EKESOTE

1 Koʼeni te ʼu higoa ʼo te ʼu foha ʼo Iselaele ʼae neʼe ʼomai mo Sakopo ki Esipito, te ʼu tagata takitahi mo tona loto fale:+ 2 ko Lupeni, mo Simeone, mo Levi pea mo Suta,+ 3 mo Isakale, mo Sepulone pea mo Pesamino, 4 mo Tane pea mo Nefetali, mo Kate pea mo Asele.+ 5 Ko natou* fuli ʼaia neʼe hifo mai ia* Sakopo neʼe ko te toko 70, kae neʼe kua nofo ia Sosefo ʼi Esipito.+ 6 Neʼe mate leva ia Sosefo,+ ʼo feia mo ʼona tehina fuli pea mo te taʼiake fuli ʼaia. 7 Pea neʼe lahi ʼaupito te ʼu fanau ʼa te kau Iselaele* pea neʼe natou liliu ʼo kaugamalie. Pea neʼe natou liliu ʼo hahaʼi mo ʼasili malolohi ʼi hona aluʼaga fakaofoofo, ʼo natou fakahahaʼi ai te fenua.+

8 Ki muli age, neʼe fakanofo leva he hau foʼou ʼi Esipito, kae neʼe mole ina iloʼi ia Sosefo. 9 Neʼe ina ui ki tana hahaʼi: “Koʼeni, kua kaugamalie mo malolohi age te kau Iselaele ia tatou.+ 10 Tou fai he puleʼaki ke ʼaua naʼa natou liliu ʼo kaugamalie age. Kapau ʼe hoko he tau, ʼe feala anai ke natou kau ki ʼotatou fili, mo natou tauʼi ia tatou pea mo mavae ʼi te fenua.”

11 Neʼe fakanofo ai he ʼu pule ʼo te hahaʼi kaugana* ke natou fakamamahiʼi ia natou ʼaki he ʼu gaue kinakina.+ Pea neʼe natou laga te ʼu kolo ko Pitomi mo Lamisese+ ke tanaki ai te ʼu koloa ʼo Falaone. 12 Kae logo la tonatou fakamamahiʼi ʼaia, neʼe toe ʼasili age pe tonatou kaugamalie mo tanatou mavetevete ʼi te fenua. Neʼe matataku mo fehihiʼa ʼaupito ai te hahaʼi ʼi te kau Iselaele.+ 13 Koia, neʼe kovi ai te fakapopulaʼi ʼo te kau Iselaele e te kau Esipito.+ 14 Neʼe natou fakamamahiʼi ʼonatou maʼuli ʼaki he ʼu gaue kinakina: neʼe natou natu te kele kula, mo faʼu ni piliki pea mo fai te ʼu gaue kehekehe ʼi te ʼu gaueʼaga. ʼEi, neʼe natou gaohi koviʼi ʼosi ia natou pea mo fakapopulaʼi natou ʼaki ni faʼahiga gaue kehekehe.+

15 Ki muli age, neʼe palalau te hau ʼo Esipito ki te ʼu fafine faifanau Hepeleo ʼae neʼe higoa ko Sifela mo Pua. 16 Neʼe ina fakatotonu age kia naua: “Ka kolua tokoni ki te ʼu fafine Hepeleo ke natou fanau,+ pea ka kolua sisio ʼi te temi ʼae ʼe to ifo ai te toe ʼe ko he tama, ʼe tonu ke kolua matehi. Kae kapau ʼe ko he taʼahine, kolua tuku ke maʼuli.” 17 Kae neʼe manavasiʼi te ʼu fafine faifanau ki te ʼAtua moʼoni, pea neʼe mole nā fai te meʼa ʼae neʼe fakatotonu age e te hau ʼo Esipito. Neʼe nā tuku ai ke maʼuli te ʼu tamaliki tagata.+ 18 Neʼe pauʼi leva e te hau ʼo Esipito te ʼu fafine faifanau ʼaia ʼo ina fehuʼi age kia naua: “He koʼe neʼe kolua tuku ke maʼuli te ʼu tamaliki tagata?” 19 Neʼe tali age e te ʼu fafine faifanau kia Falaone: “ ʼE mole hage te ʼu fafine Hepeleo ko te ʼu fafine Esipito. ʼE natou malolohi, koia ka haʼu te fafine faifanau, kua ʼosi fananau natou.”

20 Neʼe tapuakiʼi ai e te ʼAtua te ʼu fafine faifanau, pea neʼe ʼasili kaugamalie ia te hahaʼi pea mo malolohi ʼaupito. 21 Pea ki muli age, neʼe foaki e te ʼAtua moʼoni ki te ʼu fafine faifanau ʼaia hanā ʼu fanau, he neʼe nā manavasiʼi kia te ia. 22 Pea neʼe fakatotonu leva e Falaone ki tana hahaʼi fuli: “Kotou li ki te Vai Tafe ʼo Nile te ʼu toe tagata meamea fuli ʼa te kau Hepeleo, kae kotou tuku ke maʼuli te ʼu fanau fafine.”+

2 ʼI te temi ʼaia, neʼe ʼohoana he tagata ʼo te telepi ʼo Levi mo he taʼahine mai te telepi pe ʼaia.+ 2 Neʼe faitama leva te fafine pea neʼe ina fanauʼi he tamasiʼi tagata. ʼI tana sio ki te matalelei ʼo te kiʼi toe, neʼe ina fufu ai lolotoga mahina ʼe tolu.+ 3 ʼI tana mole kei lava fufu tana tamasiʼi,+ neʼe ina toʼo he kato* neʼe fai ʼaki te papilusi pea neʼe ina vali ki ai he meʼa ʼe huʼa ʼuli.* Neʼe ina tuku ki ai te tamasiʼi pea neʼe ina tuku leva te kato ʼi te ʼulu kaho ʼo te kauvai ʼo te Vai Tafe ʼo Nile. 4 Kae neʼe tuʼu mai mamaʼo te tokolua+ ʼo te tamasiʼi, ʼo sioʼi pe ʼe kotea ʼae ka hoko anai ki ai.

5 Neʼe hifo leva te ʼofafine ʼo Falaone ʼo maʼanu ʼi te Nile. Neʼe haʼele ʼana fafine gaue ʼi te kauvai ʼo te Nile. Pea neʼe sio leva ki te kato ʼi te ʼulu kaho. Neʼe ina fekauʼi atu aipe tana taʼahine kaugana ke alu ʼo kumi mai.+ 6 ʼI tana avahi te kato, neʼe sio ko te kiʼi toe tagata ʼe tagi. Neʼe ʼofa ai, kae neʼe ina ui: “ ʼE ko he fanau ʼa te kau Hepeleo.” 7 Pea neʼe ui age e te tokolua ʼo te tamasiʼi ki te ʼofafine ʼo Falaone: “ ʼE ke loto koa ke au alu ʼo kumi mai he fafine Hepeleo ke ina taupau te tamasiʼi maʼa koe?” 8 Neʼe tali age e te ʼofafine ʼo Falaone ki ai: “Alu!” Neʼe alu atu aipe te kiʼi taʼahine ʼo kumi mai te faʼe ʼa te kiʼi tamasiʼi.+ 9 Pea neʼe ui e te ʼofafine ʼo Falaone ki ai: “ ʼAve te tamasiʼi ʼaeni ʼo taupau maʼaku, pea ʼe au totogi anai koe.” Pea neʼe toʼo ai e te fafine te tamasiʼi ʼo taupau. 10 ʼI te kua lahi ʼa te tamasiʼi, neʼe ina ʼaumai ki te ʼofafine ʼo Falaone, pea neʼe ina taupau leva ohage pe ko hana kiʼi tama.+ Neʼe ina fakahigoaʼi ko Moisese* pea neʼe ina ui: “Koteʼuhi neʼe au toʼo ake ia ia mai te vai.”+

11 ʼI te kua liliu leva ʼa Moisese ʼo tagata,* neʼe alu ki ʼona tehina pea neʼe sio ki tanatou gaue kinakina.+ Pea neʼe sio leva ki he tagata Esipito neʼe ina ta he tahi ʼo ʼona tehina Hepeleo. 12 Neʼe fesioʼaki ʼi ʼona tafaʼaki, pea ʼi tana sio ʼae ʼe mole he tahi, neʼe ina matehi ai te tagata Esipito ʼo ina tanu ʼi te ʼone.+

13 ʼI te ʼaho ake, neʼe toe alu kia natou, pea neʼe sio ki he ʼu tagata Hepeleo ʼe toko lua ʼe fuhu. Neʼe ina ui age ki ʼae neʼe hala: “He koʼe ʼe ke ta tou tehina?”+ 14 Kae neʼe ina tali age ki ai: “Ko ai ʼae neʼe ina fakanofo koe ko he tama ʼaliki pea mo tuʼi fakamau kia matou? ʼE ke matehi anai koa au ohage ko tau matehi te tagata Esipito?”+ Neʼe mataku ai ia Moisese pea mo ina ui ʼi tona loto: “ ʼE mahino ia, kua iloʼi te faʼahi ʼaeni!”

15 Neʼe logo leva ia Falaone ki te meʼa ʼae neʼe hoko, pea neʼe faiga ke ina matehi ia Moisese. Kae neʼe hola ia Moisese mai ia Falaone ʼo alu ʼo nofo ʼi te fenua ʼo Matiane.+ Pea neʼe heka leva ʼi he vaʼe vai keli. 16 Neʼe maʼu e te pelepitelo ʼo Matiane+ ʼona ʼofafine ʼe toko fitu. Neʼe natou ʼomai ʼo ohu vai pea mo fakafonu te ʼu inuʼaga ʼo te ʼu manu ke iinu ai te faga ovi ʼo tanatou tamai. 17 Kae neʼe ʼomai te ʼu tagata tauhi ovi ʼo kapu natou, ohage pe ko tanatou fai mahani. Neʼe tuʼu ake ia Moisese ʼo tokoni ki* te ʼu fafine, pea neʼe ina fakainu tanatou faga ovi. 18 ʼI tanatou toe liliu ki te fale ʼo tanatou tamai ko Leuele,*+ neʼe ina fehuʼi kia natou: “He koʼe kua kotou liliu vave mai ki fale ʼi te ʼaho nei?” 19 Neʼe natou tali age ki ai: “Neʼe haofaki matou e he tagata Esipito+ mai te ʼu tagata tauhi ovi, pea ko ia ʼae neʼe ohu vai maʼa matou pea mo fakainu te faga ovi.” 20 Neʼe ina ui age ki ʼona ʼofafine: “Pea kofea te tagata ʼaia? He koʼe neʼe kotou tuku ke nofo ai? Olo ʼo kumi mai, ke haʼu ke tou kakai.” 21 Hili ʼaia, neʼe lotolelei ia Moisese ke nofo ʼi te ʼapi ʼo Leuele. Pea neʼe foaki e Leuele tona ʼofafine ko Sefola+ ke ʼohoana mo Moisese. 22 Ki muli age, neʼe ina fanauʼi he tamasiʼi tagata, pea neʼe fakahigoaʼi e Moisese ko Kelesomi,*+ he neʼe ina ui: “Kua au maʼuli ohage ko he matapule ʼi he fenua matapule.”+

23 Hili he temi loaloaga,* neʼe mate leva te hau ʼo Esipito+ kae neʼe kei maʼuli popula pe te kau Iselaele. Neʼe hoko atu pe tanatou lauga mo tanatou kalaga ʼuhi ko tonatou maʼuli popula, pea neʼe kaku leva ki te ʼAtua moʼoni ʼanatou kalaga ʼae ke tokoni age kia natou.+ 24 Neʼe logo leva ia te ʼAtua ki ʼanatou lauga,+ pea neʼe ina manatuʼi te fuakava ʼae neʼe ina fai mo Apalahamo, mo Isaake pea mo Sakopo.+ 25 Neʼe tokagaʼi ai e te ʼAtua te kau Iselaele pea neʼe sio ki ʼonatou mamahi.

3 Neʼe liliu ia Moisese ko te tagata tauhi ovi ʼo te faga ovi ʼa Setelo.+ Ko Setelo neʼe ko te pelepitelo ʼo Matiane pea neʼe ko te tamai ʼo tona ʼohoana. ʼI tana taki te faga ovi ki te potu uesite ʼo te toafa,* neʼe kaku leva ki te moʼuga ʼo te ʼAtua moʼoni, ʼi Olepe.+ 2 Pea neʼe ha ia te ʼaselo ʼa Sehova kia ia ʼi he uloʼi afi ʼi he kiʼi fuʼu ʼakau talatala.+ ʼI tana sio ʼaia, neʼe ina tokagaʼi neʼe vela te kiʼi fuʼu ʼakau talatala ʼaia kae neʼe mole gosigosi ia. 3 Pea neʼe manatu ia Moisese: “ ʼE au alu muʼa ʼo sio ki te meʼa faikehe ʼae age pea mo vakaʼi pe koʼe ʼe mole gosigosi te kiʼi fuʼu ʼakau talatala.” 4 ʼI te sio ʼa Sehova ki tana fakaovi ʼo vakaʼi, neʼe pauʼi mai ki ai mai te kiʼi fuʼu ʼakau talatala ʼo ina ui: “Moisese! Moisese!” pea neʼe ina tali age: “Koʼeni au.” 5 Neʼe ina ui age ki ai: “ ʼAua naʼa ke fakaovi mai. Huʼi ʼou sulie, koteʼuhi ko te koga meʼa ʼae ʼe ke tuʼu ai ʼe ko he kele taputapu ia.”

6 Neʼe ina hoko atu: “Ko au te ʼAtua ʼo tau tamai, ia te ʼAtua ʼo Apalahamo,+ mo te ʼAtua ʼo Isaake+ pea mo te ʼAtua ʼo Sakopo.”+ Neʼe ʼuʼufi ai e Moisese tona fofoga he neʼe mataku ʼi te sio ki te ʼAtua moʼoni. 7 Pea neʼe toe ui e Sehova: “Kua au sio moʼoni ki te mamahi ʼo taku hahaʼi ʼi Esipito, pea kua au logo ki ʼanatou kalaga ʼuhi ko natou ʼae ʼe natou fakagaueʼi. ʼE au iloʼi lelei ʼonatou mamahi.+ 8 ʼE au hifo anai ʼo haofaki ia natou mai te ʼu nima ʼo te kau Esipito.+ ʼE au fakamavae anai ia natou mai te fenua ʼaia pea mo taki ia natou ki he fenua ʼe lelei mo laulahi. Ko he fenua ʼe tafe ai te huʼa pipi mo te meli,+ ia te fenua ʼo te kau Kanaane, mo te kau Heti, mo te kau Amole, mo te kau Pelesite, mo te kau Hevi pea mo te kau Sepusi.+ 9 ʼEi, kua au logo ki te ʼu kalaga ʼa te hahaʼi ʼo Iselaele, pea kua au toe sio foki ki tonatou gaohi koviʼi e te kau Esipito.+ 10 ʼI te temi leva ʼaeni, ʼe au fekauʼi anai koe ke ke alu kia Falaone, pea ʼe ke fakamavae anai mai Esipito taku hahaʼi, ia te kau Iselaele.”+

11 Kae neʼe ui age e Moisese ki te ʼAtua moʼoni: “Ko ai koa ia au ke au alu kia Falaone pea ke au fakamavae mai Esipito te kau Iselaele?” 12 Neʼe ina tali age ki ai: “ ʼE au nofo anai mo koe.+ Pea ʼe au fai atu te fakapapau* ʼaeni ke ke iloʼi papau ai ko au ʼae neʼe ina fekauʼi koe: ʼE kotou tauhi* anai kia te au, te ʼAtua moʼoni ʼi te moʼuga ʼaeni+ moka ke ʼosi fakamavae mai Esipito ia taku hahaʼi.”

13 Kae neʼe ui e Moisese ki te ʼAtua moʼoni: “Kapau ʼe au alu ki te kau Iselaele ʼo ui age kia natou: ‘Neʼe fekauʼi mai au e te ʼAtua ʼo ʼakotou kui.’ Pea kapau ʼe natou ui mai: ‘Ko ai tona huafa?’+ kotea anai taku tali kia natou?” 14 Pea neʼe tali age e te ʼAtua kia Moisese: “ ʼE Au Liliu Anai Ko He Meʼa Pe ʼe Au Loto Ki Ai.”*+ Neʼe ina toe ui: “Koʼeni te meʼa ʼae ʼe tonu anai ke ke ui age ki te kau Iselaele: ‘Neʼe fekauʼi mai au e ia ʼae ko tona huafa ʼe fakaʼuhiga ʼE Au Liliu Anai Ko He Meʼa Pe ʼe Au Loto Ki Ai.’ ”+ 15 Pea neʼe toe ui e te ʼAtua kia Moisese:

“Koʼeni te meʼa ʼae ʼe tonu ke ke ui ki te kau Iselaele: ‘Neʼe fekauʼi mai ia au e Sehova, te ʼAtua ʼo ʼakotou kui, ia te ʼAtua ʼo Apalahamo,+ mo te ʼAtua ʼo Isaake+ pea mo te ʼAtua ʼo Sakopo.’+ Ko toku huafa ʼaia ʼo talu ai,+ pea ʼe tonu anai ke manatuʼi te huafa ʼaia mai he taʼiake ki he tahi taʼiake. 16 ʼI te temi leva ʼaeni, alu ʼo fakatahitahiʼi te kau tagata takitaki ʼo Iselaele pea ke ui kia natou: ‘Neʼe ha mai kia au ia Sehova, te ʼAtua ʼo ʼakotou kui, ia te ʼAtua ʼo Apalahamo, mo Isaake pea mo Sakopo. Pea neʼe ina ui mai: “Kua au tokagaʼi koutou+ pea kua au sio ki te meʼa ʼae ʼe fai kia koutou ʼi Esipito. 17 Koia, ʼe au fakapapau atu, ʼe au haofaki anai koutou mai tokotou fakamamahiʼi+ e te kau Esipito. Pea ʼe au taki anai koutou ki te fenua ʼo te kau Kanaane, mo te kau Heti, mo te kau Amole,+ mo te kau Pelesite, mo te kau Hevi pea mo te kau Sepusi,+ ko he fenua ʼe tafe ai te huʼa pipi mo te meli.” ’+

18 “ ʼE mahino papau ia, ʼe natou fakalogo anai ki tou leʼo.+ Pea ʼe ke alu anai mo te kau tagata takitaki ʼo Iselaele ki te hau ʼo Esipito, pea ʼe tonu anai ke kotou ui age ki ai: ‘Neʼe palalau mai kia matou ia Sehova, te ʼAtua ʼo te kau Hepeleo.+ Koia, fakalelei siʼou loto, ke ke tuku ke matou olo lolotoga ʼaho ʼe tolu ki te toafa ke feala ai hamatou fai he ʼu sakilifisio kia Sehova tomatou ʼAtua.’+ 19 Kae ʼe au iloʼi lelei pe ʼe hoki tuku anai e te hau ʼo Esipito ke kotou olo mo kapau ʼe fakakinauʼi ia ia ke ina fai te faʼahi ʼaia.+ 20 Koia, ʼe au hiki anai toku nima ke au tauteaʼi ia Esipito ʼaki ʼaku gaue fakaofoofo fuli ʼae ka au fakahoko anai ʼi ai. Pea hili ʼaia, ʼe ina tuku anai ke kotou olo.+ 21 Pea ʼe au uga anai te kau Esipito ke natou ʼoʼofa kia koutou taku hahaʼi, pea ka kotou mavae, ʼe mole kotou mavae ʼatea anai mai ai.+ 22 ʼE tonu anai ke tahi kole e te fafine ki te fafine ʼo tona vahaʼa fale pea mo te fafine ʼae ʼe nofo ʼi tona loto fale ni meʼa siliva, mo ni meʼa aulo pea mo ni mutuʼi meʼa. Pea ʼe kotou tahi foaki anai te ʼu meʼa ʼaia ke ʼai e ʼokotou foha mo ʼokotou ʼofafine. ʼE kotou toʼo anai te ʼu koloa ʼo te kau Esipito.”+

4 Kae neʼe tali e Moisese: “ ʼE feafeaʼi anai mo kapau ʼe mole natou tui kia au pea ʼe mole natou fakalogo mai?+ He ʼe natou ui mai anai: ‘Neʼe mole ha atu ia Sehova kia koe.’ ” 2 Neʼe fehuʼi age e Sehova ki ai: “Kotea ʼae ʼe ke toʼo ʼi tou nima?” Neʼe ina tali age: “Ko he toko.” 3 Pea neʼe ina ui age ki ai: “Li te toko ki te kele.” Neʼe ina li ai ki te kele pea neʼe liliu ko he gata.+ Pea neʼe hola ia Moisese mai ai. 4 Neʼe ui e Sehova kia Moisese: “Faoʼi tou nima ʼo puke te gata ʼi tona hiku.” Neʼe ina faoʼi ai tona nima ʼo puke te gata pea neʼe toe liliu ai ko he toko. 5 Neʼe ui leva e te ʼAtua: “ ʼAki te faʼahi ʼaia, ʼe natou tui anai neʼe ha+ kia koe ia Sehova, te ʼAtua ʼo ʼanatou kui, ia te ʼAtua ʼo Apalahamo, mo te ʼAtua ʼo Isaake, pea mo te ʼAtua ʼo Sakopo.”+

6 Neʼe toe ui age e Sehova: “Fakalelei siʼou loto, ʼai tou nima ki tou loto kofu.” Neʼe ina ʼai ai tona nima ki tona loto kofu. Pea ʼi tana tohoʼi ake tona nima, neʼe kua kilia pea neʼe hina ohage ko te nive.+ 7 Neʼe ina ui leva ki ai: “Toe ʼai tou nima ki tou loto kofu.” Neʼe ina toe ʼai ai tona nima ki tona loto kofu. Pea ʼi tana tohoʼi ake, neʼe kua lelei. 8 Neʼe ina toe hoko atu: “Kapau ʼe mole natou tui atu kia koe peʼe mole natou tokagaʼi te ʼuluaki milakulo, pea ʼe mahino papau ia ʼe natou tokagaʼi anai te lua milakulo.+ 9 Kae kapau ʼe mole natou tui ki te ʼu milakulo ʼaia ʼe lua pea ʼe mole natou fia fakalogo ki tou leʼo, ʼe ke toʼo anai he moʼi vai mai te Vai Tafe ʼo Nile ʼo huaʼi ki te kele. Pea ʼe liliu anai te moʼi vai ʼaia ko he toto.”+

10 Pea neʼe ui e Moisese kia Sehova: “Sehova, fakalelei mai, kae ʼe mole au poto palalau, talu mai te temi muʼa ʼo kaku mai ki te temi ʼae neʼe ke palalau mai ai kia au ʼaeni ko tau tagata faifekau, koteʼuhi ʼe au ʼalelo vale.”+ 11 Neʼe ui age e Sehova ki ai: “Ko ai ʼae neʼe ina faʼu te gutu ʼo te tagata, pe neʼe ina fakaliliu te tagata ke ʼalelo mate, peʼe ke tuli, peʼe ke sio lelei peʼe ke kivi? ʼE mole koa la ko au, ia Sehova? 12 Koia, ʼi te lakaga nei, alu pea ʼe au nofo anai mo koe moka ke palalau,* pea ʼe au akoʼi atu anai te ʼu meʼa ʼae ʼe tonu ke ke tala.”+ 13 Kae neʼe ina tali age: “Sehova, fakalelei mai, kae ʼe au kole atu ke ke fekauʼi he tahi age ʼe ke loto ki ai ke alu.” 14 Neʼe kovi ʼosi te ita ʼo Sehova kia Moisese, pea neʼe ina ui age ki ai: “ ʼE mole koa la ko hou tehina ia Alone,+ te tagata Levite? ʼE au iloʼi ʼe poto palalau. Pea ʼe haʼu nei ke kolua felaveʼi. Ka sio anai kia koe, ʼe fiafia anai tona loto.+ 15 ʼE tonu ke ke palalau kia ia pea mo ke fakaha age te ʼu meʼa ʼae ʼe tonu ke ina tala,+ pea ʼe au nofo anai mo koulua moka kolua palalau,+ pea ʼe au akoʼi atu anai te ʼu meʼa ʼae ʼe tonu ke kolua fai. 16 ʼE ina fakahoko anai ʼau palalau ki te hahaʼi. Pea ʼe ina fakafofoga anai koe, pea ʼe ke liliu anai ko hona ʼAtua.*+ 17 Pea ʼe ke toʼo anai te toko ʼaeni ʼi tou nima ʼo ke fakahoko ʼaki te ʼu milakulo.”+

18 Neʼe toe liliu ai ia Moisese kia Setelo, te tamai ʼo tona ʼohoana,+ pea neʼe ina ui age ki ai: “Fakalelei siʼou loto, ʼe au fia liliu ki ʼoku tehina ʼi Esipito ʼo vakaʼi pe ʼe kei natou maʼuʼuli.” Pea neʼe ui e Setelo kia Moisese: “Alu ʼi te fimalie.” 19 Hili ʼaia, neʼe ui e Sehova kia Moisese ʼi Matiane: “Toe liliu ki Esipito, koteʼuhi kua mamate ia te ʼu tagata fuli ʼae neʼe natou kumi ke natou matehi koe.”*+

20 Neʼe toʼo leva e Moisese tona ʼohoana mo ʼona foha ʼo fakaheka ki he asino pea neʼe toe liliu ki te fenua ʼo Esipito. Pea tahi ʼae meʼa, neʼe toʼo e Moisese ʼi tona nima te toko ʼo te ʼAtua moʼoni. 21 Pea neʼe ui e Sehova kia Moisese: “Ka ke tau atu ki Esipito, tokaga ʼo fakahoko ia muʼa ʼo Falaone te ʼu milakulo fuli ʼae ʼe tonu ke ke fakahoko ʼaki toku malohi.+ Kae ʼe au tuku pe anai ia ia ke lotofefeka+ pea ʼe mole ina tuku anai te hahaʼi ke olo.+ 22 ʼE tonu ke ke ui kia Falaone: ‘Koʼeni te folafola ʼa Sehova: “Ko Iselaele ʼe ko toku foha, ʼei, toku ʼuluaki foha.+ 23 ʼE au fakatotonu atu ke ke tuku toku foha ke alu ʼo tauhi mai kia te au. Kae kapau ʼe mole ke tuku ke alu, ʼe au matehi anai tou foha, ʼei, tou ʼuluaki foha.” ’ ”+

24 ʼI tana alu ʼaia, neʼe natou tutuʼu leva ʼi he koga meʼa ke natou momoe ai. Neʼe felaveʼi ia Sehova+ mo ia pea neʼe faiga ke ina matehi ia ia.*+ 25 Neʼe toʼo leva e Sefola+ he maka masila ʼo ina silikosisioʼi* tana tama, pea neʼe ina li te koga ʼaia* ʼo te koga tapu ʼo tana tama ki ʼona vaʼe.* Pea neʼe ina ui: “Kua ke liliu ko toku ʼohoana ʼaki te toto ʼaeni.” 26 Neʼe Ina tuku ai ia ia ke alu. Neʼe ui e Sefola ʼi te temi ʼaia: “Ko toku ʼohoana ʼaki te toto ʼaeni” ʼuhi ko te silikosisio.

27 Neʼe ui leva e Sehova kia Alone: “Alu ki te toafa ʼo fakafelaveʼi kia Moisese.”+ Neʼe alu ai pea neʼe felaveʼi mo ia ʼi te moʼuga ʼo te ʼAtua moʼoni,+ pea neʼe fakamalo age mo ʼuma ki ai. 28 Pea neʼe fakaha age e Moisese kia Alone te ʼu folafola fuli ʼa Sehova+ pea mo ina fakamatala age te ʼu milakulo fuli ʼae neʼe fakatotonu age ke ina fakahoko.+ 29 Hili ʼaia, neʼe alu ia Moisese mo Alone ʼo fakatahitahiʼi te kau tagata takitaki fuli ʼo te kau Iselaele.+ 30 Neʼe fakaha age e Alone kia natou te ʼu folafola fuli ʼae neʼe fakaha age e Sehova kia Moisese, pea neʼe ina fakahoko te ʼu milakulo+ ia muʼa ʼo te hahaʼi. 31 Pea neʼe tui ia te hahaʼi kia Moisese.+ ʼI tanatou logo ʼae kua tokagaʼi e Sehova te kau Iselaele+ pea kua sio ki ʼonatou mamahi,+ neʼe natou punou mo tulolo ai.

5 Hili ʼaia, neʼe olo ia Moisese mo Alone kia Falaone ʼo nā ui age ki ai: “Koʼeni te folafola ʼa Sehova, te ʼAtua ʼo Iselaele: ‘Tuku taku hahaʼi ke olo pea ke natou fai he ʼaho lahi maʼaku ʼi te toafa.’ ” 2 Kae neʼe tali age e Falaone: “Ko ai ia Sehova,+ ke au fakalogo ki tona leʼo pea ke au tuku ia Iselaele ke alu?+ ʼE mole au iloʼi ia Sehova. Pea ʼe mole au tuku anai ia Iselaele ke alu.”+ 3 Kae neʼe nā ui age ki ai: “Neʼe palalau mai ia te ʼAtua ʼo te kau Hepeleo kia maua. Koia, fakalelei siʼou loto, ʼe matou fia olo lolotoga ʼaho ʼe tolu ki te toafa ʼo fai he ʼu sakilifisio kia Sehova tomatou ʼAtua,+ naʼa ina tauteaʼi matou ʼaki he mahaki peʼe ina tuku ke matehi matou ʼaki te heleta.” 4 Neʼe tali age e te hau ʼo Esipito kia naua: “Moisese mo Alone, he koʼe ʼe kolua fia taʼofi te gaue ʼa te hahaʼi? Kotou toe liliu ʼo gaue!”*+ 5 Pea neʼe hoko atu e Falaone: “Kua kaugamalie te hahaʼi ʼaeni ʼi te fenua. Pea ʼe kolua loto ke tuku tanatou gaue?”

6 ʼI te ʼaho pe ʼaia, neʼe fakatotonu e Falaone ki te ʼu pule gaue pea mo ʼanatou tagata takitaki: 7 “ ʼE mole kotou toe foaki anai ki te hahaʼi te luna moamoa ke natou faʼu ʼaki te ʼu piliki.+ Kotou tuku ke olo ia natou totonu ʼo tanaki mai te luna moamoa. 8 Kae ʼe tatau pe anai te lahi ʼo te ʼu piliki ʼae ʼe tonu ke natou faʼu, ohage pe ko tona fai mahani. ʼAua naʼa kotou fetogi te lahi ʼo te ʼu piliki ʼaia, koteʼuhi ʼe natou fakafifimalie.* Ko te tupuʼaga la ʼaia ʼo tanatou kalaga: ‘ ʼE matou fia olo, ʼe matou fia fai he ʼu sakilifisio ki tomatou ʼAtua!’ 9 Ke lahi age tanatou gaue kinakina mo tanatou maʼumaʼua, ke mole natou fakalogo ai ki ni loi.”

10 Neʼe olo ai te kau pule gaue+ pea mo ʼanatou tagata takitaki ʼo ui ki te hahaʼi: “Koʼeni te meʼa ʼae neʼe ui e Falaone: ‘ ʼE mole au toe foaki atu anai te luna moamoa. 11 Kotou olo ia koutou totonu ʼo tae te luna moamoa ʼi he faʼahi pe ʼe feala ke kotou maʼu ai. Kae ʼe mole hifo anai te lahi ʼo te ʼu piliki ʼae ʼe tonu ke kotou faʼu.’ ” 12 Neʼe mavetevete ai te hahaʼi ʼi te fenua katoa ʼo Esipito ʼo natou tanaki ai te ʼu kauʼi fulumeto* ʼae neʼe tuku ʼi te ʼu gaueʼaga ʼi te ʼosi tuʼusi ʼo te fulumeto. Neʼe fakaʼaogaʼi te ʼu kauʼi fulumeto ʼaia moʼo fetogi ʼaki te luna moamoa. 13 Pea neʼe uga malohi natou e te kau pule gaue, ʼo natou ui age: “ ʼE tonu ke tatau te lahi ʼo te ʼu piliki ʼae ʼe kotou faʼu ʼi te ʼaho fuli, ohage pe ko te temi ʼae neʼe foaki atu ai te luna moamoa.” 14 Pea neʼe toe ta foki e te kau pule gaue ʼa Falaone ia te kau tagata takitaki gaue, ʼae neʼe natou fakanofo ke tokakaga ki te kau Iselaele.+ Neʼe natou fehuʼi age kia natou: “He koʼe neʼe mole katoa ʼanafi pea mo te ʼaho nei te ʼu piliki ʼae neʼe kotou faʼu, ohage ko takotou fai mahani?”

15 Neʼe olo leva te kau tagata takitaki ʼo te kau Iselaele kia Falaone ʼo natou meo ki ai: “He koʼe ʼe ke gaohi feiaʼi ʼau hahaʼi faifekau? 16 ʼE mole foaki mai te luna moamoa ki ʼau hahaʼi faifekau, kae ʼe ui mai kia matou: ‘Kotou faʼu ni piliki.’ ʼE ta matou kae ʼe ko te hala ʼo tau hahaʼi.” 17 Kae neʼe ina tali age kia natou: “ ʼE kotou fakafifimalie,* ʼe kotou fakafifimalie!*+ Ko te tupuʼaga la ʼaia ʼo takotou ui: ‘ ʼE matou fia olo, ʼe matou fia fai he ʼu sakilifisio kia Sehova.’+ 18 ʼI te temi nei, kotou toe liliu ʼo gaue! ʼE mole foaki atu anai te luna moamoa, kae ʼe tatau pe anai te lahi ʼo te ʼu piliki ʼae ʼe tonu ke kotou faʼu.”

19 Neʼe mahino leva ia te kau tagata takitaki gaue ʼo te kau Iselaele neʼe natou tau mo he faigataʼaʼia lahi. Neʼe hoko te aluʼaga ʼaia ʼuhi ko te fakatotonu ʼae ke mole hifo te lahi ʼo te ʼu piliki ʼae neʼe tonu ke natou faʼu ʼi te ʼaho fuli. 20 Hili ʼaia, ʼi tanatou ʼosi mavae mai ia muʼa ʼo Falaone, neʼe natou felaveʼi leva mo Moisese pea mo Alone ʼae neʼe fakatalitali kia natou. 21 Neʼe natou ui atu aipe kia naua: “Ke sio ifo ia Sehova ki te meʼa ʼaeni neʼe kolua fai pea ke ina fakamauʼi koulua, koteʼuhi kua fehiʼaʼinaʼi ia matou e Falaone mo ʼana hahaʼi faifekau ʼuhi ko koulua. Neʼe kolua fai he meʼa ke tupu ai tanatou fia matehi matou.”+ 22 Neʼe haga leva ia Moisese kia Sehova ʼo ina ui: “Sehova e, he koʼe ʼe ke fakamamahiʼi feiaʼi te hahaʼi ʼaeni? He koʼe neʼe ke fekauʼi mai au? 23 Kua ʼaʼasili age te agakovi ʼa Falaone ki te hahaʼi ʼaeni+ talu mai te ʼaho ʼae neʼe au alu ai kia ia ʼo palalau age ʼi tou huafa.+ Pea neʼe mole pe la ke haofaki tau hahaʼi.”+

6 Pea neʼe ui leva e Sehova kia Moisese: “ ʼI te lakaga leva ʼaeni, ʼe ke sio anai ki te meʼa ʼae ka au fai kia Falaone.+ ʼAki toku nima malohi ʼe au fakamalohiʼi anai ia ia ke ina tuku ia natou ke olo. Pea ʼaki toku nima malohi ʼe au fakamalohiʼi anai ia ia ke ina kapu ia natou mai tona fenua.”+

2 Neʼe toe ui e te ʼAtua kia Moisese: “Ko au ia Sehova. 3 Pea neʼe au ha kia Apalahamo, mo Isaake pea mo Sakopo ʼi toku ʼuhiga ʼAtua Mafimafi.+ Kae neʼe mole au fakaha katoa age toku huafa ʼae ko Sehova.+ 4 Neʼe au toe fai foki taku fuakava mo natou ke au foaki age te fenua ʼo Kanaane, te fenua ʼae neʼe natou maʼuʼuli ai ohage ko ni matapule.+ 5 ʼI te temi nei, kua au logo ki te lauga ʼa te hahaʼi ʼo Iselaele, ʼae ʼe fakapopulaʼi e te kau Esipito, pea ʼe au manatuʼi taku fuakava.+

6 “Koia, ke ke ui age ki te kau Iselaele: ‘Ko au ia Sehova, pea ʼe au fakaʼateainaʼi anai ia koutou mai te ʼu gaue kinakina ʼae ʼe fakamaʼua atu e te kau Esipito pea mo tokotou fakapopulaʼi.+ Pea ʼe au fakaʼaogaʼi anai toku nima mafimafi moʼo haofaki ia koutou pea ʼe au tauteaʼi lahi anai te kau Esipito.+ 7 Pea ʼe kotou liliu anai ko taku hahaʼi, pea ʼe au liliu anai ko tokotou ʼAtua.+ Pea ʼe kotou iloʼi moʼoni anai ko au ia Sehova, tokotou ʼAtua ʼae ʼe ina fakaʼateainaʼi ia koutou mai te ʼu gaue kinakina ʼae ʼe fakamaʼua atu e te kau Esipito. 8 Pea ʼe au taki anai ia koutou ki te fenua ʼae neʼe au fakapapau* ke au foaki kia Apalahamo, mo Isaake pea mo Sakopo. Pea ʼe au foaki atu anai ke liliu ko hokotou fenua.+ Ko au ia Sehova.’ ”+

9 Ki muli age, neʼe fakaha e Moisese te logo ʼaia ki te kau Iselaele. Kae neʼe mole natou fia fakalogo kia Moisese he neʼe kua natou lotovaivai pea neʼe kovi ʼosi tonatou fakapopulaʼi.+

10 Pea neʼe ui leva e Sehova kia Moisese: 11 “Alu ʼo ui age kia Falaone, te hau ʼo Esipito, ke ina tuku te kau Iselaele ke mavae mai tona fenua.” 12 Kae neʼe tali age e Moisese kia Sehova: “Neʼe mole fia fakalogo mai te kau Iselaele kia au.+ Pea ʼe feafeaʼi age la he fakalogo mai ʼa Falaone kia au ʼaeni ʼe vale ʼi te palalau?”+ 13 Kae neʼe toe fakaha e Sehova kia Moisese mo Alone te ʼu fakatotonu ʼae neʼe tonu ke nā fai ki te kau Iselaele pea mo Falaone, te hau ʼo Esipito. Neʼe ko te ʼu fakatotonu ʼaia ʼo ʼuhiga mo te fakamavae ʼo te kau Iselaele mai te fenua ʼo Esipito.

14 Koʼeni te ʼu higoa ʼo te ʼu pule famili ʼo te kau Iselaele: Ko te ʼu foha ʼo Lupeni, ia te ʼuluaki foha ʼo Iselaele,+ neʼe ko Anoke, mo Palu, mo Eselone pea mo Kalemi.+ Ko te hologa ʼaia ʼo Lupeni.

15 Ko te ʼu foha ʼo Simeone neʼe ko Semuele, mo Samine, mo Oate, mo Sakine, mo Tesokale pea mo Saule, te tama ʼa te fafine Kanaane.+ Ko te hologa ʼaia ʼo Simeone.

16 Koʼeni te ʼu higoa ʼo te ʼu foha ʼo Levi,+ ʼo mulimuli ki tonatou hologa: ko Kelesoni, mo Keate pea mo Melali.+ Neʼe maʼuli ia Levi ia taʼu ʼe 137.

17 Ko te ʼu foha ʼo Kelesoni neʼe ko Lipeni pea mo Simei, ʼo mulimuli pe ki ʼonā famili.+

18 Ko te ʼu foha ʼo Keate neʼe ko Amilame, mo Siteseale, mo Hepelone pea mo Usiele.+ Neʼe maʼuli ia Keate ia taʼu ʼe 133.

19 Ko te ʼu foha ʼo Melali neʼe ko Makeli pea mo Musi.

Neʼe ko te ʼu famili fuli ʼaia neʼe hifo mai ia Levi, ʼo mulimuli ki tonatou hologa.+

20 Neʼe ʼohoana leva ia Amilame mo Sokepete, te tokolua ʼo tana tamai.+ Pea neʼe ina fanauʼi leva ia Alone pea mo Moisese.+ Neʼe maʼuli ia Amilame ia taʼu ʼe 137.

21 Ko te ʼu foha ʼo Siteseale neʼe ko Kole,+ mo Nefeke pea mo Sikili.

22 Ko te ʼu foha ʼo Usiele neʼe ko Misaele, mo Elisafani+ pea mo Sitili.

23 Pea neʼe ʼohoana leva ia Alone mo Elisepa, te ʼofafine ʼo Aminatape pea ko te tokolua ʼo Naasone.+ Neʼe ina fanauʼi leva ia Natape, mo Apiu, mo Eleasale pea mo Itamale.+

24 Ko te ʼu foha ʼo Kole neʼe ko Asile, mo Elekana, pea mo Apiasafe.+ Neʼe ko te ʼu famili ʼaia neʼe hifo mai ia Kole.+

25 Neʼe ʼohoana leva ia Eleasale,+ te foha ʼo Alone, mo he ʼofafine ʼo Putiele. Pea neʼe ina fanauʼi leva ia Fineasi.+

ʼE ko te ʼu pule famili ʼaia neʼe hifo mai ia Levi, ʼo mulimuli ki ʼonatou famili.+

26 Ko te hologa ʼaia neʼe kau ai ia Alone mo Moisese pea neʼe ui age e Sehova kia naua: “Kolua fakamavae te hahaʼi ʼo Iselaele mai te fenua ʼo Esipito, ʼo fakatuʼutuʼu fakakutuga natou.”*+ 27 Neʼe ko Alone mo Moisese ʼae neʼe palalau kia Falaone, te hau ʼo Esipito, ke ina tuku te hahaʼi ʼo Iselaele ke mavae mai Esipito.+

28 ʼI te ʼaho ʼae neʼe palalau ai ia Sehova kia Moisese ʼi te fenua ʼo Esipito, 29 neʼe ui age e Sehova ki ai: “Ko au ia Sehova. Alu ʼo fakaha kia Falaone, te hau ʼo Esipito, te ʼu folafola fuli ʼae ʼe au fakaha atu.” 30 Kae neʼe tali e Moisese kia Sehova: “ ʼE feafeaʼi anai he fakalogo mai ʼa Falaone kia au ʼaeni ʼe vale ʼi te palalau?”+

7 Neʼe ui leva e Sehova kia Moisese: “ ʼE au foaki atu kia koe te malohi ʼae ʼe hage ko te malohi ʼo te ʼAtua ke ke pule kia* Falaone. Pea ʼe liliu anai tou tehina ko Alone ko tau polofeta.+ 2 ʼE ke fakaha anai ki tou tehina ko Alone te ʼu folafola fuli ʼae neʼe au fakatotonu atu, pea ʼe palalau anai kia Falaone. Pea ʼe tuku anai e Falaone ke mavae te kau Iselaele ʼi tona fenua. 3 Kae ʼe au tuku pe anai ia Falaone ke lotofefeka.+ Pea ʼe lahi anai te ʼu milakulo ʼae ka au fakahoko ʼi te fenua ʼo Esipito.+ 4 Kae ʼe mole fakalogo anai ia Falaone kia koulua. ʼE au fakaʼaogaʼi anai toku malohi* ke au fakafeagai ki te fenua ʼo Esipito. ʼE au fakamavae anai taku hahaʼi kaugamalie,* te kau Iselaele mai Esipito, pea ʼe au tauteaʼi lahi anai te kau Esipito.+ 5 Pea ʼe iloʼi moʼoni anai e te kau Esipito ko au ia Sehova+ moka ʼe au fakaʼaogaʼi toku malohi ke au fakafeagai ki te fenua ʼo Esipito mo fakamavae te kau Iselaele mai ia natou.” 6 Pea neʼe fai e Moisese mo Alone te ʼu meʼa ʼae neʼe fakatotonu age e Sehova kia naua. Neʼe nā mulimuli lelei pe ki ai. 7 Neʼe taʼu 80 ia Moisese kae neʼe taʼu 83 ia Alone ʼi te temi ʼae neʼe nā palalau ai kia Falaone.+

8 Pea neʼe ui e Sehova kia Moisese pea mo Alone: 9 “Kapau ʼe ui atu e Falaone: ‘Kolua fakahoko he milakulo,’ pea ko koe Moisese, ʼe tonu anai ke ke ui kia Alone: ‘Toʼo tou toko ʼo li kia muʼa ʼo Falaone.’ ʼE liliu anai ko he gata lahi.”+ 10 Neʼe olo ai ia Moisese mo Alone kia Falaone pea neʼe nā fai pe ʼo mulimuli ki te ʼu meʼa ʼae neʼe fakatotonu age e Sehova. Neʼe li e Alone tona toko kia muʼa ʼo Falaone mo ʼana hahaʼi faifekau, pea neʼe liliu ai ko he gata lahi. 11 Kae neʼe pauʼi e Falaone te kau tagata popoto mo te hahaʼi faifakalauʼakau. Pea neʼe toe fai foki e te kau pelepitelo ʼae ʼe gaohi meʼa fakamanamana ʼo Esipito+ te meʼa ʼaia ʼaki ʼanatou meʼa fakatemonio.+ 12 Neʼe natou tahi li tona toko pea neʼe liliu ko he ʼu gata lalahi. Kae neʼe folo e te toko ʼo Alone ʼonatou toko. 13 Kae neʼe kei lotofefeka pe ia Falaone,+ pea neʼe mole fia fakalogo kia naua, ohage pe ko tona ui age e Sehova.

14 Neʼe ui leva e Sehova kia Moisese: “ ʼE uigataʼa ia Falaone.+ ʼE mole ina fia tuku ke mavae te hahaʼi. 15 Apogipogi uhu ʼe ke fai anai te faʼahi ʼaeni: Ka alu ia Falaone ki te Vai Tafe ʼo Nile, ʼe ke alu anai ʼo tuʼu ʼi te kauvai ʼo te Vai Tafe ke ke felaveʼi mo ia. Pea ʼe ke toʼo anai ʼi tou nima te toko ʼae neʼe liliu ko he gata.+ 16 Pea ke ke ui ki ai: ‘Neʼe fekauʼi mai au e Sehova te ʼAtua ʼo te kau Hepeleo kia koe,+ pea ke au ui atu ke ke tuku tana hahaʼi ke olo ʼo tauhi kia te ia ʼi te toafa. Kae neʼe mole ke fakalogo ʼo kaku mai ki te temi nei. 17 Koia, koʼeni te meʼa ʼae ʼe ui e Sehova: “ ʼE ke iloʼi anai ko au ia Sehova+ ʼaki te meʼa ʼaeni ka au fai: ʼE au taʼi anai te vai ʼo te Nile ʼaki toku toko, pea ʼe liliu anai ʼo toto. 18 ʼE mamate anai te ʼu ika ʼo te Nile, pea ʼe mamanu anai te Nile, pea ʼe mole feala anai ke toe inu e te kau Esipito te vai ʼo te Nile.” ’ ”

19 Pea neʼe ui leva e Sehova kia Moisese: “Ke ke ui kia Alone: ‘Toʼo tou toko pea ke faoʼi tou nima ki te ʼu vai ʼo Esipito+ ke liliu ai ʼo toto: ʼona vai tafe, mo ʼona tafega vai,* mo ʼona foʼi vai,+ pea mo ʼana tanakiʼaga vai fuli.’ ʼE maʼu anai te toto ʼi te fenua katoa ʼo Esipito, maʼia mo te ʼu loto ipu ʼakau peʼe ipu maka.” 20 Neʼe fai atu aipe e Moisese mo Alone te ʼu meʼa ʼae neʼe fakatotonu age e Sehova. Neʼe hiki ake e Alone tona toko ʼo taʼi te vai ʼo te Nile ia muʼa ʼo Falaone mo ʼana hahaʼi faifekau, pea neʼe liliu te vai katoa ʼo te vai tafe ʼo toto.+ 21 Pea neʼe mamate ai te ʼu ika,+ mo kamata mamanu ai ia te vai tafe. Neʼe mole feala ke toe inu e te kau Esipito te vai ʼo te Nile.+ Neʼe maʼu te toto ʼi te fenua katoa ʼo Esipito.

22 Kae neʼe toe fai foki e te kau pelepitelo ʼae ʼe gaohi meʼa fakamanamana ʼo Esipito te meʼa ʼaia ʼaki ʼanatou meʼa fakatemonio.+ Neʼe lotofefeka aipe ia Falaone, pea neʼe mole fia fakalogo kia naua, ohage pe ko tona ui e Sehova.+ 23 Neʼe toe liliu leva ia Falaone ki tona fale hau, pea neʼe mole ina tokagaʼi te ʼu meʼa ʼae neʼe sio ki ai. 24 Pea neʼe keli e te kau Esipito fuli he ʼu vai keli ʼi te ʼu tafaʼaki ʼo te Nile ke natou maʼu ai he vai ke inu, he neʼe mole kei feala hanatou inu te vai ʼo te Nile. 25 Neʼe kua hili leva ʼaho ʼe fitu ki te fakaliliu e Sehova te vai ʼo te Nile ʼo toto.

8 Neʼe ui leva e Sehova kia Moisese: “Alu ʼo ui age kia Falaone: ‘Koʼeni te meʼa ʼae ʼe ui e Sehova: “Tuku taku hahaʼi ke olo ʼo tauhi mai kia te au.+ 2 Kapau ʼe mole ke fia tuku ia natou ke olo, ʼe au tauteaʼi anai tou fenua katoa ʼaki ni kelenui.+ 3 Pea ʼe fonu anai te Vai Tafe ʼo Nile ko ni kelenui. ʼE natou hake ake anai ʼo feulufi ki tou fale, mo tou koga fale pea mo kake anai ki tou palepale. Pea ʼe natou toe feulufi anai ki te ʼu fale ʼo ʼau hahaʼi faifekau pea mo tau hahaʼi, mo ʼau gutuʼumu, pea mo ʼau meʼa natuʼaga falaoa.+ 4 ʼE kake anai te ʼu kelenui ia koe, mo tau hahaʼi pea mo ʼau hahaʼi faifekau fuli.” ’ ”

5 Ki muli age, neʼe ui e Sehova kia Moisese: “Ke ke ui kia Alone: ‘Toʼo tou toko pea ke faoʼi tou nima ki te ʼu vai tafe, mo te ʼu tafega vai ʼae ʼe haʼu mai te Nile pea mo te ʼu foʼi vai, ke hake ake mai ai te ʼu kelenui ki te fenua ʼo Esipito.’ ” 6 Neʼe faoʼi ai e Alone tona nima ki te ʼu vai ʼo Esipito, pea neʼe kamata hake ake mai ai te ʼu kelenui pea neʼe mafola ʼi te fenua katoa ʼo Esipito. 7 Kae neʼe toe fai foki e te kau pelepitelo ʼae ʼe gaohi meʼa fakamanamana te meʼa ʼaia ʼaki te ʼu meʼa fakatemonio, pea neʼe toe hake ake te ʼu kelenui ki te fenua ʼo Esipito.+ 8 Neʼe pauʼi leva e Falaone ia Moisese mo Alone ʼo ina ui kia naua: “Kolua kole kia Sehova ke ina fakamamaʼo te ʼu kelenui mai ia au pea mo taku hahaʼi,+ he ʼe au fia tuku te hahaʼi ke olo ʼo fai he ʼu sakilifisio kia Sehova.” 9 Pea neʼe ui age e Moisese kia Falaone: “ ʼE fakalogo pe anai kia koe te temi ʼae ʼe ke loto ai ke au kole ki te ʼAtua ke ina fakamamaʼo te ʼu kelenui mai ia koe, mo ʼau hahaʼi faifekau, mo tau hahaʼi, pea mo ʼou fale. ʼE ʼi ai pe anai he ʼu kelenui ʼi te Vai Tafe ʼo Nile.” 10 Neʼe ina tali age: “Apogipogi.” Pea neʼe ui e Moisese: “ ʼE fai pe ki ai. ʼE ke iloʼi ai anai ʼe mole he tahi ʼe hage ko Sehova, tomatou ʼAtua.+ 11 ʼE mavae anai te ʼu kelenui mai ia koe, mo ʼou fale, mo ʼau hahaʼi faifekau pea mo tau hahaʼi. Kae ʼe ʼi ai pe anai he ʼu kelenui ʼi te Nile.”+

12 Neʼe mavae leva ia Moisese mo Alone mai ia muʼa ʼo Falaone, pea neʼe faikole ia Moisese kia Sehova ʼo ʼuhiga mo te ʼu kelenui ʼae neʼe Ina tauteaʼi ʼaki ia Falaone.+ 13 Pea neʼe fai leva e Sehova te meʼa ʼae neʼe kole age e Moisese, pea neʼe mamate ai te ʼu kelenui ʼi te ʼu ʼapi, mo te ʼu malaʼe pea mo te ʼu kele ʼo te kau Esipito. 14 Neʼe natou tanaki te ʼu kelenui ʼo fakatuʼuga, ʼo mole feala ai hona lau pea neʼe kamata mamanu leva ʼi te fenua. 15 ʼI te sio ʼa Falaone kua fimalie te fenua, neʼe lotofefeka aipe ia+ pea neʼe mole fia fakalogo kia naua, ohage pe ko tona ui e Sehova.

16 Pea neʼe ui e Sehova kia Moisese: “Ke ke ui kia Alone: ‘Hiki tou toko pea ke taʼi te kele pea ʼe liliu anai te efu ko he ʼu foʼi namu ʼi te fenua katoa ʼo Esipito.’ ” 17 Neʼe nā mulimuli ki ai. Neʼe hiki leva e Alone tona toko pea neʼe ina taʼi te kele. Neʼe liliu ai te efu ko he ʼu foʼi namu pea neʼe ʼomai ki te ʼu tagata mo te ʼu manu. Neʼe liliu te efu katoa ko he ʼu foʼi namu ʼi te fenua katoa ʼo Esipito.+ 18 Neʼe faiga te kau pelepitelo ʼae ʼe gaohi meʼa fakamanamana ke natou toe fai te meʼa ʼaia pea ke natou fakatupu he ʼu foʼi namu ʼaki ʼanatou meʼa fakatemonio,+ kae neʼe mole natou lavaʼi. Pea neʼe ʼomai te ʼu foʼi namu ki te ʼu tagata pea mo te ʼu manu. 19 Neʼe ui leva e te kau pelepitelo ʼae ʼe gaohi meʼa fakamanamana kia Falaone: “ ʼE hoko te faʼahi ʼaia ʼaki te malohi ʼo te ʼAtua.”*+ Kae neʼe lotofefeka aipe ia Falaone pea neʼe mole fia fakalogo kia naua, ohage pe ko tona ui e Sehova.

20 Pea neʼe ui e Sehova kia Moisese: “ ʼE ke ʼala uhuuhu anai apogipogi, pea ʼe ke alu kia Falaone ʼi te temi ʼae ʼe alu ai ki te vai tafe. ʼE ke ui anai ki ai: ‘Koʼeni te meʼa ʼae ʼe ui e Sehova: “Tuku taku hahaʼi ke olo ʼo tauhi mai kia te au. 21 Kae kapau ʼe mole ke tuku taku hahaʼi ke olo, ʼe au tuku anai he ʼu foʼi lago* ke ʼomai kia koe, mo ʼau hahaʼi faifekau pea mo tau hahaʼi pea ke natou feulufi ki ʼou fale. Pea ʼe fonu anai te ʼu loto fale ʼo te kau Esipito ko te ʼu lago, maʼia mo lalo. 22 ʼI te ʼaho ʼaia, ʼe au tuku keheʼi moʼoni anai te fenua ʼo Koseni ʼae ʼe maʼuʼuli ai taku hahaʼi. ʼE mole maʼu anai he foʼi lago ʼi ai,+ pea ʼaki te faʼahi ʼaia, ʼe ke iloʼi ai anai ko au ia Sehova pea ʼe au nofo ʼi te fenua ʼaeni.+ 23 Pea ʼe au fakakehekeheʼi anai taku hahaʼi mo tau hahaʼi. ʼE hoko anai apogipogi ia te milakulo ʼaia.” ’ ”

24 Pea neʼe fai leva e Sehova te faʼahi ʼaia. Neʼe kamata ʼomai ni tuʼuga lago ʼo feulufi ki te fale ʼo Falaone, pea mo te ʼu ʼapi ʼo ʼana hahaʼi faifekau, pea mo te fenua katoa ʼo Esipito.+ Neʼe maumau te fenua ʼuhi ko te ʼu lago.+ 25 Ki muli age, neʼe pauʼi e Falaone ia Moisese mo Alone ʼo ina ui kia naua: “Kotou olo ʼo fai he ʼu sakilifisio ki tokotou ʼAtua ʼi te fenua ʼaeni.” 26 Kae neʼe tali e Moisese: “ ʼE mole lelei ke matou fai te faʼahi ʼaia, koteʼuhi ʼe fakalialia anai te kau Esipito ki te ʼu sakilifisio ʼae ka matou fai kia Sehova, tomatou ʼAtua.+ Kapau ʼe matou fai he sakilifisio ʼe fakalialia ki ai te kau Esipito kae ʼe natou sio mata ki ai, ʼe mole natou tuki makaʼi anai koa ia matou? 27 ʼE matou olo anai lolotoga ʼaho ʼe tolu ki te toafa, pea ʼe matou fai ai anai he ʼu sakilifisio kia Sehova tomatou ʼAtua, ohage pe ko tana ui mai kia matou.”+

28 Pea neʼe ui e Falaone: “ ʼE au tuku anai ke kotou olo ʼo fai he ʼu sakilifisio kia Sehova tokotou ʼAtua ʼi te toafa. Kae ʼe mole tonu ke kotou olo mamaʼo. Kolua hufakiʼi ia au.”+ 29 Pea neʼe ui e Moisese: “ ʼE au mavae anai mai ʼou muʼa, pea ʼe au faikole anai kia Sehova. Pea ʼe mavae anai apogipogi te ʼu lago mai ia koe, Falaone, mo ʼau hahaʼi faifekau pea mo tau hahaʼi. Kae ʼe tonu ke tuku tau haga ʼo kakaʼi matou, ʼi tau mole tuku te hahaʼi ke olo ʼo fai he ʼu sakilifisio kia Sehova.”+ 30 Neʼe mavae leva ia Moisese mai ia muʼa ʼo Falaone pea neʼe faikole kia Sehova.+ 31 Neʼe fai leva e Sehova te meʼa ʼae neʼe kole age e Moisese. Pea neʼe mavae te ʼu foʼi lago mai ia Falaone, mo ʼana hahaʼi faifekau pea mo tana hahaʼi. Neʼe mole kei ʼi ai he foʼi lago ʼi te fenua. 32 Kae neʼe toe lotofefeka pe ia Falaone pea neʼe mole ina tuku ke mavae te hahaʼi.

9 Pea neʼe ui e Sehova kia Moisese: “Alu ʼo ui kia Falaone: ‘Koʼeni te meʼa ʼae ʼe ui e Sehova, te ʼAtua ʼo te kau Hepeleo: “Tuku taku hahaʼi ke mavae ʼo tauhi mai kia te au.+ 2 Kae kapau ʼe ke fakafisi pea ke taʼofi ia natou, 3 ko au, ia Sehova,+ ʼe au matehi anai tau faga manu. ʼE mahahaki anai te ʼu hosi, mo te ʼu asino, mo te ʼu kamelo, mo te faga pipi pea mo te faga ovi.+ 4 Pea ko au ia Sehova, ʼe au fakakehekeheʼi moʼoni anai te faga manu ʼa te kau Iselaele pea mo te faga manu ʼa te kau Esipito. ʼE mole mate anai he manu ʼe tahi ʼi te faga manu ʼa te kau Iselaele.” ’ ”+ 5 Tahi ʼae meʼa, neʼe fakatuʼutuʼu e Sehova he temi, ʼo ina ui: “Apogipogi ko au, ia Sehova ʼe au fakahoko anai te faʼahi ʼaia ʼi te fenua.”

6 Pea neʼe fakahoko e Sehova te faʼahi ʼaia ʼi te ʼaho ake. Neʼe mamate ai te faga manu fuli ʼa te kau Esipito,+ kae neʼe mole pe la mate he manu ʼe tahi ʼi te faga manu ʼa te kau Iselaele. 7 Neʼe kumikumi leva e Falaone te meʼa ʼae neʼe hoko, pea neʼe ina iloʼi ai neʼe mole mate he manu ʼe tahi ʼi te faga manu ʼa te kau Iselaele. Kae neʼe uigataʼa aipe ia Falaone pea neʼe mole ina tuku ke mavae te hahaʼi.+

8 Neʼe ui leva e Sehova kia Moisese mo Alone: “Kolua luluku ʼi ʼokolua nima lualua te lefulefu ʼo te gutuʼumu, pea ʼe tonu anai ke li e Moisese te lefulefu ki te ʼaele ia muʼa ʼo Falaone. 9 Pea ʼe liliu anai ko he efu ʼi te fenua katoa ʼo Esipito, pea ʼe fakatupu anai e te efu ʼaia he ʼu foʼi polo ʼi te ʼu manu pea mo te ʼu tagata ʼi te fenua katoa ʼo Esipito.”

10 Neʼe nā toʼo ai te lefulefu ʼo he gutuʼumu pea neʼe nā olo kia muʼa ʼo Falaone. Neʼe li e Moisese te lefulefu ki te ʼaele, pea neʼe fakatupu e te lefulefu ʼaia he ʼu foʼi polo ʼi te ʼu tagata mo te ʼu manu. 11 Neʼe mole feala ki te kau pelepitelo ʼae ʼe gaohi meʼa fakamanamana ke natou tutuʼu ia muʼa ʼo Moisese ʼuhi ko ʼonatou foʼi polo. ʼEi, neʼe tupu he ʼu foʼi polo ia natou pea mo te kau Esipito fuli.+ 12 Kae neʼe tuku e Sehova ia Falaone ke lotofefeka. Neʼe mole fia fakalogo kia naua, ohage pe ko tona ui e Sehova kia Moisese.+

13 Neʼe ui leva e Sehova kia Moisese: “ ʼE ke ʼala uhuuhu anai apogipogi ʼo alu ʼo ui kia Falaone: ‘Koʼeni te folafola ʼa Sehova te ʼAtua ʼo te kau Hepeleo: “Tuku taku hahaʼi ke mavae ʼo tauhi mai kia te au. 14 Kapau ʼe mole ke fai te faʼahi ʼaia, ʼe au fakahoko anai te ʼu malaʼia fuli kia koe, mo ʼau hahaʼi faifekau pea mo tau hahaʼi. Pea ʼe kotou iloʼi ai ʼe mole he tahi ʼe hage ko au ʼi te kele katoa.+ 15 Neʼe kua feala pe ke au faoʼi toku nima ʼo tauteaʼi koe pea mo tau hahaʼi ʼaki he malaʼia fakamataku, pea mo pulihi koe ʼi te kele. 16 Kae neʼe au tuku ia koe ke ke maʼuli ʼuhi ko te faʼahi ʼaeni: Ke au fakaha atu toku mafimafi pea ke tala toku huafa ʼi te kele katoa.+ 17 ʼE kei ke fiatuʼu koa ki taku hahaʼi ʼo mole ke tuku ke natou mavae? 18 Koia, ʼe au fakato anai apogipogi he toe ʼuamaka lahi ʼi te hola pe ʼaeni, pea neʼe heʼeki hoko he meʼa feia ʼi Esipito ʼo kaku mai ki te temi nei. 19 Ke ke fakatotonu ke ʼave ʼau faga manu fuli pea mo ʼau meʼa fuli ʼae ʼi te ʼu gaueʼaga ki he ʼu fale. Pea ko te ʼu tagata mo te ʼu manu fuli ʼae ʼe nonofo pe anai ʼi te ʼu gaueʼaga kae neʼe mole olo ki he koga meʼa ke haofaki ai natou, ʼe mamate anai moka to te ʼuamaka.” ’ ”

20 Neʼe tokagaʼi e ʼihi hahaʼi faifekau ʼa Falaone te ʼu palalau ʼa Sehova. Koia, neʼe natou foimo ʼave ai ʼanatou hahaʼi faifekau pea mo tanatou faga manu ki he koga meʼa ke haofaki ai ia natou. 21 Kae ko natou ʼae neʼe mole natou toʼo fakamalotoloto te ʼu palalau ʼa Sehova, neʼe natou tuku pe ʼanatou hahaʼi faifekau mo tanatou faga manu ʼi te ʼu gaueʼaga.

22 Pea neʼe ui leva e Sehova kia Moisese: “Faoʼi tou nima ki te lagi, ke to te ʼuamaka ki te fenua katoa ʼo Esipito:+ ki te tagata, mo te ʼu manu pea mo te ʼu vao ʼakau fuli ʼae ʼi te fenua ʼo Esipito.”+ 23 Neʼe hiki ai e Moisese tona toko ki te lagi. Pea neʼe fakaʼuʼulu leva e Sehova te mana pea mo fakato te ʼuamaka mo te afi* ki te kele. Neʼe haga fakato e Sehova te ʼuamaka ki te fenua ʼo Esipito. 24 Neʼe to te ʼuamaka pea neʼe tapa te hila ʼi te ʼuamaka ʼaia. Neʼe kovi ʼaupito pea neʼe heʼeki hoko he meʼa feia ʼi te fenua talu mai te kua liliu ʼa Esipito ko he puleʼaga.+ 25 Neʼe maumauʼi e te ʼuamaka ia te ʼu meʼa fuli ʼae ʼi te ʼu gaueʼaga ʼo te fenua katoa ʼo Esipito, mai te tagata ki te manu, ʼo feia mo te ʼu vao ʼakau fuli pea mo te ʼu fuʼu ʼakau fuli.+ 26 Neʼe gata pe ki te fenua ʼo Koseni, neʼe mole to ai te ʼuamaka. Ko te fenua ʼaia neʼe maʼuʼuli ai te kau Iselaele.+

27 Pea neʼe pauʼi leva e Falaone ia Moisese mo Alone ʼo ina ui age kia naua: “Neʼe au agahala ʼi te aluʼaga ʼaeni. ʼE faitotonu ia Sehova, pea ʼe ko au mo taku hahaʼi ʼae ʼe hala. 28 Kolua kole kia Sehova ke gata la te mana pea mo te ʼuamaka. ʼE au tuku anai ia koutou ke kotou mavae, pea ʼe mole kotou toe nonofo anai ʼi heni.” 29 Neʼe tali age e Moisese ki ai: “ ʼI te temi pe ʼae ʼe au mavae ai ʼi te kolo, ʼe au hiki anai ʼoku nima ia muʼa ʼo Sehova. Pea ʼe gata anai te mana mo te ʼuamaka, ke ke iloʼi ai ʼe ʼa Sehova te kele.+ 30 Kae kua au iloʼi, maʼia mo te temi ʼaia, ko koe mo ʼau hahaʼi faifekau ʼe mole kotou manavasiʼi anai kia Sehova ʼAtua.”

31 Neʼe maumauʼi te lino* mo te olose, koteʼuhi neʼe kua kamata fua te olose pea neʼe kua kamata mātala te lino. 32 Kae neʼe mole maumauʼi ia te fulumeto mo te epote,* koteʼuhi neʼe heʼeki hoko tonā temi fua. 33 Neʼe mavae ia Moisese ʼi te kolo mai ia muʼa ʼo Falaone, pea neʼe ina hiki ʼona nima ia muʼa ʼo Sehova. Pea neʼe gata ai leva te mana, mo te ʼuamaka pea mo te ʼua.+ 34 Neʼe sio ia Falaone ki te kua gata ʼo te ʼua, mo te ʼuamaka pea mo te mana. Pea neʼe hoko atu pe tana agahala mo tana uigataʼa,+ ia ia mo ʼana hahaʼi faifekau. 35 Neʼe lotofefeka aipe ia Falaone, pea neʼe mole ina tuku ke mavae te kau Iselaele, ohage pe ko tona fakaha e Sehova ʼaki ia Moisese.+

10 Pea neʼe ui e Sehova kia Moisese: “Alu kia Falaone, he neʼe au tuku ia ia ke uigataʼa ʼo feia mo ʼana hahaʼi faifekau.+ Pea ʼe au fakahoko ai ʼaku milakulo ʼi ʼona muʼa,+ 2 pea ʼe feala anai hau fakamatala ki ʼou foha mo ʼou mokopuna pe neʼe feafeaʼi taku tauteaʼi te kau Esipito pea mo te ʼu milakulo ʼae neʼe au fakahoko ʼi te lotolotoiga ʼo natou.+ Pea ʼe kotou iloʼi moʼoni anai ko au ia Sehova.”

3 Neʼe olo ai ia Moisese mo Alone ʼo ui age kia Falaone: “Koʼeni te folafola ʼa Sehova, te ʼAtua ʼo te kau Hepeleo: ‘ ʼE kaku anai ki ʼafea tau mole fia fakalogo mai kia te au?+ Tuku taku hahaʼi ke mavae ʼo tauhi mai kia te au. 4 Kapau ʼe hoko atu pe tau mole tuku taku hahaʼi ke mavae, ʼe au ʼaumai anai apogipogi he ʼu heʼe ki tou fenua. 5 Pea ʼe natou ʼaofi anai te fuga fenua, pea ʼe mole toe ha anai he meʼa ʼi te kele. ʼE natou kai anai te ʼu meʼa ʼae neʼe mole maumauʼi e te ʼuamaka pea neʼe tuku maʼa koutou. ʼE natou toe kai anai ʼokotou fuʼu ʼakau fuli ʼae ʼe homo ʼi te vao.+ 6 ʼE fonu anai ʼokotou ʼapi ko te heʼe, ʼo feia mo te ʼu ʼapi ʼo ʼakotou hahaʼi faifekau fuli, pea mo te ʼu ʼapi ʼo te kau Esipito fuli, pea neʼe heʼeki sisio ʼakotou tamai mo ʼakotou kui ki he meʼa feia ʼi te fenua ʼaeni ʼo kaku mai ki te ʼaho nei.’ ”+ Neʼe lituʼa leva ʼo mavae mai ia muʼa ʼo Falaone.

7 Pea neʼe ui e te hahaʼi faifekau ʼo te fale hau kia Falaone: “ ʼE kaku anai ki ʼafea te haga ʼa te tagata ʼaeni ʼo fakamatakuʼi* tatou? Tuku te hahaʼi ke mavae ʼo tauhi kia Sehova tonatou ʼAtua. ʼE heʼeki ke sio koa koe ki te kua maumauʼi ʼo Esipito?” 8 Neʼe pauʼi ai e Falaone ia Moisese mo Alone ʼo ina ui age kia naua: “Kotou olo ʼo tauhi kia Sehova tokotou ʼAtua. Kae ko ai koa ia natou ʼae ka olo?” 9 Neʼe tali age e Moisese: “ ʼE matou olo anai mo ʼamatou hahaʼi tupulaga, mo ʼamatou hahaʼi matuʼa, mo ʼomatou foha, mo ʼomatou ʼofafine, mo ʼamatou ovi pea mo ʼamatou pipi+ koteʼuhi ʼe matou fai anai he ʼaho lahi maʼa Sehova.”+ 10 Neʼe ina ui kia naua: “Kapau ʼe au tuku anai ia koutou ke kotou mavae mo ʼakotou fanau, pea ʼe nofo moʼoni ia Sehova mo koutou!+ ʼE mahino ia ʼe kotou fakatuʼutuʼu ke kotou fai he meʼa ʼe kovi. 11 Koia, ʼe mole au tuku anai ke kotou olo fuli. ʼE ko ʼakotou hahaʼi tagata pe anai ka olo ʼo tauhi kia Sehova, he neʼe ko te faʼahi ʼaia neʼe kolua kole mai.” Neʼe kapu ai naua mai ia muʼa ʼo Falaone.

12 Pea neʼe ui e Sehova kia Moisese: “Faoʼi tou nima ki te fenua ʼo Esipito ke ʼomai te ʼu heʼe ki te fenua katoa pea ke natou kai te ʼu vao ʼakau fuli ʼo te fenua, ia te ʼu meʼa fuli ʼae neʼe mole maumauʼi e te ʼuamaka.” 13 Neʼe faoʼi atu aipe e Moisese tona toko ki te fenua ʼo Esipito. Pea neʼe fakaagi e Sehova he matagi mai te potu esite ki te fenua ʼi te ʼaho katoa mo te po katoa. ʼI te ʼaho ake, neʼe ʼaumai e te matagi ʼo te potu esite te ʼu heʼe. 14 Pea neʼe ʼomai te ʼu heʼe ki te fenua katoa ʼo Esipito ʼo natou nonofo ai.+ Neʼe fakamataku te faʼahi ʼaia.+ Neʼe heʼeki lahi feia he ʼu heʼe ʼi muʼa atu, pea ʼe mole toe lahi feia anai ki ʼamuli. 15 Neʼe natou ʼaofi te fuga kele katoa, pea neʼe fakapoʼuli te fenua ʼuhi ko te ʼu heʼe. Neʼe natou kai te ʼu vao ʼakau fuli ʼo te fenua pea mo te ʼu fuaʼi ʼakau fuli ʼo te ʼu fuʼu ʼakau ʼae neʼe mole maumauʼi e te ʼuamaka. Neʼe mole kei ʼi ai he ʼu lau ʼi te ʼu fuʼu ʼakau peʼe ʼi te ʼu vao ʼakau ʼo te fenua katoa ʼo Esipito.

16 Neʼe pauʼi fakavilivili leva e Falaone ia Moisese mo Alone ʼo ina ui age kia naua: “Neʼe au agahala kia Sehova tokolua ʼAtua, pea mo koulua. 17 Koia, fakalelei siʼou loto, ke ke fakamolemole mai ki taku agahala ʼi te faiʼaga ʼaeni. Pea kolua kole kia Sehova tokolua ʼAtua ke ina fakamamaʼo mai ia au te malaʼia fakatupu mate ʼaeni.” 18 Neʼe mavae* leva mai ia Falaone pea neʼe faikole kia Sehova.+ 19 Pea neʼe fetogi ai e Sehova te agi ʼo te matagi, ʼo agi malohi mai te potu uesite, pea neʼe ʼave ai te ʼu heʼe ki te Tai Kula. Neʼe mole kei ʼi ai pe la he heʼe ʼi te fenua katoa ʼo Esipito. 20 Kae neʼe tuku e Sehova ia Falaone ke lotofefeka,+ pea neʼe mole tuku e Falaone ke mavae te kau Iselaele.

21 Neʼe ui leva e Sehova kia Moisese: “Hiki tou nima ki te lagi, ke fakapoʼuli katoa ai ia te fenua ʼo Esipito, ʼei, ke fakapoʼuli gaogao.” 22 Neʼe hiki atu aipe e Moisese tona nima ki te lagi. Pea neʼe fakapoʼuli gaogao ai ia te fenua katoa ʼo Esipito lolotoga ʼaho ʼe tolu.+ 23 Neʼe mole feala ke fesioʼaki te kau Esipito ia natou, pea neʼe mole mavae he tahi mai tona loto fale lolotoga ʼaho ʼe tolu. Kae neʼe malama pe te ʼu faʼahi ʼae neʼe nonofo ai te kau Iselaele fuli.+ 24 Neʼe pauʼi leva e Falaone ia Moisese ʼo ina ui age ki ai: “Kotou olo ʼo tauhi kia Sehova.+ ʼE kotou tuku pe anai ʼakotou ovi mo ʼakotou pipi ʼi heni. Kae ʼe feala anai ke olo ʼakotou fanau mo koutou.” 25 Kae neʼe tali age e Moisese: “ ʼE ke foaki mai anai e koe totonu* he ʼu manu ki ʼamatou sakilifisio mo ʼamatou holokoseta.* Pea ʼe matou momoli anai kia Sehova tomatou ʼAtua.+ 26 ʼE matou olo anai mo tamatou faga manu. ʼE mole tuku anai he manu ʼi heni, koteʼuhi ʼe matou fakaʼaogaʼi anai ʼihi manu ʼi tamatou tauhi kia Sehova tomatou ʼAtua. Pea ʼe mole matou iloʼi pe kotea ʼae ka matou momoli ʼi tamatou tauhi kia Sehova, kae heʼeki matou tau ki te koga meʼa ʼae ʼe matou olo ki ai.” 27 Pea neʼe tuku e Sehova ia Falaone ke lotofefeka, pea neʼe mole tali e Falaone ke natou mavae.+ 28 Neʼe ui e Falaone ki ai: “Mavae ʼi ʼoku muʼa! ʼAua naʼa ke faiga ke ke toe haʼu, koteʼuhi ko te ʼaho ʼae ʼe ke toe tuʼu ai ʼi ʼoku muʼa ʼe ke mate anai.” 29 Neʼe tali age e Moisese: “ ʼE mole au toe faiga anai ke au tuʼu ʼi ʼou muʼa, ʼo mulimuli pe ki ʼau palalau.”

11 Pea neʼe ui e Sehova kia Moisese: “ ʼE au tuku anai he tahi malaʼia ke hoko kia Falaone pea mo Esipito. Hili ʼaia, ʼe ina tuku anai ke kotou mavae ʼi heni.+ ʼI tana tuku ʼaia ke kotou mavae, ʼe ina kapu moʼoni anai koutou.+ 2 ʼI te temi nei, ke ke ui age ki te hahaʼi: ‘ ʼE tonu ke kole e te hahaʼi tagata mo fafine fuli ki ʼonatou vahaʼa fale he ʼu meʼa siliva pea mo he ʼu meʼa aulo.’ ”+ 3 Pea neʼe uga e Sehova te kau Esipito ke natou ʼoʼofa ki tana hahaʼi. Tahi ʼae meʼa, neʼe liliu ia Moisese ʼo iloa ʼi te fenua ʼo Esipito ʼi te lotolotoiga ʼo te hahaʼi faifekau ʼa Falaone pea mo te hahaʼi.

4 Neʼe ui leva e Moisese: “Koʼeni te meʼa ʼae ʼe ui e Sehova: ‘ ʼI te vaʼevaʼe maʼupo, ʼe au fakalaka anai ʼi Esipito,+ 5 pea ʼe mamate anai te ʼu ʼuluaki tupu fuli ʼi te fenua ʼo Esipito,+ mai te ʼuluaki foha ʼo Falaone, ʼae ʼe heka ʼi tona hekaʼaga fakahau ʼo kaku ki te ʼuluaki tama ʼa te fafine kaugana, ʼae ʼe ina momosi te fulumeto, pea mo te ʼu ʼuluaki tupu fuli ʼo te faga manu.+ 6 ʼEi, ʼe logo anai ʼi te fenua katoa ʼo Esipito ki he ʼu tagi leʼo lahi neʼe heʼeki logo ki ai ʼi muʼa atu pea ʼe mole toe hoko anai.+ 7 Kae ʼe mole koʼi anai e he kuli te kau Iselaele peʼe ko tanatou faga manu, ke kotou iloʼi ai ʼe feala ke fakakehekeheʼi e Sehova te kau Esipito mo te kau Iselaele.’+ 8 Pea ʼe mahino papau ia, ʼe hifo mai anai ʼau hahaʼi faifekau fuli ʼo tulolo ʼi ʼoku muʼa, ʼo ui mai: ‘Alu mo tau hahaʼi fuli.’+ Pea ʼe au alu anai.” Hili ʼaia, neʼe mavae ia Moisese mai ia muʼa ʼo Falaone mo hona toe ita lahi.

9 Neʼe ui leva e Sehova kia Moisese: “ ʼE mole fakalogo anai ia Falaone kia koulua,+ ʼo tupu ke lahi age te ʼu milakulo ʼae ka au fakahoko ʼi te fenua ʼo Esipito.”+ 10 Neʼe lahi te ʼu milakulo ʼae neʼe kua fakahoko e Moisese mo Alone ia muʼa ʼo Falaone,+ kae neʼe tuku e Sehova ia Falaone ke lotofefeka, pea neʼe mole tuku e Falaone ke mavae te kau Iselaele mai tona fenua.+

12 Pea neʼe ui leva e Sehova kia Moisese mo Alone ʼi te fenua ʼo Esipito: 2 “ ʼE liliu anai te mahina ʼaeni kia koutou ko te kamata ʼo te taʼu.* ʼE ko te ʼuluaki mahina anai ʼo te taʼu.+ 3 Kolua palalau ki te hahaʼi fuli ʼo Iselaele, ʼo kolua ui age: ‘ ʼI te hogofulu ʼaho ʼo te mahina ʼaeni, ʼe tonu ke kotou tahi toʼo he ovi+ maʼa tona famili, ke takitahi te loto fale mo tana ovi. 4 Kae kapau ʼe mole feala ke kai fuli e tokotou famili te ovi he ʼe mole kotou hahaʼi, ʼe tonu anai ke kotou* kai fakatahi mo ʼokotou* vahaʼa fale ʼi tokotou ʼapi. ʼE kotou vaevae anai te ovi ʼo mulimuli ki tokotou kaugamalie pea mo fakafuafua pe ki te meʼa ʼae ʼe feala ke kotou kai. 5 ʼE tonu ke kotou toʼo he ovi tagata ʼe taʼu tahi pea mo heʼe mele.+ ʼE feala ke kotou filifili he ovi tagata kei mui peʼe ko he tao tagata kei mui. 6 ʼE tonu ke kotou tokakaga ki ai ʼo kaku ki te 14 ʼaho ʼo te mahina ʼaeni,+ pea ʼe tahi matehi anai e te ʼu famili fuli ʼo te puleʼaga ʼo Iselaele te manu ʼaia ʼi te ʼosi to ʼo te laʼa.*+ 7 ʼE natou toʼo anai he moʼi toto ʼo afuhi ki te ʼu kaumatapa ʼe lua pea mo te fuga matapa ʼo te ʼu ʼapi ʼae ʼe natou kai ai anai te ovi.+

8 “ ‘ ʼE tonu ke kai te kanoʼi manu ʼi te po ʼaia.+ ʼE taʼo anai pea ʼe kai ʼaki he ʼu pane hala fakatupu+ pea mo he ʼu lauʼakau kona.+ 9 ʼAua naʼa kotou kai he koga ʼe kei mata pe neʼe haka, kae kotou taʼo te manu mo tona ʼulu, mo ʼona vaʼe pea mo ʼona toʼotoʼoga. 10 ʼE mole tonu ke kotou tuku he meʼa ke toe ki apogipogi, kae ka toe he meʼa ki apogipogi ʼe tonu anai ke kotou tutu.+ 11 ʼE kotou kai anai te manu kae kua haʼi ʼokotou kiliʼi pipi, mo tui ʼokotou sulie, pea mo puke ʼokotou toko. ʼE tonu anai ke kotou kai fakavilivili. ʼE ko te Pasikate ʼa Sehova. 12 ʼE au fakalaka anai ʼi te fenua ʼo Esipito ʼi te po ʼaia pea ʼe au matehi anai te ʼu ʼuluaki tupu fuli ʼi te fenua ʼo Esipito, mai te tagata ki te manu.+ Pea ʼe au tauteaʼi anai te ʼu ʼatua fuli ʼo Esipito.+ Ko au ia Sehova. 13 ʼE liliu anai te toto ko hokotou fakailoga ʼi te ʼu ʼapi ʼae ʼe kotou nonofo ai. Ka au sio ki te toto pea ʼe au fakalaka anai ʼi ʼokotou fuga ʼapi. ʼE mole hoko anai te malaʼia ʼaia kia koutou pea ʼe mole kotou mamate anai moka ʼe au tauteaʼi ia te fenua ʼo Esipito.+

14 “ ‘ ʼE tonu anai ke kotou manatuʼi te ʼaho ʼaia, pea ʼe kotou fai ai anai he ʼaho lahi maʼa Sehova. ʼE kotou fakamanatu anai te ʼaho ʼaia mai he taʼiake ki he tahi taʼiake. ʼE ko he lao ʼo talu ai. 15 ʼE tonu anai ke kotou kai te pane hala fakatupu lolotoga ʼaho ʼe fitu.+ ʼEi, ʼi te ʼuluaki ʼaho, ʼe tonu anai ke kotou toʼo mai ʼokotou ʼapi te meʼa fakatupu, koteʼuhi ko ia ʼae ka kai anai ki he meʼa neʼe fai ʼaki he meʼa fakatupu mai te ʼuluaki ʼaho ʼo kaku ki te fitu ʼaho, ʼe tonu anai ke pulihi* ia ia* ʼi Iselaele. 16 ʼI te ʼuluaki ʼaho, ʼe kotou fai anai he fakatahi taputapu, pea ʼi te fitu ʼaho, ʼe kotou toe fai anai he tahi fakatahi taputapu. ʼE mole fai anai he gaue ʼi te ʼu ʼaho ʼaia.+ ʼE feala pe anai ke teuteuʼi te meʼa kai ʼae ʼe ʼaoga ki te tagata* takitokotahi.

17 “ ‘ ʼE tonu anai ke kotou fai te ʼAho Lahi ʼo Te ʼu Pane Hala Fakatupu,+ koteʼuhi ʼi te ʼaho ʼaia, ʼe au fakamavae anai mai te fenua ʼo Esipito takotou hahaʼi kaugamalie.* ʼE tonu anai ke kotou fai te ʼaho lahi ʼaia ʼi te ʼu taʼiake fuli. ʼE ko he lao ʼo talu ai. 18 ʼE tonu anai ke kotou kai te pane hala fakatupu ʼi te ʼuluaki mahina, ʼi te afiafi ʼo te 14 ʼaho ʼo te mahina ʼo kaku ki te afiafi ʼo te 21 ʼaho ʼo te mahina.+ 19 ʼE mole tonu anai ke maʼu he meʼa fakatupu ʼi ʼokotou ʼapi lolotoga ʼaho ʼe fitu, koteʼuhi ko ia ʼae ʼe kai anai ki he meʼa neʼe fai ʼaki te meʼa fakatupu, pe ʼe ko he matapule peʼe ko he tagata Iselaele,+ ʼe tonu anai ke pulihi* ia ia* ʼi te hahaʼi ʼo Iselaele.+ 20 ʼE mole tonu anai ke kotou kai he meʼa neʼe fai ʼaki te meʼa fakatupu. ʼE kotou kai anai te pane hala fakatupu ʼi ʼokotou ʼapi fuli.’ ”

21 Neʼe pauʼi atu aipe e Moisese te kau tagata takitaki fuli ʼo Iselaele+ ʼo ina ui kia natou: “Kotou olo ʼo filifili he ʼu manu kei mui* ki ʼokotou famili, pea kotou matehi te ʼu manu ʼaia ki te Pasikate. 22 ʼE kotou fufuʼi anai he fuhiga isope ki te toto ʼae ʼi te pesini pea ʼe kotou afuhi anai te toto ki te ʼu fuga matapa pea mo te ʼu kaumatapa ʼe lua. ʼE mole tonu anai ke mavae he tahi ia koutou mai tona ʼapi ʼo kaku ki te uhu. 23 ʼE fakalaka anai ia Sehova ʼi te fenua ke ina tauteaʼi te kau Esipito. Pea ka sio ki te toto ʼi ʼokotou fuga matapa pea mo te ʼu kaumatapa ʼe lua, ʼe fakalaka moʼoni anai ia Sehova ʼi ʼokotou fuga ʼapi. ʼE mole ina tuku anai ke hu ki ʼokotou ʼapi te malaʼia ʼaia ʼe fakatupu mate.*+

24 “ ʼE tonu anai ke kotou haga fai te ʼu meʼa ʼaia. ʼE ko he lao maʼa koutou mo ʼokotou foha ʼo talu ai.+ 25 Pea ka kotou hu ki te fenua ʼae neʼe fakapapauʼi atu e Sehova ke ina foaki atu, ʼe tonu anai ke kotou haga fakamanatu te ʼaho ʼaia.+ 26 Pea ka fehuʼi atu anai e ʼokotou foha: ‘Kotea te fakaʼuhiga ʼo te fakamanatu ʼaia?’+ 27 ʼe kotou tali anai: ‘ ʼE ko te sakilifisio ʼo te Pasikate kia Sehova, ʼae neʼe fakalaka ʼi te ʼu fuga ʼapi ʼo te kau Iselaele ʼi Esipito. Neʼe ina tauteaʼi ai te kau Esipito, kae neʼe ina haofaki ʼomatou famili.’ ”

Neʼe punou mo tulolo leva te hahaʼi. 28 Neʼe olo ai te kau Iselaele ʼo fai ohage pe ko te ʼu meʼa ʼae neʼe fakatotonu age e Sehova kia Moisese mo Alone.+ Neʼe natou mulimuli lelei pe ki ai.

29 Pea ʼi te maʼupo, neʼe matehi leva e Sehova te ʼu ʼuluaki tupu fuli ʼi te fenua ʼo Esipito.+ Neʼe ina matehi ia natou fuli mai te ʼuluaki foha ʼo Falaone, ʼae ʼe heka ʼi tona hekaʼaga fakahau ki te ʼuluaki foha ʼo te tagata pilisoni ʼae ʼi te fale pilisoni. Pea neʼe toe kau ai foki mo te ʼu ʼuluaki ʼuhi fuli ʼo te ʼu manu.+ 30 Neʼe ʼala ake leva ia Falaone ʼi te po ʼaia mo ʼana hahaʼi faifekau fuli pea mo te kau Esipito fuli. Pea neʼe ʼi ai he ʼu tagi leʼo lahi ʼi te kau Esipito, he neʼe mole hala he ʼapi mo tona mate.+ 31 Neʼe ina pauʼi atu aipe ia Moisese mo Alone+ ʼi te poʼuli ʼo ina ui kia naua: “Kolua olo, kolua mavae mo te kau Iselaele mai taku hahaʼi. Kotou olo ʼo tauhi kia Sehova, ohage pe ko takotou ui.+ 32 Kotou toʼo mo takotou faga ovi mo takotou faga manu pea kotou olo, ohage pe ko takolua ui.+ Kae ʼe tonu foki ke kolua tapuakiʼi ia au.”

33 Pea neʼe uga leva e te kau Esipito ia te hahaʼi ke natou mavae fakavilivili+ ʼi te fenua, koteʼuhi neʼe natou ui: “Naʼa matou mamate fuli anai!”+ 34 Neʼe toʼo ai e te hahaʼi te falaoa ʼae neʼe kua ʼosi natu kae neʼe mole hona meʼa fakatupu, ʼo feia mo ʼanatou meʼa natuʼaga falaoa ʼae neʼe kofukofu ʼaki ʼonatou mutuʼi meʼa. Pea neʼe natou hili ki ʼonatou fuga ʼuma. 35 Neʼe fai e te kau Iselaele te meʼa ʼae neʼe ui age e Moisese, ʼo natou kole ai ki te kau Esipito ni meʼa siliva, mo ni meʼa aulo pea mo ni mutuʼi meʼa.+ 36 Neʼe uga e Sehova ia te kau Esipito ke natou ʼoʼofa ki tana hahaʼi. Pea neʼe natou foaki ai te ʼu meʼa fuli ʼae neʼe natou kole age. Koia, neʼe natou toʼo ai te ʼu koloa ʼo te kau Esipito.+

37 Neʼe mavae leva te kau Iselaele mai Lamisese+ ʼo olo ki Sukoti.+ Neʼe ko tagata ʼe teitei toko 600 000 neʼe haʼele lalo, kae neʼe mole lau te ʼu fanau.+ 38 Neʼe toe olo mo natou he faʼahiga hahaʼi kehekehe pea mo kaugamalie.*+ Neʼe natou toe ʼave foki ni faga ovi pea mo ni faga pipi, neʼe ko he toe faga manu ia. 39 Neʼe natou taʼo leva he ʼu pane hala fakatupu takafuafua ʼaki te falaoa ʼae neʼe natu, ʼae neʼe natou ʼaumai mai Esipito. Neʼe mole hona meʼa fakatupu, he neʼe kapu fakavilivili natou mai Esipito pea neʼe mole feala ai ke natou teuteuʼi hanatou meʼa kai.+

40 Ko te kau Iselaele ʼae neʼe nonofo ʼi Esipito, neʼe natou maʼuʼuli ʼi he ʼu fenua matapule+ lolotoga taʼu ʼe 430.+ 41 ʼI te fakaʼosi ʼo te ʼu taʼu ʼe 430, ʼi te ʼaho tonu pe ʼaia, neʼe mavae te hahaʼi katoa* ʼa Sehova mai te fenua ʼo Esipito. 42 ʼE natou fakamanatu anai te po ʼaia, ʼae neʼe fakamavae ai ia natou e Sehova mai te fenua ʼo Esipito. ʼE tonu anai ke fakamanatu te po ʼaia e te hahaʼi fuli ʼo Iselaele ke fakakololiaʼi ai ia Sehova, ʼi ʼonatou taʼiake fuli.+

43 Pea neʼe ui e Sehova kia Moisese pea mo Alone: “Koʼeni te lao ʼo ʼuhiga mo te Pasikate: ʼE mole kai anai e he matapule te kai ʼo te Pasikate.+ 44 Kae kapau ʼe maʼu e he tahi hana tagata kaugana neʼe ina totogi, ʼe tonu anai ke ina silikosisioʼi.*+ Pea ʼe hoki feala leva ke kai ki ai. 45 ʼE mole feala ke kai ki ai te kau matapule ʼae ʼe maʼuʼuli ʼi te lotolotoiga ʼo koutou, ʼo feia mo te kau gaue ʼae ʼe totogi. 46 ʼE kai anai te ovi ʼae kei mui ʼi he ʼapi. ʼE mole kotou ʼave anai he kanoʼi manu ki tuʼa, pea ʼe mole kotou fasiʼi anai hona hui.+ 47 ʼE fai anai e te hahaʼi fuli ʼo Iselaele te Pasikate. 48 Kapau ʼe nofo he matapule mo koutou pea mo ina fia fai te Pasikate maʼa Sehova, ʼe tonu anai ke silikosisioʼi te ʼu tagata fuli ʼo tona loto fale. Pea ʼe hoki feala leva ke ina fai te Pasikate, pea ʼe hage anai ko he tagata Iselaele. Kae ko te tagata ʼae neʼe mole silikosisio, ʼe mole feala anai ke kai ki te Pasikate.+ 49 ʼE ko he lao pe anai ʼe tahi maʼa te tagata Iselaele pea mo te matapule ʼae ʼe nofo ʼi te lotolotoiga ʼo koutou.”+

50 Neʼe fai ai e te kau Iselaele fuli te ʼu meʼa ʼae neʼe fakatotonu e Sehova kia Moisese pea mo Alone. Neʼe natou mulimuli lelei pe ki ai. 51 ʼI te ʼaho totonu ʼaia, neʼe fakamavae e Sehova te kau Iselaele fuli* mai te fenua ʼo Esipito.

13 Pea neʼe toe ui e Sehova kia Moisese: 2 “Fakamaʼoniʼoniʼi* maʼaku te ʼu ʼuluaki tupu tagata fuli ʼae ʼi te kau Iselaele. Ko te ʼuluaki foha ʼo he Iselaele pea mo te ʼuluaki ʼuhi tagata ʼo he manu ʼe ʼaʼaku.”+

3 Pea neʼe ui e Moisese ki te hahaʼi: “Kotou manatuʼi te ʼaho ʼae neʼe kotou mavae ai ʼi Esipito,+ ʼae neʼe fakapopulaʼi ai koutou,* he neʼe fakamavae koutou mai ai e Sehova ʼaki tona nima mafimafi.+ Koia, ʼe mole tonu anai ke kotou kai ki he meʼa neʼe fai ʼaki te meʼa fakatupu. 4 ʼE kotou mavae ʼi te ʼaho nei, ʼi te mahina ʼo Apipi.*+ 5 Ka fakahu koutou e Sehova ki te fenua ʼo te kau Kanaane, mo te kau Heti, mo te kau Amole, mo te kau Hevi pea mo te kau Sepusi+ ʼae neʼe ina fakapapau ke ina foaki ki ʼakotou kui,+ ko he fenua ʼe tafe ai te huʼa pipi mo te meli,+ ʼe tonu anai ke kotou fai te ʼaho lahi ʼaeni ʼi te mahina ʼaeni. 6 ʼE kotou kai anai te pane hala fakatupu lolotoga ʼaho ʼe fitu,+ pea ʼe kotou fai anai he ʼaho lahi maʼa Sehova ʼi te fitu ʼaho. 7 ʼE kai anai te pane hala fakatupu lolotoga ʼaho ʼe fitu.+ Pea ʼe mole maʼu anai io koutou he meʼa neʼe fai ʼaki te meʼa fakatupu+ pea ʼe mole maʼu anai he meʼa fakatupu io koutou pea mo tokotou fenua katoa.* 8 Pea ʼe tonu anai ke kotou ui ki ʼakotou fanau ʼi te ʼaho ʼaia: ‘ ʼE matou fai te faʼahi ʼaia ʼuhi ko te meʼa ʼae neʼe fai e Sehova maʼa matou ʼi tamatou mavae ʼae mai Esipito.’+ 9 Pea ka fai te ʼaho lahi ʼaia, ʼe kotou manatuʼi anai ia te meʼa ʼaia neʼe hoko ohage pe neʼe kua tohi ʼi ʼokotou nima pea mo ʼokotou laʼe.*+ Pea ʼe kotou palalau ai anai ʼo ʼuhiga mo te lao ʼa Sehova, koteʼuhi neʼe fakamavae koutou e Sehova mai Esipito ʼaki tona nima mafimafi. 10 ʼI te taʼu fuli, ʼe tonu anai ke kotou mulimuli ki te lao ʼaia ʼi te temi ʼae kua fakatuʼutuʼu ki ai.+

11 “Pea ka fakahu koutou e Sehova ki te fenua ʼo te kau Kanaane ʼae neʼe ina fakapapau kia koutou mo ʼakotou kui, ke ina foaki atu,+ 12 ʼe tonu anai ke kotou foaki kia Sehova te ʼu ʼuluaki foha fuli, ʼo feia mo te ʼu ʼuluaki ʼuhi tagata fuli ʼo takotou faga manu ʼae ka kotou maʼu. Ko te ʼu ʼuluaki foha mo te ʼu ʼuluaki ʼuhi tagata ʼo te ʼu manu ʼe ʼa Sehova.+ 13 Pea ʼe tonu anai ke kotou totogi te ʼuluaki ʼuhi ʼo he asino ʼaki he ovi ʼe tahi. Pea kapau ʼe mole kotou totogi, ʼe tonu anai ke kotou fasiʼi te kia ʼo te asino. Pea ʼe tonu anai ke kotou totogi ʼokotou ʼuluaki foha.+

14 “Kapau ʼe fehuʼi atu e ʼakotou fanau ki ʼamuli: ‘Kotea te fakaʼuhiga ʼo te meʼa ʼaia?’ pea ʼe tonu anai ke kotou tali age: ‘Neʼe fakamavae matou e Sehova mai Esipito, ʼae neʼe fakapopulaʼi ai ia matou* ʼaki tona nima mafimafi.+ 15 Neʼe lotofefeka ia Falaone ʼo mole ina tali ke matou mavae.+ Koia neʼe matehi ai e Sehova te ʼu ʼuluaki tupu fuli ʼo te fenua ʼo Esipito, mai te ʼuluaki foha ʼo te tagata ki te ʼu ʼuluaki ʼuhi tagata ʼo te ʼu manu.+ Ko te tupuʼaga la ʼaia ʼo tamatou sakilifisioʼi kia Sehova te ʼu ʼuluaki ʼuhi tagata fuli ʼo te ʼu manu pea mo tamatou totogi ʼomatou ʼuluaki foha fuli.’ 16 Pea ʼe kotou manatuʼi ai anai ia te meʼa ʼaia neʼe hoko ohage pe neʼe kua tohi ʼi ʼokotou nima pea mo ʼokotou laʼe,*+ koteʼuhi neʼe fakamavae matou e Sehova mai Esipito ʼaki tona nima mafimafi.”

17 ʼI te tuku leva e Falaone te hahaʼi ke natou mavae, neʼe mole taki natou e te ʼAtua ʼi te ala ʼo te fenua ʼo te kau Filisitini, logo la tona ovi. Neʼe ui e te ʼAtua: “ ʼE feala anai ke fetogi te manatu ʼa te hahaʼi moka natou sisio ki te ʼomai ʼa he kau solia ʼo tauʼi ia natou pea ʼe natou toe liliu anai ki Esipito.” 18 Neʼe taki ai e te ʼAtua ia te hahaʼi ke natou foli age ʼi te ala ʼo te toafa, ʼae ʼe ovi ki te Tai Kula.+ Kae neʼe fakatuʼutuʼu lelei ia te kau Iselaele ʼi tanatou mavae ʼae mai te fenua ʼo Esipito, ohage ko he ʼu kutuga solia. 19 Neʼe toe ʼave foki e Moisese te ʼu hui ʼo Sosefo, koteʼuhi neʼe ui e Sosefo ki te ʼu foha ʼo Iselaele: “ ʼE tokoni moʼoni anai te ʼAtua kia koutou. Koia, kotou fakapapauʼi mai ʼe kotou toʼo anai ʼoku hui ʼi te fenua ʼaeni.”+ 20 Neʼe natou mavae ʼi Sukoti ʼo olo ʼo fakatuʼu tonatou nofoʼaga ʼi Etame, ʼi te tuʼakoi ʼo te toafa.

21 Pea neʼe alu ia Sehova ʼi ʼonatou muʼa, ʼi te ʼaho ʼaki he ʼao moʼo taki ia natou ʼi tonatou ala,+ pea ʼi te poʼuli ʼaki he pou afi moʼo fakamalamaʼi ia natou. Neʼe feala ai ke natou faifagona ʼi te ʼaho pea mo te poʼuli.+ 22 Neʼe mole mamaʼo ia te ʼao mo te hahaʼi ʼi te ʼaho, ʼo feia mo te pou afi ʼi te poʼuli.+

14 Neʼe ui leva e Sehova kia Moisese: 2 “Fakaha ki te kau Iselaele ke natou toe liliu ʼo fakatuʼu tonatou nofoʼaga ia muʼa ʼo Piheloti, ʼi te vaha ʼo Miketoli mo te tai, ʼo haga ki Paale-sefoni.+ ʼE kotou fakatuʼu anai tokotou nofoʼaga ʼo haga ki Paale-sefoni, ʼo ovi ki te tai. 3 Pea ʼe ui anai e Falaone ʼo ʼuhiga mo te kau Iselaele: ‘Kua natou hehe ʼi te fenua. ʼE mole kei ʼi ai honatou holaʼaga ʼi te toafa.’ 4 Koia, ʼe au tuku anai ia Falaone ke lotofefeka,+ pea ʼe ina tuli anai koutou, pea ʼe au fakakololiaʼi anai ia au ʼi taku malo ia Falaone mo tana foʼi kautau katoa.+ Pea ʼe iloʼi moʼoni anai e te kau Esipito ko au ia Sehova.”+ Neʼe mulimuli ai te kau Iselaele ki ai.

5 Ki muli age, neʼe fakaha ki te hau ʼo Esipito kua mavae ia te kau Iselaele. Neʼe fetogi atu aipe e Falaone mo ʼana hahaʼi faifekau tanatou manatu ʼo ʼuhiga mo te hahaʼi.+ Pea neʼe natou ui: “He koʼe neʼe tou fai te faʼahi ʼaia? He koʼe neʼe tou fakaʼateainaʼi ʼatatou hahaʼi kaugana Iselaele?” 6 Neʼe ina fakatotonu ai ke teuteuʼi ʼana saliote tau, pea neʼe ina ʼave ʼana tagata tau.+ 7 Neʼe ina toʼo te ʼu saliote ʼe 600 ʼae ʼe lelei tukupau pea mo te tahi ʼu saliote ʼo Esipito, pea neʼe ʼi ai he kau tagata tau ʼi te ʼu saliote takitahi ʼaia. 8 Neʼe tuku ai e Sehova ia Falaone, te hau ʼo Esipito, ke lotofefeka, pea neʼe ina tuli ai te kau Iselaele, kae neʼe mole tuʼania* te kau Iselaele ʼi tanatou mavae ʼi te fenua.+ 9 Neʼe tuli leva ia natou e te kau Esipito.+ Pea neʼe kua ovi age kia natou te ʼu hosi mo te ʼu saliote fuli ʼa Falaone, ʼo feia mo ʼana tagata heka hosi pea mo tana foʼi kautau, ʼi tanatou nonofo ovi ki te tai, ʼi Piheloti, ʼo haga ki Paale-sefoni.

10 ʼI te fakaovi mai ʼa Falaone, neʼe hiki ake e te kau Iselaele ʼonatou mata ʼo natou sisio ai ki tonatou tuli mai e te kau Esipito. Neʼe matataku ʼosi te kau Iselaele pea neʼe natou kamata pauʼi ai kia Sehova.+ 11 Neʼe natou ui age kia Moisese: “Neʼe ke ʼaumai koa ia matou ki heni ke matou mamate ʼi te toafa he ʼe mole ʼi ai he ʼu fale maka ʼi Esipito?+ He koʼe neʼe ke fai te faʼahi ʼaia kia matou? He koʼe neʼe ke fakamavae ia matou mai Esipito? 12 Neʼe mole koa la matou ui atu ʼi Esipito: ‘Tukunoa ia matou ke matou tauhi ki te kau Esipito’? He ʼe matou leleiʼia age tamatou tauhi ki te kau Esipito ʼi tamatou mamate ʼi te toafa.”+ 13 Pea neʼe ui e Moisese ki te hahaʼi: “ ʼAua naʼa kotou matataku.+ Kotou tutuʼu malohi pea mo sisio ki te haofaki ʼae ka fakahoko anai e Sehova maʼa koutou ʼi te ʼaho nei.+ He ʼe ko te kau Esipito ʼae ʼe kotou sisio ki ai ʼi te ʼaho nei, ʼe mole kotou toe sisio anai kia natou ʼi he ʼaho.+ 14 ʼE tau anai ia Sehova maʼa koutou,+ pea ʼe kotou nonofo fakalogologo anai.”

15 Pea neʼe ui e Sehova kia Moisese: “He koʼe ʼe ke pauʼi tuʼumaʼu mai kia te au? Fakaha ki te kau Iselaele ke hoko atu tonatou fagona. 16 Pea ko koe, ke ke hiki tou toko pea ke ke faoʼi tou nima ki te tai ke vaelua ai pea ke feala ki te kau Iselaele hanatou fakalaka ʼi te loto tai, ʼi he kele moamoa. 17 ʼE au tuku anai ia te kau Esipito ke natou lotofefeka, pea ʼe natou tuli anai ia natou. Pea ʼe au fakakololiaʼi anai ia au ʼi taku malo ia Falaone mo tana foʼi kautau katoa, mo ʼana saliote tau pea mo ʼana tagata heka hosi.+ 18 Pea ʼe iloʼi moʼoni anai e te kau Esipito ko au ia Sehova moka ʼe au fakakololiaʼi anai ia au ʼi taku malo ia Falaone, mo ʼana saliote tau pea mo ʼana tagata heka hosi.”+

19 Pea neʼe alu leva te ʼaselo ʼa te ʼAtua moʼoni,+ ʼae neʼe haʼele ʼi muʼa ʼo te kau Iselaele ʼo tuʼu mai ʼonatou tuʼa, pea neʼe alu te ʼao ʼae neʼe ʼi ʼonatou muʼa ʼo tuʼu mai ʼonatou tuʼa.+ 20 Neʼe tuʼu ai ʼi te vaha ʼo te kau Esipito pea mo te kau Iselaele.+ Neʼe fakapoʼuli te ʼao ʼaia ʼi te tahi faʼahi, pea neʼe ina fakamalamaʼi ia te tahi age faʼahi ʼi te poʼuli.+ Neʼe mole fakaovi ai te kau Esipito ki te kau Iselaele ʼi te po katoa ʼaia.

21 Pea neʼe faoʼi leva e Moisese tona nima ki te tai.+ Pea neʼe fakaagi e Sehova he matagi malohi mai te potu esite ʼi te po katoa, ʼo vaelua ai te tai+ pea neʼe moamoa ai te takele ʼo te tai.+ 22 Neʼe haʼele leva te kau Iselaele ʼi te loto tai ʼi he kele moamoa,+ pea neʼe tuʼu te tai ʼi tonatou faʼahi mataʼu mo tonatou faʼahi hema ohage ko he kaupa.+ 23 Pea neʼe tuli natou e te kau Esipito. Neʼe tuli ai natou e te ʼu hosi fuli ʼa Falaone, mo ʼana saliote tau pea mo ʼana tagata heka hosi ʼi te loto tai.+ 24 ʼI muʼa ʼo te mafoa ʼo te ʼaho,* neʼe sio ia Sehova ki te kau Esipito mai te pou afi pea mo te ʼao,+ pea neʼe ina fakatupu he maveuveu ʼi te kau Esipito. 25 Neʼe ina toʼo te ʼu foʼi teka ke faigataʼa ai tanatou taki ʼanatou saliote. Pea neʼe ui e te kau Esipito: “Tou feholaki mai te kau Iselaele, he ʼe tau ia Sehova maʼa natou ʼo fakafeagai mai kia tatou.”+

26 Pea neʼe ui e Sehova kia Moisese: “Faoʼi tou nima ki te tai ke mapeʼe ifo ki te kau Esipito, mo ʼanatou saliote tau pea mo ʼanatou tagata heka hosi.” 27 Neʼe faoʼi atu aipe e Moisese tona nima ki te tai, pea ʼi te kua vave ʼaho, neʼe toe liliu te tai ohage pe ko te mahani. Pea ʼi te feholaki ʼa te kau Esipito, neʼe li natou e Sehova ki te loto tai.+ 28 Neʼe lofia ai te ʼu saliote tau, mo te ʼu tagata heka hosi pea mo te foʼi kautau katoa ʼa Falaone, ʼae neʼe natou tuli te kau Iselaele ʼi te loto tai.+ Neʼe mole hao he tahi ia natou.+

29 Kae neʼe haʼele te kau Iselaele ʼi he kele moamoa, ʼi te takele ʼo te tai,+ pea neʼe tuʼu te tai ʼi tonatou faʼahi mataʼu mo tonatou faʼahi hema ohage ko he kaupa.+ 30 ʼI te ʼaho ʼaia, neʼe haofaki ai e Sehova te kau Iselaele mai te ʼu nima ʼo te kau Esipito,+ pea neʼe sisio te kau Iselaele ki te leta ʼo te ʼu sino ʼo te kau Esipito ʼi te matatai. 31 Neʼe toe sisio foki ia te kau Iselaele ki te mafimafi* ʼo Sehova ʼi tana fakafeagai ki te kau Esipito. Pea neʼe kamata manavasiʼi te hahaʼi kia Sehova pea mo tui kia Sehova mo tana tagata faifekau ko Moisese.+

15 ʼI te temi ʼaia, neʼe hiva e Moisese mo te kau Iselaele ia te hiva ʼaeni kia Sehova:+

“Ke au hiva kia Sehova, he ʼe lahi tona kololia.+

Neʼe ina li ki te tai te hosi pea mo te tagata ʼae neʼe heka ai.+

 2 ʼE ko Sehova* toku malohi, he neʼe liliu ko toku haofakiʼaga.+

ʼE ko ia toku ʼAtua, pea ʼe au vikiʼi anai ia ia.+ ʼE ko te ʼAtua ʼo taku tamai,+ pea ʼe au fakamaʼuhigaʼi anai ia ia.+

 3 Ko Sehova ʼe ko he tagata tau malohi.+ Ko tona huafa ʼe ko Sehova.+

 5 Neʼe mapeʼe ifo kia natou te ʼu foʼi peau. Neʼe natou mou ai ohage ko he foʼi maka.+

 9 Neʼe ui e te fili: ‘ ʼE au tuli anai ia natou! ʼE au maʼu anai ia natou!

ʼE au vaevae anai te ʼu koloa pea ʼe au* fiafia anai!

ʼE au tohoʼi anai taku heleta! ʼE au maumauʼi anai ia natou!’+

11 Sehova e, ʼe mole he tahi age ʼatua ʼe hage ko koe!+

ʼE mole he ʼatua ʼe maʼoniʼoni ohage ko koe!+

Ko koe ʼae ʼe tonu ke matou manavasiʼi ki ai ʼaki ni hiva fakavikiviki, ko koe ʼae ʼe ke fai he ʼu gaue fakaofoofo.+

12 Neʼe ke faoʼi tou nima mataʼu, pea neʼe folo ia natou e te kele.+

ʼE lotovaivai anai te hahaʼi fuli ʼo Kanaane.+

16 ʼE natou matataku ʼaupito anai.+

18 ʼE hau anai ia Sehova ʼo talu ai.+

20 Ko te tokolua ʼo Alone, ia Miliamu te fafine polofeta, neʼe ina toʼo leva tana nafa, pea neʼe muliʼi ia ia e te ʼu fafine fuli mo ʼanatou nafa pea neʼe natou memeʼe. 21 Neʼe tali e Miliamu ki te ʼu tagata, ʼo hiva:

“Kotou hiva kia Sehova, he ʼe lahi tona kololia.+

Neʼe ina li ki te tai te hosi pea mo te tagata ʼae neʼe heka ai.”+

22 Ki muli age, neʼe taki e Moisese ia Iselaele, ʼo natou mavae mai te Tai Kula ʼo olo ki te toafa ʼo Sule. Pea neʼe natou haʼele lolotoga ʼaho ʼe tolu ʼi te toafa, kae neʼe mole natou maʼu he vai. 23 Neʼe natou tau leva ki Mala,*+ kae neʼe mole feala hanatou inu te vai ʼo Mala he neʼe kona. Koia ʼae neʼe fakahigoaʼi ai te koga meʼa ʼaia ko Mala. 24 Pea neʼe muhumuhu te hahaʼi kia Moisese,+ ʼo natou ui: “Kotea anai ka matou inu?” 25 Neʼe pauʼi ai ia Moisese kia Sehova,+ pea neʼe fakaha age e Sehova kia ia he fuʼu ʼakau. ʼI tana li te fuʼu ʼakau ʼaia ki te vai, neʼe huʼa lelei ai te vai.

ʼI te koga meʼa ʼaia, neʼe Ina foaki kia natou he lao. Pea ʼaki te meʼa ʼaia neʼe hoko, neʼe iloʼi ai e te hahaʼi pe kotea te fakamau ʼa te ʼAtua, pea neʼe Ina ʼahiʼahiʼi ia natou ʼi ai.+ 26 Neʼe ina ui: “Kapau ʼe kotou fakalogo lelei ki te leʼo ʼo Sehova tokotou ʼAtua, mo fai te meʼa ʼae ʼe lelei ki ʼona mata, mo tokagaʼi ʼana fakatotonu pea mo taupau ʼana lekula fuli,+ ʼe mole au tauteaʼi anai ia koutou ʼaki he mahaki ʼi te ʼu mahaki ʼae neʼe au tauteaʼi ʼaki te kau Esipito,+ koteʼuhi ko au, ia Sehova, ʼe au fakamalolo anai ia koutou.”+

27 Hili ʼaia, neʼe natou tau leva ki Elimi, ʼae neʼe ʼi ai ni matapuna vai ʼe 12 pea mo ni fuʼu palema ʼe 70. Neʼe natou fakatuʼu ai tonatou nofoʼaga ʼo ovi ki te vai.

16 Neʼe mavae te kau Iselaele mai Elimi. Pea neʼe natou tau leva ki te toafa ʼo Sini,+ ʼae ʼe tuʼu ʼi te vaha ʼo Elimi mo Sinai, ʼi te 15 ʼaho ʼo te lua mahina hili tanatou mavae mai te fenua ʼo Esipito.

2 Neʼe kamata muhumuhu leva te kau Iselaele kia Moisese mo Alone ʼi te toafa.+ 3 Neʼe ui e te kau Iselaele kia naua: “Neʼe lagi lelei age ke matehi matou e Sehova ʼi te fenua ʼo Esipito, ʼae neʼe matou kai ai te kanoʼi manu+ mo te pane ʼo kaku ki tamatou makokona. Kae neʼe kolua ʼaumai matou ki te toafa ʼaeni ke mamate pakupaku te hahaʼi katoa.”+

4 Pea neʼe ui e Sehova kia Moisese: “ ʼE au fakato anai he pane mai te lagi maʼa koutou.+ ʼE tonu anai ki te hahaʼi ke olo ʼo tae ʼi te ʼaho fuli ʼo tahi fakafuafua pe ki te meʼa ʼae ʼe ʼaoga kia natou,+ ke au ʼahiʼahiʼi ai ia natou pea mo vakaʼi pe ʼe natou fakalogo anai ki taku lao peʼe kailoa.+ 5 Kae ʼi te ono ʼaho,+ ʼe natou fakamoho anai te meʼa ʼae neʼe natou tae kia ʼaho ʼe lua.”+

6 Pea neʼe ui e Moisese mo Alone ki te kau Iselaele fuli: “ ʼI te afiafi, ʼe kotou iloʼi moʼoni anai ʼe ko Sehova ʼae neʼe ina fakamavae koutou mai te fenua ʼo Esipito.+ 7 Pea ʼe kotou sisio anai ʼi te uhu ki te kololia ʼo Sehova, he neʼe logo ia Sehova ki ʼakotou muhumuhu kia te ia. Ko ai ia maua, ke kotou muhumuhu ai kia maua?” 8 Neʼe hoko atu e Moisese: “Ka foaki atu e Sehova he kanoʼi manu ke kotou kai ʼi te afiafi pea mo he pane ke kotou kai ʼi te uhu ʼo kaku ki takotou makokona, ʼe kotou sisio anai neʼe logo ia Sehova ki ʼakotou muhumuhu kia te ia. Kae ko ai ia maua? Neʼe mole kotou muhumuhu kia maua, kae kia Sehova.”+

9 Neʼe ui leva e Moisese kia Alone: “Ke ke ui ki te kau Iselaele: ‘Kotou ʼomai kia muʼa ʼo Sehova, he ʼe kua logo ki ʼakotou muhumuhu.’ ”+ 10 ʼI te ʼosi palalau pe ʼa Alone ki te kau Iselaele, neʼe natou mafuli ai ʼo haga ki te toafa, pea neʼe ha te kololia ʼo Sehova ʼi te ʼao.+

11 Pea neʼe toe ui e Sehova kia Moisese: 12 “Neʼe au logo ki te muhumuhu ʼa te kau Iselaele.+ Ke ke ui kia natou: ‘ ʼI te ʼosi to ʼo te laʼa,* ʼe kotou kai anai he kanoʼi manu, pea ʼe kotou kai anai he pane ʼi te uhu ʼo kaku ki takotou makokona.+ Pea ʼe kotou iloʼi moʼoni anai ko au ia Sehova tokotou ʼAtua.’ ”+

13 Koia, ʼi te afiafi ʼaia neʼe ʼomai ai he ʼu manulele ʼo ʼaofi te nofoʼaga,+ pea ʼi te ʼaho ake, ʼi te uhu neʼe ʼi ai he hahau ʼi te ʼu tafaʼaki ʼo te nofoʼaga. 14 ʼI te temi ʼae neʼe puli ai te hahau, neʼe ha ʼi te fuga kele he meʼa manifi neʼe hage ko te nive.+ 15 ʼI te sisio ʼa te kau Iselaele ki ai, neʼe natou feʼekeʼaki: “Kotea te meʼa ʼaeni?” Neʼe natou fai te ʼu palalau ʼaia he neʼe mole natou iloʼi pe kotea. Pea neʼe tali e Moisese kia natou: “ ʼE ko te pane ʼae ʼe foaki atu e Sehova ohage ko hakotou meʼa kai.+ 16 Koʼeni te meʼa ʼae neʼe fakatotonu e Sehova: ‘ ʼE tonu anai ke tahi tae e te tagata ʼo mulimuli pe ki te meʼa ʼae ʼe feala ke ina kai. ʼE kotou toʼo anai he fua omele ʼe tahi*+ maʼa te tagata takitahi, ʼo mulimuli ki te kaugamalie ʼo te hahaʼi* ʼae ʼe nonofo ʼi ʼokotou fale la.’ ” 17 Neʼe fai e te kau Iselaele te faʼahi ʼaia. Neʼe tae lahi e ʼihi kae tae veliveli e ʼihi. 18 Pea ʼi tanatou fuafua ʼaki te omele, ko ia ʼae neʼe ina tae lahi neʼe mole lahi fau pea ko ia ʼae neʼe ina tae veliveli neʼe mole veliveli fau.+ Neʼe natou tahi tae ʼo mulimuli pe ki te meʼa ʼae neʼe feala ke natou kai.

19 Neʼe ui leva e Moisese kia natou: “Ke ʼaua naʼa tuku e he tahi he meʼa ke toe ki apogipogi.”+ 20 Kae neʼe mole natou fakalogo kia Moisese. Ka tuku e ʼihi he meʼa ke toe ki apogipogi, neʼe ulu ki ai te ʼugaga pea neʼe mamanu. Pea neʼe ita ʼosi ia Moisese kia natou. 21 Neʼe natou tae ʼi te uhu fuli, ʼo tahi mulimuli pe ki te meʼa ʼae neʼe feala ke natou kai. Pea ʼi te temi ʼae neʼe kamata sisiga ai te laʼa, neʼe vaia te meʼa ʼae neʼe toe ʼi te fuga kele.

22 ʼI te ono ʼaho, neʼe natou tae te pane kia ʼaho ʼe lua,+ neʼe taki lua te tagata mo tana fua omele. Neʼe olo fuli ai te kau takitaki ʼo te kau Iselaele ʼo fakaha age kia Moisese. 23 Pea neʼe ina tali kia natou: “ ʼE ko te faʼahi ʼaeni neʼe ui e Sehova: Apogipogi, ʼe ko he ʼaho malolo anai,* ko he sapato taputapu kia Sehova.+ Kotou fakamoho te meʼa ʼae ʼe tonu ke fakamoho, pea kotou fakapula te meʼa ʼae ʼe tonu ke fakapula.+ Pea ko te meʼa ʼae ʼe toe, kotou tuku ki apogipogi.” 24 Neʼe natou tuku ai ki apogipogi, ohage pe ko tona fakatotonu age e Moisese, pea neʼe mole mamanu mo fonu ʼugaga. 25 Neʼe ui leva e Moisese: “Kotou kai te meʼa ʼae neʼe toe ʼi te ʼaho nei, he ʼe ko te ʼaho nei ʼe ko he sapato kia Sehova. ʼI te ʼaho nei, ʼe mole kotou maʼu anai he meʼa ʼi te fuga kele. 26 ʼE kotou tae anai lolotoga ʼaho ʼe ono, kae ʼi te fitu ʼaho, ʼae ko te Sapato,+ ʼe mole kotou maʼu anai he meʼa.” 27 Kae ʼi te fitu ʼaho, neʼe olo pe ʼihi ke natou tae, kae neʼe mole natou maʼu he meʼa.

28 Koia neʼe ui ai e Sehova kia Moisese: “ ʼE kaku anai ki ʼafea takotou mole fia taupau ʼaku fakatotonu mo ʼaku lao?+ 29 Kotou manatuʼi, neʼe tuku atu e Sehova te Sapato ke kotou malolo ai.+ Ko te tupuʼaga la ʼaia ʼo tana foaki atu ʼi te ono ʼaho te pane kia ʼaho ʼe lua. ʼE tonu ke kotou tahi nofo pe ʼi te faʼahi ʼae ʼe kotou nonofo ai, ʼe mole tonu ke alu he tahi ki tuʼa ʼi te fitu ʼaho.” 30 Neʼe fai ai e te hahaʼi te Sapato* ʼi te fitu ʼaho.+

31 Neʼe fakahigoa e te kau Iselaele ia te pane ko te “mane.”* Neʼe hage ko he ʼu kiʼi pulapula hina, pea neʼe kano lelei ohage ko he ʼu foʼi keke halafalafa neʼe fai ʼaki te meli.+ 32 Pea neʼe ui e Moisese: “Koʼeni te meʼa ʼae ʼe fakatotonu e Sehova: ‘Kotou toʼo he fua omele ʼe tahi ko te mane ʼo kotou taupau. ʼE sisio ai anai te ʼu taʼiake ʼae ʼe muli mai+ ki te pane ʼae neʼe au foaki atu ʼi te toafa ke kotou kai, ʼi taku fakamavae koutou mai te fenua ʼo Esipito.’ ” 33 Koia neʼe ui e Moisese kia Alone: “ ʼAi he fua omele ʼe tahi ko te mane ki he ipu lahi pea ke tuku kia muʼa ʼo Sehova ohage ko he meʼa ʼe tonu ke taupau maʼa te ʼu taʼiake ʼae ʼe muli mai.”+ 34 Neʼe tuku ai e Alone te ipu lahi ʼaia ia muʼa ʼo te Fakamoʼoni+ ke tupu ai hona taupau, ohage pe ko tona fakatotonu e Sehova kia Moisese. 35 Neʼe kai e te kau Iselaele te mane lolotoga taʼu ʼe 40,+ ʼo kaku ki tanatou tau ki he fenua neʼe kua nofoʼi.+ Neʼe natou kai te mane ʼo kaku ki tanatou tau ki te tuʼakoi ʼo te fenua ʼo Kanaane.+ 36 Ko he omele ʼe tahi ʼe ko te vahe tahi ki te hogofulu ʼo he fua efa* ʼe tahi.

17 Neʼe mavae leva te kau Iselaele mai te toafa ʼo Sini+ ʼo natou olo ai mai he tahi koga meʼa ki he tahi age koga meʼa, ʼo mulimuli pe ki te fakatotonu ʼa Sehova.+ Pea neʼe natou fakatuʼu tonatou nofoʼaga ʼi Lefitimi.+ Kae neʼe mole maʼu ai he vai ke iinu ai te hahaʼi.

2 Pea neʼe fakatupu kē ia te hahaʼi kia Moisese,+ ʼo natou ui age ki ai: “Foaki mai he moʼi vai ke matou inu.” Kae neʼe tali e Moisese kia natou: “He koʼe ʼe kotou fakatupu kē mai kia au? He koʼe ʼe kotou ʼahiʼahiʼi tuʼumaʼu pe ia Sehova?”+ 3 Kae neʼe kua kovi ʼosi te fia iinu ʼa te hahaʼi, pea neʼe hoko atu pe tanatou muhumuhu kia Moisese:+ “He koʼe neʼe ke fakamavae ia matou mai Esipito, ke matou mamate ʼi te fia inu, ia matou mo ʼomatou foha pea mo tamatou faga manu?” 4 Neʼe pauʼi ai ia Moisese kia Sehova: “Kotea ʼae ʼe tonu ke au fai ki te hahaʼi ʼaeni? Kua lagi vave pe hanatou tuki makaʼi au!”

5 Neʼe ui e Sehova kia Moisese: “Fakalaka ia muʼa ʼo te hahaʼi, pea ke alu mo he kau tagata takitaki ʼo Iselaele pea ke toʼo tou toko ʼae neʼe ke taʼi ʼaki te Vai Tafe ʼo Nile.+ Toʼo te toko ʼi tou nima pea ke alu. 6 Koʼeni, ʼe au tuʼu anai ʼi ʼou muʼa, ʼi te fuʼu maka ʼae ʼi Olepe. ʼE ke taʼi anai te fuʼu maka, pea ʼe haʼu anai te vai ki tuʼa, pea ʼe iinu anai te hahaʼi.”+ Neʼe fai e Moisese te faʼahi ʼaia ia muʼa ʼo te kau tagata takitaki ʼo Iselaele. 7 Neʼe ina fakahigoa leva te koga meʼa ʼaia ko Masea*+ pea mo Melipa,*+ he neʼe fakatupu kē te kau Iselaele kia Moisese pea neʼe natou ʼahiʼahiʼi ia Sehova+ ʼi tanatou ui: “ ʼE nofo koa ia Sehova ʼi te lotolotoiga ʼo tatou peʼe kailoa?”

8 Neʼe ʼomai leva te kau Amaleke+ ʼo tauʼi ia Iselaele ʼi Lefitimi.+ 9 Pea neʼe ui e Moisese kia Sosue:+ “Filifili he ʼu tagata pea ke alu ʼo tauʼi te kau Amaleke. Apogipogi, ʼe au tuʼu anai ʼi te tumutumu ʼo te kiʼi moʼuga, mo te toko ʼo te ʼAtua moʼoni ʼi toku nima.” 10 Neʼe fai leva e Sosue te meʼa ʼae neʼe ui age e Moisese,+ pea neʼe ina tauʼi te kau Amaleke. Pea neʼe hake ia Moisese, mo Alone pea mo Ulu+ ki te tumutumu ʼo te kiʼi moʼuga.

11 Ka tuku maʼu e Moisese ʼona nima ʼi ʼoluga, neʼe malohi ia Iselaele, kae ka ina tuku ifo ʼona nima ki lalo, neʼe malohi te kau Amaleke. 12 ʼI te temi ʼae neʼe vaivai ai te ʼu nima ʼo Moisese, neʼe toʼo e Alone mo Ulu he foʼi maka ke heka ki ai. Neʼe nā tahi tuʼu ʼi ʼona tafa, ʼo puke ʼona nima, pea neʼe tuʼu maʼu ai ʼona nima ʼo kaku ki te to ʼo te laʼa. 13 Neʼe malo ai ia Sosue ʼi te kau Amaleke ʼaki te heleta.+

14 Pea neʼe ui e Sehova kia Moisese: “Tohi te faʼahi ʼaeni ʼi te tohi ke manatuʼi* pea ke fakaha age kia Sosue: ‘ ʼE au pulihi katoa anai te kau Amaleke ʼi te fuga ʼo te kele,* pea ʼe mole manatuʼi anai natou e he tahi.’ ”+ 15 Pea neʼe laga leva e Moisese he ʼaletale ʼo ina fakahigoa ko Sehova-nisi.* 16 Neʼe ina ui: “ ʼE tauʼi anai e Sehova te kau Amaleke mai he taʼiake ki he tahi taʼiake,+ he ʼe natou hiki ʼonatou nima ʼo fakafeagai ki te hekaʼaga fakahau ʼo Sehova.”*+

18 Pea neʼe logo ia Setelo ki te ʼu meʼa fuli ʼae neʼe fai e te ʼAtua maʼa Moisese pea mo Iselaele, tana hahaʼi, te fakamavae ʼae e Sehova ia Iselaele mai Esipito.+ Ko Setelo neʼe ko te pelepitelo ʼo Matiane, pea neʼe ko te tamai ʼo te ʼohoana ʼo Moisese.+ 2 Neʼe tokaga ia Setelo kia Sefola, te ʼohoana ʼo Moisese, ʼae neʼe fekauʼi e Moisese ke toe liliu ki tana tamai. 3 Pea neʼe toe tokaga foki ki ʼana tama ʼe lua.+ Neʼe higoa te tahi ko Kelesomi*+ he neʼe ui e Moisese: “Kua au maʼuli ohage ko he matapule ʼi he fenua matapule,” 4 pea neʼe higoa te tahi ko Eliesele* he neʼe ui e Moisese: “Ko te ʼAtua ʼo taku tamai ʼe ko toku tokoni, neʼe ina haofaki au mai te heleta ʼa Falaone.”+

5 Neʼe alu ia Setelo mo te ʼu foha ʼo Moisese pea mo tona ʼohoana kia Moisese, ʼae neʼe nofo ʼi te toafa ʼi te moʼuga ʼo te ʼAtua moʼoni.+ 6 Pea neʼe ina fekauʼi he tahi ke alu ʼo fakaha kia Moisese: “Ko au, ia Setelo te tamai ʼo tou ʼohoana,+ neʼe au haʼu mo tou ʼohoana pea mo ʼou foha ʼe lua.” 7 Neʼe alu atu aipe ia Moisese ʼo fakafelaveʼi ki te tamai ʼo tona ʼohoana, pea neʼe tulolo mo ʼuma ki ai. Neʼe nā fefakalavelaveʼaki pe ʼe nā feafeaʼi, pea neʼe nā feulufi leva ki te fale la.

8 Neʼe fakamatala age e Moisese ki te tamai ʼo tona ʼohoana te ʼu meʼa fuli ʼae neʼe fai e Sehova kia Falaone mo Esipito ʼuhi ko Iselaele,+ ʼo feia mo te ʼu faigataʼaʼia fuli ʼae neʼe hoko kia natou ʼi te ala+ pea mo tonatou haofaki e Sehova. 9 Neʼe fiafia ia Setelo ʼo ʼuhiga mo te ʼu meʼa lelei fuli ʼae neʼe fai e Sehova maʼa Iselaele ʼi tana haofaki ia natou mai Esipito.* 10 Neʼe ui leva e Setelo: “Ke vikiʼi ia Sehova, ia ia ʼae neʼe ina haofaki koutou mai Esipito pea mo Falaone, pea mo ina haofaki te hahaʼi mai te pule ʼa te kau Esipito. 11 Kua au iloʼi ʼi te temi nei ʼe lahi age ia Sehova ʼi te ʼu ʼatua fuli,+ ʼuhi ko te meʼa ʼae neʼe ina fai kia natou ʼae neʼe fiameʼalahi mo agakovi ki tana hahaʼi.” 12 Neʼe ʼaumai leva e Setelo, te tamai ʼo te ʼohoana ʼo Moisese, he holokoseta mo he ʼu sakilifisio maʼa te ʼAtua. Pea neʼe ʼomai ia Alone mo te kau tagata takitaki fuli ʼo Iselaele ʼo kakai fakatahi mo te tamai ʼo te ʼohoana ʼo Moisese ia muʼa ʼo te ʼAtua moʼoni.

13 ʼI te ʼaho ake, neʼe heka ia Moisese ʼo fakamauʼi te hahaʼi, ohage pe ko tana fai mahani. Pea neʼe olo tuʼumaʼu pe te hahaʼi ʼo tutuʼu ia muʼa ʼo Moisese mai te uhu ʼo kaku ki te afiafi. 14 ʼI te sio ʼa te tamai ʼo te ʼohoana ʼo Moisese ki te ʼu meʼa fuli ʼae neʼe ina fai maʼa te hahaʼi, neʼe ina ui leva ki ai: “He koʼe ʼe ke fai feia? He koʼe ʼe ke heka tokotahi kae ʼomai te hahaʼi ʼo tutuʼu ʼi ʼou muʼa, mai te uhu ʼo kaku ki te afiafi?” 15 Neʼe tali age e Moisese: “He ʼe ʼomai tuʼumaʼu pe te hahaʼi kia au ke au fakafehuʼi te ʼAtua. 16 Ka fihi he foʼi toko lua, ʼe fakaha mai pea ʼe tonu ke au fakamauʼi, pea ʼe au fakaha kia naua te ʼu tonu ʼa te ʼAtua moʼoni mo ʼana lao.”+

17 Neʼe ui age e te tamai ʼo te ʼohoana ʼo Moisese: “ ʼE mole lelei tau faʼahiga fai ʼaia. 18 ʼE mahino ia, ʼe ke gaʼegaʼe anai, ʼo feia pe mo te hahaʼi ʼae ʼe fakatahi mo koe, he ʼe mamafa fau te kavega ʼaia kia koe pea ʼe mole feala ke ke ʼamo tokotahi. 19 Koia, ke ke fakalogo mai. ʼE au foaki atu anai he tokoni, pea ʼe nofo anai te ʼAtua mo koe.+ ʼE ke fakafofoga ia te hahaʼi ia muʼa ʼo te ʼAtua moʼoni,+ pea ʼe tonu ke ke fakaha ki te ʼAtua moʼoni te ʼu fihi ʼae neʼe hoko.+ 20 ʼE tonu anai ke ke fakamahino kia natou te ʼu lekula mo te ʼu lao+ pea mo ke fakaha te ala ʼae ʼe tonu ke natou haʼele ai mo te gaue ʼae ʼe tonu ke natou fai. 21 Kae ʼe tonu anai ke ke filifili mai te hahaʼi he ʼu tagata popoto,+ ʼe natou manavasiʼi ki te ʼAtua, ko he ʼu tagata ʼe tuha mo te falala pea ʼe fehihiʼa ki te ʼu koloa ʼae ʼe foaki fakakaka age.+ Pea ʼe ke fakanofo anai ia natou ko he ʼu pule ʼo he toko afe, mo he ʼu pule ʼo he toko teau, mo he ʼu pule ʼo he toko nimagofulu pea mo he ʼu pule ʼo he toko hogofulu.+ 22 ʼE natou fakamauʼi anai te hahaʼi moka hoko he ʼu fihi,* pea ʼe natou fakaha atu pe anai te ʼu fihi ʼae ʼe faigataʼa fau kia natou,+ kae ko te ʼu fihi ʼae ʼe faigafua, ʼe natou fai pe anai he tonu ki ai. Fakamaʼamaʼa tau kavega, ʼo ke tuku ke kotou kaugā ʼamo fakatahi te kavega ʼaia.+ 23 Kapau ʼe ke fai te faʼahi ʼaia ʼo mulimuli ki te fakatotonu ʼa te ʼAtua, ʼe ke lava katakiʼi anai pea ʼe toe liliu fiafia te hahaʼi ki ʼonatou ʼapi.”

24 Neʼe fakalogo atu aipe ia Moisese ki te tamai ʼo tona ʼohoana pea neʼe ina fai te ʼu meʼa fuli ʼae neʼe ina ui age. 25 Neʼe filifili e Moisese he ʼu tagata neʼe popoto ʼi Iselaele katoa, pea neʼe ina fakanofo ia natou ke pule ki te hahaʼi: ko he ʼu pule ʼo he toko afe, mo he ʼu pule ʼo he toko teau, mo he ʼu pule ʼo he toko nimagofulu pea mo he ʼu pule ʼo he toko hogofulu. 26 Neʼe natou fakamauʼi te hahaʼi moka hoko he ʼu fihi. Ko te ʼu fihi ʼae ʼe faigataʼa, neʼe natou fakaha age kia Moisese,+ kae ko te ʼu fihi ʼae ʼe faigafua, neʼe natou fakamauʼi pe. 27 Hili ʼaia, neʼe tauʼine ia Moisese ki te tamai ʼo tona ʼohoana,+ pea neʼe toe liliu leva ia Setelo ki tona fenua.

19 ʼI te tolu mahina, ʼi te ʼosi mavae ʼa te kau Iselaele mai te fenua ʼo Esipito, neʼe natou tau leva ki te toafa ʼo Sinai, ʼi te ʼaho pe ʼaia. 2 Neʼe natou mavae mai Lefitimi+ pea neʼe natou tau ki te toafa ʼo Sinai, ʼo fakatuʼu ai tonatou nofoʼaga. Neʼe fakatuʼu e te kau Iselaele tonatou nofoʼaga ʼo haga ki te moʼuga.+

3 Neʼe hake leva ia Moisese ki te moʼuga ʼo tuʼu ia muʼa ʼo te ʼAtua moʼoni, pea neʼe pauʼi e Sehova mai te moʼuga,+ ʼo ina ui age: “Koʼeni te meʼa ʼae ʼe tonu ke ke ui ki te hologa ʼo Sakopo, ia te kau Iselaele: 4 ‘Neʼe kotou sisio mata ki te ʼu meʼa ʼae neʼe au fai ki te kau Esipito,+ ke feala ai haku ʼave koutou ohage pe ko te ʼave e he akuila ʼona ʼuhi ʼi ʼona pakakau, pea ke au ʼaumai koutou kia te au.+ 5 ʼI te temi nei, kapau ʼe kotou fakalogo lelei ki toku leʼo pea mo taupau taku fuakava, ʼe kotou liliu moʼoni anai ko toku koloa makehe ʼi te hahaʼi fuli,+ koteʼuhi ʼe ʼaʼaku te kele katoa.+ 6 ʼE kotou liliu anai ko he puleʼaga ʼe faʼufaʼu e he kau pelepitelo pea mo he puleʼaga maʼoniʼoni.’+ ʼE tonu anai ke ke fakaha age te ʼu folafola ʼaia ki te kau Iselaele.”

7 Neʼe alu ai ia Moisese ʼo pauʼi te kau tagata takitaki ʼo te hahaʼi pea neʼe ina fakaha kia natou te ʼu folafola fuli ʼaia neʼe fakatotonu age e Sehova kia ia.+ 8 Hili ʼaia, neʼe tali fakatahi e te hahaʼi fuli: “Ko te ʼu meʼa fuli ʼae neʼe ui e Sehova, ʼe matou lotolelei ke matou fai.”+ Neʼe alu atu aipe ia Moisese ʼo fakaha kia Sehova te tali ʼae neʼe fai e te hahaʼi. 9 Pea neʼe ui age e Sehova kia Moisese: “ ʼE au alu atu anai kia koe ʼi he ʼao fakapoʼuli, ke logo ai ia te hahaʼi moka ʼe au palalau mo koe pea ke natou tui tuʼumaʼu pe kia koe.” Neʼe fakaha leva e Moisese kia Sehova te ʼu palalau ʼae neʼe fai e te hahaʼi.

10 Pea neʼe ui e Sehova kia Moisese: “Alu ki te hahaʼi pea ke fakamaʼa ia natou ʼi te ʼaho nei mo apogipogi, pea ʼe tonu ke natou fo ʼonatou teu. 11 ʼE tonu ke natou tokalelei ki te tolu ʼaho, he ʼe hifo anai ia Sehova ʼi te tolu ʼaho ki te Moʼuga ʼo Sinai ia muʼa ʼo te hahaʼi fuli. 12 ʼE tonu ke ke fakatuʼu he ʼu tuʼakoi ʼi te takafoli ʼo te moʼuga pea ke ui ki te hahaʼi: ‘ ʼAua naʼa kotou hake ki te moʼuga peʼe kotou fakalaka ʼi te ʼu tuʼakoi. Ko he tahi pe ʼe fakaovi ki te moʼuga, ʼe matehi moʼoni anai. 13 ʼE mole ala anai he tahi ki ʼae neʼe talagataʼa, kae ʼe tuki makaʼi anai peʼe hukiʼi.* Kapau ko he manu peʼe ko he tagata, ʼe mole tuku anai ke maʼuli.’+ Kae ka pupuhi anai te fakatagi pupuhi,*+ ʼe feala anai hanatou hake ki te moʼuga.”

14 Neʼe hifo leva ia Moisese mai te moʼuga ʼo alu ki te hahaʼi, pea neʼe ina fakamaʼa ia natou, pea neʼe natou fo ʼonatou teu.+ 15 Neʼe ina ui ki te hahaʼi: “Ke kotou tokalelei ki te tolu ʼaho. Ke ʼaua naʼa kotou fai ni felaveʼi fakasino.”*

16 ʼI te uhu ʼo te tolu ʼaho, neʼe ʼuʼulu leva te mana, neʼe tapa mo te hila, neʼe ʼi ai he ʼao matolu+ ʼi te moʼuga pea neʼe natou logo ki te pupuhi malohi ʼo te fakatagi pupuhi. Neʼe tekelili te hahaʼi fuli ʼae neʼe ʼi te nofoʼaga.+ 17 Neʼe fakamavae ai e Moisese ia te hahaʼi ʼi te nofoʼaga ke natou olo ʼo felaveʼi mo te ʼAtua moʼoni. Neʼe natou tutuʼu ʼi te vaʼe moʼuga. 18 Neʼe kohu katoa te Moʼuga ʼo Sinai, he neʼe hifo ia Sehova ki ai ʼi he afi.+ Neʼe alu ake te kohu ohage ko he kohu ʼo he gutuʼumu, pea neʼe galulu malohi te moʼuga katoa.+ 19 Neʼe toe ʼasili malohi age te pupuhi ʼo te fakatagi pupuhi. Neʼe palalau leva ia Moisese, pea neʼe tali age e te ʼAtua moʼoni.*

20 Koia, neʼe hifo ai ia Sehova ki te Moʼuga ʼo Sinai, ki te tumutumu ʼo te moʼuga. Pea neʼe pauʼi e Sehova ia Moisese ke hake ake ki te tumutumu ʼo te moʼuga. Neʼe hake ai ia Moisese.+ 21 Neʼe ui e Sehova kia Moisese: “Hifo pea ke alu ʼo fakatokaga ki te hahaʼi ke ʼaua naʼa natou fakalaka ʼi te ʼu tuʼakoi ke natou sisio kia Sehova, naʼa mamate he kaugamalie ʼo natou. 22 Pea ʼe tonu anai ki te kau pelepitelo ʼae ʼe tau fakaovi kia Sehova ke natou fakamaʼa ia natou totonu, ke mole matehi natou e Sehova.”+ 23 Neʼe ui leva e Moisese kia Sehova: “ ʼE mole feala ke hake te hahaʼi ki te Moʼuga ʼo Sinai he neʼe kua ke fakatokaga mai: ‘Fakatuʼu he ʼu tuʼakoi ʼi te takafoli ʼo te moʼuga, pea ke ke fakamaʼoniʼoniʼi.’ ”+ 24 Kae neʼe ui e Sehova ki ai: “Hifo pea ke ke toe liliu mai mo Alone, kae ʼaua naʼa ke tuku ke fakalaka te kau pelepitelo mo te hahaʼi ʼi te ʼu tuʼakoi ke natou hake mai kia te au, ʼae ko Sehova, ke mole au matehi natou.”+ 25 Neʼe hifo ai ia Moisese ʼo alu ki te hahaʼi ʼo fakaha te ʼu meʼa ʼae neʼe ui age e te ʼAtua.

20 Neʼe fai leva e te ʼAtua te ʼu folafola fuli ʼaeni:+

2 “Ko au ia Sehova tou ʼAtua, ʼae neʼe ina fakamavae ia koe mai te fenua ʼo Esipito, ʼae neʼe fakapopulaʼi ai ia koe.*+ 3 ʼE tonu ke ke atolasio kia au tokotahi pe. ʼE mole tonu ke ke atolasio ki he tahi age ʼu ʼatua.+

4 “ ʼE mole tonu ke ke fai he fakatata peʼe ko he meʼa ʼe fakata ki he meʼa ʼi selo, peʼe ʼi te kele, peʼe ʼi te ʼu vai.+ 5 ʼE mole tonu ke ke tulolo ʼi ʼonatou muʼa pea mo tauhi kia natou,+ koteʼuhi ko au, ia Sehova tou ʼAtua, ko he ʼAtua ʼe ina fakamaʼua ke pipiki ʼateaina pe kia te ia.+ ʼE au tauteaʼi te ʼu foha ʼuhi ko te hala ʼo ʼanatou tamai ʼae ʼe fehihiʼa kia te au, pea ʼe au toe tauteaʼi mo te tolu taʼiake mo te fa taʼiake. 6 Kae ʼe au fakaha toku ʼofa agatonu ki te afe taʼiake, ʼae ʼe hifo mai ia natou ʼae ʼe ʼoʼofa ia te au pea mo taupau ʼaku fakatotonu.+

7 “ ʼE mole tonu ke ke moamoagaʼi te huafa ʼo Sehova tou ʼAtua,+ koteʼuhi ʼe mole tuku anai e Sehova ke hala tautea ia ia ʼae ʼe ina moamoagaʼi Tona huafa.+

8 “Manatuʼi ʼo fai te ʼaho ʼo te Sapato pea ke taputapu kia koe.+ 9 ʼE tonu ke ke fai ʼau gaue fuli lolotoga ʼaho ʼe ono,+ 10 kae ko te fitu ʼaho ʼe ko he sapato ia kia Sehova tou ʼAtua. ʼE mole tonu ke ke fai he gaue, ʼo feia mo ʼau fanau, mo tau tagata kaugana, mo tau fafine kaugana, mo tau manu lalata pea mo te matapule ʼae ʼe nofo ʼi tou kolo.*+ 11 Koteʼuhi neʼe faʼu e Sehova te lagi, mo te kele, mo te tai mo meʼa fuli ʼae ʼe maʼu ai lolotoga ʼaho ʼe ono, pea neʼe kamata malolo ʼi te fitu ʼaho.+ Ko te tupuʼaga la ʼaia ʼo te tapuakiʼi e Sehova te ʼaho ʼo te Sapato pea neʼe ina fakaliliu ko he ʼaho taputapu.

12 “Fakaʼapaʼapa ki tau tamai pea mo tau faʼe,+ ke ke maʼuli fualoa ai ʼi te fenua ʼae ʼe foaki atu e Sehova tou ʼAtua.+

13 “ ʼE mole tonu ke ke faifakapo.+

14 “ ʼE mole tonu ke ke tono.+

15 “ ʼE mole tonu ke ke kaihaʼa.+

16 “ ʼE mole tonu ke ke fai he fakamoʼoni loi ʼo ʼuhiga mo tou tatau.+

17 “ ʼE mole tonu ke ke holi ki te ʼapi ʼo tou tatau. ʼE mole tonu ke ke holi ki te ʼohoana ʼo tou tatau,+ peʼe ko tana tagata kaugana, peʼe ko tana fafine kaugana, peʼe ko tana vitulo, peʼe ko tana asino, peʼe ko he meʼa pe ʼe maʼu e tou tatau.”+

18 Pea neʼe logo ia te hahaʼi fuli ki te ʼuʼulu ʼo te mana pea mo te pupuhi ʼo te fakatagi pupuhi, mo natou sisio ki te hila pea mo te kohu ʼo te moʼuga. ʼI tanatou sisio pea mo logo ki te ʼu meʼa ʼaia, neʼe natou tekelili ai ʼi tonatou matataku pea neʼe natou tutuʼu mai mamaʼo.+ 19 Koia, neʼe natou ui ai kia Moisese: “Palalau mai koe kia matou, pea ʼe matou fakalogo atu anai, kae ʼaua naʼa palalau mai te ʼAtua, naʼa matou mamate.”+ 20 Pea neʼe ui e Moisese ki te hahaʼi: “ ʼAua naʼa kotou matataku, koteʼuhi kua haʼu te ʼAtua moʼoni ʼo ʼahiʼahiʼi koutou,+ ke kotou manavasiʼi tuʼumaʼu ai kia te ia pea ke ʼaua naʼa kotou agahala.”+ 21 Koia, neʼe tutuʼu pe te hahaʼi mai mamaʼo kae neʼe fakaovi ia Moisese ki te ʼao fakapoʼuli, ʼae neʼe nofo ai te ʼAtua moʼoni.+

22 Neʼe ui leva e Sehova kia Moisese: “Koʼeni te meʼa ʼae ʼe ke ui anai ki te kau Iselaele: ‘Neʼe kotou sisio mata ki taku palalau atu ʼae kia koutou mai te lagi.+ 23 ʼE mole tonu ke kotou faʼu he ʼu ʼatua siliva peʼe aulo, koteʼuhi ʼe mole tonu ke ʼi ai hokotou tahi age ʼu ʼatua, gata pe kia te au.+ 24 ʼE ke fai anai maʼaku he ʼaletale kele, pea ʼe ke sakilifisioʼi ai anai ʼau holokoseta, mo ʼau sakilifisio ʼo te tokalelei,* mo ʼau ovi pea mo ʼau pipi. Ko te koga meʼa pe ʼae ka au filifili ke fakamanatuʼi ai toku huafa,+ ʼe au alu atu anai kia koe pea ʼe au tapuakiʼi anai ia koe. 25 Kapau ʼe ke fai maʼaku he ʼaletale maka, ʼe mole tonu anai ke ke fakaʼaogaʼi he ʼu maka neʼe taʼataʼaga.+ Koteʼuhi kapau ʼe ke fakaʼaogaʼi he meʼa gaue, ʼe mole au leleiʼia anai te ʼaletale. 26 Pea ʼe mole tonu ke ke hake ki toku ʼaletale ʼi ni mata tuʼuga, ke ʼaua naʼa ha ai ʼou koga tapu.’*

21 “Koʼeni te ʼu lao ʼae ka ke fakaha anai kia natou:+

2 “Kapau ʼe ke totogi he tagata kaugana Hepeleo,+ ʼe kaugana anai kia koe lolotoga taʼu ʼe ono, kae ʼi te fitu taʼu, ʼe fakaʼateainaʼi anai kae ʼe mole ina totogi anai he meʼa.+ 3 Kapau neʼe haʼu tokotahi, ʼe mavae tokotahi anai. Kapau neʼe haʼu mo hona ʼohoana, ʼe tonu anai ke mavae mo tona ʼohoana. 4 Kapau ʼe foaki age e tona pule hona ʼohoana ʼo ina maʼu ai ʼona foha peʼe ko ʼona ʼofafine, ʼe maʼu anai e te pule ia te fafine mo ʼana fanau, kae ʼe mavae tokotahi pe anai te tagata kaugana ʼaia.+ 5 Kae kapau ʼe ina ui: ‘ ʼE au ʼofa ki toku pule, mo toku ʼohoana pea mo ʼoku foha, pea ʼe mole au loto ke fakaʼateainaʼi au,’+ 6 ʼe tonu ke ʼave ia ia e tona pule kia muʼa ʼo te ʼAtua moʼoni. Pea ʼe toe ʼave leva ia ia e tona pule ki te muʼa matapa peʼe ko te kaumatapa, pea ʼe ina pūhi anai tona taliga ʼaki he hui. Pea ʼe liliu ai anai ko hana tagata kaugana ʼi tona maʼuli katoa.

7 “Kapau ʼe fakatau e he tagata tona ʼofafine ke liliu ko he kaugana, ʼe mole hage anai tona fakaʼateainaʼi ko te fakaʼateainaʼi ʼo he tagata kaugana. 8 Kapau ʼe mole leleiʼia e tona pule ia ia ʼo mole liliu ai ko hana fafine, kae ʼe kumi e te pule he tahi ke ina totogi ia ia, ʼe mole fakagafua anai ke ina fakatau ia ia ki he kau matapule, he neʼe ina kakaʼi ia ia. 9 Kapau ʼe ina filifili ia ia ke ʼohoana mo tona foha, ʼe ina gaohi pe anai ohage ko hona ʼofafine. 10 Kapau ʼe ina* toʼo he tahi age taʼahine ke ʼohoana mo ia, ʼe mole ina fakasiʼisiʼi anai te meʼa kai, mo te meʼa laofi ʼo tona ʼuluaki ʼohoana, pea ʼe ina fai pe anai tona maʼua*+ ki tona ʼuluaki ʼohoana. 11 Kapau ʼe mole ina fai te ʼu faʼahi ʼaia ʼe tolu, ʼe fakaʼateainaʼi anai ia te fafine kae ʼe mole ina totogi anai he meʼa.

12 “Ko he tahi ʼe ina taʼi he tagata ʼo mate, ʼe tonu ke matehi.+ 13 Kae kapau neʼe mole ina fakatuʼutuʼu ke ina fai te faʼahi ʼaia pea neʼe tuku e te ʼAtua moʼoni ke hoko, ʼe feala anai ke hola ki he koga meʼa ʼe hoki au fakaha atu.+ 14 Kapau ʼe kovi ʼosi te ita ʼa he tagata ki he tahi tagata ʼo ina haga ai ʼo matehi,+ ʼe tonu anai ke matehi te tagata ʼaia tatau aipe pe neʼe alu ki toku ʼaletale ke puipui ai ia ia.+ 15 Ko ia ʼae ʼe ina taʼi tana tamai peʼe ko tana faʼe, ʼe tonu ke matehi.+

16 “Kapau ʼe ʼave fakamalohi e he tahi he tagata+ ʼo fakatau, peʼe maʼu atu ʼe kei nofo pe mo te tagata ʼae neʼe ina ʼave fakamalohi,+ ʼe tonu anai ke matehi.+

17 “Ko he tahi pe ʼe ina lotokoviʼi tana tamai peʼe ko tana faʼe, ʼe tonu ke matehi.+

18 “Koʼeni te meʼa ʼae ʼe tonu ke hoko mo kapau ʼe fekēʼaki he ʼu tagata pea ʼe taʼi e he tagata te tahi tagata ʼaki he foʼi maka peʼe ina hokaʼi,* ʼo mole mate kae ʼe tonu ke takoto: 19 Kapau ʼe feala hana tuʼu ake ʼo alu ʼo haʼele ʼi tuʼa mo hona toko, ʼe mole tonu anai ke fakatuʼā ia ia ʼae neʼe ina taʼi. ʼE ina foaki pe anai he falā ʼo mulimuli ki te temi ʼae ʼe mole gaue ai te tagata ʼae ʼe lavea ʼo kaku ki tona kua lelei.

20 “Kapau ʼe taʼi e he pule tana tagata peʼe fafine kaugana ʼaki he koga ʼakau ʼo mate ʼi tona ta ʼaia,* ʼe tonu anai ke fakatuʼā te pule.+ 21 Kae kapau ʼe maʼuli ʼi he ʼaho katoa peʼe ko ʼaho ʼe lua, ʼe mole tonu anai ke fakatuʼā te pule, koteʼuhi neʼe ina totogi ia ia ʼaki tana falā.

22 “Kapau ʼe fuhu he ʼu tagata ʼo lavea ai he fafine faitama pea fanau kae heʼeki hoko tona temi fanau,*+ pea ʼe mole mate* ai te fafine mo tana kiʼi toe, ʼe tonu anai ke foaki e ia ʼae neʼe hala te falā ʼae ʼe fakamaʼua age e te ʼohoana ʼo te fafine. ʼE ina foaki anai te falā ʼae neʼe fakatuʼutuʼu ki ai te kau tuʼi fakamau.+ 23 Kae kapau ʼe mate he tahi ia naua, ʼe tonu leva ke ke fetogi he maʼuli ʼaki he maʼuli,*+ 24 he mata ʼaki he mata, he nifo ʼaki he nifo, he nima ʼaki he nima, he vaʼe ʼaki he vaʼe,+ 25 he vela ʼaki he vela, he lavea ʼaki he lavea, he ta ʼaki he ta.

26 “Kapau ʼe taʼi e he tagata te foʼi mata ʼo tana tagata peʼe fafine kaugana ʼo kivi ai, ʼe ina fakaʼateainaʼi anai ia ia moʼo fetogi ʼaki tona foʼi mata.+ 27 Kapau ʼe ina taʼi tana tagata peʼe fafine kaugana ʼo to ai hona foʼi nifo, ʼe ina fakaʼateainaʼi anai ia ia moʼo fetogi ʼaki tona foʼi nifo.

28 “Kapau ʼe ʼohofi e he vitulo he tagata peʼe ko he fafine ʼo mate ai, ʼe tonu ke tuki makaʼi te vitulo ke mate+ pea ʼe mole kai anai te manu ʼaia. ʼE mole fakatuʼā anai te tagata ʼae ʼaʼana te vitulo. 29 Kae kapau neʼe mahani te vitulo ʼaia ʼi te ʼohofi ʼo te hahaʼi, pea neʼe fakatokaga age kia ia ʼae ʼaʼana te vitulo kae neʼe mole ina leʼoleʼo, ʼo mate ai he tagata peʼe ko he fafine, ʼe tuki makaʼi anai te vitulo pea ʼe toe matehi foki mo ia ʼae ʼaʼana te vitulo. 30 Kapau ʼe fakamaʼua kia ia he totogi,* ʼe ina foaki anai te falā ʼae ʼe fakamaʼua age kia ia moʼo totogi ʼaki tona maʼuli.* 31 Kae kapau neʼe ʼohofi e he vitulo ia he tamasiʼi tagata peʼe fafine, ʼe fakatuʼā anai ia ia ʼae ʼaʼana te vitulo ʼo mulimuli ki te lao ʼaia. 32 Kapau neʼe ʼohofi e te vitulo he tagata peʼe ko he fafine kaugana, ʼe foaki anai e ia ʼae ʼaʼana te vitulo he ʼu sikele* ʼe 30 ki te pule ʼo te tagata peʼe ko te fafine kaugana, pea ʼe tuki makaʼi anai te vitulo ke mate.

33 “Kapau ʼe mole pupunu e he tagata he luo peʼe ina keli he luo kae mole ina pupunu, pea to ki ai he vitulo peʼe ko he asino, 34 ʼe foaki anai e ia ʼae ʼaʼana te luo he falā moʼo fetogi ʼaki te manu.+ ʼE ina totogi anai kia ia ʼae ʼaʼana te manu, kae ʼe ina maʼu anai te manu ʼae kua mate. 35 Kapau ʼe lavea te vitulo ʼa he tagata ʼo mate ʼuhi ko te vitulo ʼa he tahi age tagata, ʼe nā fakatau anai te vitulo ʼae ʼe kei maʼuli pea ʼe nā vaevae tona totogi. ʼE nā toe vaevae foki mo te manu ʼae kua mate. 36 Peʼe kapau kua iloʼi neʼe mahani te vitulo ʼaia ʼi te ʼohofi ʼo te tahi ʼu manu, kae neʼe mole leʼoleʼo e ia ʼae ʼaʼana te vitulo, ʼe tonu anai ke ina fetogi he vitulo ʼaki he tahi vitulo, pea ʼe ina maʼu anai te manu ʼae kua mate.

22 “Kapau ʼe kaihaʼa e he tagata he vitulo peʼe ko he ovi ʼo ina matehi peʼe ina fakatau, ʼe tonu anai ke ina foaki he ʼu vitulo ʼe nima moʼo fetogi ʼaki te vitulo pea mo ovi ʼe fa moʼo fetogi ʼaki te ovi.+

2 (“Kapau ʼe maʼutoka he tagata kaihaʼa+ ʼe ina ulufi he loto fale pea ʼe taʼi ia ia ʼo mate, ʼe mole lau anai ia ko he fakapo. 3 Kae kapau neʼe hoko te faʼahi ʼaia ʼi te ʼosi hopo ake ʼo te laʼa, ʼe lau anai ia ko he fakapo.)

“ ʼE tonu ke foaki e te tagata kaihaʼa he meʼa moʼo fetogi ʼaki te meʼa ʼae neʼe ina kaihaʼa. Kapau ʼe mole hana meʼa, ʼe tonu anai ke fakatau ia ia ke ina totogi ai te meʼa ʼae neʼe ina kaihaʼa. 4 Kapau ʼe maʼu atu ʼe kei maʼuli te manu ʼae neʼe ina kaihaʼa pea ʼe nofo mo ia, pe ʼe ko he vitulo peʼe ko he asino peʼe ko he ovi, ʼe ina liufaki anai te manu ʼaia mo he tahi age manu.

5 “Kapau ʼe taki e he tahi ʼana manu ke taka kai ʼi he gaueʼaga peʼe ko he gaueʼaga vite pea ʼe ina tuku ke olo ʼo taka kai ʼi he gaueʼaga ʼo he tahi kehe, ʼe tonu anai ke ina foaki te ʼu fua ʼae ʼe lelei ʼaupito ʼo tana gaueʼaga peʼe ko tana gaueʼaga vite moʼo fetogi ʼaki te maumau ʼae neʼe fai e ʼana manu.

6 “Kapau ʼe tutu he afi ʼo kaku te vela ki te ʼu ʼakau talatala pea ʼe vela ai te ʼu fuhiga fulumeto* peʼe ko te ʼu fulumeto ʼae neʼe heʼeki tuʼusi peʼe ko he gaueʼaga, ʼe tonu anai ke foaki e ia ʼae neʼe ina tutu te afi he meʼa moʼo fetogi ʼaki te ʼu meʼa ʼae neʼe vela.

7 “Kapau ʼe foaki e he tagata hana falā peʼe ko hana ʼu meʼa ki he tahi ke nofo mo ia, pea ʼe kaihaʼa te ʼu meʼa ʼaia ʼi tona ʼapi, pea kapau ʼe maʼu te tagata kaihaʼa, ʼe tonu anai ke ina liufaki te ʼu meʼa ʼaia ʼo liuga lua.+ 8 Kapau ʼe mole maʼu te tagata kaihaʼa, ʼe tonu anai ke ʼave ia ia ʼae ʼoʼona te ʼapi kia muʼa ʼo te ʼAtua moʼoni+ ke iloʼi ai pe neʼe mole ina toʼo maʼa ia te ʼu koloa ʼo te tagata. 9 Ka tukugakoviʼi e he tagata he tahi tagata ʼi tana taupau he meʼa ʼe mole ʼa ia, pe ʼe ko he vitulo, peʼe ko he asino, peʼe ko he ovi, peʼe ko he teu peʼe ko he meʼa pe neʼe puli, ʼe tonu anai ke nā olo kia muʼa ʼo te ʼAtua moʼoni+ ke iloʼi ai pe ʼe ʼa ai moʼoni te meʼa ʼaia. ʼE fakaha anai e te ʼAtua pe ko ai ia naua ʼaia ʼe hala, pea ʼe tonu anai kia ia ʼaia ke ina totogi te meʼa ʼaia ki te tahi tagata ʼo liuga lua.+

10 “Kapau ʼe foaki e he tagata he asino, peʼe ko he vitulo, peʼe ko he ovi peʼe ko he manu lalata ki he tahi ke nofo mo ia pea kapau ʼe mate te manu, peʼe lavea kovi peʼe ʼave kae neʼe mole sio he tahi ki ai, 11 ʼe tonu anai ki te tagata ʼae neʼe nofo mo te manu ke ina fakapapau ia muʼa ʼo Sehova neʼe mole ina toʼo maʼa ia. Pea ko ia ʼae ʼaʼana te manu ʼe ina tali anai te ʼu meʼa ʼae neʼe ui age e te tagata ʼaia. ʼE mole totogi anai e te tagata ʼaia he meʼa.+ 12 Kae kapau neʼe kaihaʼa te manu ʼae neʼe nofo mo ia, ʼe tonu anai ke ina totogi kia ia ʼae ʼaʼana te manu. 13 Kapau neʼe hae te manu ʼaia e he manu fekai, ʼe tonu anai ke ina ʼaumai te manu moʼo fakamoʼoni te faʼahi ʼaia. ʼE mole ina totogi anai he meʼa mo kapau neʼe hae te manu e he manu fekai.

14 “Kae kapau ʼe kole e he tahi he manu ʼa he tagata pea ʼe lavea kovi peʼe mate kae puli te tagata ʼae ʼaʼana te manu, ʼe tonu anai ki te tagata ʼae neʼe ina kole te manu ke ina totogi te manu ʼaia. 15 ʼE mole ina totogi anai he meʼa mo kapau ʼe nofo tonu ai te tagata ʼae ʼaʼana te manu. Kapau ʼe totogi e he tahi te manu ke nofo mo ia ʼi he kiʼi temi pe, ʼe mole ina toe totogi anai he tahi age meʼa.

16 “Kapau ʼe fakahalaʼi e he tagata ia he taʼahine ʼe heʼeki fakapapau ʼohoana mo he tahi tagata, pea kapau ʼe momoe mo ia, ʼe tonu anai ke ina foaki te totogi ʼae kua fakatuʼutuʼu ki ai, ke ʼohoana ai mo te taʼahine.+ 17 Kae kapau ʼe mole loto moʼoni e te tamai ke ina foaki tona ʼofafine ke ʼohoana mo te tagata, ʼe tonu pe anai ke foaki e te tagata ia te totogi ʼaia.

18 “ ʼE mole tonu ke ke tuku ke maʼuli he fafine faifakalauʼakau.+

19 “Ko he tahi pe ʼe momoe mo he manu ʼe tonu ke matehi.+

20 “Ko ia ʼae ʼe ina fai he ʼu sakilifisio ki ni ʼatua kehe kae mole kia Sehova tokotahi pe, ʼe tonu anai ke matehi.+

21 “ ʼE mole tonu ke ke gaohi koviʼi he matapule peʼe ke fakamamahiʼi ia ia,+ koteʼuhi neʼe kotou nonofo ohage ko ni matapule ʼi te fenua ʼo Esipito.+

22 “ ʼE mole tonu ke kotou gaohi koviʼi he fafine vitua peʼe ko he tamasiʼi ʼe hala mo tamai.+ 23 Kapau ʼe ke gaohi koviʼi ia naua, ʼo nā tagi mai ai kia te au, ʼe au logo moʼoni anai ki ʼanā tagi.+ 24 ʼE kovi anai toku ita, pea ʼe au matehi anai ia koutou ʼaki te heleta, ʼe liliu anai ʼokotou ʼohoana ko ni fafine vitua pea ʼe hala tamai anai ʼakotou fanau.

25 “Kapau ʼe ke foaki he falā ki he tahi ʼe masiva* ʼi taku hahaʼi, he tahi ʼe nofo ovi kio koe, ʼe mole tonu ke ke fai te faʼahi ʼaia ke ke maʼu ai hau falā, ʼo ke fakamaʼua age ke ina foaki atu te falā mo hona tupu.+

26 “Kapau ʼe ke toʼo te pulupulu ʼo he tagata ko he fakamoʼoni ʼe ina huʼi atu anai tona maʼua,+ ʼe tonu anai ke ke liufaki age ki ai tona pulupulu ʼi muʼa ʼo te to ʼo te laʼa. 27 Koteʼuhi ko tona meʼa kafu pe ʼaia ʼe tahi, ʼae ʼe ina ʼuʼufi ʼaki tona sino. Ka moe, kotea anai ka ina kafuʼi?+ Ka tagi mai kia te au, ʼe au logo moʼoni anai ki ai, koteʼuhi ʼe au lotomanavaʼofa.+

28 “ ʼE mole tonu ke ke laukovi ki te ʼAtua+ peʼe ki he pule ʼo tau hahaʼi.+

29 “ ʼE tonu anai ke ke foaki ʼaki tou loto katoa he vahe ʼo te ʼu fua ʼae ʼe lahi ʼaupito ʼo ʼau gaueʼaga pea mo he vahe ʼo tau vino mo tau lolo ʼae ʼe lahi ʼaupito.+ ʼE ke foaki mai anai kia te au tou ʼuluaki foha.+ 30 Koʼeni te meʼa ʼae ʼe tonu ke ke fai ʼaki te ʼu ʼuluaki ʼuhi ʼo ʼau vitulo mo ʼau ovi:+ ʼE nonofo anai mo ʼanatou faʼe lolotoga ʼaho ʼe fitu. ʼI te valu ʼaho, ʼe ke foaki mai anai kia te au.+

31 “ ʼE tonu anai ke kotou liliu ko haku hahaʼi maʼoniʼoni,+ pea ʼe mole tonu anai ke kotou kai te manu ʼae neʼe hae e he manu fekai ʼi te vao.+ ʼE kotou li anai ki te ʼu kuli.

23 “ ʼE mole tonu ke ke fakamafola he logo ʼe mole moʼoni.+ ʼAua naʼa ke lagolago kia ia ʼae ʼe agakovi ʼaki hau fai he fakamoʼoni loi.+ 2 ʼE mole tonu ke ke muliʼi te kaugamalie ʼo fai te meʼa ʼae ʼe kovi, pea ʼe mole tonu ke ke loi moka ke fai he fakamoʼoni ke leleiʼia koe e te kaugamalie, he ʼe kapau ʼe ke fai feia, ʼe mole fakahoko anai te faitotonu. 3 ʼE mole tonu ke ke fakapalatahi moka ke fakatokatoka he fihi ʼe kau ai he tahi ʼe masiva.+

4 “Kapau neʼe hehe te vitulo peʼe ko te asino ʼo tou fili pea neʼe ke maʼu, ʼe tonu ke ke ʼaumai kia ia.+ 5 Kapau ʼe ke sio ki te asino ʼa he tahi ʼe fehiʼa ia koe kua takoto ʼi te mamafa ʼo tana ʼamoga, ʼe mole tonu ke ke fakalaka ohage ʼe mole ke tokagaʼi. ʼE tonu ke ke tokoni kia ia ʼo toʼo kehe te ʼamoga ʼa te manu.+

6 “ ʼE tonu ke ke faitotonu moka ke fakamauʼi te aluʼaga ʼo he tahi ʼe masiva.+

7 “ ʼAua naʼa ke tali he ʼu tukugakovi loi ʼe fai ʼo ʼuhiga mo he tahi, pea ʼaua naʼa ke matehi he tahi neʼe mole ina fai he meʼa ʼe kovi peʼe ko he tahi ʼe faitotonu, koteʼuhi ʼe mole au tala anai ʼe faitotonu* ia ia ʼae ʼe agakovi.+

8 “ ʼE mole tonu ke ke tali he meʼa ʼofa neʼe foaki fakakaka atu, koteʼuhi ʼaki te meʼa ʼofa ʼaia, ʼe meʼa noaʼi anai e natou ʼae ʼe faifakamau ia te faitotonu, pea ʼe feala ai ke fetogi e natou ʼae ʼe faitotonu ʼanatou tonu.+

9 “ ʼE mole tonu ke ke fakamamahiʼi te matapule ʼae ʼe nofo ia koutou. ʼE kotou iloʼi te meʼa ʼae ʼe logoʼi e* he matapule, he neʼe kotou nonofo ohage ko ni matapule ʼi te fenua ʼo Esipito.+

10 “Lolotoga taʼu ʼe ono, ʼe ke nunusi anai te pulapula ʼi tou moʼi kele pea ʼe ke tanaki anai ʼona fua.+ 11 Kae ʼi te fitu taʼu, ʼe mole ke gaueʼi anai tou moʼi kele pea ʼe ke tuku anai ke malolo. ʼE kai anai e te kau masisiva ʼae ʼi te lotolotoiga ʼo tau hahaʼi te ʼu meʼa ʼae ʼe maʼu ai, pea ko te ʼu meʼa ʼae ka toe, ʼe kai anai e te ʼu manu ʼo te vao. Ko te meʼa ʼaia ʼe tonu ke ke fai ki tau gaueʼaga vite mo tau gaueʼaga oliveto.

12 “ ʼE ke fakahoko anai tau gaue lolotoga ʼaho ʼe ono, kae ʼi te fitu ʼaho, ʼe ke tuku anai tau gaue, ke feala ai he malolo ʼo tau vitulo mo tau asino pea ke toe maʼu e te tama ʼo tau fafine kaugana mo te matapule ʼae ʼe nofo ia koe honā malohi.+

13 “ ʼE tonu ke kotou tokakaga lelei ʼo fai te ʼu meʼa fuli ʼae neʼe au ui atu,+ pea ʼe mole tonu ke kotou fetapa ki he tahi age ʼu ʼatua. ʼE mole tonu ke haʼu mai tou gutu ʼonatou higoa.+

14 “ ʼE ke fai tuʼa tolu anai ʼi te taʼu he ʼaho lahi maʼaku.+ 15 ʼE ke fai anai te ʼAho Lahi ʼo Te ʼu Pane Hala Fakatupu.+ ʼE ke kai anai he ʼu pane hala fakatupu lolotoga ʼaho ʼe fitu, ohage pe ko taku fakatotonu atu, ʼi te temi ʼae kua ʼosi fakatuʼutuʼu ki ai, ʼi te mahina ʼo Apipi,*+ koteʼuhi neʼe ke mavae mai Esipito ʼi te temi ʼaia. ʼE mole tuʼu anai he tahi ʼi ʼoku muʼa mo ʼona nima ʼatea.+ 16 ʼE ke toe fai anai te ʼAho Lahi ʼo Te Taʼukai* ʼae ʼe ke tanaki ai te ʼu ʼuluaki fua ʼae kua matutuʼa ʼo tau gaueʼaga.+ Pea ʼe ke toe fai anai te ʼAho Lahi ʼo Te Tanaki,* ʼi te fakaʼosi taʼu moka ke tanaki anai te ʼu fua ʼo tau gaue mai tau gaueʼaga.+ 17 ʼE olo anai te ʼu tagata fuli kia muʼa ʼo Sehova, te ʼAliki moʼoni, tuʼa tolu ʼi te taʼu.+

18 “ ʼE mole tonu ke ke momoli fakatahi te toto ʼo taku sakilifisio mo he meʼa neʼe fai ʼaki te meʼa fakatupu. Pea ʼe mole tuku anai ke kaku ki apogipogi uhu te gako ʼo te ʼu sakilifisio ʼae ʼe momoli mai kia te au ʼi ʼoku ʼaho lalahi.

19 “ ʼE ke ʼaumai anai ki te fale ʼo Sehova tou ʼAtua te ʼu ʼuluaki fua ʼae ʼe lelei tukupau ʼo tou kele pea kua matutuʼa.+

“ ʼE mole tonu ke ke fakamoho te ʼuhiʼi tao ʼi te huʼa pipi ʼo tana faʼe.+

20 “ ʼE au fekauʼi he ʼaselo ke alu ʼi ʼou muʼa+ ke ina puipui ia koe ʼi te ala pea mo fakahu koe ki te koga meʼa ʼae kua au teuteuʼi.+ 21 Ke ke tokagaʼi ia ia pea mo fakalogo ki tona leʼo. ʼAua naʼa ke agatuʼu kia ia he ʼe mole ina fakamolemole anai ʼakotou agahala,+ koteʼuhi ʼe ina fua toku huafa. 22 Kae kapau ʼe ke fakalogo lelei ki tona leʼo pea mo fai te ʼu meʼa fuli ʼae ʼe au ui atu, ʼe au liliu anai ko he fili ʼo ʼou fili pea ʼe au fakafeagai anai kia natou ʼae ʼe fakafeagai kia koe. 23 Koteʼuhi ʼe alu anai taku ʼaselo ʼi ʼou muʼa pea ʼe ina taki anai ia koe ki te kau Amole, mo te kau Heti, mo te kau Pelesite, mo te kau Kanaane, mo te kau Hevi mo te kau Sepusi, pea ʼe au pulihi anai ia natou.+ 24 ʼE mole tonu anai ke ke tulolo ia muʼa ʼo ʼonatou ʼatua peʼe ke tauhi kia natou, pea ʼe mole tonu anai ke ke faʼifaʼitakiʼi ʼanatou aga.+ Kae ʼe tonu anai ke ke maumauʼi ʼonatou ʼatua pea mo laliki ʼonatou pou maka taputapu.+ 25 ʼE tonu anai ke kotou tauhi kia Sehova tokotou ʼAtua,+ pea ʼe ina tapuakiʼi anai tau pane mo tau vai.+ ʼE au pulihi anai mai ia koe te mahaki.+ 26 ʼE mole maʼu anai ʼi tou fenua he fafine ʼe fatuto peʼe paʼa.+ Pea ʼe au fakatologa anai tou maʼuli.

27 “ ʼE matataku anai te hahaʼi ia au, kae ʼe heʼeki ke tau atu ki ai.+ ʼE au fakatupu anai he maveuveu ia natou fuli ʼae ka felaveʼi mo koe, pea ʼe feholaki anai ʼou fili fuli ʼi ʼou muʼa ʼuhi pe ko au.*+ 28 ʼE natou lotovaivai* anai ʼuhi ko au, kae ʼe heʼeki ke tau atu ki ai,+ pea ʼe au kapu anai mai ʼou muʼa te kau Hevi, mo te kau Kanaane pea mo te kau Heti.+ 29 ʼE mole au kapu anai ia natou mai ʼou muʼa ʼi he taʼu pe ʼe tahi, naʼa lavaki te fenua pea ke mole tuputupu ai te ʼu manu fekai ʼo fakatupu tuʼutamaki kia koe.+ 30 ʼE au kapu mamalie anai natou mai ʼou muʼa, ʼo kaku ki tau liliu ʼo kaugamalie pea mo maʼu te fenua.+

31 “ ʼE au fakatuʼu anai ʼou tuʼakoi mai te Tai Kula ʼo kaku ki te tai ʼo te kau Filisitini pea mai te toafa ʼo kaku ki te Vai Tafe,*+ he ʼe au tuku anai ki ʼou nima te hahaʼi ʼo te fenua pea ʼe ke kapu anai ia natou ʼi ʼou muʼa.+ 32 ʼE mole tonu anai ke ke fai he fuakava mo natou peʼe ko ʼonatou ʼatua.+ 33 ʼE mole tonu anai ke natou nonofo ʼi tou fenua naʼa natou fakaneke ia koe ke ke agahala mai kia te au. Kapau ʼe ke tauhi ki ʼonatou ʼatua, pea ʼe liliu moʼoni anai te meʼa ʼaia ko he hele kia koe.”+

24 Neʼe ui leva e Sehova kia Moisese: “Hake ki te moʼuga, ia koe mo Alone, mo Natape mo Apiu,+ pea mo he kau tagata takitaki ʼe toko 70 ʼo Iselaele, ʼe kotou tulolo anai mai mamaʼo. 2 Ko koe tokotahi pe anai ʼae ʼe tonu ke ke fakaovi mai kia te au, ʼae ko Sehova. Kae ʼe mole fakaovi mai anai ia natou ʼae, pea ʼe mole hake anai te hahaʼi mo koe.”+

3 Neʼe haʼu leva ia Moisese ʼo fakaha ki te hahaʼi te ʼu folafola fuli ʼa Sehova mo ʼana lao fuli,+ pea neʼe tali fakatahi e te hahaʼi katoa: “Ko te ʼu folafola fuli ʼae neʼe fai e Sehova, ʼe matou lotolelei ke matou fai.”+ 4 Neʼe tohi fuli ai e Moisese te ʼu folafola ʼa Sehova.+ Pea neʼe ʼala uhuuhu ʼo fakatuʼu ʼi te vaʼe moʼuga he ʼaletale pea mo he ʼu pou maka ʼe 12 ʼo mulimuli pe ki te ʼu telepi ʼe 12 ʼo Iselaele. 5 Hili ʼaia, neʼe ina fekauʼi he ʼu tama Iselaele ke natou olo ʼo momoli he ʼu holokoseta kia Sehova pea mo sakilifisioʼi he ʼu vitulo ko he ʼu sakilifisio ʼo te tokalelei.+ 6 Neʼe toʼo leva e Moisese te vaelua ʼo te toto ʼo ʼai ki he ʼu pa loloto, pea neʼe ina afuhi te tahi vaelua ʼo te toto ki te ʼaletale. 7 Pea neʼe ina toʼo te tohi ʼo te fuakava ʼo lau leʼo lahi ia muʼa ʼo te hahaʼi.+ Pea neʼe natou ui: “Ko te ʼu meʼa fuli ʼae neʼe ui e Sehova, ʼe matou lotolelei ke matou fai, pea ʼe matou fakalogo anai.”+ 8 Neʼe toʼo ai leva e Moisese te toto ʼo afuhi ki te hahaʼi+ pea neʼe ina ui: “ ʼE ko te toto ʼaeni ʼo te fuakava ʼae neʼe fai e Sehova mo koutou ʼo mulimuli pe ki te ʼu folafola fuli ʼaeni neʼe kotou logo ki ai.”+

9 Neʼe hake leva ia Moisese ki te moʼuga mo Alone, mo Natape mo Apiu, pea mo te kau tagata takitaki ʼe toko 70 ʼo Iselaele, 10 ʼo natou sisio ai ki te ʼAtua ʼo Iselaele.+ ʼI ʼona lalo vaʼe, neʼe ʼi ai he meʼa neʼe hage ko he tale neʼe fola ʼaki te maka ʼae ko te safile pea neʼe maʼa ohage ko te lagi.+ 11 Neʼe mole ina fai he meʼa ʼe kovi ki te ʼu tagata maʼuhiga ʼaia ʼo Iselaele.+ Neʼe natou sisio ki te ʼAtua moʼoni ʼi te meʼa ʼaia neʼe ha, pea neʼe natou kakai mo iinu.

12 Pea neʼe ui e Sehova kia Moisese: “Hake mai kia te au ʼi te moʼuga pea ke nofo ai. ʼE au foaki atu anai he ʼu lauʼi maka pea ʼe au tohi anai ʼi ai te ʼu lao mo te ʼu fakatotonu ke akoʼi ai te hahaʼi.”+ 13 Neʼe alu ai ia Moisese mo tana tagata tokoni gaue ko Sosue,+ pea neʼe hake ia Moisese ki te moʼuga ʼo te ʼAtua moʼoni.+ 14 Kae neʼe ina ui ki te kau tagata takitaki: “Kotou talitali age ʼi heni ʼo kaku ki tamā toe liliu mai.+ ʼE nofo ia Alone pea mo Ulu+ mo koutou. Kapau ʼe tonu ke fakamauʼi he fihifihia ʼo he tahi, ʼe feala hana alu kia naua.”+ 15 Neʼe hake ai ia Moisese ki te moʼuga ʼae neʼe kua ʼaofi e te ʼao.+

16 Neʼe nofo ia te kololia ʼo Sehova+ ʼi te Moʼuga ʼo Sinai,+ pea neʼe ʼaofi e te ʼao ia te moʼuga lolotoga ʼaho ʼe ono. ʼI te fitu ʼaho, neʼe ina pauʼi ia Moisese mai te ʼao. 17 ʼI te mamata ʼa te kau Iselaele ki ai, neʼe hage te ha ʼo te kololia ʼo Sehova ko he afi kakaha ʼi te tumutumu ʼo te moʼuga. 18 Neʼe ulu leva ia Moisese ki te ʼao pea neʼe hake ki te moʼuga.+ Pea neʼe nofo ia Moisese ʼi te moʼuga lolotoga ʼaho ʼe 40 mo po ʼe 40.+

25 Neʼe ui leva e Sehova kia Moisese: 2 “Fakaha ki te kau Iselaele ke natou ʼaumai kia te au he meʼa ʼofa. ʼE kotou tali anai te meʼa ʼofa ʼaia mai ia natou fuli ʼae ʼe lotolelei ke natou foaki.+ 3 Koʼeni te meʼa ʼofa ʼae ʼe kotou tali anai: ko te aulo,+ mo te siliva,+ mo te kapa,+ 4 mo te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula, mo te lino* lelei, mo te fuluʼi tao, 5 mo te kiliʼi ovi* ʼe lanu kula, mo te kiliʼi foke,* mo te ʼakau ʼae ko te akasia,+ 6 mo te lolo ki te ʼu malama,+ mo te lolo magoni ʼae moʼo fai ʼaki te lolo taputapu+ mo te iseso magoni,+ 7 pea mo te ʼu maka ʼae ko te onise mo te tahi ʼu maka ke fakapipiki ki te efote*+ mo te peketolale.*+ 8 ʼE natou faʼu anai maʼaku he sagatualio, pea ʼe au nofo anai* ʼi te lotolotoiga ʼo natou.+ 9 ʼE kotou fai anai te tapenakulo mo ʼana meʼa kehekehe fuli ʼo kotou mulimuli lelei pe ki te pāki ʼae ʼe au fakaha atu anai.+

10 “ ʼE natou faʼu anai he aleka* ʼaki te ʼakau ʼae ko te akasia: ʼe fasiga nima* lua vaelua tona loa, mo fasiga nima tahi vaelua tona laulahi pea mo fasiga nima tahi vaelua tona maʼoluga.+ 11 Pea ʼe ke ʼaofi anai te aleka ʼaki te aulo maʼa,+ ʼi tuʼa mo loto, pea ʼe ke fai anai he tapatapa aulo ʼi te takafoli.+ 12 ʼE ke haka anai te aulo moʼo fai ʼaki he ʼu mama ʼe fa pea ʼe ke fakapipiki anai ʼi ʼoluga ʼo te ʼu foʼi vaʼe ʼe fa ʼo te aleka: ko mama ʼe lua ʼi te tahi faʼahi pea mo mama ʼe lua ʼi te tahi faʼahi. 13 ʼE ke fai anai te ʼu ʼakau ʼamo ʼaki te ʼakau ʼae ko te akasia pea ʼe ke ʼaofi anai ʼaki te aulo.+ 14 ʼE ke fakaulu anai te ʼu ʼakau ʼamo ʼi te ʼu mama ʼae ʼi te ʼu tafaʼaki ʼo te Aleka ke fata ʼaki te Aleka. 15 ʼE tuku maʼu pe anai te ʼu ʼakau ʼamo ʼi te ʼu mama ʼo te Aleka. ʼE mole tonu anai ke toʼo kehe mai ai.+ 16 ʼE ke tuku anai ki te loto Aleka ia te Fakamoʼoni* ʼae ka au foaki atu.+

17 “ ʼE ke fai anai he tapunu ʼo te aleka ʼaki te aulo maʼa: ʼe fasiga nima lua vaelua tona loa pea mo fasiga nima tahi vaelua tona laulahi.+ 18 ʼE ke fai anai he ʼu kelupimi aulo ʼe lua. ʼE ke tuki anai te aulo moʼo fai ʼaki te ʼu kelupimi ʼaia ʼi te ʼu muliʼi meʼa ʼo te tapunu.+ 19 ʼE ke fai anai te ʼu kelupimi ʼi te ʼu muliʼi meʼa ʼe lua, ke takitahi te kelupimi ʼi te ʼu muliʼi meʼa ʼo te tapunu. 20 ʼE folahi anai e te ʼu kelupimi ʼonā pakakau ki ʼoluga, ʼo malumalu ai te tapunu,+ pea ʼe nā fehagaʼaki anai. ʼE haga anai ʼonā fofoga ki te tapunu. 21 ʼE ke hili anai te tapunu+ ki te Aleka, pea ʼe ke tuku anai ki te loto Aleka te Fakamoʼoni ʼae ka au foaki atu. 22 ʼE au ha anai kia koe ʼi ai pea mo palalau atu mai te fuga tapunu.+ ʼI te vaha ʼo te ʼu kelupimi ʼe lua ʼae ʼi te fuga aleka ʼo te Fakamoʼoni,* ʼe au tala atu anai te ʼu fakatotonu fuli ʼae ʼe tonu ke ke fakaha ki te kau Iselaele.

23 “ ʼE ke toe fai foki anai he laupapa+ ʼaki te ʼakau ʼae ko te akasia: ʼe fasiga nima lua tona loa, mo fasiga nima tahi tona laulahi pea mo fasiga nima tahi vaelua tona maʼoluga.+ 24 ʼE ke ʼaofi anai te laupapa ʼaki te aulo maʼa pea ʼe ke teuteuʼi anai te takafoli ʼaki te aulo. 25 ʼE ke fai anai he tapatapa ʼi te takafoli ʼo te laupapa ʼe ʼalofi nima tahi* tona laulahi pea ʼe ke toe teuteuʼi anai te lalo tapatapa ʼaia ʼaki te aulo. 26 ʼE ke fai anai he ʼu mama aulo ʼe fa pea ʼe ke fakapipiki anai ki te ʼu tuliki ʼe fa ʼo te laupapa, ʼae ʼe tuʼu ai te ʼu foʼi vaʼe ʼe fa. 27 ʼE ovi anai te ʼu mama ki te tapatapa ke fakaulu ai te ʼu ʼakau ʼamo ke fata ʼaki te laupapa. 28 ʼE ke fai anai te ʼu ʼakau ʼamo ʼaki te ʼakau ʼae ko te akasia pea ʼe ke ʼaofi anai ʼaki te aulo, pea ʼe fata ʼaki anai ia te laupapa.

29 “ ʼE ke toe fai foki anai mo he ʼu pa ʼo te laupapa, mo ʼona ipu, mo ʼona ʼaiʼaga vai pea mo ʼona pa loloto ʼae ʼe liligi ʼaki anai te ʼu molaga vino. ʼE ke fai anai te ʼu meʼa ʼaia ʼaki te aulo maʼa.+ 30 Pea ʼe ke hili tuʼumaʼu pe anai te ʼu pane ʼae ʼe molagaʼi ki te laupapa, ʼi ʼoku muʼa.+

31 “ ʼE ke fai anai he tuʼulaga malama+ ʼaki te aulo maʼa. ʼE ke tuki anai te aulo moʼo fai ʼaki te tuʼulaga malama. ʼE ke faʼu anai ʼaki he potu aulo ʼe tahi te tafito, mo te sinoʼi malama, mo te ʼu maga, mo te ʼu matalaʼi ʼakau, mo te ʼu moto pea mo te ʼu fisiʼi teu.+ 32 ʼE haʼu anai mai te sinoʼi malama te ʼu maga ʼe ono, ʼe ko maga ʼe tolu ʼi te tahi faʼahi pea mo maga ʼe tolu ʼi te tahi age faʼahi. 33 ʼI te ʼu maga takitahi ʼo te tahi faʼahi ʼe ʼi ai anai he ʼu matalaʼi ʼakau ʼe tolu ʼe hage tonatou agaaga ko te ʼu fisiʼi teu amatie, pea ʼe fakavaha ʼaki te ʼu moto mo te ʼu fisiʼi teu. ʼE toe feia pe anai ki te ʼu maga ʼo te tahi age faʼahi. ʼE feia anai te agaaga ʼo te ʼu maga ʼae ʼe ono ʼe haʼu mai te sinoʼi malama. 34 ʼI te sinoʼi malama, ʼe ʼi ai anai te ʼu matalaʼi ʼakau ʼe fa ʼe hage tonatou agaaga ko te ʼu fisiʼi teu amatie, pea ʼe fakavaha ʼaki te ʼu moto mo te ʼu fisiʼi teu. 35 ʼE ʼi ai anai he moto ʼe tahi ʼi lalo ʼo te ʼu ʼuluaki maga ʼe lua ʼae ʼe haʼu mai te sinoʼi malama, pea mo he moto ʼe tahi ʼi lalo ʼo te ʼu maga ʼe lua ʼae ʼe hoa mai ki ai, pea mo he moto ʼe tahi ʼi lalo ʼo te ʼu maga fakaʼosi ʼe lua. ʼE fai feia anai ki te ʼu maga ʼae ʼe ono ʼe haʼu mai te sinoʼi malama. 36 ʼE fai anai ia te ʼu moto, mo te ʼu maga pea mo te tuʼulaga malama katoa ʼaki he potu aulo maʼa ʼe tahi kua tuki.+ 37 ʼE ke fai anai he ʼu malama ʼe fitu ʼo te tuʼulaga malama, pea ka tutu te ʼu malama ʼaia, ʼe malamagia pe anai ia muʼa.+ 38 ʼE fai anai te ʼu pipi* pea mo te ʼu ʼaiʼaga afi ʼaki te aulo maʼa.+ 39 ʼE fai anai te tuʼulaga malama ʼaia ʼo feia mo ʼana meʼa kehekehe ʼaki he taleta* aulo maʼa ʼe tahi. 40 Tokaga ʼo fai te ʼu meʼa fuli ʼaia ʼo mulimuli ki te pāki ʼae neʼe fakaha atu ʼi te moʼuga.+

26 “ ʼE ke fai anai te tapenakulo+ ʼaki he ʼu kie ʼe hogofulu neʼe fai ʼaki te filo lino lelei, mo te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno pea mo te filo kula. ʼE ke tui fakailoga anai ki ai he ʼu kelupimi.+ 2 ʼE fasiga nima* 28 anai te loa ʼo he kie ʼe tahi pea mo fasiga nima 4 tona laulahi. ʼE tatau anai te ʼu fuafua ʼo te ʼu kie fuli.+ 3 ʼE fakapipiki fakatahi anai te ʼu kie ʼe nima ke liliu ai ko he foʼi kie lahi, pea ʼe toe fai feia anai mo te tahi ʼu kie ʼe nima. ʼE maʼu ai anai he ʼu foʼi kie lalahi ʼe lua. 4 ʼE ke fai anai ʼi te tapa ʼo te ʼu foʼi kie lalahi ʼaia ʼe lua he ʼu mama filo ʼuʼui, ʼi te faʼahi ʼae ka fakapipiki ai te ʼu foʼi kie ʼaia ʼe lua. 5 ʼE ke tui anai te ʼu mama ʼe 50 ʼi te tahi foʼi kie pea mo te ʼu mama ʼe 50 ʼi te tapa ʼo te tahi age foʼi kie, ke fehagaʼaki ai te ʼu mama ʼaia ʼi te faʼahi ʼae ʼe fakapipiki ai anai te ʼu foʼi kie lalahi. 6 ʼE ke fai anai he ʼu fakamaʼu aulo ʼe 50 pea ʼe ke fakapipiki fakatahi anai te ʼu foʼi kie lalahi ʼaia ʼe lua ʼaki te ʼu fakamaʼu ʼaia. Pea ʼe liliu anai te tapenakulo ko he meʼa ʼe tahi.+

7 “ ʼE ke toe fai foki he ʼu kie ʼaki te fuluʼi tao+ moʼo ʼuʼufi ʼaki te tapenakulo. ʼE ke fai anai he ʼu kie ʼe 11.+ 8 ʼE fasiga nima 30 anai te loa ʼo he kie ʼe tahi pea mo fasiga nima 4 tona laulahi. ʼE tatau anai te ʼu fuafua ʼo te ʼu kie fuli ʼaia ʼe 11. 9 ʼE ke fakapipiki fakatahi anai he ʼu kie ʼe nima ke liliu ko he foʼi kie lahi ʼe tahi pea ʼe ke toe fakapipiki fakatahi anai te tahi ʼu kie ʼe ono ke liliu ko he foʼi kie lahi ʼe tahi, pea ʼe ke peluki anai te ono kie ʼi te muʼa tapenakulo. 10 ʼE ke fai anai te ʼu mama ʼe 50 ʼi te tapa ʼo te ʼu foʼi kie lalahi ʼaia ʼe lua, ʼi te faʼahi ʼae ka fakapipiki fakatahi ai te ʼu foʼi kie ʼaia ʼe lua. 11 ʼE ke fai anai te ʼu fakamaʼu kapa ʼe 50, pea ʼe ke fakaulu anai te ʼu fakamaʼu ki te ʼu mama, pea ʼe ke fakapipiki fakatahi anai te ʼu foʼi kie lalahi, pea ʼe liliu anai ko he meʼa ʼe tahi. 12 ʼE ʼi ai anai he koga ʼo te ʼu foʼi kie lalahi ʼaia ʼe fakalaka. ʼE fakalaka anai te koga ʼo te foʼi kie lahi ʼae ʼi muli ʼo te tapenakulo ia fasiga nima ʼe lua. 13 Pea ko te koga ʼo te ʼu foʼi kie lalahi ʼae ʼe fakalaka ʼi te ʼu tafaʼaki ʼo te tapenakulo ʼe fasiga nima tahi anai, pea ʼe ʼuʼufi ai te tapenakulo.

14 “ ʼE ke toe fai foki he foʼi kie lahi ʼaki te kiliʼi ovi* ʼe lanu kula moʼo ʼuʼufi ʼaki te fale la, pea ʼe ke hili anai ki ai he tahi age foʼi kie lahi neʼe fai ʼaki te kiliʼi foke.*+

15 “ ʼE ke fai anai he ʼu kaumatapa ʼe tapa fa+ ʼo te tapenakulo ʼaki te ʼakau ʼae ko te akasia, pea ʼe fakatuʼu tonu anai.+ 16 ʼE fasiga nima hogofulu anai te maʼoluga ʼo he kaumatapa pea mo fasiga nima tahi vaelua tona laulahi. 17 ʼE ʼi ai anai he ʼu fakanifo* ʼe lua ʼe vaha tatau ʼi te ʼu kaumatapa takitahi. ʼE ke fai feia anai ki te ʼu kaumatapa fuli ʼo te tapenakulo. 18 ʼE ke fai anai he ʼu kaumatapa ʼe 20 ki te faʼahi ʼo te tapenakulo, ʼae ʼe haga ki te potu saute.

19 “ ʼE ke fai anai he ʼu tuʼuʼaga siliva+ ʼe 40 ʼo te ʼu kaumatapa ʼae ʼe 20. ʼE ʼi ai anai he ʼu fakanifo ʼe lua ʼi he kaumatapa ʼe tahi pea ʼe fakaulu anai ke to tonu mo te ʼu tuʼuʼaga siliva ʼe lua. ʼE ke fai feia anai ki te ʼu kaumatapa fuli.+ 20 ʼE ke fai anai he ʼu kaumatapa ʼe 20 ki te faʼahi ʼo te tapenakulo, ʼae ʼe haga ki te potu noleto 21 pea mo ʼonatou tuʼuʼaga siliva ʼe 40: ʼe ko tuʼuʼaga ʼe lua ʼo te ʼuluaki kaumatapa pea ʼe toe tuʼuʼaga lua mo te ʼu kaumatapa fuli ʼae ʼe hoa mai. 22 ʼE ke fai anai he ʼu kaumatapa ʼe ono ki te faʼahi ʼae ʼi muli ʼo te tapenakulo, ʼi te potu uesite.+ 23 ʼE ke fai anai he ʼu kaumatapa ʼe lua ke liliu ko he ʼu pou tuliki ʼe lua ʼo te tapenakulo, ʼi muli. 24 ʼE fakapipiki taki lua anai mai lalo ki ʼoluga, ʼo kaku ki te ʼuluaki mama. ʼE tonu anai ke fai tatau ki te ʼu kaumatapa ʼo te ʼu tuliki ʼae ʼe lua. ʼE liliu anai ko te ʼu pou tuliki ʼe lua. 25 Pea ʼe ʼi ai anai te ʼu kaumatapa ʼe valu pea mo ʼonatou tuʼuʼaga siliva ʼe 16: ʼe ko tuʼuʼaga ʼe lua ʼo te ʼuluaki kaumatapa pea ʼe toe tuʼuʼaga lua mo te ʼu kaumatapa fuli ʼae ʼe hoa mai.

26 “ ʼE ke fai anai he ʼu ʼakau fakalavalava ʼaki te ʼakau ʼae ko te akasia, ko ʼakau fakalavalava ʼe nima ki te ʼu kaumatapa ʼo te tahi faʼahi ʼo te tapenakulo,+ 27 mo ʼakau fakalavalava ʼe nima ki te ʼu kaumatapa ʼo te tahi age faʼahi ʼo te tapenakulo, pea mo ʼakau fakalavalava ʼe nima ki te ʼu kaumatapa ʼae ʼi muli, ʼi te faʼahi uesite ʼo te tapenakulo. 28 ʼE fakaulu anai te ʼakau fakalava ʼae ʼi lotomalie ki te ʼu mama mai te tahi muliʼi meʼa ki te tahi age muliʼi meʼa.

29 “ ʼE ke ʼaofi anai te ʼu kaumatapa ʼaki te aulo,+ pea ʼe ke fai anai te ʼu mama aulo ʼae ʼe fakaulu anai ki ai te ʼu ʼakau fakalavalava. Pea ʼe ke ʼaofi anai te ʼu ʼakau fakalavalava ʼaki te aulo. 30 ʼE ke fakatuʼu anai te tapenakulo ʼo mulimuli ki te pāki ʼae neʼe fakaha atu ʼi te moʼuga.+

31 “ ʼE ke fai anai he lito+ ʼaki te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula, pea mo te filo lino lelei. ʼE tui fakailoga anai ki ai he ʼu kelupimi. 32 Pea ʼe ke tau anai ki he ʼu pou ʼe fa neʼe fai ʼaki te ʼakau ʼae ko te akasia pea neʼe ʼaofi ʼaki te aulo. ʼE fai anai ʼaki te aulo te ʼu faʼo ʼo te ʼu foʼi pou ʼaia ke tau ki ai te lito. ʼE fakatuʼu anai te ʼu pou ʼaia ʼi he ʼu tuʼuʼaga siliva ʼe fa. 33 ʼE ke tau anai te lito ʼi lalo ifo pe ʼo te ʼu fakamaʼu pea ʼe ke ʼaumai anai te aleka ʼo te Fakamoʼoni+ ʼo fakatuʼu ʼi te tahi faʼahi ʼo te lito. ʼE vaheʼi anai e te lito te Potu Taputapu+ mo te Potu Taputapu ʼAupito.+ 34 ʼE ke hili anai te tapunu ki te aleka ʼo te Fakamoʼoni ʼi te Potu Taputapu ʼAupito.

35 “ ʼE ke fakatuʼu anai te laupapa ʼi te faʼahi ʼae ʼi te muʼa lito.* Pea ʼe ke fakatuʼu anai te tuʼulaga malama+ ke haga ki te laupapa, ʼi te faʼahi ʼo te tapenakulo ʼae ʼe haga ki te potu saute. ʼE ke fakatuʼu anai te laupapa ʼi te potu noleto. 36 ʼE ke lalaga fakatahi anai te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula, pea mo te filo lino lelei moʼo fai ʼaki te lito ki te huʼaga ʼo te fale la.+ 37 ʼE ke fai anai he ʼu pou ʼe nima ʼaki te ʼakau ʼae ko te akasia pea ʼe ke ʼaofi anai ʼaki te aulo pea ʼe ke tau anai ki ai te lito. ʼE ke fai anai ʼaki te aulo te ʼu faʼo ʼo te ʼu pou ʼaia, pea ʼe ke haka anai te kapa moʼo faʼu ʼaki ni tuʼuʼaga kapa ʼe nima ki te ʼu pou ʼaia.

27 “ ʼE ke fai anai te ʼaletale ʼaki te ʼakau ʼae ko te akasia:+ ʼe fasiga nima* nima anai tona loa pea mo fasiga nima nima tona laulahi. ʼE tapa fa tatau anai te ʼaletale pea mo fasiga nima tolu tona maʼoluga.+ 2 ʼE ke fai anai he tala+ ʼe tahi ʼi te ʼu muliʼi meʼa takitahi ʼae ʼe fa ʼo te ʼaletale. Ko te ʼu tala ʼaia ʼe ko he koga anai ʼo te ʼaletale, pea ʼe ke ʼaofi anai te ʼaletale ʼaki te kapa.+ 3 ʼE ke fai anai he ʼu topu ke tanaki ai te lefulefu* ʼo te ʼaletale, mo he ʼu huo takele, mo he ʼu ipu lalahi, mo he ʼu huki pea mo he ʼu ʼaiʼaga afi. Pea ʼe ke fai anai te ʼu meʼa kehekehe fuli ʼaia ʼaki te kapa.+ 4 ʼE ke fai anai he meʼa vagavaga ki te ʼaletale ʼaki te kapa, pea ʼe ke fai anai he ʼu mama kapa ʼe fa ʼo te meʼa vagavaga ʼaia ʼi ʼona muliʼi meʼa ʼae ʼe fa. 5 ʼE ke tuku anai te meʼa vagavaga ʼaia ʼi lalo ifo ʼo te tapatapa ʼo te ʼaletale, ʼi te lotomalie ʼo te ʼaletale. 6 ʼE ke fai anai he ʼu ʼakau ʼamo ʼo te ʼaletale ʼaki te ʼakau ʼae ko te akasia pea ʼe ke ʼaofi anai ʼaki te kapa. 7 ʼE fakaulu anai te ʼu ʼakau ʼamo ʼaia ki te ʼu mama ʼi te ʼu faʼahi lualua ʼo te ʼaletale moka fata anai.+ 8 ʼE ke fai anai te ʼaletale ohage ko he foʼi kesi ʼe fai ʼaki ni papa. ʼE fai anai te ʼaletale ʼo mulimuli pe ki te meʼa ʼae neʼe Au fakaha atu ʼi te moʼuga.+

9 “ ʼE ke fai anai te malaʼe+ ʼo te tapenakulo. ʼI te faʼahi saute ʼo te malaʼe, ʼae ʼe fasiga nima 100 tona loa, ʼe ke tau ai anai ni kie neʼe fai ʼaki te filo lino lelei.+ 10 ʼE ʼi ai anai mo he ʼu pou ʼe 20 pea mo he ʼu tuʼuʼaga kapa ʼe 20. Ko te ʼu faʼo ʼo te ʼu pou mo ʼanatou meʼa fakamaʼu* ʼe fai anai ʼaki te siliva. 11 ʼI te faʼahi noleto, ʼae ʼe fasiga nima 100 tona loa, ʼe ke tau ai anai ni kie, pea ʼe ʼi ai anai mo he ʼu pou ʼe 20 mo ʼonatou tuʼuʼaga kapa ʼe 20, mo he ʼu faʼo siliva pea mo he ʼu meʼa fakamaʼu* siliva ʼo te ʼu pou. 12 ʼI te faʼahi uesite ʼo te malaʼe, ʼae ʼe fasiga nima 50 tona laulahi, ʼe ke tau ai anai ni kie, pea ʼe ʼi ai anai mo he ʼu pou ʼe hogofulu mo he ʼu tuʼuʼaga ʼe hogofulu. 13 Ko te laulahi ʼo te faʼahi ʼo te malaʼe ʼae ʼe haga ki te potu esite, ʼae ʼe hopo ake ai te laʼa, ʼe fasiga nima 50 anai. 14 ʼE ke tau anai ni kie ia fasiga nima ʼe 15 ʼi te tahi faʼahi ʼo te huʼaga ki te malaʼe, pea ʼe ʼi ai anai he ʼu pou ʼe tolu mo he ʼu tuʼuʼaga ʼe tolu.+ 15 Pea ʼi te tahi age faʼahi ʼo te huʼaga, ʼe ke tau ai anai ni kie ia fasiga nima ʼe 15, pea ʼe ʼi ai anai he ʼu pou ʼe tolu mo he ʼu tuʼuʼaga ʼe tolu.

16 “ ʼI te huʼaga ʼo te malaʼe ʼe ʼi ai anai he lito ʼe fasiga nima 20 tona loa. ʼE lalaga fakatahi anai te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula, pea mo te filo lino lelei moʼo fai ʼaki te lito ʼaia.+ Pea ʼe ʼi ai anai he ʼu pou ʼe fa mo ʼonatou tuʼuʼaga ʼe fa.+ 17 ʼE ʼi ai anai he ʼu meʼa fakamaʼu siliva pea mo he ʼu faʼo siliva ʼo te ʼu pou fuli ʼae ʼe natou ʼa takai te malaʼe, kae ʼe fai anai ʼonatou tuʼuʼaga ʼaki te kapa.+ 18 ʼE fasiga nima 100 anai te loa ʼo te malaʼe,+ mo fasiga nima 50 tona laulahi pea mo fasiga nima 5 te maʼoluga ʼo te ʼu kie ʼae ʼe ʼa takai ʼaki te malaʼe pea neʼe fai ʼaki te filo lino lelei. Pea ʼe fai anai he ʼu tuʼuʼaga kapa. 19 Ko te ʼu meʼa kehekehe fuli ʼae ʼe fakaʼaogaʼi ki te gaue ʼo te tapenakulo, ʼo feia mo te ʼu faʼo ʼo te fale la pea mo te ʼu faʼo fuli ʼo te malaʼe, ʼe fai anai ʼaki te kapa.+

20 “ ʼE ke fakatotonu anai ki te kau Iselaele ke natou ʼaumai kia koe he lolo oliveto maʼa, ke feala ai ke ulo tuʼumaʼu te ʼu malama.+ 21 ʼI te fale la ʼo te fono, ʼi te faʼahi ʼae ʼi te muʼa lito,* ʼae ʼe ovi ki te Fakamoʼoni,+ ʼe tokaga anai ia Alone mo ʼona foha ke ulo tuʼumaʼu pe te ʼu malama mai te afiafi ʼo kaku ki te uhu ia muʼa ʼo Sehova.+ ʼE ko he lao ʼo talu ai maʼa te kau Iselaele pea ʼe mulimuli pe anai ki ai ʼonatou taʼiake fuli.+

28 “ ʼE ke pauʼi anai mai te kau Iselaele tou tehina ko Alone ʼo feia mo ʼona foha, ke natou tauhi kia te au ʼi tonatou ʼuhiga pelepitelo:+ ko Alone+ mo ʼona foha+ ko Natape pea mo Apiu,+ mo Eleasale pea mo Itamale.+ 2 ʼE ke fai anai he ʼu teu taputapu mo matalelei maʼa tou tehina ko Alone ke fakaʼapaʼapaʼi ai ia ia.+ 3 ʼE ke palalau anai ki te kau gaue faiva fuli, ia natou ʼae neʼe au foaki age te poto,+ pea ʼe natou fai anai te ʼu teu ʼo Alone ke fakamaʼoniʼoniʼi ai ia ia, pea ke tauhi kia te au ʼi tona ʼuhiga pelepitelo.

4 “Koʼeni te ʼu teu ʼae ʼe natou fai anai: ko he peketolale,*+ mo he efote,+ mo he kofu ʼe mole hona ʼu nimaʼi kofu,+ mo he kofu tamie, mo he kie ʼe takai ʼaki te ʼulu+ pea mo he kie ʼe haʼi ʼaki te koga loto.+ ʼE natou fai anai te ʼu teu taputapu ʼaia maʼa tou tehina ko Alone mo ʼona foha, ke natou tauhi kia te au ʼi tonatou ʼuhiga pelepitelo. 5 ʼE fakaʼaogaʼi anai e te kau gaue faiva ia te aulo, mo te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula pea mo te lino lelei.

6 “ ʼE natou lalaga anai te efote ʼaki te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula pea mo te filo lino lelei. Pea ʼe tui fakailoga anai ʼaki te ʼu filo aulo.+ 7 ʼE fakapipiki anai te ʼu koga lualua ʼo te efote ʼaki he ʼu koga kie ʼe lua ʼi te ʼu fuga ʼuma. 8 ʼE pipiki fakatahi anai te kiliʼi pipi+ mo te efote ke haʼi ke maʼu te efote. Pea ʼe lalaga pe anai te kiliʼi pipi ʼaki te aulo, mo te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula pea mo te filo lino lelei.

9 “ ʼE ke toʼo anai he ʼu maka ʼe lua ʼae ko te onise+ pea ʼe ke togi anai ʼi ai te ʼu higoa ʼo te ʼu foha ʼo Iselaele.+ 10 ʼE ko higoa ʼe ono ʼi te tahi maka pea ʼe ko higoa ʼe ono ʼi te tahi age maka, ʼo mulimuli pe ki ʼonatou taʼu. 11 Ko te tagata togi maka, ʼe ina togi anai te ʼu higoa ʼo te ʼu foha ʼo Iselaele ʼi te ʼu maka ʼaia ʼe lua ohage pe ko te togi ʼo he mama fakailoga.+ Pea ʼe ke fakapipiki anai te ʼu maka ʼaia ʼe lua ki he ʼu meʼa aulo. 12 ʼE ke fakapipiki anai te ʼu maka ʼaia ʼe lua ki te ʼu koga kie ʼe lua ʼae ʼi te ʼu fuga ʼuma ohage ko he ʼu maka fakamanatu ki te ʼu foha ʼo Iselaele.+ Pea ʼe alu anai ia Alone kia muʼa ʼo Sehova mo ʼonatou higoa ʼae ʼi ʼona fuga ʼuma ohage ko he fakamanatu. 13 ʼE ke fai anai he ʼu meʼa aulo 14 pea mo he ʼu seini ʼe lua neʼe fai ʼaki te aulo maʼa pea neʼe fi ohage ko he maea,+ pea ʼe ke fakaulu anai te ʼu seini ʼaia ki te ʼu meʼa aulo.+

15 “ ʼE fai anai e he tahi ʼe poto ʼi te tui fakailoga ia te peketolale ʼo te fakamau.+ ʼE hage pe ko te efote, ʼe fai anai ʼaki te aulo, mo te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula pea mo te filo lino lelei.+ 16 ʼE tapa fa tatau anai moka peluki lua, ʼe ko te apane ʼe tahi* tona loa, mo te apane ʼe tahi tona laulahi. 17 ʼE ke teuteuʼi anai ʼaki ni maka maʼuhiga, ʼe ko ʼatu anai ʼe fa. Ko te ʼuluaki ʼatu: ko te lupi, mo te topasi pea mo te emelote. 18 Ko te lua ʼatu: ko te tulekoase, mo te safile pea mo te sasipa. 19 Ko te tolu ʼatu: ko te leseme,* mo te akate pea mo te ametite. 20 Ko te fa ʼatu: ko te kisolite, mo te onise pea mo te sate. ʼE fakapipiki anai te ʼu maka maʼuhiga ʼaia ki he ʼu meʼa aulo. 21 ʼE tuʼu anai ʼi te ʼu maka maʼuhiga ʼaia te ʼu higoa ʼo te ʼu foha ʼe toko 12 ʼo Iselaele. ʼE togi anai ʼi te ʼu maka takitahi ʼaia he higoa ʼo he telepi ʼo te ʼu telepi ʼe 12, ohage pe ko te togi ʼo he mama fakailoga.

22 “ ʼE ke fai anai he ʼu seini ʼo te peketolale ʼaki te aulo maʼa, neʼe fi ohage ko he ʼu maea.+ 23 ʼE ke fai anai he ʼu mama aulo ʼe lua ʼo te peketolale pea ʼe ke fakapipiki anai te ʼu mama ʼaia ʼe lua ʼi te ʼu muliʼi meʼa ʼe lua ʼo te peketolale. 24 ʼE ke fakaulu anai te ʼu maea aulo ʼe lua ki te ʼu mama ʼe lua ʼae ʼi te ʼu muliʼi meʼa ʼo te peketolale. 25 ʼE ke toe fakaulu anai mai muʼa te tahi ʼu muliʼi maea ʼi te ʼu meʼa aulo ʼe lua ʼae ʼe pipiki ki te ʼu koga kie ʼe lua ʼi te ʼu fuga ʼuma ʼo te efote. Pea ʼe ke haʼi ai anai. 26 ʼE ke fai anai he ʼu mama aulo ʼe lua ʼo ke fakapipiki ki te ʼu muliʼi meʼa ʼe lua ʼae ʼi lalo ʼo te peketolale, ʼi muli pea ʼe lave ki te efote.+ 27 ʼE ke fai anai te tahi ʼu mama aulo ʼe lua ʼi muʼa ʼo te efote, ʼi te faʼahi ʼae ʼe pipiki fakatahi ai te kiliʼi pipi mo te efote, ʼi lalo ifo ʼo te ʼu koga kie ʼe lua ʼae ʼi te ʼu fuga ʼuma, ʼi ʼoluga pe ʼo te kiliʼi pipi ʼae neʼe lalaga.+ 28 ʼE haʼi anai ke maʼu ia te peketolale ʼaki he kave ʼuʼui. ʼE fakaulu anai ki te ʼu mama ʼo te peketolale mo te ʼu mama ʼaia ʼo te efote. ʼE pipiki maʼu anai te peketolale ki te efote, ʼi ʼoluga ʼo te kiliʼi pipi ʼae neʼe lalaga.

29 “Ka hu ia Alone ki te Potu Taputapu, kua ina tui te peketolale ʼo te fakamau ʼae neʼe togi ai te ʼu higoa ʼo te ʼu foha ʼo Iselaele pea ʼe tuʼu ʼi te faʼahi ʼo tona mafu, ohage ko he fakamanatu ia muʼa ʼo Sehova ʼo talu ai. 30 ʼE ke ʼai anai ki te loto peketolale ʼo te fakamau ia te Ulime mo te Tumime.*+ ʼE alu anai ia Alone kia muʼa ʼo Sehova mo te ʼu meʼa ʼaia ʼe tuʼu ʼi te faʼahi ʼo tona mafu. ʼE tuʼu tuʼumaʼu pe anai ia Alone ia muʼa ʼo Sehova mo te ʼu meʼa ʼaia ʼe tuʼu ʼi te faʼahi ʼo tona mafu, moʼo fai ʼaki he ʼu tonu ʼo ʼuhiga mo te kau Iselaele.

31 “ ʼE ke fai anai te kofu katoa ʼae ʼe mole hona ʼu nimaʼi kofu, ʼae neʼe tui ʼi loto ʼo te efote ʼaki pe te filo ʼuʼui.+ 32 ʼE ke fai anai he ava ʼi tona kiaʼi kofu, ʼi lotomalie. ʼE tui tapa anai te ava ʼaia e he tahi ʼe lalaga. ʼE hage pe anai ko te ava ʼo he kofu tau, ke ʼaua naʼa mahae. 33 ʼI te lalo tapaʼi kofu ʼe ke fai anai he ʼu kelenate ʼaki te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno pea mo te filo kula, pea ʼe ke fakavaha ʼaki ni kiʼi pele aulo. 34 ʼE ke fakavaha anai te ʼu kiʼi pele aulo ʼaia ʼaki te ʼu kelenate, ʼi te takafoli ʼo te lalo tapaʼi kofu. 35 ʼE tonu anai ke tui e Alone te kofu ʼaia ke feala hana fai te gaue. Pea ʼe logoaʼa anai te ʼu kiʼi pele moka hu ki te sagatualio ia muʼa ʼo Sehova pea moka mavae mai ai, ke ʼaua naʼa mate.+

36 “ ʼE ke fai anai he lauʼi ukamea gigila ʼaki te aulo maʼa pea ʼe ke togi anai ʼi ai ohage pe ko te togi ʼo he mama fakailoga, te meʼa ʼaeni: ‘Ko te maʼoniʼoni ʼe ʼa Sehova.’+ 37 ʼE ke haʼi anai te lauʼi ukamea ʼaia ʼaki he kave ʼuʼui ki te kie ʼae ʼe takai ʼaki te ʼulu,+ pea ʼe tonu anai ke tuʼu ʼi muʼa. 38 ʼE tuʼu anai ʼi te laʼe ʼo Alone. ʼE lau anai ko te hala ʼa Alone mo kapau ʼe mole fakaʼaogaʼi lelei e he tahi te ʼu meʼa taputapu,+ ʼae ʼe fakamaʼoniʼoniʼi e te kau Iselaele moka natou foaki ohage ko he ʼu meʼa ʼofa taputapu. ʼE tuku tuʼumaʼu pe anai ʼi tona laʼe ke natou maʼu ai te ʼofa ʼo Sehova.

39 “ ʼE ke lalaga anai te kofu tamie ʼaki te filo lino lelei ʼo feia mo te kie ʼae ʼe takai ʼaki te ʼulu, pea ʼe ke lalaga anai he kie ʼe haʼi ʼaki te koga loto.+

40 “ ʼE ke toe fai anai te ʼu teu matalelei ʼaeni maʼa te ʼu foha ʼo Alone ke fakaʼapaʼapaʼi ai natou:+ ko he ʼu kofu, mo he ʼu kie ʼe haʼi ʼaki te koga loto pea mo he ʼu kie ʼe takai ʼaki te ʼulu.+ 41 ʼE ke fakatui anai te ʼu teu ʼaia ki tou tehina ko Alone mo ʼona foha. Pea ʼe ke tākai lolo anai ʼonatou ʼulu mo ke fakanofo anai natou+ ko he ʼu pelepitelo*+ pea ʼe ke fakamaʼoniʼoniʼi anai ia natou. ʼE natou tauhi anai kia te au ʼi tonatou ʼuhiga pelepitelo. 42 ʼE ke toe fai anai mo honatou ʼu vavaʼe loto ʼaki te lino moʼo ʼuʼufi ʼaki tonatou telefua.+ ʼE ko he ʼu vavaʼe mai te koga loto ki te ʼu tuli. 43 ʼE tui anai e Alone mo ʼona foha te ʼu vavaʼe ʼaia moka natou hu anai ki te fale la ʼo te fono peʼe moka natou fakaovi ki te ʼaletale ʼo fai he gaue ʼi te faʼahi taputapu, ke mole natou lakahala ai pea mo mamate. ʼE ko he lao maʼa ia pea mo tona hakoga ʼo talu ai.

29 “Koʼeni te ʼu meʼa ʼae ʼe ke fai anai moʼo fakamaʼoniʼoniʼi ia natou ke natou tauhi ai kia te au ʼi tonatou ʼuhiga pelepitelo: Ke ke toʼo he vitulo kei mui, mo he ʼu ovi tagata ʼe lua ʼe heʼe mele,+ 2 mo he ʼu pane hala fakatupu, mo he ʼu pane takafuafua* hala fakatupu neʼe ʼai ki ai he moʼi lolo, pea mo he ʼu foʼi fakapaku hala fakatupu neʼe vali ʼaki te lolo.+ ʼE ke fai anai te ʼu meʼa ʼaia ʼaki te falena lelei* 3 pea ke ʼai anai ki he kato ʼo ʼaumai ki ʼoku muʼa,+ ʼo feia mo te vitulo pea mo te ʼu ovi tagata ʼe lua.

4 “ ʼE ke ʼaumai anai ia Alone mo ʼona foha ki te huʼaga ʼo te fale la ʼo te fono,+ pea ʼe ke fakatotonu anai ke natou maʼanu.*+ 5 ʼE ke toʼo anai te ʼu teu+ pea ʼe ke fakatui kia Alone te kofu tamie, mo te kofu ʼo te efote ʼae ʼe mole hona ʼu nimaʼi kofu, mo te efote pea mo te peketolale,* pea ʼe ke haʼi anai te kiliʼi pipi ʼo te efote ʼae neʼe lalaga ki tona koga loto.+ 6 ʼE ke takai anai tona ʼulu ʼaki te kie taputapu pea mo haʼi ki ai te lauʼi ukamea aulo taputapu.*+ 7 Pea ʼe ke toʼo anai te lolo taputapu+ ʼo tākai ʼaki tona ʼulu ke fakanofo ai ko he pelepitelo.+

8 “Pea ʼe ke fakaovi mai anai kia te au ʼona foha mo fakatui kia natou te ʼu kofu.+ 9 ʼE ke toʼo anai te ʼu kie taputapu ʼo haʼi ʼaki te ʼu koga loto ʼo Alone mo ʼona foha pea mo takai ʼaki ʼonatou ʼulu. ʼE ko natou pe ʼae ka natou maʼu te tuʼulaga fakapelepitelo. Pea ʼe ko he lao ʼo talu ai.+ ʼE feia anai tau fakanofo pelepitelo ia Alone pea mo ʼona foha.*+

10 “ ʼE ke ʼaumai anai te vitulo ki te muʼa fale la ʼo te fono, pea ʼe hili anai e Alone mo ʼona foha ʼonatou nima ki te ʼulu ʼo te vitulo.+ 11 ʼE ke matehi anai te vitulo ia muʼa ʼo Sehova, ʼi te huʼaga ʼo te fale la ʼo te fono.+ 12 ʼE ke ʼai anai ki tou kauʼi tuhi he moʼi toto ʼo te vitulo pea ʼe ke vali anai ki te ʼu tala ʼo te ʼaletale,+ pea ʼe ke liligi leva te toe ʼo te toto ki te vaʼe ʼaletale.+ 13 Pea ʼe ke toʼo anai te gako fuli+ ʼae ʼe ina ʼaofi te gākau, mo te gako ʼo te ʼate, mo te ʼu ifiifi ʼe lua mo ʼonā gako ʼo tutu ke kohu ʼi te ʼaletale.+ 14 Kae ko te kakano ʼo te vitulo, mo tona kili pea mo ʼona faifekau ʼe ke tutu anai ʼi tuʼa atu ʼo te nofoʼaga. Ko te vitulo ʼaia ʼe ko he molaga ʼo te agahala.

15 “Pea ʼe ke toʼo anai he ovi tagata ʼi te ʼu ovi tagata ʼae ʼe lua, pea ʼe hili anai e Alone mo ʼona foha ʼonatou nima ki te ʼulu ʼo te ovi tagata ʼaia.+ 16 ʼE ke matehi anai te ovi tagata pea ʼe ke toʼo anai tona toto ʼo afuhi ki te ʼu faʼahi kehekehe fuli ʼo te ʼaletale.+ 17 ʼE ke taʼataʼaga anai te ovi tagata, pea ʼe ke fakamaʼa anai tona gākau+ mo ʼona vaʼe, pea ʼe ke hili fakatahi anai te ʼu ʼinasi mo te foʼi ʼulu ki te ʼaletale. 18 ʼE ke tutu anai te ovi tagata katoa, ʼo ke tuku ke kohu ʼi te ʼaletale. ʼE ko he holokoseta maʼa Sehova, ko he ʼaele lelei.+ ʼE ko he molaga ʼe tutu maʼa Sehova.

19 “Hili ʼaia, ʼe ke toʼo anai te tahi ovi tagata, pea ʼe hili anai e Alone mo ʼona foha ʼonatou nima ki te ʼulu ʼo te ovi tagata ʼaia.+ 20 ʼE ke matehi anai te ovi tagata pea mo toʼo he moʼi toto ʼo ʼai ki te taliga mataʼu ʼo Alone, mo te ʼu taliga mataʼu ʼo ʼona foha pea mo te kauʼi tuhi matuʼa ʼo ʼonatou nima mataʼu ʼo feia mo te kauʼi vaʼe matuʼa ʼo ʼonatou vaʼe mataʼu. Pea ʼe ke afuhi anai te toto ki te ʼu faʼahi kehekehe fuli ʼo te ʼaletale. 21 ʼE ke toʼo anai he moʼi toto ʼi te ʼaletale mo he moʼi lolo taputapu+ ʼo afuhi kia Alone mo ʼona teu pea mo ʼona foha mo ʼonatou teu, ke fakamaʼoniʼoniʼi ai ia ia mo ʼona teu pea mo ʼona foha mo ʼonatou teu.+

22 “Pea ʼe ke toʼo anai ʼi te ovi tagata ʼaia te gako, mo te hiku ʼae ʼe gako, mo te gako ʼae ʼe ina ʼaofi te gākau, mo te gako ʼo te ʼate, te ʼu ifiifi ʼe lua mo ʼonā gako,+ pea mo te alaga mataʼu, koteʼuhi ko he ovi tagata ʼae ʼe sakilifisioʼi moka fakanofo pelepitelo he tahi.+ 23 ʼI te kato pane hala fakatupu ʼae ʼe tuku ia muʼa ʼo Sehova, ʼe ke toʼo anai mai ai he foʼi pane takafuafua, mo he foʼi pane* neʼe ʼai ki ai te lolo pea mo he foʼi fakapaku. 24 ʼE ke hili anai te ʼu meʼa fuli ʼaia ki te ʼu nima ʼo Alone mo te ʼu nima ʼo ʼona foha, pea ʼe ke lu anai te ʼu meʼa ʼaia ohage ko he molaga ʼe lu ia muʼa ʼo Sehova. 25 Pea ʼe ke toʼo anai te ʼu meʼa ʼaia mai ʼonatou nima ʼo tutu ʼi te ʼaletale, ʼi ʼoluga ʼo te holokoseta, ohage ko he ʼaele lelei ia muʼa ʼo Sehova. ʼE ko he molaga ʼe tutu maʼa Sehova.

26 “Pea ʼi te ovi tagata ʼae ʼe sakilifisioʼi moka fakanofo pelepitelo+ ia Alone ʼe ke toʼo anai te fatafata pea ke lu ohage ko he molaga ʼe lu ia muʼa ʼo Sehova. Pea ʼe ko tou vahe anai ʼaia. 27 ʼE ke tuku keheʼi anai te alaga mo te fatafata ʼo te ovi tagata ʼae ʼe sakilifisioʼi moka fakanofo pelepitelo+ ia Alone mo ʼona foha, ko te ʼu ʼinasi ʼaia ʼe lu ia muʼa ʼo te ʼAtua. 28 ʼE foaki tuʼumaʼu pe anai kia Alone mo ʼona foha te faʼahi ʼaia, pea ʼe ko he lao ʼe tonu anai ke mulimuli ki ai te kau Iselaele ʼo talu ai, koteʼuhi ʼe ko he vahe taputapu. Pea ʼe tonu anai ke foaki e te kau Iselaele te vahe taputapu ʼaia.+ ʼE ko tonatou vahe taputapu ʼaia maʼa Sehova ʼae ʼe natou toʼo anai mai ʼanatou sakilifisio ʼo te tokalelei.+

29 “ ʼE fakaʼaogaʼi anai te ʼu teu taputapu+ ʼo Alone e ʼona foha+ ʼae ka natou fetogi ia ia, moka tākai lolo ʼonatou ʼulu pea mo fakanofo pelepitelo ai natou. 30 Ko tona foha ʼae ka ina fetogi ia ia ʼi tona tuʼulaga pelepitelo pea mo hu ki te fale la ʼo te fono ke gaue ʼi te faʼahi taputapu, ʼe ina tui anai te ʼu teu ʼaia lolotoga ʼaho ʼe fitu.+

31 “ ʼE ke toʼo anai te ovi tagata ʼae ʼe sakilifisioʼi moka fakanofo pelepitelo he tahi pea ʼe ke fakamoho anai te kanoʼi manu ʼi he koga meʼa taputapu.+ 32 ʼE kai anai e Alone mo ʼona foha+ ia te kanoʼi manu ʼaia pea mo te ʼu foʼi pane ʼae ʼi te kato, ʼi te huʼaga ʼo te fale la ʼo te fono. 33 ʼE natou kai anai te sakilifisio ʼaia neʼe fai moʼo fakamolemole ʼanatou agahala, pea mo fakanofo pelepitelo* mo fakamaʼoniʼoniʼi ia natou. ʼE mole feala anai ke kai e he tahi kehe* te ʼu meʼa ʼaia, he ʼe taputapu.+ 34 Kapau ʼe toe he moʼi kanoʼi manu ʼo te ovi tagata ʼae neʼe sakilifisioʼi peʼe ko he moʼi pane ki apogipogi, ʼe tonu anai ke ke tutu.+ ʼE mole tonu anai ke kai he ʼe taputapu.

35 “ ʼE ke fai feia anai kia Alone mo ʼona foha, ʼo mulimuli ki te ʼu meʼa fuli ʼae neʼe au fakatotonu atu. ʼE ʼaho fitu anai tau fakanofo natou ko he ʼu pelepitelo.*+ 36 ʼI te ʼaho fuli pe, ʼe ke sakilifisioʼi anai he vitulo ko he molaga moʼo fakamolemole te ʼu agahala, pea ʼe ke fakamaʼa anai te ʼaletale mai te agahala ʼaki te molaga ʼaia, pea ʼe ke liligi anai te lolo ki te ʼaletale ke fakamaʼoniʼoniʼi ai.+ 37 ʼE ʼaho fitu anai tau fakamaʼa ia te ʼaletale, pea ʼe ke fakamaʼoniʼoniʼi anai te ʼaletale ke liliu ai ko he ʼaletale taputapu ʼaupito.+ ʼE tonu anai ke maʼoniʼoni ia ia ʼae ʼe fāfā ki te ʼaletale.

38 “Koʼeni te ʼu meʼa ʼae ʼe ke momoli anai ʼi te ʼaletale: Ko ovi tagata ʼe lua ʼe taki taʼu tahi, ʼi te ʼaho fuli, pea ʼe ke fai tuʼumaʼu pe anai.+ 39 ʼE ke momoli anai he ovi tagata ʼi te uhu pea ko te tahi ovi tagata ʼi te ʼosi to ʼo te laʼa.*+ 40 ʼE momoli fakatahi anai mo te ʼuluaki ovi tagata ia te vahe tahi ki te hogofulu ʼo he fua efa* falena lelei ʼe tahi neʼe fio ʼaki te vahe tahi ki te fa ʼo he hine* lolo oliveto ʼe tahi, pea mo he molaga vino ʼe ko te vahe tahi ki te fa ʼo he hine vino ʼe tahi. 41 ʼE ke momoli anai te lua ovi tagata ʼi te ʼosi to ʼo te laʼa,* mo he molaga meʼa kai mo he molaga meʼa inu ʼe tatau mo ʼae ʼo te uhu. ʼE ke momoli anai te ʼu meʼa ʼaia ohage ko he ʼaele lelei, ko he molaga ʼe tutu anai maʼa Sehova. 42 ʼE ko he holokoseta ʼe momoli tuʼumaʼu pe anai mai he taʼiake ki he tahi taʼiake ʼi te huʼaga ʼo te fale la ʼo te fono ia muʼa ʼo Sehova, te koga meʼa ʼae ʼe au ha atu ai anai kia koutou pea mo palalau atu ai kia koe.+

43 “ ʼE au ha anai ʼi ai ki te kau Iselaele, pea ʼe fakamaʼoniʼoniʼi anai te koga meʼa ʼaia ʼuhi ko toku kololia.+ 44 ʼE au fakamaʼoniʼoniʼi anai te fale la ʼo te fono pea mo te ʼaletale, pea ʼe au fakamaʼoniʼoniʼi anai ia Alone mo ʼona foha+ ke natou tauhi ai kia te au ʼi tonatou ʼuhiga pelepitelo. 45 ʼE au nofo anai* ʼi te lotolotoiga ʼo te hahaʼi ʼo Iselaele, pea ʼe au liliu anai ko tonatou ʼAtua.+ 46 Pea ʼe natou iloʼi moʼoni anai ko au ia Sehova tonatou ʼAtua, ʼae neʼe ina fakamavae natou mai te fenua ʼo Esipito ke feala ai haku nofo ʼi te lotolotoiga ʼo natou.+ Ko au ia Sehova tonatou ʼAtua.

30 “ ʼE ke fai anai he ʼaletale ke tutu ai te iseso.+ ʼE ke fai anai ʼaki te ʼakau ʼae ko te akasia.+ 2 ʼE tapa fa tatau anai: ʼe fasiga nima tahi* tona loa, mo fasiga nima tahi tona laulahi, pea mo fasiga nima lua tona maʼoluga. Ko ʼona tala ʼe ko he koga anai ʼo te ʼaletale.+ 3 ʼE ke ʼaofi anai ʼaki te aulo maʼa ia ʼoluga, mo ʼona tafaʼaki fuli, pea mo ʼona tala. ʼE ke fai anai he tapatapa aulo ʼi te takafoli. 4 ʼE ke toe fai foki anai he ʼu mama aulo ʼe lua ʼi lalo ifo ʼo te tapatapa ʼaia, ʼi te ʼu faʼahi lua, ke fakaulu ai te ʼu ʼakau ʼamo ke fata ʼaki te ʼaletale. 5 ʼE ke fai anai te ʼu ʼakau ʼamo ʼaki te ʼakau ʼae ko te akasia pea ʼe ke ʼaofi anai ʼaki te aulo. 6 ʼE ke fakatuʼu anai te ʼaletale ʼi te muʼa lito, ʼae ʼe ovi ki te aleka ʼo te Fakamoʼoni,+ ʼi muʼa ʼo te tapunu ʼae ʼe hili ʼi te Fakamoʼoni, ʼae ʼe au ha atu ai anai kia koe.+

7 “ ʼE tutu ai anai e Alone+ te iseso magoni,+ ʼo ina tuku ke kohu ʼi te ʼaletale+ moka tokaga ki te ʼu malama+ ʼi te uhu fuli. 8 Pea ka tutu e Alone te ʼu malama ʼi te ʼosi to ʼo te laʼa,* ʼe ina toe tutu ai anai mo te iseso. ʼE ko te molaga ʼaia ʼo te iseso ʼe fai tuʼumaʼu pe anai ia muʼa ʼo Sehova, mai he taʼiake ki he tahi taʼiake. 9 ʼE mole kotou momoli anai ʼi ai he tahi age iseso,+ peʼe ko he holokoseta peʼe ko he molaga meʼa kai pea ʼe mole kotou liligi anai ʼi ai he molaga vino. 10 ʼE vali anai e Alone he moʼi toto ʼo te molaga ʼo te agahala+ ki te ʼu tala ʼo te ʼaletale ke fakamaʼa ai te ʼaletale. ʼE tonu anai ke ina fai tuʼa tahi ʼi te taʼu+ te faʼahi ʼaia. ʼE tonu anai ke fai mai he taʼiake ki he tahi taʼiake, ke fakamaʼoniʼoniʼi ai te ʼaletale. ʼE taputapu ʼaupito te ʼaletale kia Sehova.”

11 Pea neʼe toe ui e Sehova kia Moisese: 12 “Ka ke tohi te kaugamalie ʼo te hahaʼi tagata ʼo Iselaele,+ ʼe tonu anai ke natou tahi foaki kia Sehova he totogi* ke fetogi ʼaki tonatou maʼuli,* ʼi te temi ʼae ʼe lau ai tonatou kaugamalie. ʼE fai anai te faʼahi ʼaia ke mole hoko kia natou he malaʼia moka lau tonatou kaugamalie. 13 Koʼeni te meʼa ʼae ʼe foaki anai e natou fuli ʼae neʼe tohi: ko he vaeluaʼi sikele* ʼo mulimuli ki te sikele ʼo te koga meʼa taputapu.*+ Ko kela* ʼe 20 ʼe ko he foʼi sikele ʼe tahi. Ko te vaeluaʼi sikele ʼe ko te meʼa ʼofa ʼaia kia Sehova.+ 14 ʼE foaki anai te meʼa ʼofa ʼaia kia Sehova e natou fuli ʼae neʼe tohi, mai te taʼu 20 ʼo fai ki ʼoluga.+ 15 ʼE mole tonu anai ke lahi age te meʼa ʼae ʼe foaki e te tagata maʼu koloa ʼi te vaeluaʼi sikele* ʼae ʼe tonu ke foaki kia Sehova pea ʼe mole tonu anai ke veliveli age te meʼa ʼae ʼe foaki e te tagata masiva. ʼAki te meʼa ʼofa ʼaia, ʼe totogi ai ʼonatou maʼuli.* 16 ʼE ke toʼo anai te falā* ʼae ʼe foaki e te kau Iselaele moʼo totogi ʼo ʼanatou agahala pea ʼe ke foaki leva ki te gaue ʼae ʼe fai ʼi te fale la ʼo te fono. ʼE liliu anai te falā ʼaia ko he fakamanatu maʼa te kau Iselaele ia muʼa ʼo Sehova, ke totogi ai ʼanatou agahala pea ke haofaki ai natou.”*

17 Pea neʼe toe ui e Sehova kia Moisese: 18 “ ʼE ke fai anai he foʼi topu kapa mo hona tuʼuʼaga.+ ʼE ke fakatuʼu anai ʼi te vaha ʼo te fale la ʼo te fono mo te ʼaletale pea ʼe ke ʼai anai ki ai he vai.+ 19 ʼE fanofano ai anai ia Alone mo ʼona foha pea mo fufulu ai ʼonatou vaʼe.+ 20 Ka natou hu ki te fale la ʼo te fono peʼe fakaovi ki te ʼaletale ʼo fai he gaue pea mo tutu ke kohu he ʼu sakilifisio kia Sehova, ʼe natou fakaʼaogaʼi anai te vai ʼaia ke fakamaʼa ai ia natou ke mole natou mamate. 21 ʼE natou fanofano pea mo fufulu anai ʼonatou vaʼe ke mole natou mamate. Pea ʼe liliu anai te faʼahi ʼaia ko he lao ʼo talu ai maʼa natou, maʼa Alone mo tona hologa, mai he taʼiake ki he tahi taʼiake.”+

22 Neʼe hoko atu e Sehova tana palalau kia Moisese, ʼo ina ui: 23 “Ke ke toʼo leva te ʼu meʼa magoni ʼae ʼe lelei tukupau: ko fua mila* fefeka ʼe 500, mo fua kasia* magoni ʼe 250, mo fua kaho magoni ʼe 250, 24 pea mo fua ʼe 500 ʼo te tahi faʼahiga kasia. ʼE fua anai te ʼu meʼa magoni fuli ʼaia ʼo mulimuli ki te sikele ʼo te koga meʼa taputapu.*+ ʼE ke toe toʼo anai mo he hine* lolo oliveto ʼe tahi. 25 Pea ʼe ke fai anai ʼaki te ʼu meʼa ʼaia he lolo taputapu ʼe fakaʼaogaʼi moʼo fakanofo ʼo he tahi. ʼE tonu anai ke fai te lolo ʼaia ohage ko te fai e te tagata fai lolo magoni ʼana lolo.+ ʼE ko te lolo taputapu ʼaia ʼe fakaʼaogaʼi anai moʼo fakanofo ʼo he tahi.

26 “ ʼE ke ʼai anai he moʼi lolo taputapu ki te fale la ʼo te fono+ pea mo te aleka ʼo te Fakamoʼoni, 27 ʼo feia mo te laupapa mo ʼona meʼa kehekehe fuli, mo te tuʼulaga malama mo ʼona meʼa kehekehe, mo te ʼaletale ʼo te iseso, 28 mo te ʼaletale ʼo te ʼu holokoseta mo ʼona meʼa kehekehe fuli, pea mo te foʼi topu mo tona tuʼuʼaga. 29 ʼE tonu anai ke ke fakamaʼoniʼoniʼi te ʼu meʼa ʼaia ke liliu ʼo taputapu ʼaupito.+ ʼE tonu anai ke maʼoniʼoni ia ia ʼae ʼe fāfā ki ai.+ 30 ʼE ke tākai lolo anai te ʼulu ʼo Alone+ mo ʼona foha+ pea mo fakamaʼoniʼoniʼi ke natou tauhi kia te au ʼi tonatou ʼuhiga pelepitelo.+

31 “ ʼE ke ui anai ki te kau Iselaele: ‘ ʼE ko taku lolo taputapu anai ʼaia ka fakaʼaogaʼi moʼo fakanofo he tahi, mai he taʼiake ki he tahi taʼiake.+ 32 ʼE mole vali anai ki he sino ʼo he tahi, pea ʼe mole tonu anai ke kotou fai he meʼa ʼe tatau tona fai mo te lolo ʼaia. ʼE ko he meʼa taputapu. Pea ʼe taputapu tuʼumaʼu pe anai kia koutou. 33 Ko ia ʼae ʼe ina fai anai he lolo magoni ohage ko te lolo magoni ʼaia pea mo ʼai ki he tahi ʼe mole tonu ke ʼai ki ai,* ʼe tonu anai ke matehi.’ ”+

34 Pea neʼe ui leva e Sehova kia Moisese: “Ke ke fua fakatatau te ʼu meʼa magoni ʼaeni:+ he ʼu mosiʼi setakite, mo he onika, mo he kalipanume magoni, pea mo he iseso hina* maʼa. 35 ʼE ke fai anai ʼaki te ʼu meʼa ʼaia he iseso.+ ʼE fio anai te ʼu meʼa magoni ʼaia ohage ko te fai e te tagata fai lolo magoni ʼana lolo, pea ʼe konakona anai,+ mo maʼa pea mo taputapu. 36 ʼE ke tuki anai hona koga ke liliu ko he pauta manifi pea ʼe ke tuku anai he kiʼi meʼa veliveli pe ʼi te muʼa Fakamoʼoni, ʼae ʼi te fale la ʼo te fono, ʼae ʼe au ha atu ai anai kia koe. ʼE tonu anai ke taputapu kia koutou te iseso ʼaia. 37 ʼE mole tonu anai ke kotou fai maʼa koutou totonu he iseso ʼe tatau tona fai mo te iseso ʼaia.+ ʼE ko he meʼa taputapu kia Sehova. 38 Ko ia ʼae ʼe ina fai anai he iseso ohage ko te iseso ʼaia ke mamanu ki tona magoni, ʼe tonu anai ke matehi.”

31 Neʼe hoko atu pe te palalau ʼa Sehova kia Moisese, ʼo ina ui ki ai: 2 “Koʼeni, kua au filifili* ia Petesalele,+ te foha ʼo Uli, te foha ʼo Ulu mai te telepi ʼo Suta.+ 3 ʼE au foaki anai kia ia toku laumalie,* ke ina maʼu ai te poto, mo te ʼatamai pea mo te mahino ʼi te fai ʼo te ʼu faʼahiga gaue kehekehe fuli, 4 ke ina fai he ʼu fakatuʼutuʼu, mo gaueʼi te aulo, mo te siliva pea mo te kapa, 5 mo togi pea mo fakapipiki he ʼu maka maʼuhiga,+ pea mo fai he ʼu meʼa kehekehe ʼaki te ʼakau.+ 6 Tahi ʼae meʼa, kua au hinoʼi ia Oholiape,+ te foha ʼo Ahisamake mai te telepi ʼo Tane ke tokoni kia ia. Pea ʼe au toe foaki anai mo he poto kia natou fuli ʼae ʼe faiva, ke natou fai ai te ʼu meʼa fuli ʼaeni neʼe au fakatotonu atu:+ 7 te fale la ʼo te fono,+ mo te aleka ʼo te Fakamoʼoni+ pea mo te tapunu+ ʼae ʼe hili ai, mo te ʼu meʼa kehekehe fuli ʼo te fale la, 8 mo te laupapa+ mo ʼana meʼa kehekehe, mo te tuʼulaga malama ʼae neʼe fai ʼaki te aulo maʼa mo ʼana meʼa kehekehe fuli,+ mo te ʼaletale ʼo te iseso,+ 9 mo te ʼaletale ʼo te ʼu holokoseta+ pea mo ʼana meʼa kehekehe fuli, mo te foʼi topu kapa pea mo tona tuʼuʼaga,+ 10 mo te ʼu teu matalelei ʼae neʼe lalaga, mo te ʼu teu taputapu ʼo Alone te pelepitelo, mo te ʼu teu ʼo ʼona foha ki tanatou gaue fakapelepitelo,+ 11 mo te lolo taputapu, pea mo te iseso magoni ki te sagatualio.+ ʼE natou fai anai ia te ʼu meʼa fuli ʼae neʼe au fakatotonu atu.”

12 Pea neʼe toe ui e Sehova kia Moisese: 13 “Palalau ki te kau Iselaele pea ke ke ui age kia natou: ‘ ʼE kotou taupau fakalelei anai ʼaku sapato,+ koteʼuhi ʼe ko he fakailoga mai he taʼiake ki he tahi taʼiake ʼo te fuakava ʼae neʼe au fai mo koutou, ke kotou iloʼi ai ko au ia Sehova, ʼe au fakamaʼoniʼoniʼi koutou. 14 ʼE tonu anai ke kotou taupau te Sapato he ʼe ko he meʼa taputapu kia koutou.+ Ko ʼae ʼe ina moamoagaʼi anai te Sapato, ʼe tonu anai ke matehi. Ko ʼae ʼe ina fai he gaue ʼi te ʼaho ʼaia, ʼe tonu anai ke matehi.+ 15 ʼE feala anai ke fai he ʼu gaue lolotoga ʼaho ʼe ono, kae ko te fitu ʼaho, ʼe ko he sapato, ko he ʼaho makehe ke malolo ai.+ ʼE ko he meʼa taputapu kia Sehova. Ko ʼae ʼe ina fai anai he gaue ʼi te ʼaho ʼo te Sapato, ʼe tonu anai ke matehi. 16 ʼE tonu anai ke taupau e te kau Iselaele ia te Sapato. ʼE tonu anai ke natou fai te Sapato mai he taʼiake ki he tahi taʼiake. ʼE ko he fuakava ʼe fualoa anai. 17 ʼE ko he fakailoga ʼo te fuakava ʼae neʼe au fai mo te hahaʼi ʼo Iselaele pea ʼe fualoa anai,+ koteʼuhi neʼe fakatupu e Sehova te lagi mo te kele lolotoga ʼaho ʼe ono kae ʼi te fitu ʼaho, neʼe malolo ai leva pea mo fiafia ʼi tana gaue.’ ”+

18 Pea ʼi te ʼosi pe ʼo tana palalau mo Moisese ʼi te Moʼuga ʼo Sinai, neʼe ina foaki age kia ia te ʼu lauʼi maka ʼe lua ʼo te Fakamoʼoni,+ ko te ʼu lauʼi maka ʼae neʼe tohi ʼaki te nima* ʼo te ʼAtua.+

32 Lolotoga te temi ʼaia, neʼe sio ia te hahaʼi kua tuai te hifo mai ʼa Moisese mai te moʼuga.+ Neʼe natou fakatahitahi ai kia Alone ʼo natou ui age ki ai: “Faʼu maʼa tatou he ʼatua ke ina takitaki ia tatou,+ koteʼuhi ʼe mole tou iloʼi pe kotea ʼae kua hoko kia Moisese, te tagata ʼae neʼe ina fakamavae ia tatou mai te fenua ʼo Esipito.” 2 Pea neʼe tali age e Alone kia natou: “Kotou toʼo te ʼu hau aulo+ mai te ʼu taliga ʼo ʼokotou ʼohoana, mo ʼokotou foha pea mo ʼokotou ʼofafine pea kotou ʼaumai kia au.” 3 Neʼe toʼo ai leva e te hahaʼi fuli te ʼu hau aulo mai ʼonatou taliga ʼo ʼaumai kia Alone. 4 Pea neʼe ina toʼo te ʼu meʼa aulo ʼaia pea neʼe ina gaueʼi te aulo ke liliu ko he fakatata* ʼo he ʼuhiʼi pipi.+ Pea neʼe natou ui leva: “Iselaele, koʼeni tou ʼAtua, ʼae neʼe ina fakamavae ia koe mai te fenua ʼo Esipito.”+

5 ʼI te sio ʼa Alone ki te faʼahi ʼaia, neʼe ina laga ai he ʼaletale ʼi te muʼa fakatata. Pea neʼe kalaga ia Alone: “ ʼE fai anai he ʼaho lahi maʼa Sehova apogipogi.” 6 Koia, ʼi te ʼaho ake, neʼe natou ʼaʼala uhuuhu pea neʼe natou momoli he ʼu holokoseta pea mo he ʼu sakilifisio ʼo te tokalelei. Hili ʼaia, neʼe nonofo ifo te hahaʼi ki lalo ʼo kakai mo iinu. Pea neʼe natou tutuʼu ake leva ʼo fakafiafia.+

7 Pea neʼe ui leva e Sehova kia Moisese: “Hifo he ʼe ko tau hahaʼi, ʼae neʼe ke fakamavae mai te fenua ʼo Esipito, kua natou fai he ʼu aga ʼe kovi.+ 8 Kua natou maliu fakavilivili mai te ala ʼae neʼe au fakatotonu ke natou haʼele ai.+ Pea kua natou faʼu maʼa natou he fakatata* ʼo he ʼuhiʼi pipi, pea ʼe natou tulolo ʼi ʼona muʼa mo fai he ʼu sakilifisio ki ai, pea mo ui: ‘Iselaele, koʼeni tou ʼAtua, ʼae neʼe ina fakamavae ia koe mai te fenua ʼo Esipito.’ ” 9 Pea neʼe toe ui e Sehova kia Moisese: “ ʼE au sio ko te hahaʼi ʼaia ʼe ko he hahaʼi uigataʼa.*+ 10 Koia, ʼi te lakaga nei, ʼe au fakaʼauha anai ia natou ʼuhi ko toku hauhau, pea ʼe au fakaliliu anai ia koe ko he puleʼaga lahi moʼo fetogi ʼo natou.”+

11 Neʼe tagi leva ia Moisese kia* Sehova tona ʼAtua+ ʼo ina ui: “Sehova e, he koʼe ʼe to anai tou hauhau ki tau hahaʼi ʼi tau ʼosi fakamavae ia natou mai te fenua ʼo Esipito ʼaki tou mafimafi pea mo tou nima malohi?+ 12 Kapau ʼe ke fai te faʼahi ʼaia, ʼe ui anai e te kau Esipito: ‘Neʼe ʼi ai ʼana fakatuʼutuʼu kovi ʼi tana fakamavae ia natou. Neʼe ina fia matehi ia natou ʼi te ʼu moʼuga pea mo fakaʼauha ia natou ʼi te fuga kele.’+ Ke ke taʼofi tou hauhau pea ke ke toe fakakaukauʼi* te tonu ʼae ke ke fakahoko te malaʼia ʼaia ki tau hahaʼi. 13 Ke ke manatuʼi ʼau tagata faifekau ko Apalahamo, mo Isaake pea mo Iselaele, ʼae neʼe ke fakapapauʼi age e koe totonu kia natou: ‘ ʼE au fakahahaʼi anai tokotou hakoga ohage ko te ʼu fetuʼu ʼo te lagi.+ Pea ʼe au foaki anai ki tokotou hakoga te fenua katoa ʼaeni neʼe au palalau ki ai, ke natou maʼu te fenua ʼaia ʼo talu ai.’ ”+

14 Neʼe fetogi ai leva e Sehova* tana tonu ʼo mole ina matehi tana hahaʼi ohage ko tana fakatotonu.+

15 Pea neʼe toe liliu leva ia Moisese pea neʼe hifo mai te moʼuga mo te ʼu lauʼi maka ʼe lua ʼo te Fakamoʼoni+ ʼi tona nima.+ Neʼe tohi te ʼu lauʼi maka ʼaia ʼi te ʼu faʼahi lualua, ʼi muʼa mo muli. 16 Neʼe fai e te ʼAtua te ʼu lauʼi maka ʼaia pea neʼe ko te faitohi ʼa te ʼAtua totonu ʼae neʼe togi ai.+ 17 ʼI te logo ʼa Sosue ki te logoaʼa ʼa te hahaʼi, ʼei, ʼanatou kalaga, neʼe ina ui kia Moisese: “ ʼE hage te logoaʼa ko he hahaʼi ʼe fetauʼaki ʼi te nofoʼaga.” 18 Kae neʼe ui e Moisese:

19 ʼI te fakaovi atu ʼa Moisese ki te nofoʼaga pea ʼi tana sio ki te ʼuhiʼi pipi+ mo tanatou memeʼe, neʼe kovi ʼosi ai tona ita. Pea neʼe ina liʼaki te ʼu lauʼi maka ʼae neʼe ʼi ʼona nima ki te vaʼe moʼuga ʼo foafoa ai.+ 20 Neʼe ina toʼo te ʼuhiʼi pipi ʼae neʼe natou faʼu ʼo tutu pea neʼe ina laliki ke liliu ko he lefulefu.+ Neʼe ina laku leva te lefulefu ʼaia ki te vai pea neʼe ina fakatotonu ki te kau Iselaele ke natou inu.+ 21 Pea neʼe ui e Moisese kia Alone: “Kotea ʼae neʼe fai atu e te hahaʼi ʼaeni kia koe ke ke tuku ai ke natou fai he toe agahala lahi?” 22 Neʼe tali age e Alone: “Siʼoku ʼaliki, ʼaua naʼa ke ita. ʼE ke iloʼi lelei pe ʼe fia fai tuʼumaʼu e te hahaʼi ʼaeni te meʼa ʼae ʼe kovi.+ 23 Koia neʼe natou ui ai: ‘Faʼu maʼa tatou he ʼatua ke ina takitaki ia tatou, koteʼuhi ʼe mole tou iloʼi pe kotea ʼae kua hoko kia Moisese, te tagata ʼae neʼe ina fakamavae tatou mai te fenua ʼo Esipito.’+ 24 Pea neʼe au ui age kia natou: ‘Ko natou ʼae ʼe natou maʼu he ʼu meʼa aulo, ke natou toʼo ʼo ʼaumai kia au.’ Neʼe au laku ai leva ki te afi pea neʼe maʼu mai ai te ʼuhiʼi pipi ʼaia.”

25 Neʼe sio ia Moisese neʼe tuku e Alone ke fai fakavalevale e te hahaʼi he ʼu aga ʼe mole lelei, ʼo natou liliu ai ko he meʼa fakaufiufi ia muʼa ʼo ʼonatou fili. 26 Neʼe alu leva ia Moisese ʼo tuʼu ʼi te huʼaga ʼo te nofoʼaga pea neʼe ina ui: “Ko ai ʼae ʼe kau mo Sehova? Ke haʼu kia au!”+ Pea neʼe fakatahitahi age leva kia ia te kau Levite fuli. 27 Neʼe ina ui kia natou: “Koʼeni te folafola ʼa Sehova te ʼAtua ʼo Iselaele: ‘Kotou tahi toʼo tana heleta pea kotou fakalaka ʼi te nofoʼaga mai te tahi potu ki te tahi age potu,* pea kotou tahi matehi tona tehina, mo tona vahaʼa fale pea mo tona kaumeʼa.’ ”+ 28 Neʼe fai e te kau Levite te meʼa ʼae neʼe ui e Moisese. Pea neʼe ko tagata ʼe teitei toko 3 000 neʼe matehi ʼi te ʼaho ʼaia. 29 Neʼe ui leva e Moisese: “Kotou fakamaʼoniʼoniʼi ia koutou* ʼi te ʼaho nei ke kotou fai te gaue ʼa Sehova, he neʼe kotou tahi fakafeagai ki tona foha totonu pea mo tona tehina totonu.+ Koia, ʼi te ʼaho nei, ʼe ina tapuakiʼi anai ia koutou.”+

30 ʼI te ʼaho ake, neʼe ui e Moisese ki te hahaʼi: “Neʼe lahi ʼosi te agahala ʼae neʼe kotou fai. ʼI te lakaga ʼaeni, ʼe au hake ki te moʼuga kia Sehova ʼo vakaʼi pe ʼe feala ke au fai he meʼa ke ina fakamolemole ai takotou agahala.”+ 31 Neʼe toe liliu ai ia Moisese kia Sehova pea neʼe ina ui: “Kua fai e te hahaʼi ʼaeni he toe agahala lahi! Neʼe natou faʼu honatou ʼatua aulo!+ 32 Kae ʼi te lakaga nei, kapau ʼe ke loto ki ai, ke ke fakamolemole tanatou agahala.+ Kae kapau ʼe mole ke loto ki ai, fakalelei siʼou loto, ke ke molehi toku higoa ʼi tau tohi.”+ 33 Kae neʼe ui e Sehova kia Moisese: “Ko ʼae neʼe agahala mai kia te au, ʼe au molehi anai tona higoa ʼi taku tohi. 34 ʼI te temi nei, alu pea ke taki te hahaʼi ki te koga meʼa ʼae neʼe au palalau atu ki ai. ʼE taki anai ia koe e taku ʼaselo,+ pea ko te ʼaho ʼae ka au faifakamau ai, ʼe au tauteaʼi anai ia natou ʼuhi ko tanatou agahala.” 35 Pea neʼe toe tauteaʼi foki e Sehova te hahaʼi ʼuhi ko te ʼuhiʼi pipi ʼae neʼe natou faʼu, ʼei, te ʼuhiʼi pipi ʼae neʼe faʼu e Alone maʼa natou.

33 Neʼe toe ui e Sehova kia Moisese: “Mavae ʼi heni mo te hahaʼi ʼae neʼe ke fakamavae mai te fenua ʼo Esipito. Pea ke alu ki te fenua ʼae neʼe au fakapapau kia Apalahamo, mo Isaake pea mo Sakopo ʼe au foaki anai ki tonatou hakoga.+ 2 ʼE au fekauʼi anai he ʼaselo ke alu ʼi ʼou muʼa+ pea ʼe au kapu anai te kau Kanaane, mo te kau Amole, mo te kau Heti, mo te kau Pelesite, mo te kau Hevi pea mo te kau Sepusi.+ 3 Alu ki he fenua ʼe tafe ai te huʼa pipi mo te meli.+ Kae ʼe mole au alu anai mo koutou, koteʼuhi ko koutou ko he hahaʼi uigataʼa,*+ pea ʼe feala pe ke au fakaʼauha ia koutou ʼi te ala.”+

4 ʼI te logo ʼa te hahaʼi ki te ʼu palalau fefeka ʼaia, neʼe natou lotomamahi ai, pea neʼe mole tau e he tahi hona ʼu meʼa fakateuteu. 5 Neʼe ui e Sehova kia Moisese: “Ke ke ui ki te kau Iselaele: ‘Ko koutou ko he hahaʼi uigataʼa.*+ ʼE feala pe haku fakalaka mo fakaʼauha ia koutou ʼi he moʼi temi pe ʼe tahi.+ Koia, ʼaua naʼa kotou toe tau ʼokotou meʼa fakateuteu, he ʼe au fakakaukauʼi muʼa pe kotea ʼae ka au fai kia koutou.’ ” 6 Koia, neʼe mole toe tau ai e te kau Iselaele ʼonatou meʼa fakateuteu talu mai te meʼa ʼae neʼe hoko ʼi te Moʼuga ʼo Olepe.

7 Pea neʼe toʼo e Moisese tona fale la ʼo alu ʼo fakatuʼu ʼi tuʼa atu ʼo te nofoʼaga, ʼo mamaʼo mai te nofoʼaga, pea neʼe ina fakahigoa ko te fale la ʼo te fono. Ko natou fuli ʼae neʼe natou fia fakafehuʼi ia Sehova,+ neʼe olo ki te fale la ʼo te fono, ʼae neʼe tuʼu ʼi tuʼa atu ʼo te nofoʼaga. 8 ʼI te temi pe ʼae neʼe alu ai ia Moisese ki te fale la, neʼe tutuʼu ake te hahaʼi fuli ʼo tutuʼu ʼi ʼonatou muʼa fale la, pea neʼe natou sioʼi ia Moisese ʼo kaku ki tana hu ki te fale la. 9 ʼI te temi pe ʼae neʼe hu ai ia Moisese ki te fale la, neʼe hifo ifo te ʼao+ ʼo tuʼu ʼi te huʼaga ʼo te fale la, kae palalau ia te ʼAtua mo Moisese.+ 10 Pea ka sisio te hahaʼi fuli ki te tuʼu ʼa te ʼao ʼi te huʼaga ʼo te fale la, neʼe natou tahi tulolo ʼi te huʼaga ʼo tona fale la. 11 Neʼe palalau ia Sehova mo Moisese ʼo nā fehagaʼaki,+ ohage pe ko he faipalalau ʼa he foʼi toko lua. ʼI tana toe liliu ki te nofoʼaga, neʼe nofo pe ia Sosue,+ te foha ʼo Nune, tana tagata tokoni gaue,+ ʼi te fale la.

12 Pea neʼe ui e Moisese kia Sehova: “ ʼE ke ui mai: ‘Ke ke taki te hahaʼi ʼaeni,’ kae neʼe mole ke fakaha mai pe ko ai ʼae ʼe ke fekauʼi anai ke alu mo au. Pea tahi ʼae meʼa, neʼe ke ui mai: ‘Kua au iloʼi lelei ia koe,* pea kua au ʼofa ia koe.’ 13 Fakalelei siʼou loto, kapau ʼe ke ʼofa ia au, fakaha mai ʼou ala,+ ke au iloʼi ai ia koe pea ke ke haga ʼofa ai kia au. Pea ke ke manatuʼi foki ko te puleʼaga ʼaeni ʼe ko tau hahaʼi.”+ 14 Neʼe ina ui age: “Ko au totonu pe* ʼae ka alu mo koe,+ pea ʼe au foaki atu anai te tokalelei.”+ 15 Pea neʼe tali age e Moisese: “Kapau ʼe mole ke haʼu ia koe totonu mo au, pea ʼaua naʼa ke fakamavae ia matou ʼi heni. 16 ʼE iloʼi feafeaʼi anai ʼe ke ʼofa ia au pea mo tau hahaʼi? ʼE mole iloʼi anai koa la mo kapau ʼe ke haʼu mo matou?+ Koia ʼe fakakehekeheʼi ai anai ia au mo tau hahaʼi mai te hahaʼi fuli ʼo te kele.”+

17 Pea neʼe tali age e Sehova kia Moisese: “ ʼE au toe fai anai mo te meʼa ʼaia neʼe ke kole mai, koteʼuhi kua au ʼofa ia koe pea kua au iloʼi lelei ia koe.”* 18 Pea neʼe ina ui age: “Fakalelei siʼou loto, fakaha mai tou kololia.” 19 Kae neʼe ina tali age: “ ʼE au tuku anai ke ke sio ki toku kololia* katoa, pea ʼe au tala anai ʼi ʼou muʼa toku huafa ʼae ko Sehova.+ ʼE au ʼofa anai ki ʼae ʼe au loto ke au ʼofa ki ai, pea ʼe au manavaʼofa anai ki ʼae ʼe au loto ke au manavaʼofa ki ai.”+ 20 Pea neʼe ina hoko atu: “ ʼE mole feala ke ke sio ki toku fofoga, koteʼuhi ʼe mole feala ke sio he tagata kia te au pea maʼuli.”

21 Neʼe toe ui e Sehova: “Koʼeni he koga meʼa ʼe ovi mai kia au. Ke ke tuʼu ʼi te fuʼu maka. 22 Ka au fakalaka ʼi toku kololia, ʼe au tuku anai ia koe ki he ava ʼo te fuʼu maka, pea ʼe au puipui anai ia koe ʼaki toku nima ʼo kaku ki taku ʼosi fakalaka. 23 Hili ʼaia, ʼe au toʼo anai toku nima, pea ʼe ke sio anai ki toku tuʼa. Kae ʼe mole feala anai ke ke sio ki toku fofoga.”+

34 Pea neʼe ui e Sehova kia Moisese: “Ke ke fai he ʼu lauʼi maka ʼe lua ohage ko te ʼu ʼuluaki lauʼi maka,+ pea ʼe au tohi anai ʼi ai te ʼu folafola ʼae neʼe tuʼu ʼi te ʼu ʼuluaki lauʼi maka+ ʼae neʼe ke foaʼi.+ 2 Ke ke tokalelei ki apogipogi uhu, he ʼe ke hake anai ki te Moʼuga ʼo Sinai pea ʼe ke tuʼu anai ʼi ʼoku muʼa ʼi te tumutumu ʼo te moʼuga.+ 3 Kae ʼe mole hake anai he tahi mo koe, pea ʼe mole tonu ke ʼasi he tahi ʼi te moʼuga. ʼE mole tonu anai ke taka kai te faga manu ʼo ovi ʼi te moʼuga.”+

4 Neʼe fai ai e Moisese te ʼu lauʼi maka ʼe lua ohage pe ko te ʼu ʼuluaki lauʼi maka. Neʼe ʼala uhuuhu leva ʼo hake ki te Moʼuga ʼo Sinai, ohage pe ko tona fakatotonu age e Sehova, pea neʼe ina toʼo te ʼu lauʼi maka ʼe lua ʼi tona nima. 5 Neʼe hifo leva ia Sehova+ ʼi he ʼao ʼo tuʼu ʼi ʼona tafa, pea neʼe ina tala tona huafa ʼae ko Sehova.+ 6 Neʼe fakalaka ia Sehova ʼi ʼona muʼa pea mo tala age: “Sehova, Sehova, ʼAtua manavaʼofa,*+ tuai ʼi te ita+ pea mo fonu ʼi te ʼofa agatonu+ mo te moʼoni,*+ 7 ʼe ina fakaha tona ʼofa agatonu ki te toko lauʼi afe,+ pea mo fakamolemole te hala mo te talagataʼa pea mo te agahala.+ ʼE mole ina tuku anai ke hao mai te tautea ia ia ʼae neʼe lakahala,+ kae ʼe ina tauteaʼi te ʼu foha mo te ʼu mokopuna ʼuhi ko te hala ʼo ʼanatou tamai pea ʼe ina toe tauteaʼi mo te tolu taʼiake mo te fa taʼiake.”+

8 Neʼe punou atu aipe ia Moisese pea mo tulolo ki te kele. 9 Pea neʼe ina ui: “Sehova e, kapau ʼe ke ʼofa ia au, fakalelei siʼou loto, ke ke haʼu mo matou Sehova,+ logo la ko matou ko he hahaʼi uigataʼa,*+ pea ke fakamolemole tamatou hala mo tamatou agahala,+ pea ke tali matou ohage ko hau hahaʼi.” 10 Pea neʼe tali e Sehova: “Koʼeni ʼe au fai anai he fuakava: ʼE au fai anai ia muʼa ʼo tau hahaʼi fuli he ʼu meʼa fakaofoofo neʼe heʼeki fai ʼi muʼa atu ʼi te kele peʼe ʼi te ʼatu puleʼaga.+ Pea ʼe sisio anai te hahaʼi fuli ʼae ʼi ʼokotou tafaʼaki ki taku gaue, he ʼe au fai anai he meʼa fakamanavahe kia koutou.+

11 “Fakalogo lelei ki te ʼu meʼa ʼae ʼe au fakatotonu atu ʼi te ʼaho nei.+ ʼE au kapu anai ʼi ʼou muʼa te kau Amole, mo te kau Kanaane, mo te kau Heti, mo te kau Pelesite, mo te kau Hevi pea mo te kau Sepusi.+ 12 Tokaga naʼa ke fai he fuakava mo te hahaʼi ʼo te fenua ʼae ʼe ke alu anai ki ai,+ he ʼe liliu anai ko he hele kia koe.+ 13 ʼE ke maumauʼi anai ʼonatou ʼaletale, mo laliki ʼonatou pou maka taputapu pea ʼe ke taʼaga anai ʼonatou pou ʼakau taputapu.*+ 14 ʼE mole tonu anai ke ke tulolo ki he tahi age ʼatua,+ he ʼe ko Sehova ʼe ko he tahi* ʼe ina fakamaʼua ke pipiki ʼateaina pe kia te ia. ʼEi, ko he ʼAtua ʼe ina fakamaʼua ke pipiki ʼateaina pe kia te ia.+ 15 Tokaga naʼa ke fai he fuakava mo te hahaʼi ʼo te fenua, koteʼuhi ka natou tauhi ki* ʼonatou ʼatua mo fai ni sakilifisio kia natou,+ ʼe haʼu anai he tahi ʼo fakaafe koe pea ʼe ke kai anai ki tana sakilifisio.+ 16 Pea ʼe ke toʼo moʼoni anai ʼihi ʼo ʼonatou ʼofafine ke ʼohoana mo ʼou foha.+ ʼE tauhi anai ʼonatou ʼofafine ki* ʼonatou ʼatua pea ʼe natou uga anai ʼou foha ke natou tauhi ki* ʼonatou ʼatua.+

17 “ ʼE mole tonu anai ke ke fai he ʼu fakatata ukamea.+

18 “ ʼE ke fai anai te ʼAho Lahi ʼo Te ʼu Pane Hala Fakatupu.+ ʼE ke kai anai he ʼu pane hala fakatupu, ohage pe ko taku fakatotonu atu. ʼE ke fai anai te faʼahi ʼaia lolotoga ʼaho ʼe fitu, ʼi te temi ʼae kua ʼosi fakatuʼutuʼu ki ai, ʼi te mahina ʼo Apipi,*+ koteʼuhi neʼe ke mavae mai Esipito ʼi te mahina ʼaia.

19 “Ko te ʼu ʼuluaki foha fuli ʼe ʼaʼaku,+ ʼo feia mo te ʼu ʼuluaki ʼuhi tagata ʼo tau faga manu, pe ʼe ko he vitulo peʼe ko he ovi.+ 20 ʼE tonu anai ke ke totogi te ʼuluaki ʼuhi ʼo he asino ʼaki he ovi ʼe tahi. Kae kapau ʼe mole ke totogi, ʼe tonu anai ke ke fasiʼi te kia ʼo te asino. ʼE tonu anai ke ke totogi ʼou ʼuluaki foha.+ ʼE mole tuʼu anai he tahi ʼi ʼoku muʼa mo ʼona nima ʼatea.

21 “ ʼE ke gaue anai lolotoga ʼaho ʼe ono, kae ʼi te fitu ʼaho ʼe ke malolo anai.*+ ʼE ke malolo anai tatau aipe pe ko te temi ʼae ʼe tonu ke fuli ai te kele peʼe ke tanaki ai te taʼukai.

22 “Pea ʼe ke fai anai te ʼAho Lahi ʼo Te ʼu Vahaʼa pea ʼe ke momoli ai anai te ʼu ʼuluaki fua ʼae kua matutuʼa ʼo te fulumeto, pea ʼi te fakaʼosi ʼo te taʼu, ʼe ke fai anai te ʼAho Lahi ʼo Te Tanaki.*+

23 “ ʼE olo anai te ʼu tagata fuli kia muʼa ʼo Sehova, te ʼAliki moʼoni, te ʼAtua ʼo Iselaele, tuʼa tolu ʼi te taʼu.+ 24 Koteʼuhi ʼe au kapu anai te ʼu puleʼaga ʼi ʼou muʼa,+ pea ʼe au fakalahi anai tou fenua. ʼE mole fia fai anai he tahi ki tou fenua ʼi te temi ʼae ʼe ke hake ai anai ʼo tuʼu ia muʼa ʼo Sehova tou ʼAtua, tuʼa tolu ʼi te taʼu.

25 “ ʼE mole tonu ke ke momoli fakatahi te toto ʼo taku sakilifisio mo he meʼa neʼe fai ʼaki te meʼa fakatupu.+ Pea ʼe mole tuku anai ke kaku ki apogipogi uhu te sakilifisio ʼo te ʼaho lahi ʼo te Pasikate.+

26 “ ʼE ke ʼaumai anai ki te fale ʼo Sehova tou ʼAtua te ʼu ʼuluaki fua ʼae ʼe lelei tukupau ʼo tou kele pea kua matutuʼa.+

“ ʼE mole tonu ke ke fakamoho te ʼuhiʼi tao ʼi te huʼa pipi ʼo tana faʼe.”+

27 Pea neʼe toe ui e Sehova kia Moisese: “ ʼE ke tohi anai te ʼu folafola ʼaia,+ he ʼe au fai he fuakava mo koe pea mo Iselaele ʼo mulimuli ki te ʼu folafola ʼaia.”+ 28 Pea neʼe nofo ai mo Sehova ia ʼaho ʼe 40 mo po ʼe 40. Neʼe mole kai hana moʼi pane mo inu hana moʼi vai.+ Pea neʼe Ina tohi ʼi te ʼu lauʼi maka te ʼu folafola ʼo te fuakava, ia te ʼu Folafola ʼae ʼe Hogofulu.+

29 Neʼe hifo mai leva ia Moisese mai te Moʼuga ʼo Sinai mo te ʼu lauʼi maka ʼe lua ʼo te Fakamoʼoni ʼi tona nima.+ ʼI te hifo mai ʼa Moisese mai te moʼuga, neʼe mole ina iloʼi neʼe gigila tona fofoga ʼuhi ko tana palalau mo te ʼAtua. 30 ʼI te sio ʼa Alone mo te kau Iselaele fuli kia Moisese, neʼe natou tokagaʼi te gigila ʼo tona fofoga pea neʼe natou matataku ʼi te fakaovi age kia ia.+

31 Kae neʼe pauʼi leva natou e Moisese. Neʼe olo ai ia Alone mo te kau takitaki fuli ʼo te kau Iselaele kia ia, pea neʼe palalau age ia Moisese kia natou. 32 Hili ʼaia, neʼe fakaovi age te kau Iselaele fuli kia ia pea neʼe ina fakaha kia natou te ʼu fakatotonu fuli ʼae neʼe foaki age e Sehova kia ia ʼi te Moʼuga ʼo Sinai.+ 33 ʼI te ʼosi palalau ʼa Moisese mo natou, neʼe ina ʼuʼufi tona fofoga ʼaki he kie.+ 34 Kae ʼi te temi ʼae neʼe hu ai ia Moisese ʼo tuʼu ia muʼa ʼo Sehova pea mo palalau mo ia, neʼe ina toʼo te kie ʼo kaku ki tana mavae.+ Neʼe alu ai leva ʼo fakaha ki te kau Iselaele te ʼu meʼa ʼae neʼe fakatotonu age e te ʼAtua.+ 35 Pea neʼe sisio te kau Iselaele ki te gigila ʼo te fofoga ʼo Moisese. Neʼe ʼuʼufi ai leva e Moisese tona fofoga ʼo kaku ki tana toe hu ʼo palalau mo te ʼAtua.*+

35 Ki muli age, neʼe fakatahiʼi e Moisese te kau Iselaele katoa, pea neʼe ina ui age kia natou: “Koʼeni te ʼu meʼa ʼae neʼe fakatotonu mai e Sehova ke fai:+ 2 ʼE feala anai ke kotou gaue lolotoga ʼaho ʼe ono, kae ʼe liliu anai te fitu ʼaho ko he ʼaho taputapu kia koutou, ʼe ko he sapato, ko he ʼaho maʼa Sehova ke kotou malolo ai.+ Ko he tahi pe ʼe ina fai he gaue ʼi te ʼaho ʼaia, ʼe tonu anai ke matehi.+ 3 ʼI te ʼaho ʼo te Sapato, ʼe mole kotou tafu ai anai he afi ʼi ʼokotou nofoʼaga.”

4 Pea neʼe toe ui e Moisese ki te kau Iselaele katoa: “Koʼeni te fakatotonu ʼa Sehova: 5 ‘Kotou toʼo ʼi te ʼu koloa ʼae ʼe kotou maʼu he meʼa ʼofa maʼa Sehova.+ Ke ʼaumai e natou fuli ʼae ʼe lotolelei ki ai+ he meʼa ʼofa maʼa Sehova: ko te aulo, mo te siliva, mo te kapa, 6 mo te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula, mo te lino lelei, mo te fuluʼi tao,+ 7 mo te kiliʼi ovi* ʼe lanu kula, mo te kiliʼi foke,* mo te ʼakau ʼae ko te akasia, 8 mo te lolo ki te ʼu malama, mo te lolo magoni ʼae moʼo fai ʼaki te lolo taputapu mo te iseso magoni,+ 9 mo te ʼu maka ʼae ko te onise, pea mo te tahi ʼu maka ke fakapipiki ki te efote+ mo te peketolale.*+

10 “ ‘Ke ʼomai ia natou fuli ʼae ʼe poto gaue+ ʼo fai te ʼu meʼa fuli ʼae neʼe fakatotonu e Sehova: 11 te tapenakulo mo te ʼu foʼi kie lalahi ʼae ʼe ʼuʼufi ʼaki, mo ʼana meʼa fakamaʼu pea mo ʼona kaumatapa ʼe tapa fa, mo ʼona ʼakau fakalavalava, mo ʼona pou, pea mo ʼonatou tuʼuʼaga, 12 mo te Aleka+ pea mo ʼona ʼakau ʼamo,+ mo te tapunu,+ pea mo te lito+ ʼae ʼe tautau ʼi te muʼa Aleka, 13 mo te laupapa,+ mo ʼona ʼakau ʼamo pea mo ʼana meʼa kehekehe fuli pea mo te pane ʼae ʼe molagaʼi,+ 14 mo te tuʼulaga malama+ mo ʼana meʼa kehekehe, pea mo ʼona malama mo te lolo,+ 15 mo te ʼaletale ʼo te iseso+ pea mo ʼona ʼakau ʼamo, mo te lolo taputapu pea mo te iseso magoni,+ mo te lito ki te huʼaga ʼo te tapenakulo, 16 mo te ʼaletale ʼo te ʼu holokoseta+ pea mo te ukamea vagavaga kapa, mo ʼona ʼakau ʼamo pea mo ʼana meʼa kehekehe fuli, mo te foʼi topu kapa mo tona tuʼuʼaga,+ 17 mo te ʼu kie ʼae ʼe ʼa takai ʼaki te malaʼe,+ mo ʼona pou pea mo ʼonatou tuʼuʼaga, mo te lito ʼo te huʼaga ʼo te malaʼe, 18 mo te ʼu faʼo ʼo te tapenakulo mo te ʼu faʼo ʼo te malaʼe pea mo ʼonatou maea,+ 19 mo te ʼu teu matalelei ʼae neʼe lalaga+ ki te gaue ʼo te sagatualio, mo te ʼu teu taputapu ʼo Alone+ te pelepitelo, mo te ʼu teu ʼo ʼona foha ki tanatou gaue fakapelepitelo.’ ”

20 Neʼe mavae ai leva te kau Iselaele katoa mai ia muʼa ʼo Moisese. 21 Pea ko natou fuli ʼae neʼe lotolelei+ pea mo maʼu he faʼahiga manatu ʼe lelei, neʼe natou ʼaumai ʼanatou meʼa ʼofa kia Sehova ke fakaʼaogaʼi maʼa te fale la ʼo te fono, mo te ʼu gaue ʼae ka fai ai, pea mo fai ʼaki te ʼu teu taputapu. 22 Neʼe haga ʼomai pe te hahaʼi tagata mo fafine, ʼae neʼe lotolelei, ʼo ʼaumai he ʼu foʼi pine, mo he ʼu hau, mo he ʼu mama pea mo te tahi age ʼu meʼa fakateuteu, ʼo feia mo te ʼu faʼahiga meʼa aulo fuli. Neʼe natou momoli fuli ʼanatou meʼa ʼofa aulo kia* Sehova.+ 23 Pea ko natou fuli ʼae neʼe natou maʼu te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula, mo te lino lelei, mo te fuluʼi tao, mo te kiliʼi ovi* ʼe lanu kula pea mo te kiliʼi foke,* neʼe natou ʼaumai. 24 Ko natou fuli ʼae neʼe natou fia foaki he siliva peʼe ko he kapa, neʼe natou ʼaumai ohage ko he meʼa ʼofa kia Sehova. Pea ko natou fuli ʼae neʼe natou maʼu te ʼakau ʼae ko te akasia, neʼe natou ʼaumai ke fai ʼaki te ʼu faʼahiga gaue kehekehe.

25 Ko te ʼu fafine fuli ʼae neʼe popoto+ ʼi te faifilo, neʼe natou ʼaumai te ʼu meʼa ʼae neʼe natou fai: ko te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula, mo te lino lelei. 26 Ko te ʼu fafine fuli ʼae neʼe popoto ʼi te faifilo pea mo lotolelei, neʼe natou fai he ʼu filo ʼaki te fuluʼi tao.

27 Pea neʼe ʼaumai e te kau takitaki te ʼu maka ʼae ko te onise mo te tahi ʼu maka ke fakapipiki ki te efote mo te peketolale,+ 28 mo te lolo ʼae neʼe fai ʼaki te ʼu ʼakau fakamagoni mo te lolo oliveto ʼae neʼe fakaʼaogaʼi ki te ʼu malama, pea neʼe fai ʼaki te lolo taputapu+ mo te iseso magoni.+ 29 Ko te ʼu tagata mo fafine fuli ʼae neʼe lotolelei, neʼe natou ʼaumai hanatou meʼa ki te gaue ʼae neʼe fakatotonu e Sehova ke fai ʼaki ia Moisese. Neʼe foaki e te kau Iselaele ʼaki he lotolelei te ʼu meʼa ʼofa ʼaia kia Sehova.+

30 Neʼe ui leva e Moisese ki te kau Iselaele: “Koʼeni, kua filifili e Sehova ia Petesalele, te foha ʼo Uli, te foha ʼo Ulu mai te telepi ʼo Suta.+ 31 Neʼe foaki e te ʼAtua kia ia tona laumalie, ke ina maʼu ai te poto, mo te ʼatamai pea mo te mahino ʼi te fai ʼo te ʼu faʼahiga gaue kehekehe fuli, 32 ke ina fai he ʼu fakatuʼutuʼu, mo gaueʼi te aulo, mo te siliva pea mo te kapa, 33 mo togi pea mo fakapipiki he ʼu maka maʼuhiga, pea mo fai he ʼu meʼa fakateuteu kehekehe ʼaki te ʼakau. 34 Neʼe foaki age e te ʼAtua kia ia mo Oholiape,+ te foha ʼo Ahisamake mai te telepi ʼo Tane te poto ʼae ke nā akoʼi niʼihi. 35 Neʼe ina foaki age kia naua te poto+ ʼae ʼi te fai ʼo he ʼu faʼahiga gaue kehekehe, ʼo feia mo te tui fakailoga, mo te tui ʼaki te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula, mo te lino lelei, pea mo te lalaga. ʼE fai anai e te ʼu tagata ʼaia he ʼu faʼahiga gaue kehekehe pea mo ni fakatuʼutuʼu kehekehe.

36 “ ʼE gaue fakatahi anai ia Petesalele mo Oholiape pea mo te ʼu tagata faiva fuli ʼae neʼe foaki age ki ai e Sehova te poto mo te ʼatamai, ke natou iloʼi te fai ʼo te ʼu gaue fuli ʼo te koga meʼa taputapu, ʼo mulimuli pe ki te ʼu meʼa ʼae neʼe fakatotonu e Sehova.”+

2 Neʼe pauʼi leva e Moisese ia Petesalele mo Oholiape pea mo te ʼu tagata faiva fuli ʼae neʼe foaki age ki ai e Sehova te poto,+ ia natou fuli ʼae neʼe lotolelei ke natou fai te gaue.+ 3 Pea neʼe natou toʼo te ʼu meʼa ʼofa fuli+ ʼae neʼe ʼaumai e te kau Iselaele kia Moisese ki te fai ʼo te ʼu gaue ʼo te koga meʼa taputapu. Kae neʼe hoko atu pe tanatou ʼaumai he ʼu meʼa ʼofa kia ia, ʼi te uhu fuli.

4 ʼI tanatou kua ʼosi kamata te gaue taputapu, neʼe fakahoahoa takitahi te kau tagata gaue faiva fuli 5 ʼo ui kia Moisese: “Ko te ʼu meʼa ʼae ʼe ʼaumai e te hahaʼi kua fakalaka age ia ʼi te ʼu meʼa ʼae ʼe ʼaoga ki te gaue ʼae neʼe fakatotonu mai e Sehova ke fai.” 6 Koia, neʼe fakatotonu ai e Moisese ke tala ʼi te nofoʼaga katoa: “Hahaʼi ʼo Iselaele, ʼaua naʼa kotou toe ʼaumai he ʼu meʼa ʼofa maʼa te fale la taputapu.” Neʼe taʼofi ai te toe ʼaumai e te hahaʼi he tahi ʼu meʼa. 7 Neʼe kua feʼauga te ʼu meʼa ʼofa ki te ʼu gaue fuli ʼae ka fai, ʼo laka age ia.

8 Neʼe fai ai leva e te kau gaue faiva fuli+ ia te tapenakulo+ ʼaki te ʼu kie ʼe hogofulu ʼae neʼe fai ʼaki te filo lino lelei, mo te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno pea mo te filo kula. Neʼe ina* tui fakailoga ki ai he ʼu kelupimi.+ 9 Neʼe fasiga nima* 28 te loa ʼo he kie ʼe tahi pea mo fasiga nima 4 tona laulahi. Neʼe tatau te ʼu fuafua ʼo te ʼu kie fuli. 10 Neʼe ina fakapipiki fakatahi leva te ʼu kie ʼe nima ke liliu ko he foʼi kie lahi ʼe tahi pea neʼe ina toe fakapipiki fakatahi te tahi ʼu kie ʼe nima ke liliu ko he foʼi kie lahi ʼe tahi. 11 Neʼe ina fai ʼi te tapa ʼo te ʼu foʼi kie lalahi ʼaia ʼe lua he ʼu mama filo ʼuʼui, ʼi te faʼahi ʼae neʼe fakapipiki ai te ʼu foʼi kie ʼaia ʼe lua. 12 Neʼe ina tui te ʼu mama ʼe 50 ʼi te tahi foʼi kie pea mo te ʼu mama ʼe 50 ʼi te tapa ʼo te tahi age foʼi kie, ke fehagaʼaki ai te ʼu mama ʼaia ʼi te faʼahi ʼae neʼe fakapipiki ai te ʼu foʼi kie lalahi. 13 Pea neʼe ina fai leva he ʼu fakamaʼu aulo ʼe 50 pea neʼe ina fakapipiki fakatahi te ʼu foʼi kie lalahi ʼaia ʼe lua ʼaki te ʼu fakamaʼu ʼaia. Pea neʼe liliu te tapenakulo ko he meʼa ʼe tahi.

14 Pea neʼe ina fai he ʼu kie ʼaki te fuluʼi tao moʼo ʼuʼufi ʼaki te tapenakulo. Neʼe ina fai he ʼu kie ʼe 11.+ 15 Neʼe fasiga nima 30 te loa ʼo he kie ʼe tahi pea mo fasiga nima 4 tona laulahi. Neʼe tatau te ʼu fuafua ʼo te ʼu kie ʼaia ʼe 11. 16 Neʼe ina fakapipiki fakatahi leva te ʼu kie ʼe nima ke liliu ko he foʼi kie lahi ʼe tahi pea neʼe ina toe fakapipiki fakatahi te tahi ʼu kie ʼe ono ke liliu ko he foʼi kie lahi ʼe tahi. 17 Hili ʼaia, neʼe ina fai te ʼu mama ʼe 50 ʼi te tapa ʼo te ʼu foʼi kie lalahi ʼaia ʼe lua, ʼi te faʼahi ʼae neʼe fakapipiki fakatahi ai te ʼu foʼi kie ʼaia ʼe lua. 18 Pea neʼe ina fai te ʼu fakamaʼu kapa ʼe 50 ke fakapipiki fakatahi te ʼu foʼi kie lalahi ʼaia ʼe lua, pea neʼe liliu ko he meʼa ʼe tahi.

19 Pea neʼe ina fai he foʼi kie lahi ʼaki te kiliʼi ovi* ʼe lanu kula moʼo ʼuʼufi ʼaki te fale la, pea neʼe ina hili ki ai he tahi age foʼi kie lahi neʼe fai ʼaki te kiliʼi foke.*+

20 Neʼe ina fai leva he ʼu kaumatapa ʼe tapa fa ʼo te tapenakulo ʼaki te ʼakau ʼae ko te akasia,+ pea neʼe fakatuʼu tonu.+ 21 Neʼe fasiga nima hogofulu te maʼoluga ʼo he kaumatapa pea mo fasiga nima tahi vaelua tona laulahi. 22 Neʼe ʼi ai he ʼu fakanifo* ʼe lua neʼe vaha tatau ʼi te ʼu kaumatapa takitahi. Neʼe ina fai feia ki te ʼu kaumatapa fuli ʼo te tapenakulo. 23 Neʼe ina fai ai he ʼu kaumatapa ki te faʼahi ʼo te tapenakulo, ʼae ʼe haga ki te potu saute, neʼe ko kaumatapa ʼe 20. 24 Pea neʼe ina fai he ʼu tuʼuʼaga siliva ʼe 40 ʼo te ʼu kaumatapa ʼe 20. Neʼe takitahi te kaumatapa mo ʼona fakanifo ʼe lua pea neʼe fakaulu ke to tonu mo te ʼu tuʼuʼaga siliva ʼe lua. Neʼe ina fai feia ki te ʼu kaumatapa fuli.+ 25 Neʼe ina fai he ʼu kaumatapa ʼe 20 ki te faʼahi ʼo te tapenakulo, ʼae ʼe haga ki te potu noleto 26 pea mo ʼonatou tuʼuʼaga siliva ʼe 40: neʼe ko tuʼuʼaga ʼe lua ʼo te ʼuluaki kaumatapa pea toe takitahi te ʼu kaumatapa fuli ʼae ʼe hoa mai mo ʼona tuʼuʼaga ʼe lua.

27 Neʼe ina fai he ʼu kaumatapa ʼe ono ki te faʼahi ʼae ʼi muli ʼo te tapenakulo, ʼi te potu uesite.+ 28 Neʼe ina fai he ʼu kaumatapa ʼe lua ke liliu ko he ʼu pou tuliki ʼe lua ʼo te tapenakulo, ʼi muli. 29 Neʼe fakapipiki taki lua te ʼu pou mai lalo ki ʼoluga, ʼo kaku ki te ʼuluaki mama. Neʼe ina fai feia ki te ʼu pou tuliki ʼae ʼe lua. 30 Koia, neʼe ko kaumatapa ʼe valu pea mo ʼonatou tuʼuʼaga siliva ʼe 16, neʼe takitahi te kaumatapa mo ʼona tuʼuʼaga ʼe lua.

31 Pea neʼe ina fai he ʼu ʼakau fakalavalava ʼaki te ʼakau ʼae ko te akasia, ko ʼakau fakalavalava ʼe nima ki te ʼu kaumatapa ʼo te tahi faʼahi ʼo te tapenakulo+ 32 mo ʼakau fakalavalava ʼe nima ki te ʼu kaumatapa ʼo te tahi age faʼahi ʼo te tapenakulo, pea mo ʼakau fakalavalava ʼe nima ki te ʼu kaumatapa ʼae ʼi muli, ʼi te faʼahi uesite ʼo te tapenakulo. 33 Neʼe ina fai te ʼakau fakalava ʼae ʼi lotomalie ʼo te ʼu kaumatapa, ʼae neʼe fakaulu ki te ʼu mama mai te tahi muliʼi meʼa ki te tahi age muliʼi meʼa. 34 Neʼe ina ʼaofi te ʼu kaumatapa ʼaki te aulo. ʼI te ʼu kaumatapa ʼaia, neʼe ina fai ai te ʼu mama aulo ʼae neʼe fakaulu ki ai te ʼu ʼakau fakalavalava. Pea neʼe ina ʼaofi te ʼu ʼakau fakalavalava ʼaki te aulo.+

35 Pea neʼe ina fai he lito+ ʼaki te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula, pea mo te filo lino lelei. Neʼe ina tui fakailoga ki ai+ he ʼu kelupimi.+ 36 Pea neʼe ina fai he ʼu faʼo aulo mo he ʼu pou ʼe fa ke tau ki ai te lito. Neʼe fai te ʼu pou ʼaia ʼaki te ʼakau ʼae ko te akasia pea neʼe ina ʼaofi ʼaki te aulo. Pea neʼe ina haka leva te siliva moʼo fai ʼaki he ʼu tuʼuʼaga ʼe fa ʼo te ʼu pou ʼaia. 37 Hili ʼaia, neʼe ina lalaga fakatahi te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula, pea mo te filo lino lelei moʼo fai ʼaki te lito ki te huʼaga ʼo te fale la.+ 38 Pea neʼe ina fai mo ʼona pou ʼe nima mo ʼonatou faʼo. Neʼe ina ʼaofi ʼaki te aulo te ʼu ʼuluʼi pou ʼo feia mo ʼonatou meʼa fakamaʼu,* kae neʼe ina fai te ʼu tuʼuʼaga ʼe nima ʼo te ʼu pou ʼaia ʼaki te kapa.

37 Neʼe fai leva e Petesalele+ te Aleka+ ʼaki te ʼakau ʼae ko te akasia. Neʼe fasiga nima* lua vaelua tona loa, mo fasiga nima tahi vaelua tona laulahi pea mo fasiga nima tahi vaelua tona maʼoluga.+ 2 Neʼe ina ʼaofi ʼaki te aulo maʼa, ʼi tuʼa mo loto, pea neʼe ina fai he tapatapa aulo ʼi te takafoli.+ 3 Hili ʼaia, neʼe ina haka te aulo moʼo fai ʼaki he ʼu mama ʼe fa, ke fakapipiki ʼi ʼoluga ʼo te ʼu foʼi vaʼe ʼe fa ʼo te aleka: ko mama ʼe lua ʼi te tahi faʼahi pea mo mama ʼe lua ʼi te tahi faʼahi. 4 Neʼe ina fai leva te ʼu ʼakau ʼamo ʼaki te ʼakau ʼae ko te akasia pea neʼe ina ʼaofi ʼaki te aulo.+ 5 Neʼe ina fakaulu leva te ʼu ʼakau ʼamo ʼi te ʼu mama ʼae ʼi te ʼu tafaʼaki ʼo te Aleka ke fata ʼaki te Aleka.+

6 Neʼe ina fai te tapunu ʼaki te aulo maʼa.+ Neʼe fasiga nima lua vaelua tona loa pea mo fasiga nima tahi vaelua tona laulahi.+ 7 Neʼe ina fai te ʼu kelupimi ʼe lua+ ʼi te ʼu muliʼi meʼa ʼo te tapunu ʼaki te aulo ʼae neʼe tuki.+ 8 Neʼe tuʼu te tahi kelupimi ʼi te tahi muliʼi meʼa, pea ko te tahi kelupimi ʼi te tahi muliʼi meʼa. Neʼe ina fai te ʼu kelupimi ʼaia ʼi te ʼu muliʼi meʼa ʼo te tapunu. 9 Neʼe folahi e te ʼu kelupimi ʼonā pakakau ki ʼoluga, ʼo malumalu ai te tapunu.+ Neʼe nā fehagaʼaki, pea neʼe haga ʼonā fofoga ki te tapunu.+

10 Neʼe ina fai leva te laupapa ʼaki te ʼakau ʼae ko te akasia.+ Neʼe fasiga nima lua tona loa, mo fasiga nima tahi tona laulahi pea mo fasiga nima tahi vaelua tona maʼoluga.+ 11 Neʼe ina ʼaofi te laupapa ʼaki te aulo maʼa pea neʼe ina teuteuʼi te takafoli ʼaki te aulo. 12 Hili ʼaia, neʼe ina fai he tapatapa ʼi te takafoli ʼo te laupapa, neʼe ʼalofi nima tahi* tona laulahi pea neʼe ina toe teuteuʼi te lalo tapatapa ʼaia ʼaki te aulo. 13 Pea neʼe ina haka te aulo moʼo fai ʼaki he ʼu mama ʼe fa pea neʼe ina fakapipiki te ʼu mama ʼaia ki te ʼu muliʼi laupapa, ʼae neʼe tuʼu ai te ʼu foʼi vaʼe ʼe fa. 14 Neʼe ovi te ʼu mama ki te tapatapa ke fakaulu ai te ʼu ʼakau ʼamo ke fata ʼaki te laupapa. 15 Neʼe ina fai te ʼu ʼakau ʼamo ʼaki te ʼakau ʼae ko te akasia ke fata ʼaki te laupapa pea neʼe ina ʼaofi ʼaki te aulo. 16 Hili ʼaia, neʼe ina fai te ʼu meʼa kehekehe ʼae ka hili ʼi te laupapa ʼaki te aulo maʼa: he ʼu pa, mo he ʼu ipu, mo he ʼu pa loloto pea mo he ʼu ʼaiʼaga vai ʼae ʼe liligi ʼaki te ʼu molaga vino.+

17 Neʼe ina fai leva te tuʼulaga malama+ ʼaki te aulo maʼa. Neʼe ina tuki te aulo moʼo fai ʼaki te tuʼulaga malama. Neʼe ina faʼu ʼaki he potu aulo ʼe tahi te tafito, mo te sinoʼi malama, mo te ʼu matalaʼi ʼakau, mo te ʼu moto pea mo te ʼu fisiʼi teu.+ 18 Neʼe haʼu mai te sinoʼi malama te ʼu maga ʼe ono, ko maga ʼe tolu ʼi te tahi faʼahi pea mo maga ʼe tolu ʼi te tahi age faʼahi. 19 ʼI te ʼu maga takitahi ʼo te tahi faʼahi neʼe ʼi ai he ʼu matalaʼi ʼakau ʼe tolu neʼe hage tonatou agaaga ko te ʼu fisiʼi teu amatie, pea neʼe fakavaha ʼaki te ʼu moto mo te ʼu fisiʼi teu. Neʼe toe feia pe ki te ʼu maga ʼo te tahi age faʼahi. Neʼe fai feia te ʼu maga ʼe ono ʼae neʼe haʼu mai te sinoʼi malama. 20 Pea ʼi te sinoʼi malama, neʼe ʼi ai te ʼu matalaʼi ʼakau ʼe fa neʼe hage tonatou agaaga ko te ʼu fisiʼi teu amatie, pea neʼe fakavaha ʼaki te ʼu moto mo te ʼu fisiʼi teu. 21 Neʼe ʼi ai he moto ʼe tahi ʼi lalo ʼo te ʼu ʼuluaki maga ʼe lua ʼae neʼe haʼu mai te sinoʼi malama, pea mo he moto ʼe tahi ʼi lalo ʼo te ʼu maga ʼe lua ʼae neʼe hoa mai ki ai, pea mo he moto ʼe tahi ʼi lalo ʼo te ʼu maga fakaʼosi ʼe lua. Neʼe feia tona fai ʼi te ʼu maga ʼe ono ʼae neʼe haʼu mai te sinoʼi malama. 22 Neʼe fai ia te ʼu moto, mo te ʼu maga pea mo te tuʼulaga malama katoa ʼaki he potu aulo maʼa ʼe tahi neʼe tuki. 23 Pea neʼe ina fai te ʼu malama ʼe fitu+ ʼo te tuʼulaga malama, mo ʼana pipi* pea mo ʼana ʼaiʼaga afi ʼaki te aulo maʼa. 24 Neʼe ina fai te tuʼulaga malama ʼaia ʼo feia mo ʼana meʼa kehekehe fuli ʼaki he taleta* aulo maʼa ʼe tahi.

25 Pea neʼe ina fai te ʼaletale ʼo te iseso+ ʼaki te ʼakau ʼae ko te akasia. Neʼe tapa fa tatau: neʼe fasiga nima tahi tona loa, mo fasiga nima tahi tona laulahi, pea mo fasiga nima lua tona maʼoluga. Ko ʼona tala neʼe ko he koga ʼo te ʼaletale.+ 26 Neʼe ina ʼaofi ʼaki te aulo maʼa ia ʼoluga, mo ʼona tafaʼaki fuli, pea mo ʼona tala. Neʼe ina fai he tapatapa aulo ʼi te takafoli. 27 Neʼe ina fai he ʼu mama aulo ʼe lua ʼi lalo ifo ʼo te tapatapa ʼaia, ʼi te ʼu faʼahi lua, ke fakaulu ai te ʼu ʼakau ʼamo ke fata ʼaki te ʼaletale. 28 Hili ʼaia neʼe ina fai leva te ʼu ʼakau ʼamo ʼaki te ʼakau ʼae ko te akasia pea neʼe ina ʼaofi ʼaki te aulo. 29 Neʼe ina toe fai foki te lolo taputapu+ ʼae ʼe fakaʼaogaʼi moʼo fakanofo he tahi pea mo te iseso maʼa mo magoni,+ ohage ko te fai e te tagata fai lolo magoni ʼana lolo.

38 Neʼe ina fai te ʼaletale ʼo te ʼu holokoseta ʼaki te ʼakau ʼae ko te akasia. Neʼe tapa fa tatau: neʼe fasiga nima* nima tona loa pea mo fasiga nima nima tona laulahi. Pea neʼe fasiga nima tolu tona maʼoluga.+ 2 Neʼe ina fai leva he tala ʼe tahi ʼi te ʼu muliʼi meʼa takitahi ʼae ʼe fa ʼo te ʼaletale. Ko te ʼu tala ʼaia neʼe ko he koga ʼo te ʼaletale. Hili ʼaia, neʼe ina ʼaofi te ʼaletale ʼaki te kapa.+ 3 Pea neʼe ina fai leva te ʼu meʼa kehekehe fuli ʼo te ʼaletale, ia te ʼu pakete, mo te ʼu huo takele, mo te ʼu ipu lalahi, mo te ʼu huki, pea mo te ʼu ʼaiʼaga afi. Neʼe ina fai te ʼu meʼa kehekehe fuli ʼaia ʼaki te kapa. 4 Neʼe ina toe fai foki he ukamea vagavaga ʼo te ʼaletale ʼaki te kapa, pea neʼe ina tuku ʼi lalo ifo ʼo te tapatapa ʼo te ʼaletale, ʼi te lotomalie ʼo te ʼaletale. 5 Neʼe ina fai he ʼu mama ʼe fa pea neʼe ina fakapipiki ki te ʼu muliʼi meʼa ʼae ʼe fa ʼo te ʼaletale, ʼo ovi ki te ukamea vagavaga kapa, ke fakaulu ki ai te ʼu ʼakau ʼamo. 6 Hili ʼaia, neʼe ina fai te ʼu ʼakau ʼamo ʼaki te ʼakau ʼae ko te akasia pea neʼe ina ʼaofi ʼaki te kapa. 7 Neʼe ina fakaulu te ʼu ʼakau ʼamo ki te ʼu mama ʼi te ʼu faʼahi ʼo te ʼaletale ke fata ʼaki. Neʼe ina fai te ʼaletale ohage ko he foʼi kesi ʼe fai ʼaki ni papa.

8 Neʼe ina fai leva te foʼi topu kapa+ mo tona tuʼuʼaga kapa ʼaki te ʼu sioʼata* neʼe fai ʼaki te kapa. Neʼe ko te ʼu sioʼata ʼaia ʼa te hahaʼi fafine ʼae neʼe gaue ʼi te huʼaga ʼo te fale la ʼo te fono, ʼo mulimuli ki he ʼu fakatuʼutuʼu neʼe fai.

9 Neʼe ina fai leva te malaʼe.+ ʼI te faʼahi saute ʼo te malaʼe, neʼe ina tau ai ni kie neʼe fai ʼaki te filo lino lelei, ia fasiga nima ʼe 100.+ 10 Neʼe ʼi ai he ʼu pou ʼe 20 pea mo he ʼu tuʼuʼaga kapa ʼe 20. Ko te ʼu faʼo ʼo te ʼu pou mo ʼanatou meʼa fakamaʼu* neʼe fai ʼaki te siliva. 11 Pea ʼi te faʼahi noleto, neʼe tau ai ni kie ia fasiga nima ʼe 100. Ko ʼonatou pou mo ʼonatou tuʼuʼaga neʼe fai ʼaki te kapa. Ko te ʼu faʼo ʼo te ʼu pou mo ʼanatou meʼa fakamaʼu* neʼe fai ʼaki te siliva. 12 Kae ʼi te faʼahi uesite, neʼe tau ai ni kie ia fasiga nima ʼe 50. Neʼe ʼi ai he ʼu pou ʼe hogofulu mo he ʼu tuʼuʼaga ʼe hogofulu. Pea ko te ʼu faʼo ʼo te ʼu pou mo ʼanatou meʼa fakamaʼu* neʼe fai ʼaki te siliva. 13 Ko te laulahi ʼo te faʼahi ʼae ʼe haga ki te potu esite, ʼae ʼe hopo ake ai te laʼa, neʼe fasiga nima 50. 14 Neʼe tau ni kie ia fasiga nima ʼe 15 ʼi te tahi faʼahi ʼo te huʼaga ki te malaʼe, pea neʼe ʼi ai he ʼu pou ʼe tolu mo he ʼu tuʼuʼaga ʼe tolu. 15 Pea ʼi te tahi age faʼahi ʼo te huʼaga, neʼe tau ai ni kie ia fasiga nima ʼe 15, pea neʼe ʼi ai he ʼu pou ʼe tolu mo he ʼu tuʼuʼaga ʼe tolu. 16 Ko te ʼu kie fuli ʼae neʼe ʼa takai ʼaki te malaʼe neʼe fai ʼaki te filo lino lelei. 17 Neʼe fai te ʼu tuʼuʼaga ʼo te ʼu pou ʼaki te kapa, pea neʼe fai te ʼu faʼo ʼo te ʼu pou mo ʼanatou meʼa fakamaʼu* ʼaki te siliva, pea neʼe ʼaofi te ʼu ʼuluʼi pou ʼaki te siliva. Neʼe ʼi ai te ʼu meʼa fakamaʼu siliva ʼo te ʼu pou fuli ʼo te malaʼe.+

18 Neʼe ina fai leva he lito ʼo te huʼaga ki te malaʼe. Neʼe lalaga fakatahi te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula, pea mo te filo lino lelei moʼo fai ʼaki te lito ʼaia. Neʼe fasiga nima 20 tona loa pea mo fasiga nima 5 tona maʼoluga. Neʼe hage tona maʼoluga ko te ʼu kie ʼo te malaʼe.+ 19 Ko ʼona pou ʼe fa mo ʼona tuʼuʼaga ʼe fa neʼe fai ʼaki te kapa. Neʼe fai te ʼu faʼo ʼo te ʼu pou mo ʼanatou meʼa fakamaʼu* ʼaki te siliva pea neʼe ʼaofi te ʼu ʼuluʼi pou ʼaki te siliva. 20 Neʼe fai ʼaki te kapa ia te ʼu faʼo fuli ʼo te tapenakulo pea mo te malaʼe.+

21 Koʼeni te tanaki ʼo te ʼu meʼa gaue ʼae neʼe fakaʼaogaʼi ki te laga ʼo te tapenakulo, ia te tapenakulo ʼo te Fakamoʼoni.+ Neʼe fakatotonu e Moisese ke tohi e te kau Levite+ ia te ʼu meʼa gaue ʼaia. Neʼe takitaki te gaue ʼaia e Itamale,+ te foha ʼo te pelepitelo ko Alone. 22 Neʼe fai e Petesalele,+ te foha ʼo Uli, te foha ʼo Ulu mai te telepi ʼo Suta te ʼu meʼa fuli ʼae neʼe fakatotonu age e Sehova kia Moisese. 23 Neʼe gaue mo ia ia Oholiape,+ te foha ʼo Ahisamake mai te telepi ʼo Tane. Neʼe ko he tagata neʼe poto ʼi te gaue fakatufuga, ʼo feia mo te tui fakailoga, mo te tui ʼaki te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula pea mo te lino lelei.

24 Ko te aulo katoa ʼae neʼe fakaʼaogaʼi ki te ʼu gaue fuli ʼo te koga meʼa taputapu, neʼe ko te aulo ʼae neʼe foaki ohage ko he molaga ʼe lu ia muʼa ʼo te ʼAtua.+ Neʼe ko taleta* ʼe 29 pea mo sikele* ʼe 730, ʼo mulimuli ki te sikele ʼo te koga meʼa taputapu.* 25 Pea ko te siliva ʼae neʼe foaki e te hahaʼi tagata ʼae neʼe tohi ʼonatou higoa, neʼe ko taleta ʼe 100 pea mo sikele ʼe 1 775, ʼo mulimuli ki te sikele ʼo te koga meʼa taputapu.* 26 Ko te tagata takitokotahi ʼae neʼe tohi ʼonatou higoa mai te taʼu 20 ʼo fai ki ʼoluga, neʼe natou ʼaumai he vaeluaʼi sikele, ʼo mulimuli ki te sikele ʼo te koga meʼa taputapu.*+ Pea neʼe natou toko 603 550.+

27 Neʼe haka ia taleta siliva ʼe 100 moʼo fai ʼaki te ʼu tuʼuʼaga ʼo te ʼu kaumatapa ʼae ʼe tapa fa ʼo te koga meʼa taputapu pea mo te ʼu tuʼuʼaga ʼo te ʼu pou ʼo te lito. Neʼe ko taleta siliva ʼe 100 ʼae neʼe fai ʼaki te ʼu tuʼuʼaga ʼe 100, ko he taleta ʼe tahi ki he tuʼuʼaga ʼe tahi.+ 28 Neʼe ina fai te ʼu faʼo ʼo te ʼu pou, mo ʼaofi te ʼu ʼuluʼi pou pea mo fai te ʼu meʼa fakamaʼu ʼo te ʼu pou ʼaki ia sikele siliva ʼe 1 775.

29 Ko te kapa ʼo te molaga ʼae neʼe lu ia muʼa ʼo te ʼAtua, neʼe ko taleta ʼe 70 pea mo sikele ʼe 2 400. 30 Neʼe ina fai ʼaki te kapa ʼaia te ʼu tuʼuʼaga ʼo te ʼu pou ʼo te huʼaga ki te fale la ʼo te fono, mo te ʼaletale kapa mo tona ukamea vagavaga kapa, mo te ʼu meʼa kehekehe fuli ʼo te ʼaletale, 31 mo te ʼu tuʼuʼaga ʼo te ʼu pou ʼo te malaʼe, mo te ʼu tuʼuʼaga ʼo te ʼu pou ʼo te huʼaga ki te malaʼe, mo te ʼu faʼo fuli ʼo te tapenakulo pea mo te ʼu faʼo fuli+ ʼo te malaʼe.

39 Neʼe natou fakaʼaogaʼi te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno pea mo te filo kula,+ moʼo fai ʼaki te ʼu teu matalelei ʼae neʼe lalaga ki te gaue ʼo te koga meʼa taputapu. Neʼe natou fai te ʼu teu taputapu ʼo Alone,+ ohage pe ko tona fakatotonu age e Sehova kia Moisese.

2 Neʼe ina* fai te efote+ ʼaki te aulo, mo te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula pea mo te filo lino lelei. 3 Neʼe natou tuki te ʼu lauʼi ukamea aulo ke manifi pea neʼe ina tuʼusi ke liliu ko ni filo ke lalaga fakatahi mo te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula pea mo te filo lino lelei. Neʼe tui fakailoga ia te efote. 4 Neʼe natou fakapipiki te ʼu koga lualua ʼo te efote ʼaki he ʼu koga kie ʼe lua ʼi te ʼu fuga ʼuma. 5 Pea neʼe pipiki fakatahi te kiliʼi pipi mo te efote ke haʼi ke maʼu te efote.+ Pea neʼe lalaga pe te kiliʼi pipi ʼaki te aulo, mo te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula pea mo te filo lino lelei, ohage pe ko tona fakatotonu age e Sehova kia Moisese.

6 Pea neʼe natou ʼai te ʼu maka ʼae ko te onise ki he ʼu meʼa aulo, pea neʼe natou togi te ʼu higoa ʼo te ʼu foha ʼo Iselaele ʼi te ʼu maka ʼaia, ohage pe ko te togi ʼo he mama fakailoga.+ 7 Neʼe ina fakapipiki te ʼu maka ʼaia ki te ʼu koga kie ʼe lua ʼi te ʼu fuga ʼuma ʼo te efote ohage ko he ʼu maka fakamanatu ki te ʼu foha ʼo Iselaele,+ ohage pe ko tona fakatotonu age e Sehova kia Moisese. 8 Neʼe ina tui fakailoga leva ia te peketolale,*+ ohage pe ko te tui fakailoga ʼo te efote. Neʼe ina fai ʼaki te aulo, mo te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno, mo te filo kula pea mo te filo lino lelei.+ 9 Neʼe tapa fa tatau te peketolale moka peluki lua: neʼe apane tahi* tona loa mo tona laulahi. 10 Neʼe natou teuteuʼi te peketolale ʼaki ni maka maʼuhiga, neʼe ko ʼatu ʼe fa. Ko te ʼuluaki ʼatu: ko te lupi, mo te topasi pea mo te emelote. 11 Ko te lua ʼatu: ko te tulekoase, mo te safile pea mo te sasipa. 12 Ko te tolu ʼatu: ko te leseme,* mo te akate pea mo te ametite. 13 Ko te fa ʼatu: ko te kisolite, mo te onise pea mo te sate. Neʼe fakapipiki te ʼu maka maʼuhiga ʼaia ki he ʼu meʼa aulo. 14 Neʼe tuʼu ʼi te ʼu maka maʼuhiga ʼaia te ʼu higoa ʼo te ʼu foha ʼe toko 12 ʼo Iselaele, pea neʼe togi te ʼu higoa ʼaia ohage pe ko te togi ʼo he mama fakailoga. Neʼe tuʼu ʼi te ʼu maka takitahi ʼaia te higoa ʼo he telepi ʼo te ʼu telepi ʼe 12.

15 Neʼe natou fai leva he ʼu seini ʼo te peketolale ʼaki te aulo maʼa, neʼe fi ohage ko he ʼu maea.+ 16 Pea neʼe natou fai te ʼu meʼa aulo ʼe lua mo te ʼu mama aulo ʼe lua, pea neʼe natou fakapipiki te ʼu mama aulo ʼaia ʼe lua ʼi te ʼu muliʼi meʼa ʼe lua ʼo te peketolale. 17 Hili ʼaia, neʼe natou fakaulu te ʼu maea aulo ʼe lua ki te ʼu mama ʼe lua ʼae ʼi te ʼu muliʼi meʼa ʼo te peketolale. 18 Pea neʼe natou toe fakaulu mai muʼa te tahi ʼu muliʼi maea ʼi te ʼu meʼa aulo ʼe lua ʼae neʼe pipiki ki te ʼu koga kie ʼe lua ʼae ʼi te ʼu fuga ʼuma ʼo te efote. Pea neʼe natou haʼi ai. 19 Neʼe natou toe fai he ʼu mama aulo ʼe lua ʼo fakapipiki ki te ʼu muliʼi meʼa ʼe lua ʼae ʼi lalo ʼo te peketolale, ʼi muli pea ʼe lave ki te efote.+ 20 Pea neʼe natou fai te tahi ʼu mama aulo ʼe lua ʼi muʼa ʼo te efote, ʼi te faʼahi ʼae ʼe pipiki fakatahi ai te kiliʼi pipi mo te efote, ʼi lalo ifo ʼo te ʼu koga kie ʼe lua ʼae ʼi te ʼu fuga ʼuma, ʼi ʼoluga pe ʼo te kiliʼi pipi ʼae neʼe lalaga. 21 Pea neʼe natou haʼi leva ia te peketolale ʼaki he kave ʼuʼui ʼae neʼe fakaulu ki te ʼu mama ʼo te peketolale mo te ʼu mama ʼo te efote. Neʼe fai te faʼahi ʼaia ke pipiki maʼu te peketolale ki te efote, ʼi ʼoluga ʼo te kiliʼi pipi ʼae neʼe lalaga, ohage pe ko tona fakatotonu age e Sehova kia Moisese.

22 Pea neʼe ina lalaga ʼaki pe te filo ʼuʼui ia te kofu katoa ʼae ʼe mole hona ʼu nimaʼi kofu, ʼae neʼe tui ʼi loto ʼo te efote.+ 23 Neʼe fai he ava ʼi tona kiaʼi kofu, ʼi lotomalie, ohage pe ko te ava ʼo he kofu tau. Neʼe tui tapa te ava ʼaia ke ʼaua naʼa mahae. 24 Pea neʼe natou fai ʼi te lalo tapaʼi kofu he ʼu kelenate ʼaki te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno pea mo te filo kula. Neʼe fi fakatahi te ʼu filo ʼaia. 25 Pea neʼe natou fai ni kiʼi pele ʼaki te aulo maʼa pea neʼe natou fakavaha te ʼu kiʼi pele ʼaia ʼaki te ʼu kelenate, ʼi te takafoli ʼo te lalo tapaʼi kofu. 26 Neʼe natou fakavaha te ʼu kiʼi pele ʼaia ʼaki te ʼu kelenate, ʼi te takafoli ʼo te lalo tapaʼi kofu pea neʼe fakaʼaogaʼi te kofu ʼaia ki te gaue fakapelepitelo, ohage pe ko tona fakatotonu age e Sehova kia Moisese.

27 Pea neʼe natou lalaga te filo lino lelei ke fai ʼaki te ʼu kofu ʼo Alone mo ʼona foha,+ 28 mo te kie ʼae ʼe takai ʼaki te ʼulu+ ʼo Alone, mo te ʼu kie ʼae ʼe takai ʼaki te ʼu ʼulu+ ʼo ʼona foha, ʼo feia mo te ʼu vavaʼe loto.+ 29 Neʼe natou toe lalaga te filo lino lelei, mo te filo ʼuʼui, mo te filo huʼa lotuma fakapoʼuli ʼae neʼe fai ʼaki te fuluʼi akeno pea mo te filo kula ke fai ʼaki te kie ʼae ʼe haʼi ʼaki te koga loto, ohage pe ko tona fakatotonu age e Sehova kia Moisese.

30 Pea neʼe natou fai leva ʼaki te aulo maʼa te lauʼi ukamea gigila, ia te fakailoga taputapu.* Pea neʼe natou togi ʼi ai ohage pe ko te togi ʼo he mama fakailoga, te meʼa ʼaeni: “Ko te maʼoniʼoni ʼe ʼa Sehova.”+ 31 Pea neʼe natou haʼi te lauʼi ukamea ʼaia ʼaki he kave neʼe fai ʼaki te filo ʼuʼui ki te kie ʼae ʼe takai ʼaki te ʼulu, ohage pe ko tona fakatotonu age e Sehova kia Moisese.

32 Neʼe ʼosi ai leva te ʼu gaue fuli ʼo te tapenakulo, ia te fale la ʼo te fono, pea neʼe fai e te kau Iselaele te ʼu meʼa fuli ʼae neʼe fakatotonu age e Sehova kia Moisese.+ Neʼe natou mulimuli lelei pe ki ai.

33 Pea neʼe natou ʼaumai kia Moisese te tapenakulo,+ ia te foʼi kie lahi moʼo ʼuʼufi ʼaki te tapenakulo+ mo ʼona meʼa kehekehe fuli: ko ʼona meʼa fakamaʼu+ pea mo ʼona kaumatapa ʼae ʼe tapa fa,+ mo ʼona ʼakau fakalavalava,+ mo ʼona pou, pea mo ʼona tuʼuʼaga,+ 34 mo te foʼi kie lahi ʼae neʼe fai ʼaki te kiliʼi ovi* ʼe lanu kula,+ mo te foʼi kie lahi ʼae neʼe fai ʼaki te kiliʼi foke,* mo te lito ʼae ʼe tautau ʼi te muʼa Aleka,+ 35 mo te aleka ʼo te Fakamoʼoni mo ʼona ʼakau ʼamo,+ pea mo te tapunu,+ 36 mo te laupapa, mo ʼona meʼa kehekehe fuli+ pea mo te ʼu pane ʼae ʼe molagaʼi, 37 mo te tuʼulaga malama+ ʼae neʼe fai ʼaki te aulo maʼa, mo ʼona malama ʼae neʼe kua fakaʼatu, mo ʼona meʼa kehekehe fuli+ pea mo te lolo ki te ʼu malama,+ 38 mo te ʼaletale aulo,+ mo te lolo taputapu,+ mo te iseso magoni,+ mo te lito+ ki te huʼaga ʼo te fale la, 39 mo te ʼaletale kapa,+ mo tona ukamea vagavaga kapa, mo ʼona ʼakau ʼamo,+ mo ʼona meʼa kehekehe fuli,+ mo te foʼi topu kapa mo tona tuʼuʼaga,+ 40 mo te ʼu kie ʼo te malaʼe, mo ʼona pou pea mo ʼona tuʼuʼaga,+ mo te lito+ ki te huʼaga ʼo te malaʼe, mo ʼona maea pea mo ʼona faʼo+ pea mo te ʼu meʼa kehekehe fuli ʼae neʼe fakaʼaogaʼi ki te gaue ʼo te tapenakulo, ia te fale la ʼo te fono, 41 mo te ʼu teu matalelei ʼae neʼe lalaga ki te gaue ʼo te sagatualio, mo te ʼu teu taputapu ʼo Alone te pelepitelo+ pea mo te ʼu teu ʼo ʼona foha ki tanatou gaue fakapelepitelo.

42 Neʼe fai e te kau Iselaele te ʼu gaue fuli, ʼo mulimuli pe ki te ʼu meʼa fuli ʼae neʼe fakatotonu e Sehova kia Moisese.+ 43 Pea neʼe alu ia Moisese ʼo vakavakaʼi te ʼu gaue fuli ʼae neʼe natou fai, pea neʼe ina tokagaʼi neʼe natou fai te ʼu gaue ʼaia ohage pe ko tona fakatotonu age e Sehova. Pea neʼe tapuakiʼi ia natou e Moisese.

40 Pea neʼe ui leva e Sehova kia Moisese: 2 “ ʼI te ʼuluaki ʼaho ʼo te ʼuluaki mahina, ʼe ke fakatuʼu anai te tapenakulo, ia te fale la ʼo te fono.+ 3 ʼE ke tuku anai ki loto te aleka ʼo te Fakamoʼoni,+ pea ʼe ʼū anai te Aleka ʼi te lito.+ 4 ʼE ke ʼaumai anai te laupapa+ pea ʼe ke fakatoka anai te ʼu meʼa ʼae ʼe tonu ke hili ki ai. ʼE ke ʼaumai anai mo te tuʼulaga malama+ pea ʼe ke tutu anai ʼona malama.+ 5 Pea ʼe ke tuku anai te ʼaletale aulo ʼo te iseso+ ʼi te muʼa aleka ʼo te Fakamoʼoni pea ʼe ke tau anai te lito ʼo te huʼaga ki te tapenakulo.+

6 “ ʼE ke tuku anai te ʼaletale ʼo te ʼu holokoseta+ ʼi te muʼa huʼaga ʼo te tapenakulo, ia te fale la ʼo te fono. 7 Pea ʼe ke fakatuʼu anai te foʼi topu kapa ʼi te vaha ʼo te fale la ʼo te fono mo te ʼaletale pea ʼe ke ʼai anai ki ai he vai.+ 8 ʼE tonu anai ke ke ʼa ia te malaʼe+ pea ʼe ke tau anai te lito+ ʼo te huʼaga ki te malaʼe. 9 Hili ʼaia, ʼe ke toʼo anai te lolo taputapu+ pea ʼe ke liligi anai ki te tapenakulo mo te ʼu meʼa fuli ʼae ʼi loto.+ Pea ʼe ke fakamaʼoniʼoniʼi anai ʼo feia mo ʼana meʼa kehekehe fuli, pea ʼe liliu anai ko he meʼa taputapu. 10 ʼE ke liligi anai te lolo ki te ʼaletale ʼo te ʼu holokoseta mo ʼana meʼa kehekehe fuli. Pea ʼe ke fakamaʼoniʼoniʼi anai te ʼaletale ke liliu ko he ʼaletale taputapu ʼaupito.+ 11 Pea ʼe ke liligi anai te lolo ki te foʼi topu kapa mo tona tuʼuʼaga, pea ʼe ke fakamaʼoniʼoniʼi anai te foʼi topu.

12 “Pea ʼe ke ʼaumai anai ia Alone mo ʼona foha ki te huʼaga ʼo te fale la ʼo te fono, pea ʼe ke fakamaʼa anai natou ʼaki te vai.*+ 13 ʼE ke fakatui anai kia Alone te ʼu teu taputapu,+ pea ʼe ke tākai lolo anai tona ʼulu+ pea ʼe ke fakamaʼoniʼoniʼi anai ia ia. ʼE tauhi anai kia te au ʼi tona ʼuhiga pelepitelo. 14 Hili ʼaia, ʼe ke ʼaumai anai ʼona foha pea ʼe ke fakatui anai kia natou te ʼu kofu.+ 15 ʼE ke tākai lolo anai ʼonatou ʼulu ohage pe ko tau fai ki tanatou tamai,+ ke natou tauhi kia te au ʼi tonatou ʼuhiga pelepitelo. ʼI tonatou fakanofo ʼaia, ʼe natou hoko atu pe anai te gaue fakapelepitelo ʼo feia mo tonatou hologa, mai he taʼiake ki he tahi taʼiake.”+

16 Neʼe fai e Moisese te ʼu meʼa fuli ʼae neʼe fakatotonu age e Sehova kia ia.+ Pea neʼe mulimuli lelei pe ki ai.

17 ʼI te ʼuluaki ʼaho ʼo te ʼuluaki mahina ʼo te lua taʼu, neʼe kua fakatuʼu leva te tapenakulo.+ 18 ʼI te temi ʼae neʼe fakatuʼu ai e Moisese te tapenakulo, neʼe ina ʼai ʼona tuʼuʼaga,+ mo fakatuʼu ʼona kaumatapa ʼae ʼe tapa fa,+ mo fakaulu ki te ʼu mama ʼona ʼakau fakalavalava,+ pea mo fakatuʼu ʼona pou. 19 Neʼe ina folahi leva te foʼi kie lahi+ ki te tapenakulo pea neʼe ina toe hili ki ai+ te tahi ʼu foʼi kie lalahi, ohage pe ko tona fakatotonu age e Sehova.

20 Hili ʼaia, neʼe ina tuku te Fakamoʼoni+ ki te loto Aleka,+ pea neʼe ina fakaulu te ʼu ʼakau ʼamo ki te ʼu mama+ ʼo te Aleka+ pea neʼe ina ʼai leva tona tapunu.+ 21 Neʼe ina ʼaumai leva te Aleka ki te tapenakulo, pea neʼe ina tau te lito+ ʼae ʼi te muʼa aleka, ʼo ʼū ai te aleka ʼo te Fakamoʼoni,+ ohage pe ko tona fakatotonu age e Sehova.

22 Pea neʼe ina tuku te laupapa+ ki te fale la ʼo te fono, ʼi te faʼahi noleto ʼo te tapenakulo, ʼi te faʼahi ʼae ʼi te muʼa lito.* 23 Pea neʼe ina fakatoka ʼi ai te ʼu pane+ ia muʼa ʼo Sehova, ohage pe ko tona fakatotonu age e Sehova.

24 Neʼe ina fakatuʼu te tuʼulaga malama+ ʼi te fale la ʼo te fono ʼi muʼa ʼo te laupapa, ʼi te faʼahi ʼo te tapenakulo ʼae ʼe haga ki te potu saute. 25 Neʼe ina tutu te ʼu malama+ ia muʼa ʼo Sehova, ohage pe ko tona fakatotonu age e Sehova.

26 Pea neʼe ina fakatuʼu te ʼaletale aulo+ ʼi te fale la ʼo te fono ʼi te muʼa lito, 27 ke tutu ke kohu+ ai te iseso magoni,+ ohage pe ko tona fakatotonu age e Sehova.

28 Neʼe ina tau leva te lito+ ʼo te huʼaga ki te tapenakulo.

29 Neʼe ina fakatuʼu te ʼaletale ʼo te ʼu holokoseta+ ʼi te huʼaga ʼo te tapenakulo, ia te fale la ʼo te fono, ke feala hana momoli ʼi ai te ʼu holokoseta+ mo te ʼu molaga meʼa kai, ohage pe ko tona fakatotonu age e Sehova.

30 Neʼe ina fakatuʼu leva te foʼi topu kapa ʼi te vaha ʼo te fale la ʼo te fono mo te ʼaletale pea neʼe ina ʼai ki ai he vai.+ 31 Neʼe fakaʼaogaʼi e Moisese pea mo Alone mo ʼona foha te vai ʼaia moʼo fanofano pea mo fufulu ai ʼonatou vaʼe. 32 ʼI te temi fuli pe ʼae neʼe natou hu ai ki te fale la ʼo te fono peʼe fakaovi ki te ʼaletale, neʼe natou fakamaʼa ia natou totonu,+ ohage pe ko tona fakatotonu age e Sehova.

33 Ki muli age leva, neʼe ina fai te ʼa ʼo te malaʼe+ ʼi te takafoli ʼo te tapenakulo mo te ʼaletale, pea neʼe ina tau te lito ʼo te huʼaga ki te malaʼe.+

Koia neʼe fakaʼosi ai leva e Moisese tana gaue. 34 Pea neʼe ʼaofi e te ʼao ia te fale la ʼo te fono, pea neʼe fonu te tapenakulo ʼi te kololia ʼo Sehova.+ 35 Neʼe mole feala ke ulu ia Moisese ki te fale la ʼo te fono he neʼe tuʼu te ʼao ʼi te fuga fale la, pea neʼe fonu te tapenakulo ʼi te kololia ʼo Sehova.+

36 Pea ʼi te temi ʼae neʼe malaga ai te ʼao mai te tapenakulo, neʼe vete e te kau Iselaele ʼonatou fale la pea natou mavae. Neʼe natou fai feia lolotoga tanatou faifagona katoa ʼi te toafa.+ 37 Kae kapau neʼe mole malaga te ʼao, neʼe mole natou vete ʼonatou fale la.+ 38 Koteʼuhi lolotoga tanatou faifagona katoa ʼaia, neʼe feala ke sisio ia te hahaʼi fuli ʼo Iselaele ki te ʼao ʼa Sehova ʼae neʼe tuʼu ʼi te fuga tapenakulo ʼi te ʼaho, pea mo te afi ʼae neʼe tuʼu ʼi ai ʼi te poʼuli.+