Ekampanya Yaapakiwe Saana Ennikumiherya Sooreera
María Isabel ti namalaleerya mwammiravo ooluttuweliwa esidade ya São Bernardo wAmerica do Sul elapo ya oChile. Owo ni emusi awe ta nloko na Mapuche animaka mutakhwani. Nto emusi yotheene ennikhaliherya vanceene wira opakiwe muloko musya wa nttaava na eMapuche nniihaniwa Mapudungun.
Okathi vaalaleiwe aya wira mwaha wa Wuupuwelela Okhwa wa Yesu onkela wiiriwa ni nttaava na Mapudungun, ni wira saahipakiwa ipaphelo sa olattuliwa atthu sowiiraka 2.000, sa nttaava nle, yaahimwiiriha María Isabel wuupuwelela so: Kinrowa opaka exeeni wira kikhaliherye? Owo ahuupuwelela sowiiraneya sa Anamoona akina yaakhumenle saana mwaha wa waalaleerya apatthani a oxikola. Murokora ola aahilavula ni anamuyari awe nto otheene aya yaaheemererya wira María Isabel akaweke ipaphelo sa waalattula atthu oxikola. Nto palano xeeni ampanke awe?
Wanipacerya, María Isabel ahaavekela ahooleli a oxikola wira emweemererye ophatteya epaphelo emosa vaxirini ya oxikola vamukhora. Awosa yaaheemererya yoovekela awe nave yaahimuttottopela. Nihiku nimosa voosiisu, muhooleli mulopwana a oxikola, aarumeelaka altufalanti, aahilaleya ipaphelo iye sa nlattulo!
Nto María Isabel aahivekela oxekurya isaala sotheene sa oxikola. Nuumala weemiheriwa ni maprusoore, owo aahaakoha anaxikola akhwaawe akhala wira yaari a nloko na Mapuche, eyo piiyo ale anilavula nttaava Mapudungun. María onihimya so: “Koona wira kinrowa waaphwanya anaxikola 10 wala 15, ari a imusi sa Mapuch; masi kahaaphwanya anceene; kaahiwerya okawa ipaphelo sa nlattulo soovikana 150!”
‘OWO ANWEHERERYA MUTTHU MUULUPALE’
Muthiyana mmosa aawenhe ipaphelo iye vamukhora va exikola, aahivekela wira amusuwele mutthu aarowa awe olavulana mmwaha ole wa ipaphelo sa nlattulo. Nkahaya muupuwele oxankiheya aarina awe nuumala othoonyeriwa mwali aarina paahi iyaakha 10! Atheyaka vanceene, María aahilavula wira: “Owo anwehererya mutthu muulupale”. Nuumala onvaha muthiyana ole epaphelo ya nlattulo, María Isabel aahinvekela wira amutthokiherye ephiro ya owannyawe wira arowe ni anamuyari awe wira yaamutthokiherye myaha sikina sa Omwene wa Muluku. Tthiri waari ohakalala wuulupale yaarina aya anamalaleerya 20 anirumeela muttetthe wa nttaava na Mapudungun, onweha muthiyana ole arwaaka ni atthu 26 yaawo yaasiveliwe wira erowe omuthukumanoni wa Wuupuwelela Okhwa wa Yesu. Vano ola ori muloko onikhumela saana!
Moohicala munnuwelo wa iyaakha sanyu, niireke nyuwo munniimananiha waalattula atthu anivara anyu miteko vamosa wira erowe Yuupuwelele Okhwa wa Yesu, wala orowa okonkresuni? Nthowa xeeni muhinitokosa anyu iliivuru sahu wira moone sowiiraneya sinkela woovahani ankhili a moota wookhumela saana ikampaanya ntoko iyo? Nave munvekeleke Yehova munepa awe wootteela wira mulaleeryeke ihapari sawe ni olipa murima. (Luka 11:13) Mwiira siiso, nave munrowa otikinihiwa ni ohakalala onikhumelela, ni vanceenexa olipihiwa mwaha wa okhumela saana ipalano sanyu.
[Elatarato epaaxina 32]