. Alora, lu el ndarà benedirne compagno el ga fato con Paolo. (Sal. 126:5) E quando vedemo le benedission de Geovà, scominsiaremo a gaver ancora pi voia de far meio el nostro laoro a lu. w23.05 p. 29 §§ 9, 10

El apòstolo Paolo el ga dito che quei che i ze drio dormir no i ndarà seitar vivi dopo del giorno de Geovà. Lori no i capisse mia quel che l’è drio suceder nel mondo intorno de lori gnanca i se nicorde che el tempo l’è drio passar. Par quela, no i vede che quel che l’è drio suceder l’è tanto importante. Ancoi, quasi tute le persone le ze come che drio dormir. (Rom. 11:8) Cossita, lore no le vede che semo nei “ùltimi giorni” e che la granda tribolassion la ze pròpio darente. (2 Pie. 3:3, 4) Noantri, invesse, savemo che l’è cada volta pi importante seitar desmissiadi. (1 Tes. 5:6) Ghemo de esser calmi e pensar ben vanti de far qualcossa par no meterse nela polìtica e nei assunti del mondo de ancoi. Intanto che rivemo pi darente del giorno de Geovà, sarà cada volta pi fadiga no meterse nela polìtica parché le persone le volarà che ciapemo una banda. Stesso cossita, no ghemo mia de preocuparse parché el spìrito santo de Dio ndarà giutarne a seitar calmi e a far bone dessision. — Luc. 12:11, 12. w23.06 p. 10 §§ 6, 7

Cossa che te vien in mente quando te scolti el nome Sanson? Pol esser che te te ricordi che lu l’era un omo pròpio forte e che el ga fato tante robe bone. Ma lu el ga fato una bruta dessision che lo ga fato sofrir tanto. Ancora cossita, Geovà no’l se ga desmentegà de tuto quel che el gavea fato de bon. Par quela, lu el ga assà el esémpio de Sanson nela Bìblia par giutarne fin ancoi. Geovà el ga doperà Sanson par far robe de gnanca creder e par giutar i israeliti. Par quela, tanti ani dopo che Sanson l’è morto, Geovà el ga volesto che Paolo el parlesse de lu insieme a altre persone che le ga mostrà una granda fede. (Ebr. 11:32-34) El esémpio de Sanson pol incoraiarne tanto, parché el se ga fidà in Geovà anca quando el ga bio dificoltà. El so esémpio pol giutarne e podemo imparar tanto de lu. w23.09 p. 2 §§ 1, 2

Pol esser che adesso no te sì mia drio infrontar una bruta dificoltà. Ancora cossita, domanda el aiuto de Geovà se te infronti problemi pi pìcoli, se te te senti disgustà o se no te sè cossa far. Parché? Parché se te ghe conti a Geovà i to pensieri e te vè in serca del so aiuto, te farè pi forte la to perseveransa. (1 Tes. 5:17) E cossita, te sarè sicuro che Geovà el sa pròpio quel che te ghè de bisogno e che el ndarà giutarte anca quando vien fora dificoltà pi brute. (Sal. 27:1, 3) Parché che podemo dir che sarà pi fàcile perseverar nela granda tribolassion se seitemo fedeli a Geovà ancoi? (Rom. 5:3) Parché la perseveransa la farà pi forte la nostra fede de che Geovà el vol giutarne, e questa fede la ne giutarà a perseverar nele dificoltà che vegnarà fora pi avanti. — Tia. 1:2-4. w23.07 p. 3 §§ 7, 8

Geovà el ne trata cossita parché lu l’è ùmile e bondoso. Varda cossa ga sucedesto quando lu l’era pronto par finir fora la cità de Sodoma. Par meso dei so àngeli, Geovà el ghe ga dito a Lò che lu el gavea de scampar par le montagne. Ma Lò el gavea paura de ndar là, e el ga domandà se lu e la so fameia i podea ndar a Zoar. Magari, Geovà el gavea dessidio de finir fora anca quela cità. Par quela, Geovà el podaria gaver dito de nò a Lò, e farlo ndar ale montagne. Invesse, lu el ga assà che Lò el ndesse a Zoar e no’l ga mia finio fora quela cità. (Gén. 19:18-22) Tanti ani dopo, Geovà el ga mostrà bontà ale persone che le era de star in Nìnive. Lu el gavea mandà che el profeta Giona el ndesse avisar che quele persone rugne le saria finide fora. Ma dopo che le se ga ciamade grame, Geovà el ga desistio de finir fora quela cità. — Giona 3:1, 10; 4:10, 11. w23.07 p. 21 § 5

Geoàs l’è stà come una pianta sensa radise, che sol la ze bona de star su par causa de una steca. Se no ghen’è la steca, el vento la buta do. Come cossita? Intanto che Geoàs el gavea el aiuto de Geoiada, lu l’è stà fedele a Geovà. Magari dopo che Geoiada l’è morto, Geoàs el ga scominsià a far tante robe sbaliade e a ndar contra Geovà. Cossa che podemo imparar de quel che ga sucedesto con Geoàs? Noantri no ghemo de servir a Geovà sol par causa dela nostra fameia o dei fradei dela congregassion. Invesse, ghemo de far pi forte nostro amor e rispeto par Geovà. Par quela, volemo sforsarse par seitar a pregar a Geovà, studiar la Bìblia e pensarghe sora quel che imparemo. (Ger. 17:7, 8; Col. 2:6, 7) La Bìblia la dise cossa che Geovà el speta de noantri: “Temi el vero Dio e obedissi ai so comandamenti parché questa la ze tuta la obrigassion del omo.” (Ecl. 12:13) Alora, quel che Geovà el ne domanda de far no l’è mia fadiga. Se noantri tememo a Geovà, o sia, ghemo tanto rispeto par lu, saremo boni de dàrghene fora con tute le dificoltà che vegnarà fora nel futuro. Cossita, gnente ndarà rovinar la nostra amicìssia con Geovà. w23.06 p. 18, 19 §§ 17-19

Apocalisse 21:5 dise: “Quel che l’era sentà nel trono el ga dito.” Alora, l’è stà Geovà che el ga parlà le parole che le vien dopo. Cossita, questo testo l’è tanto importante parché, nele vision del libro de Apocalisse, Geovà el parla sol tre volte. Alora, no l’è stà un àngelo gnanca Gesù che el ga fato questa promessa. Invesse, l’è stà Geovà! Par quela, semo sicuri che quel che dise in Apocalisse 21:5 e 6 l’è pròpio vera, parché Dio “no’l pol dir busie”. (Tito 1:2) Geovà anca el dise: “Varda!” El libro de Apocalisse el dopera la parola “varda!” arquante volte. E cossa che Geovà el ga dito dopo? “Son drio far nove tute le robe.” Cossita vedemo che Geovà el ndarà pròpio far quel che el ga prometesto. Lu l’è tanto sicuro dele so promesse che el parla come se le fusse belche drio suceder. — Isa. 46:10. w23.11 p. 3, 4 §§ 7, 8

El apòstolo Piero el ga sbalià tanto. Par esémpio, Gesù el ga spiegà ai so apòstoli che, de acordo cola Bìblia, lu el ndaria sofrir e el saria copà. Ma Piero el ghe ga dito che questo no ndaria mia suceder. (Mar. 8:31-33) Diverse volte, lu e altri apòstoli i ga barufà par veder chi che l’era el pi importante. (Mar. 9:33, 34) Nela note vanti de Gesù esser copà, Piero el ga taià fora la récia de un omo. (Gio. 18:10) Dopo, lu l’è restà tanto disgustà parché el ga dito tre volte che no’l cognossea mia so caro amigo, Gesù. (Mar. 14:66-72) Ancora che Piero el fusse tanto desanimà, Gesù el ga proà giutarlo. Par esémpio, dopo che Gesù l’è stà ressussità, lu el ga assà che Piero el mostresse che lo amea e el ghe ga domandà de tender dele so piégore. (Gio. 21:15-17) Podemo esser sicuri che Piero el ga fato pròpio quel che Gesù el gavea domandà parché l’era intrà i primi dissìpoli che i ze stati scoliesti par ndar al cielo. w23.09 p. 22 §§ 6, 7

El apòstolo Piero el ga dito ai ansiani: “Tendé dele piégore de Dio.” (1 Pie. 5:1-4) Se te sì un ansiano, sicuro che te ghe vol ben ai to fradei e sorele e te vol tenderli. Ma pol esser che, dele volte, te te senti stufo e te ghè massa laori de far. Alora, come che te pol tender ben dei to fradei? Prega a Geovà e contaghe come che te sì drio sentirte. Varda quel che Piero el ga scrito: “Se qualchedun el serve, che el fae questo nela forsa che Dio el ghe dà.” (1 Pie. 4:11) Fursi i fradei i ze drio tribolar con un problema che ndarà risolverse sol nel novo mondo. Alora, ricòrdate che Gesù l’è la meio persona par giutarli adesso e che el sarà bon de finir fora coi so problemi nel futuro. Geovà sol el vol che te mostri amor ai fradei, che te li tendi e che te sìpia un bel esémpio par lori. w23.09 p. 30 §§ 13, 14

No ghemo mia de ndar drio la maniera de pensar de quei che no i obedisse a Geovà. Tanti i pensa che la meio maniera de viver l’è far quel che i vol sensa badar a Dio. Se pensemo compagno a lori, anca noantri ndaremo desobedir a Geovà. (1 Cor. 3:19) Par esémpio, nel passà, arquanti dissìpoli de Gesù dele cità de Pèrgamo e Tiatira i ga scominsià a far imoralità e a adorar falsi dèi, compagno ale persone de quele cità. Par quela, Gesù el ghe ga dato un forte consìlio. (Apo. 2:14, 20) Pol esser che quei dela nostra fameia e altre persone che cognossemo i proa farne pensar che no ne ocore obedir a tuto quel che la Bìblia la dise e che podemo far quel che volemo. Fursi lori anca i dise che quando la Bìblia la ze stata scrita la vita la era tanto difarente e che l’è massa fadiga obedirla ancoi. Ancoi Geovà el ne dà orientassion par meso dela Bìblia e dela so organisassion. Ma, pol esser che, dele volte, pensemo che ghemo bisogno de de pi orientassion de quele che ricevemo. Alora, fursi ne vien voia de far noantri stessi una règola. — 1 Cor. 4:6. w23.07 p. 16 §§ 10, 11

Maria, so mare de Gesù, la gavea bisogno de aiuto. Ela la gavaria un fiol e no la era gnancora maridada. El so fiol el deventaria el Messia, ma ela no la savea mia come slevar su un toseto. Anca saria pròpio fadiga spiegar a Giusepe cossa che l’era drio suceder parché ela ancora la era vèrgine. (Luc. 1:26-33) Cossa che Maria la ga fato par gaver la forsa che ghe ocorea? Ela la ze ndata in serca del aiuto dei altri. Par esémpio, Maria la ga domandà che el àngelo Gabriel ghe contesse de pi sora cossa che ndaria suceder e cossa che la gavea de far. (Luc. 1:34) Dopo, “la ze ndata svelta fin una cità nei monti de Giudà” par catarse con Elizabete, che la era dela so fameia. Elizabete la ga lodada e la ga fato una professia sora el fiol de Maria. (Luc. 1:39-45) Alora, Maria la ga dito che Geovà el gavea mostrà el so grando poder. (Luc. 1:46-51) Sicuro che Geovà el ga incoraià Maria par meso del àngelo Gabriel e de Elizabete. w23.10 p. 14, 15 §§ 10-12

Par meso del so spìrito santo, Geovà el ga scoliesto 144 mila persone che le ndarà servir come sasserdoti nel cielo insieme a Gesù. (Apo. 14:1) Intanto che lore le ze qua nela Tera, Geovà le ga scolieste par esser so fioi. Alora, el Santo del tabernàcolo vol dir che questi 144 mila i ga una relassion spessial con Geovà. (Rom. 8:15-17) El Santìssimo del tabernàcolo vol dir el cielo ndove Geovà l’è de star. “La coltrina”, che la spartia el Santo del Santìssimo, vol dir el corpo de Gesù quando l’era qua nela Tera. Quando el ga dato la so vita come sacrifìssio, lu el ga perso quel corpo de carne e l’è stà bon de tornar al cielo come Prinsipal Sasserdote del témpio spiritual. Cossita, anca i 144 mila i ndarà al cielo dopo che se finisse la so vita qua nela Tera. — Ebr. 10:19, 20; 1 Cor. 15:50. w23.10 p. 28 § 13

Una volta, i òmini de Efrain i ga sbrontolà par causa de una roba che Gideon el gavea fato. Ma Gideon no l’è restà cativo. (Giui. 8:1-3) Gideon li ga scoltadi con calma e ghe ga rispondesto con bontà. Come che i ansiani i pol far compagno a lu? Quando qualchedun el sbrontola par causa de quel che te ghè fato, sfòrsate par scoltarlo con calma e risponderghe con bontà. (Tia. 3:13) Cossita, ghen sarà pace nela congregassion. Quando Gideon el ga vinsesto Midian, i israeliti i lo ga lodà tanto. Magari, Gideon el ga dato el onor a Geovà. (Giui. 8:22, 23) Come che i ansiani i pol far compagno el so esémpio? Lori i ga de ricordarse de sempre lodar a Geovà par tuto quel che i ze boni de far. (1 Cor. 4:6, 7) Par esémpio, pol esser che un ansiano l’è bon de far bei discorsi. Alora, se qualchedun lo loda, lu el ga de dir che tuto quel che el ga parlà vien dela Bìblia e dela organisassion. Lori anca i ga de pensarghe sora se la so maniera de insegnar la ghe dà onor a Geovà o a lori stessi. w23.06 p. 4 §§ 7, 8

Se quel che ghemo domandà a Geovà no ga sucedesto, podemo domandarse: ‘Sarà che quel che son drio domandar l’è la meio roba?’ Parché? L’è vera che pensemo che savemo quel che l’è meio. Ma pol esser che quel che ghemo domandà a Geovà no sarà mia bon par noantri o par i altri. Par esémpio, fursi volemo finir fora con un problema dela nostra maniera, e volemo che Geovà el ne giute. Ma, no se nicordemo che ghen’è una maniera ancora meio. E pol esser che domandemo a Geovà qualcossa che no la ze mia de acordo cola so volontà. (1 Gio. 5:14) Pensa nte un pare e nte una mare che i seita a domandar che Geovà el giute so fiol a seitar a servirlo. Pol esser che ne par giusto quel che lori i domanda. Ma, Geovà el vol che tuti noantri lo servimo de volentiera, anca i nostri fioi. (Deu. 10:12, 13; 30:19, 20) Alora, saria meio che quei genitori i domandesse che Geovà li giutesse a esser boni de tocar el cuor de so fiol e giutarlo a amar a Geovà. — Pro. 22:6; Efe. 6:4. w23.11 p. 21 § 5; p. 23 § 12

Un libro el dise che la parola che Paolo el ga doperà par “dar consolo” a qualchedun vol dir ‘restar dela so banda par darghe coraio quando lu l’è drio tribolar’. Alora, parché che podemo dir che quando consolemo un fradel semo drio mostrarghe amor? Parché semo drio giutarlo a servir a Geovà anca cole dificoltà. Cossita, sempre che giutemo un fradel o una sorela che l’è drio tribolar, mostremo che lo amemo. (2 Cor. 7:6, 7, 13) Se noantri ghemo compassion dei altri, gavaremo una forte voia de consolarli quando i ze drio tribolar. Alora, ne ocore gaver compassion dele persone par esser boni de darghe consolo. Come cossita? Paolo el ga dito che Geovà “l’è el Pare dele grande compassion e el Dio de tuto el consolo”. — 2 Cor. 1:3. w23.11 p. 9, 10 §§ 8-10

Tuti i dissìpoli de Gesù i sa che una ora o l’altra i ndarà tribolar. Come cossita? Varda el esémpio del apòstolo Paolo. Lu el ga dito ai tessalonissensi: “Quando che noantri èrino con valtri, ve ghemo dito che gavarìssino de sofrir tribolassion e, come che valtri savé, questo l’è quel che l’è drio suceder.” (1 Tes. 3:4) E lu el ga dito ai fradei corinti: ‘Parché no volemo, fradei, che valtri resté sensa saver dela tribolassion che gavemo passà. Semo restadi tanto preocupadi fin cola nostra vita.’ (2 Cor. 1:8; 11:23-27) Tuti noantri savemo che ndaremo tribolar. (2 Tim. 3:12) E se ti te servi a Geovà, pol esser che i to amighi o quei dela to fameia i te ride drio o i te dise su. Fursi te sì drio infrontar dificoltà nel laoro parché te vol far tuto polito e mai ciavar i altri. (Ebr. 13:18) O pol esser che te sì drio infrontar perseghission del governo parché te fè el laoro de predicassion. Ma Paolo el ga dito che tuti noantri podemo esser felici, no vol mia dir le dificoltà. w23.12 p. 10, 11 §§ 9, 10

Giacò el ga bio tante dificoltà. Due dei fioi de Giacò, Simeon e Levi, i ga fato un bruto pecato che el ga portà vergogna al nome de Geovà e dela so fameia. Giacò anca el ga sofrio tanto parché la so cara dona Rachel la ze morta quando la ga bio el so secondo fiol. E quando Giacò deromai l’era vècio, una bruta fame la ze vegnesta fora e ghe ga tocà ndar de star nel Egito. (Gén. 35:16-19; 37:28; 45:9-11, 28) Dopo de tuto quel che ghe ga sucedesto, Giacò no’l ga mai assà de fidarse in Geovà e nele so promesse. Par quela, Geovà lo ga sempre giutà. Par esémpio, Giacò l’è stà benedio e el so capital l’è restà cada volta pi grando. E sicuro che lu el ga ringrassià tanto a Geovà quando el se ga catà nantra volta col so fiol Giusepe. La forte amicìssia che Giacò el gavea con Geovà lo ga giutà a dàrghene fora con tute queste dificoltà. (Gén. 30:43; 32:9, 10; 46:28-30) Se se sforsemo par gaver una forte amicìssia con Geovà, anca noantri saremo boni de dàrghene fora cole dificoltà che sucede de colpo. w23.04 p. 15 §§ 6, 7

Nel Salmo 23, Davi el ga mostrà che l’era sicuro che Geovà lo amea e lo tendea. Lu el ga parlà dela amicìssia che ghen’era intrà de lori e el ga parlà che Geovà l’era el so “Pastor”. Davi el ga parlà cossita parché el se fidea del tuto in Geovà e el savea che Dio sempre el ghe diseria quel che el gavea de far. Davi el savea che Geovà el seitaria a amarlo par sempre. Cossa che lo ga giutà a esser sicuro cossita? Davi l’era sicuro che Geovà l’era drio tenderlo. Parché? Parché Geovà sempre el ghe ga dato quel che el gavea de bisogno, l’era so amigo e el mostrea che l’era contento con Davi. Alora, no importa quel che sucedesse, Davi l’era sicuro che Geovà sempre el ndaria giutarlo. Anca se tante dificoltà le ze vegneste fora, Davi el seitea contento parché el se fidea che Geovà el ghe volea tanto ben e el ndaria giutarlo. — Sal. 16:11. w24.01 p. 28, 29 §§ 12, 13

Dela Seconda Guera Mondial avanti, i servi de Geovà i ze stati boni de predicar in tanti paesi, e persone de tuto el mondo le ga cognossesto la verità. Ancoi, i fradei del Corpo Governante i va drio ale orientassion de Gesù. La Bìblia la dise che questi ansiani untadi i ze “nela man drita” de Cristo. (Apo. 2:1) Lori sempre i proa saver se quel che i fà l’è pròpio quel che Gesù el vol. E i superintendenti de sircuito e i ansiani i dopera quel che i fradei untadi i dise par tender dele congregassion. Savemo che tuti i ansiani i ze imperfeti e i pol far sbali. Ma Moisè, Giosuè e anca i apòstoli i ga fato sbali. (Nùm. 20:12; Gios. 9:14, 15; Rom. 3:23) Ancora cossita, podemo esser sicuri che Geovà el ga scoliesto questi òmini. Alora, podemo fidarse nele orientassion che Gesù el ne dà par meso de questi bravi òmini. w24.02 p. 23, 24 §§ 13, 14

Quando discoremo cole persone, podemo mostrar che amemo a Geovà e che ghe demo valor a tuto quel che lu el fà par noantri. Nela predicassion, volemo giutar le persone a deventar amighe de Geovà e a veder che lu l’è un Pare che el ne ama tanto. (Tia. 4:8) Ne piase insegnar la Bìblia ai altri e giutarli a capir tante qualità de Geovà, come el amor, giustìssia, sabedoria e poder. E come che podemo lodar a Geovà anca nela nostra vita? Ghemo de sforsarse par ndar drio al so esémpio. (Efe. 5:1) Cossita, le persone le ndarà veder che semo difarenti dei altri. Alora, podaremo spiegarghe parché che semo cossita. Fursi arquanti i volarà imparar de pi sora Dio. Sicuro che, quando lodemo el nome de Geovà, lu el resta tanto contento. — 1 Tim. 2:3, 4. w24.02 p. 10 § 7

Par esser un bravo servo de Geovà, te toca imparar a far arquante robe. Cossita, te sarè bon de giutar nela congregassion, catar un laoro, tender dela to fameia e gaver bele amicìssie. Par esémpio, te pol imparar a leder e a scriver ben. La Bìblia la dise che tuto ndarà ben cola persona che la lede la Bìblia e la ghe pensa sora. (Sal. 1:1-3) Quando una persona la lede la Bìblia tuti i giorni, la ze bona de capir come Geovà el pensa e de meter in pràtica i consili dela Bìblia. (Pro. 1:3, 4) I fradei che i sa doperar ben la Bìblia par insegnar e darghe consili i ze boni de giutar tanto la congregassion. Alora, se te sè leder e scriver ben, te ndarè pareciar boni discorsi e boni comentari che incoraia i fradei. Te podarè anca scriver do bele robe che giutarà la to fede a deventar cada volta pi forte e anca a incoraiar i to fradei. w23.12 p. 26, 27 §§ 9-11

Alora, quando te ghè paura, pensaghe sora quel che Geovà el ndarà far nel futuro quando Sàtana el sarà finio fora. Nel congresso de 2014, ghemo bio una dimostrassion ndove una fameia la parlea come saria la so vita in Paradiso. Lori i ga pensà come el testo de 2 Timòteo 3:1-5 saria difarente nel novo mondo. Questo testo el saria cossita: “Ma te ghè de saver che nel novo mondo ghen sarà i tempi pi felici de tuti. Parché le persone le amarà i altri, le amarà la verità, le sarà ùmile, le ndarà adorar a Dio, le sarà obediente ai genitori, le darà valor a quel che i altri i fà, le sarà leai, le gavarà amor a quei dela so fameia, le sarà bonasse, sempre le ndarà parlar ben dei altri, le gavarà passiensa, le sarà manse e le amarà quel che l’è bon, le sarà de fidarse, le gavarà bon giudìssio, le pensarà de maniera ùmile, le amarà a Dio invesse dei piaseri. Le lodarà a Dio con tuto el cuor. Stà darente de lore.” Cossa pénsito de parlar cola to fameia e coi fradei sora la vita nel novo mondo? w24.01 p. 6 §§ 13, 14

L’è tanto bel saver che Geovà el dà valor ai so servi qua nela Tera. La Bìblia la dise: “Geovà el resta contento col so pòpolo.” (Sal. 149:4) Ma pol esser che fursi se domandemo: ‘Sarà che Geovà el dà valor anca a mi?’ Tanti servi de Geovà del passà i fea fadiga creder che Geovà el ghe dea valor. (1 Sam. 1:6-10; Giò 29:2, 4; Sal. 51:11) La Bìblia la mostra che anca umani imperfeti i ga valor par Geovà. Chi? Quei che i ga fede in Gesù e i se batesa. (Gio. 3:16) Quando femo queste robe, mostremo che se ghemo ciamà grami dei nostri pecati e che ghemo fato la promessa de viver par far la volontà de Geovà. (Ati 2:38; 3:19) Geovà el resta tanto contento quando femo queste robe e mostremo che volemo esser so amighi. Se femo el nostro meio par far quel che ghemo prometesto a Geovà, lu el ne dà valor e el ne vede pròpio come so amighi. — Sal. 25:14. w24.03 p. 26 §§ 1, 2

Se i governi i dise che ghemo de fermarse de predicar, noantri ghemo de far compagno a quei dissìpoli. Podemo esser sicuri che Geovà el ne giutarà nela predicassion. Prega che el te dae coraio e sabedoria e aiuto par dàrghene fora coi problemi. Tanti de noantri sofrimo parché semo desanimadi, maladi o parché l’è morto qualchedun che amemo. Arquanti i sofre par causa de un problema nela fameia, perseghission o altre robe. E l’è ancora pi fadiga portar avanti se vien fora una pandemia o una guera. Alora, cossa che pol giutarne a infrontar questi bruti colpi? Pregar a Geovà e parlarghe tuto quel che semo drio sentir. Ghemo de proar parlar con Geovà compagno ndarìssino parlar con un caro amigo e esser sicuri che lu el ndarà giutarne. (Sal. 37:3, 5) Se seitemo pregar a Geovà, saremo boni de dàrghene fora cole dificoltà. (Rom. 12:12) E podemo esser sicuri che lu el ndarà scoltarne. — Sal. 145:18, 19. w23.05 p. 5, 6 §§ 12-15

Vanti de far una dessision importante, ghemo de capir “quala che la ze la volontà de Geovà” e dopo far quel che lu el vol. (Efe. 5:17) Quando catemo fora prinsipi dela Bìblia che i ne giuta, podemo capir quel che Geovà el pensa. Dopo, se metemo in pràtica quel che ghemo imparà podemo far bone dessision. ‘El Perverso’, o sia, Sàtana, l’è el nostro nemigo. (1 Gio. 5:19) Lu el vol che doperemo nostro tempo con altre robe invesse de doperarlo par adorar a Geovà. Alora, ghemo de star atenti parché l’è tanto fàcile ndar drio ai soldi, studi e laori invesse de proar cambiar la vita par far de pi par Geovà. Ancora che queste robe no le sìpia mia sbaliade, no le ze mia pi importante che la nostra adorassion a Geovà. Quei che i va in serca de queste robe del mondo i mostra che i ze drio pensar compagno ale persone che no le serve a Dio. w24.03 p. 24 §§ 16, 17