Bantta Dosan Eeno Giidosona Turkken

‘KAWOTETTAA wonggeliyaa mishiraachuwaa’ danddayettida keenan daro asawu yootanawu koyro xeetu layttan deꞌida Kiristtaaneti keehi baaxetidosona. (Maa. 24:14) Issoti issoti kare biittikka biidosona. Leemisuwawu, kiitettida PHawuloosi misoonaawe oosuwawu ha wodiyan Turkke giyo biittay deꞌiyoosaa biidi yan loytti markkattiis.a Hegaappe 2000 gidiya layttay aadhi simmin, 2014n he biittan sabbakiyo dumma zamachan sabbakida. Zamachan sabbakidoy aybissee? He zamachan oottiday oonee?

“HANIIDDI DEꞌIYAABAY AYBEE?”

Turkken 79 miiloone asay deꞌees; qassi yan deꞌiya aassiyaageetu 2,800⁠ppe daro. Turkken 28,000 asaappe Yihoowa Markkay 1 xalla. Yaatiyo gishshawu, aassiyaageeti daro asawu sabbakana danddayibookkona. Ha zamachay guutta wodiyan danddayettida keenan daro asawu sabbakanawu halchidi giigissidoba. He zamachan, Turkke qaalaa haasayiya, 550 gidiya hara biittan deꞌiya ishatinne michoti Turkke biidi he biittan deꞌiya ishanttuuranne michonttuura issippe sabbakidosona. He zamachan oosettidabay aybee?

Keehi daro asawu sabbakidosona. Isttanbbule kataman deꞌiya issi gubaaꞌee, “Asay nuna beꞌiyo wode, ‘Ubbasan Yihoowa Markkata beꞌoos! Hagan dumma gita shiiqoy deꞌiiyyee?’ giidi oychees” yaagiis. Izmira kataman deꞌiya issi gubaaꞌee qassi hagaadan giis: “Takisee eqqiyoosan oottiya issi bitanee, ‘Haniiddi deꞌiyaabay aybee? Intte oosuwaa aassiiddi deꞌeetii?’ giidi gubaaꞌe cimaa oychiis.” Ee, he zamachan oosettiiddi deꞌiyaabaa daro asay akeekiis.

Sabbakanawu kare biittappe yiidaageeti he zamachan keehi ufayttidosona. Denmarkkeppe yiida Istifeni, “Sabbakiyo wode, Yihoowabaa mule siyi erenna asaara ubba galla gayttays. A sunttaa tumuppe erissaydda deꞌiyaabadan tawu siyettiis” giis. Paransaayeppe yiida Jin Deebidi hagaadan giis: “Nuuni daro saatiyawu issi oge xallan haggaazida. Hegee keehi ufayssiyaaba! Daro asay Yihoowa Markkata erenna. Nuuni sooppe soo biidi demmido asatuppe keehi darotuura tobbida, nu biiduwaappe issuwaa eta bessida, qassi etawu xuufiyaa immida.”

He zamachan sabbakida 550 ishanttinne michontti naaꞌꞌu saamintta xallan 60,000 xuufeta asawu immidosona! He zamachan daro asawu sabbakida.

Kaseegaappe aaruwan mishettidi sabbakanaadan denttettiis. He dumma zamachay Turkken deꞌiya ishantta keehi denttettiis. Daroti kumetta wodiyaa haggaazanawu halchidosona. Ubba hegaappe simmin deꞌiya issi layttan Turkken aqinyetu qooday xeetaappe 24 kushe dariis.

Kare biittappe he zamachawu biidaageeti bantta biitti simmidoogaappe guyyiyankka kaseegaappe aaruwan haggaazanaadan hegee eta denttettidoogaa yootidosona. Jarmaneppe yiida SHerena hagaadan gaasu: “Turkken deꞌiya ishantti haggaazuwaa kiyennan markkattanawu metootokkona. Taani haggaazuwaa kiyennan markkattanawu yayyays. SHin ha zamachan Turkke ishantti oottidobaa beꞌidonne mintta woossido gishshawu taani kase oottana danddayennabaa oottaas. Taani baaburiyan bayddakka sabbakaysinne trakttiyaa immays! Haꞌꞌi taani kaseegaadan yayyikke.”

Jarmaneppe yiida Yohaannisi hagaadan giis: “Taani kaseegaappe loytta haggaazanaadan maaddiya issi issibaa tamaaraas. Turkken deꞌiya ishantti keehi daro asawu mishiraachuwaa yootanawu koyoosona. Eti demmiyo asa ubbawu sabbakoosona. Taanikka Jarmane simmiyo wode hegaadan oottanawu qofaa qachido gishshawu haꞌꞌi kaseegaappe aaruwan daro asawu sabbakays.”

Paransaayeppe yiida Zanepa, “Ha zamachay taani loytta haggaazanaadan keehi maaddiis. Hegee taani kaseegaappe aaruwan xala gidanaadaaninne Yihoowan ammanettanaadan maaddiis” yaagaasu.

Aassiyaageeti keehi dabbotanaadan maaddiis. Dumma dumma biittaappe yiida ishanttunne michonttu siiqoynne issippetettay awudenne dogettenna. Qommoora abaa denttido Jin Deebidi hagaadan giis: “Ishantti imattaa mokkiyaageeta gidiyoogaa beꞌida. Eti nuna bantta laggenne so asaadan xeellidosona. Eti nuna bantta son mokkidosona. Nuuni kumetta saꞌan deꞌiya ishanttu maabaraa yame gidiyoogaa erays; qassi hegaabaa nu xuufetun darotoo nabbabaas. SHin haꞌꞌi hegaa beꞌaas. Taani Yihoowa Markkaa gidiyoogan kaseegaappe aaruwan ufayttays; he gita maataa tawu immido gishshawu Yihoowa galatays.”

Paransaayeppe yiida Klara hagaadan gaasu: “Nuuni yiidoy Denmarkkeppe gidin, Paransaayeppe gidin, Jarmaneppe gidin, woy Turkken deꞌin, nuuni ubbay issi keettaa asa. Hegee Xoossay ubba biittatu zawaa malaataa wogga laaphisiyan qucci xayssidoogaa mala.”

Paransaayeppe yiida Istefana, “Nu issippetettay wogaa woy qaalaa gaasuwan demmidoba gidennan, Yihoowa siiqiyo gishshawu demmidoba gidiyoogaa ha zamachaappe akeekida” yaagaasu.

DARO WODIYAWU MAADDIIS

He zamachawu hara biittappe Turkke biida daroti he biittan oosettiiddi deꞌiya daro oosuwaa maaddanawu, yaa biidi deꞌanawu halchoosona. Daro ishantti he biittan deꞌanawu biidosona. Aassiyaageeti keehi koshshiyoosaa haggaazanawu biida ha ishantta keehi nashshoos.

Ane 25 aassiyaageeti deꞌiyo, haakkidi deꞌiya issi citaabaa qoppa. Daro layttawu, he citan issi cima xallay deꞌees. Aassiyaageeti keehi koshshiyoosan haggaazanawu Jarmaneppenne Nezerlanddeppe usuppun aassiyaageeti 2015n eta maaddanawu yin eti keehi ufayttidosona!

AASSIYAAGEETI KEEHI KOSHSHIYOOSAN HAGGAAZIYOOGAA

Aassiyaageeti keehi koshshiyoosan haggaazanawu Turkke biidi takkidaageeti yan takkido wodiyaabaa woygiyoonaa? Aassiyaageeti keehi koshshiyoosan haggaaziyo wode metiyaabay deꞌikkokka, hegee keehi ufayssiya deꞌo. Issoti issoti giidobaa beꞌa:

Isppeeneppe biida, layttay 42 heera gidido, aqo oyqqida Federika giyo ishay, “Daro aqoy nuuyyo baynnaagee unꞌꞌettennaadaaninne keehi koshshiyaabaa ubbatoo qoppanaadan maaddiis” yaagiis. I haratikka hegaadan haggaazanaadan minttettees. I hagaadan giis: “Asay Yihoowabaa eranaadan maaddanawu halchada kare biitti biyo wode an ammanettiyoogaa bessaasa. Yaatiyo wode, i neessi koshshiyaabaa kunttiyoogaa loytta akeekaasa.”

Nezerlanddeppe biida, layttay 58 heera gidido, aqo oyqqida Ruda giyo ishay hagaadan giis: “Hagaappe kase tumaa mule siyi erenna daro asawu sabbakiyoogee keehi ufayssiyaaba. Asay tumaa siyidi keehi ufayttiyoogaa beꞌiyoogee keehi ufayssiyaaba.”

Layttay 42 heera gidido, Jarmaneppe biida, machida ishay Sashi hagaadan giis: “Taani haggaaziyo wode ubban, tumaa mule siyi erenna asaara gayttays. Yihoowa eranaadan he asata maaddiyoogee keehi ufayssees.”

Layttay 35 heera gidido, Jaappaaneppe biida, gelida michiyaa Atsuka hagaadan gaasu: “Kase, Armmageedooni sohuwaara yaanaadan koyays. SHin Turkke ya simmada, Yihooway hanno gakkanawu danddayido gishshawu a galatays. Yihooway hanotaa ba koyiyo ogiyan waati kaalettiyaakko beꞌiyo wode, kaseegaappe aaruwan akko shiiqanawu koyays.”

Layttay 32 heera gidido, Raashiyaappe biida Alisa hagaadan gaasu: “Aassiyaageeti keehi koshshiyoosan Yihoowawu haggaaziyoogee taani a loꞌꞌotettaa xeella beꞌanaadan maaddiis.” (Maz. 34:8) A gujjada yaagaasu: “Yihooway tawu Aawa xalla gidennan, dumma dumma wodiyan a oonatettaa loytta erido ta mata Dabbo. Taani keehi ufayssiyaanne anjjoy kumido deꞌo deꞌays!”

“GOSHSHAA LOITTI XEELLITE”

Turkken dumma zamachan sabbakidoogee daro asay tumaa siyanaadan maaddiis. SHin haꞌꞌikka mishiraachuwaa siyana bessiya daro asay deꞌees. Kawotettaabaa sabbakanawu Turkke biidaageeti Yihoowabaa mule siyi erenna asaara ubbatoo gayttoosona. Neenikka hegaa malasan haggaazanawu koyay? Koyikko, ‘goshshaa loytta xeellanaadan’ minttettoos; “kattai cahaa bessiis.” (Yoh. 4:35) Kattay ‘cahaa bessido’ heeri baada haggaazana danddayay? Yaatikko, hegawu maaddiyaabaa oottiyoogaa haꞌꞌi doomma. ‘Saꞌaa gaxaa gakkanaashin’ mishiraachuwaa yootanawu neeyyo danddayettida ubbabaa oottikko, hara ay oosoynne demissiyoogaappe keehi aadhiya anjjuwaa demmaassa.—Oos. 1:8.