MMWAATTAMELE MULUKU
“Yoruma Yopajerya Mwa Molumo Othene P’ivi?”
Exeeni enitthuneya wira nimuhakalalihe Muluku? Niireke khareere malamulo anitthuneya ahu weettelaka? Waakhuliwa woohakalaliha ti woowi: nnaari. Moovarihana ni mwanawenexa Muluku, Yesu Kristu, ele Muluku ennivekela awe pooti ohimmwa ni masu vakhaani.—Mmusome Marko 12:28-31.
Wanipacerya nrowe nithokorerye ele yiiraneya okathi wa masu ala a Yesu. Owo iixuttiha mpaani mwa Muluku, nihiku na Nisani 11, ahalaka mahiku vakhaani wira aiviwe. Awanani awe yaahimukoha itthu soovila aphavelaka omphwanyana mulattu. Khula nikoho Yesu ahaakhula voohiphwanya mulattu. Nuumala-vo, aahikohiwa nikoho nla: “Yoruma yopajerya mwa molumo othene p’ivi?”—Versikulu 28.
Nla naari nikoho noovila waakhula. AYuda akina yaanyeserya wira sooruma 600, sa Nlamulo na Moise, ti saari soopacerya, wala sootthuneya. Akina yaahimya wira malamulo otheene yaari ootthuneya, ni wira khinivo nlamulo nirina efaita yuulupale ovikana nikina. Nto Yesu aarowa waakhula sai nikoho nle?
Okathi wowaakhula Yesu aahimyale malamulo manli ohiya nimosa paahi. Wanipacerya, aahimyale so: ‘Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene n’ikuru sanyu sothene’. (Versikulu 30; Otumererya 6:5) Moolumo oowi ‘murima’ ‘osuwela’ ‘eroho’ ni ‘ikuru’, pooti olikanasa yootaphulela aya.a Yootaphulela aya tiila: Omphenta Yehova ohaana ohelaka mpuwa makhalelo otheene a mutthu, muupuwelo awe ni sotheene sirina awe. Biibiliya mukina ohimyale so: ‘Muluku ohaana ophentiwa moohivukula etthu’. Nto akhala wira munnimphenta Muluku, munrowa opakaka sotheene siniwerya anyu, wira khuta nihiku Muluku otteeliweke murima.—1 Yohani 5:3.
Moottharelana Yesu aahimyale so: ‘Mwaphenteke akhw’inyu ntoko sinìphenta anyu’. (Versikulu 31; Onamukuttho 19:18) Omphenta Muluku ni akhwiihu khonivalaana. Namphentaka Muluku, vanookhweyaka waaphenta akhwiihu. (1 Yohani 4:20, 21) Akhala wira ninnaaphenta akina ntoko siniiphenta ahu, ninrowa waathokoreryaka akina ntoko siniphavela ahu othokoreriwa. (Matheyo 7:12) Mwa enamuna eyo nnimooniheryaka omphenta wahu Muluku onipattunxe hiyo otheene, ailikanyihaka mmansawe.—Maphattuwelo 1:26.
Niireke yooruma ya omphenta Muluku ni akwiihu ti yootepa otthuneya? Yesu onihimya so: “khivo yoruma ekina envikana soruma iya”. (Versikulu 31) Mwa yoohimmwa yoolikana ni ela, Yesu aahimyale so: ‘Mwa soruma iya pili sinnikhuma ikano [sooruma] sothene’.—Matheyo 22:40.
Tthiri khonivila omuhakalaliha Muluku. Sotheene Muluku onnivekela awe siri mmasu ala vakhaani: ophenta. Okhuma khalai mpakha muhoolo eyo tenrowa okhala etthu yuulupale mwa omukokhorela Muluku wekeekhai. Masi ophenta khahiyo masu wala muupuwelelo paahi; onooneya ni miteko saya. (1 Yohani 3:18) Nto xeeni ohimananihaka wiixutta moota womphenta Yehova, yoowo ori Muluku a ‘ophenta’?—1 Yohani 4:8.
Malakiheryo a omusoma Biibiliya Março:
[Enoota]
a MBiibiliyani, moolumo oowi ‘eroho’, animuhimya mutthu muneene otheene. Tivonto ‘eroho’ enihela muhina ‘murima’ ‘muupuwelelo’ wala ‘osuwela’ ni ‘ikuru’ sa mutthu.
[Eponto yuulupale ya epaaxina 13]
Sotheene Muluku onnivekela awe siri mmasu ala vakhaani: ophenta