Nilokiherye Inamuna Sahu Soolaleerya​—Mooniherye Yoosoma ya Biibiliya Murumeelaka Eliivuru Biibiliya Oniixuttiha Exeeni

Otthuneya Waya: Anamunceene khaniiwexexa naalavulaka sa omusoma Biibiliya. Woonasa wene, anuupuwela wira ahaana wiirela mpantta egrupu ya atthu anisoma, wala ompaka kursu ni atthu a muttetthe mukina. Nto, ohiya ovaha yoosoma ya Biibiliya paahi, nihaana wooniheryaka yoosoma eyo. Mwa minutu vakhaani, hata neemenle ene, nnoowerya wooniherya wira omusoma Biibiliya ti etthu yookhweya ni yoohakalaliha.

Moota Woopaka Eyo:

• Nuumala ohimya nsina nanyu, mmukoheke mwaneene etthoko akhala wira onnixankiheya voohimya sa muhoolo.

• Muhimye wira atthu anceene nave-tho annixankiheya, ni mmooniherye epaaxina 2 ya eliivuru Biibiliya Oniixuttiha Exeeni. Mmuleele wira myaha sa eliivuru ela ti sookhweya wiiwexexa, ni sinnooniherya ele Biibiliya oniixuttiha awe voohimya sa muhoolo ni itthu sikina. Nto, munvekele mutthu owo wira athanle muru onimusivela.

• Munvahe eliivuru emosa ni mukhunule muru onirowa awe othanla. Mmutthokiherye wira makoho ari wanipacerya wa muru, anaakhuliwa ittima sinittharelana.

• Munvekele wira asome ettima yoopacerya, aaphavelaka. Moottharelana musome nikoho na ettima eyo, ni muthokorerye hoothe waakhuliwa waya. Musome soolepa sinivarihana ni waakhuliwa iwo. Mmooniherye eliivuru anyu moota mwaakhunle anyu makoho awo.

• Musome ettima enittharelana, masi vano munvekele wira omananihe waakhula nikoho nlo orumeelaka masu awe.

• Mmuttottopele, ni mwiiwanane nihiku nootthika wira mmalihe yoosoma eyo.

• Vaareerelaka, mmooniherye eviidiyu eri va jw.org, yeeyo eni: Como É um Estudo Bíblico?

Mweererye Ela Mweeri Yoola:

• Munvekele Yehova wira oreelihe wiimananiha wanyu wira mpacerihe yoosoma ya Biibiliya.​—aFil. 2:13.

• Mwaalaleeryaka, mmananiheke wooniherya yoosoma ya Biibiliya murumeelaka eliivuru Biibiliya Oniixuttiha Exeeni, wala mooniheke eviidiyu eni: Como É um Estudo Bíblico?