ESAIA
1 Koʼeni te meʼa ʼae neʼe ha kia Esaia,*+ te foha ʼo Amote ʼo ʼuhiga mo Suta mo Selusalemi ʼi te temi ʼo te ʼu hau ʼo Suta+ ko Osiasi,+ mo Sotame,+ mo Akase,+ mo Esekiasi:+
2 Lagi, fagono mai, kele, tokaga mai,+
He neʼe palalau ia Sehova:
3 ʼE iloʼi lelei e te vitulo tona pule ʼae neʼe ina totogi,
Pea mo te asino, te kaiʼaga manu ʼo tona pule.
Kae ʼe mole iloʼi au e Iselaele,*+
ʼE mole ʼatamai taku hahaʼi.”
4 Malaʼia ki te puleʼaga agahala,+
Ki te hahaʼi ʼae ʼe lahi ʼanatou hala,
Ki te hakoga agakovi, fanau agakaka!
Neʼe natou liʼaki ia Sehova,+
Neʼe mole natou fakaʼapaʼapa ki te Maʼoniʼoni ʼo Iselaele,
Neʼe natou lituʼa kia te ia.
5 ʼI te kovi ʼo takotou agatuʼu, kotea ʼae ka hoko kia koutou?+
Kua mahaki te ʼulu katoa,
Mo mamahi te loto katoa.+
6 Mai te ʼu vaʼe ki te ʼulu, ʼe mole kei lelei he meʼa.
Ko te ʼu lavea, te ʼu tokatoka ʼuʼuli mo te ʼu mataʼi papala,
Neʼe mole faitoʼo, neʼe mole haʼi pea neʼe mole vali ki ai te lolo.+
7 Kua maumau tokotou fenua.
Kua tutu ʼokotou kolo.
ʼE kai te ʼu koloa ʼo tokotou fenua ʼi ʼokotou muʼa e te kau matapule.+
Kua hage ia ko he kele neʼe maumauʼi e te kau matapule.+
8 Neʼe tuku te taʼahine ʼo Sione ohage ko he fakamalumaluʼaga ʼi he gaueʼaga vite,
Ohage ko he pola ʼi he gaueʼaga kokomu,
Ohage ko he kolo neʼe ʼa takai.+
9 Ka na neʼe mole haofaki e Sehova ʼo te ʼatu kautau niʼihi ia matou,
Ka na ʼaua la kua matou hage nei ko te hahaʼi ʼo Sotoma
Pea mo te hahaʼi ʼo Komola.+
10 Kau pule ʼo Sotoma, kotou fakalogo ki te folafola ʼa Sehova!+
Kotou tokakaga ki te lao* ʼo totatou ʼAtua, hahaʼi ʼo Komola!+
11 ʼE ui e Sehova: “Kotea te ʼaoga ʼo ʼakotou sakilifisio fuli?+
Kua au piko ʼi ʼakotou holokoseta* ovi tagata+ mo te gako ʼo te ʼu manu ʼae ʼe fafaga leleiʼi.+
ʼE mole au fiafia ʼi te toto+ ʼo te ʼu vitulo kei mui,+ mo te ʼu akeno, mo te ʼu tao tagata.+
12 ʼE kotou ʼomai koutou ʼo hu ʼi ʼoku muʼa,+
Kae ko ai koa ʼae neʼe ina kole atu
Ke kotou haʼeleʼi ʼoku malaʼe?+
13 Tuku la takotou ʼaumai ʼakotou molaga meʼa kai ʼae ʼe mole hona ʼuhiga.
ʼE au fakalialia ki takotou iseso.+
ʼE kotou taupau te ʼu tuʼu afiafi ʼo te mahina,+ ʼakotou sapato+ pea mo te teuteuʼi ʼo ʼakotou fakatahi.+
Kae ʼe mole au tali ʼakotou fakatahi taputapu, he ʼe kotou fakaʼaogaʼi te ʼu malohi fakamanamana.+
14 ʼEi, ʼe au fakalialia ki ʼakotou tuʼu afiafi ʼo te mahina mo ʼokotou ʼaho lalahi.
Kua liliu ko he kavega mamafa kia te au,
Kua au fiu ʼi tona tali.
15 Ka kotou folahi ʼokotou ʼalofi nima,
ʼE au haga kehe.+
16 Kotou fufulu mo fakamaʼa ia koutou,+
Kotou toʼo ʼi ʼoku muʼa ʼakotou agakovi.
Tuku la takotou fai te meʼa ʼae ʼe kovi.+
17 Kotou ako te fai ’o te meʼa ʼae ʼe lelei, kotou kumi te faitotonu,+
Kotou fakatonutonuʼi ia ia ʼae ʼe agakovi,
Kotou haofaki ia ia ʼae ʼe hala mo tamai,
Pea mo puipui te fafine vitua.”+
18 ʼE ui e Sehova: “Kotou ʼomai ke tou fakatokatoka.+
Tatau aipe pe ʼe kula fakapoʼuli ʼakotou agahala,
ʼE liliu anai ia ʼo hihina ohage ko te nive.+
Tatau aipe pe ʼe hage ko he kie ʼe kula fakapoʼuli,
ʼE liliu anai ia ohage ko te fuluʼi ovi.
19 Kapau ʼe kotou lotolelei mo fakalogo,
ʼE kotou kai anai te ʼu meʼa lelei ʼo te fenua.+
20 Kae kapau ʼe mole kotou fia fakalogo pea mo agatuʼu,
ʼE matehi anai koutou ʼaki te heleta,+
He ʼe ko te folafola tonu ʼaia ʼa Sehova.”
21 Kua liliu te kolo agatonu+ ko he fafine paomutu!+
Neʼe aga fakahagatonu,+
Neʼe maʼu ai te faitotonu,+
Kae ʼi te temi nei kua nofoʼi pe ia e te kau faifakapo.+
23 Kua uigataʼa ʼau tama ʼaliki pea ʼe fakatahi mo te kau kaihaʼa.+
ʼE natou leleiʼia fuli te ʼu meʼa ʼofa ʼae ʼe foaki fakafufu pea ʼe natou holi ki te ʼu fakapale.+
ʼE mole natou faitotonu ki te fanau hala mo tamai,
Pea ʼe mole natou tokagaʼi ʼi he temi te fafine vitua.+
24 Koia ʼe ui ai e te ʼAliki moʼoni, ia Sehova ʼo te ʼatu kautau,
Te Mafimafi ʼo Iselaele:
“ ʼE au pulihi anai ʼoku fili,
Pea ʼe au lagavaka anai kia natou ʼae ʼe fakafeagai mai.+
25 ʼE au fakatuʼā anai ia koe,
ʼE au pulihi anai ʼou sikoli ʼaki te sota
Pea ʼe au toʼo anai te ʼuli fuli ia koe.+
26 ʼE au toe fakanofo anai ʼau tuʼi fakamau ohage ko te kamata,
Mo ʼau tagata faitokoni ohage ko te temi muʼa.+
Hili ia, pea ʼe fakahigoaʼi anai koe ko te Kolo ʼo Te Faitotonu, Kolo Agatonu.+
27 ʼE totogi anai ia Sione e te agatonu,+
Pea ko tana hahaʼi ʼae ʼe toe liliu mai, ʼe totogi anai natou e te faitotonu.
28 ʼE pulihi fakatahi anai te kau agatuʼu mo te kau agahala,+
Pea ʼe matehi anai ia natou ʼae ʼe natou liʼaki ia Sehova.+
29 ʼE fakaufiufi anai te ʼu fuʼu ʼakau malolohi ʼae neʼe kotou holi ki ai,+
Pea ʼe kotou kula momoho anai ʼuhi ko te ʼu ʼoloto* ʼae neʼe kotou filifili.+
30 Koteʼuhi ʼe kotou liliu anai ohage ko he fuʼu ʼakau lahi kua fefe ʼona lau+
Pea ohage ko he ʼoloto ʼe mole ʼi ai hona vai.
31 ʼE liliu anai te tagata malohi ko te luna moamoa,
Pea ʼe mafisifisi tana gaue ohage ko he afi,
Pea ʼe nā ulo fakatahi anai,
ʼE mole he tahi ke ina tamateʼi te afi.”
2 Koʼeni te meʼa neʼe sio ki ai ia Esaia, te foha ʼo Amote ʼo ʼuhiga mo Suta mo Selusalemi:+
2 ʼI te ʼu ʼaho fakamuli,
ʼE tuʼu malohi anai te moʼuga ʼo te fale ʼo Sehova
ʼI ʼoluga ʼo te tumutumu ʼo te ʼu moʼuga.+
ʼE maʼoluga age anai ʼi te ʼu kiʼi moʼuga,
Pea ʼe ʼomai anai ki ai te ʼu puleʼaga fuli.+
3 ʼE olo anai ki ai ni hahaʼi kaugamalie mai ni puleʼaga kehekehe ʼo natou ui:
“Kotou ʼomai ke tou hake ki te moʼuga ʼo Sehova,
Ki te fale ʼo te ʼAtua ʼo Sakopo.+
ʼE ina akoʼi mai anai ʼona ala,
Pea ʼe tou haʼele anai ʼi ʼona ala foufou.”+
4 ʼE ina fakahoko anai te faitotonu ki te ʼu puleʼaga
Pea ʼe ina fakatonutonuʼi anai ni hahaʼi kaugamalie.
ʼE natou fai anai ni huo fuli kele ʼaki ʼanatou heleta
Pea mo ni hele tuʼusi ʼakau ʼaki ʼanatou tao.+
ʼE mole toe laga tau anai he puleʼaga ki he tahi puleʼaga,
Pea ʼe mole natou toe ako anai te tau.+
5 Kotou ʼomai hakoga ʼo Sakopo,
Ke tou haʼele ʼi te malama ʼo Sehova!+
6 ʼE moʼoni, neʼe ke liʼaki tau hahaʼi, te hakoga ʼo Sakopo,+
He neʼe kua fonu tonatou fenua ko te ʼu meʼa ʼae mai te potu Esite.
ʼE natou gaohi meʼa fakamanamana+ ohage ko te kau Filisitini
Pea ʼe kaugamalie ai te ʼu fanau matapule io natou.
7 Kua fonu tonatou fenua ko te siliva mo te aulo,
ʼE mole feala ke lau ʼonatou koloa.
Kua fonu tonatou fenua ko te ʼu hosi,
ʼE mole feala ke lau ʼanatou saliote tau.+
8 ʼE fonu tonatou fenua ko ni ʼatua ʼe vaʼiganoa.+
ʼE natou tulolo ki te gaue ʼo ʼonatou nima,
ʼEi, ia muʼa ʼo te ʼu meʼa ʼae neʼe natou faʼu.
9 Koia ʼe punou ai te tagata mo lainoa.
ʼE mole feala ia ke ke fakamolemole kia natou.
10 Ke natou feulufi ki te loto ʼana pea ke natou fenonoʼi ʼi te efu,
ʼUhi ko te hauhau fakamataku ʼa Sehova
Pea mo te taulekaleka ʼo tona kololia!+
11 ʼE fakamalaloʼi anai te tagata fialahi,
ʼE fakalainoaʼi anai te hahaʼi fiatuʼu.
ʼI te ʼaho ʼaia, ʼe maʼoluga tokotahi anai ia Sehova.
12 Ko te ʼaho ʼaia ’e ʼa Sehova ʼo te ʼatu kautau.+
ʼE hoko anai te ʼaho ʼaia ki te tagata fuli ʼe fialahi mo fiatuʼu,
Ki te tagata fuli ʼae ʼe maʼuhiga peʼe mole maʼuhiga,+
13 Ki te ʼu fuʼu sete fuli ʼo Lipane ʼae ʼe lalahi mo maʼoluga,
Mo te ʼu fuʼu sene fuli ʼo Pasani,
14 Ki te ʼu moʼuga maʼoluga fuli,
Mo te ʼu kiʼi moʼuga fuli,
15 Ki te ʼu tule maʼoluga fuli mo te ʼu kaupa malolohi fuli,
16 Ki te ʼu vaka fuli ʼo Talesisi+
Pea mo te ʼu vaka matalelei fuli.
17 ʼE fakatolaloʼi anai te tagata fialahi,
ʼE fakamalaloʼi anai te hahaʼi fiatuʼu.
ʼI te ʼaho ʼaia, ʼe maʼoluga tokotahi anai ia Sehova.
18 ʼE pulihi katoa anai te ʼu ʼatua vaʼiganoa.+
19 ʼE feulufi anai te hahaʼi ki te ʼu ʼana ʼo te ʼu maka
Pea mo te ʼu luo ʼi te kele,+
ʼUhi ko te hauhau fakamataku ʼo Sehova
Pea mo te taulekaleka ʼo tona kololia,+
Moka tuʼu ake anai ʼo fakagalulu te kele ʼo tekelili ai te hahaʼi.
20 ʼI te ʼaho ʼaia, ʼe toʼo anai e te tagata te ʼu ʼatua vaʼiganoa siliva mo aulo
ʼAe neʼe ina faʼu ʼo tulolo ki ai,
ʼO laku ki te ʼu kuma mo te ʼu peka,+
21 Pea ʼe ulu anai ki te ʼana
Ki te ava ʼo te ʼu maka,
ʼUhi ko te hauhau fakamataku ʼo Sehova
Pea mo te taulekaleka ʼo tona kololia,
Moka tuʼu ake anai ʼo fakagalulu te kele ʼo tekelili ai te hahaʼi.
22 Tuku la takotou falala ki te tagata,
ʼAe ʼe hage pe tona maʼuli ko he manava!
He koʼe koa ʼe tokagaʼi ia ia?
3 Koʼeni te ʼAliki moʼoni, ia Sehova ʼo te ʼatu kautau,
ʼE ina toʼo ʼi Selusalemi mo Suta ia meʼa kehekehe ʼe ʼaoga ki te maʼuli mo te ʼu tokoni,
Te pane mo te vai,+
2 Te tagata malohi mo te tagata tau,
Te tuʼi fakamau mo te polofeta,+ te tagata faifakakikite mo te takitaki,
3 Te pule ʼo he toko 50,+ te tagata maʼu tuʼulaga mo te tagata faitokoni,
Te tagata gaohi meʼa fakatemonio pea mo te tagata faiva ʼi te fakalalata ʼo te gata.+
4 ʼE au foaki anai kia natou ni ʼaliki ʼe kei tamasiʼi,
Pea ʼe pule anai kia natou ia ia ʼae ʼe mole fakapotopoto.
5 ʼE fegaohikoviʼiʼaki anai te hahaʼi,
ʼE natou tahi gaohi koviʼi pe tona tatau.+
ʼE agamalohi anai te tama ki te matuʼa vaivai,
Pea ʼe fakafeagai anai te tagata ʼae ʼe meʼa noaʼi ki te tagata ʼae ʼe fakaʼapaʼapaʼi.+
6 ʼE tahi puke anai tona tehina ʼi te ʼapi ʼo tana tamai pea mo ui age:
“ ʼE ʼi ai tou pulupulu, ke ke liliu ko tomatou pule.
Ke ke tokaga ki te koga meʼa maumau ʼaena.”
7 Kae ʼi te ʼaho ʼaia, ʼe fakafisi anai mo ui:
“ ʼE mole au faitoʼo anai ʼokotou lavea,
ʼE mole he meʼa kai mo ni mutuʼi meʼa ʼi toku ʼapi.
ʼAua naʼa kotou fakanofo au ko he pule ki te hahaʼi.”
8 Neʼe tukia ia Selusalemi
Pea neʼe to ia Suta,
He ʼe natou fakafeagai kia Sehova ʼi ʼanatou palalau mo ʼanatou gaue.
ʼE natou agapauʼu ia muʼa ʼo tona kololia.+
9 ʼE ha ʼi ʼonatou fofoga tonatou ʼuhiga moʼoni,
Pea ohage ko Sotoma, ʼe natou palalau fakahaha ki ʼanatou agahala,+
ʼE mole natou faiga ke fufu.
Malaʼia kia natou, he ʼe natou fakatupu pe ʼonatou mamahi!
10 Kotou fakaha ki te kau faitotonu, ʼe fua lelei anai kia natou,
ʼE fakapale anai natou ʼo ʼuhiga mo te ʼu meʼa ʼae ʼe natou fai.+
11 Malaʼia ki te tagata agakovi!
ʼE mamahi anai,
He ʼe toe liufaki age anai te aga ʼae neʼe ina fai!
12 Kae ʼe fakamamahiʼi taku hahaʼi e ʼonatou pule gaue,
Pea ʼe pule kia natou ni fafine.
Siʼaku hahaʼi, ʼe fakaheʼi koutou e ʼokotou pule,
Pea ʼe mole kei kotou iloʼi te ʼu ala foufou ʼae ʼe tonu ke kotou olo ai.+
13 ʼE teuteu ia Sehova ke ina tukugakoviʼi te hahaʼi,
ʼE tuʼu ake ʼo tala he tautea ki te ʼu puleʼaga.
14 ʼE tauteaʼi anai e Sehova te kau takitaki mo te kau tama ʼaliki ʼo tana hahaʼi.
“Neʼe kotou tutu te gaueʼaga vite,
Pea ʼe maʼu ʼi ʼokotou ʼapi te meʼa ʼae neʼe kotou kaihaʼa mai te masiva.+
15 ʼE feafeaʼi pe hakotou lava fakamafasia taku hahaʼi
Mo fakamamahiʼi te masiva?”+ ko te ui ʼaia ʼa te Tuʼi ʼAliki ko Sehova ʼo te ʼatu kautau.
16 ʼE ui e Sehova: “ ʼE fialahi te ʼu taʼahine ʼo Sione,
Pea ʼe natou haʼele nekenekea,
ʼE natou fakatokaga mo hopohopo,
Pea ʼe natou fakalogoaʼa te ʼu vesa ʼo ʼonatou vaʼe,
17 Koia ʼe tuku anai e Sehova ke mafola te ʼu pakuʼi fele ʼi te ʼu ʼulu ʼo te ʼu taʼahine ʼo Sione,
Pea ʼe toe tuku anai e Sehova ke natou ʼulu tula.+
18 ʼI te ʼaho ʼaia, ʼe toʼo anai e Sehova tonatou matalelei, mo te ʼu vesa ʼae ʼi ʼonatou vaʼe,
Te ʼu kie ʼae ʼe haʼi ʼaki ʼonatou ʼulu pea mo ʼanatou meʼa fakateuteu,*+
19 Mo ʼonatou hoaʼi hau, ʼonatou vesa, ʼonatou pulou,
20 Mo te ʼu kie ʼi ʼonatou ʼulu, te ʼu katena ʼi ʼonatou vaʼe, ʼonatou kiliʼi pipi,
ʼAnatou hina kaloni, ʼanatou meʼa puipui,
21 Mo ʼonatou mama mo te ʼu mama ʼi ʼonatou ihu,
22 Mo ʼonatou teu matalelei, ʼonatou kofu tuʼa, ʼonatou pulupulu, ʼanatou kato taki,
23 Mo ʼonatou kiʼi sioʼata,+ ʼonatou mutuʼi meʼa ʼae neʼe fai ʼaki te lino,
Pea mo ʼonatou pulou.
24 ʼE fetogi anai te lolo ʼae neʼe fai ʼaki te ʼu ʼakau fakamagoni+ ʼaki he ʼaele kovi,
Te kiliʼi pipi ʼaki he maea,
Te faʼu matalelei ʼaki te ʼulu tula,+
Te mutuʼi meʼa taulekaleka ʼaki he mutuʼi meʼa neʼe fai ʼaki he taga,*+
Pea mo te matalelei ʼaki he fakailoga neʼe fai ʼaki te ukamea vela.
25 ʼE matehi anai ʼau tagata ʼaki te heleta,
Pea ʼe mamate anai ʼau tagata malolohi ʼi te tau.+
26 ʼE fetagihi anai mo putu te hahaʼi ʼi te ʼu huʼaga ʼo Sione,+
Pea ʼe hage anai te kolo ko he fafine ʼe nofo ki te kele mo fakaʼofaʼofa.”+
4 ʼI te ʼaho ʼaia, ʼe puke anai e ni fafine ʼe toko fitu he tagata ʼe tahi+ ʼo natou ui age ki ai:
“Ko tamatou pane ʼae ka matou kai
Pea ko ʼomatou mutuʼi meʼa ʼae ka matou tui.
Fakagafua mai pe ke toʼo tou higoa kia matou,
2 ʼE taulekaleka anai mo fakakololia te meʼa ʼae ka fakahomo e Sehova ʼi te ʼaho ʼaia, pea ʼe fiameʼameʼa anai mo fiafia te kau maʼuʼuli ʼo Iselaele ʼi te ʼu fua ʼo te fenua.+ 3 Ko natou fuli ʼae ʼe nonofo anai ʼi Sione mo tuku ʼi Selusalemi, ʼe ui anai ʼe natou maʼoniʼoni, ʼei, ia natou fuli ʼae ʼo Selusalemi kua tohi ki te maʼuli.+
4 ʼE to anai te hauhau ʼo Sehova ki Selusalemi pea ʼe ina fakamauʼi anai ʼo ina toʼo ai te ʼuli ʼo te ʼu taʼahine ʼo Sione+ pea mo fakamaʼa ai te toto.+ 5 ʼE toe fakatupu anai e Sehova ʼi te fuga Moʼuga ʼo Sione pea ʼi ʼoluga ʼo te koga meʼa ʼae ʼe fai ai ʼana fakatahi, he ʼao mo he kohu ʼi te ʼaho mo he afi kakaha ʼi te poʼuli.+ Pea ʼe maʼu anai he nonoʼaga ʼi te fuga kololia ʼaia. 6 ʼE ʼi ai anai he pola moʼo fakamalumalu pea mo puipui mai te momofi ʼo te ʼaho,+ ko he nonoʼaga anai ki te ʼu afā mo te ʼua.+
5 Fakalelei, ʼe au fia hiva ki toku ʼofaina
He hiva ʼo ʼuhiga mo ia ʼae ʼe au ʼofa ai mo tana gaueʼaga vite.+
ʼE ʼi ai te gaueʼaga vite ʼo toku ʼofaina ʼi he kiʼi moʼuga ʼe kele maʼuli.
2 Neʼe ina fuli te kele mo toʼo te maka.
Pea neʼe ina to leva te fuʼu vite ʼe lelei ʼaupito.
Neʼe ina laga he tule ʼi te gaueʼaga vite,
Mo toli te maka moʼo faʼu ʼaki te lomiʼaga vite.+
Neʼe fakaʼamu ʼe ina maʼu anai he ʼu vite ʼe lelei,
Kae neʼe ina maʼu pe ia he ʼu vite ʼe mole lelei.+
3 “ ʼI te temi nei, hahaʼi ʼo Selusalemi mo Suta,
Fakalelei, kotou fakamauʼi au mo taku gaueʼaga vite.+
4 Kua au fai ia meʼa fuli ki taku gaueʼaga vite.
Kotea la te meʼa ʼae heʼeki au fai?+
He koʼe neʼe au maʼu pe he ʼu vite ʼe mole lelei,
Kae neʼe au fakaʼamu la ki he ʼu fua ʼe lelei?
5 ʼI te temi nei, ʼe au fakaha atu
Pe kotea ʼae ka au fai ki taku gaueʼaga vite:
ʼE au taʼaki anai tona ʼa,
Pea tutu anai.+
ʼE au holoʼi anai tona kaupa maka
Pea malamalaki anai.
6 ʼE mole au toe gaueʼi anai te kele ʼaia.+
ʼE mole fakagata anai peʼe huo te gaueʼaga vite ʼaia.
ʼE ʼaofi anai e te ʼu ʼakau talatala mo te ʼu vao kovi,+
Pea ʼe au fakatotonu anai ki te ʼu ʼao ke mole ʼua ki ai.+
7 Ko te gaueʼaga vite ʼa Sehova ʼo te ʼatu kautau ko te hahaʼi* ʼo Iselaele.+
Ko Suta ko te gaueʼaga ʼae neʼe ʼofa ai.
Neʼe ʼamanaki ki te agatonu,+
Kae koʼeni ʼe mole ʼi ai he agatonu.
Neʼe ʼamanaki ki te faitotonu,
Kae koʼeni ʼe logo ki ni tagi mamahi.”+
8 Malaʼia kia natou ʼae ʼe natou maʼu he ʼapi mo he tahi age ʼapi,+
He gaueʼaga mo he tahi age gaueʼaga,+
ʼO kaku ki te mole kei ʼi ai ʼo he nofoʼaga
Pea ko natou ʼateaina pe ʼe nonofo ʼi te fenua.
9 Neʼe au logo kia Sehova ʼo te ʼatu kautau neʼe ina fakapapauʼi,
Logope la te lahi mo matalelei ʼo te ʼu ʼapi,
Kae ʼe maumauʼi anai,
ʼE mole toe nofoʼi anai.+
10 ʼE maʼu he fua pate* ʼe tahi ki he gaueʼaga vite lahi.
Pea ʼe maʼu anai he efa* ʼe tahi ki he fua homele* pulapula ʼe tahi.+
11 Malaʼia kia natou ʼae ʼe ʼaʼala mafoata ʼo inu kava,+
Mo tataka poʼuli ʼo kaku ki tanatou fai ni agavale.
12 ʼE natou maʼu ni alepa, mo ni meʼa faimaholo kauʼi uka,
Mo ni nafa, mo ni fagufagu, mo he vino ʼi ʼanatou kaitahi.
Kae ʼe mole natou tokagaʼi pe la te gaue ʼa Sehova,
ʼE mole natou sisio ki te gaue ʼo ʼona nima.
13 ʼE ʼave popula anai taku hahaʼi
ʼUhi ko tanatou mole iloʼi au.+
ʼE pakupaku anai ʼana tagata maʼuhiga+
Mo fia iinu anai ʼana hahaʼi fuli.
14 Koia kua falahi ai te Faitoka,*
Kua ina avahi lahi ʼosi tona gutu.+
ʼE hihifo moʼoni anai ki ai
Te taulekaleka* ʼo Selusalemi, ʼana hahaʼi logoaʼa pea mo natou ʼae ʼe fakafiafia fakavalevale.
15 ʼE punou anai te tagata,
ʼE fakato laloʼi anai ia ia,
Pea ʼe fakamalaloʼi anai te tagata fialahi.
16 ʼE maʼoluga anai ia Sehova ʼo te ʼatu kautau ʼi te fakamau ʼae ka ina fai.
Ko te ʼAtua moʼoni, te Maʼoniʼoni,+ ʼe ina fakaha anai tona maʼoniʼoni ʼaki te faitotonu.+
17 ʼE hage anai te kakai ʼa te ʼu akeno ko tanatou kakai ʼi te koga meʼa lunaʼia.
ʼE kakai anai te kau matapule ʼi te ʼu koga meʼa ʼae kua maumau, ʼae neʼe fafaga lelei ai te ʼu manu ʼi te temi muʼa.
18 Malaʼia kia natou ʼae ʼe loi he ʼe natou toho tanatou hala
Mo tanatou agahala ohage ko he manu ʼe ina toho he saliote.
19 Malaʼia kia natou ʼae ʼe natou ui: “Ke fakaviliviliʼi la e te ʼAtua tana gaue,
Ke hoko fakavilivili mai ke tou sisio ki ai!
20 Malaʼia kia natou ʼae ʼe natou ui ʼe lelei te meʼa ʼae ʼe kovi pea ʼe kovi te meʼa ʼae ʼe lelei,+
Kia natou ʼae ʼe natou fetogi te fakapoʼuli ʼaki te malama pea mo te malama ʼaki te fakapoʼuli,
Kia natou ʼae ʼe natou fetogi te meʼa ʼae ʼe kona ʼaki te meʼa ʼae ʼe malie, te meʼa ʼae ʼe malie ʼaki te meʼa ʼae ʼe kona.
21 Malaʼia kia natou ʼae ʼe natou ui ʼe natou popoto,
ʼI tanatou manatu ʼe natou ʼatamai.+
22 Malaʼia kia natou ʼae ʼe malolohi moʼo inu vino,
Mo natou ʼae ʼe faiva ʼi te huʼi ʼo te kava.+
23 Malaʼia kia natou ʼae ʼe natou tali te meʼa ʼofa moʼo fakaʼateainaʼi he tahi ʼe agakovi,+
Pea ʼe mole natou faitotonu kia ia ʼae ’e faitotonu.+
24 Koia ohage pe ko te ulo ʼo te luna moamoa
Mo te gosigosi ʼo te luna ʼi te afi,
ʼE toe feia pe ʼe popo anai ʼonatou aka,
Pea ʼe viligia anai ʼanatou matalaʼi ʼakau ohage ko te efu,
Koteʼuhi neʼe natou liʼaki te lao* ʼa Sehova ʼo te ʼatu kautau
Pea neʼe natou meʼa noaʼi te folafola ʼa te Maʼoniʼoni ʼo Iselaele.+
25 Koia ʼae ʼe to ai te hauhau ʼo Sehova ki tana hahaʼi,
Pea ʼe ina faoʼi anai tona nima ʼo tauteaʼi natou:+
ʼE galulu anai te ʼu moʼuga,
Pea ʼe hage anai ʼonatou sino mate ko te ʼu ʼotaʼota ʼi te ʼu ala.+
ʼE mole puli anai tona hauhau ʼuhi ko te ʼu meʼa fuli ʼaia,
Kae ʼe hoko atu pe tana faoʼi tona nima ʼo tauteaʼi natou.
26 Neʼe ina fakatuʼu he fakailoga* ki he puleʼaga mai mamaʼo,+
Neʼe veka ke ʼomai ia natou ʼae ʼi te potu taupotu ʼo te kele.+
Koʼeni natou ʼe ʼomai fakavilivili!+
27 ʼE mole he tahi ia natou ʼe gaʼegaʼe peʼe tukia.
ʼE mole he tahi ʼe tulemoe peʼe moe.
ʼE mole vevete te kiliʼi pipi ʼi ʼonatou koga loto,
Pea ʼe mole maumau te haʼi ʼo ʼonatou sulie.
28 ʼE masila ʼanatou kauʼi nahau fuli,
Pea kua tokalelei fuli ʼanatou nahau.
ʼE hage te ʼu vaʼe ʼo ʼanatou hosi ko te maka fefeka,
Pea ʼe hage te ʼu teka ʼo ʼanatou saliote tau ko he afā.+
29 ʼE natou gugulu ohage ko te laione,
ʼE natou gugulu ohage ko ni laione kei mui.+
ʼE natou gugulu mo puke anai te manu
Mo ʼave, pea ʼe mole feala ke haofaki e he tahi.
30 ʼI te ʼaho ʼaia, ʼe natou gugulu anai kia ia
Ohage ko te gugulu ʼo te tai.+
Ko natou fuli ʼae ʼe natou sioʼi te fenua ʼe natou sisio anai ki ni fakapoʼuli fakamataku.
ʼE toe fakapoʼuli anai mo te malama ʼuhi ko te ʼu ʼao.+
6 ʼI te taʼu ʼae neʼe mate ai te Hau ko Osiasi,+ neʼe au sio kia Sehova ʼe heka ʼi tona hekaʼaga fakahau ʼe maʼoluga ʼaupito,+ pea neʼe ʼaofi fuli e tona kofu loa te fale lotu. 2 Neʼe tutuʼu te ʼu selafimi ʼi ʼoluga ʼo te ʼAtua. Neʼe taki pakakau ono te selafimi: ko pakakau ʼe lua moʼo ʼaofi ʼo te fofoga, ko pakakau ʼe lua moʼo ʼuʼufi ʼo te ʼu vaʼe pea ko pakakau leva ʼe lua moʼo lele.
3 Pea neʼe natou feuiʼaki mo kalaga:
“Maʼoniʼoni, maʼoniʼoni, maʼoniʼoni ia Sehova ʼo te ʼatu kautau.+
ʼE fonu te kele katoa ko tona kololia.”
4 ʼI he logo pe ʼo he kalaga neʼe galulu ai te ʼu kaumatapa mo fonu ai te fale lotu* ko te kohu.+
5 Neʼe au ui leva: “Malaʼia kia au!
ʼE au mate anai,
He ʼe ko au ko te tagata ʼe heʼe maʼa ʼoku laugutu,
Pea ʼe au maʼuli ʼi he hahaʼi ʼe haʼu mai ʼonatou gutu he ʼu palalau heʼe maʼa.+
Pea tahi, neʼe au sio tonu ki te Hau, ia Sehova ʼo te ʼatu kautau.”
6 Kae neʼe lele mai kia au he selafimi neʼe ina puke he mamala kakaha+ neʼe ina toʼo mai te ʼaletale ʼaki ni pipi.+ 7 Neʼe fāfā ki toku gutu ʼo ui:
“Kua lave te meʼa ʼaeni ki ʼou laugutu.
Kua ke maʼa mai tau lakahala,
Pea kua fakamolemole tau agahala.”
8 Pea neʼe au logo ʼe fehuʼi e Sehova: “Ko ai ʼae ka au fekauʼi pea ko ai ʼae ka alu maʼa matou?”+ Neʼe au tali: “Koʼeni au! Fekauʼi au!”+
9 Pea neʼe ina ui: “Alu ʼo ui age ki te hahaʼi ʼaia:
‘ ʼE kotou logo tuʼumaʼu anai,
Kae ʼe mole kotou mahino anai.
ʼE kotou sio tuʼumaʼu anai,
Kae ʼe mole kotou ako anai he meʼa.’+
10 Fakaliliu te hahaʼi ʼaia ke natou lotofefeka,+
Mapunuʼi ʼonatou taliga,+
Mo pupunu ʼonatou mata,
Ke ʼaua naʼa natou sisio,
Ke ʼaua naʼa natou logo,
Ke ʼaua naʼa natou mahino,
Pea ke ʼaua naʼa natou toe liliu mai ke au fakamalolo natou.”+
11 Pea neʼe au fehuʼi: “Sehova e, ʼo kaku ki ʼafea?” Neʼe ina tali mai:
“ ʼO kaku ki te maumau ʼo te ʼu kolo mo tuʼu lavaki,
Ki te mole kei nofoʼi ʼo te ʼu ʼapi,
Pea ke maumau katoa te fenua,+
12 ʼO kaku ki te fakamamaʼo ʼo te hahaʼi e Sehova+
Pea ke tuʼu lavaki ai te fenua.
13 “Kae ʼe toe anai he vahe tahi ki te hogofulu ʼi te hahaʼi ʼo Iselaele, pea ʼe toe tutu anai te vahe ʼaia. ʼE hage anai ko he fuʼu ʼakau lahi pea mo he fuʼu sene, ʼae ka taʼaga kae tuku tona tafito pea ʼe homo anai he huli* maʼoniʼoni mai te tafito ʼaia.”
7 ʼI te temi ʼo te hau ʼo Suta ko Akase,+ te foha ʼo Sotame, te foha ʼo Osiasi, neʼe ʼomai ia Letisini te Hau ʼo Silia pea mo Pekase,+ te foha ʼo Lemalia te hau ʼo Iselaele ʼo tauʼi ia Selusalemi kae neʼe mole feala ke nā* maʼu.+ 2 Neʼe fakaha leva ki te hologa fakahau* ʼo Tavite: “Kua kau ia Silia mo Efalaimi.”
Neʼe tete ai te mafu ʼo Akase pea mo te mafu ʼo tana hahaʼi ohage ko te gaugaue ʼo te ʼulu ʼakau ʼi te vao matuʼa ʼuhi ko te matagi.
3 Neʼe ui leva e Sehova kia Esaia: “Fakalelei, alu ʼo fakafetaulaki kia Akase mo tou foha ko Seale-sakupe*+ ʼi te gataʼaga ʼo te tafega vai ʼae ʼe haʼu mai te maʼanuʼaga ʼi ʼoluga,+ ʼi te ala ʼae ʼe alu ki te gaueʼaga ʼa te tagata faifo. 4 ʼE tonu anai ke ke ui age ki ai: ‘ ʼAua naʼa ke lotohoha, ʼaua naʼa ke mataku pea ʼaua naʼa ke lotovaivai ʼuhi ko te ʼu kiʼi motumotu kokohu ʼaia, ʼuhi ko te ita ʼo Letisini mo Silia pea mo te foha ʼo Lemalia.+ 5 ʼEi, neʼe fonofono kia koe ia Silia mo Efalaimi pea mo te foha ʼo Lemalia ʼo natou ui: 6 “Tou hake ʼo tauʼi, mo hae liki* ke tou maʼu ai ia Suta pea ke tou fakanofo ia te foha ʼo Tapeele ko honatou hau.”+
7 “ ‘Koʼeni te meʼa ʼae ʼe ui e te Tuʼi ʼAliki ko Sehova:
“ ʼE mole iku anai,
ʼE mole hoko anai.
8 Ko te kolo muʼa ʼo Silia ko Tamaso,
Pea ko te pule ʼo Tamaso ko Letisini.
ʼE kei toe pe taʼu ʼe 65,
Pea ʼe molehi katoa anai ia Efalaimi mo tana hahaʼi.+
Kapau ʼe mole malohi takotou tui,
Pea ʼe mole kotou tutuʼu malohi anai.” ’ ”
10 Neʼe toe ui e Sehova kia Akase: 11 “Kole kia Sehova tou ʼAtua he fakailoga.+ ʼE feala anai ke malalo ohage ko te Faitoka* peʼe maʼoluga ohage ko te lagi.” 12 Kae neʼe tali e Akase: “ ʼE mole au kole anai he meʼa pea ʼe mole au ʼahiʼahiʼi anai ia Sehova.”
13 Neʼe ui leva e Esaia: “Hakoga ʼo Tavite, fakalelei siʼokotou loto ʼo fakalogo mai. Kua kotou fakaʼaogaʼi kovi te faʼa kataki ʼa te tagata. ʼE tonu koa ke kotou toe fakaʼaogaʼi kovi mo te faʼa kataki ʼa te ʼAtua?+ 14 ʼE foaki atu anai e Sehova totonu he fakailoga: ʼE faitama anai te taʼahine, ʼe ina fanauʼi anai he tama+ pea ʼe ina fakahigoaʼi anai ko Emanuele.*+ 15 ʼI muʼa ʼo tana iloʼi te fakakehekeheʼi ʼo te meʼa ʼae ʼe lelei mo te meʼa ʼae ʼe kovi, ʼe ina kai anai te potilo mo te meli. 16 ʼI muʼa ʼo te iloʼi e te tama te meʼa ʼae ʼe kovi mo te meʼa ʼae ʼe lelei, ʼe tuʼu lavaki anai te fenua ʼo te ʼu hau ʼe lua ʼae ʼe ke mataku ai.+ 17 ʼE tuku atu anai e Sehova kia koe mo tau hahaʼi pea mo te famili ʼo tau tamai, ni ʼaho faigataʼa neʼe heʼeki hoko talu mai te ʼaho ʼae neʼe mavete ai ia Efalaimi mo Suta,+ he ʼe Ina fekauʼi mai anai te hau ʼo Asilia.+
18 “ ʼI te ʼaho ʼaia, ʼe ʼaumai anai e Sehova te ʼu lago ʼo te ʼu vai tafe* ʼo te Nile ʼae ʼe tuʼu mamaʼo ʼi Esipito, pea mo te ʼu lago meli ʼo Asilia, 19 pea ʼe natou ʼomai fuli anai ʼo tutuʼu ʼi te ʼu mata mato,* ʼi te ʼu ava ʼo te ʼu maka, ʼi te ʼu ʼakau talatala fuli pea mo te ʼu vai fuli ʼae ʼe iinu ai te ʼu manu.
20 “ ʼI te ʼaho ʼaia, ʼaki te hau ʼo Asilia,+ ʼe tele anai e Sehova tona ʼulu mo ʼona vaʼe ʼo toe feia pe mo tona kaukava ʼaki he tele kava neʼe totogi fakatemi ʼi te potu fenua ʼo te Vai Tafe.*
21 “ ʼI te ʼaho ʼaia, ʼe tuku anai ke maʼuli he pipi fafine ʼo te faga manu mo ni ovi ʼe lua. 22 ʼE kai anai te potilo ʼi te mahu ʼo te huʼa pipi, pea ko natou fuli ʼae ka nonofo ʼi te fenua, ʼe natou kai anai te potilo mo te meli.
23 “ ʼI te ʼaho ʼaia, ʼi te ʼu potu ʼae neʼe maʼu ai ni fuʼu vite ʼe 1 000, ʼae ko tona tau ko piesi siliva ʼe 1 000, ʼe maʼu aipe anai te ʼakau talatala mo te vao kovi. 24 ʼE ʼomai anai ki ai te hahaʼi mo ni nahau mo ni kauʼi nahau, he ʼe kua mafola ʼi te fenua te ʼakau talatala mo te vao kovi. 25 Pea ʼe mole ke fakaovi anai ki te ʼu moʼuga fuli ʼae neʼe fakaʼatea ʼaki te hele tuʼusi ʼakau ʼuhi ko te ʼakau talatala mo te vao kovi. ʼE natou liliu anai ko he koga meʼa ʼe kakai ai te ʼu vitulo, ko he kele ʼe malamalaki e te ʼu ovi.”
8 Neʼe ui mai e Sehova: “Toʼo he lauʼi papa lahi+ pea ke tohi ki ai ʼaki he peni, ‘Maele-salale-kase-pase.’* 2 ʼE au loto ke fakamoʼoni ki ai pea mo tohi e ni tagata agatonu, te pelepitelo ko Ulia+ pea mo Sakalia te foha ʼo Sepelekia.”
3 Pea neʼe au momoe mo te fafine polofeta.* Neʼe faitama leva pea neʼe ina fanauʼi he tama.+ Pea neʼe ui mai e Sehova: “Fakahigoa ia ia ko Maele-salale-kase-pase, 4 koteʼuhi ʼi muʼa ʼo te toʼo e te tama ‘Tamai’ mo ‘Faʼe,’ ʼe ʼave anai te ʼu meʼa lelei ʼo Tamaso pea mo te koloa ʼae neʼe toʼo mai Samalia kia muʼa ʼo te hau ʼo Asilia.”+
5 Neʼe toe ui mai e Sehova:
6 “Neʼe liʼaki e te hahaʼi ʼaeni ia te ʼu vai tokalelei ʼo Siloe+
Pea neʼe natou fakafiafia ʼo ʼuhiga mo Letisini mo te foha ʼo Lemalia.+
7 Koia ʼe fakahake anai e Sehova kia natou
Te ʼu vai malohi mo lalahi ʼo te Vai Tafe,*
Ia te hau ʼo Asilia+ mo tona kololia katoa,
ʼE hage anai ko he vai tafe kua hake
ʼO lofia ai ʼona kauvai fuli
8 Pea mo tatafe ki Suta.
ʼEi, ʼe lomaki anai te fenua ʼo kaku ki te kia.+
ʼE ina folahi anai ʼona pakakau ohage ko he manulele ʼo ʼaofi tou fenua katoa,
9 ʼU puleʼaga, kotou agakovi kia natou, kae ʼe laliki anai koutou.
Kotou fagono mai, ia koutou fuli ʼae ʼe ʼomai mai ni potu fenua mamaʼo ʼo te kele!
Kotou teuteu ki te tau, kae ʼe laliki anai koutou!+
Kotou teuteu ki te tau, kae ʼe laliki anai koutou!
10 Kotou fakatuʼutuʼu he puleʼaki, kae ʼe to noa anai!
Kotou ui pe koutou te meʼa ʼae ʼe kotou loto ki ai, kae ʼe mole iku anai ia,
11 Neʼe tokoni mai kia au te nima malohi ʼo Sehova, pea koʼeni te meʼa ʼae neʼe ina ui mai ke mole au muliʼi te aga ʼa te hahaʼi ʼaeni:
12 “ ʼE mole tonu ke kotou ui: ‘Ko he fakatuʼutuʼu kaka!’ moka ui pe e te hahaʼi ʼaeni: ‘Ko he fakatuʼutuʼu kaka!’
ʼAua naʼa kotou tuʼania ki te meʼa ʼae ʼe natou tuʼania ki ai,
Pea ʼaua naʼa kotou matataku ai.
13 Ko Sehova ʼo te ʼatu kautau ʼae ʼe tonu ke maʼoniʼoni kia koutou,+
Ko Ia ʼae ʼe tonu ke kotou manavasiʼi ki ai,
Pea ko Ia ʼae ʼe tonu ke kotou fakaʼapaʼapaʼi.”+
14 Ki te ʼu puleʼaga ʼe lua ʼo Iselaele,
ʼE hage anai ko he sagatualio,
Ko he foʼi maka ʼe kita ʼi ai,
Ko he ʼutu ʼe kita tukia ai.+
Pea ki te hahaʼi ʼo Selusalemi,
ʼE hage anai ko he kupega mo he hele.
15 Ko te tokolahi ia natou ʼe tukia anai, mo fetoki pea mo lavevea.
ʼE natou to anai ki te hele pea ʼe puke ai natou.
16 Takai* te fakamoʼoni ʼae neʼe tohi,
Pea fakamaʼu te lao ʼo foaki ki ʼaku tisipulo.
17 ʼE au haga talitali anai* kia Sehova,+ ʼae ʼe mole kei tokaga ki te hakoga ʼo Sakopo,+ ʼei, ʼe au falala anai kia te ia.
18 Koʼeni au mo te ʼu fanau ʼae neʼe foaki mai e Sehova,+ ko matou ko ni fakailoga+ mo ni milakulo ʼi Iselaele mai ia Sehova ʼo te ʼatu kautau, ʼae ʼe nofo ʼi te Moʼuga ʼo Sione.
19 Pea kapau ʼe ui atu: “Kotou fakafehuʼi ia natou ʼae ʼe felogoi mo te kau mate peʼe ko te kau faifakakikite, ʼae ʼe muhumuhu mo fanafana,” ʼe mole koa la ko tonatou ʼAtua ʼae ʼe tonu ke fakafehuʼi e te hahaʼi? ʼE tonu koa ke natou fakafehuʼi te kau mate ke natou tokoni ki te hahaʼi maʼuli?+ 20 Kailoa, ʼe tonu ia ke natou kumi tokoni ki te lao mo te fakamoʼoni ʼae neʼe tohi.
Kapau ʼe mole alu tahi te meʼa ʼae ʼe kita ui mo te folafola ʼaia, ʼe mole kita maʼu anai he malama.+ 21 ʼE tahi fakalaka fakaʼofaʼofa mo pakupaku anai te tagata ʼi te fenua,+ pea ʼe laukovi anai ki tona hau mo tona ʼAtua ʼo sio ki ʼoluga, koteʼuhi ʼe pakupaku anai mo ita. 22 Pea ʼe sio anai ki te kele, kae koʼeni, ko te mamahi pe mo te fakapoʼuli, te lotomamahi mo te ʼu temi faigataʼa, te lotohoha mo te puli ʼo te malama.
9 Kae ʼe mole hage anai te fakapoʼuli ko te temi ʼae neʼe mamahi ai te fenua ʼi muʼa atu, ʼae neʼe meʼa noaʼi ai te fenua ʼo Sepulone mo te fenua ʼo Nefetali.+ Ki muli age, ʼe ina* faigaʼi anai ke fakaʼapaʼapaʼi te ala ʼae ʼe ovi ki te tai, ʼi te potu fenua ʼo Solotane, ia Kalilea ʼo te ʼu puleʼaga.
2 Ko te hahaʼi ʼae neʼe haʼele ʼi te fakapoʼuli
Neʼe sisio ki he toe malama.
Pea ko natou ʼae neʼe nonofo ʼi te fenua ʼo te fakapoʼuli gaogao
Neʼe mu kia natou te malama.+
3 Neʼe ke fakahahaʼi te fenua.
Neʼe ke foaki ki ai he toe fiafia.
ʼE natou fakafiafia ʼi ʼou muʼa
Ohage ko te fakafiafia ʼi te temi ʼo te taʼukai,
Ohage ko natou ʼae ʼe natou vaevae fakafiafia ni koloa.
4 ʼEi, he neʼe ke laliki te ʼakau ʼamo ʼae neʼe mamafa kia natou,
Te ʼakau ʼae neʼe ta ʼaki ʼonatou fuga ʼuma, te ʼakau ʼo te pule gaue,
Ohage ko te ʼu ʼaho ʼo Matiane.+
5 ʼE hokohokoʼi anai te afi
ʼAki te ʼu sulie fuli ʼa te kau solia ʼae ʼe galulu ai te kele moka natou haʼele
Pea ʼaki te ʼu mutuʼi meʼa fuli ʼae kua totoʼia.
ʼE fakahigoaʼi anai ko Faitokoni Taulekaleka,+ ʼAtua Malohi,+ Tamai Heʼe Gata, Tama ʼAliki ʼo Te Tokalelei.
7 ʼE mole ʼi ai anai he gataʼaga
ʼO te lahi ʼo tana pule* mo te tokalelei,+
ʼI te hekaʼaga fakahau ʼo Tavite+ mo tona puleʼaga.
ʼE tuʼu malohi anai+ pea ʼe lagolago anai ki ai
Te agatonu mo te faitotonu,+
ʼI te temi nei ʼo talu ai.
ʼE fakahoko anai te faʼahi ʼaia e Sehova ʼo te ʼatu kautau ʼaki he faʼafai.
8 Neʼe fakamauʼi e Sehova ia Sakopo mo ina fakaha ki ai,
ʼEi, neʼe ina fakaha ki Iselaele.+
9 Pea ʼe iloʼi anai e te hahaʼi fuli,
ʼEi, ia Efalaimi mo te hahaʼi ʼo Samalia,
Ia natou ʼae ʼe fialahi mo agapauʼu ʼo ui:
10 “Neʼe maʼofa ni piliki,
Kae ʼe matou toe laga anai ʼaki ni maka neʼe taʼataʼaga.+
Neʼe taʼaga he ʼu fuʼu sikomole,
Kae ʼe matou fetogi anai ʼaki he ʼu fuʼu sete.”
11 ʼE uga anai e Sehova te ʼu fili ʼo Letisini ke natou fakafeagai ki ai,*
Pea ʼe ina uga anai ʼona fili ke natou tauʼi ia ia:
12 ʼE haʼu anai ia Silia mai te potu esite pea ko te kau Filisitini mai te potu uesite,+
Pea ʼe natou avahi lahi anai ʼonatou gutu ke natou folo ia Iselaele.+
ʼE mole puli anai tona hauhau ʼuhi ko te ʼu meʼa fuli ʼaia,
Kae ʼe hoko atu pe tana faoʼi tona nima ʼo tauteaʼi natou.+
13 Neʼe mole toe liliu te hahaʼi kia ia ʼae neʼe ina tauteaʼi natou.
Neʼe mole natou kumi ia Sehova ʼo te ʼatu kautau.+
14 ʼE tuʼusi anai e Sehova
Te ʼulu mo te hiku ʼo Iselaele, te huli* mo te kauʼi kaho, ʼi he ʼaho pe ʼe tahi.+
15 Ko te takitaki mo te tagata ʼae ʼe fakaʼapaʼapaʼi ko te ʼulu,
Pea ko te polofeta ʼae ʼe ina akoʼi te loi ko te hiku.+
16 ʼE fakaheʼi te hahaʼi ʼaeni e ʼonatou takitaki,
ʼEi, kua puli te ʼatamai ʼo te hahaʼi ʼae ʼe fakalogo ki te kau takitaki.
17 Koia ʼae ʼe mole fakafiafia anai ia Sehova ʼo ʼuhiga mo ʼanatou kau tupulaga,
ʼE mole manavaʼofa anai ia ki ʼanatou fanau hala mo tamai mo ʼanatou fafine vitua,
Koteʼuhi ko ni hahaʼi heʼe agatonu* fuli mo agakovi,+
Pea ʼe natou palalau vale fuli.
ʼE mole puli anai tona hauhau ʼuhi ko te ʼu meʼa fuli ʼaia,
Kae ʼe hoko atu pe tana faoʼi tona nima ʼo tauteaʼi natou.+
18 ʼE vela te agakovi ohage ko he afi,
ʼO gosigosi ai te ʼakau talatala mo te vao kovi.
ʼE toe tutu ai anai te vao matuʼa
Pea ʼe manunu ai.
19 Neʼe vela te fenua
ʼUhi ko te hauhau ʼo Sehova ʼo te ʼatu kautau,
Pea ʼe liliu anai te hahaʼi ko he fafie ki te afi.
ʼE mole manavaʼofa anai he tahi maʼia ki tona tehina totonu.
20 ʼE tuʼusi anai te meʼa kai ʼi te faʼahi mataʼu,
Kae ʼe kei fia kakai pe anai.
ʼE kai anai te meʼa kai ʼi te faʼahi hema,
Kae ʼe mole makokona anai.
ʼE tahi kai pe anai tona nima,
21 ʼE folo anai e Manase ia Efalaimi,
Pea ʼe folo anai e Efalaimi ia Manase.
ʼE nā tauʼi fakatahi anai ia Suta.+
ʼE mole puli anai tona hauhau ʼuhi ko te ʼu meʼa fuli ʼaia,
Kae ʼe hoko atu pe tana faoʼi tona nima ʼo tauteaʼi natou.+
10 Malaʼia kia natou ʼae ʼe natou fai ni fakatotonu ʼe fakatupu mamahi,+
ʼAe ʼe natou teuteuʼi tuʼumaʼu ni lao ʼe mamafa,
2 Ke ʼaua naʼa fakamauʼi ʼi te faitotonu te kau masiva,
Pea ke fakafisi ki te ʼu tagi ʼa te kau vaivai ʼo taku hahaʼi.+
ʼE natou toʼo te ʼu koloa ʼo te ʼu fafine vitua
Pea ʼe natou kaihaʼa te ʼu fanau hala mo tamai!+
3 Kotea anai ka kotou fai ʼi te ʼaho ʼae ʼe fakamauʼi ai koutou,*+
Moka haʼu anai te maumau mai mamaʼo?+
ʼE kotou feholaki anai ʼo kumi tokoni kia ai?+
Pea ko ai ʼae ʼe kotou tuku anai ki ai ʼokotou koloa?
4 ʼE mahino ia, ʼe kotou tuʼutuli anai ʼi te kau pilisoni
Peʼe kotou leta fakatahi anai mo te ʼu sino mate.
ʼE mole puli anai tona hauhau ʼuhi ko te ʼu meʼa fuli ʼaia,
Kae ʼe hoko atu pe tana faoʼi tona nima ʼo tauteaʼi natou.+
5 “Koʼeni te tagata Asilia,+
Te toko ʼae ʼe au fakaʼaogaʼi moʼo fakaha toku hauhau+
Mo te ʼakau ʼae ʼi tona nima moʼo fakaha taku tautea!
6 ʼE au fekauʼi anai ia ia ke alu ʼo tauʼi he puleʼaga heʼe agatonu,*+
Te hahaʼi ʼae ʼe tupu ai toku hauhau.
ʼE au fakatotonu anai ki ai ke ina kaihaʼa mo toʼo ʼonatou koloa,
Mo malamalaki natou ohage ko te pela ʼo te ʼu ala.+
7 Kae ʼe mole loto anai ia ki te meʼa ʼaia,
ʼE mole ko te meʼa ʼaia ka ina teuteuʼi ʼi tona loto,
Koteʼuhi ʼe ina fia maumauʼi
Mo pulihi ni puleʼaga kaugamalie, kae ʼe mole ko ’ihi pe.
8 ʼE ina ui:
‘ ʼE mole hau fuli koa la ʼaku tama ʼaliki?+
9 ʼE mole hage koa la ia Kaleno+ ko Kalekemisi?+
ʼE mole hage koa la ia Hamate+ ko Alepate?+
ʼE mole hage koa la ia Samalia+ ko Tamaso?+
10 Neʼe maʼu e toku nima te ʼu puleʼaga ʼo te ʼu ʼatua vaʼiganoa,
ʼAe ko ʼonatou fakatata neʼe lahi age ʼi ʼae ʼo Selusalemi mo Samalia!+
11 ʼE mole au fai anai koa ki Selusalemi mo ʼona fakatata
Te meʼa ʼae neʼe au fai ki Samalia mo ʼona ʼatua vaʼiganoa?’+
12 “Ko au ia Sehova, ka au fakaʼosi anai taku gaue katoa ʼi te Moʼuga ʼo Sione pea mo Selusalemi, ʼe au tauteaʼi anai te hau ʼo Asilia ʼuhi ko tana agapauʼu mo tana fiatuʼu,+ 13 koteʼuhi ʼe ina ui:
‘ ʼE au fakahoko anai te meʼa ʼaia ʼaki te malohi ʼo toku nima
Mo toku poto he ʼe au poto.
ʼE au toʼo anai te ʼu tuʼakoi ʼo te ʼu fenua,+
Mo kaihaʼa ʼonatou koloa.+
Pea ʼe au puleʼi fakamalohi anai te hahaʼi.+
14 ʼE au toʼo anai te ʼu koloa ʼo te ʼu fenua,
Ohage ko he tagata ʼe ina ʼai tona nima ki he moeʼaga ʼo he manulele.
ʼE au tae anai te ʼu meʼa fuli ʼi te kele
Ohage ko he tae ʼo ni fuaʼi moa neʼe liʼakina!
Pea ʼe mole fakagaugaueʼi anai e he manulele ʼona pakakau, peʼe ina avahi tona gutu, peʼe tagi.’ ”
15 ʼE ui anai koa e te toki ʼe maʼuhiga age ia ʼi ʼae ʼe ina fakaʼaogaʼi?
ʼE ui anai koa e te tutuʼu ʼe maʼuhiga age ia ʼi ʼae ʼe ina fakaʼaogaʼi?
ʼE feala koa ki he ʼakau+ ke ina fakagaugaueʼi ia ia ʼae ʼe ina hiki,
Peʼe ki te toko hana lagaʼi ia ia ʼae ʼe ina toʼo?
16 Koia, ʼe fakavaivaiʼi anai ʼana tagata* malolohi
E te ʼAliki moʼoni ko Sehova ʼo te ʼatu kautau+
Mo ina tutu anai he afi kakaha ʼo puli ai tona kololia.+
17 ʼE hage anai ko he afi+ te Malama ʼo Iselaele+
Pea ko tona Maʼoniʼoni ko he uloʼi afi.
ʼE ina tutu anai ʼo gosigosi ai ʼona* vao kovi mo ʼona ʼakau talatala ʼi te ʼaho pe ʼe tahi.
18 ʼE ina pulihi katoa anai te taulekaleka ʼo tona vao matuʼa mo tana gaueʼaga.
ʼE hage anai tona taulekaleka ko te hifo ʼo te vaivai ʼo he tahi ʼe mahaki.+
19 ʼE mole lahi anai te ʼu fuʼu ʼakau ʼae ʼe tuʼu ʼi tona vao matuʼa
ʼO feala ai ke lau mo tohi e he kiʼi toe.
20 ʼI te ʼaho ʼaia, ko te toe ʼo te hahaʼi ʼo Iselaele,
Ia natou ʼae neʼe hao ʼi te hakoga ʼo Sakopo,
ʼE mole natou toe falanaki anai kia ia ʼae neʼe ina tauteaʼi natou,+
Kae ʼe natou falanaki anai kia Sehova,
Te Maʼoniʼoni ʼo Iselaele ʼi te agatonu.
21 ʼE toe liliu mai anai he toega,
ʼEi, te toega ʼo te hakoga ʼo Sakopo, ki te ʼAtua malohi.+
22 Iselaele, tatau aipe pe ʼe kaugamalie tau hahaʼi
Ohage ko te ʼu fisiʼi ʼone ʼo te tai,
Kae ko he toega pe anai ʼae ka toe liliu mai.+
23 ʼEi, ʼe fakahoko anai ʼi te fenua katoa,
Te maumau ʼae neʼe fakatuʼutuʼu e te Tuʼi ʼAliki ko Sehova ʼo te ʼatu kautau.+
24 Koia ʼae ʼe ui ai e te Tuʼi ʼAliki ko Sehova ʼo te ʼatu kautau: “Siʼaku hahaʼi, ia koutou ʼae ʼe nonofo ʼi Sione, ʼaua naʼa kotou matataku ki te tagata Asilia ʼae neʼe ina taʼi koutou ʼaki tona toko+ mo ina hiki kia koutou tana ʼakau ohage ko Esipito.+ 25 ʼI he kiʼi temi siʼi pe, ʼe gata ai anai te ita,* pea ʼe pulihi anai te tagata Asilia ʼo tupu ko toku hauhau.+ 26 ʼE hiki anai e Sehova ʼo te ʼatu kautau he huipi kia ia+ ohage pe ko te temi ʼae neʼe malo ai ia Matiane ʼi te fuʼu maka ʼo Olepi.+ Pea ʼe ina hiki anai tana ʼakau ki te tai, pea ʼe hage pe anai tana hiki ʼaia ko tana fai ki Esipito.+
29 Neʼe fakalaka ʼi he vai tafe ʼe mole loloto.
Neʼe moe ʼi Kepa.+
Neʼe mataku ia Lama pea neʼe feholaki te hahaʼi ʼo Kipease+ te kolo ʼo Saulo.+
30 Taʼahine ʼo Kalimi, kalaga leʼo lahi!
Tokaga kia koe Laise!
Siʼi Anatote!+
31 Kua hola ia Matemena.
Neʼe kumi nonoʼaga te hahaʼi ʼo Kepime.
32 ʼI te ʼaho pe ʼaia, ʼe tuʼu anai ʼi Nope.+
ʼE ina fakamatakuʼi te moʼuga ʼo te taʼahine ʼo Sione ʼaki tona tuke,
Te kiʼi moʼuga ʼo Selusalemi.
33 Koʼeni te ʼAliki moʼoni ko Sehova ʼo te ʼatu kautau,
ʼE ina fasifasiʼi ni vaʼa pea ʼe fakamataku tana logoaʼa.+
ʼE tuʼusi te ʼu fuʼu ʼakau lalahi
Pea ko te ʼu fuʼu ʼakau ʼae ʼe maʼoluga ʼe tuku ki lalo.
34 ʼE ina tuʼusi te ʼu fuʼu ʼakau ʼo te vao matuʼa ʼaki he toki,
Pea ʼe toka anai te ʼu fuʼu ʼakau ʼo Lipane, he ʼe taʼaga anai e ia ʼae ʼe malohi.
2 ʼE nofo anai te laumalie ʼo Sehova ia ia,*+
Koia ʼe poto+ anai mo ʼatamai,
ʼE faitokoni lelei anai mo malohi,+
ʼE ina maʼu anai te ʼatamai malama mo manavasiʼi kia Sehova.
3 ʼE fiafia anai ʼi te manavasiʼi kia Sehova.+
ʼE mole ina fakamauʼi anai ʼaki pe te meʼa ʼae ʼe sio ki ai,
Peʼe ina fakatonutonuʼi he tahi ʼaki pe te meʼa ʼae ʼe logo ki ai.+
4 ʼE ina fakamauʼi anai ia natou liliki ʼi te faitotonu
Mo ina fakatonutonuʼi ʼi te agatonu ke fua lelei ki te kau agavaivai ʼo te kele.
ʼE ina taʼi anai te kele ʼaki te ʼakau ʼae ʼe haʼu mai tona gutu+
Pea ʼe ina matehi anai te agakovi ʼaki tana manava.+
5 ʼE hage anai te faitotonu ko te kiliʼi pipi ʼi tona koga loto
Pea ʼe hage anai te agatonu ko te kiliʼi pipi ʼi ʼona faʼahi vakavaka.+
6 ʼE nofo fakatahi anai te lupo mo te akeno ʼi he kiʼi temi,+
ʼE takoto anai te leopa mo te ʼuhiʼi tao,
ʼE fakatahi fuli anai te ʼuhiʼi pipi, mo te laione, mo te manu ʼae ʼe fafaga lelei,*+
Pea ʼe taki anai natou e he kiʼi tama.
7 ʼE kakai fakatahi anai te pipi fafine mo te uluso fafine,
Pea ʼe toe takokoto fakatahi anai ʼonā ʼuhi.
ʼE kai anai e te laione ia te luna moamoa ohage ko te vitulo.+
8 ʼE gaoʼi anai te kiʼi toe meamea ʼo ovi ki te nofoʼaga ʼo te gata ʼae ʼe fakatupu mate,
Pea ʼe ʼai anai e te kiʼi toe ʼae kua vaheʼi ia tona nima ki te pu ʼae ʼe nono ai te gata kafokona.
9 ʼE mole hoko anai he mamahi+
Peʼe ko he maumau ʼi toku moʼuga maʼoniʼoni katoa,+
Koteʼuhi ʼe fonu moʼoni anai te kele ko te ʼatamai malama ʼo ʼuhiga mo Sehova
Ohage ko te ʼaofi e te ʼu vai te takele ʼo te tai.+
10 ʼI te ʼaho ʼaia ʼe tuʼu anai te aka ʼo Sese+ ko he fakailoga* ki te ʼu puleʼaga.+
ʼE natou maliu mai anai kia ia ke ina takitaki natou,*+
Pea ʼe fonu anai tona maloloʼaga ko te kololia.
11 ʼI te ʼaho ʼaia ʼe toe faoʼi anai e Sehova tona nima, ko tona tuʼa lua ʼaia, ke ina toe maʼu te toega ʼo tana hahaʼi ʼae neʼe tuku ʼi Asilia,+ mo Esipito,+ mo Patolosi,+ mo Kusi,+ mo Elame,+ mo Sinea,* mo Hamate pea mo te ʼu motu ʼo te tai.+ 12 ʼE ina fakatuʼu anai he fakailoga* ki te ʼu puleʼaga. ʼE ina fakatahiʼi anai ia natou ʼo Iselaele ʼae neʼe mavetevete+ pea ʼe ina tanaki anai mai te ʼu potu taupotu ʼe fa ʼo te kele ia natou ʼo Suta ʼae neʼe fakaʼaunofo.+
13 ʼE puli anai te maheka ʼo Efalaimi,+
Pea ʼe pulihi anai ia natou ʼae ʼe fehihiʼa ki Suta.
ʼE mole maheka anai ia Efalaimi ki Suta,
Pea ʼe mole fehiʼa anai ia Suta ki Efalaimi.+
14 ʼE nā feleleʼi anai ʼi te ʼu mahifo ʼo te fenua ʼo te kau Filisitini ʼi te potu uesite,
Pea ʼe nā kaihaʼa anai te hahaʼi ʼo te potu Esite.
Pea ʼe mamaha anai ʼona maga ʼe fitu* ʼi te vela ʼo tana manava,
ʼO ina fakahaʼele ai te hahaʼi mo ʼonatou sulie.
16 ʼE ʼi ai anai he ala laulahi+ mai Asilia maʼa te toega ʼo tana hahaʼi,+
Ohage ko te ala ʼae mai Esipito maʼa te kau Iselaele ʼi te ʼaho ʼae neʼe natou mavae mai ai.
12 ʼI te ʼaho ʼaia ʼe ke ui anai:
“Sehova e, ʼe au fakamalo atu,
Koteʼuhi logo la neʼe ke ita kia au,
Kae kua malū ifo tou ita ʼo ke fakapelepeleʼi au.+
2 Ko te ʼAtua ko toku haofakiʼaga.+
ʼE au lotofalala anai pea ʼe mole au mataku anai,+
He ʼe ko Sehova,* ʼei, ko Sehova toku malohi mo toku puipuiʼaga,
Pea kua liliu ko toku haofakiʼaga.”+
3 ʼE kotou ohu anai te vai ʼi te fiafia
ʼI te ʼu matapuna vai ʼo te haofaki.+
4 Pea ʼi te ʼaho ʼaia ʼe kotou ui anai:
“Kotou fakafetaʼi kia Sehova, kotou vikiʼi* tona huafa,
Kotou fakaha ʼana gaue fakaofoofo ki te hahaʼi.+
Kotou kalagaʼi te maʼoluga ʼo tona huafa.+
5 Kotou hiva ni fakavikiviki* kia Sehova+ he neʼe ina fai ni gaue taulekaleka.+
Ke iloʼi ʼi te kele katoa.
6 Kalaga fakafiafia ia koe ʼae ʼe nofo ʼi* Sione,
He ʼe maʼoluga te Maʼoniʼoni ʼo Iselaele ʼae ʼe nofo mo koe.”
13 Koʼeni te folafola ʼo ʼuhiga mo Papiloni+ ʼae neʼe fakaha kia Esaia+ te foha ʼo Amote ʼi he meʼa neʼe sio ki ai:
2 “Kotou fakatuʼu he fakailoga*+ ʼi he moʼuga makamakaʼia.
Kotou pauʼi mo taukalo kia natou,
Ke natou hu ʼi te ʼu matapa ʼo te kau ʼaliki.
3 Neʼe au fakatotonu kia natou ʼae neʼe au fakanofo.+
Neʼe au pauʼi ʼaku tagata tau ke natou fakatuʼā ia natou ʼae ʼe tupu ai toku ita,
ʼE natou fakafiafia ʼi te fialahi.
4 Kotou fakalogo! ʼE ʼi ai he hahaʼi tokolahi ʼi te ʼu moʼuga,
ʼE hage ʼe natou kaugamalie!
Kotou fakalogo te logoaʼa ʼa te ʼu puleʼaga,
Te gatutu ʼa te ʼu foʼi tau ʼae kua fakatahiʼi!+
ʼE vakavakaʼi e Sehova ʼo te ʼatu kautau ʼana kau solia ki te tau.+
5 ʼE haʼu ia Sehova mo te ʼu mahafu ʼo tona hauhau
Mai he fenua mamaʼo,+
Mai te potu taupotu ʼo te lagi
Moʼo maumauʼi te kele katoa.+
6 Kotou kalaga leʼo lahi he ʼe kua ovi mai te ʼaho ʼo Sehova!
ʼI te ʼaho ʼaia, ʼe maumauʼi anai ia meʼa fuli e te Mafimafi.+
7 Koia ʼe vaivai anai te ʼu nima fuli,
Pea ʼe lumaʼea anai te tagata fuli ʼi te mataku.+
8 ʼE natou manavahe.+
ʼE natou tete ʼi te mamahi,
Ohage ko he fafine ʼe fanau.
ʼE natou fesioʼaki ʼi he toe mataku
Pea ʼe iloga tanatou hoha ʼi ʼonatou fofoga.
9 Koʼeni ʼe haʼu te ʼaho ʼo Sehova,
ʼE fakamatakutaku anai, pea ʼe to anai tona hauhau
Ke fehiʼaʼinaʼi te fenua+
Mo pulihi ai te kau agahala.
10 ʼE mole gigila anai
Te ʼu fetuʼu ʼo te lagi mo te ʼu pupuga fetuʼu,*+
ʼE mole mu anai te laʼa moka hopo ake,
Pea ʼe mole huhulu anai te mahina.
11 ʼE au fakamauʼi anai te kele ʼuhi ko tana agakovi+
Pea mo te kau agakovi ʼuhi ko ʼanatou lakahala.
ʼE au fakagata anai te fialahi ʼa te kau fiamaʼoluga
Pea ʼe au fakalainoaʼi anai te fiatuʼu ʼa te ʼu pule agamalohi.+
12 ʼE au fakaliliu anai te tagata ke tahitahiga age tona maʼu ʼi te maʼu ʼo te aulo maʼa,+
Pea ke tahitahiga age te maʼu ’o te hahaʼi ʼi te ma’u ’o te aulo mai Ofile.+
13 Koia ʼe au fakagalulu anai te lagi,
Pea ʼe gaugaue anai te kele ʼo mavae mai tona tuʼuʼaga+
ʼUhi ko te ita lahi ʼo Sehova ʼo te ʼatu kautau ʼi te ʼaho ʼo tona hauhau.
14 ʼE tahi liliu anai ki tana hahaʼi,
Pea mo tahi hola anai ki tona fenua,
Ohage ko he tia fafine ʼe tuli, mo he faga manu ʼe mole tanaki e he tahi.+
15 ʼE hokaʼi anai ia natou ʼae ka maʼu ʼaki te tao
Pea ʼe matehi anai ia natou ʼae ka puke ʼaki te heleta.+
16 ʼE tamateʼi anai ʼanatou fanau ʼi ʼonatou muʼa,+
Mo kaihaʼa anai ʼonatou loto fale,
Pea ʼe fakaʼalikiʼi anai ʼonatou ʼohoana.
17 Koʼeni ʼe au fekauʼi kia natou te kau Metia,+
ʼAe ʼe natou meʼa noaʼi te siliva
Pea ʼe mole natou leleiʼia te aulo.
18 ʼE natou fana anai te kau tupulaga ʼaki te ʼu kauʼi nahau,+
ʼE mole natou manavaʼofa anai
Peʼe fakaʼofaʼofa ki te ʼu fanau.
19 Pea ko Papiloni ʼae ʼe lahi age tona kololia ʼi te ʼu puleʼaga,+
Te taulekaleka mo te fiameʼameʼa ʼa te kau Kaletea,+
ʼE hage anai ko Sotoma mo Komola ʼae neʼe pulihi e te ʼAtua.+
ʼE mole fakatuʼu ai anai e he Alape tona fale la
Pea ʼe mole fakamalolo ai anai e he tauhi ovi tana faga manu.
21 ʼE takokoto anai ʼi ai te ʼu manu ʼo te toafa,
ʼE fonu anai te ʼu ʼapi ko te ʼu lulu,
22 ʼE fetagihi anai te ʼu manu ʼo te vao ʼi ʼona tule,
Mo te ʼu kuli ʼo te vao ʼi ʼona fale hau matalelei.
Kua ovi mai tona hola pea kua nounou ʼona ʼaho.”+
14 ʼE manavaʼofa anai ia Sehova kia Sakopo+ pea ʼe ina toe filifili anai ia Iselaele.+ ʼE ina fakanofo anai ia natou ki tonatou fenua,+ pea ʼe fakatahi anai te hahaʼi matapule mo natou pea ʼe natou pipiki anai ki te hologa ʼo Sakopo.+ 2 ʼE toe fakaliliu anai natou ki tonatou fenua e ni hahaʼi ʼo he tahi ʼu puleʼaga, pea ʼe fakaliliu anai natou e te hologa ʼo Iselaele ko ni tagata mo fafine kaugana+ ʼi te fenua ʼo Sehova. ʼE natou pilisoniʼi anai ia natou ʼae neʼe natou pilisoniʼi natou. Pea ʼe natou puleʼi anai ia natou ʼae neʼe natou fakakinauʼi natou ke gaue.*
3 ʼI te ʼaho ʼae ka fakafimalieʼi ai koe e Sehova mai tou mamahi, mo tau hoha pea mo tou maʼuli popula ʼae neʼe fakakinauʼi atu,+ 4 ʼe ke lau anai ki te hau ʼo Papiloni te taʼaga lea ʼaeni moʼona vaʼi:
“ ʼEa koa, kua puli ia ia ʼae neʼe ina fakakinauʼi ʼihi ke gaue!
ʼEi, kua puli ia ia ʼae ʼe agamalohi!+
5 Kua fasiʼi e Sehova te toko ʼo te kau agakovi,
Te ʼakau ʼo te ʼu pule,+
6 Ia ia ʼae neʼe ina haha tuʼumaʼu te ʼu puleʼaga ʼi tona ita,+
Mo puleʼi fakaita te ʼu puleʼaga mo fakatagaʼi natou.+
7 Kua fimalie te kele katoa, kua tokalelei ia.
Kua lahi tona fiafia.+
8 ʼE toe fiafia ʼo ʼuhiga mo koe
Te ʼu fuʼu senelie mo te ʼu fuʼu sete ʼo Lipane.
ʼE natou ui: ‘Talu tau to,
ʼE mole kei he tahi ʼe haʼu ʼo taʼaga matou.’
9 ʼE toe feʼohoʼaki mo te Faitoka* ʼi lalo
Moʼou fakatalitali.
ʼE ina fafagu maʼa koe ia natou ʼae ʼe mole kei honatou malohi ʼi te mate,
Te kau takitaki agamalohi* fuli ʼo te kele.
ʼE ina fakatuʼu te ʼu hau fuli ʼo te ʼu puleʼaga mai ʼonatou hekaʼaga fakahau.
10 ʼE natou palalau fuli mo ui atu:
‘Kua ke toe vaivai koa la mo koe?
Kua ke hage koa koe ko matou?
ʼE ke takoto ki te ʼugaga ohage ko he palepale
Pea ʼe ke kafuʼi te ʼunukele.’
12 Koʼeni kua ke to mai te lagi,
Ia koe ʼae ko te fetuʼu gigila, te foha ʼo te mafoata!
Koʼeni kua ke toka ki te kele,
Ia koe ʼae neʼe ke malo ʼi te ʼu puleʼaga!+
13 Neʼe ke ui koe: ‘ ʼE au hake anai ki te lagi.+
ʼE au hiki anai toku hekaʼaga fakahau ʼo maʼoluga age ʼi te ʼu fetuʼu ʼa te ʼAtua+
Pea ʼe au heka anai ʼi te moʼuga ʼae ʼe fai ai te tauhi,
ʼI te ʼu potu taupotu ʼo te potu noleto.+
14 ʼE au hake anai ʼo maʼoluga age ʼi te tumutumu ʼo te ʼu ʼao.
Pea ʼe au liliu anai ohage ko te Maʼoluga.’
15 Kae ʼe fakahifo fakahagatonu anai koe ki te Faitoka,*
Ki te ʼu potu loloto ʼo te luo.
16 Ko natou ʼae ka sisio atu, ʼe natou sio’i fakamama’u anai ia koe.
ʼE natou sioʼi fakalelei anai koe mo ui:
‘ ʼE mole ko te tagata koa la ʼaeni neʼe feʼohoʼaki ai te kele,
ʼAe neʼe matataku ki ai te ʼu puleʼaga,+
17 ʼAe neʼe ina fakaliliu te kele ʼae ʼe nofoʼi ko he toafa,
ʼAe neʼe ina holoʼi ʼona kolo,+
ʼAe neʼe mole ina tuku te kau pilisoni ke liliu kio natou?’+
18 Ko te ʼu hau fuli ʼae ʼo te ʼu puleʼaga,
ʼEi, ia natou fuli, ʼe natou takokoto ʼi te kololia,
ʼO takitahi tona fale maka.
19 Kae ʼe liʼaki anai koe, ʼo mole hou fale maka.
ʼE ke hage anai ko he huli* ʼe fehiʼaʼinaʼi,
ʼE taʼotaʼo e natou ʼae neʼe matehi ʼaki te heleta,
ʼE li ki he luo ʼe fonu ai te maka,
ʼE ke hage anai ko he sino mate neʼe malamalaki.
20 ʼE mole ke toe fakatahi anai mo natou ʼi he fale maka,
He neʼe ke maumauʼi tou fenua,
Neʼe ke matehi tau hahaʼi.
ʼE mole toe palalauʼi anai ʼi he temi te hologa ʼo te kau agakovi.
21 Kotou teuteuʼi he koga meʼa ke matehi ai ʼona foha,
ʼUhi ko te lakahala ʼo ʼanatou kui,
Ke mole feala ke natou toe tutuʼu ake ʼo puleʼi te kele
Pea mo fakafonu te malamanei ʼaki ʼonatou kolo.”
22 ʼE ui e Sehova ʼo te ʼatu kautau: “ ʼE au fakafeagai anai kia natou.”+
ʼE ui e Sehova: “ ʼE au molehi anai mai Papiloni te higoa mo te toega, te fanau mo te hakoga.”+
23 ʼE ui e Sehova ʼo te ʼatu kautau: “ ʼEi, ʼe au fakaliliu anai ko he nofoʼaga ʼo te ʼu eliso mo he koga meʼa ʼe lahi ai ni foʼi vai, pea ʼe au hiko anai ia ia ʼaki te taufale ʼo te fakaʼauha.”+
24 Neʼe fakapapau e Sehova ʼo te ʼatu kautau:
“ ʼE hoko anai te fakatuʼutuʼu ʼae neʼe au fai.
ʼEi, ko te tonu ʼae neʼe au fai ʼe hoko moʼoni anai.
25 ʼE au laliki anai te tagata Asilia ʼi toku fenua,
ʼE au malamalaki anai ia ia ʼi ʼoku moʼuga.+
Pea ʼe toʼo anai te ʼakau ʼamo ʼae ʼi taku hahaʼi,
Mo te ʼamoga ʼae ʼi ʼonatou fuga ʼuma.”+
26 Ko te fakatuʼutuʼu ʼaia ki te kele katoa,
Pea koʼena te nima ʼae kua tokalelei ke ina taʼi te ʼu puleʼaga fuli.
27 Kua fakatotonu e Sehova ʼo te ʼatu kautau,
Pea ko ai ʼae ʼe feala ke ina holoʼi?+
Kua tokalelei tona nima ke ina taʼi,
Pea ko ai ʼae ʼe feala ke ina taʼofi?+
28 ʼI te taʼu ʼae neʼe mate ai te Hau ko Akase,+ neʼe tala ai te logo ʼaeni:
29 “ ʼAua naʼa ke fakafiafia, Filisitini katoa,
Koteʼuhi kua fasiʼi te ʼakau ʼa ia ʼae neʼe ina haha ʼaki koe.
ʼE haʼu anai mai te hakoga ʼo te gata+ he gata kafokona,+
Pea ko tona hako, ʼe ko he gata kafokona ʼosi.
30 ʼE kakai anai te ʼu ʼuluaki tupu ʼo te hahaʼi ʼae ʼe malalo
Pea ʼe takokoto anai ʼi te fimalie te kau masisiva.
Kae ʼe au pulihi anai tou hakoga ʼaki te hoge,
Pea ʼe matehi anai ia natou ʼae ʼe toe.+
31 Matapa ke ke kalaga! Kolo ke ke lauga!
Filisitini katoa ʼe ke lotovaivai anai!
ʼE haʼu he kohu mai te potu noleto
Pea ʼe mole hehe he tahi ʼi te ʼu ʼatu ʼo ʼou fili.”
32 Kotea anai he tali ’e foaki age ki te kau ʼave logo ʼo te puleʼaga?
Neʼe fakatuʼu e Sehova te ʼu fakatafito ʼo Sione,+
Pea ʼe fenonoʼi ai anai te kau agavaivai ʼo tana hahaʼi.
15 Koʼeni te logo ʼo ʼuhiga mo Moape:+
Neʼe pulihi ia Ali+ ʼo Moape,
Neʼe maumauʼi ʼi he po ʼe tahi.
Neʼe pulihi ia Kile+ ʼo Moape,
Neʼe maumauʼi ʼi he po ʼe tahi.
Neʼe tagilaulau ia Moape ki Nepo+ mo Metepa.+
Neʼe tele fuli ʼonatou ʼulu+ mo kosi fuli ʼonatou kava.+
3 ʼI te ʼu ala, ʼe kofuʼi e te hahaʼi ni taga.*
ʼI te ʼu ʼato mo te ʼu malaʼe lalahi, ʼe natou kalaga fuli,
ʼE natou faifetagihi.+
Koia ʼae ʼe hoko atu ai te kalaga ʼa te kautau ʼo Moape.
ʼE matataku te hahaʼi.
5 ʼE tagi toku loto ʼo ʼuhiga mo Moape.
ʼE feholaki te hahaʼi ʼo kaku ki Tesoa+ mo Ekalate-selisisa.+
ʼI te mahake ʼo Lukite, ʼe natou hake fetagihi,
ʼI te ala ʼo Kolonaimi, ʼe natou kalaga ʼuhi ko te maumau.+
6 Kua magemage katoa te ʼu vai ʼo Nimelimi.
Kua moamoa te luna,
Kua puli te luna, ʼe mole kei maʼuli he meʼa.
7 Koia ʼae ʼe ʼave ai te ʼu toega ʼo te ʼu meʼa kai mo te ʼu koloa,
ʼE fakalaka te hahaʼi ʼi te vai tafe* ʼo te ʼu fuʼu sole.
8 Kua logo te ʼu kalaga ʼi te fenua katoa ʼo Moape.+
Kua logo te ʼu kalaga ki Ekalaime,
Kua logo te ʼu kalaga ki Peele-elimi.
9 Kua fonu toto te ʼu vai ʼo Timune,
Pea ʼe kei toe te tahi ʼu malaʼia ki Timune:
ʼE au ʼaumai anai ni laione kia natou ʼae ʼe feholaki ʼi Moape
Pea mo natou ʼae ka toe ʼi te fenua.+
16 ʼAve he ovi tagata ki te pule ʼo te fenua,
Mai Selea ʼo fakalaka ʼi te toafa
ʼO kaku ki te moʼuga ʼo te taʼahine ʼo Sione.
2 Ohage ko he manulele ʼe kapu mai tona moeʼaga,+
ʼE feia anai te ʼu taʼahine ʼo Moape ʼi te ʼu potu ʼae ʼe mole loloto ʼo te vai tafe ʼo Alenone.+
3 “Foaki he tokoni, mulimuli ki te tonu.
ʼI te fetapa totonu, fakaliliu tou malu ke hage ko te poʼuli.
Fakanono ia natou ʼae ʼe mavetevete pea ʼaua naʼa ke kakaʼi ia natou ʼae neʼe feholaki.
4 Moape, tuku taku hahaʼi ʼae ʼe mavetevete ke nonofo io koe!
Ke ke liliu ko honatou nonoʼaga mai ia ia ʼae ʼe fakatupu maumau.+
ʼE pulihi anai te tagata agakovi,
Pea gata ai te maumau,
Pea ʼe toʼo anai mai te kele ia natou ʼae neʼe natou malamalaki ʼihi.
5 Pea ʼe fakatuʼu malohi anai he hekaʼaga fakahau ʼaki te ʼofa.*
ʼE agatonu anai ia ia ʼae ka heka ki ai mai te fale la ʼo Tavite,+
ʼE ina fakamauʼi mo fakahoko fakavilivili anai ʼi te faitotonu.”+
6 Neʼe matou logo talanoa ki te fialahi ʼo Moape, ʼei, tona fialahi ʼosi,+
Tona fiatuʼu, tona fialahi mo tona itaita.+
Kae ʼe mole hoko anai ʼana talaga vaʼiganoa.
7 Koia ʼae ʼe kalaga anai ia Moape ʼuhi ko tona malaʼia,
ʼE natou kalaga fuli anai.+
ʼE lauga anai ia natou ʼae neʼe mole malo ʼo manatuʼi te ʼu foʼi keke vite ʼo Kile-aleseti.+
8 Kua moamoa te ʼu gaueʼaga ʼo Heseponi,+
ʼO toe feia mo te gaueʼaga vite ʼo Sipima.+
Neʼe malamalaki e te ʼu pule ʼo te ʼu puleʼaga ʼona vaʼa kula.*
Neʼe kaku ia ki Saesele,+
Neʼe mafola ia ki te toafa.
Neʼe homo ʼona vaʼa ʼo mafola ki te tai.
9 Koia ʼae ʼe au tagi anai ki te fuʼu vite ʼo Sipima ohage ko taku tagi kia Saesele.
Heseponi mo Eleale, ʼe au fakavai anai koulua ʼaki ʼoku loʼimata,+
He ʼe mole kei logo te ʼu kalaga fakafiafia ʼuhi ko* ʼakolua fuaʼi ʼakau ʼo te temi mafana mo ʼakolua taʼukai.
10 Kua puli te fiafia ʼi te gaueʼaga,
ʼE mole kei ʼi ai ni hiva mo ni kalaga fakafiafia ʼi te ʼu gaueʼaga vite.+
ʼE mole kei lomi e he tahi ni vite ʼi te ʼu lomiʼaga vite,
Kua au fakagata te ʼu kalaga fakafiafia.+
11 Koia ʼae ʼe au hoha ai ʼo ʼuhiga mo Moape+
Ohage ko ni kauʼi uka ʼo he alepa moka ta,
ʼEi, ʼe au hoha ʼo ʼuhiga mo Kile-aleseti.+
12 Koia ʼe mole he ʼuhiga anai ʼo te kinakina ʼa Moape moka hake ki te faʼahi maʼoluga pea mo tana alu ʼae ʼo faikole ʼi tona sagatualio.+
13 Ko te logo ʼaia neʼe tala e Sehova ʼo ʼuhiga mo Moape. 14 ʼI te temi nei ʼe ui e Sehova: “ ʼE fakalainoaʼi anai te kololia ʼo Moape pea ʼe hoko tonu ia taʼu ʼe tolu.* ʼE tau anai mo ni mamahi kehekehe pea ko natou ʼae ka toe, ʼe mole maʼuhiga anai, ʼe tokosiʼi anai.”+
17 Koʼeni te logo ʼo ʼuhiga mo Tamaso:+
“Kotou sisio ki Tamaso ʼe mole toe ui anai ko he kolo,
ʼE maumauʼi anai ia!+
2 ʼE liʼakina anai te ʼu kolo ʼo Aloele,+
ʼE liliu anai ko ni koga meʼa ʼe takokoto ai te ʼu faga manu,
ʼE mole fakamatakuʼi ai e he tahi.
3 ʼE pulihi anai te ʼu kolo malolohi ʼo Efalaimi,+
Pea ʼe to anai te puleʼaga ʼo Tamaso.+
Ko te kau Silia ʼae ka toe,
ʼE puli anai tonatou kololia ohage ko te kololia ʼo te kau Iselaele,” ko te ui ʼaia ʼa Sehova ʼo te ʼatu kautau.
4 “ ʼI te ʼaho ʼaia ʼe mole kei lahi te kololia ʼo Sakopo
Pea kua sino kovi ʼo mole kei malohi.
5 ʼE hage anai ia ko te ʼaho ʼae ʼe tuʼusi ai e te tagata te fulumeto,
Pea ʼe tanaki te ʼu kauʼi fulumeto
Ohage pe ko te tae ʼo te ʼu kauʼi fulumeto ʼi te Potu Fenua Laulelei ʼo Lefaimi.+
6 ʼE veliveli anai te ʼu fuaʼi ʼakau ʼae ʼe kei toe ke tae,
Ohage ko te haha ʼo te oliveto:
He ʼu foʼi oliveto momoho pe ʼe lua peʼe tolu ʼi te vaʼa maʼoluga,
He ʼu foʼi oliveto ʼe fa peʼe nima ʼi te ʼu vaʼa ʼae ʼe fua,”+ ko te ui ʼaia ʼa Sehova, te ʼAtua ʼo Iselaele.
7 ʼI te ʼaho ʼaia, ʼe haga anai te tagata kia Ia ʼae neʼe ina fakatupu, pea ʼe mamata anai ki te Maʼoniʼoni ʼo Iselaele. 8 ʼE mole ina sioʼi anai te ʼu ʼaletale,+ te gaue ʼo ʼona nima,+ ʼe mole mamata anai ki te ʼu meʼa ʼae neʼe ina faʼu: te ʼu pou ʼakau taputapu* mo te ʼu tuʼulaga iseso.
9 ʼI te ʼaho ʼaia, ʼe liliu anai ʼona kolo malolohi ohage ko he koga meʼa lavaki ʼi te vao matuʼa,+
Ohage ko he vaʼa ʼakau ʼe liʼaki ia muʼa ʼo te kau Iselaele.
ʼE natou liliu anai ko he toafa.
10 Neʼe ke* galoʼi te ʼAtua+ ʼae ʼe ina haofaki ia koe,
Neʼe mole ke manatuʼi tou Maka Malohi,+ tou kolo tau.
Koia ʼae ʼe ke fai ai he ʼu gaueʼaga matalelei
Pea ke to ki ai he huli ʼo he matapule.*
11 ʼI te ʼaho, ʼe ke ʼa fakalelei’i tau gaueʼaga,
ʼI te uhu, ʼe ke fakahomo ai tau pulapula,
Kae ʼe mole ke utu anai he meʼa ʼi te ʼaho ʼae ʼe ke mahaki mo mamahi kovi ai.+
12 Kotou logo ki te logoaʼa ʼa he hahaʼi kaugamalie!
ʼE hage tanatou logoaʼa ko te hou ʼa te tai.
ʼE gugulu te ʼu puleʼaga!
ʼE hage tanatou gugulu ko te tatafe malohi ʼa te ʼu vai.
13 ʼE gugulu te ʼu puleʼaga ohage ko ni vai lalahi.
ʼE fakatonutonuʼi anai natou e te ʼAtua pea ʼe natou feholaki mamaʼo anai
Ohage ko te viligia ʼa te ʼu kiliʼi fulumeto ʼi te ʼu moʼuga
Ohage ko te vao talatala ʼae ʼe ʼave e te ʼahiohio.
14 ʼI te afiafi, ko te mataku.
Pea ia muʼa ʼo te mafoata, kua natou pulinoa.
Ko te vahe ʼaena ʼo natou ʼae ʼe natou gaohi koviʼi tatou,
Ko te ikuʼaga ʼaia ʼo natou ʼae ʼe natou kaihaʼa tatou.
18 Malaʼia ki te fenua ʼae ʼe logo ai te lele ʼa te ʼu kiʼi manu,
ʼI te potu fenua ʼo te ʼu vai tafe ʼo Etiopea!+
2 ʼE ina fekauʼi he ʼu tagata fakafofoga ʼi te tai,
ʼI ni vaka papilusi ʼe faifolau ʼi te ʼu vai, ʼo ina ui:
“Kotou olo kau ʼave logo gaholo
Ki he puleʼaga ʼo ni hahaʼi lalahi mo kili momole,
Ki he hahaʼi ʼe matakuʼia ʼi te ʼu potu fuli,+
Ki he puleʼaga malohi mo tau tuʼumaʼu,
ʼAe ʼe ʼave e te ʼu vai te ʼu kele.”
3 Hahaʼi ʼo te malamanei, ia koutou fuli ʼae ʼe nonofo ʼi te kele,
Ko te meʼa ʼae ka kotou sisio ki ai ʼe hage anai ko he fakailoga* ʼe tuʼu ʼi te ʼu moʼuga
Pea ko te meʼa ʼae ka kotou logo ki ai ʼe hage anai ko te pupuhi ʼo te fakatagi pupuhi.
4 Koʼeni te meʼa ʼae neʼe ui mai e Sehova:
“ ʼE au fimalie anai ʼo sioʼi* toku nofoʼaga ʼae ʼe tuʼu malohi,
Ohage ko te vevela ʼo te laʼa,
Ohage ko he ʼao ʼo te hahau ʼi te temi vela ʼo te taʼukai.
5 ʼI muʼa ʼo te toli ʼo te ʼu vite,
Moka ʼosi tona fisi pea moka liliu anai te ʼu matalaʼi teu ko ni fuaʼi vite momoho,
ʼE fakagata anai te ʼu vaʼa ʼaki te hele.
Pea ʼe tuʼusi mo toʼo anai te ʼu kauʼi vite.
6 ʼE siʼaki anai te ʼu sino mate fuli ki te ʼu manulele fekai ʼo te ʼu moʼuga
Pea mo te ʼu manu ʼo te kele.
ʼE kai anai ki ai te ʼu manulele fekai ʼi te temi vela,
Pea ʼe toe kai pe anai e te ʼu manu ʼo te kele ʼi te temi taʼukai.
7 ʼI te temi ʼaia, ʼe ʼave anai he meʼa ʼofa kia Sehova ʼo te ʼatu kautau,
Mai he puleʼaga ʼo ni hahaʼi lalahi mo kili momole,
Mai he hahaʼi ʼe matakuʼia ʼi te ʼu potu fuli,
Mai he puleʼaga malohi mo tau tuʼumaʼu,
ʼAe ʼe ʼave e te ʼu vai te ʼu kele.
ʼE ʼave anai te meʼa ʼofa ʼaia ki te koga meʼa ʼae ʼe ʼafio ai te huafa ʼo Sehova ʼo te ʼatu kautau, ia te Moʼuga ʼo Sione.”+
19 Koʼeni te logo ʼo ʼuhiga mo Esipito:+
Kua heka ia Sehova ʼi he ʼao gaholo pea ʼe tau ki Esipito.
ʼE matataku anai te ʼu ʼatua vaʼiganoa ia te ia,+
Pea ʼe puli anai te lototoʼa ʼa te kau Esipito.
2 “ ʼE au uga anai ke fefakafeagaiʼaki te kau Esipito,
Pea ʼe natou fetauʼaki anai.
ʼE tahi tauʼi pe anai tona tehina pea mo tona vahaʼa fale,
Te kolo ki te kolo, te puleʼaga ki te puleʼaga.
3 ʼE hoha anai te ʼatamai ʼo te kau Esipito,
Pea ʼe au veuki anai ʼanatou fakatuʼutuʼu.+
ʼE natou pauʼi anai ki ʼonatou ʼatua vaʼiganoa,
Mo natou ʼae ʼe gaohi meʼa fakatemonio, mo natou ʼae ʼe felogoi mo te kau mate, mo natou ʼae ʼe faifakakikite.+
4 ʼE au tuku anai ia Esipito ki te ʼu nima ʼo he pule agafefeka,
Pea ʼe pule anai kia natou he hau agakovi,”+ ko te ui ʼaia ʼa te ʼAliki moʼoni, ia Sehova ʼo te ʼatu kautau.
5 ʼE mamaha anai te tai,
ʼE moamoa anai te vai ʼo mole kei tafe.+
6 ʼE mamanu anai te ʼu vai tafe.
ʼE mamaha anai te ʼu tafega vai ʼo te Nile ʼo Esipito ʼo moamoa ai.
ʼE popo anai te ʼulu kaho.+
7 ʼE moamoa anai te ʼu kele fuli ʼae neʼe gaueʼi ʼi te matavai ʼo te Nile,
ʼO feia mo te ʼu fuʼu ʼakau ʼae ʼi te kauvai ʼo te Nile,+ ʼae ʼi tona gataʼaga.+
ʼE ʼave fuli anai ia ʼo pulinoa ʼi te matagi.
8 ʼE lauga anai te kau gelu,
ʼE tagilaulau anai ia natou fuli ʼae ʼe natou mātaʼu ʼi te Nile,
Pea ʼe tokosiʼi anai ia natou ʼae ʼe natou ʼaʼau ʼanatou kupega ʼi te vai.
9 Pea ʼe ufiufi anai ia natou ʼae ʼe natou fai ni kie ʼaki te vavae hina,*
Mo natou ʼae ʼe natou gaueʼi te lino.+
10 ʼE mafasia anai te kau faikie,
ʼE lotomamahi anai te kau gaue fuli ʼae ʼe totogi.
11 ʼE agavale te kau tama ʼaliki ʼo Tesoane.+
ʼE mole fakapotopoto te ʼu tokoni ʼae ʼe fai e te kau popoto ʼa Falaone.+
ʼE lava feafeaʼi hakotou ui kia Falaone:
“ ʼE au hifo mai te kau popoto,
ʼE au hifo mai te ʼu hau ʼo te temi muʼa”?
12 Kofea la tau kau popoto?+
Ke natou fakaha atu mo kapau ʼe natou iloʼi pe kotea te fakatuʼutuʼu ʼa Sehova ʼo te ʼatu kautau ʼo ʼuhiga mo Esipito!
13 Neʼe agavale te kau tama ʼaliki ʼo Tesoane,
Neʼe fakahalaʼi pe e te kau tama ʼaliki ʼo Nofi*+ ia natou totonu.*
Neʼe fakaheʼi ia Esipito e ʼona pule telepi.
14 Neʼe fakamavetevete e Sehova te fenua,+
Pea neʼe natou fakaheʼi ia Esipito ia meʼa fuli ʼae ʼe ina fai,
ʼO fakaliliu ai ohage ko he tagata konahia ʼe siʼia ʼi tona lua.
15 ʼE mole toe fakahoko anai e Esipito he meʼa,
Pe ʼe ko te ʼulu, peʼe ko te hiku, peʼe ko te huli,* peʼe ko te ʼulu kaho.
16 ʼI te ʼaho ʼaia, ʼe liliu anai ia Esipito ohage ko ni fafine: ʼe mataku anai mo tekelili moka hiki e Sehova ʼo te ʼatu kautau tona nima kia ia.+ 17 ʼE matataku anai te hahaʼi ʼo Esipito ʼuhi ko te fenua ʼo Suta. Ka palalau ʼo ʼuhiga mo ia, ʼe natou tekelili anai ʼuhi ko te fakatotonu ʼae neʼe fai e Sehova ʼo te ʼatu kautau ʼo ʼuhiga mo natou.+
18 ʼI te ʼaho ʼaia, ʼe palalau anai ʼi te lea ʼo Kanaane* ni kolo ʼe nima ʼo Esipito+ pea ʼe natou fakapapau anai ʼe natou agatonu kia Sehova ʼo te ʼatu kautau. ʼE fakahigoaʼi anai te tahi kolo ko te Kolo ʼo Te Maumau.
19 ʼI te ʼaho ʼaia, ʼe ʼi ai anai he ʼaletale maʼa Sehova ʼi Esipito pea mo he pou maka maʼa Sehova ʼi tona tuʼakoi. 20 ʼE ko te fakailoga ʼaia ʼi Esipito pea mo he fakamoʼoni maʼa Sehova ʼo te ʼatu kautau. ʼE natou kole tokoni anai kia Sehova ʼuhi ko te kau fakafeagai pea ʼe ina fekauʼi anai he tahi ʼe malohi ke ina haofaki ia natou. 21 ʼE fakaha anai e Sehova ki te kau Esipito pe ko ai ia ia pea ʼi te ʼaho ʼaia, ʼe iloʼi anai e te kau Esipito ia Sehova. Koia ʼe natou momoli ai anai ni sakilifisio mo ni meʼa ʼofa pea mo natou fai he fakapapau kia Sehova ʼo natou fakahoko. 22 ʼE taʼi anai e Sehova ia Esipito,+ ʼe ina taʼi anai mo ina fakamalolo. ʼE natou toe liliu mai anai kia Sehova pea ʼe ina tali anai ki ʼanatou tagi pea mo ina fakamalolo ia natou.
23 ʼI te ʼaho ʼaia, ʼe ʼi ai anai he ala lahi+ mai Esipito ki Asilia. Pea ʼe alu anai Asilia ki Esipito, pea ko Esipito ki Asilia, pea ʼe tauhi fakatahi anai ia Esipito mo Asilia ki te ʼAtua. 24 ʼI te ʼaho ʼaia, ʼe fakatahi anai ia Iselaele mo Esipito pea mo Asilia,+ ko he tapuakina ki te kele, 25 he neʼe tapuakiʼi natou e Sehova ʼo te ʼatu kautau ʼo ina ui: “Ke tapuakina taku hahaʼi ko Esipito, mo te gaueʼaga ʼo ʼoku nima ia Asilia pea mo toku tofiʼa ia Iselaele!”+
20 ʼI te taʼu ʼae neʼe fekauʼi ai e te hau ʼo Asilia ko Salekoni ia te Taletane* ki Asoti,+ neʼe ina tauʼi mo maʼu ia Asoti.+ 2 ʼI te temi ʼaia, neʼe palalau ia Sehova ʼaki ia Esaia,+ te foha ʼo Amote. Neʼe ina ui age: “Alu, toʼo te taga* ʼae ʼi tou koga loto pea mo huʼi ʼou sulie.” Neʼe ina fai te faʼahi ʼaia ʼo haʼele telefua* ai mo kiliʼi vaʼe.
3 Pea neʼe ui e Sehova: “Ohage pe ko taku tagata faifekau ko Esaia, ʼae neʼe haʼele telefua mo kiliʼi vaʼe ia taʼu ʼe tolu ohage ko he fakailoga+ mo he fakatokaga ki Esipito+ mo Etiopea,+ 4 ʼe toe feia pe anai mo te ʼave e te hau ʼo Asilia te kau pilisoni ʼo Esipito,+ mo te kau ʼaunofo ʼo Etiopea, tamaliki tagata mo tagata matutuʼa, telefua mo kiliʼi vaʼe pea ʼe ha ʼonatou tuʼa, ko he fakaufiufi lahi ki Esipito. 5 ʼE natou matataku anai mo ufiufi ki Etiopea tonatou ʼamanaki, pea mo Esipito ʼae ʼe natou fiameʼameʼa ai. 6 ʼE ui anai ʼi te ʼaho ʼaia e te hahaʼi ʼo te fenua ʼo te matatai ʼaia: ‘Kotou sio ki te meʼa ʼae neʼe hoko kia ia ʼae neʼe tou ʼamanaki mo feholaki ki ai, mo kumi tokoni ke ina haofaki tatou mai te hau ʼo Asilia! ʼE feafeaʼi anai te haofaki ʼo tatou ʼi te temi nei?’ ”
21 Koʼeni te logo ʼo ʼuhiga mo te toafa ʼo te tai:*+
ʼE haʼu te malaʼia mai te toafa, mai he fenua fakamataku,+
Ohage ko ni tuʼani matagi ʼe natou fueʼi te potu saute.
2 Neʼe fakaha mai he meʼa fakamataku:
ʼE kaka te tagata kaka,
ʼE maumauʼi e te tagata fakatupu maumau.
Elame, ke ke hake! Metia, ke ke tau!+
ʼE au fakagata anai te ʼu lauga fuli ʼae ʼe tupu ko ia.*+
3 Ko te tupuʼaga la ʼaia ʼo taku hoha lahi.+
ʼE au tete
Ohage ko he fafine ʼe fanau.
ʼE mole feala ke au logo ʼi te lahi ʼo taku hoha,
ʼE mole feala ke au sio ʼi te lahi ʼo taku tuʼania.
4 Kua au lotovaivai, ʼe au tekelili ʼi te mataku.
ʼE au fakaʼamu ke hoko mai la te mafoata kae ʼe au mataku.
5 Kotou teuteuʼi te laupapa pea mo ʼai te ʼu hekaʼaga!
Kotou kakai mo iinu!+
Kotou tutuʼu ake kau tama ʼaliki ʼo vali te lolo ki te meʼa tali tau!
6 Koʼeni te meʼa ʼae neʼe ui mai e Sehova:
“Alu ʼo fakanofo he tagata leʼo pea ke ina fakaha te meʼa ʼae ʼe sio ki ai.”
7 Neʼe sio ki he saliote tau ʼe toho e ni hosi,
Ki he saliote tau mo ni asino,
Ki he saliote tau mo ni kamelo.
Pea neʼe sio fakalelei, ʼei, neʼe tokaga lelei.
8 Pea neʼe kalaga ohage ko he laione:
“Sehova e, ʼi te tule leʼo, ʼe au nofo tuʼumaʼu ai ʼi te ʼaho,
Pea ʼi te ʼu po fuli, ʼe au leʼo tuʼumaʼu ai.+
9 Koʼeni, ʼe ʼomai
Ni tagata ʼi he saliote tau ʼe toho e ni hosi!”+
Pea neʼe kalaga leʼo lahi leva:
“Kua to ia ia! Kua to ia Papiloni!+
Kua maumauʼi te ʼu fakatata fuli ʼo ʼona ʼatua ʼi te kele!”+
10 Siʼaku hahaʼi, ia koe ʼae neʼe haha ohage ko ni fulumeto,
Te fua ʼo taku hahaʼaga,+
Neʼe au tala atu te meʼa ʼae neʼe ui mai e Sehova ʼo te ʼatu kautau, te ʼAtua ʼo Iselaele.
11 Koʼeni te logo ʼo ʼuhiga mo Tuma:*
ʼE kalaga he tahi mai Seili:+
“Tagata leʼo, kua vave te mafoata?
Tagata leʼo, kua vave te mafoata?”
12 ʼE tali e te tagata leʼo:
“ ʼEi, kua vave pe te uhu, feia mo te poʼuli.
Kapau ʼe kotou fia faifehuʼi, kotou fehuʼi.
Kotou toe liliu mai!”
13 Koʼeni te logo ʼo ʼuhiga mo te toafa:
Hahaʼi fagona ʼo Tetane,+
ʼE kotou momoe anai ʼi te poʼuli ʼi te vao matuʼa, ʼi te toafa!
14 Hahaʼi ʼo te fenua ʼo Tema,
Kotou ʼave he moʼi vai kia ia ʼae ʼe fia inu,+
Mo he moʼi pane kia ia ʼae ʼe feholaʼaki.
15 ʼE natou feholaki mai te ʼu heleta, mai te heleta ʼae ʼe tohoʼi mai tona ʼaiʼaga,
Mai te nahau ʼae kua faoʼi ke fanahi, mai te agamalohi ʼo te tau.
16 Koʼeni te meʼa ʼae neʼe ui mai e Sehova: “ ʼE puli anai te kololia katoa ʼo Keta,+ pea ʼe hoko tonu ʼi he taʼu ʼe tahi.* 17 ʼI te kautau ʼo Keta, ko he tokosiʼi pe anai ʼe toe ʼi te kau fainahau, ko te ui ʼaia ʼa Sehova te ʼAtua ʼo Iselaele.”
22 Koʼeni te logo ʼo ʼuhiga mo te Potu Fenua Laulelei ʼAe ʼe Fakaha Ai e Te ʼAtua Ni Meʼa:*+
Kotea ʼae kua hoko kia koe? He koʼe kua fekakeʼi tau hahaʼi fuli ki te ʼu fuga ʼato?
2 Neʼe ke gatutu,
Kolo maveuveu, kolo fakafiafia.
Neʼe mole matehi ʼau kau mate ʼaki te heleta,
Neʼe mole natou mamate ʼi te tau.+
3 Neʼe feholaki fakatahi ʼau kau pule agamalohi fuli.+
Neʼe pilisoniʼi ia natou kae neʼe mole fanahi pe la he kauʼi nahau ʼe tahi.
Neʼe pilisoniʼi ia natou fuli ʼae neʼe puke,+
Tatau aipe pe neʼe feholaki mamaʼo.
4 Koia ʼae neʼe au ui ai: “Ke haga kehe ʼokotou mata ia au,
Pea mo tuku ke au tagi mamahi.+
ʼAua naʼa kotou faiga ke kotou fakapelepeleʼi au
5 Ko he ʼaho ʼo te maveuveu, ʼe mole hoko ai he malo, ʼe fakatupu hoha,+
ʼE fakahoko e te Tuʼi ʼAliki ko Sehova ʼo te ʼatu kautau,
ʼI te Potu Fenua Laulelei ʼAe ʼe Fakaha Ai e Te ʼAtua Ni Meʼa:
ʼE holoʼi te kaupa,+
ʼE hake he tagi ki te moʼuga.
7 ʼE fonu anai ko ni saliote tau
ʼOu potu fenua laulelei tukupau,
ʼE tutuʼu anai te ʼu hosi* ʼi te matapa
8 Pea ʼe toʼo anai te puipuiʼaga ʼo Suta.
“ ʼI te ʼaho ʼaia, ʼe kotou haga anai ki te ʼu mahafu tau ʼo te Fale ʼo Te Vao Matuʼa,+ 9 pea ʼe kotou sisio anai ki ni tuʼuga ava ʼi te kaupa ʼo te Kolo ʼo Tavite.+ ʼE kotou tanaki anai ni vai ʼi te maʼanuʼaga ʼae ʼe tuʼu ʼi lalo.+ 10 ʼE kotou lau anai te ʼu ʼapi ʼo Selusalemi pea ʼe kotou maumauʼi anai ʼihi ʼapi moʼo fakamalohiʼi ʼo te kaupa. 11 ʼE kotou toe fai anai mo he tanakiʼaga vai ʼi te vaha ʼo te ʼu kaupa ʼe lua ke tanaki ai te ʼu vai ʼo te maʼanuʼaga ʼafeā. Kae ʼe mole kotou haga anai kia Ia ʼae neʼe ina fai ia meʼa fuli ʼaia, pea ʼe mole kotou sisio anai kia Ia ʼae neʼe ina teuteuʼi talu mai fualoa.
12 ʼI te ʼaho ʼaia, ko te Tuʼi ʼAliki ko Sehova ʼo te ʼatu kautau,
ʼE ina kole anai ke fetagihi mo lauga te hahaʼi,+
Mo tele te ’u ʼulu mo tui ni taga.*
13 Kae ʼe natou fakafiafia anai natou,
ʼE natou matematehi anai ni faga pipi mo ni ovi,
ʼE natou kai anai te kanoʼi manu mo inu vino.+
‘Tou kakai mo iinu he ʼe tou mamate anai apogipogi.’ ”+
14 Neʼe fakaha mai leva e Sehova ʼo te ʼatu kautau te meʼa ʼaeni: “ ‘ ʼE mole fakamolemole anai takotou hala ʼo kaku ki takotou mamate,’+ ko te ui ʼaia ʼa te Tuʼi ʼAliki ko Sehova ʼo te ʼatu kautau.”
15 Koʼeni te meʼa ʼae ʼe ui e te Tuʼi ʼAliki ko Sehova ʼo te ʼatu kautau: “Alu ki te tagata tauhi ʼapi ko Sepena,+ ʼae ʼe tokaga ki te ʼu meʼa ʼo te fale hau ʼo ui age ki ai: 16 ‘Kotea ʼae ʼe ke maʼu ʼi heni pea ko ai tou famili ʼi heni ke ke maʼu ai hou fale maka?’ ʼE ina keli ai hona fale maka ʼi he potu maʼoluga, ʼe ina toli hona maloloʼaga* ʼi he fuʼu maka. 17 ‘Koʼeni, tagata e, ʼe lipaki anai koe e Sehova ki te kele mo puke malohi koe! 18 Pea ʼe ina takatakai maʼu anai ia koe ʼo li ohage ko he foʼi fiti ʼi he fenua laulahi. ʼI te potu ʼaia ʼe ke mate anai mo ʼau saliote tau ʼae ʼe taulekaleka, ʼe ko he fakalainoa anai ki te ʼapi ʼo tou pule. 19 ʼEi, ʼe au fakahifo anai mo kapu koe mai tou tuʼulaga.
20 “ ‘ ʼI te ʼaho ʼaia, ʼe au pauʼi anai taku tagata faifekau ko Eliakimi,+ foha ʼo Ilekisa. 21 ʼE au fakatui anai kia ia tou teu, ʼe au haʼi maʼu anai ki tona koga loto ia tou kie+ pea ʼe au tuku anai tou tuʼulaga pule kia ia. Pea ʼe liliu anai ko he tamai maʼa te hahaʼi ʼo Selusalemi pea mo te hologa ʼo Suta. 22 ʼE au tuku anai te kalavi ʼo te ʼapi ʼo Tavite+ ki tona fuga ʼuma. Ka ina avahi ʼe mole pupunu anai e he tahi, ka ina pupunu ʼe mole avahi anai e he tahi. 23 ʼE au tutuki anai ia ia ohage ko he faʼo ʼi he kaupa malohi pea ʼe liliu anai ohage ko he hekaʼaga fakahau fakakololia maʼa tona famili. 24 ʼE tuku anai kia ia te kololia katoa ʼo tona famili, mo te ʼu hologa mo te ʼu fanau, mo te ʼu ipu liliki fuli mo te ʼu pa loloto, ʼo toe feia pe mo te ʼu ʼaiʼaga vai lalahi fuli.’
25 “ ʼE ui e Sehova ʼo te ʼatu kautau: ‘ ʼI te ʼaho ʼaia, ʼe toʼo anai te faʼo ʼae neʼe tutuki ki he kaupa malohi,+ ʼe tuʼusi anai ʼo to ki lalo pea ʼe to ai mo te kavega ʼae neʼe tau ai ʼo maumau, koteʼuhi ko te ui tonu ʼaia ʼa Sehova.’ ”
23 Koʼeni te logo ʼo ʼuhiga mo Tile:+
Kotou lauga, ʼu vaka ʼo Talesisi!+
Kua maumauʼi te ʼuafu, ʼe mole kei feala ki he vaka ke tau ki ai.
Neʼe fakaha te logo ʼaia kia natou mai te fenua ʼo Kitimi.+
2 Fakalogologo, hahaʼi ʼo te fenua ʼo te matatai!
Neʼe ke maʼu koloa mai te hahaʼi faikoloa ʼo Sitoni+ ʼae ʼe fefolauʼaki ʼi te tai.
3 Ko te ʼu fulumeto* ʼo Sihole*+ mo te taʼukai ʼo te Nile,
ʼOu koloa ʼae neʼe fetuku ʼi te ʼu vai lalahi,
Neʼe ko te ʼu koloa ia ʼo te ʼu puleʼaga.+
4 Sitoni, ke ke ufiufi, ia koe ʼae ko te kolo tau ʼo te tai,
He neʼe ui e te tai:
“Neʼe mole au mamahi au, neʼe mole au fanau,
Neʼe mole au pusiaki ni tupulaga peʼe akoʼi ni taʼahine.”+
5 ʼE kita tuʼania anai ʼi takita maʼu logo ʼo ʼuhiga mo Tile+
Ohage pe ko takita maʼu logo ʼo ʼuhiga mo Esipito.+
6 Kotou fakalaka ki Talesisi!
Kotou lauga, hahaʼi ʼo te fenua ʼo te matatai!
7 Neʼe mole fiafia koa la tokotou kolo talu mai fualoa, mai te temi muʼa?
Neʼe alu ia ʼo nofo ʼi ni fenua mamaʼo.
8 Ko ai ʼae neʼe ina fai te tonu ʼaia ki Tile,
Ia ia ʼae neʼe ina tufa ni pale fakahau,
ʼAe ko ʼana kau faikoloa neʼe ko ni tama ʼaliki,
ʼAe neʼe fakaʼapaʼapaʼi ʼana kau faikoloa ʼi te kele katoa?+
9 Neʼe ko Sehova ʼo te ʼatu kautau ʼae neʼe ina fai te tonu ʼaia,
Moʼo fakagata tana fiameʼameʼa ʼi tona taulekaleka,
Moʼo fakamalaloʼi ia natou fuli ʼae neʼe fakaʼapaʼapaʼi ʼi te kele katoa.+
10 Taʼahine ʼo Talesisi, fakalaka ʼi tou fenua ohage ko te Nile!
ʼE mole kei ʼi ai he koga meʼa ke faʼu ai ni vaka.*+
11 Neʼe ina faoʼi tona nima ki te tai,
Neʼe ina luluʼi te ʼu puleʼaga.
Neʼe fakatotonu e Sehova ke maumauʼi te ʼu kolo tau ʼo Fenisia.+
12 Neʼe ina ui: “ ʼE mole ke toe fiafia anai,+
Taʼahine taupoʼou ʼo Sitoni ʼae neʼe fakamamahiʼi.
Tuʼu ake ʼo fakalaka ki Kitimi.+
Maʼiape la ʼi te potu ʼaia, ʼe mole ke maʼu anai hou maloloʼaga.”
13 Koʼeni te fenua ʼo te kau Kaletea!+
ʼE ko te hahaʼi ʼaeni kae ʼe mole ko Asilia,+
ʼAe neʼe ina fakaliliu ko he koga meʼa maʼa te ʼu manu ʼo te toafa.
Neʼe natou fakatuʼu ʼonatou tule moʼona tauʼi,
Neʼe natou holoʼi ʼona tule malolohi+
Pea neʼe natou maumauʼi ai te fenua.
14 Kotou lauga, ʼu vaka ʼo Talesisi,
He ʼe kua maumauʼi tokotou kolo tau.+
15 ʼI te ʼaho ʼaia, ʼe galoʼi anai ia Tile ia taʼu ʼe 70,+ ko te loaloaga ʼaia ʼo te maʼuli ʼo he hau. Hili te ʼu taʼu ʼae ʼe 70, ʼe hoko anai ki Tile te aluʼaga ʼo te fafine paomutu ʼo te hiva ʼaeni:
16 “Fafine paomutu ʼae neʼe galoʼi, toʼo he alepa, pea ke alu ʼo foliʼi te kolo.
Ta tau alepa ke mālie,
Hiva pea ke lahi ʼau hiva,
Ke manatuʼi ai ia koe.”
17 Hili ʼaia taʼu ʼe 70, ʼe tokaga anai ia Sehova ki Tile, ʼe ina toe maʼu anai tona totogi pea ʼe faiaga anai mo te ʼu puleʼaga fuli ʼo te malamanei, ʼi te ʼu potu fuli pe. 18 Kae ko ʼona koloa mo tona totogi ʼe liliu anai ko he meʼa taputapu maʼa Sehova. ʼE mole tae anai peʼe tanaki, he ʼe fakaʼaogaʼi anai tona totogi maʼa natou ʼae ʼe nonofo ia muʼa ʼo Sehova, ke natou makokona ai pea mo tui ni teu matalelei.+
24 Koʼeni, ʼe fakalavakiʼi e Sehova te fenua* mo fakaliliu ko he toafa.+
ʼE ina veuki+ mo fakamavetevete ʼana hahaʼi.+
2 ʼE tatau anai te aluʼaga ʼo natou fuli ʼaeni:
Te tagata mo te pelepitelo,
Te tagata faifekau mo tona pule,
Te fafine faifekau pea mo tona fafine pule,
Ia ia ʼae ʼe faifakatau mo ia ʼae ʼe fakatau,
Ia ia ʼae ʼe foaki falā mo ia ʼae ʼe kole falā,
Ia ia ʼae ʼe foaki maʼua mo ia ʼae ʼe toʼo maʼua.+
4 ʼE putu* anai te fenua,+ ʼe mole kei maʼu he meʼa.
ʼE kele kaka anai, ʼe mole kei homo he meʼa.
Kua vaivai te ʼu ʼaliki ʼo te fenua.
5 Neʼe ʼulihi te fenua e ʼana hahaʼi+
He neʼe natou meʼa noaʼi te ʼu lao,+
Mo fetogi te ʼu fakatotonu+
Pea mo maumauʼi te fuakava ʼae neʼe fai ke tuʼu ʼo talu ai.*+
6 Koia ʼe hoko anai te malaʼia ki te fenua,+
Pea ʼe lakahala ʼana hahaʼi.
Koia ʼe mole hahaʼi ai te fenua,
Pea kua tokosiʼi ia natou tagata.+
7 ʼE putu* te vino foʼou pea ʼe moamoa te gaueʼaga vite,+
Pea ʼe lauga ia natou fuli ʼae neʼe lotofiafia.+
8 ʼE mole kei logo te tagi mālie ʼo te ʼu nafa,
Kua gata te logoaʼa ʼa te kau fakafiafia fakavalevale,
Kua ʼosi te ta mālie ʼo te alepa.+
9 ʼE mole kei he hiva ʼi te inu ʼo te vino,
Pea ʼe hifo kona te kava kia natou ʼae ʼe natou inu.
10 Kua maumauʼi te kolo ʼae ʼe lavaki,+
Kua pupunu te ʼu ʼapi fuli pea ʼe mole ulu ki ai he tahi.
11 ʼE kalaga ʼi te ʼu ala he ʼe mole kei feʼauga te vino.
Kua puli ʼosi te fiafia,
ʼE mole kei maʼu te fiafia ʼi te fenua.+
12 Kua holo te kolo,
Kua maumauʼi te matapa pea kua laliki katoa.+
13 ʼE hage anai taku hahaʼi ʼi te ʼu puleʼaga
Ko te toe ʼo te ʼu oliveto moka haha te fuʼu ʼakau,+
Pea ʼe natou hage ko te toli ʼo te vite moka ʼosi te taʼukai.+
14 ʼE natou leʼo lahi anai,
ʼE natou kalaga fakafiafia anai.
Mai te tai,* ʼe natou fakaha anai te ʼalikisia ʼo Sehova.+
15 Koia ʼe natou fakakololiaʼi anai ia Sehova ʼi te potu fenua ʼae ʼe mu ai te malama.*+
ʼE natou fakakololiaʼi anai te huafa ʼo Sehova, te ʼAtua ʼo Iselaele ʼi te ʼu motu ʼo te tai.+
16 ʼE matou logo ki ni hiva mai te potu taupotu ʼo te kele:
“Ke fakakololiaʼi ia Ia ʼae ʼe faitotonu!”+
Kae ʼe au ui: “ ʼE au vaivai, ʼe au vaivai!
Malaʼia kia au! Neʼe kaka pe te kau agakaka.
Neʼe fakahalaʼi pe ʼihi e te kau agakaka.”+
17 Hahaʼi ʼo te fenua, kua tau atu te mataku, mo te ʼu luo mo te ʼu hele!+
18 ʼE to anai ki he luo ia ia ʼae ʼe hola mai te logoaʼa fakamataku,
Pea ko ia ʼae ʼe hake ake mai te luo, ʼe to anai ki he hele.+
ʼE avahi anai te ʼu vai ʼo te lagi
Pea ʼe galulu anai te ʼu fakatafito ʼo te fenua.
20 ʼE hage te fenua ko he tagata konahia ʼe siʼia,
ʼE hage ko he fale lau ʼe femaleʼeʼaki ʼi te matagi.
ʼE mamafa ʼosi kia ia tana talagataʼa,+
ʼE toka pea ʼe mole toe tuʼu ake anai.
21 ʼI te ʼaho ʼaia, ʼe tokaga anai ia Sehova ki te kautau ʼo te lagi,
Pea ʼi te kele, ki te ʼu hau ʼo te kele.
22 ʼE fakatahiʼi anai natou
Ohage ko he kau pilisoni ʼi he luo.
ʼE pupunu anai natou ʼi he fale pilisoni
Pea ʼe tokaga anai kia natou hili ki ai ni ʼaho.
23 ʼE umiuminoa anai te mahina logo la tona katoa,
Pea ʼe ufiufi anai te laʼa logo la tona mu malohi,+
He ʼe kua Hau ia Sehova ʼo te ʼatu kautau+ ʼi te Moʼuga ʼo Sione+ pea mo Selusalemi,
Kua fakakololiaʼi ia muʼa ʼo te kau takitaki ʼo tana hahaʼi.+
25 Sehova e, ko koe toku ʼAtua.
ʼE au fakavikiviki kia te koe pea mo vikiʼi tou huafa,
He neʼe ke fai ni meʼa taulekaleka,+
Ni fakatuʼutuʼu talu mai te temi muʼa,+
ʼAki te agatonu+ mo te faitotonu.
2 Neʼe ke fakaliliu he kolo ko ni tuʼuga maka,
Neʼe ke maumauʼi he kolo malohi.
Kua pulinoa te kolo ʼo te matapule,
ʼE mole toe laga anai ʼi he temi.
3 Koia ʼe fakakololiaʼi anai koe e he hahaʼi malohi,
ʼE manavasiʼi anai te kolo ʼo te ʼu puleʼaga agamalohi kia te koe.+
4 Neʼe ke liliu ko he kolo tau kia ia ʼae ʼe veliveli,
Mo he kolo tau kia ia ʼae ʼe masiva ʼi tona temi mamahi,+
Neʼe ke liliu ko he nonoʼaga ki te afā
Pea mo he malu ki te temi vevela.+
Ka iita te ʼu pule agamalohi ohage ko he afā ʼe to ki he kaupa,
5 ʼE ke fakagata ai te logoaʼa ʼa te kau matapule
Ohage ko tau fakasiʼisiʼi te vela ki he kele magemage.
ʼE mole toe logo te hiva ʼa te ʼu pule agamalohi,
Ohage ko te vela ʼae ʼe puli ʼi te malu ʼo he ʼao.
6 ʼI te moʼuga ʼaeni,+ ʼe teuteuʼi anai e Sehova ʼo te ʼatu kautau maʼa te hahaʼi fuli
He kaitahi ʼo ni meʼa kai lelei,+
He kaitahi ʼo ni vino lelei,
Ni meʼa kai lelei mo gakogako,
Mo ni vino lelei neʼe fakaoʼo.
7 ʼI te moʼuga ʼaeni, ʼe ina pulihi anai te kie ʼae ʼe ina ʼaofi te hahaʼi fuli
Pea mo te kie kafu ʼae ʼe ina ʼuʼufi te ʼu puleʼaga fuli.
8 ʼE ina pulihi anai te mate ʼo talu ai.+
ʼE holoholoʼi anai e te Tuʼi ʼAliki ko Sehova te ʼu loʼimata ʼi te ʼu fofoga fuli.+
ʼE ina pulihi anai te lainoa ʼo tana hahaʼi ʼi te kele katoa,
Ko te ui ʼaia ʼa Sehova.
9 ʼI te ʼaho ʼaia, ʼe ui anai:
“Kotou sisio, ko totatou ʼAtua!+
Ko Sehova!
Neʼe tou falala kia te ia.
Tou fiafia, tou fakafiafia he ʼe ina haofaki tatou.”+
10 ʼE hili anai te nima ʼo Sehova ki te moʼuga ʼaia,+
ʼE malamalaki anai ia Moape ʼi tona tuʼuʼaga+
Ohage ko te malamalaki ʼo te luna moamoa ʼi he tuʼuga meʼa fakagako kele.
11 ʼE ina faoʼi anai ʼona nima
Ohage ko he tagata ʼe kāuga,
ʼE ina fakamalaloʼi anai tona fialahi*+
ʼAki te faʼahiga haka ʼo ʼona nima.
12 ʼEi, ʼe ina holoʼi anai te kolo tau,
Mo ʼona* kaupa maʼoluga ʼae moʼona puipui.
ʼE ina lipaki anai ki te kele, ki te efu.
26 ʼI te ʼaho ʼaia, ʼe hiva anai te hiva+ ʼaeni ʼi te fenua ʼo Suta:+
“ ʼE ʼi ai tomatou kolo malohi.+
Ko tana* haofaki ʼe hage ko ni kaupa.+
3 ʼE ke puipui anai ia natou ʼae ʼe falanaki katoa kia te koe.*
ʼE ke foaki anai kia natou he tokalelei ʼo talu ai,+
Koteʼuhi ʼe natou falala kia te koe.+
5 Neʼe ina fakamalaloʼi te kolo maʼoluga, ia natou ʼae ʼe nonofo ʼi te ʼu potu maʼoluga.
ʼE ina siʼaki ia ia,
ʼE ina siʼaki ia ia ki te kele,
ʼE ina lipaki ia ia ki te efu.
6 ʼE malamalaki anai ia ia
E te ʼu vaʼe ʼo natou ʼae ʼe fakaʼofaʼofa, mo haʼeleʼi e te kau vaivai.”
7 ʼE tokalelei* te ala ʼo ia ʼae ʼe faitotonu.
Ia koe ʼae ʼe ke faitotonu,
ʼE ke fakatokatoka anai te ala ʼo ia ʼae ʼe faitotonu.
8 Sehova e, ʼe matou mulimuli ki te ala ʼo ʼau fakamau,
Pea ʼe matou falala kia te koe.
ʼE matou holi malohi ke matou manatuʼi ia koe pea mo tou huafa.
9 ʼI te poʼuli, ʼe au fakaʼamu ʼi toku loto katoa ke au maʼu ia koe,
ʼEi, ʼe au kumi tuʼumaʼu ia koe,+
Koteʼuhi ka ke fakamauʼi te kele,
ʼE ako ai e te hahaʼi ʼo te fenua te faitotonu.+
11 Sehova e, ʼe ke hiki tou nima kae ʼe mole sisio ki ai te kau agakovi.+
ʼE natou ufiufi anai ʼi tanatou sisio ki tau faʼafai ʼo ʼuhiga mo tau hahaʼi.
ʼEi, ʼe tutu anai ʼou fili.
12 Sehova e, ʼe ke foaki mai anai te tokalelei,+
He ko meʼa fuli ʼae neʼe matou fai,
Ko koe ia ʼae neʼe ke fakahoko maʼa matou.
14 Kua natou mamate, ʼe mole natou toe maʼuʼuli anai.
ʼE mole kei honatou malohi ʼi te mate pea ʼe mole natou toe tutuʼu ake anai.+
Neʼe ke tokagaʼi ia natou,
Neʼe ke pulihi natou pea ʼe mole toe manatuʼi natou.
15 Sehova e, neʼe ke fakahahaʼi te puleʼaga,
ʼEi, neʼe ke fakahahaʼi ia te puleʼaga.
Neʼe ke fakakololiaʼi ia koe.+
Neʼe ke hiki ke mamaʼo te ʼu tuʼakoi fuli ʼo te fenua.+
16 Sehova e, neʼe natou haga atu kia te koe ʼi tonatou mamahi.
Neʼe natou faikole fanafana atu, ʼi tau fakatonutonuʼi natou.+
18 Neʼe hage neʼe matou faitama mo mamahi fanau,
Kae neʼe matou fanauʼi te matagi.
Neʼe mole matou haofaki te fenua,
Pea neʼe mole tupu he tahi ke nofo ʼi te fenua.
19 “ ʼE toe maʼuʼuli anai ʼau mate.
ʼE toe tutuʼu ake anai ʼaku mate.+
Kotou ʼaʼala mo kalaga fakafiafia,
Ia koutou ʼae ʼe nonofo ʼi te efu!+
ʼE hage tau hahau ko te hahau ʼo te uhu,*
Pea ʼe toe fakamaʼuli anai e te kele ia natou ʼae ʼe mole kei ʼi ai honatou malohi ʼi te mate.
Ke ke nono ʼi he kiʼi temi,
ʼO kaku ki te ʼosi ʼo toku hauhau.+
21 Koʼeni, ʼe mavae ia Sehova mai tona nofoʼaga
Ke ina fakamauʼi te hahaʼi ʼo te fenua ʼuhi ko tanatou hala.
ʼE iloʼi anai e te fenua te ligi toto ʼae neʼe hoko
Pea ʼe mole toe fufu anai ʼana kau mate.”
27 ʼI te ʼaho ʼaia, ʼaki he heleta lahi mo malohi, mo fakamataku,+
ʼE tokagaʼi anai e Sehova ia Leviatane,* te gata ʼae ʼe totolo,
Ia Leviatane, te gata ʼae ʼe alu pikopiko.
Pea ʼe ina matehi anai te manu lahi ʼaia ʼo te tai.
2 ʼI te ʼaho ʼaia, kotou hiva maʼa ia:*
“Ko he gaueʼaga vite ʼe maʼu ai he vino ʼe fiho!+
3 Ko au ia Sehova, ʼe au puipui ia ia.+
ʼE au fakavai tuʼumaʼu.+
ʼE au puipui ʼi te poʼuli mo te ʼaho,
Ke mole maumauʼi e he tahi.+
ʼI te tau, ko ai ʼae ka fakafeagai mai ʼaki ni ʼakau talatala pea mo ni vao kovi?
ʼE au malamalaki anai mo tutu fakatahi ia natou fuli.
5 Kapau ʼe mole loto ki ai, ke hola mai ki toku kolo tau.
Ke fakatokatoka mo au,
ʼEi, ke fakatokatoka mo au.”
6 ʼI te ʼu ʼaho ka hoko mai, ʼe tauaka anai ia Sakopo,
ʼE mātala anai pea mo fisi ia Iselaele,+
Pea ʼe natou fakafonu anai te fenua ʼaki ʼonatou fua.+
7 ʼE tonu koa ke tauteaʼi ohage ko ia ʼae neʼe ina ta ia ia?
Peʼe tonu koa ke matehi ohage ko natou ʼae neʼe ina matehi?
8 ʼE ke tauʼi anai mo fakaliliu ia ia ʼaki he kalaga fakamataku.
ʼE ke fakaviligia anai ia ia ʼaki te malohi ʼo tau manava ʼi te ʼaho ʼae ʼe agi ai te matagi mai te potu esite.+
9 Koia ʼe feia anai te ʼuʼufi* ʼo te hala ʼa Sakopo,+
Pea ka toʼo anai tana agahala, koʼeni ia meʼa fuli ʼae ka hoko:
ʼE ina laliki anai te ʼu maka fuli ʼo te ʼaletale
Ohage ko ni maka lahe.
Pea ʼe mole toe maʼu anai ni pou ʼakau taputapu* mo ni ʼaletale ʼo te iseso.+
10 ʼE tuʼu lavaki anai te kolo tau,
ʼE tukunoa mo siʼaki anai te ʼu koga meʼa lunaʼia ohage ko he toafa.+
ʼE kai anai ʼi ai mo moe ai te ʼuhiʼi pipi,
Pea ʼe ina kai anai ʼona vaʼa.+
11 Ka moamoa ʼona kiʼi vaʼa,
ʼE ʼomai anai ni fafine ʼo fasi
Moʼo tafu he afi.
ʼE mole mahino te hahaʼi ʼaeni ki he meʼa.+
Koia ʼe mole manavaʼofa anai ia Ia ʼae neʼe ina fakatupu ia natou,
Pea ʼe mole agaʼofa anai ia Ia ʼae neʼe ina faʼu natou.+
12 Hahaʼi ʼo Iselaele, ʼi te ʼaho ʼaia, ʼe fakato anai e Sehova te ʼu fuaʼi ʼakau mai te Vai Tafe* ʼo kaku ki te Vai Tafe* ʼo Esipito,+ pea ʼe tanaki anai ia koutou fuli.+ 13 ʼI te ʼaho ʼaia, ʼe pupuhi anai te fakatagi pupuhi,+ pea ko natou ʼae ʼe fakaʼofaʼofa ʼi Asilia+ mo natou ʼae ʼe mavetevete ʼi Esipito,+ ʼe ʼomai anai ʼo tulolo ia muʼa ʼo Sehova ʼi te moʼuga taputapu ʼi Selusalemi.+
28 Malaʼia ki te pale* fiameʼameʼa* ʼo te kau konahihia ʼo Efalaimi,+
Ki te fisiʼi teu ʼae kua fefe tona matalelei,
Pea ʼe tuʼu ʼi ʼoluga ʼo te potu fenua laulelei ʼae ʼe nonofo ai te hahaʼi konahihia ʼi te vino!
2 Koʼeni, ʼe fekauʼi anai e Sehova he tahi ʼe malohi.
ʼE ina lipaki malohi anai ia ia ki te kele,
Ohage ko he ʼuamaka, he tuʼani matagi fakamataku,
Ohage ko he afā.
4 ʼEi, ko te fisiʼi teu ʼae kua fefe tona matalelei,
ʼAe ʼe tuʼu ʼi ʼoluga ʼo te potu fenua laulelei,
ʼE liliu anai ohage ko he foʼi fiku ʼe ha tautonu ʼi muʼa ʼo te temi mafana.
Ka kita sio ki ai, ʼe kita toli pea kita kai atu aipe.
5 ʼI te ʼaho ʼaia, ʼe liliu anai ia Sehova ʼo te ʼatu kautau ko he kolona taulekaleka pea mo he pale matalelei maʼa natou ʼae ka toe ʼi tana hahaʼi.+ 6 ʼE ina uga anai ke fakahoko te faitotonu e ia ʼae ʼe faifakamau. Pea ʼe liliu anai ko he matapuna ʼo te malohi maʼa natou ʼae ʼe natou teteke te ʼohofi ʼi te matapa ʼo te kolo.+
7 Pea ko natou foki ʼaeni ʼe natou toe hehe ʼi te vino,
Mo natou siʼia ʼi te kava.
ʼE hehe te ʼu pelepitelo mo te ʼu polofeta ʼi te kava.
Pea ʼe maveuveu ʼonatou ʼatamai ʼi te vino,
Mo natou siʼia ʼi te kava.
ʼE natou hehe ʼi te meʼa ʼae ʼe natou sisio ki ai
Pea ʼe natou faihala ʼi ʼanatou tonu.+
8 Kua fonu ko te lua ʼonatou laupapa,
ʼE mole kei ʼi ai he faʼahi ʼe maʼa.
9 ʼE foaki anai kia ai te ʼatamai malama
Pea ʼe fakamahino anai kia ai te logo?
Kia natou koa ʼae neʼe hoki vaheʼi,
Peʼe kia natou ʼae ʼe mole kei fafaga e ʼanatou faʼe?
10 Koia “ko he tonu mo he tonu, ko he tonu mo he tonu,
Ko he lekula* mo he lekula, ko he lekula mo he lekula,+
He kiʼi meʼa ʼi heni, he kiʼi meʼa ʼi he.”
11 ʼE palalau anai ki te hahaʼi ʼaeni ʼo fakaʼaogaʼi ia natou ʼae ʼe ʼalelo vale mo palalau ʼi he lea matapule.+ 12 Neʼe ina ui age kia natou ʼi te temi muʼa: “Koʼeni te maloloʼaga. Ko ia ʼae kua gaʼegaʼe ke malolo ai, ko he koga meʼa ke kotou fimalie ai.” Kae neʼe mole natou fia fakalogo.+ 13 ʼE palalau anai ia Sehova kia natou:
“Ko he tonu mo he tonu, ko he tonu mo he tonu,
He lekula mo he lekula, he lekula mo he lekula,+
He kiʼi meʼa ʼi heni, he kiʼi meʼa ʼi he.”
Koia ka natou haʼele,
ʼE natou tukia mo fetoki anai.
ʼE natou lavevea anai mo to ki he hele, mo puke ai natou.+
14 Koia kotou fakalogo ki te folafola ʼa Sehova, ia koutou ʼae ʼe laupisi,
ʼU pule ʼo te hahaʼi ʼaeni ʼi Selusalemi,
15 He ʼe kotou ui:
Ka tafe mai te ʼu vai,
ʼE mole matou tafea anai,
Koteʼuhi neʼe matou fakaliliu te loi ko tomatou nonoʼaga
Pea ʼe matou fenonoʼi ʼi te kaka.”+
16 Koʼeni te folafola ʼa te Tuʼi ʼAliki ko Sehova:
“Koʼeni, ʼe au fakatuʼu anai ʼi Sione he maka neʼe ʼahiʼahiʼi,+
ʼE mole mataku anai ia ia ʼae ʼe tui.+
ʼE maumauʼi anai e te ʼuamaka te nonoʼaga ʼo te ʼu loi
Pea ʼe ʼaofi anai e te ʼu vai tou nonoʼaga.
Ka tatafe mai te ʼu vai,
ʼE holoʼi anai koutou.
19 ʼI te temi fuli ka fakalaka ai,
ʼE tatafi anai koutou.+
ʼE fakalaka anai ʼi te uhu fuli,
ʼI te ʼaho mo te poʼuli.
ʼE mahino pe anai ki te logo ʼuhi ko te mataku.”*
20 ʼE veliveli fau te palepale ke kita takoto lelei ki ai,
Pea ʼe lauveliveli te kie ke kita kafuʼi.
21 ʼE tuʼu ake anai ia Sehova ohage ko tana tuʼu ake ʼi te moʼuga ʼo Pelatesimi.
ʼE maʼumaʼua anai ohage ko tana fai ʼi te potu fenua laulelei ʼae ʼe ovi ʼi Kipeone,+
Moʼo fai tana gaue, ko he gaue fakapunamaʼuli,
Pea mo fakahoko tana fakatuʼutuʼu, ko he fakatuʼutuʼu faikehe.+
22 ʼI te temi nei, ʼaua naʼa kotou vava,+
Kapau ʼe mole kotou loto ke manoʼo ʼokotou haʼi,
He ʼe koʼeni te meʼa neʼe au logo ki ai mai te Tuʼi ʼAliki ko Sehova ʼo te ʼatu kautau:
23 Kotou fagono mo fakalogo ki toku leʼo.
Kotou nofo tokaga mo fakalogo ki te meʼa ʼae ʼe au fakaha atu.
24 ʼE gaueʼi koa e te tagata tona kele ʼi te ʼaho katoa ʼi muʼa ʼo tana nunusi tana pulapula?
ʼE ina fuli koa mo fakamalū tuʼumaʼu tona kele?+
25 Ka tokalelei leva te kele,
ʼE mole ina nunusi koa te kumino ʼuli pea mo te tahi faʼahiga kumino?
ʼE mole ina to koa te fulumeto, mo te mile, mo te olose ʼi te koga meʼa ʼae ʼe lelei?
ʼE mole ina to koa te tahi faʼahiga fulumeto*+ ʼi te tuʼakoi ʼo te gaueʼaga?
27 ʼE mole tataʼo te kumino ʼuli ʼaki te saliote ʼae ʼe molomoloki ʼaki te fulumeto,+
Pea ʼe mole tataʼo te faʼahiga kumino ʼaki te foʼi teka ʼo te saliote.
Kailoa, ʼe haha te kumino ʼuli ʼaki he ʼakau,
Pea mo te faʼahiga kumino ʼaki he toko.
28 ʼE tataʼo koa te fulumeto ʼae ʼe fai ʼaki te pane?
29 Ko meʼa fuli ʼaia ʼe haʼu ia mai ia Sehova ʼo te ʼatu kautau.
ʼE taulekaleka tana fakatuʼutuʼu,
29 “Malaʼia ki Aliele,* te kolo ko Aliele ʼae neʼe fakatuʼu ai e Tavite tona nofoʼaga!+
Ke fefakahoahoaʼaki ai te ʼu taʼu,
Ke hoholo te ʼu ʼaho lalahi,+
2 Kae ʼe au fakamamahiʼi anai ia Aliele.+
ʼE putu anai mo tagilaulau,+
Pea ʼe hage anai maʼaku ko he tafuga afi ʼo te ʼaletale ʼo te ʼAtua.+
3 ʼE au fakatuʼu anai toku nofoʼaga tau ʼi ʼou tafa,
ʼE au ʼa takai anai ia koe ʼaki he kaupa,
ʼE au laga anai ni meʼa tau moʼo ʼohofi ʼo koe.+
4 ʼE fakamalaloʼi anai ia koe,
ʼE ke palalau anai mai te kele,
Pea ʼe mole logo mai anai ʼau palalau ʼi te efu.
ʼE hake ake tou leʼo mai te kele+
Ohage ko te leʼo ʼo he tahi ʼe felogoi mo te kau mate,
Pea ʼe fanafana mai ʼau palalau mai te efu.
5 ʼE hage anai te kaugamalie ʼo ʼou fili* ko te eveʼi efu.+
ʼE viligia anai te kaugamalie ʼo te ʼu pule agamalohi ohage ko te kiliʼi fulumeto.+
ʼE hoko fakafokifa anai ʼi he kiʼi temi.+
6 ʼE tokaga anai ia Sehova ʼo te ʼatu kautau kia koe
ʼAki te mana, mo he mafuike, pea mo he toe logoaʼa,
Mo he afā, mo he tuʼani matagi pea mo he afi kakaha.”+
7 Pea ko te kaugamalie ʼo te ʼu puleʼaga fuli ʼae ʼe laga tau ki Aliele:+
Ia natou fuli ʼae ʼe natou tauʼi,
Mo te ʼu tule ʼae neʼe fakatuʼu moʼona ʼohofi,
Pea mo natou ʼae ʼe natou fakamamahiʼi,
ʼE natou liliu anai ohage ko he moemisi, he meʼa ʼe ha ʼi te poʼuli.
8 ʼEi, ʼe hage anai ko he tahi ʼe fia kai ʼe moemisi ʼe lolotoga kai,
Kae ʼe ʼala ake ia ʼe kei fia kai pe ia.
Pea ʼe hage ko he tahi ʼe fia inu ʼe moemisi ia ʼe lolotoga inu,
Kae ʼe ʼala gaʼegaʼe ake ia mo fia inu.
Ko te meʼa ʼaia ka hoko ki te kaugamalie ʼo te ʼu puleʼaga fuli
ʼAe ʼe laga tau ki te Moʼuga ʼo Sione.+
ʼE natou konahihia kae mole ʼuhi ko te vino,
ʼE natou siʼia kae mole ʼuhi ko te kava.
10 Neʼe tuku e Sehova ke kotou maʼumoea ʼi te faʼahi fakalaumalie.+
Neʼe ina pupunu te ʼu mata ʼo te kau polofeta,+
Neʼe ina ʼuʼufi te ʼu ʼulu ʼo natou ʼae ʼe ha ki ai ni meʼa.+
11 ʼE hage ia meʼa fuli ʼae ʼe ha kia koutou ko ni palalau ʼo he tohi neʼe fakamaʼu.+ Kapau ʼe foaki age ki he tahi ʼe poto ʼi te lautohi, mo ui: “Fakalelei siʼou loto, ke ke lau leʼo lahi te meʼa ʼaeni,” ʼe ina tali anai: “ ʼE mole feala ia he ʼe fakamaʼu.” 12 Pea kapau ʼe foaki te tohi ki he tahi ʼe mole poto ia ʼi te lautohi, mo ui: “Fakalelei siʼou loto lau te meʼa ʼaeni,” ʼe ina tali anai: “ ʼE mole au poto ʼi te lautohi.”
13 ʼE ui e Sehova: “ ʼE fakaovi mai te hahaʼi ʼaeni kia te au ʼaki ʼanatou palalau,
Pea ʼe natou fakaʼapaʼapa kia te au ʼaki ʼonatou laugutu,+
Kae ʼe mamaʼo ʼaupito ʼonatou loto ia te au.
Pea ʼe fakatafito tanatou manavasiʼi ʼae kia te au ki te ʼu fakatotonu fakatagata ʼae neʼe akoʼi age.+
14 Ko te tupuʼaga la ʼaia ʼo taku toe fai anai he ʼu meʼa fakaofoofo ki te hahaʼi ʼaeni,+
Ko he meʼa fakaofoofo mo he meʼa fakaofoofo.
ʼE puli anai te poto ʼo tana kau popoto,
Pea ʼe puli anai te ʼatamai ʼo tana kau tagata ʼatamai.”+
15 Malaʼia kia natou ʼae ʼe natou faiga malohi ke natou fai fakafufu ʼanatou fakatuʼutuʼu kia Sehova.+
ʼE natou gaue ʼi te ʼu potu fakapoʼuli,
ʼO natou ui: “Ko ai ʼae ʼe sio kia tatou?
Ko ai ʼae ʼe ina iloʼi te meʼa ʼae ʼe tou fai?”+
16 ʼI faihala leva!
ʼE tonu koa ke fakatatau te tagata faʼu ipu mo te kele?+
ʼE feala koa ke ui e te ipu ʼo ʼuhiga mo ia ʼae neʼe ina faʼu ia ia:
“Neʼe mole ina faʼu au”?+
ʼE feala koa ke ui e te ipu ʼo ʼuhiga mo ia ʼae neʼe ina fai ia ia:
“ ʼE mole mahino ki he meʼa”?+
17 Kua vave liliu pe te Lipane ohage ko he gaueʼaga,+
Pea ʼe hage anai te gaueʼaga ko he vao matuʼa.+
18 ʼI te ʼaho ʼaia, ʼe logo anai te kau tuli ki te ʼu folafola ʼo te tohi,
Pea ʼe sisio anai te kau kivi ʼae neʼe haofaki mai te fakapoʼuli.+
19 ʼE hage anai ia Sehova ko he matapuna ʼo te fiafia lahi kia natou ʼae ʼe agavaivai.
Pea ʼe fakafiafiaʼi anai e te Maʼoniʼoni ʼo Iselaele te kau masiva.+
20 ʼE mole toe maʼu anai ia ia ʼae ʼe agamalohi,
ʼE pulihi anai ia ia ʼae ʼe laupisi.
Ko natou fuli ʼae ʼe natou fia fai tuʼumaʼu te meʼa ʼae ʼe kovi, ʼe matehi anai.+
21 ʼEi, ko natou ʼae ʼe natou tukugakoviʼi ʼihi ʼaki he loi,
Mo fai ni puleʼaki kaka kia ia ʼae ʼe ina haofaki ʼihi* ʼi te matapa ʼo te kolo,+
Pea mole natou fakahoko te faitotonu kia ia ʼae ʼe agatonu ʼaki ni palalau vaʼiganoa.+
22 Koia koʼeni te ʼu palalau ʼa Sehova, ʼae neʼe ina totogi ia Apalahamo,+ neʼe ina ui age ki te hologa ʼo Sakopo:
23 ʼE sio anai ki ʼana fanau,
ʼAe ko te gaue ʼo ʼoku nima,+
Pea ʼe natou fakatapuha anai toku huafa,
ʼEi, ʼe natou fakamaʼoniʼoniʼi anai te Maʼoniʼoni ʼo Sakopo,
Pea ʼe natou fakaʼapaʼapa lahi anai ki te ʼAtua ʼo Iselaele.+
24 Ko natou ʼae ʼe hehe ʼanatou fakakaukau, ʼe natou ʼatamai anai,
Pea ko natou ʼae ʼe meo, ʼe natou tali anai ke akoʼi natou.”
30 Koʼeni te folafola ʼa Sehova:
“Malaʼia ki te ʼu foha uigataʼa,+
ʼAe ʼe natou fakahoko ni fakatuʼutuʼu kae ʼe mole ʼaʼaku,+
ʼAe ʼe natou fai ni fuakava kae ʼe mole takitaki e toku laumalie,
ʼO tuputupu ai te agahala.
2 ʼE natou hifo ki Esipito+ kae neʼe mole natou felogoi mai,+
Ke natou kumi ai te puipui ʼa Falaone
Pea ke natou fenonoʼi ʼi te malu ʼo Esipito!
3 Kae ʼe liliu anai te puipui ʼa Falaone ko he ufiufi kia koutou,
Pea ko te nonoʼaga ʼi te malu ʼo Esipito ko he lainoa.+
4 Kua nonofo ʼi Tesoane te ʼu tama ʼaliki,+
Pea kua tau ki Anese te kau fakafofoga.
5 ʼE natou ufiufi fuli anai
ʼUhi ko te hahaʼi ʼae ʼe mole honatou ʼaoga,
ʼAe ʼe mole maʼu ai he haofaki pea ʼe mole honatou ʼuhiga,
Ko te ufiufi pe mo te fakalainoa.”+
6 Koʼeni te logo ʼo ʼuhiga mo te ʼu manu ʼo te potu saute:
ʼI te fenua ʼo te mamahi mo te ʼu ʼahiʼahi,
Te fenua ʼo te laione mo te laione gugulu,
Mo te ʼu gata kafokona,
ʼE natou fetuku ʼonatou koloa ʼi te ʼu tuʼa ʼo te ʼu asino
Pea mo ʼanatou meʼa ʼofa ʼi te ʼu tuʼa ʼo te ʼu kamelo.
Kae ʼe mole ʼaoga anai te ʼu meʼa ʼaia ki te hahaʼi.
7 Pea ʼe mole he ʼaoga tuʼa tahi ʼo te tokoni ʼa Esipito.+
Koia ʼae neʼe au fakahigoaʼi ai: “Ko Laape+ ʼae ʼe mole ina fai he meʼa.”
8 “Koia, alu nei ʼo tohi ki he lauʼi maka ʼi ʼonatou muʼa,
Pea ke hiki ki he tohi,+
Ko he fakamoʼoni ʼo talu ai
Ke ʼaoga ai ki te ka haʼu.+
9 Ko he hahaʼi agatuʼu,+ ko ni foha gutuloi,+
Ko ni foha ʼe mole natou fia fakalogo ki te lao* ʼa Sehova.+
10 ʼE natou ui ki te kau polofeta: ‘ ʼAua naʼa kotou faifakakikite,’
Pea ki te ʼu tagata ʼae ʼe natou iloʼi te ʼu meʼa ʼae neʼe ha: ‘ ʼAua naʼa kotou palalau mai ki ni meʼa neʼe ha moʼoni.+
Kotou fai mai ni palalau fakalai, kotou sioʼi ni meʼa kaka.+
11 Kotou maliu kehe mo fakamamaʼo mai te ala.
Tuku takotou palalau mai ki te Maʼoniʼoni ʼo Iselaele.’ ”+
12 Koia koʼeni te folafola ʼa te Maʼoniʼoni ʼo Iselaele:
“ ʼI takotou siʼaki taku folafola,+
Pea mo takotou falala ki te kaka mo te loi,
Pea mo takotou tui ki ai,+
13 ʼE hage anai te hala ʼaia kia koutou ko he kaupa kua makafaʼafaʼa,
Ohage ko he kaupa maʼoluga ʼe piko pea kua vave holo.
ʼE holo fakafokifa anai ʼi he kiʼi temi.
14 ʼE maumauʼi anai ohage ko he ipu kele lahi.
ʼE laliki katoa anai ʼo mole pe la toe he kogaʼi ipu
Moʼo heu he mamalaʼi afi
Peʼe moʼo ohu vai ʼi he foʼi vai.”*
15 Koʼeni te folafola ʼa te Tuʼi ʼAliki ko Sehova, te Maʼoniʼoni ʼo Iselaele:
“Kotou toe liliu mai kia te au pea mo talitali ʼi te fimalie pea ʼe haofaki anai koutou.
ʼE kotou malolohi anai mo kapau ʼe mole kotou hoha kae ʼe kotou falala.”+
Kae neʼe mole kotou loto ki ai.+
16 Neʼe kotou ui koutou: “Kailoa, ʼe matou feholaki anai ʼi ni hosi!”
ʼE moʼoni, ʼe kotou feholaki anai.
“ ʼE matou heheka anai ʼi ni hosi gaholo!”+
Kae ʼe gaholo anai ia natou ʼae ʼe natou tuli koutou.+
17 ʼE tete anai he toko afe ʼi he foʼi tokotahi.+
ʼE kotou feholaki anai ʼi he foʼi toko nima.
Pea ko natou ʼae ka toe, ʼe natou hage anai ko he pou ʼi te tumutumu ʼo he moʼuga,
18 Kae ʼe kataki fualoa pe ia Sehova ke manavaʼofa kia koutou,+
Pea ʼe tuʼu ake anai ʼo fakaha atu tona manavaʼofa.+
Ko Sehova ʼe ko he ʼAtua ʼo te faitotonu.+
Manuʼia ia natou fuli ʼae ʼe haga talitali kia te ia.*+
19 Ke ke iloʼi papau, ʼe mole ke toe tagi anai moka toe nonofo te hahaʼi ʼi Sione, ʼi Selusalemi.+ ʼE manavaʼofa anai* kia koe moka ʼe ke kole tokoni kia te ia. ʼE tali atu anai moka logo ki ai.+ 20 ʼE moʼoni, ʼe foaki atu anai e Sehova te mamahi ko hau moʼi pane pea mo te fakataga ko hou moʼi vai.+ Kae ʼe mole toe nono anai tou Faiako Lahi, pea ʼe ke sio tonu anai ki tou Faiako Lahi.+ 21 Kapau ʼe ke maliu ki te faʼahi mataʼu peʼe ko te faʼahi hema,+ ʼe logo anai ʼou taliga ki te folafola ʼaeni ʼi ʼou tuʼa: “Koʼeni te ala,+ kotou haʼele ai.”
22 ʼE ke ʼulihi anai ʼau fakatata ʼae neʼe togi mo ʼaofi ʼaki te siliva pea mo ʼau fakatata ukamea* ʼae neʼe ʼaofi ʼaki te aulo.+ ʼE ke laku anai ohage ko he kie ʼe ʼuli ʼuhi ko te mahaki fakafafine, ʼo ui age kia natou: “Ki tuʼa!”*+ 23 ʼE ina foaki atu anai te ʼua ki te pulapula ʼae ka nunusi,+ pea ʼe mahu anai te kele ko te pane kano lelei.+ ʼI te temi ʼaia, ʼe kakai anai ʼau faga manu ʼi ni koga meʼa lunaʼia laulahi.+ 24 Ko te ʼu pipi mo te ʼu asino ʼae ʼe natou gaueʼi te kele, ʼe natou kai anai te luna moamoa ʼae neʼe kua haha ʼaki te huo takele mo te lato pea neʼe fio ʼaki he faʼahiga lauʼakau. 25 ʼI te ʼaho ʼo te mātea, moka holo te ʼu tule, ʼe maʼu anai ʼi te ʼu moʼuga maʼoluga fuli mo te ʼu kiʼi moʼuga fuli ni tafega vai mo ni vai tafe.+ 26 ʼEi, ʼi te ʼaho ʼae ʼe haʼi ai anai e Sehova te lavea ʼo tana hahaʼi+ mo faitoʼo te kafo ʼo tana foʼi ta,+ ʼe hage anai te mu ʼo te mahina ko te mu ʼo te laʼa pea ʼe malohi anai ʼo tuʼa fitu te mu ʼo te laʼa+ ohage ko te malama ʼo ʼaho ʼe fitu.
27 Koʼeni, ʼe haʼu ia Sehova mai mamaʼo,
Mo he toe ita lahi ʼi ni ʼao matolu.
ʼE fonu ʼona laugutu ko te hauhau,
Pea ʼe hage tona ʼalelo ko he afi kakaha.+
28 ʼE hage tona laumalie* ko he vai tafe ʼe hake ʼo kaku ki te kia,
Moʼo luluʼi te ʼu puleʼaga ʼi te tami ʼo te fakaʼauha.
ʼE fakagutu anai te ʼu puleʼaga+ ke taki mamaʼo ai natou mai te ala.
29 Kae ʼe hage anai takotou hiva ko ʼae ʼe hivaʼi ʼi te poʼuli,
Moka kita teuteu ki he ʼaho lahi,+
Pea ʼe kotou fiafia anai ohage ko he tahi
ʼE haʼele mo hana fagufagu
Ki te moʼuga ʼo Sehova, te ʼUtu ʼo Iselaele.+
30 ʼE fakaha anai e Sehova ia tona leʼo fakaofoofo+
Mo tona nima+ ʼae ka ina fakaʼaogaʼi ʼi tona hauhau,+
Mo te ulo ʼo he afi kakaha,+
31 ʼE mataku likoliko anai ia Asilia ʼi tana logo ki te leʼo ʼo Sehova,+
Pea ʼe ina taʼi anai ia ia ʼaki he ʼakau.+
32 ʼI te temi fuli pe ʼae ʼe taʼi ai
E Sehova ia Asilia ʼaki te ʼakau ʼo te fakatuʼā,
ʼE ta ai anai te ʼu nafa mo te ʼu alepa,+
Moka ina hiki tona nima kia natou ʼi te tau.+
Neʼe ina fai he mata afi ʼe laulahi mo loloto,
ʼAki ni fafie mo he afi ʼe mu lelei.
ʼE tutu anai
E te manava ʼo Sehova ohage ko he vai tafe sulifa.
31 Malaʼia kia natou ʼae ʼe hifo ki Esipito ʼo kumi tokoni,+
Kia natou ʼae ʼe falala ki te ʼu hosi,+
ʼAe ʼe falala ki te ʼu saliote tau he ʼe natou kaugamalie,
Ki te kau heka hosi he ʼe natou malolohi.
ʼE mole natou haga ki te Maʼoniʼoni ʼo Iselaele,
ʼE mole natou kumi natou ia Sehova.
2 Kae ʼe toe poto mo ia, ʼe ina fakato anai te malaʼia
Pea ʼe ina fakahoko anai ʼana folafola.
ʼE fakafeagai anai ki te hahaʼi agakovi
Pea mo natou ʼae ʼe tokoni ki te kau agamalohi.+
3 Ko te kau Esipito, ʼe ko ni tagata pe ia, pea ʼe mole feala ke fakatatau ki te ʼAtua.
ʼE kakano pe ʼanatou hosi, kae ʼe mole ko ni laumalie.+
Ka faoʼi e Sehova ia tona nima,
ʼE tukia anai ia ia ʼae ʼe ina foaki he tokoni,
Pea ʼe to anai ia ia ʼae ʼe ina maʼu te tokoni.
ʼE natou pupuli fuli anai ʼi he temi ʼe tahi.
4 Koʼeni te folafola ʼae neʼe ui mai e Sehova:
“ ʼE hifo anai ia Sehova ʼo te ʼatu kautau ʼo tau
Maʼa te Moʼuga ʼo Sione pea mo tona tumutumu.
ʼE hage pe anai ko he laione ʼe kei mui mo malohi, ʼe gugulu moʼo taupau ia tana meʼa kai
Moka fakatahitahi ni kau tauhi ovi ʼo fakafeagai kia ia,
Kae ʼe mole tekelili ia ʼi ʼonatou leʼo
Pea ʼe mole tokaga ia ki tanatou logoaʼa.
5 ʼE puipui anai e Sehova ʼo te ʼatu kautau ia Selusalemi ohage ko ni manulele ʼe natou ʼoho ki ʼonatou moeʼaga.+
ʼE ina puipui anai mo ina haofaki.
ʼE ina fakahao anai mo ina fakaʼateainaʼi.”
6 “Hahaʼi ʼo Iselaele, kotou toe liliu mai kia te Ia ʼae neʼe kotou agatuʼu faʼifaʼitaliha ki ai.+ 7 ʼI te ʼaho ʼaia, ʼe kotou tahi laku anai ʼona ʼatua siliva ʼae ʼe mole hona ʼuhiga, mo te ʼu ʼatua aulo ʼae ʼe mole hona ʼaoga, ʼae neʼe kotou agahala ʼo faʼu.
8 ʼE matehi anai te tagata Asilia e te heleta, kae ʼe mole ko te heleta ʼa he tagata.
ʼE tamateʼi anai e te heleta, kae ʼe mole ko te heleta ʼa he tagata.+
ʼE hola anai ia muʼa ʼo te heleta,
Pea ʼe fakakauganaʼi anai tana kau tupulaga.
9 ʼE puli anai tona ʼutu ʼi te mataku,
Pea ʼe tekelili anai ʼana tama ʼaliki ʼi te fakailoga,”* ko te ui ʼaia ʼa Sehova,
ʼAe ʼe tuʼu tona malama* ʼi Sione mo tana gutuʼumu ʼi Selusalemi.
2 ʼE natou tahi liliu anai ko he nonoʼaga ʼi te matagi,
Ko he holaʼaga ʼi te afā,
Ko he ʼu vai tafe ʼi he kele moamoa,+
Ko he malu ʼo he fuʼu maka ʼi he kele magemage.
3 ʼE mole mapunu anai te ʼu mata ʼo natou ʼae ʼe sisio,
Pea ʼe fakalogo lelei anai ia natou ʼae ʼe logo.
4 ʼE fakakaukauʼi anai e ia ʼae ʼe ʼoho noa te ʼatamai malama,
Pea ʼe mahino anai mo tasilo te palalau ʼa ia ʼae ʼe ʼalelo vale.+
5 ʼE mole toe ui anai ʼe lelei te aga ʼa* te tagata agavale,
Pea ʼe tuha mo te fakaʼapaʼapa te tagata agakaka.
6 ʼE hoko palalau anai ia ia ʼae ʼe agavale,
Pea ʼe fakatuʼutuʼu kovi tuʼumaʼu anai tona loto,+
ʼE ina uga anai ke agatuʼu te hahaʼi pea mo laukovi kia Sehova.
ʼE mole ina fafaga anai ia ia ʼae ʼe fia kai,
Pea ʼe mole ina fakainu anai ia ia ʼae ʼe fia inu.
7 ʼE kovi te ʼu fakatuʼutuʼu ʼa te tagata agakaka.+
ʼE ina uga ke fai he aga fakaufiufi,
Ke pulihi ai te tagata fakaʼofaʼofa ʼaki ni loi,+
Logo la ʼe tonu te ʼu palalau ʼa te tagata masiva.
8 Kae ʼe lelei te ʼu fakatuʼutuʼu ʼa te tagata lelei*
Pea ʼe ina fai tuʼumaʼu ni fakatuʼutuʼu lelei.
9 “ ʼU fafine fakaʼauʼauganoa, kotou tutuʼu ake mo fakalogo mai!
ʼU taʼahine fakafifimalie,+ kotou tokagaʼi ʼaku palalau!
10 Ko koutou ʼae ʼe fakafifimalie, ʼe kotou tekelili anai ʼi te hili ʼo he taʼu ʼe tahi mo laka atu,
He ʼe mole toe maʼu anai he vite ʼi te fakaʼosi ʼo te taʼukai.+
11 ʼU fafine fakaʼauʼauganoa, kotou matataku!
Ko koutou ʼae ʼe fakafifimalie, kotou tekelili!
12 Kotou tuki fatafata mo fetagihi
ʼO ʼuhiga mo te ʼu gaueʼaga matalelei mo te gaueʼaga vite ʼae ʼe fua.
13 ʼE tupu anai te ʼakau talatala mo te vao talatala ʼi te kele ʼo taku hahaʼi.
ʼE ʼaofi anai te ʼu ʼapi fuli ʼae neʼe maʼu ai te fiafia,
ʼEi, te kolo ʼo te fiafia.+
14 Kua siʼaki te tule malohi,
Kua tuʼu lavaki te kolo ʼae neʼe logoaʼa.+
ʼE liʼakina anai te Ofeli*+ pea mo te tule leʼo.
ʼE liliu anai ko he palatiso maʼa te ʼu asino vao,
Pea ko he koga meʼa lunaʼia maʼa te faga manu.+
15 ʼE feia anai ʼo kaku ki te hifo mai ʼo te laumalie kia tatou,+
Pea mo te liliu ʼo te toafa ko he gaueʼaga,
Mo te gaueʼaga ohage ko he vao matuʼa.+
16 Pea ʼe maʼu anai te agatonu ʼi te toafa,
Mo te faitotonu ʼi te gaueʼaga.+
17 ʼE tupu anai te tokalelei ʼi te faitotonu moʼoni,+
ʼEi, ʼe maʼu tuʼumaʼu anai te tokalelei mo te fimalie ʼi te faitotonu moʼoni.+
18 ʼE nonofo anai taku hahaʼi ʼi he koga meʼa tokalelei,
ʼI ni ʼapi malohi mo ni koga meʼa fimalie.+
19 Kae ʼe taʼotaʼo anai te vao matuʼa e te ʼuamaka,
Pea ʼe maumauʼi katoa anai te kolo.
20 Manuʼia ia koutou ʼae ʼe kotou nunusi ʼi te ʼu potu fuli ʼae ʼe maʼu ai te vai,
33 Malaʼia kia koe, tagata fakatupu maumau ʼae neʼe mole maumauʼi,+
ʼAe ʼe kaka kae heʼeki kakaʼi!
Ka ʼosi anai tau maumau ʼe maumauʼi anai koe.+
Ka ʼosi anai tau kaka pea ʼe kakaʼi anai koe.
2 Sehova e, ʼofa mai kia matou.+
ʼE matou falala kia te koe.
3 ʼE feholaki anai te hahaʼi ʼi te logoaʼa.
ʼE mavetevete te ʼu puleʼaga moka ʼe ke tuʼu ake.+
4 ʼE tanaki anai te koloa ohage ko he fakapupu ʼa ni heʼe kaikai.
ʼE ʼoho anai ki ai te hahaʼi ohage ko ni pupuga heʼe.
5 ʼE fakakololiaʼi anai ia Sehova,
Koteʼuhi ʼe nofo ʼi te ʼu potu maʼoluga.
ʼE ina uga anai ke agatonu mo faitotonu te hahaʼi ʼo Sione.
6 ʼE ina foaki atu he maʼuli fimalie,
Mo te haofaki,+ mo te poto, mo te ʼatamai malama pea mo te manavasiʼi kia Sehova,+
Ko he toe koloa ia.*
7 Koʼeni, ʼe kalaga ʼanatou kau toʼa ʼi te ala,
ʼE tagi mamahi te kau ʼave logo ʼo te tokalelei.
8 Kua lavaki te ʼu ala lalahi,
ʼE mole kei haʼeleʼi te ʼu ala.
9 ʼE putu* te fenua, ʼe hage ko he fisiʼi teu ʼe fefe.
ʼE ufiufi ia Lipane,+ ʼe hage ko he meʼa kua pala.
Kua liliu ia Salona ohage ko he toafa,
Pea kua fakato lau ia Pasani mo Kalemelo.+
10 ʼE ui e Sehova: “ ʼI te temi nei, ʼe au tuʼu ake anai,
ʼI te temi nei, ʼe au fakakololiaʼi anai ia au,+
ʼI te temi nei, ʼe au fakamaʼuhigaʼi anai ia au.
11 ʼE to noa anai ʼakotou fakatuʼutuʼu mo ʼakotou gaue ohage ko he luna moamoa.
ʼE kotou kakaha anai ohage ko he afi ʼuhi ko takotou faʼahiga manatu.*+
12 ʼE hage anai neʼe tutu te hahaʼi ʼaki te lahe.
ʼE tutu anai natou ohage ko te ʼu ʼakau talatala ʼae neʼe tuʼusi.+
13 Kotou fagono ki te meʼa ʼae ka au fai, ia koutou ʼae ʼe mamaʼo!
Kotou tokagaʼi toku mafimafi, ia koutou ʼae ʼe ovi mai!
‘Ko ai ʼae ia tatou ʼe feala ke maʼuli ʼi he vaʼe afi kakaha?+
Ko ai ʼae ia tatou ʼe feala ke maʼuli ʼi he vaʼe afi ʼe ulo tuʼumaʼu?’
15 Ko ia ʼae ʼe faitotonu tuʼumaʼu,+
Ko ia ʼae ʼe ina fakaha te meʼa ʼae ʼe totonu,+
Ko ia ʼae ʼe lituʼa ki te agakaka,
ʼAe ʼe fakafisi ki te meʼa ʼofa kaka,+
Ko ia ʼae ʼe ina pupunu ʼona taliga ke mole logo ki te palalauʼi ʼo he faifakapo
Pea mo moeʼi ʼona mata ke mole sio ki te meʼa ʼae ʼe kovi:
16 ʼE nofo anai ia ia ʼaia ʼi te ʼu potu maʼoluga,
ʼE ina maʼu anai tona nonoʼaga moʼoni ʼi te ʼu mata maka malolohi,
ʼE ina maʼu ai anai tana moʼi pane,
Pea ʼe mole hoge vai anai ʼi he temi.”+
17 ʼE ke mamata anai ki he hau ʼi tona kololia.
ʼE ke sio anai ki he fenua mamaʼo.
18 ʼE fakamanatuʼi atu anai e tou loto* te aluʼaga fakamataku ʼaia, pea ʼe ke ui anai:
“Kofea te sikalaipe?
Kofea ia ia ʼae neʼe ina fua te tukuhau?+
Kofea ia ia ʼae neʼe ina lau te ʼu tule?”
19 ʼE mole ke toe sio anai ki te hahaʼi agapauʼu ʼaia,
Ki te hahaʼi ʼaia ʼe faigataʼa tanatou lea ke ke logo ki ai,
ʼAe ʼe ʼalelo vale ʼo mole ke mahino ki ai.+
20 Mamata ki Sione, te kolo ʼo te ʼu ʼaho lalahi!+
ʼE ke sio anai ki Selusalemi, te kolo ʼae ʼe maʼuli fimalie,
Te fale la ʼae ʼe mole hiki anai.+
ʼE mole taʼaki anai ʼona faʼo ʼi he temi,
Pea ʼe mole motuhi anai ʼona maea.
21 ʼI te potu ʼaia, ko Sehova, te Taulekaleka,
ʼE hage anai maʼa tatou ko he koga meʼa ʼe lahi ai ni vai tafe mo ni tafega vai,
ʼAe ʼe mole faifolau ai anai ni vaka tauʼaʼalo,
ʼAe ʼe mole fakalaka ai anai ni vaka matalelei.
22 Ko Sehova ko totatou Tuʼi Fakamau,+
Ko Sehova ko tatatou Tagata Failao,+
Ko Sehova ko totatou Hau.+
Ko Ia ʼae ka ina haofaki anai tatou.+
23 ʼE veteki anai te ʼu maea,
ʼE mole tuʼu tonu anai te fana, peʼe mole folahi anai te ʼu la.
ʼI te temi ʼaia, ʼe lahi anai te koloa ʼae ka vaevae,
ʼE toe lahi anai mo te vahe ʼo te kau ketu.+
24 ʼE mole ui anai e he tahi: “ ʼE au mahaki.”+
ʼE fakamolemole anai te hala ʼa te hahaʼi ʼae ʼe nonofo ʼi te fenua.+
34 ʼU puleʼaga, kotou fakaovi mai ʼo fakalogo,
Hahaʼi, kotou tokakaga.
Ke fakalogo te kele pea mo meʼa fuli ʼae ʼe maʼu ai,
Te fenua pea mo ʼona fua fuli.
Kua ina fakatotonu ke ina fakaʼauha ia natou
ʼO matematehi ai ia natou.+
3 ʼE laku anai ʼi tuʼa te ʼu mate.
ʼE mamanu anai te ʼu sino mate.+
ʼE hahali anai tonatou toto ʼi te ʼu moʼuga.+
4 ʼE pala anai te kautau katoa ʼo te lagi,
ʼE takatakai anai te lagi ohage ko he takaiga tohi.
ʼE fefe anai te kautau katoa,
Ohage ko he lau moamoa ʼe to mai te fuʼu vite
Peʼe ko he foʼi fiku fefe mai te fuʼu fiku.
5 “ ʼI te lagi, ʼe totototo anai taku heleta.+
ʼE au fakaʼaogaʼi anai moʼo fakahoko te fakamau ki Etome,+
Ki te hahaʼi ʼae kua au fakatotonu ke fakaʼauha.
6 ʼE ʼi ai te heleta ʼa Sehova: ʼe totototo anai
Mo ʼaofi ʼaki te gako,+
Te gako ʼo te ʼu ifiifi ʼo te ʼu ovi,
Mo te toto ʼo te ʼu ovi tagata ʼae ʼe kei mui mo te ʼu tao.
ʼE teuteuʼi e Sehova he sakilifisio ʼi Potisela,
Ko he toe mātea ia ʼi te fenua ʼo Etome.+
7 ʼE olo anai mo natou te ʼu vitulo vao,
Ia natou ʼae ʼe kei mui mo malolohi.
ʼE totototo anai te kele,
Mo gakogako te efu.”
8 Neʼe fakatuʼutuʼu e Sehova he ʼaho lagavaka,+
He taʼu ʼe ina fakamauʼi ai te kovi ʼae neʼe fai ki Sione.+
9 ʼE liliu anai ʼona tafega vai* ʼo huʼa ʼuli,*
Pea ko tona efu ko te sulifa.
ʼE liliu anai tona kele ko he meʼa huʼa ʼuli ʼe ulo.
10 ʼE mole mate anai ia ʼi te poʼuli peʼe ko te ʼaho,
ʼE kohu anai ia ʼo talu ai.
ʼE tuʼu maumau anai mai he taʼiake ki he tahi taʼiake ia te fenua,
ʼE mole toe fakalaka ai anai he tahi.+
11 Ko te nofoʼaga anai ʼo te pelikano pea mo te eliso,
ʼE toe nonofo ai mo te ʼu lulu pea mo te ʼu kolopo.
ʼE fakafuafua anai e te ʼAtua* te fenua ʼaki he maea moʼo fakaha ʼe mole hona ʼuhiga,
Pea mo he filo ʼe tautau ai he foʼi pulu ʼe ha ai ʼe tuʼu lavaki anai.
12 ʼE mole fakanofo anai ke hau he tahi ʼi ʼana ʼaliki,
ʼE pulihi anai ʼana tama ʼaliki fuli.
13 ʼE hohomo anai te ʼu ʼakau talatala ʼi ʼona tule malolohi,
Pea mo te vao talatala mo te vao kovi ʼi ʼona kolo tau.
ʼE liliu anai ko he nofoʼaga maʼa te ʼu kuli vao,+
Pea mo he lotoʼa maʼa te ʼu otulusi.
14 ʼE fetaulaki anai te ʼu manu ʼo te toafa mo te ʼu manu logoaʼa,
Pea ʼe fetagiʼaki anai te ʼu tao ʼo te vao.*
Ko te nofoʼaga ʼaia ʼo te manulele ʼo te poʼuli pea ko tona maloloʼaga.
15 ʼE toe fai ai anai e te gata tona moeʼaga pea mo fakato ai ʼona fua.
ʼE ina tataʼo anai mo puipui ai natou.
ʼE toe fakatahi ai anai mo te ʼu milani, tagata mo fafine.
16 Kotou kumi te tohi ʼa Sehova pea kotou lau leʼo lahi:
ʼE mole puli anai he manu ʼi te ʼu manu ʼaia.
ʼE mole hala anai he manu tagata mo hana manu fafine,
Ko te fakatotonu ʼaia mai ia Sehova,
Pea neʼe ina fakatahiʼi natou ʼaki tona laumalie.
17 Ko ia ʼae neʼe ina fai te toho ʼo ʼuhiga mo tonatou vahe,
Neʼe ina fakatuʼakoi te koga meʼa ʼae ka foaki age kia natou.
ʼE ko tonatou koga meʼa anai ʼo talu ai,
ʼE natou nonofo ai anai mai he tahi taʼiake ki he tahi taʼiake.
35 ʼE fakafiafia anai te toafa mo te fenua kele magemage.+
ʼE fiafia anai te potu toafa pea ʼe fisi anai ohage ko te safalani.+
ʼE kita sio anai ki te kololia ʼo Sehova, te taulekaleka ʼo totatou ʼAtua.
4 Ui age kia natou ʼae ʼe tuʼania:
“Kotou malolohi, ʼaua naʼa kotou matataku.
Koʼeni, ʼe haʼu anai tokotou ʼAtua mo te lagavaka,
ʼE haʼu anai tokotou ʼAtua mo te fakatuʼā.+
ʼE haʼu anai ʼo ina haofaki koutou.”+
6 ʼI te temi ʼaia, ʼe hopohopo fakafiafia anai te ketu ohage ko te tia,+
Pea ʼe kalaga fakafiafia anai te ʼalelo mate.+
ʼE mapuna ake anai ni vai mai te toafa,
Mo ni vai tafe mai te potu toafa.
7 ʼE liliu anai te kele magemage ko he vai ʼe maʼuli ai ni kaho,
Mo te kele moamoa ko ni matapuna vai.+
ʼE homo anai te luna, mo te ʼu kaho, mo te ʼu papilusi
ʼI te ʼu maloloʼaga ʼo te ʼu kuli vao.+
ʼE mole fakalaka ai anai he tahi ʼe heʼe maʼa.+
ʼE fakalaka pe ia natou ʼae neʼe fakagafua age,
ʼE mole haʼele ai anai he vale.
9 ʼI te ala ʼaia, ʼe mole maʼu ai anai he laione
Peʼe ko ni manu kaikai ʼo te vao.
10 ʼE toe liliu mai anai mo feulufi ʼi te fiafia ki Sione ia natou ʼae neʼe totogi e Sehova.+
ʼE hage anai tonatou fiafia ko he pale ʼi ʼonatou ʼulu.+
ʼE natou lotofiafia anai,
ʼE pulihi anai te lotomamahi mo te lauga.+
36 ʼI te 14 taʼu ʼo te pule ʼa te Hau ko Esekiasi, neʼe haʼu ia Senakelipe, te hau ʼo Asilia+ ʼo tauʼi te ʼu kolo tau fuli ʼo Suta pea neʼe ina maʼu.+ 2 Neʼe fekauʼi leva e te hau ʼo Asilia ia te Lapesake*+ ʼae neʼe ʼi Lakisi+ pea mo he foʼi kautau kaugamalie ke natou olo ki Selusalemi, ki te Hau ko Esekiasi. Neʼe natou olo ai ʼo tutuʼu ovi ki te tafega vai ʼae ʼe haʼu mai te maʼanuʼaga ʼi ʼoluga,+ ʼi te ala ʼae ʼe alu ki te gaueʼaga ʼa te tagata faifo.+ 3 Neʼe ko Eliakimi,+ te foha ʼo Ilekisa, mo Sepena,+ pea mo Soake, te foha ʼo Asafe, ʼae neʼe olo age kia ia. Neʼe tokaga ki te fale hau ia Eliakimi, ko Sepena neʼe ko te sikalaipe pea ko Soake neʼe ko te sikalaipe ʼa te hau.
4 Pea neʼe ui e te Lapesake kia natou: “Fakalelei siʼokotou loto, kae kotou ui age kia Esekiasi: ‘Koʼeni te meʼa ʼae ʼe ui e te hau lahi, te hau ʼo Asilia: “Kotea koa ʼae ʼe tupu ai tau falala?+ 5 ʼE ke ui ʼe ʼi ai tau fakatuʼutuʼu pea ʼe ke maʼu te malohi ki te tau, kae ʼe mole he ʼuhiga ʼo tau palalau ʼaia. Ko ai koa ʼae ʼe ke falala ki ai, ke ke agatuʼu mai ai kia au?+ 6 ʼE ke falala ki te tokoni ʼa te kaho fasi ʼaena ko Esipito, kae ka tekeni he tahi ki ai, pea ʼe pu anai tona nima. ʼE fena ia Falaone, te hau ʼo Esipito kia natou ʼae ʼe falala kia ia.+ 7 Pea kapau ʼe ke ui mai: ‘ ʼE matou falala kia Sehova, tomatou ʼAtua,’ ʼe mole koa la ko ʼona faʼahi maʼoluga pea mo ʼona ʼaletale ʼae neʼe pulihi e Esekiasi,+ kae neʼe ina ui ki Suta pea mo Selusalemi: ‘ ʼE kotou tulolo anai ʼi te muʼa ʼaletale ʼaeni’?” ’+ 8 Koia, fakalelei siʼou loto, kae ʼi te lakaga nei, ke ke vakaʼi pe ʼe ke lavaʼi anai te fakatuʼutuʼu ʼaeni ʼo siʼoku ʼaliki, te hau ʼo Asilia:+ ʼE au foaki atu anai ni hosi ʼe 2 000 mo kapau ʼe ke maʼu feʼauga he ʼu tagata heka hosi ke natou heheka ai. 9 ʼE lava feafeaʼi hau kapu te kovana ʼae ʼe veliveli ʼosi ʼi te ʼu hahaʼi faifekau ʼo siʼoku ʼaliki kae ʼe ke falala koe ki te ʼu saliote tau mo te ʼu tagata heka hosi ʼae ka foaki atu e Esipito? 10 Neʼe mole fakagafua mai koa la e Sehova ke au haʼu ʼo tauʼi mo maumauʼi te fenua ʼaeni? Neʼe ui mai e Sehova: ‘Alu ʼo tauʼi mo maumauʼi te fenua ʼaia.’ ”
11 Pea neʼe ui e Eliakimi, mo Sepena+ pea mo Soake ki te Lapesake:+ “Fakalelei siʼou loto, kae ke ke palalau mai kia matou ʼi te lea Fakaalamea,*+ koteʼuhi ʼe matou mahino ki ai. ʼAua naʼa ke palalau mai ʼi te lea ʼa te kau Sutea, naʼa logo mai te hahaʼi ʼae ʼe tutuʼu ʼi te kaupa.”+ 12 Kae neʼe tali age e te Lapesake: “Neʼe mole fekauʼi mai pe au ke au haʼu ʼo fai te ʼu palalau ʼaia ki tokotou ʼaliki pea mo koutou. ʼE mole toe fakahagahaga koa la te ʼu palalau ʼaia ki te ʼu tagata ʼae ʼe heheka ʼi te kaupa, ʼae ka natou kai ʼonatou faifekau pea mo inu ʼonatou livai, ohage pe ko koutou?”
13 Neʼe kalaga leva ia te Lapesake ʼi te lea ʼa te kau Sutea:+ “Kotou fagono ki te folafola ʼa te hau lahi, te hau ʼo Asilia.+ 14 ʼE ui e te hau: ‘ ʼAua naʼa kakaʼi koutou e Esekiasi, he ʼe mole feala ke ina haofaki koutou.+ 15 Pea ʼaua naʼa uga koutou e Esekiasi ke kotou falala kia Sehova,+ ʼo ina ui atu: “ ʼE haofaki moʼoni anai tatou e Sehova, pea ʼe mole tuku anai te kolo ʼaeni ki te ʼu nima ʼo te hau ʼo Asilia.” 16 ʼAua naʼa kotou fakalogo kia ia, he ʼe koʼeni te meʼa ʼae ʼe ui e te hau ʼo Asilia: “Kotou kumi te tokalelei mo au pea tuku takotou fakafeagai mai kia au, pea ʼe kotou tahi kai anai te fua ʼo tana gaueʼaga vite mo tana fuʼu fiku pea mo tahi inu anai te vai ʼo tana foʼi tane vai. 17 ʼE au haʼu anai ʼo ʼave koutou ki he fenua ʼe hage pe ko tokotou fenua,+ he fenua ʼe maʼu ai te fulumeto, mo te olose pea mo te ʼu vite moʼo fai ʼaki takotou pane mo takotou vino. 18 Ke ʼaua naʼa kakaʼi koutou e Esekiasi ʼi tana ui: ‘ ʼE haofaki anai tatou e Sehova.’ Neʼe feala koa ki he ʼatua ʼi te ʼu ʼatua ʼo te ʼu puleʼaga ke ina haofaki tona fenua mai te ʼu nima ʼo te hau ʼo Asilia?+ 19 ʼE ʼifea te ʼu ʼatua ʼo Hamate pea mo Alepate?+ ʼE ʼifea te ʼu ʼatua ʼo Sefalevaimi?+ Neʼe feala koa ke natou haofaki ia Samalia mai ʼoku nima?+ 20 Neʼe ʼi ai koa he ʼu ʼatua ʼi te ʼu ʼatua fuli ʼo te ʼu fenua ʼaia, neʼe feala ke natou haofaki tonatou fenua mai ʼoku nima? Pea ʼe lava haofaki anai koa e Sehova ia Selusalemi mai ʼoku nima?” ’ ”+
21 Kae neʼe natou nonofo fakalogologo ʼo mole natou tali age he meʼa, he neʼe fakatotonu e te hau kia natou: “ ʼAua naʼa kotou tali age he meʼa.”+ 22 Ko Eliakimi, te foha ʼo Ilekisa, ʼae ʼe tokaga ki te fale hau, mo Sepena,+ te sikalaipe pea mo Soake, te foha ʼo Asafe, te sikalaipe ʼa te hau, neʼe natou hae leva ʼonatou teu. Pea neʼe natou olo leva kia Esekiasi ʼo fakaha te ʼu palalau ʼae neʼe fai e te Lapesake.
37 ʼI te temi pe ʼae neʼe logo ai ia te Hau ko Esekiasi ki te faʼahi ʼaia, neʼe ina hae ʼona kofu, mo ina tui he taga* pea neʼe alu leva ki te fale ʼo Sehova.+ 2 Neʼe ina fekauʼi ia Eliakimi, ʼae neʼe tokaga ki te fale hau, mo Sepena, te sikalaipe pea mo te kau takitaki ʼo te ʼu pelepitelo, ke natou olo ki te polofeta ko Esaia,+ te foha ʼo Amote. Neʼe natou tui fuli ai he ʼu taga.* 3 Pea neʼe natou ui age ki te polofeta: “Koʼeni te meʼa ʼae ʼe ui e Esekiasi: ‘Ko te ʼaho ʼaeni ʼe ko he ʼaho ʼo te mamahi, mo te valoki* pea mo te ufiufi, koteʼuhi ʼe matou hage ko he fafine kua vave fanau, kae ʼe mole ina maʼu feʼauga te malohi ke fanau.+ 4 ʼE lagi logo anai ia Sehova tou ʼAtua ki te ʼu palalau ʼa te Lapesake, ʼae neʼe fekauʼi mai e tona ʼaliki, te hau ʼo Asilia ke haʼu ʼo laga tau ki te ʼAtua maʼuli.+ Pea ʼe ina tauteaʼi anai ia ia ʼuhi ko te ʼu palalau ʼaia neʼe logo ki ai ia Sehova tou ʼAtua. Koia ke ke faikole+ maʼa te toe ʼo te hahaʼi ʼaeni neʼe hao.’ ”+
5 ʼI te ʼosi fakaha age e te ʼu tagata faifekau ʼa te Hau ko Esekiasi te logo ʼaia kia Esaia,+ 6 neʼe tali leva e Esaia kia natou: “Koʼeni te meʼa ʼae ʼe tonu ke kotou ui ki tokotou ʼaliki: ‘Koʼeni te folafola ʼa Sehova: “ ʼAua naʼa ke mataku+ ʼuhi ko te ʼu palalau ʼaia neʼe ke logo ki ai, ia te ʼu laukovi ʼae neʼe fai mai kia au e te hahaʼi gaue ʼa te hau ʼo Asilia.+ 7 Koia, ʼe au uga anai tona ʼatamai,* pea ka tau age he logo, ʼe toe liliu anai ki tona fenua.+ Pea ʼe matehi anai ia ia ʼaki te heleta ʼi tona fenua totonu.” ’ ”+
8 ʼI te logo ʼa te Lapesake neʼe kua mavae te hau ʼo Asilia mai Lakisi, neʼe toe liliu ki ai pea neʼe ina maʼu atu ʼe ina tauʼi te kolo ko Lipina.+ 9 Pea neʼe logo te hau ʼo Asilia ki te ui ʼo ʼuhiga mo Tilaka, te Hau ʼo Etiopea: “ ʼE haʼu ʼo tauʼi koe.” ʼI tana iloʼi te faʼahi ʼaia, neʼe ina toe fekauʼi ai he ʼu tagata ʼave logo ke olo kia Esekiasi.+ Neʼe ina ui age kia natou: 10 “Koʼeni te meʼa ʼae ʼe tonu ke kotou ui kia Esekiasi, te Hau ʼo Suta: ‘ ʼAua naʼa kakaʼi koe e tou ʼAtua ʼae ʼe ke falala ki ai, ʼi tana ui atu: “ ʼE mole tuku anai ia Selusalemi ki te ʼu nima ʼo te hau ʼo Asilia.”+ 11 Neʼe ke logo ki te ʼu meʼa ʼae neʼe fai e te ʼu hau ʼo Asilia ki te ʼu fenua fuli, ʼi tanatou haga ʼae ʼo maumauʼi natou.+ Pea ʼe ke manatu koa la ʼe ko koe pe anai ʼae ka hao? 12 Ko te ʼu puleʼaga ʼae neʼe maumauʼi e ʼaku kui neʼe haofaki koa natou e ʼonatou ʼatua?+ ʼE ʼifea ia Kosani, mo Halani,+ mo Letesefi pea mo te hahaʼi ʼo Eteni, ʼae neʼe nonofo ʼi Tele-asale? 13 ʼE ʼifea te hau ʼo Hamate, mo te hau ʼo Alepate pea mo te hau ʼo te ʼu kolo ko Sefalevaimi,+ mo Ena pea mo Iva?’ ”
14 Pea neʼe toʼo e Esekiasi te ʼu tohi mai te ʼu nima ʼo te ʼu tagata ʼave logo ʼo lau. Neʼe alu leva ia Esekiasi ki te fale ʼo Sehova, ʼo ina folahi te ʼu tohi ʼaia ia muʼa ʼo Sehova.+ 15 Pea neʼe kamata faikole ia Esekiasi kia Sehova:+ 16 “Sehova ʼo te ʼatu kautau,+ te ʼAtua ʼo Iselaele, ʼae ʼe ʼafio ʼi te ʼu fuga* kelupimi, ko koe tokotahi pe te ʼAtua moʼoni ʼo te ʼu puleʼaga fuli ʼo te kele. Neʼe ke fakatupu te lagi mo te kele. 17 Sehova e, ke ke tokaga mai pea mo ke fagono!+ Sehova e, ke ava ʼou mata pea mo ke sio!+ Ke ke fagono ki te ʼu palalau fuli ʼae neʼe fai e Senakelipe ʼaki ʼana tagata ʼave logo, moʼo laga tau kia te koe, ʼae ko te ʼAtua maʼuli.+ 18 Sehova e, ʼe moʼoni neʼe maumauʼi e te ʼu hau ʼo Asilia te ʼu fenua fuli+ mo tonatou fenua totonu. 19 Pea neʼe natou laku ʼonatou ʼatua ki te afi,+ he neʼe mole ko he ʼu ʼatua kae neʼe ko te gaue ia ʼo te ʼu nima ʼo te tagata,+ neʼe fai ʼaki te ʼakau pea mo te maka. Koia ʼae neʼe feala ai hanatou maumauʼi. 20 Kae, Sehova e, siʼomatou ʼAtua, ke ke haofaki matou mai ʼona nima, ke iloʼi ai e te ʼu puleʼaga fuli ʼo te kele ʼe ko koe tokotahi pe, Sehova e, ia te ʼAtua.”+
21 Pea neʼe fakaha leva e Esaia, te foha ʼo Amote te logo ʼaeni kia Esekiasi: “Koʼeni te folafola ʼa Sehova, te ʼAtua ʼo Iselaele: ‘Koteʼuhi neʼe ke faikole mai ʼo ʼuhiga mo Senakelipe, te Hau ʼo Asilia,+ 22 koʼeni te ʼu palalau ʼae ʼe fai e Sehova ʼo ʼuhiga mo ia:
“Ko te taʼahine ʼo Sione, ʼae kei nofo taupoʼou, ʼe fehiʼa ia koe, ʼe ina manukiʼi koe.
ʼE kalokalo te ʼulu ʼo te taʼahine ʼo Selusalemi kia koe.
23 Ko ai koa ʼae neʼe ke laga tau ki ai+ pea mo laukoviʼi?
Ko ai koa ʼae neʼe ke leʼo lahi ki ai+
Pea mo sio ki ai ʼaki he fiameʼalahi?
ʼE ko te Maʼoniʼoni ʼo Iselaele!+
24 ʼAki ʼau tagata faifekau neʼe ke laga tau kia Sehova+ pea mo ui:
‘ ʼAki ʼaku tu’uga saliote tau,
ʼE au hake anai ki te tumutumu ʼo te ʼu moʼuga,+
Te ʼu koga meʼa mamaʼo ʼo Lipane.
ʼE au taʼaga anai ʼona fuʼu sete lalahi, mo ʼona fuʼu senelie matalelei.
ʼE au ulu anai ki ʼona koga meʼa ʼae ʼe maʼoluga, mo ʼona vao matuʼa matalelei.
25 ʼE au keli anai he ʼu vai keli pea mo inu anai te vai.
ʼE au fakamamaha anai te ʼu vai tafe* ʼo Esipito ʼaki ʼoku ʼalofi vaʼe.’
26 Neʼe heʼeki ke logo koa la ki ai? Neʼe kua ʼosi fakatuʼutuʼu* te faʼahi ʼaia talu mai fualoa.
Talu mai te temi muʼa, neʼe kua au ʼosi teuteuʼi.+
ʼI te temi leva ʼaeni, ʼe au fakahoko anai.+
ʼE ke fakaliliu anai te ʼu kolo tau ko he ʼu kolo maumau ʼe mole kei nofoʼi.+
27 ʼE mole lava fai anai he meʼa e te hahaʼi ʼae ʼe nonofo ʼi ai.
ʼE natou matataku anai mo ufiufi.
ʼE natou liliu anai ohage ko te vao pea mo te luna,
Ohage ko te luna ʼae ʼi te ʼu fuga fale ʼe moamoa ʼuhi ko te matagi ʼo te potu esite.
28 Kae ʼe au iloʼi lelei pe te temi ʼae ʼe ke heka ai, mo ke ulu ai ki tuʼa, mo ke ulu ai ki loto,+
Pea moka ke ita ai kia au,+
29 Koteʼuhi neʼe au logo ki ʼau palalau itaita ʼae neʼe ke fai mai kia au+ pea mo ʼau kalaga.+
Koia ʼe au ʼai anai taku mātaʼu ki tou ihu pea mo au fakagutu anai koe,+
Pea ʼe au toe fakaliliu anai koe ʼi te ala ʼae neʼe ke haʼu ai.”
30 “ ‘Pea Esekiasi, koʼeni leva te fakailoga ʼe au foaki atu anai kia koe: ʼI te taʼu ʼaeni, ʼe kotou kai anai te meʼa ʼae neʼe homo noa ake.* Pea ʼi te taʼu ka haʼu, ʼe kotou toe kai anai te fulumeto ʼae neʼe homo noa ake. Kae ʼi te taʼu leva ʼae ka hoa mai ki ai, ʼe kotou nunusi anai te pulapula pea mo utu anai, ʼe kotou to anai he ʼu gaueʼaga vite pea mo kotou kai anai ʼonatou fua.+ 31 Ko natou ʼae ka hao ʼi te hahaʼi ʼo Suta, ia natou ʼae kei toe,+ ʼe natou tauaka anai ohage ko he ʼu fuʼu ʼakau pea mo fua. 32 Koteʼuhi ʼe ʼomai anai mai Selusalemi te toe ʼo te hahaʼi, pea ʼe ʼomai anai mai te Moʼuga ʼo Sione ia natou ʼae ka hao.+ ʼE fakahoko anai te faʼahi ʼaia e Sehova ʼo te ʼatu kautau ʼaki he faʼafai.+
33 “ ‘Koia, koʼeni te folafola ʼa Sehova ʼo ʼuhiga mo te hau ʼo Asilia:+
“ ʼE mole ulu mai anai ki te kolo ʼaeni,+
Peʼe ina fanahi he kauʼi nahau ki heni,
Peʼe ina tauʼi ʼaki he meʼa tali tau,
Peʼe ina fakatuʼuga he kele ke natou kaku ki te kaupa ʼo te kolo.” ’+
34 ‘ ʼE toe liliu anai ia ʼi te ala ʼae neʼe haʼu ai,
ʼE mole ulu mai anai ki te kolo ʼaeni,’ ʼe ko te ui ʼaia ʼa Sehova.
35 ‘ ʼE au tau anai maʼa te kolo ʼaeni+ pea mo au haofaki ʼuhi ko toku huafa+
Pea ʼuhi ko taku tagata faifekau ko Tavite.’ ”+
36 Neʼe alu ai te ʼaselo ʼa Sehova ʼo matehi te ʼu tagata ʼe toko 185 000 ʼi te nofoʼaga ʼo te kau Asilia. ʼI te ʼaʼala ake ʼa te hahaʼi ʼi te kei uhuuhu, neʼe natou sisio ai ki te ʼu sino mate fuli.+ 37 Pea neʼe toe liliu leva ia Senakelipe, te Hau ʼo Asilia ki Ninive+ ʼo nofo ai.+ 38 Pea ʼi tana lolotoga tulolo ʼi te fale* ʼo tona ʼatua ko Niseloke, neʼe matehi ia ia ʼaki te heleta e ʼona foha totonu ko Atelameleke pea mo Saletesele.+ Neʼe nā feholaki leva ki te fenua ko Alalate.+ Pea neʼe hau tona foha ko Esale-atone+ ʼo fetogi ia ia.
38 ʼI te temi ʼaia, neʼe mahaki leva ia Esekiasi ʼo meihiʼi mate ai.+ Pea neʼe alu te polofeta ko Esaia,+ te foha ʼo Amote kia ia, ʼo ina ui age: “Koʼeni te folafola ʼa Sehova: ‘Fai he ʼu fakatotonu ki tou loto fale, he ʼe ke mate anai. ʼE mole toe lelei anai tou mahaki.’ ”+ 2 ʼI tana logo ki te ʼu palalau ʼaia, neʼe haga ia Esekiasi ki te kaupa ʼo faikole kia Sehova: 3 “Sehova e, fakalelei siʼou loto, ʼe au kole atu ke ke manatuʼi+ neʼe au haʼele agatonu ʼi ʼou muʼa mo he loto katoa,+ pea neʼe au fai te ʼu meʼa ʼae ʼe lelei ki ʼou mata.” Pea neʼe tagi mamahi ai ia Esekiasi.
4 Neʼe palalau leva ia Sehova kia Esaia: 5 “Toe liliu pea ke ui age kia Esekiasi:+ ‘Koʼeni te folafola ʼa Sehova, te ʼAtua ʼo Tavite tau kui: “Neʼe au logo ki tau faikole.+ Neʼe au sio ki ʼou loʼimata.+ ʼE au fakatologa anai tou maʼuli ia taʼu ʼe 15.+ 6 ʼE au haofaki anai ia koe mo te kolo ʼaeni mai te ʼu nima ʼo te hau ʼo Asilia. Pea ʼe au puipui anai te kolo ʼaeni.+ 7 Koʼeni te fakailoga mai ia Sehova moʼo fakaha atu ʼe fakahoko anai e Sehova te folafola ʼae neʼe ina fakaha:+ 8 ʼE au fakaholomuli anai te malu ʼo te laʼa ʼi te mata tuʼuga* ʼo Akase ia mata tuʼuga ʼe hogofulu.” ’ ”+ Pea neʼe hake ai te malu ia mata tuʼuga ʼe hogofulu.
9 Koʼeni te tohi mai ia Esekiasi, te Hau ʼo Suta, ʼi te temi ʼae neʼe mahaki ai pea toe malolo.
10 Neʼe au ui: “ ʼI taku kei malohi,
ʼE tonu ke au fakalaka ʼi te ʼu matapa ʼo te Faitoka.*
ʼE pulinoa anai ʼoku taʼu ʼae ʼe kei toe.”
11 Neʼe au ui: “ ʼE mole au toe sio anai kia Sehova,* ʼei, kia Sehova* ʼi te fenua ʼo te kau maʼuli.+
ʼE mole au toe sio anai ki te tagata
Moka au nofo fakatahi mo natou ʼae ʼe nonofo ʼi te fenua ʼo te kau mate.
12 Neʼe taʼaki toku nofoʼaga ʼo ʼave mamaʼo ia au+
Ohage ko he fale la ʼa he tagata tauhi ovi.
Neʼe takatakai toku maʼuli ohage ko he tagata faikie ʼe ina takatakai he moʼi kie.
ʼE ina tuʼusi au ohage ko ni kauʼi filo ʼo he moʼi kie.
Mai te mafoata ki te to ʼo te poʼuli, ʼe ke taki au ki toku gataʼaga.+
13 ʼE au tauʼi toku hoha ʼo kaku ki te mafoata.
Kae ohage ko he laione, ʼe ina haga fasifasiʼi ʼoku hui fuli.
Mai te mafoata ki te to ʼo te poʼuli, ʼe ke taki au ki toku gataʼaga.+
Kua gaʼegaʼe ʼoku mata ʼi te sio ki te lagi:+
‘Sehova e, ʼe au lotomamahi ʼaupito,
Tokoni mai!’+
15 Kotea taku tali?
Neʼe palalau mai pea neʼe ina fakahoko.
ʼE au agavaivai anai ʼi ʼoku taʼu ʼae ʼe kei toe
ʼUhi ko te kovi ʼo toku lotomamahi.
16 ‘Sehova e, ʼe maʼuli te tagata fuli ʼuhi ko te ʼu meʼa ʼaia,*
Pea koia ʼae ʼe au maʼuli ai.
ʼE ke fakamalolo anai ia au mo taupau toku maʼuli.+
17 Koʼeni, neʼe mole au tokalelei, neʼe au lotomamahi.
Kae ʼi tou ʼofa kia au,
Neʼe ke haofaki au mai te luo.+
Neʼe ke li ʼaku agahala fuli ki ʼou tuʼa.*+
ʼE mole feala ke fakaʼamu ki tau agatonu ia natou ʼae ʼe hihifo ki te luo.+
19 Ko ia pe ʼae ʼe maʼuli ʼe feala ke ina vikiʼi koe,
Ohage ko au ʼi te ʼaho nei.
ʼE feala ki he tamai ke ina fakamahino tau agatonu ki ʼona foha.+
20 Sehova e, haofaki au,
ʼE matou hiva anai mo ni meʼa faimaholo kauʼi uka+
ʼI te ʼaho fuli ʼo tomatou maʼuli, ʼi te fale ʼo Sehova.’ ”+
21 Neʼe ui leva e Esaia: “ ʼAumai he foʼi keke fiku ʼo hili ki te foʼi polo ke malolo ai te hau.”+ 22 Kae ʼi muʼa atu neʼe fehuʼi e Esekiasi: “Kotea la te fakailoga ʼe ha ai ʼe au alu anai ki te fale ʼo Sehova?”+
39 ʼI te temi ʼaia, neʼe momoli e te hau ʼo Papiloni, ko Melotake-palatane, te foha ʼo Palatane, he ʼu tohi mo he meʼa ʼofa kia Esekiasi,+ he neʼe logo neʼe mahaki pea kua lelei.+ 2 Neʼe fakatalitali fakafiafia e Esekiasi ia te ʼu tagata ʼave logo. Neʼe ina fakaha age te fale ʼae neʼe tanaki ai ʼona koloa:+ te siliva, mo te aulo, mo te lolo neʼe fai ʼaki te ʼu ʼakau fakamagoni, mo te tahi age lolo maʼuhiga, mo ʼana mahafu tau fuli pea mo te ʼu meʼa fuli ʼae neʼe tuku ʼi ʼona fale tanakiʼaga koloa. Neʼe fakaha age e Esekiasi te ʼu meʼa fuli ʼae neʼe ʼi tona fale hau pea mo tona puleʼaga.
3 Hili ʼaia, neʼe alu leva te polofeta ko Esaia ki te Hau ko Esekiasi, ʼo fehuʼi age ki ai: “Kotea ʼae neʼe ui atu e te ʼu tagata ʼaia? Pea neʼe ʼomai maifea?” Neʼe tali age e Esekiasi: “Neʼe ʼomai mai he fenua mamaʼo, mai Papiloni.”+ 4 Pea neʼe ina fehuʼi age ki ai: “Kotea ʼae neʼe natou sisio ki ai ʼi tou fale hau?” Neʼe tali age e Esekiasi: “Neʼe natou sisio ki te ʼu meʼa fuli ʼae ʼi toku fale hau. Neʼe au fakaha age kia natou ia meʼa fuli ʼae ʼi ʼoku fale tanakiʼaga koloa.”
5 Neʼe ui leva e Esaia kia Esekiasi: “Fagono ki te folafola ʼaeni ʼa Sehova ʼo te ʼatu kautau: 6 ‘Koʼeni, ʼe hoko mai anai te temi ʼae ka ʼave ai ki Papiloni te ʼu meʼa fuli ʼae ʼi tou fale hau pea mo te ʼu meʼa fuli ʼae neʼe tanaki e ʼau kui ʼo kaku mai ki te ʼaho nei. ʼE mole tuku anai he meʼa,’+ ko te ui ʼaia ʼa Sehova.+ 7 ‘Pea ko ʼihi ʼo tou hologa ʼe ʼave popula anai mo gaue ʼi te fale hau ʼo te hau ʼo Papiloni.’ ”+
8 Neʼe ui e Esekiasi kia Esaia: “ ʼE lelei te folafola ʼa Sehova ʼae neʼe ke fakaha mai.” Pea neʼe ina hoko atu: “ ʼE lelei pe ia, mo kapau ʼe maʼu te tokalelei mo te fimalie lolotoga toku temi maʼuli.”+
40 ʼE ui e tokotou ʼAtua: “Kotou fakafimalieʼi, kotou fakafimalieʼi taku hahaʼi.+
2 Kotou palalau ki te loto ʼo te hahaʼi ʼo* Selusalemi,
Kotou fakaha kia natou kua ʼosi tanatou gaue ʼae neʼe fakamaʼua age,
Kua fakamolemole tanatou agahala.+
Kua natou maʼu katoa* mai ia Sehova te fakatuʼā ʼae ʼe tuha mo ʼanatou agahala fuli.”+
3 ʼE kalaga he tahi ʼi te toafa:
“Kotou teuteuʼi te ala ʼo Sehova!+
Kotou tofa ʼi te toafa he ala lahi mo totonu+ maʼa totatou ʼAtua.+
4 Ke maʼoluga te ʼu potu fenua laulelei,
Ke fakamalaloʼi te ʼu moʼuga mo te ʼu kiʼi moʼuga fuli.
Ke fakatokatoka te kele ʼae ʼe tokakovi,
Ke liliu ko he potu fenua laulelei te ʼu koga meʼa ʼae ʼe tokakovi.+
5 ʼE ha anai te kololia ʼo Sehova,+
ʼE sisio anai ki ai te hahaʼi fuli,+
He ʼe ko te folafola ʼaia ʼa Sehova.”
6 Fagono, ʼe ui e he tahi: “Kalaga!”
ʼE ui e he tahi age: “Kotea ʼae ka au kalagaʼi?”
“ ʼE hage te hahaʼi fuli ko te luna.
ʼE hage tanatou agatonu* ko te fisiʼi teu ʼo te vao.+
ʼEi, ʼe hage pe te hahaʼi ko te luna.
9 Hake ki he moʼuga maʼoluga,
Ia koe, te fafine ʼae ʼe ke ʼave ni logo lelei maʼa Sione!+
Kalaga malohi,
Ia koe, te fafine ʼae ʼe ke ʼave ni logo lelei maʼa Selusalemi!
ʼAua naʼa ke mataku, kalaga!
Fakaha ki te ʼu kolo ʼo Suta: “Koʼeni tokotou ʼAtua.”+
Koʼeni, ʼe nofo mo te fakapale,
Pea ko te totogi ʼae ʼe ina li, ʼe ʼi ʼona muʼa.+
11 ʼE tokaga anai ki tana faga ovi ohage ko he tagata tauhi ovi.+
ʼE ina tanaki anai te ʼu akeno ʼaki tona nima
Pea ʼe ina fua anai ki tona fatafata.
ʼE ina taki mamalie anai te ʼu ovi ʼae ʼe natou fafaga ʼonatou ʼuhi.+
12 Ko ai ʼae neʼe ina fua te ʼu vai ʼi tona ʼalofi nima+
Pea mo fuafua te lagi?
Ko ai ʼae neʼe ina tanaki te efu ʼo te kele ʼi he ipu fuafua,+
Pea mo fua te ʼu moʼuga mo te ʼu kiʼi moʼuga?
14 Neʼe palalau mo ai ke mahino lelei age?
Ko ai ʼae ʼe ina akoʼi age te faitotonu,
Peʼe ina akoʼi age te ʼatamai malama,
Peʼe ina fakahinohino age te ala ʼo te ʼatamai moʼoni?+
15 Koʼeni, ʼe hage te ʼu puleʼaga ko he mosiʼi vai ’e to mai he pakete.
ʼEi, ʼe natou hage ko he efu ʼi he meʼa fua.+
ʼE ina hiki te ʼu motu ohage ko he efuʼi kele.
16 ʼE mole feʼauga pe la mo te Lipane moʼo hokohoko he afi,*
Pea mo ʼana manu ʼo te vao moʼo fai ʼo he holokoseta.
17 ʼE hage te ʼu puleʼaga fuli ʼi ʼona muʼa ko he meʼa noa.+
ʼEi, ʼe mole honatou ʼuhiga, ko he matagi pe ia.+
18 ʼE kotou fakatatau anai kia ai te ʼAtua?+
ʼE kotou ui anai ʼe hoko kia ai?+
19 ʼE haka e te tagata tufuga he ukamea moʼo faʼu he fakatata,
Pea ʼe ʼaofi leva ʼaki te aulo e te tagata gaue ukamea+
Mo faʼu ni seini siliva.
20 ʼE filifili e he tagata he fuʼu ʼakau maʼa tona molaga,+
He fuʼu ʼakau ʼe mole popo anai.
ʼE ina kumi leva he tagata tufuga faiva
Moʼo togi he fakatata ʼe mole feala ke gaugaue.+
21 ʼE mole kotou iloʼi koa la?
Neʼe mole kotou logo koa la?
Neʼe mole fakaha atu koa la talu mai te kamataʼaga?
Neʼe mole kotou mahino koa la talu mai te fakatuʼu ʼo te ʼu fakatafito ʼo te kele?+
ʼE ina folahi te lagi ohage ko he kie manifi,
Ohage ko he fale la ke nofoʼi.+
23 ʼE ina fakamalaloʼi te hahaʼi maʼuhiga
Pea mo fakaliliu te ʼu tuʼi fakamau* ʼo te kele ohage ko te matagi.
24 Neʼe hoki to pe ia natou,
Neʼe hoki nunusi pe,
Neʼe hoki tauaka pe ʼi te kele,
Kae kua natou moamoa ʼi te agi ʼo te matagi,
Pea mo viligia ohage ko he luna moamoa.+
25 ʼE ui e te Maʼoniʼoni: “ ʼE kotou fakatatau anai ia au kia ai? ʼE au tatau mo ai?
26 Kotou hiki ake ʼokotou mata ki te lagi pea kotou sisio.
Ko ai ʼae neʼe ina fakatupu te ʼu meʼa ʼaia?+
Ko Ia ʼae neʼe ina fakaʼatu natou ohage ko he kautau, ʼo tahi mulimuli pe ki tona numelo.
ʼE ina pauʼi ia natou fuli ʼi ʼonatou higoa.+
ʼE mole puli pe la he tahi,
ʼUhi ko te lahi mo te fakaofoofo ʼo tona malohi.+
27 Sakopo, he koʼe ʼe ke ui, pea mo Iselaele, he koʼe ʼe ke tala:
‘ ʼE mole sio ia Sehova ki te meʼa ʼae ʼe hoko kia au,
Pea ʼe mole puipui au e toku ʼAtua’?+
28 ʼE mole ke iloʼi koa koe? Neʼe mole ke logo koa koe?
Ko Sehova, te Tupuʼaga ʼo te kele mai te potu taupotu ki he tahi taupotu, ʼe ʼAtua ʼo heʼe gata.+
ʼE mole gaʼegaʼe ia peʼe vaivai ʼi he temi.+
ʼE mole feala ke fuafua tona ʼatamai.+
29 ʼE ina foaki te malohi kia ia ʼae ʼe gaʼegaʼe
Pea ʼe ina fakamalohiʼi ia natou ʼae ʼe mole kei malohi.+
30 Ko te ʼu tama ʼe gaʼegaʼe anai mo pipiko,
Ko te kau tupulaga ʼe tukia anai mo fetokaʼi,
31 Kae ko natou ʼae ʼe falala kia Sehova ʼe toe malolohi anai.
ʼE natou malaga ake anai ohage ʼe natou maʼu te ʼu pakakau ʼo ni akuila.+
ʼE natou feleleʼi anai kae ʼe mole natou pipiko pe la,
ʼE natou haʼele anai kae ʼe mole natou gaʼegaʼe pe la.”+
41 “ ʼU motu, kotou fakalologo ʼo fagono mai.
Ke toe malolohi te ʼu puleʼaga.
Ke natou fakaovi mai pea ke natou palalau leva.+
Tou fakaovi fakatahi ki te fakamau.
2 Ko ai ʼae neʼe ina fekauʼi mai he tahi mai te hopoʼaga ʼo te laʼa,*+
ʼO ina pauʼi ke gaue maʼa Ia ʼo fakahoko te faitotonu?
Ko ai ʼae ʼe ina foaki ki ai ni puleʼaga
Ke pule ai ki ni hau?+
Ko ai ʼae ʼe ina laliki natou ʼi muʼa ʼo tana heleta?
Ko ai ʼae ʼe ina veuki natou ʼi muʼa ʼo tana nahau ʼo natou viligia ai ohage ko te luna moamoa?
3 ʼE ina tuli natou ʼo alu fimalie
ʼI ni ala neʼe heʼeki lave ai ʼona vaʼe.
4 Ko ai ʼae neʼe ina fai pea mo fakahoko te meʼa ʼaia,
ʼO pauʼi te ʼu taʼiake mai te kamataʼaga?
Ko au, ia Sehova, ʼe au ʼAtua mai te Kamataʼaga,+
Pea ʼe au toe ʼAtua pe ki te ʼu taʼiake ʼae ka hoko mai.”+
5 Neʼe sisio ki ai te ʼu motu pea neʼe natou matataku.
ʼE tekelili te ʼu potu taupotu ʼo te kele.
ʼE natou fakaovi fuli mai, ʼe natou ʼomai.
6 ʼE tahi tokoni ki tona kaumeʼa
Mo ui ki tona tehina: “Lotomalohi.”
7 ʼE fakalotomalohiʼi e te tagata tufuga te tagata tufuga ukamea.+
ʼE fakalotomalohiʼi e ia ʼae ʼe ina tuki ʼaki te hamale
Ia ia ʼae ʼe ina ta te ukamea.
ʼE ina ui ʼo ʼuhiga mo te gaue: “ ʼE lelei ʼosi.”
Pea ʼe fakapipiki leva te fakatata ʼaki ni faʼo ke mole gaugaue.
8 “Kae Iselaele, ko koe taku tagata kaugana,+
Ko koe ia Sakopo ʼae neʼe au filifili,+
Te hakoga ʼo toku kaumeʼa ko Apalahamo,+
9 Ia koe ʼae neʼe au toʼo mai te ʼu potu taupotu ʼo te kele,+
ʼAe neʼe au pauʼi mai ʼona potu mamaʼo.
10 ʼAua naʼa ke mataku he ʼe au nofo mo koe.+
ʼAua naʼa ke tuʼania he ʼe ko au tou ʼAtua.+
ʼE au fakamalohiʼi anai koe. ʼEi, ʼe au tokoni atu anai.+
ʼE au lagolago moʼoni anai kia koe ʼaki toku nima mataʼu, toku nima ʼae ʼe ina fakahoko te faitotonu.’
11 ʼE ufiufi anai mo lainoa ia natou fuli ʼae ʼe iita kia koe.+
ʼE fakamalaloʼi anai mo pulihi ia natou ʼae ʼe natou tauʼi koe.+
12 ʼE ke kumi anai te ʼu tagata ʼae ʼe natou tauʼi koe, kae ʼe mole ke maʼu anai.
ʼE hage anai te ʼu tagata ʼae ʼe natou tauʼi koe ko ni meʼa noa, ʼe mole honatou ʼuhiga.+
13 Ko au, ia Sehova tou ʼAtua, ʼe au toʼo tou nima mataʼu,
Ko au ʼae ʼe au ui atu:
‘ ʼAua naʼa ke mataku. ʼE au tokoni atu anai.’+
14 ʼAua naʼa ke mataku, kiʼi ʼugaga* ko Sakopo,+
Ia koe Iselaele, ʼe au tokoni atu anai,” ko te ui ʼaia ʼa Sehova, te Maʼoniʼoni ʼo Iselaele, ia Ia ʼae neʼe ina totogi koe.+
15 “Koʼeni, neʼe au fakaliliu koe ko he saliote ʼae ʼe molomoloki ʼaki te fulumeto,+
Ko he meʼa gaue foʼou ʼe masila.
ʼE ke malamalaki anai mo laliki te ʼu moʼuga,
ʼE ke fakaliliu anai te ʼu kiʼi moʼuga ohage ko he kiliʼi fulumeto.
16 ʼE ke li anai natou ki te ʼaele
Pea ʼe natou viligia ai.
ʼE natou mavetevete anai ʼi te afā.
17 “ ʼE kumi e te kau masiva mo natou ʼae ʼe fakaʼofaʼofa he moʼi vai, kae ʼe mole natou maʼu.
Kua magemage ʼonatou ʼalelo ʼi te fia inu.+
Ko au, ia Sehova, ʼe au tali anai kia natou.+
Ko au, te ʼAtua ʼo Iselaele, ʼe mole au liʼaki anai natou.+
18 ʼE au fakatafe anai ni vai tafe ʼi te ʼu kiʼi moʼuga lauʼatea,+
Mo ni matapuna vai ʼi te ʼu potu fenua laulelei.+
ʼE au fakaliliu anai te toafa ko he foʼi vai ʼe maʼuli ai te kaho,
Mo te kele kaka ko ni matapuna vai.+
19 ʼI te toafa, ʼe au to anai te fuʼu sete,
Mo te fuʼu akasia, mo te fuʼu milete pea mo te fuʼu sapa.+
ʼI te potu toafa, ʼe au to anai te fuʼu senelie,
Mo te fuʼu felene, mo te fuʼu sipele,+
20 Ke sio mo iloʼi e te hahaʼi fuli,
Mo tokagaʼi pea mo mahino
Ko te nima ʼo Sehova ʼae neʼe ina fakahoko te ʼu meʼa ʼaia,
Ko te Maʼoniʼoni ʼo Iselaele ʼae neʼe ina fakatupu.”+
21 ʼE ui e Sehova: “Kotou fakaha tokotou aluʼaga.”
ʼE ui e te Hau ʼo Sakopo:
“Kotou fakamahino ʼakotou manatu.
22 Fakamatala mo tala mai te meʼa ʼae ka hoko.
Palalau mai ki te ʼu meʼa ʼo te temi muʼa
Ke matou fakakaukauʼi pea ke matou iloʼi tona hoko atu,
Peʼe kotou fakaha mai te ka haʼu.+
23 ʼEi, kotou fakaha mai te meʼa ʼae ka hoko
Ke matou iloʼi ai ko koutou ko ni ʼatua.+
Kotou fai he meʼa, pe ʼe lelei peʼe kovi,
Ke matou punamaʼuli moka matou sisio ki ai.+
24 Koʼeni, ko koutou ko te ʼu meʼa noa,
ʼE mole he ʼuhiga ʼo takotou gaue.+
ʼE fakalialia ia natou fuli ʼae ʼe natou filifili ia koutou.+
25 Neʼe au fekauʼi mai he tahi mai te potu noleto, pea ʼe haʼu anai.+
Ko he tahi mai te hopoʼaga ʼo te laʼa*+ ʼe ina vikiʼi anai* toku huafa.
ʼE ina molomoloki anai te ʼu pule ohage ko he moʼi kele,+
Ohage ko te malamalaki e te tagata faʼu ipu ia te kele.
26 Ko ai ʼae neʼe ina fakaha mai te ʼu meʼa ʼaia talu mai te kamataʼaga ke matou iloʼi?
Peʼe talu mai te temi muʼa ke matou ui ai: ‘ ʼE tonu ia’?+
Neʼe mole fakakikite ia e he tahi!
Kailoa, neʼe mole fakaha mai ia e he tahi!
Neʼe heʼeki logo he tahi ki hakotou palalau!”+
27 Ko au ʼae neʼe au ʼuluaki tala ki Sione: “Koʼeni te ʼu meʼa ʼae ka hoko!”+
ʼE au fekauʼi anai ki Selusalemi he tagata ʼe ina ʼave ni logo lelei.+
28 Logo la neʼe au haga sio, kae neʼe mole ʼi ai he tahi,
ʼEi, neʼe mole he tahi ia natou ke ina foaki mai ni tokoni.
Neʼe au kole liuliuga ke natou tali mai.
29 Koʼeni, ko natou fuli ko ni meʼa noa.
ʼE mole he ʼuhiga ʼo ʼanatou gaue.
Ko ʼanatou fakatata ukamea, ko he matagi noa.+
42 Koʼeni taku tagata faifekau+ ʼae ʼe au lagolago ki ai!
Ia ia ʼae neʼe au filifili+ mo ʼofa ki ai!+
3 ʼE mole ina fasiʼi anai te kaho ʼae kua mapelu
Pea ʼe mole ina matehi anai te vavae ʼae ʼe mu veliveli.+
ʼE agatonu anai ʼo fakahoko te faitotonu.+
4 ʼE mole vaivai anai peʼe fiu ʼo kaku ki tana fakahoko te faitotonu ki te kele.+
ʼE nofo talitali te ʼu motu ki tana lao.*
5 Koʼeni te folafola ʼa te ʼAtua moʼoni, ia Sehova,
Te Tupuʼaga ʼo te lagi pea mo te ʼAtua Lahi ʼae neʼe ina folahi,+
Ia Ia ʼae neʼe ina fakatupu te kele mo ʼona fua,+
Ia Ia ʼae ʼe ina foaki te manava ki te hahaʼi+
Pea mo te maʼuli kia natou ʼae ʼe haʼele ai:+
6 “Ko au ia Sehova, neʼe au pauʼi koe ke ke fakahoko te faitotonu,
Neʼe au puke tou nima.
ʼE au puipui anai koe mo foaki ohage ko he fuakava maʼa te hahaʼi,+
Pea ko he malama ki te ʼu puleʼaga,+
7 Ke ke avahi te ʼu mata ʼo te kau kivi,+
Ke ke fakaʼateainaʼi te kau pilisoni,
Ia natou ʼae ʼe nonofo ʼi te fakapoʼuli.+
8 Ko au ia Sehova, ko toku huafa ʼaia,
ʼE mole au foaki toku kololia ki* he tahi
Peʼe ko te fakavikiviki ʼae ʼe tuha pe mo au ki te ʼu fakatata.+
9 Koʼeni, kua hoko te ʼu meʼa ʼae neʼe fakakikite talu mai fualoa.
ʼI te temi nei, ʼe au fakaha atu ni meʼa foʼou.
ʼE au fakaha atu kia koutou ʼi muʼa ʼo tona hoko.”+
10 Kotou hiva kia Sehova he hiva foʼou,+
Tona fakavikiviki mai te ʼu potu taupotu ʼo te kele,+
Ia koutou ʼae ʼe faifolau ʼi te tai pea mo meʼa fuli ʼae ʼe maʼu ai,
Mo koutou ʼu motu mo te hahaʼi ʼae ʼe maʼuʼuli ai.+
Ke kalaga fakafiafia ia natou ʼae ʼe nonofo ʼi te ʼu ʼutu,
Ke natou kalaga mai te ʼu tumutumu ʼo te ʼu moʼuga.
12 Ke natou fakakololiaʼi ia Sehova,
Pea ke kalagaʼi tona fakavikiviki ʼi te ʼu motu.+
13 ʼE haʼu anai ia Sehova ohage ko he tagata malohi.+
ʼE faʼafai anai ohage ko he tagata tau.+
ʼE kalaga anai, ʼei, ko he kalaga tau,
ʼE malohi age anai ia ʼi ʼona fili.+
14 “Neʼe fualoa taku nofo fakalogologo.
Neʼe mole au gu kae neʼe au lotololomi.
ʼE au lauga anai mo fakahelahela,
Ohage ko he fafine ʼe fanau.
15 ʼE au maumauʼi anai te ʼu moʼuga mo te ʼu kiʼi moʼuga,
ʼE au fakamoamoa anai te ʼulu vao fuli.
ʼE au fakaliliu anai te ʼu vai tafe ko ni motu.*
ʼE au fakamamaha anai te ʼu foʼi vai ʼae ʼe maʼuli ai te kaho.+
16 ʼE au taki anai te kau kivi ʼi he ala ʼe mole natou iloʼi,+
ʼE au fakahaʼele anai natou ʼi ni ala foufou ʼe mole natou malama ki ai.+
Ko te meʼa ʼaia ka au fai maʼa natou pea ʼe mole au liʼaki anai natou.”
17 ʼE natou holomuli anai mo ufiufi,
Ia natou ʼae ʼe falala ki ʼanatou fakatata ʼae neʼe togi,
Mo natou ʼae ʼe natou ui ki te ʼu fakatata ukamea: “Ko koutou ko ʼomatou ʼatua.”+
18 Kotou fagono ia koutou ʼae ʼe tuli,
Kotou sisio mo tokaga ia koutou ʼae ʼe kivi.+
19 Ko ai ʼae ʼe kivi? ʼE mole koa la ko taku tagata faifekau?
Ko ai ʼae ʼe tuli ohage ko te tagata ʼave logo ʼae ʼe au fekauʼi?
Ko ai ʼae ʼe kivi ohage ko ia ʼae neʼe au fakapale,
Peʼe kivi ohage ko te tagata faifekau ʼa Sehova?+
20 ʼE ke sio ki ni tuʼuga meʼa, kae ʼe mole ke tokagaʼi.
ʼE ke avahi ʼou taliga, kae ʼe mole ke fakalogo.+
21 Neʼe fiafia ia Sehova ʼi tana fakaha te taulekaleka mo te maʼuhiga ʼo tana lao*
ʼUhi ko tona faitotonu.
22 Kae neʼe ko he hahaʼi neʼe kaihaʼa pea mo toʼo fakamalohi ʼonatou koloa.+
Neʼe natou fetoki fuli ki ni luo mo pupunu ʼi ni fale pilisoni.+
Neʼe kaihaʼa natou kae neʼe mole ʼi ai he tahi ke ina haofaki ia natou,+
Neʼe toʼo fakamalohi ʼonatou koloa, kae neʼe mole ʼi ai he tahi ke ina ui: “Toe fakaliliu mai ia natou!”
23 Ko ai ia koutou ka fagono anai ki te meʼa ʼaia?
Ko ai ʼae ka tokaga mo fakalogo ke fua lelei ki te temi ka haʼu?
24 Ko ai ʼae neʼe ina tuku ia Sakopo kia natou ʼae neʼe natou toʼo fakamalohi ʼona koloa?
Ko ai ʼae neʼe ina tuku ia Iselaele ki te kau kaihaʼa?
Neʼe mole koa la ko Sehova, ia ia ʼae neʼe tou agahala ki ai?
25 Koia neʼe hoko atu pe te to ʼo tona hauhau kia natou,
Neʼe ita lahi pea neʼe kovi ʼosi te tau.+
Neʼe maumau ia meʼa fuli ʼi ʼonatou tafaʼaki ʼi te tau, kae neʼe mole natou tokagaʼi.+
Neʼe fua kovi ʼosi te tau, kae neʼe mole maʼuhiga ia kia natou.+
43 Koʼeni leva te folafola ʼa Sehova,
Tou Tupuʼaga, Sakopo, ia Ia ʼae neʼe ina faʼu koe Iselaele:+
“ ʼAua naʼa ke mataku, neʼe au totogi koe.+
Neʼe au pauʼi koe ʼi tou higoa.
Ko koe ʼaʼaku.
Ka ke haʼele ʼi te afi, ʼe mole ke vela anai,
ʼE mole ke manu ʼahu anai.
3 Ko au ia Sehova tou ʼAtua,
Te Maʼoniʼoni ʼo Iselaele, tou Fakamaʼuli.
Neʼe au foaki ia Esipito moʼo totogi ʼo koe,
Mo Etiopea pea mo Sapa moʼo fetogi ʼo koe.
Koia ʼae neʼe au foaki ai ni tagata moʼo fetogi ʼo koe
Pea mo ni puleʼaga moʼo fetogi ʼo tou maʼuli.
5 ʼAua naʼa ke mataku, ʼe au nofo mo koe.+
ʼE au ʼaumai anai tou hakoga mai te potu esite
Pea ʼe au tanaki anai koe mai te potu uesite.+
6 ʼE au ui anai ki te potu noleto: ‘Liufaki mai ia natou!’+
Ki te potu saute: ‘ ʼAua naʼa ke taʼofi ia natou.
ʼAumai ʼoku foha mai mamaʼo pea mo ʼoku ʼofafine mai te ʼu potu taupotu ʼo te kele,+
7 Ia natou fuli ʼae ʼe natou fua toku huafa+
Pea neʼe au fakatupu ki toku kololia,
Ia natou ʼae neʼe au fakatupu mo faʼu.’+
8 Fakamavae he hahaʼi ʼe kivi kae ʼe ʼi ai ʼonatou mata,
Pea mo tuli kae ʼe ʼi ai ʼonatou taliga.+
Ko ai ia natou ʼe feala ke ina fakaha te meʼa ʼaia?
ʼE feala koa ke natou fakamatala mai te ʼu ʼuluaki meʼa?*+
Ke natou ʼaumai ʼanatou fakamoʼoni, ke tou iloʼi ai pe ʼe natou tonu,
Peʼe ke logo mo ui e ʼihi: ‘Ko te moʼoni!’ ”+
10 ʼE ui e Sehova: “Ko koutou ko ʼaku fakamoʼoni,+
ʼEi, taku kaugana ʼae neʼe au filifili,+
Ke kotou iloʼi mo tui kia te au
Pea ke kotou mahino ʼe mole au fetogi.+
Neʼe mole fakatupu he ʼAtua ʼi muʼa atu ia te au,
Pea ki muli mai ʼe mole ʼi ai he tahi age ʼAtua.+
11 Ko au, ʼei, ko au ia Sehova,+ ʼe mole ʼi ai he tahi fakamaʼuli, gata pe kia te au.”+
12 “Ko au ʼae neʼe au tala, neʼe au haofaki koe mo fakaha,
ʼI te temi ʼae neʼe mole ʼi ai he ʼatua matapule ia koutou.+
Koia ko koutou ko ʼaku fakamoʼoni pea ko au ko te ʼAtua,” ko te ui ʼaia ʼa Sehova.+
13 “Pea tahi, ʼe mole au fetogi ʼi he temi.+
ʼE mole feala ki he tahi ke ina taʼaki te meʼa ʼae ʼi toku nima.+
Ka au gaue, ko ai ʼae ʼe feala ke fakafeagai mai?”+
14 Koʼeni te folafola ʼa Sehova, ia Ia ʼae neʼe ina totogi koutou,+ te Maʼoniʼoni ʼo Iselaele:+
“ ʼE au fekauʼi anai he tahi ki Papiloni maʼa koutou pea ʼe au maumauʼi anai te ʼu ʼakau fakamaʼu fuli ʼo te ʼu matapa,+
Pea ʼe kalaga lotomamahi anai te kau Kaletea ʼi ʼonatou vaka.+
15 Ko au ia Sehova tokotou Maʼoniʼoni,+ te Tupuʼaga ʼo Iselaele,+ tokotou Hau.”+
16 Koʼeni te folafola ʼa Sehova,
Ia Ia ʼae ʼe ina tofa he ala ʼi te tai
Pea mo he ala foufou ʼi te ʼu vai ʼae ʼe hou,+
17 Ia Ia ʼae ʼe ina fakamavae te saliote tau pea mo te hosi,+
Mo te kautau pea mo ʼona solia malolohi:
“ ʼE natou takokoto anai kae ʼe mole natou toe tutuʼu ake.+
ʼE natou pupuli anai ohage ko te puhiʼi ʼo te ulo ʼo he vavae.”
18 “ ʼAua naʼa kotou manatuʼi te ʼu meʼa ʼae ʼo te temi muʼa,
Pea ʼaua naʼa kotou taupau te ʼu meʼa ʼae kua hili.
19 Koʼeni, ʼe au fai he meʼa foʼou.+
Kua lolotoga homo ia.
ʼE mole kotou sisio koa la ki ai?
20 ʼE fakaʼapaʼapaʼi anai au e te ʼu manu ʼo te vao,
Mo te ʼu kuli vao pea mo te ʼu otulusi.
ʼE au foaki anai he vai ki te toafa,
Mo ni vai tafe ʼi te ʼu kele toafa,+
Ke inu ai taku hahaʼi ʼae neʼe au filifili,+
21 Te hahaʼi ʼae neʼe au faʼu maʼaku
Ke feala ai hanatou fakavikiviki kia te au.+
23 Neʼe mole ke ʼaumai ni ovi ki ʼau holokoseta,
Peʼe fakakololiaʼi au ʼaki ʼau sakilifisio.
Neʼe mole au fakamaʼua ke ke ʼaumai he meʼa ʼofa
Pea neʼe mole au fakamafasiaʼi koe ʼo kole atu he iseso hina.*+
24 Neʼe mole ke totogi maʼaku he kaho fakamagoni ʼaki tau falā
Pea neʼe mole ke fakafiafiaʼi au ʼaki te gako ʼo ʼau sakilifisio.+
Kae neʼe ke fakamamahiʼi au ʼaki ʼau agahala
Pea mo fakagaʼegaʼe au ʼaki ʼau hala.+
25 Ko au, ʼei, ko au ʼae ʼe au molehi ʼau lakahala+ ʼuhi ko toku huafa,+
Pea ʼe mole au toe manatuʼi anai ʼau agahala.+
26 Ta felogoi, fakamanatuʼi mai te ʼu meʼa ʼae neʼe hoko.
Tala mai tau manatu pe ʼe ke tonu.
28 ʼE au fakalainoaʼi anai te ʼu tama ʼaliki ʼo te koga meʼa taputapu,
ʼE au tuku anai ke molehi ia Sakopo
Pea ke laukoviʼi ia Iselaele.+
44 “ ʼI te temi nei, fagono mai Sakopo, taku tagata kaugana,
Pea mo koe Iselaele ʼae neʼe au filifili.+
2 Koʼeni te folafola ʼa Sehova,
Ia Ia ʼae neʼe ina fakatupu mo faʼu ia koe,+
ʼAe neʼe tokoni kia koe talu mai tau tupu:
3 ʼE au foaki anai he vai ki he kele hoge vai,+
Mo ni tafega vai ki te kele moamoa.
ʼE au foaki anai toku laumalie ki tou hakoga,+
Pea mo taku tapuakina ki tou hologa.
4 ʼE natou homo anai ohage ko te homo ʼo te luna,+
Ohage ko ni fuʼu sole ʼi ni vaʼe tafega vai.
5 ʼE ui anai e he tahi: “Ko au ʼa Sehova.”+
ʼE toʼo anai e he tahi te higoa ʼo Sakopo,
Pea ʼe toe tohi anai e he tahi ʼi tona nima:
“Ko au ʼa Sehova.”
Pea ʼe ina fili anai te higoa ʼo Iselaele.’
6 Koʼeni te folafola ʼa Sehova,
Te Hau, ia Ia ʼae neʼe ina totogi ia Iselaele,+ ia Sehova ʼo te ʼatu kautau:
‘Ko au te ʼuluaki pea ko au te fakamuli.+
ʼE mole ʼi ai he tahi ʼAtua, gata pe kia te au.+
7 Ko ai koa ʼae ʼe hage ko au?+
Ke kalaga, ke ina fakaha pea ke ina fakamoʼoni!+
Ke ina fakaha te ʼu meʼa ʼae ka hoko
Pea mo te ʼu meʼa ʼae ka hoko ki ʼamuli,
Ohage ko taku fai talu mai te temi ʼae neʼe au fakanofo ai he hahaʼi ʼi te temi muʼa.
Neʼe mole au palalau fakatomuʼa atu koa la kia koutou takitokotahi? Neʼe mole au fakaha atu koa la?
Ko koutou ko ʼaku fakamoʼoni.+
ʼE ʼi ai koa he tahi age ʼAtua ia te au?
Kailoa, ʼe mole ʼi ai he tahi ʼUtu,+ ʼe mole ʼi ai he tahi atu.’ ”
9 ʼE mole he ʼuhiga ʼo natou fuli ʼae ʼe natou togi ni fakatata,
Pea ʼe mole ʼaoga anai te ʼu meʼa ʼae ʼe natou ʼoʼofa ki ai.+
Ko te ʼu fakamoʼoni* ʼe mole natou sisio mo iloʼi he meʼa.+
Koia ʼe ufiufi anai ia natou ʼae neʼe natou faʼu te ʼu fakatata ʼaia.+
10 Ko ai koa ʼae ka ina faʼu he ʼatua peʼe ko he fakatata ukamea
ʼE mole hona ʼuhiga?+
11 Koʼeni, ʼe ufiufi anai ʼona kaugā gaue fuli!+
Ko te kau tufuga ko ni tagata pe ia.
Ke natou fakatahitahi fuli mai ki ʼoku muʼa.
ʼE natou matataku fuli anai mo ufiufi.
12 ʼE gaueʼi e te tagata tufuga te ukamea ʼi te ʼu mamala ʼaki tana meʼa gaue.
ʼE ina tukituki ʼaki tana hamale,
ʼE ina fakaʼaogaʼi tona malohi ki ai.+
Pea ʼe fia kai leva, ʼo mole kei hona malohi.
ʼE gaʼegaʼe he ʼe mole inu hana moʼi vai.
13 ʼE faoʼi e te tagata tufuga ʼakau he maea moʼo fakafuafua, pea ʼe ina tohi ʼaki te moʼi falena kula he pāki.
ʼE ina tele leva mo fakailoga.
ʼE ina faʼufaʼu ohage ko he tagata,+
He pāki taulekaleka ʼo te tagata,
14 Ko te gaue ʼa he tahi ko te tuʼusi ʼo ni fuʼu sete.
ʼE ina filifili he faʼahiga fuʼu ʼakau, he fuʼu sene,
Pea ʼe ina tuku leva ke liliu ʼo malohi ʼi te ʼu fuʼu ʼakau ʼo te vao matuʼa.+
ʼE ina to he fuʼu lolie ʼae ʼe fakahomo e te ʼua.
15 Pea ʼe liliu leva te fuʼu ʼakau ko ni fafie.
ʼE toʼo e te tagata hona koga moʼona fakamafana.
ʼE ina tafu he afi pea mo fakamoho ai tana foʼi pane.
Kae ʼe ina toe faʼu ʼaki he ʼatua pea atolasio ki ai.
ʼE ina faʼu he fakatata pea ʼe tulolo ai leva ki ʼona muʼa.+
16 ʼE ina tutu te tahi koga ʼo te ʼakau ʼi te afi.
Pea ʼaki te koga ʼaia, ʼe ina fakamoho leva tana moʼi pipi pea ina kai, pea makona ai.
ʼE toe fakamafana ai pea ina ui:
“Oie, kua au mafana lelei ʼosi, ʼi taku sioʼi te afi.”
17 Kae ʼaki te koga ʼae, ʼe ina faʼu he ʼatua, he fakatata,
Pea tulolo leva ʼi ʼona muʼa ʼo atolasio ki ai.
ʼE ina fai leva ki ai te faikole ʼaeni:
“Haofaki au he ʼe ko koe toku ʼatua.”+
18 ʼE mole natou iloʼi he meʼa, ʼe mole natou mahino ki he meʼa,+
He ʼe pipiki ʼosi ʼonatou mata, ʼo mole feala ai ke natou sisio,
Pea ʼe mole natou maʼu te fakasiosio poto.
19 ʼE mole pe fakakaukau he tahi,
Peʼe poto mo ʼatamai he tahi ʼo ui:
“Neʼe au tutu tona tahi koga ʼi te afi,
Pea ʼi ʼona mamala, neʼe au fakamoho ai taku foʼi pane mo taku moʼi pipi ʼo kai.
ʼI te temi nei, ʼe feafeaʼi haku faʼu he meʼa fakalialia+ ʼaki tona toe?
ʼE feafeaʼi anai haku atolasio ki he koga ʼakau?”
20 ʼE ina kai te lefulefu.
Neʼe hehe ʼi te kaka ʼo tona loto.
ʼE mole feala pe la ke ina haofaki ia ia totonu pea ʼe mole ina ui ia:
“ ʼE mole koa la ko he kaka ʼaeni ʼi toku nima mataʼu?”
21 “Sakopo, manatuʼi te ʼu meʼa ʼaia, pea mo koe Iselaele,
He ko koe ko taku tagata kaugana.
Neʼe au faʼu ia koe pea ko koe ko taku kaugana.+
Siʼi Iselaele, ʼe mole au galoʼi anai koe.+
22 ʼE au molehi anai ʼau talagataʼa ohage ʼe ʼuʼufi e he ʼao,+
Pea mo ʼau agahala ohage ʼe ʼuʼufi e he ʼao matolu.
Toe liliu mai kia te au he ʼe au totogi anai koe.+
23 ʼAtu lagi, kotou kalaga fakafiafia,
He neʼe gaue ia Sehova!
ʼU potu loloto ʼo te kele, kotou kalaga fakafiafia mo koutou!
ʼU moʼuga, kotou fakafiafia,+
Pea mo koe vao matuʼa pea mo ʼou fuʼu ʼakau fuli!
Neʼe totogi e Sehova ia Sakopo,
Pea ʼe ina fakaha tona taulekaleka ki Iselaele.”+
24 Koʼeni te folafola ʼa Sehova, ia Ia ʼae neʼe ina totogi koe,+
Ia ia ʼae neʼe ina faʼu koe kae neʼe kei ke nofo ʼi te fatu:
“Ko au ia Sehova, ko au ʼae neʼe au fai ia meʼa fuli.
Ko ai ʼae neʼe nofo mo au?
25 ʼE au fakato noa te ʼu fakailoga ʼo te kau polofeta loi,
ʼE au fai ke agavale te kau faifakakikite fakatemonio.+
ʼE au fakaheʼi te kau popoto
Pea ʼe au fakaliliu ke vale tonatou poto.+
26 ʼE au fakahoko te folafola ʼo taku tagata kaugana
Pea ʼe au fakahoko katoa te ʼu fakakikite ʼo ʼaku tagata ʼave logo.+
ʼE au ui ʼo ʼuhiga mo Selusalemi: ‘ ʼE nofoʼi anai,’+
Pea ʼo ʼuhiga mo te ʼu kolo ʼo Suta: ‘ ʼE toe laga anai,+
ʼEi, ʼe au toe fakatuʼu anai.’+
27 ʼE au ui ki te ʼu vai loloto: ‘Ke kotou fakamamao,
Pea ʼe au fakamamaha anai ʼokotou tafega vai fuli.’+
28 ʼE au ui ʼo ʼuhiga mo Siliusi:+ ‘Ko taku tagata tauhi ovi,
ʼE ina fakahoko katoa anai toku finegalo.’+
ʼE au ui ʼo ʼuhiga mo Selusalemi: ‘ ʼE toe laga anai,’
Pea ki te fale lotu: ‘ ʼE fakatuʼu anai ʼou fakatafito.’ ”+
45 Koʼeni te folafola ʼa Sehova ki tana fakanofo, ia Siliusi,+
ʼAe ʼe ina puke tona nima mataʼu,+
Ke pule ki ni puleʼaga,+
Ke ina toʼo te ʼu mahafu ʼo ni hau,
Ke ina avahi ʼi ʼona muʼa te ʼu matapa ʼe kaumatapa lua,
ʼO mole toe feala ai anai ke pupunu te ʼu matapa ʼo te kolo:
ʼE au maumauʼi anai te ʼu matapa kapa,
Pea ʼe au laliki anai mo ʼona fakamaʼu ukamea.+
3 ʼE au foaki atu anai te ʼu koloa ʼae ʼe tuku ʼi te fakapoʼuli
Pea mo te ʼu koloa ʼae ʼe fufu,+
Ke ke iloʼi ai ko au ia Sehova,
Te ʼAtua ʼo Iselaele ʼae ʼe ina pauʼi koe ʼi tou higoa.+
4 ʼEi, ʼe au pauʼi koe ʼi tou higoa
Ke fua lelei ki taku kaugana ko Sakopo mo Iselaele, ia ia ʼae neʼe au fili.
ʼE au fakamaʼuhigaʼi tou higoa logo la ʼe heʼeki ke iloʼi au.
5 Ko au ia Sehova, ʼe mole ʼi ai he tahi atu.
ʼE mole he tahi atu ʼAtua, gata pe kia te au.+
ʼE au fakamalohiʼi anai ia koe, logo la ʼe heʼeki ke iloʼi au,
6 Ke mahino
Mai te hopoʼaga ʼo te laʼa ki tona toʼaga*
ʼE mole ʼi ai he tahi atu, ko au pe.+
Ko au ia Sehova, pea ʼe mole ʼi ai he tahi atu.+
7 ʼE au faʼu te malama+ pea ʼe au fakatupu te fakapoʼuli,+
ʼE au fakatuʼu te tokalelei+ pea ʼe au fakahoko te malaʼia.+
Ko au ia Sehova, ʼe au fai te ʼu meʼa fuli ʼaia.
Ke ava te kele mo foaki te fakamaʼuli,
Pea ke ina toe fakahomo te faitotonu.+
Ko au ia Sehova, neʼe au fai te faʼahi ʼaia.”
9 Malaʼia ki te tagata ʼae ʼe fakafeagai kia Ia ʼae neʼe ina faʼu,
He ʼe ko he kogaʼi ipu kele
ʼI te ʼu kogaʼi ipu ʼae ʼe leta ʼi te kele!
ʼE ui anai koa e te kele ki te Tufuga Faʼu Ipu: “Kotea ʼae ʼe ke fai?”+
Peʼe ui anai koa e tana gaue: “ ʼE mole ʼi ai koa ni ʼou nima”?*
10 Malaʼia kia ia ʼae ʼe ina ui ki he tamai: “Ko te faʼahiga tamasiʼi feafeaʼi ʼae neʼe ke fakatupu?”
Pea ki he fafine: “Kotea ʼae neʼe ke fanauʼi?”
11 Koʼeni te folafola ʼa Sehova, te Maʼoniʼoni ʼo Iselaele,+ ia Ia ʼae neʼe ina faʼu:
“ ʼE kotou lava fakafehuʼi koa au ʼo ʼuhiga mo te ʼu meʼa ʼae ka hoko
Pea ʼe kotou fai mai ni tonu ʼo ʼuhiga mo ʼoku foha+ mo ʼaku gaue?
12 Neʼe au faʼu te kele+ pea neʼe au fakatupu te tagata ʼo tuku ki ai.+
13 Neʼe au fekauʼi mai he tahi ʼuhi ko taku faitotonu,+
Pea ʼe au fakatokatoka anai ʼona ala fuli.
Ko ia ʼae ka ina laga toku kolo+
Pea ʼe ina fakaʼateainaʼi anai ʼaku kau popula+ ʼo mole ina kole he totogi peʼe ko he meʼa ʼofa,”+ ko te ui ʼaia ʼa Sehova ʼo te ʼatu kautau.
14 Koʼeni te folafola ʼa Sehova:
“Ko te ʼu koloa* ʼo Esipito mo te ʼu faifakatau* ʼo Etiopea pea mo te kau Sapeane, ni tagata lalahi,
Ko te ʼu meʼa fuli ʼaia ʼe ke maʼu anai pea ʼe ʼavatu anai kio koe.
ʼE seiniʼi anai natou pea mo haʼele ʼi ʼou tuʼa.
ʼE natou ʼomai anai ʼo tulolo ʼi ʼou muʼa.+
ʼE natou fakaʼapaʼapa anai, ʼo ui: ‘ ʼE nofo moʼoni te ʼAtua mo koe,+
ʼE mole ʼi ai he tahi ʼAtua, kailoa, ʼe mole he tahi atu ia.’ ”
15 ʼE mahino ia, ko koe ko he ʼAtua ʼe nono,
Te ʼAtua ʼo Iselaele, te Fakamaʼuli.+
16 ʼE ufiufi anai mo fakamalaloʼi ia natou fuli,
ʼE olo lainoa anai ia natou fuli ʼae ʼe natou faʼu ni fakatata.+
17 Kae ʼe haofaki anai e Sehova ia Iselaele ʼo talu ai.+
ʼE mole kotou ufiufi anai mo lainoa ʼi he temi.+
18 Koʼeni te folafola ʼa Sehova,
Te Tupuʼaga ʼo te lagi,+ ia te ʼAtua moʼoni,
Ia Ia ʼae neʼe ina faʼu te kele mo fakatuʼu ke malohi,+
Ia ia ʼae neʼe mole ina fakatupu noa,* kae neʼe ina faʼu ke nofoʼi:+
“Ko au ia Sehova pea ʼe mole ʼi ai he tahi atu.
19 Neʼe mole au palalau ʼi he nonoʼaga,+ ʼi he fenua fakapoʼuli.
Neʼe mole au ui ki te hakoga ʼo Sakopo:
‘Kotou kumi au kae ʼe mole hona ʼuhiga.’
Ko au ia Sehova, ʼe au tala te meʼa ʼae ʼe totonu pea mo moʼoni.+
20 Kotou fakatahitahi pea kotou ʼomai.
Kotou fakaovi fakatahi mai, ia koutou ʼae neʼe hao ʼi te ʼu puleʼaga!+
ʼE mole natou iloʼi he meʼa, ia natou ʼae ʼe natou fata te ʼu fakatata ʼae neʼe togi
Pea mo faikole ki he ʼatua ʼe mole ina lava haofaki natou.+
21 Kotou palalau, fakamahino mai ʼakotou manatu.
Kotou felogoi.
Ko ai ʼae neʼe ina fakakikite talu mai fualoa te ʼu meʼa fuli ʼaia?
Pea ko ai ʼae neʼe ina fakaha talu mai te ʼu temi ʼae kua hili?
ʼE mole ko au koa la, ia Sehova?
ʼE mole ʼi ai he tahi atu ʼAtua ia te au.
Ko au pe te ʼAtua faitotonu, te Fakamaʼuli,+ ʼe mole ʼi ai he tahi atu.+
22 Kotou haga mai kia te au pea ʼe au haofaki anai koutou,+ ia koutou fuli ʼae mai te ʼu potu taupotu ʼo te kele.
Ko au te ʼAtua, ʼe mole ʼi ai he tahi atu.+
23 Neʼe au fakapapau e au totonu,
Ko te folafola ʼae ʼe mavae atu ʼi toku gutu ʼe moʼoni,
Pea ʼe hoko moʼoni anai ia:+
ʼE tuʼutuli anai te hahaʼi fuli ʼi ʼoku muʼa,
Pea ʼe natou fakapapau fuli anai ʼe natou agatonu+
24 Mo ui anai: ‘ ʼE fai tuʼumaʼu e Sehova te meʼa ʼae ʼe totonu pea ʼe malohi.
Ko natou fuli ʼae ʼe iita kia te ia, ʼe natou ʼomai ufiufi anai ki ʼona muʼa.
25 ʼE iloʼi anai ʼuhi ko Sehova ʼe tonu te ʼu hologa fuli ʼo Iselaele,+
Pea ʼe natou fiameʼameʼa anai.’ ”
46 ʼE mapelu ia Pele,+ ʼe punou ia Nepo.
2 Kua nā mapelu mo punou toko lua.
ʼE mole feala ki te ʼu ʼatua ke nā haofaki te ʼu uta ʼaia,*
Pea ʼe ʼave popula mo naua.
3 “Kotou fakalogo mai, hakoga ʼo Sakopo, pea mo koutou fuli te hakoga ʼo Iselaele ʼae ʼe toe,+
Ia koutou ʼae neʼe au tokoni ki ai ʼi muʼa ʼo takotou tupu pea neʼe au fua koutou talu mai te fatu!+
4 ʼE mole au fetogi anai ʼo kaku ki tokotou temi matuʼa.+
ʼE au tokoni atu anai ʼo kaku ki te hina ʼo ʼokotou fuluʼi ʼulu.
ʼE au fua anai koutou, ʼe au tokoni atu anai mo haofaki koutou ohage ko taku kua fai.+
6 ʼE ʼi ai te hahaʼi ʼae ʼe maluku mai tanatou kato te aulo.
ʼE natou fua te siliva ʼi te meʼa fua.
ʼE natou totogi he tagata tufuga ukamea ke ina fai he ʼatua.+
Pea ʼe natou tulolo leva ʼi ʼona muʼa ʼo atolasio ki ai.+
7 ʼE natou fua ia ia ʼi ʼonatou fuga ʼuma.+
ʼE natou fua ʼo kaku ki tona tuʼuʼaga, ʼo fakatuʼu ki ai.
ʼE mole gaugaue ia ʼi tona tuʼuʼaga.+
ʼE natou kole tokoni ki ai kae ʼe mole ina tali age ia.
ʼE mole feala ke ina haofaki he tahi ʼi te mamahi.+
8 Kotou manatuʼi te meʼa ʼaeni mo lototoʼa.
Kotou fakakaukauʼi lelei, kau talagataʼa!
9 Kotou manatuʼi te ʼu meʼa ʼo te temi muʼa,
Kotou manatuʼi ko au te ʼAtua pea ʼe mole ʼi ai he tahi atu.
Ko au te ʼAtua pea ʼe mole ʼi ai he tahi ʼe hage ko au.+
10 Talu mai te kamataʼaga, ʼe au fakakikite te fakaʼosi,
Pea mai te ʼu temi ʼafeā ʼe au tala te ʼu meʼa ʼae ʼe mole heʼeki hoko.+
ʼE au ui: ‘ ʼE hoko anai te meʼa ʼae neʼe au fakatotonu,+
Pea ʼe au fakahoko anai ia meʼa fuli ʼae ʼe au fiafia ai.’+
11 ʼE au pauʼi he akuila mai te hopoʼaga ʼo te laʼa,*+
Mai he fenua mamaʼo he tagata ʼe ina fakahoko anai te meʼa ʼae neʼe au fakatotonu.+
Neʼe au palalau pea ʼe au fakahoko anai.
Neʼe au fai te fakatuʼutuʼu pea ʼe au fakahoko moʼoni anai.+
12 Kotou fakalogo mai ia koutou ʼae ʼe uigataʼa,
Ia koutou ʼae ʼe mamaʼo mai te faitotonu.
ʼE au fakahoko anai te fakamaʼuli ki Sione, pea ʼe au foaki anai toku taulekaleka ki Iselaele.”+
47 Hifo mai ʼo nofo ʼi te efu,
Taʼahine taupoʼou ʼo Papiloni.+
Nofo ʼi te kele ʼi te potu ʼae ʼe mole ʼi ai he hekaʼaga fakahau,+
Taʼahine ʼo Kaletea,
He ʼe mole toe ui anai ʼi he temi, ʼe ke fakaʼeteʼete mo fakapelepele.
2 Toʼo he meʼa momosi fulumeto pea ke momosi te falena.
Toʼo tou pulou.
Lagaʼi ake tou tapaʼi kofu pea ke fakaha ʼou vaʼe.
Fakalaka ʼi te ʼu vai tafe.
3 ʼE ha anai tou telefua.
ʼE iloʼi anai e te hahaʼi te meʼa ʼae ʼe ke ufiufi ai.
ʼE au lagavaka anai+ pea ʼe mole feala ki he tahi ke ina taʼofi au.*
4 “Ko Ia ʼae ʼe ina totogi matou,
Ko tona huafa ko Sehova ʼo te ʼatu kautau,
Ko te Maʼoniʼoni ʼo Iselaele.”+
5 Nofo fakalogologo ʼi he pea ke nofo ʼi te fakapoʼuli,
Taʼahine ʼo Kaletea.+
ʼE mole toe fakahigoaʼi anai koe Fineʼaliki ʼo te ʼu Puleʼaga.+
6 Neʼe to toku hauhau ki taku hahaʼi.+
Kae neʼe mole ke ʼofa pe la kia natou.+
Neʼe ke toe fakamafasia te kavega ʼo te kau matuʼa.+
7 Neʼe ke ui: “ ʼE au Fineʼaliki anai ʼo tuʼumaʼu, ʼo heʼe gata.”+
Neʼe mole ke fakakaukauʼi lelei te ʼu meʼa ʼaia,
Neʼe mole ke feʼekeʼaki pe ʼe ʼosi feafeaʼi anai.
8 ʼI te temi nei fagono ki te meʼa ʼaeni, siʼi koe ʼae ʼe ke leleiʼia te ʼu fakafiafia,+
Ia koe ʼae ʼe heka mo lotofalala, ʼo ke ui:
“Ko au tokotahi pe, ʼe mole ʼi ai he tahi kehe.+
ʼE mole au vitua anai.
ʼE mole pupuli anai ʼi he temi ʼaku fanau.”+
9 Kae ʼe hoko fakapunamaʼuli anai kia koe te ʼu malaʼia ʼaia ʼe lua, ʼi he ʼaho pe ʼe tahi:+
Te puli ʼo ʼau fanau pea mo ke vitua.
ʼE to kovi anai kia koe te ʼu malaʼia ʼaia+
ʼUhi ko* te lahi ʼo ʼau faifakalauʼakau mo ʼau meʼa fakatemonio.+
10 Neʼe ke falala ki tau agakovi.
Neʼe ke ui: “ ʼE mole sio mai he tahi.”
Neʼe fakaheʼi koe e tou poto mo tou ʼatamai,
Pea neʼe ke ui: “Ko au tokotahi pe, ʼe mole he tahi kehe.”
11 Kae ʼe to anai te malaʼia kia koe.
ʼE mole lava taʼofi anai e ʼau meʼa fakatemonio.
ʼE to anai te mamahi kia koe pea ʼe mole ke taʼofi anai.
ʼE hoko fakafokifa anai kia koe he toe maumau, he maumau ʼe mole heʼeki hoko.+
12 Koia ke hoko atu pe ʼau meʼa fakatemonio mo faifakalauʼakau+
ʼAe neʼe ke kinakina ki ai talu mai tau kei tupulaga.
Lagi ʼe fua lelei anai kia koe,
Lagi ʼe ke fakatupu mataku anai.
13 Kua ke gaʼegaʼe ʼi te kole tokoni ki ʼau faitokoni kaugamalie.
Koia ke natou ʼomai ʼo haofaki koe,
Ia natou ʼae ʼe atolasio ki* te lagi, ʼae ʼe natou sivi te ʼu fetuʼu,+
Ia natou ʼae ʼe natou fakaha ʼi te tuʼu afiafi ʼo te mahina
Te ʼu meʼa ʼae ka hoko kia koe.
14 ʼE natou hage ko te luna moamoa.
ʼE tutu anai natou.
ʼE mole feala pe la ke natou haofaki ia natou mai te kakaha ʼo te afi,
He ’e mole ko ni mamala ia
’e kita fakamafana ai,
Peʼe ko he afi ’e kita nofo ovi ai.
15 ʼE feia anai maʼa koe ia natou ʼae ʼe gaohi meʼa fakatemonio,
Ia natou ʼae neʼe ke gaue kinakina fakatahi mo natou talu mai tau kei tupulaga.
ʼE natou tahi hehe anai.
ʼE mole ʼi ai anai he tahi ke ina haofaki koe.+
48 Hakoga ʼo Sakopo, kotou fakalogo ki te meʼa ʼaeni,
Ia koutou ʼae ʼe higoa ko Iselaele,+
Ia koutou ʼae neʼe mavae mai te ʼu vai ʼo* Suta,
Ia koutou ʼae ʼe fakapapau ʼi te huafa ʼo Sehova+
Pea mo faikole ki te ʼAtua ʼo Iselaele.
Kae ʼe mole kotou fai fakamalotoloto pea ʼe mole kotou mulimuli ki te faitotonu.+
2 ʼE fakahigoaʼi natou ki te kolo taputapu+
Pea ʼe natou kumi te tokoni ʼa te ʼAtua ʼo Iselaele,+
ʼAe ko tona huafa, ko Sehova ʼo te ʼatu kautau.
3 “Ko te ʼu meʼa ʼae kua hili kua fualoa taku fakaha atu.
Neʼe mavae atu ʼi toku gutu,
Neʼe au fakaha atu.+
Fokifa pe neʼe au gaue pea neʼe hoko.+
4 ʼI taku iloʼi tau uigataʼa
Mo tou kia ko he ukamea, pea mo tou laʼe ko he kapa,+
5 Neʼe au fakaha atu ai talu mai fualoa.
Neʼe au tala atu ʼi muʼa ʼo tona hoko
Ke mole ke ui ai: ‘Ko taku taula ʼatua ʼae neʼe ina fai,
Ko taku fakatata ʼae neʼe togi pea mo taku fakatata ukamea ʼae neʼe nā fakatotonu.’
6 Neʼe ke logo pea neʼe ke sio ki te ʼu meʼa fuli ʼaia.
ʼE mole ke palalau anai koa ki ai?+
ʼI te temi nei, ʼe au tala atu ni meʼa foʼou,+
Ko ni meʼa fakalilo neʼe taupau lelei, neʼe mole ke iloʼi.
7 Ko te ʼu meʼa ʼaia neʼe hoki tupu pe, neʼe mole heʼeki fualoa.
Neʼe mole ke logo ki ai ʼi muʼa atu,
Koia ʼe mole feala ke ke ui: ‘Neʼe au iloʼi.’
8 Kailoa, neʼe mole ke logo ki he meʼa,+ neʼe mole ke iloʼi he meʼa,
Pea ʼi te temi muʼa, neʼe mole ke tokaga ki ai.
9 Kae ʼe au lolomi anai toku hauhau ʼuhi ko toku huafa,+
ʼE au tataʼofi anai ʼuhi ko toku kololia
Pea ʼe mole au pulihi anai koe.+
10 Koʼeni, neʼe au fakamaʼa koe, kae ʼe mole hage ko te siliva ʼae ʼe fakamaʼa ʼi te afi.+
Neʼe au ʼahiʼahiʼi* koe ʼi te gutuʼumu ʼo te mamahi.+
Pea ʼe mole au foaki toku kololia ki* he tahi.
12 Sakopo, fakalogo mai, Iselaele ʼae neʼe au pauʼi.
ʼE mole au fetogi.+ Ko au te ʼuluaki pea mo te fakamuli.+
13 Ko toku nima ʼae neʼe ina fakatuʼu te ʼu fakatafito ʼo te kele,+
Pea ko toku nima mataʼu ʼae neʼe ina folahi te lagi.+
Ka au pauʼi natou, ʼe natou tutuʼu ake fakatahi.
14 Kotou fakatahi fuli pea kotou fakalogo.
Ko ai ia natou neʼe ina fakaha te ʼu meʼa ʼaia?
Ko ia ʼae ʼe ʼofa ki ai ia Sehova.+
ʼE ina fakahoko anai ki Papiloni te meʼa ʼae ʼe fiafia ai,+
Pea ʼe to anai tona nima ki te kau Kaletea.+
15 Ko au ʼae neʼe palalau pea neʼe au pauʼi.+
Neʼe au fekauʼi ke haʼu pea ʼe fua lelei anai te meʼa ʼae ka ina fakahoko.+
16 Kotou fakaovi mai kia te au pea kotou fakalogo.
Talu mai te kamataʼaga neʼe mole au fufu he meʼa.+
Talu mai te temi ʼae neʼe hoko ai, neʼe au ʼi ai.”
ʼI te temi nei, ʼe fekauʼi au e te Tuʼi ʼAliki ko Sehova pea mo tona laumalie.
17 Koʼeni te folafola ʼa Sehova, ia Ia ʼae neʼe ina totogi koe, te Maʼoniʼoni ʼo Iselaele:+
“Ko au ia Sehova, ko tou ʼAtua,
Ia Ia ʼae ʼe ina akoʼi koe ke fua lelei kia koe,+
Ia Ia ʼae ʼe ina takitaki koe ʼi te ala ʼae ʼe tonu ke ke haʼele ai.+
18 Ka na pau la neʼe ke tokaga lelei ki ʼaku fakatotonu,+
19 ʼE hage anai tou hologa ko te ʼone,
ʼE kaugamalie anai ʼou hologa ohage ko te ʼu fisiʼi ʼone.+
ʼE mole molehi anai ʼonatou higoa pea ʼe mole pulihi anai natou ʼi ʼoku muʼa.”
20 Kotou mavae ʼi Papiloni!+
Kotou feholaki mai mai te kau Kaletea!
Kotou fakaha fakafiafia! Kotou tala!+
Ke iloʼi ʼi te ʼu potu taupotu ʼo te kele.+
Kotou ui: “Neʼe totogi e Sehova tana kaugana ko Sakopo.+
21 Neʼe mole natou hoge vai ʼi tana taki natou ʼi te ʼu potu toafa.+
Neʼe ina fakahali he vai mai te fuʼu maka maʼa natou.
Neʼe ina fahiʼi te fuʼu maka pea neʼe mapuna mai te vai.”+
22 ʼE ui e Sehova: “ ʼE mole he tokalelei maʼa te kau agakovi.”+
49 ʼU motu, kotou fakalogo mai,
ʼU puleʼaga mamaʼo, kotou tokaga mai.+
Neʼe pauʼi au e Sehova ʼi muʼa ʼo taku tupu.+
Neʼe ina fakaha toku higoa kae neʼe kei au ʼi te fatu ʼo taku faʼe.
Neʼe ina fakaliliu au ko he kauʼi nahau masila,
Neʼe ina fufu au ʼi tana ʼaiʼaga nahau.
3 Neʼe ina ui mai: “Siʼi Iselaele, ko koe taku kaugana,+
Pea ʼe au fakaha anai toku taulekaleka ʼaki ia koe.”+
4 Kae neʼe au tali age: “Neʼe mole he ʼuhiga ʼo taku gaue kinakina.
Kua pulinoa toku malohi, ʼe mole pe la hona fua.
5 ʼI te temi nei, ko Sehova,
ʼAe neʼe ina faʼu au ʼi te fatu ke au liliu ko tana tagata kaugana,
Neʼe ina kole mai ke au ʼaumai ia Sakopo kia te ia,
Ke fakatahitahi ia Iselaele ʼi ʼona tafa.+
ʼE fakakololiaʼi anai au ia mata ʼo Sehova,
Pea ko toku ʼAtua, ʼe liliu anai ko toku malohi.
6 Neʼe ina ui mai: “ ʼE mole feʼauga taku fakaliliu koe ko taku tagata kaugana,
ʼAe ka ina toe fakatuʼu te ʼu telepi ʼo Sakopo
Pea mo ʼaumai ia natou ʼae neʼe hao ʼo Iselaele.
Kae neʼe au toe fakaliliu koe ko he malama ʼo te ʼu puleʼaga,+
Ke kaku taku fakamaʼuli ki te ʼu potu taupotu ʼo te kele.”+
7 Ko Sehova, ia Ia ʼae neʼe ina totogi ia Iselaele, ia Ia ʼae ʼe Maʼoniʼoni,+ ʼe ina ui kia ia ʼae ʼe meʼa noaʼi,+ kia ia ʼae ʼe fehiʼaʼinaʼi e te puleʼaga, ki te tagata kaugana ʼa te kau takitaki:
“ ʼE sisio anai mo tutuʼu ake ni hau,
Pea ʼe tulolo anai ni tama ʼaliki
ʼO fakaʼapaʼapa kia Sehova ʼae ʼe agatonu,+
Te Maʼoniʼoni ʼo Iselaele ʼae neʼe ina filifili ia koe.”+
8 Koʼeni te folafola ʼa Sehova:
“ ʼI he temi neʼe au fakaha ai toku ʼofa, neʼe au tali atu,+
ʼI he ʼaho ʼo te haofaki, neʼe au tokoni atu.+
Neʼe au puipui koe ʼo foaki ko he fuakava maʼa te hahaʼi,+
Ke toe laga ai te fenua,
Ke natou toe maʼu tonatou tofiʼa ʼae neʼe maumauʼi,+
9 Ke ui ki te kau pilisoni: ‘ ʼOmai ki tuʼa!’+
Pea kia natou ʼae ʼi te fakapoʼuli:+ ‘ ʼOmai ki te malama!’
ʼE natou kakai anai ʼi te ʼu vaʼe ala ohage ko he faga ovi,
ʼE maʼu anai ʼonatou koga meʼa lunaʼia ʼi te ʼu ala foufou fuli ʼae ʼe haʼeleʼi.*
10 ʼE mole natou fia kakai anai mo fia iinu,+
ʼE mole lave kovi anai kia natou te momofi ʼo te vevela pea mo te laʼa,+
He ʼe takitaki anai natou e ia ʼae ʼe ʼofa kia natou+
Pea ʼe ina taki anai natou ʼo ovi ki te ʼu matapuna vai.+
11 ʼE au fakaliliu anai ʼoku moʼuga fuli ko he ala,
Pea ʼe fakamaʼoluga anai ʼoku ala lalahi.+
12 Koʼeni, ʼe natou ʼomai fuli mai mamaʼo,+
Pea ko natou ʼaeni, ʼe ʼomai mai te potu noleto mo te potu uesite,
Pea ko natou ʼae, mai te fenua ʼo Sinime.”+
13 ʼAtu lagi, kotou kalaga fakafiafia, kele, ke ke fiafia!+
Ke toe kalaga fakafiafia mo te ʼu moʼuga,+
14 Kae neʼe haga ui e Sione:
“Neʼe liʼaki au e Sehova,+ neʼe galoʼi au e Sehova.”+
15 ʼE feala koa ki he fafine ke ina galoʼi tana kiʼi toe
Peʼe ke mole manavaʼofa ki te tama ʼae neʼe ina fuafatuʼi?
Tatau aipe pe ʼe galoʼi e te ʼu fafine ʼaia, kae ko au, ʼe mole au galoʼi anai koe ʼi he temi.+
16 Koʼeni, neʼe au tohi tou higoa ʼi ʼoku ʼalofi nima.
ʼE tuʼu tuʼumaʼu ʼou kaupa ʼi ʼoku muʼa.
17 ʼE toe liliu fakavilivili mai anai ʼau tama,
Kae ʼe mavae anai ia natou ʼae neʼe natou maumauʼi koe.
18 Hiki ake ʼou mata pea ke sio ki ʼou tafaʼaki.
ʼE fakatahitahi fuli ʼau tama.+
ʼE natou ʼomai kia koe.
ʼE ui e Sehova: “ ʼE au tala moʼoni atu,
ʼE natou hage anai ko hou ʼu meʼa fakateuteu,
Pea ʼe ke ʼai anai kia koe ohage ko tona ʼai e he fafine ʼe ʼohoana.
19 Tatau aipe pe ʼe maumauʼi anai ʼou nofoʼaga pea mo tuʼu lavaki tou fenua,+
Kae ʼe mole ʼi ai anai he koga meʼa ke nofo ai tau hahaʼi,+
Pea ʼe fakamamaʼo anai ia natou ʼae neʼe natou gaohi koviʼi koe.+
20 ʼE ui atu anai e te ʼu tama ʼae ka tutupu ake ʼi te kua mamate ʼo ʼau fanau ʼae:
‘ ʼE veliveli fau te koga meʼa ʼaeni kia matou.
Fakaʼatea mai he koga meʼa ke feala hamatou nonofo ai.’+
21 ʼE ke feʼekeʼaki anai:
‘Ko ai te tamai ʼa te ʼu fanau ʼae neʼe foaki mai?
Kua mamate ʼaku fanau pea ʼe au paʼa.
Neʼe ʼave popula au.
Koia, ko ai ʼae neʼe ina pusiaki ia natou ʼaeni?+
22 Koʼeni te folafola ʼa te Tuʼi ʼAliki ko Sehova:
ʼE natou fua anai ʼau tama,
Pea ʼe natou ʼamo anai ʼau taʼahine.+
ʼE natou tulolo anai ki te kele ʼi ʼou muʼa,+
Pea ʼe natou ʼemo anai te efu ʼo ʼou vaʼe.+
ʼE ke iloʼi moʼoni anai ko au ia Sehova.
ʼE mole ufiufi anai ia natou ʼae ʼe falala mai kia te au.”+
24 ʼE feala koa ke toʼo mai te tagata malohi ia natou ʼae neʼe ina puke?
ʼE feala koa ke fakaʼateainaʼi te kau pilisoni mai he pule agamalohi?
25 Koʼeni te folafola ʼa Sehova:
“ ʼEi, ʼe toʼo anai mai te tagata malohi te kau pilisoni,+
Pea ʼe fakaʼateainaʼi anai ia natou ʼae neʼe puke e te pule agamalohi.+
ʼE au fakafeagai anai kia natou ʼae ʼe fakafeagai atu,+
Pea ʼe au haofaki anai ʼau tama.
26 ʼE au uga anai ia natou ʼae ʼe natou gaohi koviʼi koe ke natou kai tonatou kakano.
Pea ʼe natou konana anai ʼi tonatou toto ohage ko te vino.
ʼE iloʼi moʼoni anai e te hahaʼi fuli, ko au ia Sehova,+
Tou Fakamaʼuli,+ ia Ia ʼae neʼe ina totogi koe,+
Te Mafimafi ʼo Sakopo.”+
50 Koʼeni te folafola ʼa Sehova:
“ ʼE ʼifea te tohi mavete+ ʼae neʼe au foaki ki takotou faʼe ʼae neʼe au kapu?
Ko ai ia natou ʼae neʼe au tuʼu maʼua ki ai mo fakatau koutou ki ai?
2 Koia, he koʼe neʼe mole ʼi ai he tahi ʼi taku haʼu?
He koʼe neʼe mole tali mai he tahi ki taku pauʼi?+
ʼE nounou koa toku nima ke au totogi?
ʼE mole feʼauga koa toku malohi ke au haofaki?+
ʼE mamate fia iinu ʼanatou ika,
Pea ʼe natou mamate he ʼe mole ʼi ai he moʼi vai.
ʼE ina fakaʼala au ʼi te uhu fuli.
ʼE ina uga au ke au fakalogo lelei ohage ko natou ʼae ʼe akoʼi.+
Neʼe mole au maliu kehe.+
6 Neʼe au tuku toku tuʼa ke natou haha
Pea mo ʼoku kauʼahe ke natou fusi toku kaukava.
Neʼe mole au fufu toku fofoga ki te ʼu fakalainoa pea mo te ʼu ʼaʼanu.+
7 Kae ʼe haofaki anai au e te Tuʼi ʼAliki ko Sehova.+
Koia ʼe mole au lainoa anai.
Neʼe au fakaliliu toku fofoga ke hage ko he maka fefeka,+
Pea ʼe au iloʼi ʼe mole au ufiufi anai.
8 ʼE mole mamaʼo ia Ia ʼae ʼe ina tala ʼe au faitotonu.
Ko ai ʼae ʼe feala ke ina tukugakoviʼi au?+
Ke ma tutuʼu fakatahi* ʼi te fakamauʼaga.
Ko ai ʼae ʼe fihifihia mo au?
Ke fakaovi mai kia au.
9 Koʼeni, ʼe haofaki anai au e te Tuʼi ʼAliki ko Sehova.
Ko ai ʼae ʼe ina ui anai ʼe au lakahala?
Koʼeni, ʼe natou popo fuli anai ohage ko he teu.
ʼE kai anai natou e te ʼu kiʼi manu.
10 Ko ai ia koutou ʼe manavasiʼi kia Sehova
Mo fakalogo ki te leʼo ʼo tana tagata kaugana?+
Ko ai ʼae neʼe haʼele ʼi te fakapoʼuli gaogao kae ʼe mole malama?
Ke falala ki te huafa ʼo Sehova mo falanaki ki tona ʼAtua.
11 “Kae ko koutou fuli ʼae ʼe kotou tafu he afi
Pea viligia ai te mafisifisi,
Kotou haʼele ʼi te malama ʼo takotou afi,
Mo ʼona mafisifisi.
Koʼeni te meʼa ʼae ka kotou maʼu ʼi toku nima:
ʼE kotou takokoto anai ʼi te mamahi.
51 “Kotou fakalogo mai kia te au, ia koutou ʼae ʼe kotou fakahoko te faitotonu,
Ia koutou ʼae ʼe kotou kumi ia Sehova.
Kotou haga ki te ʼutu ʼae neʼe toli mai ai koutou
Mo te keliʼaga maka ʼae neʼe toʼo mai ai koutou.
2 Kotou haga kia Apalahamo takotou tamai,
Pea mo Sala+ ʼae neʼe ina fanauʼi koutou.
Neʼe tokotahi ʼi te temi ʼae neʼe au pauʼi ai,+
Pea neʼe au tapuakiʼi ia ia mo fakahahaʼi tona hologa.+
3 ʼE fakapelepeleʼi anai e Sehova ia Sione.+
ʼE ina fakapelepeleʼi anai ʼona maumau fuli,+
ʼE ina fakaliliu anai tona toafa ohage ko te Eteni+
Pea mo tona potu toafa ohage ko te ʼoloto ʼo Sehova.+
ʼE maʼu ai anai te fiafia,
Mo te fakafetaʼi pea mo te hiva mālie.+
4 Siʼaku hahaʼi, kotou fakalogo lelei mai,
Siʼoku puleʼaga, kotou tokagaʼi te meʼa ʼae ʼe au fakaha atu.+
5 Kua fakaovi mai taku faitotonu.+
6 Kotou hiki ʼokotou mata ki te lagi,
Pea kotou sisio ki lalo ki te kele.
ʼE mavetevete anai te lagi ohage ko he kohu,
ʼE popo anai te kele ohage ko he teu,
Mo mamate te hahaʼi ohage ko ni lago.
7 Kotou fakalogo mai kia te au, ia koutou ʼae ʼe kotou iloʼi te meʼa ʼae ʼe totonu,
ʼAua naʼa kotou matataku ʼi te ʼu fakaneke ʼa te tagata,
ʼAua naʼa kotou tekelili ʼi ʼanatou laukovi.
Kae ʼe tuʼu anai ʼo heʼe gata taku faitotonu,
Pea ʼe kaku anai taku fakamaʼuli ki te ʼu taʼiake fuli.”+
9 Ke ʼala ake, ke ʼala ake, ke malohi
Te nima ʼo Sehova!+
Ke ʼala ake ohage ko te ʼu ʼaho ʼo te temi muʼa, ohage ko te ʼu temi ʼo te ʼu taʼiake kua hili.
10 Neʼe mole ko koe koa la ʼae neʼe ke fakamoamoa te tai, te ʼu vai loloto?+
Neʼe mole ko koe koa la ʼae neʼe ke fetogi te ʼu potu loloto ʼo te tai ko he ala ke feala ke fakalaka ai ia natou ʼae neʼe totogi?+
11 ʼE toe liliu mai anai ia natou ʼae neʼe totogi e Sehova.+
ʼE natou feulufi anai ki Sione mo kalaga fakafiafia,+
ʼE hage anai tonatou fiafia ko he pale ʼi ʼonatou ʼulu ʼo talu ai.+
ʼE natou fakafiafia lahi anai,
Pea ʼe puli anai te mamahi mo te ʼu lauga.+
12 “Ko au ʼae ʼe au fakapelepeleʼi koutou.+
He koʼe ʼe ke mataku anai ki te tagata ʼae ka mate,+
Ki te foha ʼo te tagata ʼae ʼe fefe anai ohage ko te luna?
13 He koʼe ʼe ke galoʼi ia Sehova, ia Ia ʼae neʼe ina fakatupu koe,+
Ia Ia ʼae neʼe ina folahi te lagi+ mo fakatuʼu te ʼu fakatafito ʼo te kele?
ʼI te ʼaho katoa, neʼe ke mataku tuʼumaʼu ki te ita ʼo te fili,
Ohage la ʼe feala ke ina pulihi koe.
Kae ʼi te temi nei, ʼe ʼifea te ita ʼo te fili?
14 Kua vave haofaki ia ia ʼae ʼe mapelu ʼi te ʼu seini.+
ʼE mole mate anai ia mo alu ki te luo,
Pea ʼe mole hala ia mo he moʼi pane.
15 Ko au ia Sehova tou ʼAtua,
ʼE au fakahou te tai mo ʼona peau.+
Ko toku huafa ko Sehova ʼo te ʼatu kautau.+
16 ʼE au tuku anai ʼaku folafola ki tou gutu,
ʼE au ʼaofi anai koe ʼi te malu ʼo toku nima,+
Moʼo fakatuʼu te lagi mo te ʼu fakatafito ʼo te kele+
Pea mo ui ki Sione: ‘Ko koe taku hahaʼi.’+
17 ʼAla ake, ʼala ake! Siʼi Selusalemi, tuʼu ake la,+
Ia koe ʼae neʼe ke inu te ipu ʼo te hauhau ʼae neʼe foaki atu e Sehova!
Neʼe ke inu te ipu,
Neʼe ke inu ʼo ʼago te ipu ʼae neʼe feala ke ke siʼia ai.+
18 ʼI te ʼu tama fuli ʼae neʼe ina fua, neʼe mole pe la he tahi moʼona takitaki.
ʼI te ʼu tama fuli ʼae neʼe ina taupau, neʼe mole pe la he tahi ke ina puke tona nima.
19 Neʼe hoko te ʼu meʼa ʼaeni ʼe lua kia koe:
Te maumau mo te kaihaʼa, te hoge mo te heleta!+
Ko ai ʼae ka ʼofa anai kia koe?
Ko ai ʼae ka ina fakapelepeleʼi anai koe?+
20 Neʼe pogigia ʼau tama.+
ʼI te ʼu magaʼi ala fuli, ʼe natou leta ʼi te kele
Ohage ko he ovi vao neʼe to ki he hele.
ʼE natou konahihia ʼi te hauhau ʼo Sehova, te fakatonutonu ʼo tou ʼAtua.”
21 Koia fakalelei siʼou loto, fakalogo ki te meʼa ʼaeni,
Siʼi fafine lotomamahi mo konahia, kae mole ʼi te vino.
22 Koʼeni te folafola ʼo tou ʼAliki ko Sehova, tou ʼAtua ʼae ʼe ina haofaki tana hahaʼi:
“Koʼeni, ʼe au toʼo anai mai tou nima te ipu ʼae ʼe feala ke ke siʼia ai,+
Te ipu ʼo toku hauhau,
ʼE mole ke toe inu anai ki ai ʼi he temi.+
23 ʼE au tuku anai ki te nima ʼo natou ʼae ʼe natou fakamamahiʼi ia koe,+
Ia natou ʼae neʼe natou ui: ‘Ke ke punou ke matou haʼeleʼi koe!’
Neʼe hage tou tuʼa ko te kele,
Neʼe hage ko he ala ke natou haʼele ai.”
52 Siʼi Sione, ʼala ake, ʼala ake,+ pea ke malohi!+
Siʼi Selusalemi, te kolo taputapu, tui ʼou teu matalelei!+
He ʼe mole toe ulu anai kio koe ia ia ʼae neʼe mole silikosisioʼi mo heʼe maʼa.+
2 Siʼi Selusalemi, tuʼu ake, tu te efu ʼae ia koe pea ke heka!
Taʼahine popula ʼo Sione, vevete ʼou haʼi ʼi tou kia!+
3 Koʼeni te folafola ʼa Sehova:
4 Koʼeni te folafola ʼa te Tuʼi ʼAliki ko Sehova:
“ ʼI te kamata, neʼe hifo taku hahaʼi ki Esipito ʼo maʼuli ai ohage ko ni matapule,+
Pea neʼe gaohi koviʼi e te kau Asilia kae neʼe mole hona tupuʼaga.”
5 ʼE ui e Sehova: “Koia, kotea ʼae ʼe tonu ke au fai ʼi heni?
Neʼe toʼo noa taku hahaʼi.”
ʼE ui e Sehova: “Ko natou ʼae ʼe natou pule ki ai, ʼe natou kalaga fakafiafia.+
Pea tuʼumaʼu pe, ʼi te ʼaho katoa, ʼe mole fakaʼapaʼapaʼi toku huafa.+
6 Ko te tupuʼaga la ʼaia, ʼe iloʼi ai anai e taku hahaʼi toku huafa.+
Ko te tupuʼaga la ʼaia, ʼe natou iloʼi anai ʼi te ʼaho ʼaia ko au ʼae ʼe palalau.
ʼEi, ko au!”
7 ʼI matalelei leva, ʼi te ʼu moʼuga, te ʼu vaʼe ʼo ia ʼae ʼe ina ʼaumai ni logo lelei,+
ʼO ia ʼae ʼe ina tala te tokalelei,+
ʼO ia ʼae ʼe ina ʼaumai ni logo lelei ʼo he meʼa ʼe lelei age,
ʼO ia ʼae ʼe ina kalagaʼi te fakamaʼuli,
ʼO ia ʼae ʼe ina ui ki Sione: “Kua Hau ia tou ʼAtua!”+
8 Fagono, ʼe kalaga ʼau tagata leʼo.
ʼE natou kalaga fakafiafia fakatahi.
ʼE natou sisio lelei anai moka ʼaumai e Sehova ia Sione.
9 Kotou fakafiafia ʼu maumau ʼo Selusalemi,+ kotou kalaga fakafiafia fakatahi!
Neʼe fakapelepeleʼi e Sehova tana hahaʼi,+ neʼe ina totogi ia Selusalemi.+
10 Neʼe fakaha e Sehova tona nima taputapu ki te ʼu puleʼaga fuli.+
ʼE sisio anai te ʼu potu taupotu fuli ʼo te kele ki te haofaki* ʼo totatou ʼAtua.+
11 Kotou fakamamaʼo, kotou fakamamaʼo, kotou mavae ʼi heni,+ ʼaua naʼa kotou fāfā ki he meʼa ʼe heʼe maʼa!+
Kotou mavae ia ia,+ kotou tokakaga ʼo nonofo maʼa,
Ia koutou ʼae ʼe kotou fua te ʼu meʼa gaue ʼae ʼe fai ʼaki te tauhi kia Sehova.+
12 ʼE mole kotou mavae anai ʼi te mataku
Pea ʼe mole kotou feholaki anai,
He ʼe haʼele anai ia Sehova ʼi ʼokotou muʼa,+
Mo puipui koutou e te ʼAtua ʼo Iselaele ʼi ʼokotou tuʼa.+
13 Koʼeni, ʼe aga fakapotopoto anai taku tagata faifekau.+
ʼE fakamaʼuhigaʼi anai,
Mo hikihiki pea mo fakakololiaʼi.+
14 Neʼe punamaʼuli te tokolahi ʼi tanatou sioʼi,
He neʼe kua fetogi ʼosi tona agaaga ʼo kovi age ia ʼi te agaaga ʼo he tahi tagata.
Pea kua puli tona taulekaleka ʼo kovi age ia ʼi te taulekaleka ʼo he tagata.
15 ʼE toe feia pe, ʼe ʼoho anai ni puleʼaga kaugamalie.+
ʼE mapunu anai te gutu ʼo* ni hau ʼi ʼona muʼa,+
He ʼe natou sisio anai ki te meʼa ʼae neʼe mole fakamatala age,
Pea ʼe natou tokagaʼi anai te meʼa ʼae neʼe mole natou logo ki ai.+
53 Ko ai koa ʼae neʼe tui ki te logo ʼae neʼe matou tala?*+
Pea neʼe fakaha koa kia ai te malohi* ʼo Sehova?+
2 ʼE tupu anai ohage ko he huli+ ʼi ʼona muʼa,* ohage ko he aka ʼi he kele magemage.
ʼE mole taulekaleka anai mo matalelei tona agaaga,+
Pea ka kita sio ki ai ʼe mole kita fia fakaovi ki ai.
3 Neʼe fehiʼaʼinaʼi pea neʼe fakamamaʼo te hahaʼi mai ia ia.+
Neʼe mahino te tagata ʼaia ki te ʼu mamahi pea mo te mahaki.
Neʼe hage ia neʼe ʼuʼufi tona fofoga.*
Neʼe fehiʼaʼinaʼi pea neʼe mole maʼuhiga kia tatou.+
Kae neʼe tou manatu tatou, neʼe tauteaʼi mo ta e te ʼAtua pea mo gaohi koviʼi.
6 Neʼe tou hehe fuli ohage ko ni ovi,+
Neʼe tou tahi mulimuli pe ʼi tona ala,
Pea neʼe tuku e Sehova kia ia te hala ʼa te tagata fuli.+
Ohage ko he ovi ʼe ʼave ke tamateʼi,+
ʼE nofo fakalogologo ia muʼa ʼo ʼana tagata faikosi,
Neʼe mole pe la fai hana palalau.+
8 Neʼe gaohi koviʼi ia ia pea neʼe ʼave ʼuhi he neʼe mole fakamauʼi ʼi te faitotonu.
Koia ko ai ʼae ka tokaga ki te fakamatala ʼo tona taʼiake?*
9 Logo la neʼe mole ina fai he meʼa ʼe kovi,
Pea neʼe mole ina fai he palalau kaka,+
Neʼe ina maʼu he fale maka ʼi te kau agakovi.+
ʼI tona mate, neʼe tanu ia mo te kau maʼu koloa.+
10 Kae neʼe ko te finegalo ʼo Sehova ke laliki ia ia, pea neʼe ina fakagafua ke mamahi.
Kapau ʼe ke momoli tona maʼuli ohage ko he sakilifisio fakatokatoka,*+
ʼE sio anai ki tona hakoga, ʼe ina fakatologa anai ʼona ʼaho,+
Pea ʼe hoko anai te finegalo ʼo Sehova ʼaki ia ia.+
11 ʼI tana ʼosi mamahi ʼaia, ʼe fakafimalieʼi anai ʼi te meʼa ʼae ka sio ki ai.
ʼAki taku tagata kaugana, ia ia ʼae ʼe faitotonu, ʼuhi ko tona ʼatamai malama,+
ʼE tala anai ʼe faitotonu te tokolahi+
Pea ʼe ina ʼamo anai ʼanatou hala.+
12 Koia ʼae ʼe au foaki anai hona vahe ʼi te kaugamalie,
Pea ʼe ina vaevae anai te koloa mo natou ʼae ʼe malolohi,
Koteʼuhi neʼe ina foaki tona maʼuli ʼo kaku ki te mate+
Pea neʼe lau ia ia ʼi te kau talagataʼa.+
Neʼe ina ʼamo te ʼu agahala ʼo te tokolahi+
Pea neʼe ina hufakiʼi te kau talagataʼa.+
54 “Fafine paʼa, kalaga fakafiafia, ia koe ʼae heʼeki ke maʼu fanau!+
Fakaha tau fiafia,+ ia koe ʼae heʼeki ke mamahi fanau,+
He ʼe lahi age te ʼu tama* ʼa te fafine ʼae neʼe liʼakina
Ia ia ʼae ʼe ʼi ai tona ʼohoana,”*+ ko te ui ʼaia ʼa Sehova.
2 “Fakalahi te tuʼuʼaga ʼo tou fale la.+
Folahi te ʼu la ʼi tou nofoʼaga taulekaleka.
Fakaloloa te ʼu maea ʼo tou fale la, ʼaua naʼa ke taʼofi,
Pea mo fakamalohiʼi te ʼu faʼo.+
3 ʼE ke folahi anai ʼou tuʼakoi ʼi te faʼahi mataʼu mo te faʼahi hema.
ʼE puleʼi anai e ʼou hakoga ni puleʼaga
Mo nonofo ʼi ni kolo lavaki.+
4 ʼAua naʼa ke mataku+ he ʼe mole fakalainoaʼi anai koe.+
ʼAua naʼa ke ufiufi, he ʼe mole ke lotomamahi anai.
ʼE ke galoʼi anai te ufiufi ʼo tou temi tupulaga
Pea ʼe mole ke toe manatuʼi anai te fakalainoaʼi ʼo tou temi vitua.”
5 “ ʼE hage tou Tupuʼaga Lahi+ ko hou ʼohoana.*+
Ko tona huafa ko Sehova ʼo te ʼatu kautau,
Pea ko te Maʼoniʼoni ʼo Iselaele, ko Ia ʼae neʼe ina totogi koe.+
ʼE fakahigoaʼi anai ko te ʼAtua ʼo te kele katoa.+
6 ʼI te temi ʼae neʼe pauʼi ai koe e Sehova, neʼe ke hage ko he fafine neʼe liʼaki pea mo lotomamahi ʼaupito,+
Ko he fafine ʼohoana ʼi tona temi tupulaga pea neʼe siʼakina,” ko te ui ʼaia ʼo tou ʼAtua.
7 “Neʼe au liʼaki koe ʼi he kiʼi temi pe,
Kae ʼi te lahi ʼo toku manavaʼofa, ʼe au toe ʼaumai anai ia koe.+
8 ʼI te lahi ʼo toku ita, neʼe au lituʼa kia koe ʼi he kiʼi temi pe,+
Kae ʼi te heʼe gata ʼo toku ʼofa agatonu, ʼe au ʼofa anai kia koe,”+ ko te ui ʼaia ʼa Sehova, ia Ia ʼae neʼe ina totogi koe.+
9 “Maʼaku ʼe hage pe te aluʼaga ʼaeni ko te temi ʼo Noe:+
Ohage pe ko taku fakapapau ʼe mole toe lofia anai te kele,+
ʼE au fakapapau ʼe mole au toe ita anai mo fakatonutonuʼi koe.+
10 ʼE feala ke puli te ʼu moʼuga
Pea mo holoʼi te ʼu kiʼi moʼuga,
Kae ʼe mole puli anai toku ʼofa agatonu kia koe+
Pea ʼe mole holoʼi anai taku fuakava ʼo te tokalelei,”+ ko te ui ʼaia ʼa Sehova, ia Ia ʼae ʼe ʼofa kia koe.+
11 “Siʼi fafine ʼae ʼe gaohi koviʼi,+ ʼae ʼe fueʼi e te afā pea ʼe mole he tahi ke ina fakapelepeleʼi,+
ʼE au fakatuʼu ʼou maka ʼaki he sima malohi
Pea ʼaki te safile, ʼe au fakatuʼu ʼou fakatafito.+
12 ʼE au fai anai te tumutumu ʼo tou kaupa ʼaki te lupi,
Mo ʼou matapa ʼaki ni maka gigila,
Pea ʼe au fakatuʼakoi anai tou fenua ʼaki ni maka maʼuhiga.
14 ʼE ke tuʼu malohi anai ʼi te faitotonu.+
ʼE mole toe gaohi koviʼi anai koe,+
ʼE mole ke toe tuʼania anai mo mataku ki he meʼa,
He ʼe mole toe fakaovi atu anai kia koe he meʼa fakamataku.+
15 Kapau ʼe ʼohofi koe e he tahi,
Neʼe mole ko au ʼae neʼe au fakatotonu.
Ko he tahi pe ʼe ina ʼohofi koe, ʼe to anai ʼuhi pe ko koe.”+
16 “Koʼeni, ko au ʼae neʼe au fakatupu te tagata tufuga ukamea,
ʼAe ʼe ina pupuhi te ʼu mamala ʼo te afi
Pea ʼaki tana gaue, ʼe ina faʼu he mahafu.
Pea ko au ʼae neʼe au toe fakatupu te tagata fakatupu maumau ke ina fakahoko ni maumau.+
17 ʼE to noa anai ia mahafu fuli ʼae ʼe fai moʼo tauʼi ʼo koe.+
Pea ʼe ke tauteaʼi anai ia natou fuli ʼae ʼe fakafeagai kia koe ʼi te ʼu faifakamau.
Ko te tofiʼa ʼaia ʼa te ʼu kaugana ʼa Sehova,
Pea maʼaku ʼe natou faitotonu,” ko te ui ʼaia ʼa Sehova.+
55 Kotou ʼomai ia koutou fuli ʼae ʼe fia iinu+ ʼo toʼo te vai!+
Ia koutou ʼae ʼe mole hakotou falā, kotou ʼomai ʼo toʼo mo kakai!
ʼEi, kotou ʼomai ʼo toʼo te vino mo te huʼa pipi,+ ʼo toʼo noa ʼo mole totogi.+
2 He koʼe ʼe kotou haga maumau falā ki he meʼa ʼe mole kai?
He koʼe ʼe kotou maumauʼi tokotou totogi* kae ʼe mole kotou makokona ai?
Kotou fakalogo lelei mai pea kotou kai te meʼa ʼae ʼe lelei.+
ʼE kotou fiafia anai ʼi he meʼa ʼe kano lelei age.+
3 Kotou tokakaga pea kotou ʼomai kia te au.+
Kotou fagono pea ʼe kotou maʼuʼuli anai.
ʼE au fai anai he fuakava heʼe gata+ mo koutou
ʼO mulimuli ki te fakapapau ʼae neʼe au fai kia Tavite ʼo ʼuhiga mo toku ʼofa agatonu.
Pea ʼe tuha te fakapapau ʼaia mo te falala.+
5 ʼE ke* pauʼi anai he puleʼaga ʼe mole ke iloʼi,
Pea ʼe ʼomai anai kia koe ni hahaʼi ʼo he puleʼaga neʼe mole natou iloʼi ia koe
ʼUhi ko Sehova tou ʼAtua,+ te Maʼoniʼoni ʼo Iselaele,
Koteʼuhi ʼe ina fakakololiaʼi anai ia koe.+
6 Kotou kumi ia Sehova he ʼe kei feala ke maʼu.+
Kotou pauʼi ia ia he ʼe kei ovi mai.+
7 Ke liʼaki e te agakovi ʼana aga,+
Pea mo te tagata agakovi ʼana manatu.
Ke toe liliu mai kia Sehova pea ʼe ʼofa anai ki ai,+
8 “Ko ʼaku manatu ʼe mole ko ʼakotou manatu,+
Pea ko ʼakotou aga ʼe mole ko ʼaku aga,” ko te tala ʼaia ʼa Sehova.
9 “Ohage pe ko te maʼoluga ʼo te lagi ʼi te kele,
ʼE toe feia pe mo ʼaku aga, ʼe maʼoluga age ia ʼi ʼakotou aga,
Pea mo ʼaku manatu ʼi ʼakotou manatu.+
10 Ohage pe ko te to ifo mai te lagi ʼo te ʼua pea mo te nive
Pea ʼe mole nā toe liliu anai ki ai kae ʼe mole heʼeki nā fakavai te kele, mo fakatupu mo fakahomo,
Pea mo foaki te pulapula ki te tagata to pulapula, pea mo te moʼi pane kia ia ʼae ʼe kai,
11 ʼE toe feia anai mo te folafola ʼae ʼe mavae atu ʼi toku gutu.+
ʼE mole toe liliu mai anai kia te au kae ʼe mole hona fua,+
ʼE ina fakahoko moʼoni anai ia meʼa fuli ʼae ʼe au fiafia ai*+
Pea mo te gaue ʼae neʼe au fakatotonu ki ai.
ʼE kalaga fakafiafia anai ʼi ʼokotou muʼa te ʼu moʼuga mo te ʼu kiʼi moʼuga,+
Pea ʼe pasipasi anai te ʼu fuʼu ʼakau fuli ʼo te vao.+
13 ʼE homo anai te fuʼu senelie kae mole ko te ʼakau talatala,+
Mo te fuʼu milete kae mole ko te vao talatala.
ʼE tupu ai anai te logologona ʼo Sehova,+
Ko he fakailoga heʼe gata ʼe mole toe puli anai ʼi he temi.”
56 Koʼeni te folafola ʼa Sehova:
“Kotou taupau mo fai te meʼa ʼae ʼe totonu,+
He ʼe kua vave pe te haofaki,
Pea ʼe ha anai taku faitotonu.+
2 Manuʼia te tagata ʼae ʼe ina fai te meʼa ʼaia,
Pea mo te foha ʼo te tagata ʼae ʼe ina fakahoko lelei,
ʼAe ʼe ina taupau te Sapato ʼo mole ina maumauʼi+
Pea ʼe mole ina fai he aga ʼe kovi.
3 ʼE mole tonu anai ke ui e te matapule ʼae ʼe fakatahi kia Sehova:+
‘ ʼE mahino ia, ʼe tuku keheʼi anai au e Sehova ʼi tana hahaʼi.’
Pea ʼe mole tonu anai ke ui e te enuke:* ‘Koʼeni, ko au ko he fuʼu ʼakau moamoa.’ ”
4 Koʼeni te folafola ʼa Sehova:
“Ki te kau enuke ʼae ʼe natou taupau ʼaku Sapato,
ʼAe ʼe natou filifili te meʼa ʼae ʼe au fiafia ai
Pea mo pipiki maʼu ki taku fuakava,
5 ʼE au foaki anai he mataga mo he higoa ʼi toku fale,
Ko he meʼa ʼe lelei age ia ʼi ni foha mo ni ʼofafine.
ʼE au foaki anai kia natou he higoa ʼo heʼe gata,
He higoa ʼe mole molehi anai.
6 Kae ki te kau matapule ʼae ʼe fakatahi kia Sehova ke tauhi kia te ia,
Mo ʼoʼofa ki te huafa ʼo Sehova+
Pea mo liliu ko ʼana kaugana,
Ko natou fuli ʼae ʼe natou taupau te Sapato, ʼe mole natou maumauʼi,
Pea ʼe natou pipiki maʼu ki taku fuakava,
7 ʼE au ʼaumai anai natou ki toku moʼuga taputapu+
Mo fakafiafiaʼi natou ʼi toku fale faikole.
ʼE au tali anai ʼanatou holokoseta pea mo ʼanatou sakilifisio ʼi toku ʼaletale.
ʼE fakahigoaʼi anai toku ʼapi ko he fale faikole maʼa te hahaʼi fuli.”+
8 Koʼeni te folafola ʼa te Tuʼi ʼAliki ko Sehova, ia ia ʼae ʼe ina fakatahiʼi natou ʼae neʼe mavetevete ʼo Iselaele:+
“ ʼE au toe fakatahiʼi anai ʼihi kia natou ʼae neʼe kua au ʼosi fakatahiʼi.”+
9 Kotou ʼomai ʼo kakai ia koutou fuli, ʼu manu fekai ʼo te vao,
Pea mo koutou fuli, ʼu manu fekai ʼo te ʼu vao matuʼa.+
10 Kua kivi te kau leʼo,+ neʼe mole natou tokagaʼi he meʼa.+
Ko natou fuli ko ni kuli ʼalelo mate, ʼe mole natou ko pe la.+
ʼE natou hehela mo takokoto, ʼe natou manako pe ki te moe.
11 Ko ni kuli ʼuakai,
ʼE mole natou makokona ʼi he temi.
Ko ni tauhi ovi ʼe mole mahino ki he meʼa.+
ʼE natou mulimuli fuli pe ki ʼonatou ala,
ʼE natou kumi pe ke natou maʼu fakakaka ʼonatou koloa mo ui:
12 “Kotou ʼomai, ʼe au alu ʼo kumi he vino,
Pea tou inu kava ke tou konana.+
ʼE tatau pe anai te apogipogi mo te ʼaho nei, pea ʼe toe lelei age la ia!”
57 ʼE mate te tagata faitotonu,
Kae ʼe mole tokagaʼi e he tahi.
ʼE ʼave* te ʼu tagata agatonu,+
Pea ʼe mole iloʼi e he tahi neʼe ʼave te tagata faitotonu
ʼI* te malaʼia.
2 ʼE ina maʼu te tokalelei.
ʼE malolo ʼi ʼonatou moeʼaga* ia natou fuli ʼae ʼe agatonu.
3 “Kae kotou fakaovi mai,
ʼU tama ʼa he fafine faifakalauʼakau,
ʼU fanau ʼa he tagata tono mo he fafine paomutu:
4 Ko ai ʼae ʼe kotou vaʼi?
ʼE kotou avahi lahi tokotou gutu ʼo fakaliliʼi ia ai?
ʼE mole ko koutou koa la ko ni fanau ʼo te talagataʼa,
Ko ni fanau ʼo te kaka,+
5 Natou ʼae ʼe holi kovi ʼi te ʼu fuʼu ʼakau lalahi,+
ʼI te ʼu lalo fuʼu ʼakau fuli ʼae ʼe maʼuli lelei,+
Natou ʼae ʼe natou matehi ni fanau ʼi te ʼu vaʼe vai tafe,*+
ʼI te ʼu ʼutu?
6 Ko tou vahe ko ni maka momole ʼo te vai tafe.*+
ʼEi, ko tou tofiʼa.
Neʼe ke toe momoli ki ai ni molaga vino mo ni meʼa ʼofa.+
Neʼe tonu koa ke au fiafia ʼi te ʼu meʼa ʼaia?
7 Neʼe ke fai tou moeʼaga ʼi he moʼuga lahi mo maʼoluga,+
Pea neʼe ke hake ki ai ʼo momoli ni sakilifisio.+
8 Neʼe ke tuku ki te tuʼa matapa mo ʼona kaumatapa tau fakatata.*
Neʼe ke siʼaki au pea neʼe ke huʼi ʼou mutuʼi meʼa.
Neʼe ke hake pea neʼe ke fakalahi tou moeʼaga.
Pea neʼe ke fai he fuakava mo natou.
9 Neʼe ke hifo kia Meleke* mo he moʼi lolo
Pea mo ni lolo magoni ʼe lahi ʼaupito.
Neʼe ke fekauʼi ki mamaʼo ʼou fakafofoga,
Pea neʼe ke hifo ki te Faitoka.*
10 Neʼe ke kinakina ʼi tau muliʼi ni tuʼuga ala,
Kae neʼe mole ke ui pe la: ‘ ʼE mole hona ʼuhiga!’
ʼI tau toe malohi,
Neʼe mole ke holomuli.*
11 Neʼe ke mataku mo tuʼania kia ai,
ʼAe neʼe ke loi ai?+
Neʼe mole ke manatuʼi pe la ia au.+
Neʼe mole ke tokagaʼi he meʼa.+
ʼI taku nofo fakalogologo pea mo taku nofo kehe,+
Neʼe mole ke manavasiʼi pe la kia te au.
13 Ka ke kole tokoni,
ʼE mole haofaki anai koe e ʼau taula ʼatua.+
ʼE ʼave fuli anai e te matagi,
ʼE heu anai natou e he kiʼi manava.
Kae ko ia ʼae ʼe nono ia te au, ʼe ina maʼu anai te fenua
Pea ʼe nofo anai ʼi toku moʼuga taputapu.+
14 ʼE ui anai: ‘Kotou tofa, kotou tofa he ala! Kotou teuteuʼi te ala!+
Kotou toʼo ia te meʼa fakatupu tukia fuli ʼi te ala ʼo taku hahaʼi.’ ”
15 Koʼeni te folafola ʼo Ia ʼae ʼe maʼoluga ʼaupito,
Ia ia ʼae ʼe maʼuli ʼo talu ai+ pea ʼe taputapu tona huafa:+
“ ʼE au nofo ʼi te potu maʼoluga mo taputapu,+
Pea ʼe au toe nofo mo natou ʼae ʼe taʼomia mo agavaivai.
ʼE au fakalotomalohiʼi te kau agavaivai
Pea ʼe au fakamalohiʼi te loto ʼo natou ʼae ʼe taʼomia.+
16 ʼE mole au fakafeagai anai kia natou ʼo heʼe gata
Pea ʼe mole au ita anai kia natou ʼo talu ai+
Naʼa lotovaivai te tagata ʼuhi ko au,+
ʼEi, ia meʼa fuli ʼae neʼe au fakatupu mo manava.
17 Neʼe au ita ki tana agahala,* ki tana maʼu fakakaka ʼona koloa.+
Koia neʼe au taʼi, mo ita, mo haga kehe mai ia ia.
Kae neʼe hoko atu pe tana fakalogo ki tona loto ʼo talagataʼa.+
19 “ ʼE au tuku te fakavikiviki ki te ʼu laugutu.
ʼE maʼu anai he tokalelei ʼo talu ai e ia ʼae ʼe mamaʼo mo ia ʼae ʼe ovi,”+ ko te ui ʼaia ʼa Sehova,
“Pea ʼe au fakamalolo anai ia ia.”
20 “Kae ʼe hage te kau agakovi ko te tai ʼae ʼe hou ʼe mole gona,
Pea ʼe laku tuʼumaʼu mai te limu mo te pela.
21 ʼE mole he tokalelei ki te kau agakovi,”+ ko te ui ʼaia e toku ʼAtua.
58 “Kalaga ʼi tou malohi katoa, ʼaua naʼa ke tataʼofi!
Hiki tou leʼo ohage ko te pupuhi ʼo he tala.
Fakaha ki taku hahaʼi tana agatuʼu,+
Ki te hologa ʼo Sakopo ʼana agahala.
2 ʼE natou kumi au ʼi te ʼaho fuli
Pea ʼe natou ui ʼe natou fiafia ʼi te iloʼi ʼo ʼaku aga,
Ohage la ko natou ko he puleʼaga ʼe natou fakahoko te faitotonu
Pea mole natou siʼaki te ʼu lao ʼo tonatou ʼAtua.+
ʼE natou kole mai ke au fakamauʼi natou ʼi te faitotonu
Ohage la ʼe natou fiafia ʼi te fakaovi ki te ʼAtua:+
3 ‘Moka matou sesunio, he koʼe ʼe mole ke iloʼi?+
Moka matou fakamamahi, he koʼe ʼe mole ke tokagaʼi?’+
He ʼe ko te ʼaho ʼae ʼe kotou sesunio ai, ʼe kotou kumi pe te meʼa ʼae ʼe lelei kia koutou,
Pea ʼe kotou gaohi koviʼi ʼakotou kau gaue.+
4 ʼE fakaʼosi ʼakotou sesunio ʼi ni kē mo ni fuhu,
Pea ʼe kotou hokaʼi ʼaki te tuke ʼo te agakovi.
ʼE mole feala ke kotou sesunio ohage ko takotou fai nei pea logoʼi ai koutou ʼi selo.
5 ʼE tonu koa ke feia te sesunio ʼae ʼe au kole atu:
Ko he ʼaho ʼe tonu ke kita fakamamahi ai,
Ke punou te ʼulu ohage ko te mapelu ʼo he kaho,
Pea mo fai tona moeʼaga ʼi ni taga* mo ni lefulefu?
Ko te faʼahiga fai koa ʼaia ʼo he sesunio, he ʼaho ke fiafia ai ia Sehova?
6 Koʼeni te sesunio ʼae ʼe au loto ki ai:
Ke toʼo te ʼu seini ʼo te agakovi,
Ke vevete te ʼu haʼi ʼo te ʼakau ʼamo,+
Ke fakaʼateainaʼi ia natou ʼae ʼe gaohi koviʼi+
Pea ke fasiʼi te ʼu ʼakau ʼamo fuli.
7 Ke toe vaevae foki tau moʼi pane mo ia ʼae ʼe fia kai,+
Ke ke tali kaiga ki te masiva mo ia ʼae ʼe hala nofoʼaga,
Ke fakakofu ia ia ʼae ʼe mole hona mutuʼi meʼa+
Pea ʼaua naʼa ke lituʼa ki tou tehina.
8 Pea ʼe mu anai tou malama ohage ko te mafoata+
Mo homo fakavilivili tou malolo.
ʼE haʼele anai ʼi ʼou muʼa tau faitotonu,
Pea ʼe puipui anai koe e te kololia ʼo Sehova ʼi ʼou tuʼa.+
9 ʼE ke pauʼi anai pea ʼe tali atu e Sehova.
ʼE ke kalaga anai ʼo kole tokoni pea ʼe ina ui atu: ‘Koʼeni au!’
Kapau ʼe ke pulihi ia koe te ʼakau ʼamo,
Pea kapau ʼe tuku tau tuhiʼi mo palalau agakovi,+
10 Kapau ʼe ke foaki kia ia ʼae ʼe fia kai te meʼa kai ʼae ʼe lelei kia koe+
Pea kapau ʼe ke fakafimalieʼi ia natou ʼae ʼe lotomamahi,
ʼE mu anai tou malama ʼi te poʼuli
Pea ʼe hage anai tou fakapoʼuli ko te fetapa.+
11 ʼE takitaki tuʼumaʼu anai koe e Sehova
Pea ʼe ina toe fakafimalieʼi anai koe ʼi he kele moamoa.+
ʼE ina fakamalohiʼi anai ʼou hui
Pea ʼe ke liliu anai ohage ko he ʼoloto ʼe fakavai lelei,+
Ko he matapuna vai ʼe hali tuʼumaʼu.
12 ʼE toe gaohi anai maʼa koe te ʼu maumau ʼafeā,+
Pea ʼe ke gaohi anai te ʼu fakatafito ʼo te ʼu taʼiake kua hili.+
ʼE fakahigoaʼi anai koe ko ia ʼae ʼe ina toe gaohi te ʼu kaupa ʼae kua holo,+
Mo ina tofa te ʼu ala ʼae ʼe nofoʼi ʼonatou kauala.
13 Kapau ʼuhi ko te Sapato ʼe mole ke kumi pe te ʼu meʼa ʼae ʼe lelei kia koe ʼi toku ʼaho taputapu+
Pea kapau ʼe ke fakaʼuhiga te Sapato ohage ko he meʼa ʼe lelei, ko he ʼaho taputapu ʼa Sehova, ko he ʼaho ke fakaʼapaʼapaʼi,+
Pea ʼe ke fakaʼapaʼapa moʼoni ʼo mole ke kumi pe te ʼu meʼa ʼae ʼe lelei kia koe mo hoko palalau,
14 Pea ʼe ke fiafia lahi anai ia Sehova,
Pea ʼe au fakaheka anai koe ʼi te ʼu potu maʼoluga ʼo te kele.+
ʼE au fakafiafiaʼi anai koe ʼaki te tofiʼa ʼo Sakopo, tau kui,+
Ko te folafola tonu ʼaia ʼa Sehova.”
59 Koʼeni, ʼe mole nounou te nima ʼo Sehova ke mole feala ke ina haofaki,+
Peʼe tuli tona taliga ke mole feala ke fagono.+
2 Kailoa ia, ko ʼakotou hala ʼae ʼe kotou mamaʼo ai mai tokotou ʼAtua.+
Pea ʼuhi ko ʼakotou agahala, ʼe lituʼa ai kia koutou,
ʼE mole kei fia fakalogo atu.+
3 ʼE ʼuli ʼokotou ʼalofi nima ʼi te toto,+
Pea mo ʼokotou kauʼi tuhi ʼi te hala.
ʼE tala e ʼokotou laugutu ni loi+ mo fanafana ni meʼa ʼe mole totonu.
4 ʼE mole puipui e he tahi te faitotonu,+
Pea ʼe mole faifakamau he tahi ʼi te moʼoni.
ʼE natou falala ki ni meʼa noa+ pea ʼe natou tala ni meʼa vaʼiganoa.
ʼE natou fakakaukauʼi te malaʼia mo fakahoko te meʼa ʼae ʼe kovi.+
5 ʼE natou foafoaʼi te ʼu fua ʼo te gata kafokona
Pea ʼe natou fai he kavelevele.+
Ko ia ʼae ʼe ina kai ʼonatou fua ʼe mate anai,
Pea ʼe maʼu anai he gata ʼi te fua ʼae ka foaʼi.
6 ʼE mole fakaʼaogaʼi anai ʼonatou kavelevele moʼo fai ʼo ni mutuʼi meʼa,
Pea ko te meʼa ʼae ʼe natou fai, ʼe mole feʼauga anai moʼo ʼuʼufi ʼo natou.+
ʼE kovi ʼanatou gaue,
Pea ʼe natou agamalohi tuʼumaʼu.+
7 ʼE feleleʼi ʼonatou vaʼe moʼo fai te meʼa ʼae ʼe kovi,
ʼE natou ʼoho fakavilivili ʼo liligi te toto ʼo natou ʼae ʼe mole natou fai he meʼa ʼe kovi.+
ʼE kovi tuʼumaʼu pe ʼanatou manatu,
ʼE maʼu ʼi ʼonatou ala te maumau mo te malaʼia.+
8 ʼE mole natou iloʼi te ala ʼo te tokalelei,
Pea ʼe puli te faitotonu ʼi ʼonatou ala foufou.+
ʼE natou fakapikopikoʼi ʼonatou ala,
Pea ʼe mole maʼu anai te tokalelei e natou ʼae ʼe haʼele ai.+
9 Koia la ʼae ʼe mamaʼo ai te agatonu ia tatou
Pea ʼe mole kaku mai te faitotonu kia tatou.
ʼE tou fakaʼamu tuʼumaʼu ki te malama kae ʼe ko te fakapoʼuli.
ʼE tou fakaʼamu tuʼumaʼu ki te ʼaho kae ʼe tou haga haʼele pe ʼi te fakapoʼuli.+
10 ʼE tou kumi fakataufa te kaupa ohage ko ni kivi.
ʼE tou taufa tuʼumaʼu ohage ko ni hahaʼi ʼe mole sisio.+
ʼI te fetapa, ʼe tou tukia ohage ʼe fakapoʼuli.
ʼE hage ia kua tou mamate ʼi te lotolotoiga ʼo te ʼu tagata malolohi.
11 Ko tatou fuli ʼe tou gugulu tuʼumaʼu ohage ko ni uluso.
ʼE tou fetagihi fakaʼofaʼofa ohage ko ni lupe.
ʼE tou fakaʼamu ki te faitotonu, kae ʼe mole maʼu ia.
ʼE tou fakaʼamu ki te haofaki, kae kua mamaʼo ia ia tatou.
ʼE matou iloʼi lelei ʼamatou agatuʼu,
ʼEi, ʼe matou iloʼi lelei ʼamatou hala.+
13 Neʼe matou talagataʼa mo fakafisi kia Sehova.
Neʼe matou lituʼa ki tomatou ʼAtua.
Neʼe matou fakaneke te agamalohi mo te agatuʼu.+
Neʼe matou fakakaukauʼi mo fanafana ni loi ʼi ʼomatou loto.+
14 ʼE hoho ki muli te agatonu,+
ʼE tuʼu mamaʼo te faitotonu,+
He neʼe tukia te moʼoni* ʼi te malaʼe lahi
Pea ʼe mole feala ke ulu ki ai te agatonu.
Neʼe sio ki ai ia Sehova pea neʼe mole fiafia,
He ʼe mole kei fakahoko te faitotonu.+
16 Neʼe punamaʼuli ʼi tana sio ʼae neʼe mole ʼi ai he tahi,
ʼEi, neʼe mole he tagata ke ina fakahoko.
Koia ko tona nima ʼae neʼe ina fakahoko te fakamaʼuli,*
Pea neʼe lagolago ki ai tana faitotonu.
17 Neʼe ina kofuʼi leva te faitotonu ohage ko he kofu tau
Pea neʼe ina ʼai ki tona ʼulu te puloga tau ʼo te haofaki.*+
Neʼe ina tui te ʼu teu ʼo te lagavaka+
Pea neʼe pulupulu ki te faʼafai.
18 Koʼeni te meʼa ʼae ka ina liufaki ʼuhi ko ʼanatou aga:+
Te hauhau mo te fakatuʼā ki ʼona fili.+
Pea ki te ʼu motu, te meʼa ʼae ʼe tuha mo natou.
19 ʼE manavasiʼi anai ki te huafa ʼo Sehova ia natou ʼae mai te toʼaga ʼo te laʼa.
Pea ʼe manavasiʼi anai ia natou ʼae mai te hopoʼaga ʼo te laʼa ʼuhi ko tona kololia,
He ʼe haʼu fakavilivili anai ia Sehova ohage ko he vai tafe,
ʼE tatafe ʼuhi ko tona laumalie.
20 “ ʼE haʼu anai ki Sione ia Ia ʼae ʼe ina totogi,+
Ki te hologa ʼo Sakopo ʼae neʼe haga kehe mai te talagataʼa,”+ ko te ui ʼaia ʼa Sehova.
21 ʼE ui e Sehova: “Kae kia au, koʼeni taku fuakava mo natou.”+ Pea ʼe toe ui e Sehova: “ ʼE au tuku toku laumalie mo ʼaku folafola kia koe, ʼae neʼe au ʼai ki tou gutu pea ʼe mole au toʼo anai mai tou gutu, peʼe ko te gutu ʼo ʼau fanau, peʼe ko te gutu ʼo ʼou mokopuna ʼi te temi nei ʼo talu ai.”
60 “Fafine, tuʼu ake,+ fakamafola te malama he ʼe kua mu mai.
ʼE mu te kololia ʼo Sehova kia koe.+
2 ʼEi, ʼe ʼaofi anai te kele e te fakapoʼuli,
Mo he fakapoʼuli gaogao ia te ʼu puleʼaga.
Kae ʼe fakamu anai e Sehova te malama kia koe,
Mo ha anai tona kololia ia koe.
4 Hiki ake ʼou mata mo sio ki ʼou tafaʼaki!
ʼE natou fakatahitahi fuli, ʼe natou ʼomai kia koe.
ʼE hoko atu pe te ʼomai ʼo ʼau tama mai mamaʼo,+
Pea mo ʼau taʼahine ʼae ʼe fua ʼi te faʼahi vakavaka.+
5 ʼI te temi ʼaia, ʼe ke sio anai mo fiafia,+
ʼEi, ʼe fiafia lahi anai tou loto,
He ʼe fagona mai anai kia koe te ʼu koloa ʼo te tai,
Mo tau mai anai kia koe te ʼu koloa ʼo te ʼu puleʼaga.+
ʼE ʼomai anai te hahaʼi fuli ʼo Sapa
ʼO ʼaumai te aulo mo te iseso hina.
ʼE natou kalagaʼi anai ni fakavikiviki kia Sehova.+
7 ʼE fakatahi fuli anai te faga manu ʼo Keta+ io koe.
ʼE ʼaumai anai maʼa koe te ʼu ovi tagata ʼo Nepasote.+
ʼE sakilifisioʼi anai natou ʼi toku ʼaletale pea ʼe au tali anai.+
ʼE au fakamataleleiʼi anai toku ʼapi ʼae kua fonu ʼi te kololia.+
8 Ko ai koa ia natou ʼaena ʼe feoloʼaki ohage ko te ʼu ʼao,
Ohage ko te ʼu lupe ki ʼonatou nofoʼaga?
9 ʼE falala anai te ʼu motu kia te au.+
ʼE takimuʼa te ʼu vaka ʼo Talesisi
Moʼo ʼaumai ʼau tama mai mamaʼo,+
ʼO feia mo ʼanatou siliva mo ʼanatou aulo,
Ki te huafa ʼo Sehova tou ʼAtua, te Maʼoniʼoni ʼo Iselaele,
He ʼe ina fakakololiaʼi anai koe.+
10 ʼE laga anai e ni matapule ʼou kaupa,
Pea ʼe tauhi anai kia koe ʼonatou hau,+
He ʼe ʼi toku ita neʼe au taʼi koe.
Kae ʼi toku manavaʼofa ʼe au ʼofa anai kia koe.+
11 ʼE ava tuʼumaʼu anai ʼou matapa.+
ʼE mole pupunu anai ʼi te ʼaho peʼe ko te poʼuli,
Ke ʼaumai kia koe te ʼu koloa ʼo te ʼu puleʼaga
Pea ko ʼonatou hau ʼae ka natou ʼuluaki fakahoko.+
12 ʼE pulihi anai te hahaʼi mo te ʼu puleʼaga fuli ʼae ʼe mole tauhi kia koe.
ʼE molehi katoa anai te ʼu puleʼaga ʼaia.+
13 ʼE foaki atu anai te kololia ʼo Lipane,+
ʼO fakatahi mo te fuʼu senelie, mo te fuʼu felene, mo te fuʼu sipele+
Moʼo fakamataleleiʼi te tuʼuʼaga ʼo toku sagatualio.
ʼE au fakakololiaʼi anai te koga meʼa ʼae ʼe hili ai ʼoku vaʼe.+
14 ʼE ʼomai anai te ʼu foha ʼo natou ʼae neʼe natou gaohi koviʼi koe ʼo tulolo ʼi ʼou muʼa.
ʼE tulolo anai ki ʼou vaʼe ia natou fuli ʼae neʼe mole fakaʼapaʼapa kia koe
Pea ʼe tonu anai ke natou fakahigoaʼi koe ko te kolo ʼo Sehova,
Ko Sione ʼo te Maʼoniʼoni ʼo Iselaele.+
15 Tatau aipe pe neʼe liʼakina mo fehiʼaʼinaʼi koe, pea neʼe mole fakalaka he tahi io koe,+
Kae ʼe au fakaliliu anai koe ko he matapuna ʼo te fiameʼameʼa ʼo talu ai,
Ko he fiafiaʼaga mai he taʼiake ki he tahi taʼiake.+
16 ʼE ke inu anai te huʼa pipi ʼo te ʼu puleʼaga,+
ʼE fafaga anai koe e ni hau ohage ko tona fai e he faʼe.+
Pea ʼe ke iloʼi moʼoni anai ko au ia Sehova tou Fakamaʼuli.
Pea ko Ia ʼae neʼe ina totogi koe, te Mafimafi ʼo Sakopo.+
17 ʼE au fetogi anai te kapa ʼaki te aulo,
Te ukamea ʼaki te siliva,
Te ʼakau ʼaki te kapa,
Mo te maka ʼaki te ukamea.
ʼEi, ʼe au fakanofo anai kia koe te tokalelei ohage ko he kau takitaki,
Pea mo te faitotonu ohage ko he kau pule gaue.+
18 ʼE mole toe logo anai he tahi ki he agamalohi ʼi tou fenua,
Peʼe ki he maumau ʼi loto ʼo ʼou tuʼakoi.+
ʼE ke fakahigoaʼi anai ʼou kaupa ko Haofaki,+ pea mo ʼou matapa ko Fakavikiviki.
19 ʼE mole toe fakamalamaʼi anai koe e te laʼa ʼi te ʼaho,
Pea ʼe mole toe inaina anai koe e te huhulu ʼo te mahina ʼi te poʼuli,
He ʼe liliu anai ia Sehova ko he malama heʼe gata maʼa koe.+
Pea ʼe liliu anai tou ʼAtua ko tou kololia.+
20 ʼE mole toe to anai te laʼa,
Pea ʼe mole fakapoʼuli anai te mahina,
He ʼe liliu anai ia Sehova ko he malama heʼe gata maʼa koe+
Pea ʼe fakaʼosi anai tou temi putu.+
21 ʼE faitotonu fuli anai tau hahaʼi.
ʼE natou maʼu anai te fenua ʼo talu ai.
22 ʼE liliu anai te tokosiʼi ko he toko afe,
Pea ko ia ʼae ʼe mole maʼuhiga ko he puleʼaga malohi.
Ko au Sehova ʼe au fakahoko fakavilivili anai ʼi tona temi totonu.”
61 Ko te laumalie ʼo te Tuʼi ʼAliki ko Sehova ʼe ia te au,+
Koteʼuhi neʼe fakanofo au e Sehova ke au tala ni logo lelei ki te kau agavaivai.+
Neʼe ina fekauʼi au ke au haʼi te ʼu lavea ʼo natou ʼae ʼe lotovaivai,
Moʼo tala ki te kau pilisoni ʼe fakaʼateainaʼi anai natou
Pea ki te kau popula ʼe ava lahi anai ʼonatou mata,+
2 Moʼo kalagaʼi te taʼu ʼo te manavaʼofa ʼo Sehova
Pea mo te ʼaho ʼo te lagavaka ʼo totatou ʼAtua,+
Moʼo fakapelepeleʼi ia natou fuli ʼae ʼe putu,+
3 Moʼo tokaga kia natou ʼae ʼe putu ʼuhi ko Sione,
Moʼo foaki he pulou kae mole ko te lefulefu,
He lolo ʼo te fiafia kae mole ko te putu,
He teu ʼo te fakavikiviki kae mole ko te lotovaivai.
Pea ʼe fakahigoaʼi anai natou ko te ʼu fuʼu ʼakau lalahi ʼo te faitotonu,
Te gaueʼaga ʼa Sehova ke fakakololiaʼi ai ia ia.+
4 ʼE natou toe laga anai te ʼu maumau ʼafeā.
ʼE natou toe fakatuʼu ake anai te ʼu potu toafa ʼo te temi muʼa+
Pea ʼe natou toe fakafoʼou anai te ʼu kolo ʼae neʼe maumauʼi,+
Te ʼu potu ʼae neʼe tuʼu lavaki mai he taʼiake ki he tahi taʼiake.+
5 “ ʼE ʼomai anai ni matapule ʼo tokakaga lelei ki ʼakotou faga manu,
ʼE liliu anai ni matapule+ ko ʼakotou tagata gaue kele mo gaue vite.+
6 Kae ʼe fakahigoaʼi anai koutou ko te kau pelepitelo ʼa Sehova.+
ʼE fakahigoaʼi anai koutou ko te kau faifekau ʼo totatou ʼAtua.
ʼE kotou fakaʼaogaʼi anai te ʼu koloa ʼo te ʼu puleʼaga+
Pea ʼe kotou fiameʼameʼa ai anai.
7 ʼE maʼu anai e taku hahaʼi ni vahe ʼe lua kae ʼe mole natou ufiufi,
ʼE natou kalaga fakafiafia anai ʼuhi ko te vahe ʼae ka natou maʼu, kae ʼe mole natou lainoa.
ʼEi, ʼe natou maʼu anai ni vahe ʼe lua ʼi tonatou fenua.+
ʼE natou fiafia anai ʼo talu ai.+
ʼE au faitotonu anai ʼo foaki age tonatou totogi
Pea ʼe au fai anai mo natou he fuakava ʼo heʼe gata.+
Ko natou fuli ʼae ka sisio kia natou ʼe natou iloʼi anai
Ko te hologa ʼaia neʼe tapuakiʼi e Sehova.”+
10 ʼE lahi anai toku fiafia ia Sehova.
ʼE fiafia anai toku loto katoa ʼi toku ʼAtua.+
Neʼe ina fakakofuʼi au ʼaki te ʼu teu ʼo te haofaki,+
Neʼe ina fakatui kia au te kofu ʼo te faitotonu,
Ohage ko he tagata ʼohoana ʼe ina takai tona ʼulu ʼaki he kie ohage ko te kie ʼo te kau pelepitelo,+
Pea ohage ko he fafine ʼohoana ʼe teu ʼaki ni meʼa faiteuteu.
11 Ohage pe ko te fakahomo e te kele ʼona huli,
Pea mo te ʼoloto te meʼa ʼae neʼe to ki ai,
ʼE toe feia pe mo te Tuʼi ʼAliki ko Sehova,
ʼE ina fakahomo anai te faitotonu+ mo te fakavikiviki+ ia muʼa ʼo te ʼu puleʼaga fuli.
62 ʼE mole au fakalogologo anai ʼuhi ko Sione,+
ʼE mole au malolo anai ʼuhi ko Selusalemi,
ʼO kaku ki te mu ʼo tana faitotonu ohage ko he malama gigila+
Pea mo te haofaki ohage ko te ulo ʼo he taume.+
ʼE foaki atu anai he higoa foʼou,+
ʼE filifili tonu anai e Sehova.
3 ʼE ke liliu anai ko he pale taulekaleka ʼi te nima ʼo Sehova,
Ko he pale fakahau ʼi te ʼalofi nima ʼo tou ʼAtua.
4 ʼE mole toe ui anai ko koe ko he fafine neʼe liʼakina,+
ʼE mole toe ui anai neʼe maumauʼi tou kele.+
ʼE fakahigoaʼi anai koe ʼE Au Fiafia Ia Ia,+
ʼE fakahigoaʼi anai tou kele ko te Fafine ʼOhoana.
ʼE fiafia anai ia Sehova ia koe
Pea ʼe hage anai tou kele ko he fafine ʼohoana.
5 Ohage ko te ʼohoanaʼi e he tupulaga he taʼahine taupoʼou,
ʼE ʼohoanaʼi anai koe e ʼau hahaʼi.
Ohage ko te fakafiafiaʼi e te fafine ia tona ʼohoana,
ʼE ke fakafiafiaʼi anai tou ʼAtua.+
6 Selusalemi, neʼe au fakatuʼu ni tagata leʼo ʼi ʼou kaupa.
ʼE mole tonu ke natou fakalogologo ʼi he temi, tatau pe te ʼaho mo te poʼuli.
Ia koutou ʼae ʼe palalau ʼo ʼuhiga mo Sehova,
ʼAua naʼa kotou malolo.
7 Pea ʼaua naʼa kotou tuku ke malolo ʼo kaku ki tana fakatuʼu ke malohi ia Selusalemi,
ʼEi, ʼo kaku ki tana fakaliliu ko he kolo ʼe vikiʼi ʼi te kele.”+
8 Neʼe fai e Sehova he fuakava ʼo ina hiki tona nima mataʼu, ʼei, tona nima malohi:
“ ʼE mole au toe foaki anai ʼau fulumeto ko he meʼa kai ki ʼou fili.
Pea ʼe mole toe inu anai e ni matapule tau vino foʼou, ʼae neʼe ke gaue kinakina ki ai.+
9 Kae ko natou ʼae ʼe natou utu te ʼu fulumeto, ʼe natou kai anai mo fakavikiviki kia Sehova.
Pea ko natou ʼae ʼe natou toli te vite, ʼe natou inu anai te vino ʼi ʼoku malaʼe taputapu.”+
10 Kotou feulufi, kotou feulufi ʼi te ʼu matapa.
Kotou tofa te ala ki te hahaʼi.+
Kotou fakatokatoka, kotou fakatokatoka te ala lahi.
Kotou toʼo kehe te ʼu maka.+
Kotou fakatuʼu he fakailoga* ki te hahaʼi.+
11 Koʼeni ʼe tala e Sehova ʼi te ʼu potu taupotu ʼo te kele:
“Fakaha ki te taʼahine ʼo Sione:
‘Koʼeni, kua tau mai tou fakamaʼuli.+
Koʼeni, ʼe nofo te ʼAtua mo te fakapale,
Pea ko te totogi ʼae ʼe ina li, ʼe ʼi ʼona muʼa.’ ”+
12 ʼE fakahigoaʼi anai te hahaʼi ʼaeni ko te hahaʼi maʼoniʼoni, ia natou ʼae neʼe totogi e Sehova.+
Pea ʼe fakahigoaʼi anai koe ko te Kolo ʼAe Neʼe Kumi, ko te Kolo ʼAe Neʼe Mole Liʼakina.+
63 Ko ai ia ia ʼae ʼe haʼu mai Etome,+
Mai Potisela+ ʼi ni teu lanu,*
Ia ia ʼae ʼe kofu ki ni teu taulekaleka,
ʼAe ʼe haʼu ʼi tona malohi katoa?
“Ko au,* ia Ia ʼae ʼe ina tala te meʼa ʼae ʼe totonu,
Ia Ia ʼae ʼe ina maʼu he malohi lahi moʼo haofaki.”
2 He koʼe ʼe kula ʼou teu?
He koʼe ʼe hage ia ko te ʼu teu ʼo ia ʼae ʼe ina molomoloki te vite ʼi te lomiʼaga vite?+
3 “Neʼe au molomoloki tokotahi te vite ʼae neʼe ʼi te lomiʼaga vite.
Neʼe mole he tahi mo au.
Neʼe au molomoloki natou ʼi toku itaita.
Neʼe au tataʼo natou ʼi toku hauhau.+
Neʼe pihi mai tonatou toto ki ʼoku teu,
Pea neʼe pulepule fuli ai ʼoku kofu.
4 Neʼe au fakatuʼutuʼu te ʼaho ʼo te lagavaka,+
Pea kua hoko mai te taʼu ʼae ke au totogi ai taku hahaʼi.
5 Neʼe au fesioʼaki kae neʼe mole ʼi ai he tahi ke tokoni mai.
Neʼe au lotomamahi ʼi te mole fia tokoni mai ʼa he tahi.
6 Neʼe au malamalaki ni hahaʼi ʼi toku itaita,
Neʼe au fakakonahiaʼi natou ʼi toku hauhau+
Pea neʼe au liligi tonatou toto ki te kele.”
7 ʼE au palalau anai ki te ʼu gaue ʼae neʼe fai e Sehova ʼi tona ʼofa agatonu,
Ko te ʼu gaue ʼa Sehova ʼe tuha mo te fakavikiviki
ʼUhi ko meʼa fuli ʼae neʼe fai e Sehova maʼa tatou,+
Te ʼu meʼa lelei fuli ʼae neʼe ina fai maʼa te hahaʼi ʼo Iselaele,
ʼO mulimuli ki tona manavaʼofa pea mo te lahi ʼo tona ʼofa agatonu.
8 Neʼe ina ui: “ ʼE mahino papau ia ʼe ko taku hahaʼi, ko ni foha ʼe mole natou heʼe agatonu anai.”+
Koia neʼe liliu ai ko tonatou Fakamaʼuli.+
9 ʼI ʼonatou mamahi fuli, neʼe toe mamahi mo ia.+
Neʼe ina haofaki natou ʼaki tana tagata ʼave logo totonu.*+
Neʼe ina totogi natou ʼi tona ʼofa mo tona manavaʼofa,+
Neʼe ina fakatuʼu ake mo fua natou ʼi te ʼu temi ʼae kua hili.+
10 Kae neʼe natou agatuʼu+ mo fakamamahiʼi tona laumalie maʼoniʼoni.+
11 Neʼe natou manatuʼi leva te ʼu temi ʼae kua hili,
Te temi ʼo tana kaugana ko Moisese:
“Kofea ia Ia ʼae neʼe ina fakahake tana hahaʼi mai te tai+ mo te ʼu tagata tauhi ʼo tana faga ovi?+
Kofea ia Ia ʼae neʼe ina tuku ki ai Tona laumalie maʼoniʼoni,+
12 Ia Ia ʼae ʼaki tona nima fakakololia neʼe tokoni ki te nima mataʼu ʼo Moisese,+
Ia Ia ʼae neʼe ina vaeluaʼi te ʼu vai ʼi ʼonatou muʼa+
Ke manatuʼi ai tona huafa ʼo heʼe gata,+
13 Ia Ia ʼae neʼe ina taki natou ʼi ni vai tokakovi,*
ʼO mole natou tukia ai ʼi tanatou haʼele,
Ohage ko he hosi ʼi te vao?*
14 Neʼe fakamalolo ai natou e te laumalie ʼo Sehova,+
Ohage ko he taki ʼo he faga manu ki te potu fenua laulelei.”
Neʼe feia tau takitaki tau hahaʼi,
Ke taulekaleka tou huafa.+
15 Ke ke haga mai mai te lagi mo sio,
Mai tou nofoʼaga taulekaleka, mo taputapu pea mo fakakololia.
ʼE mole kei ke fakaha mai kia matou.*
16 Ko koe tamatou Tamai.+
Tatau aipe pe ʼe mole iloʼi matou e Apalahamo,
Peʼe mole tokagaʼi matou e Iselaele,
Kae Sehova e, ko koe tamatou Tamai.
Neʼe ke totogi matou ʼi te temi muʼa, ko tou huafa ʼaia.+
17 Sehova e, he koʼe ʼe ke tuku ke matou hehe mamaʼo ʼi ʼou ala?
He koʼe ʼe ke tuku ke matou lotofefeka ʼo mole matou manavasiʼi ai kia te koe?+
Toe liliu mai ke fua lelei ki ʼau kaugana,
He ʼe ʼa koe te ʼu telepi ʼaia.+
18 Neʼe mole fualoa te maʼu e tau hahaʼi maʼoniʼoni ia te fenua.
Neʼe molomoloki e ʼomatou fili tou sagatualio.+
19 Kua fualoa ʼaupito tamatou hage ko natou ʼae neʼe mole ke ʼafio ki ai,
Ohage ko natou ʼae neʼe heʼeki natou fua tou huafa.
64 Ka na pau la neʼe ke haeʼi te lagi mo hifo mai,
ʼO fakagalulu te ʼu moʼuga,
2 Ohage ko te ulo ʼo he afi ʼi te fafie
Pea mo fakapula te vai,
ʼE iloʼi anai e ʼou fili tou huafa,
Pea ʼe tekelili anai te ʼu puleʼaga ʼi ʼou muʼa!
3 ʼI te temi ʼae neʼe ke fai ai ni meʼa fakaofoofo neʼe mole matou ʼamanaki ki ai,+
Neʼe ke hifo mai pea neʼe galulu te ʼu moʼuga ʼi ʼou muʼa.+
4 Neʼe mole heʼeki logo peʼe iloʼi e he tahi te meʼa ʼaeni,
Pea neʼe mole heʼeki sio he tahi ki he tahi age ʼAtua ia koe,
ʼAe ʼe gaue ʼo ʼuhiga mo natou ʼae ʼe haga talitali* kia te koe.+
5 Neʼe ke felaveʼi mo natou ʼae ʼe natou fai fakafiafia te meʼa ʼae ʼe totonu,+
Ia natou ʼae ʼe natou manatuʼi ia koe pea mo mulimuli ʼi ʼou ala.
Neʼe ke ita he neʼe hoko atu pe tamatou agahala,+
Pea neʼe fualoa tamatou fakahoko te faʼahi ʼaia.
ʼE tuha koa mo matou te haofaki?
6 Kua matou liliu fuli ohage ko he tahi ʼe heʼe maʼa,
Pea ko ʼamatou gaue faitotonu fuli ʼe hage ko he kie ʼe ʼuli ʼuhi ko te mahaki fakafafine.+
Ko matou fuli ʼe matou fefe anai ohage ko he lau,
Pea ʼe matou viligia anai ʼuhi ko ʼamatou hala.
7 ʼE mole pauʼi pe la he tahi ki tou huafa,
ʼE mole gaugaue pe la he tahi ʼo faiga ke ina taʼofi koe,
Koteʼuhi kua ke haga kehe ia matou+
Pea kua ke fakalotovaivaiʼi ia matou ʼuhi ko tamatou hala.
8 Kae Sehova e, ʼi te temi nei, ko koe tamatou Tamai.+
9 Sehova e, ʼaua naʼa ke itaita,+
Pea ʼaua naʼa ke manatuʼi ʼo talu ai tamatou hala.
Fakalelei siʼou loto, sio mai he ʼe ko matou fuli ko tau hahaʼi.
10 Kua liliu ʼou kolo taputapu ko he toafa.
Kua liliu ia Sione ko he toafa,
Kua tuʼu lavaki ia Selusalemi.+
11 Kua tutu
Tomatou ʼapi* taputapu mo fakakololia,
ʼAe neʼe vikiʼi ai koe e ʼamatou kui,+
Pea kua maumauʼi te ʼu meʼa fuli ʼae neʼe matou leleiʼia.
12 Sehova e, ʼe fualoa anai koa tau nofo noa ia muʼa ʼo te ʼu meʼa fuli ʼaia?
ʼE ke nofo fakalogologo anai koa ʼo ke tuku matou ʼi he toe mamahi?+
65 “Neʼe au tuku ke fakaovi mai ia natou ʼae neʼe mole fia palalau mai,
Neʼe au tuku ke maʼu au e natou ʼae neʼe mole natou kumi au.+
Pea neʼe au ui ki he puleʼaga neʼe mole pauʼi ki toku huafa: ‘Koʼeni au!’+
2 ʼI te ʼaho katoa, ʼe au faoʼi ʼoku nima ki he hahaʼi ʼe uigataʼa,+
Ki he hahaʼi ʼe haʼele ʼi te ala ʼae ʼe mole lelei+
Pea ʼe natou faʼifaʼitaliha,+
3 Ki he hahaʼi ʼe natou fakamamahiʼi tuʼumaʼu au+
ʼI tanatou momoli ni sakilifisio ʼi te ʼu ʼoloto+ pea mo fakakohu ni sakilifisio ʼe natou momoli ʼi ni piliki.
4 ʼE natou heheka ʼi te ʼu fale maka+
Pea ʼi te poʼuli ʼe natou nonofo ʼi ni nonoʼaga.*
ʼE natou kai puaka+
Pea ʼi ʼanatou pa, ʼe maʼu ai ni meʼa fakalialia* neʼe haka.+
5 ʼE natou ui: ‘Tuʼu maʼu, ʼaua tau fakaovi mai.
ʼE au maʼoniʼoni age ia koe.’*
ʼE natou hage ko he kohu ʼi ʼoku poga ihu, ko he afi ʼe ulo ʼi te ʼaho katoa.
6 Koʼeni, kua tohi ʼi ʼoku muʼa,
ʼE mole au fakalogologo anai,
Kae ʼe au fakatuʼā anai natou,+
ʼEi, ʼe au fakatuʼā moʼoni anai ia natou
7 ʼUhi ko ʼanatou hala pea mo te ʼu hala ʼo ʼanatou kui,”+ ko te ui ʼaia ʼa Sehova.
“Neʼe natou fakakohu ni sakilifisio ʼi te ʼu moʼuga,
ʼO natou fakalainoaʼi au ʼi te ʼu kiʼi moʼuga,+
Koia ʼe au ʼuluaki liufaki age anai te meʼa ʼae ʼe tuha mo natou.”
8 Koʼeni te folafola ʼa Sehova:
“Ohage pe ko te kei maʼu ʼo he fuhiga vite ʼe fai ʼaki he vino foʼou mo ui ai e he tahi:
‘ ʼAua naʼa ke maumauʼi he ʼe maʼu ai he meʼa ʼe lelei,’*
ʼO toe feia pe, ʼe au gaue anai maʼa ʼaku kaugana,
ʼE mole au pulihi fuli anai natou.+
9 ʼE au fakatupu anai he hakoga ʼo Sakopo,
Pea mai Suta, ia ia ʼae ka ina maʼu ʼoku moʼuga.+
ʼEi, ʼe maʼu anai e natou ʼae neʼe au filifili,
Pea ʼe nonofo ai anai ʼaku kaugana.+
10 ʼE liliu anai ia Salona+ ko he koga meʼa lunaʼia maʼa te faga ovi,
Mo te Potu Fenua Laulelei ʼo Akole+ ko he maloloʼaga maʼa te faga pipi,
Ke fua lelei ki taku hahaʼi ʼae ʼe natou kumi au.
11 Kae ko koutou ʼae ʼe kotou lituʼa kia Sehova,+
ʼAe ʼe kotou galoʼi toku moʼuga taputapu,+
Mo teuteuʼi he laupapa ki te ʼatua ʼo te Manuʼia*
Pea mo fakafonu ni ipu vino kua fio ki te ʼatua ʼae ʼe ina puleʼi te mataʼi tohi ʼo te hahaʼi.
12 Koia ʼe au tuku anai ke kotou mamate ʼi te heleta,+
Pea ʼe kotou tuʼutuli fuli anai ke matehi koutou,+
Koteʼuhi neʼe mole kotou tali mai ʼi taku pauʼi atu,
Pea neʼe mole kotou fakalogo ʼi taku palalau atu.+
Neʼe kotou haga fai pe koutou te meʼa ʼae ʼe kovi ki ʼoku mata
Pea neʼe kotou filifili te meʼa ʼae ʼe au fehiʼa ki ai.”+
13 Koʼeni te folafola ʼa te Tuʼi ʼAliki ko Sehova:
“Koʼeni, ʼe kakai anai ʼaku kaugana, kae ʼe kotou pakupaku koutou.+
ʼE iinu anai ʼaku kaugana,+ kae ʼe kotou fia iinu koutou.
ʼE fiafia anai ʼaku kaugana,+ kae ʼe kotou ufiufi koutou.+
14 ʼE kalaga fakafiafia anai ʼaku kaugana ʼuhi ko te lelei ʼo tonatou loto,
Kae ʼe kotou kalaga anai koutou ʼuhi ko te mamahi ʼo tokotou loto,
Pea ʼe kotou tagilaulau anai ʼuhi ko tokotou lotovaivai.
15 ʼE kotou tuku anai he higoa ka fakaʼaogaʼi e natou ʼae neʼe au filifili moʼo faitutuku,
Pea ʼe matehi anai koutou fuli e te Tuʼi ʼAliki ko Sehova,
Kae ʼe ina foaki anai he tahi higoa ki ʼana kaugana.+
16 Koia, ko he tahi pe ʼe ina kumi anai he tapuakina ʼi te kele
ʼE tapuakiʼi anai e te ʼAtua ʼo te moʼoni,*
Pea ko he tahi pe ʼe ina fai he fakapapau ʼi te kele
17 Koʼeni, ʼe au fakatupu he lagi foʼou mo he kele foʼou.+
ʼE mole toe manatuʼi anai te ʼu meʼa ʼae kua hili,
Pea ʼe mole toe hake anai ʼi he loto.+
18 Koia kotou fakafiafia pea kotou fiafia tuʼumaʼu ʼi te meʼa ʼae ʼe au fakatupu.
Koʼeni, ʼe au fakatupu ia Selusalemi ke liliu ko he matapuna ʼo te fiafia,
Pea mo tana hahaʼi ke liliu ko he matapuna ʼo te fakafiafia.+
19 ʼE au fiafia anai ʼo ʼuhiga mo Selusalemi pea mo fakafiafia ʼo ʼuhiga mo taku hahaʼi.+
ʼE mole toe logo anai ki ni tagilaulau peʼe ko ni kalaga ʼuhi ko te lotomamahi.”+
20 “ ʼI te koga meʼa ʼaia, ʼe mole toe maʼu anai he kiʼi toe meamea ʼe maʼuli pe ʼi ni kiʼi ʼaho,
Peʼe ko ni matuʼa ʼe mole kaku ki tonatou temi vaivai.
ʼE ui anai neʼe tupulaga ia ia ʼae ʼe mate ʼi tona taʼu teau,
Pea ʼe fakamalaʼia anai te tagata agahala tatau aipe pe kua taʼu teau.*
21 ʼE natou laga anai ni ʼapi mo natou nofoʼi,+
ʼE natou to anai ni gaueʼaga vite mo natou kai ʼona fua.+
22 ʼE mole natou laga anai ke nofoʼi e he tahi kehe,
ʼE mole natou to anai ke kai e niʼihi kehe.
ʼE lahi anai te ʼu ʼaho ʼo taku hahaʼi ohage ko te ʼu ʼaho ʼo he fuʼu ʼakau,+
Pea ʼe maʼu katoa anai e natou ʼae neʼe au filifili te ʼu fua ʼo ʼanatou gaue.
23 ʼE mole natou kinakina noa anai,+
ʼE mole maʼuli mamahi anai te ʼu fanau ʼae ka natou maʼu,
Koteʼuhi ko natou mo ʼanatou fanau+
Ko te hologa ʼae ʼe tapuakiʼi e Sehova.+
24 ʼE au tali anai kia natou ia muʼa ʼo tanatou pauʼi mai.
ʼE au fakahoko anai tanatou kole kae ʼe kei natou palalau.
25 ʼE kakai fakatahi anai te lupo mo te akeno,
ʼE kai anai e te laione ia te luna ohage ko te vitulo,+
Pea ʼe kai anai e te gata ia te efu.
ʼE mole hoko anai he meʼa ʼe kovi pea mo he maumau ʼi toku moʼuga taputapu katoa,”+ ko te ui ʼaia ʼa Sehova.
66 Koʼeni te folafola ʼa Sehova:
“Ko te lagi ko toku hekaʼaga fakahau, pea ko te kele ko toku hiliʼaga vaʼe.+
2 “Ko toku nima ʼae neʼe ina fakatupu te ʼu meʼa fuli ʼaia,
Pea neʼe tutupu fuli ai,” ko te ui ʼaia ʼa Sehova.+
“Koʼeni ia ia ʼae ka au haga ki ai,
Ia ia ʼae ʼe agavaivai mo lotomamahi, mo tekelili ki* taku folafola.+
3 Ko ia ʼae ʼe ina matehi he vitulo, ʼe hage pe ko ia ʼae ʼe ina matehi he tagata.+
Ko ia ʼae ʼe ina sakilifisioʼi he ovi, ʼe hage pe ko ia ʼae ʼe ina fasiʼi te kia ʼo he kuli.+
Ko ia ʼae ʼe ina momoli he meʼa ʼofa, ʼe hage pe ko ia ʼae ʼe ina momoli te toto ʼo he puaka!+
Ko ia ʼae ʼe ina momoli te iseso hina,+ ʼe hage pe ko ia ʼae ʼe ina tapuakiʼi ʼaki ni palalau fakamanamana.*+
Neʼe natou filifili pe ke natou mulimuli ki ʼonatou ala totonu
Pea ʼe natou fiafia pe ʼi te meʼa ʼae ʼe fakalialia.
4 Koia ʼe au filifili anai ni faʼahiga fakatuʼā kehekehe ʼo natou,+
Pea ko te ʼu meʼa ʼae ʼe natou tuʼania ki ai, ʼe au fakahoko anai kia natou,
Koteʼuhi neʼe mole tali mai he tahi ʼi taku pauʼi natou,
Pea neʼe mole fakalogo mai he tahi ʼi taku palalau kia natou.+
Neʼe natou haga fai pe natou te meʼa ʼae ʼe kovi ki ʼoku mata,
Pea neʼe natou filifili te meʼa ʼae neʼe au fehiʼa ki ai.”+
5 Kotou fagono ki te palalau ʼa Sehova, ia koutou ʼae ʼe tekelili ki* tana folafola:
“Ko ʼokotou tehina ʼae ʼe natou fehihiʼa mo kapu ia koutou ʼuhi ko toku huafa, ʼe natou ui: ‘Ke fakakololia kia Sehova!’+
6 ʼE haʼu he logoaʼa mai te kolo, he logoaʼa mai te fale lotu!
Ko te logoaʼa ʼaia ko Sehova ʼi tana liufaki ki ʼona fili te meʼa ʼae ʼe tuha mo natou.
7 Kua fanau te fafine ʼi muʼa ʼo tana mamahi fanau.+
Kua ina fanauʼi he tama ʼi muʼa ʼo te laga ʼo tona mamahi fanau.
8 Ko ai ʼae neʼe logo ki he meʼa feia?
Ko ai ʼae neʼe sio ki ni meʼa feia?
ʼE feala koa ke fakatupu he fenua ʼi he ʼaho ʼe tahi?
Peʼe fanauʼi fakafokifa koa he puleʼaga?
Kae ʼi te kamata ʼo tona mamahi, neʼe kua fanauʼi e Sione ʼana tama.
9 ʼE ui e Sehova: “ ʼE au tuku anai koa ke tuputupu te fanau ʼi te fatu kae mole fanauʼi mai?”
ʼE ui e tou ʼAtua: “Pe ʼe au taʼofi anai koa ʼi tona kamata fanauʼi mai?”
10 Kotou fakafiafia mo Selusalemi, ʼei, kotou fiafia mo ia,+ ia koutou fuli ʼae ʼe ʼoʼofa ia ia.+
Kotou fakafiafia mo ia, ia koutou fuli ʼae ʼe putu ʼo ʼuhiga mo ia,
11 He ʼe ina fafaga anai koutou ohage ko tona fai e he faʼe, ʼo kotou makokona ai mo fimalie.
ʼE kotou inu tuʼumaʼu anai mo fakafiafia ʼi te lahi ʼo tona kololia.
12 Koʼeni te folafola ʼa Sehova:
“ ʼE au foaki anai kia ia te tokalelei ohage ko he vai tafe,+
Pea mo te kololia ʼo te ʼu puleʼaga ohage ko te tatafe ʼo te ʼu vai.+
ʼE fafaga anai koutou ohage ko tona fai e he faʼe mo fua koutou ʼi te faʼahi vakavaka,
Pea ʼe fakahopohopo anai koutou ʼi te ʼu fuga tuli.
13 ʼE au haga fakapelepeleʼi anai koutou,
Ohage ko te fakapelepeleʼi e he faʼe tana tama.+
Pea ʼe fakapelepeleʼi anai koutou ʼo ʼuhiga mo Selusalemi.+
14 ʼE kotou sisio anai ki ai mo fiafia tokotou loto,
ʼE malohi anai ʼokotou hui ohage ko te luna foʼou.
ʼEi, ʼe fakaha anai e Sehova tona mafimafi ki ʼana kaugana,
Kae ko tona hauhau ki ʼona fili.”+
15 “ ʼE haʼu anai ia Sehova ohage ko he afi,+
ʼE hage anai ʼana saliote tau ko he afā,+
Moʼo fakatuʼā ʼi te kovi ʼo tona ita,
Moʼo fakatonutonuʼi ʼaki ni uloʼi afi.+
16 ʼE tauteaʼi anai e Sehova te hahaʼi fuli
ʼAki te afi mo tana heleta.
Pea ʼe kaugamalie anai ia natou ʼae ka matehi e Sehova.”
17 ʼE ui e Sehova: “Ko natou fuli ʼae ʼe natou fakamaʼa ia natou ke natou feulufi ki te ʼu ʼoloto+ ʼo tutuʼu ia tuʼa ʼo ia ʼae ʼe tuʼu ʼi te lotomalie,* ia natou ʼae ʼe kai puaka,+ mo ni meʼa fakalialia mo ni kuma,+ ko natou fuli ʼaia ʼe mamate anai. 18 ʼE au iloʼi ʼanatou gaue mo ʼanatou manatu. Koia ʼe au haʼu ai ʼo fakatahiʼi ni hahaʼi ʼo te ʼu puleʼaga mo te ʼu lea fuli, pea ʼe ʼomai anai ia natou ʼaia ʼo mamata ki toku kololia.”
19 “ ʼE au fakatuʼu anai he fakailoga ia natou pea ʼe au fekauʼi anai ʼihi ia natou ʼae neʼe hao ke olo ki te ʼu puleʼaga ʼae neʼe heʼeki natou iloʼi au pea neʼe mole natou mamata ki toku kololia, ia Talesisi,+ mo Pulu, mo Luto,+ te ʼu fenua ʼo te kau fainahau, mo Tupale, mo Savani+ pea mo te ʼu motu mamaʼo. ʼE natou kalagaʼi anai toku kololia ʼi te ʼu puleʼaga.”+ 20 ʼE ui e Sehova: “ ʼE natou fakamavae anai ʼokotou tehina fuli mai te ʼu puleʼaga fuli+ pea ʼe natou ʼaumai anai ohage ko he meʼa ʼofa kia Sehova ki toku moʼuga taputapu, ʼi Selusalemi, ʼi ni hosi, ʼi ni saliote tau, ʼi ni saliote punupunu, ʼi ni asino pea ʼi ni kamelo gaholo. ʼE hage anai ko te ʼaumai e te kau Iselaele ʼanatou meʼa ʼofa ʼi he ipu maʼa ki te fale ʼo Sehova.”
21 ʼE ui e Sehova: “ ʼE au toe toʼo anai ʼihi ke natou pelepitelo, pea ko ʼihi ke natou Levite.”
22 ʼE ui e Sehova: “Ohage pe ko te tuʼu ʼo talu ai ʼi ʼoku muʼa ia te lagi foʼou mo te kele foʼou+ ʼae ʼe au fakatupu, pea ʼe toe tuʼu feia pe anai ʼo talu ai tokotou hologa pea mo tokotou higoa.”+
23 ʼE ui e Sehova: “ ʼE ʼomai anai te hahaʼi fuli ʼo tulolo ʼi ʼoku muʼa,*
ʼI te tuʼu afiafi fuli ʼo te mahina mo te sapato fuli.”+
24 “ ʼE natou olo anai ʼo sioʼi te ʼu sino mate ʼo te ʼu tagata ʼae neʼe talagataʼa kia te au.
ʼE mole mamate anai te ʼugaga ʼae ʼi ʼonatou sino,
Pea ʼe mole mate anai te afi ʼae ʼe ina tutu natou.+
ʼE natou liliu anai ko he meʼa fakalialia ki te hahaʼi fuli.”
Ko tona fakaʼuhiga “Te Haofaki ʼa Sehova.”
Peʼe “ ʼe mole iloʼi e Iselaele tona pule.”
Peʼe “faiakonaki.”
Vakaʼi Te ʼu Kupu.
Peʼe “ ʼotaʼota.”
Peʼe “tau piele ʼae neʼe fai ʼaki te fulumeto.”
ʼE mahino ia, ko ni fuʼu ʼakau mo ni ʼoloto ʼe fai ai te tauhi taula ʼatua.
Peʼe “faiakonaki.”
ʼE ko he ʼu meʼa fakateuteu ʼe hage ko te tapaʼi fagogo ʼo te mahina.
Vakaʼi Te ʼu Kupu.
ʼE fakaʼuhiga ki te lainoa ʼae ʼe tupu ʼi te nofo selipatea mo hala fanau.
Hep. “fale.”
Vakaʼi Te ʼu Fakamahino 2.14.
Vakaʼi Te ʼu Fakamahino 2.14.
Vakaʼi Te ʼu Fakamahino 2.14.
Vakaʼi Te ʼu Kupu.
Peʼe “te kau ʼaliki.”
Peʼe “fakatuʼutuʼu,” peʼe “tonu.”
Peʼe “faiakonaki.”
Peʼe “pou fakailoga.”
Hep. “fale.”
Peʼe “hakoga.”
Peʼe lagi “ina.”
Hep. “te fale.”
Ko tona fakaʼuhiga “ ʼE Toe Liliu Mai Anai Te Toega ʼo Te Hahaʼi.”
Peʼe lagi “fakamatakuʼi.”
Vakaʼi Te ʼu Kupu.
Ko tona fakaʼuhiga “ ʼE Nofo Te ʼAtua Mo Matou.”
Peʼe “tafega vai.”
Peʼe “vai tafe.”
ʼE fakaʼuhiga ki te Efalate.
ʼE lagi fakaʼuhiga “ ʼE Alu Vave ʼo Kaihaʼa Te ʼu Koloa.”
ʼE fakaʼuhiga ki te ʼohoana ʼo Esaia.
ʼE fakaʼuhiga ki te Efalate.
Ko tona fakaʼuhiga “ ʼE Nofo Te ʼAtua Mo Matou.”
“ ʼE nofo te ʼAtua mo matou” ko te fakaʼuhiga ʼo te higoa Fakahepeleo ko Emanuele. Vakaʼi ia Esa 7:14; 8:8.
Peʼe “Taupau lelei.”
Peʼe “ ʼE au talitali anai mo he fakaʼamu lahi.”
ʼE fakaʼuhiga ki te ʼAtua.
Peʼe “puleʼaga.”
Peʼe “tona puleʼaga.”
ʼE fakaʼuhiga ki Iselaele.
Peʼe lagi “te lau palema.”
Peʼe “hahaʼi aposita.”
Peʼe “ ʼaho ʼo te tautea.”
Peʼe “aposita.”
ʼE fakaʼuhiga kia natou ʼae ʼe kau mo te tagata Asilia.
ʼE fakaʼuhiga ki te tagata Asilia.
Peʼe “tautea.”
ʼE lagi fakaʼuhiga ki te faʼahiga lolo ʼo te ʼu taume ʼa te ʼu tagata ʼa Seteone ʼe toko 300, peʼe ko te lolo ʼae neʼe fakaʼaogaʼi moʼo fakanofo ʼaki te ʼu hau ʼo Iselaele.
ʼE fakahagahaga ki te “vaʼa” mo te “huli” ʼo te vaega 1.
Peʼe lagi “ ʼE kakai fakatahi anai te ʼuhiʼi pipi mo te laione.”
Peʼe “pou fakailoga.”
Peʼe “ ʼE natou kumi anai ia ia.”
ʼE fakaʼuhiga ki Papilonia.
Peʼe “pou fakailoga.”
Peʼe “fakamamaha.”
ʼE fakaʼuhiga ki te Efalate.
Peʼe lagi “ ʼe ina taʼi anai ʼo maga fitu.”
ʼI te Fakahepeleo, ʼe tuʼu ʼi heni te fakanounou ʼo te huafa ʼo Sehova.
Hep. “fetapa ki.”
Peʼe “faimaholo.”
Hep. “fafine ʼo.” ʼE fakata te hahaʼi e he fafine.
Peʼe “pou fakailoga.”
Peʼe “pupuga fetuʼu ʼo Kesile.” ʼE lagi fakaʼuhiga ki Olione mo te ʼu pupuga fetuʼu ʼi ʼona tafaʼaki.
Peʼe lagi “te ʼu temonio ʼae ʼe hage ko he ʼu tao.”
Peʼe “ ʼonatou pule gaue.”
Vakaʼi Te ʼu Kupu.
Hep. “Te ʼu tao tagata.”
Vakaʼi Te ʼu Kupu.
Vakaʼi Te ʼu Kupu.
Peʼe “vaʼa.”
Hep. “fale.”
Vakaʼi Te ʼu Kupu.
Vakaʼi Te ʼu Kupu.
Peʼe “ ʼofa agatonu.”
Peʼe “vaʼa ʼe lahi ai te ʼu fuaʼi vite kula.”
Peʼe lagi “He ʼe kaku atu te kalaga tau ki.”
Peʼe “ ʼe hoko ia taʼu ʼe tolu ohage ko tona lau totonu e te tagata gaue.”
Vakaʼi Te ʼu Kupu.
ʼE fakaʼuhiga ki te kolo ʼae neʼe tauhi ai ki te ʼAtua.
Peʼe “ ʼatua matapule.”
Peʼe “pou fakailoga.”
Peʼe lagi “sioʼi mai.”
Peʼe “fai ni kie hina.”
Peʼe “Memifisi.”
Peʼe “Neʼe kakaʼi te kau tama ʼaliki ʼo Nofi.”
Peʼe lagi “te lau palema.”
ʼE fakaʼuhiga ki te lea Fakahepeleo.
Peʼe “te pule ʼo te foʼi kautau.”
Vakaʼi Te ʼu Kupu.
Vakaʼi te nota ia 1Sa 19:24.
ʼE mahino ia, ʼe fakaʼuhiga ki te potu fenua ʼo Papilonia ʼafeā.
ʼE lagi fakaʼuhiga ki Papiloni.
Ko tona fakaʼuhiga “Fakalologo.” Ko te higoa ʼo Etome ʼi te lea fakapolofeta.
Peʼe “ ʼe hoko ʼi he taʼu ʼe tahi ohage ko tona lau totonu e te tagata gaue.”
ʼE lagi fakaʼuhiga ki Selusalemi.
ʼE lagi ko he palalau fakatuketuke ʼe fakaʼuhiga ki te ʼofa peʼe ko te manavaʼofa.
Peʼe “te kau heka hosi.”
Peʼe “teuteuʼi.”
Peʼe “te kau heka hosi.”
Vakaʼi Te ʼu Kupu.
Hep. “nofoʼaga.”
Hep. “pulapula.”
Ko he tafega vai ʼo te Nile.
Peʼe lagi “he ʼuafu.”
Peʼe “kele.”
Peʼe lagi “magemage.”
Peʼe “fuakava ʼafeā.”
Peʼe lagi “maha.”
Peʼe “potu uesite.”
Peʼe “potu esite.”
ʼE fakaʼuhiga ki Moape.
Hep. “ ʼou.”
ʼE lagi fakaʼuhiga ki te ʼAtua.
Peʼe lagi “ ʼae ʼe tuʼu malohi ʼanatou manatu.”
ʼI te Fakahepeleo, ʼe tuʼu ʼi heni te fakanounou ʼo te huafa ʼo Sehova.
Peʼe “totonu.”
Peʼe lagi “te hahau ʼo te vao.”
Vakaʼi Te ʼu Kupu.
ʼE mahino ia, ʼe fakaʼuhiga ki Iselaele, ʼe fakatatau ki he fafine peʼe ko he gaueʼaga vite.
Peʼe “fakamolemole.”
Vakaʼi Te ʼu Kupu.
ʼE fakaʼuhiga ki te Efalate.
Vakaʼi Te ʼu Kupu.
ʼE mahino ia, ʼe fakaʼuhiga ki te kolo muʼa ko Samalia.
Peʼe “fialahi.”
Peʼe “fialahi.”
Hep. “maea moʼo fakafuafua.”
Peʼe lagi “fakahoko he meʼa neʼe ha.”
Vakaʼi Te ʼu Kupu.
Peʼe “maea moʼo fakafuafua.”
Vakaʼi Te ʼu Kupu.
Peʼe lagi “Ka kita mahino, ʼe lahi anai takita mataku.”
Peʼe “kele.”
Ko he faʼahiga fulumeto ʼe mole faʼa lelei neʼe to ʼi Esipito ʼo te temi muʼa.
Peʼe “fakatonutonuʼi,” peʼe “fakatuʼā.”
Peʼe “tana aga fakapotopoto.”
ʼE lagi fakaʼuhiga “Te Tafuga Afi ʼo Te ʼAletale ʼo Te ʼAtua.” ʼE mahino ia, ko Selusalemi.
Hep. “ ʼo ʼau matapule.”
Hep. “ ʼae ʼe ina fakatonutonuʼi.”
Ko tona fakaʼuhiga, ʼe mole toe ufiufi mo lotomamahi anai.
Peʼe “faiakonaki.”
Peʼe lagi “tane vai.”
Peʼe “pou fakailoga.”
Peʼe “ ʼae ʼe natou talitali kia te ia mo he fakaʼamu lahi.”
ʼE fakaʼuhiga ki te ʼAtua.
Peʼe “ukamea neʼe haka.”
Peʼe lagi “pea ʼe ke fakaʼuhiga anai natou ko ni ʼotaʼota.”
Peʼe “tana manava.”
Ko he palalau fakata ʼe fakaʼuhiga ki he tutuʼaga meʼa, ʼe ina fakata te fakaʼauha.
Peʼe “pou fakailoga.”
Peʼe “afi.”
Peʼe “ ʼe lotofoaki.”
Peʼe “lotofoaki.”
Vakaʼi Te ʼu Kupu.
ʼE mahino ia, ʼe fakaʼuhiga ki he kiʼi moʼuga ʼi Selusalemi.
Peʼe “veteki.”
Peʼe lagi “Ko te koloa ʼaia ʼe ina foaki.”
ʼE fakaʼuhiga ki te fili.
Peʼe lagi “magemage.”
Hep. rouaḥ. Vakaʼi Te ʼu Kupu.
Peʼe “aposita.”
Peʼe “ ʼE ke metitasio anai ʼi tou loto ki.”
ʼE lagi fakaʼuhiga ki te ʼu tafega vai ʼo Potisela, te kolo muʼa ʼo Etome.
ʼE hage ko te kolota.
Hep. “ ʼE ina fakafuafua anai.”
Peʼe lagi “te ʼu temonio ʼae ʼe hage ko he ʼu tao.”
Peʼe “te pule ʼo te ʼu tagata pule ʼo te vino.”
Peʼe “Fakasilia.”
Vakaʼi Te ʼu Kupu.
Vakaʼi Te ʼu Kupu.
Peʼe “laukovi.”
Hep. “ ʼe au tuku anai he laumalie kia ia.”
Peʼe lagi “ ʼi te vaha ʼo te ʼu.”
Peʼe “tafega vai ʼo te Nile.”
Hep. “fai.”
Peʼe “te fua ʼo te pulapula ʼae neʼe maluku ifo.”
Peʼe “fale lotu.”
Neʼe lagi fakaʼaogaʼi te ʼu mata tuʼuga ʼaia moʼo lau te temi, ʼaki te vakaʼi ʼo te tuʼuʼaga ʼo te malu.
Vakaʼi Te ʼu Kupu.
ʼI te Fakahepeleo, ʼe tuʼu ʼi heni te fakanounou ʼo te huafa ʼo Sehova.
ʼI te Fakahepeleo, ʼe tuʼu ʼi heni te fakanounou ʼo te huafa ʼo Sehova.
ʼE fakaʼuhiga ki te ʼu folafola mo te ʼu gaue ʼa te ʼAtua.
Peʼe “toʼo ʼaku agahala fuli ʼi ʼou muʼa.”
Vakaʼi Te ʼu Kupu.
Peʼe “palalau fakapelepele ki.”
Peʼe “maʼu liuga lua.”
Peʼe “tonatou ʼofa agatonu.”
Peʼe lagi “neʼe mahino ki.”
Peʼe “te Lipane ke maʼu ai he fafie.”
Peʼe “te kau takitaki.”
Peʼe “te potu esite.”
Ko tona fakaʼuhiga, neʼe vaivai mo hala puipui.
Peʼe “te potu esite.”
Hep. “fetapa anai ki.”
Peʼe “faiakonaki.”
Peʼe “vaevae toku kololia mo.”
Peʼe “kele moamoa.”
Peʼe “faiakonaki.”
Peʼe “faiakonaki.”
ʼE lagi fakaʼuhiga ki te ʼu ʼuluaki meʼa ʼae ka hoko ʼi te ka haʼu.
Vakaʼi Te ʼu Kupu.
ʼE lagi fakaʼuhiga ki te kau faiako ʼo te Lao.
Ko tona fakaʼuhiga “Ko Ia ʼAe ʼe Faitotonu.” Ko he higoa fakatuʼulaga ʼo Iselaele.
ʼE fakaʼuhiga ki te ʼu fakatata.
Peʼe “sagatualio.”
Peʼe “mai te potu esite ki te potu uesite.”
Peʼe lagi “Peʼe ui anai koa e te kele: ‘ ʼE mole ʼi ai ni kave ʼi tau gaue’?”
Peʼe lagi “kau gaue.”
Peʼe lagi “te hahaʼi faifakatau.”
Peʼe lagi “fakatupu ke tuʼu lavaki.”
Peʼe “taula ʼatua.”
ʼE fakaʼuhiga ki te ʼu taula ʼatua ʼae ʼe hili ki te ʼu manu.
Peʼe “potu esite.”
Peʼe lagi “mole au agalelei anai moka au felaveʼi mo he tahi.”
Peʼe lagi “Logope la.”
Peʼe lagi “vahe.”
Peʼe lagi “ ʼe hihifo mai ia.”
Peʼe “sivi.” Peʼe lagi “filifili.”
Peʼe “vaevae toku kololia mo.”
Peʼe “ ʼae ka ina fakamauʼi au ʼi te faitotonu.”
Peʼe lagi “ ʼi te ʼu kiʼi moʼuga lauʼatea.”
Peʼe “pou fakailoga.”
Vakaʼi Te ʼu Kupu.
Peʼe lagi “fakalotomalohiʼi ia.”
Peʼe “fehagaʼaki.”
Peʼe “malohi.”
Peʼe “akonaki.”
Peʼe lagi “kai e te ʼugaga.”
Vakaʼi Te ʼu Kupu.
Peʼe “malo.”
Peʼe “ ʼE mole fegufi anai.”
Peʼe lagi “te meʼa ʼae neʼe matou logo ki ai.”
Hep. “te nima.”
ʼE fakaʼuhiga ki he tahi pe, peʼe ko te ʼAtua.
Peʼe lagi “Neʼe hage ko he tahi ʼe tou haga kehe mai ai.”
Peʼe “tona faʼahiga maʼuli.”
Peʼe “molehi.”
Peʼe “tamateʼi.”
Peʼe “sakilifisio ki te lakahala.” Vakaʼi te kupu “Sakilifisio fakatokatoka” ʼi Te ʼu Kupu.
Peʼe “fanau.”
Peʼe “pule.”
Peʼe “pule.”
Peʼe “fanau.”
Peʼe “fanau.”
Peʼe “kakava.”
ʼE fakaʼuhiga kia Sakopo peʼe ko Iselaele.
Peʼe “fakamolemole anai ki ai mo he lotolelei.”
Peʼe “loto ki ai.”
Vakaʼi Te ʼu Kupu.
ʼE fakaʼuhiga ki te mate.
Peʼe lagi “Ke hao ʼi.”
ʼE fakaʼuhiga ki ʼonatou fale maka.
Vakaʼi Te ʼu Kupu.
Vakaʼi Te ʼu Kupu.
Hep. “fakamanatu.”
ʼE lagi fakaʼuhiga ki he tauhi taula ʼatua.
Peʼe lagi “ki te hau.”
Vakaʼi Te ʼu Kupu.
Hep. “Neʼe mole ke fiu.”
ʼE fakaʼuhiga ki te agahala ʼa Iselaele.
Vakaʼi Te ʼu Kupu.
Peʼe “aga fakahagatonu.”
Peʼe “aga fakahagatonu.”
Peʼe “ ʼae neʼe malo ai.”
Peʼe “malo.”
Peʼe “pou fakailoga.”
Peʼe lagi “kula mamaʼa.”
ʼE fakaʼuhiga ki te ʼAtua.
Peʼe “neʼe au malo ai ʼaki toku nima.”
Peʼe “te ʼaselo ʼae ʼe tuʼu ʼi ʼona muʼa.”
Peʼe “loloto.”
Peʼe “te toafa.”
Hep. “au.”
Peʼe “ ʼe kataki ʼo talitali.”
Peʼe “ko koe ʼae neʼe ke faʼu matou.”
Peʼe “fale lotu.”
Peʼe lagi “pola moʼo leʼoleʼo.”
Peʼe “heʼe maʼa.”
Peʼe lagi “ ʼE au tuku atu anai toku maʼoniʼoni.”
Hep. “he tapuakina.”
Peʼe “Lasio.”
Peʼe “agatonu.” Hep. “Ameni.”
Peʼe “agatonu.” Hep. “Ameni.”
Peʼe “fihifihia.”
Peʼe lagi “Pea ʼe ui anai ʼe malaʼia ia ia ʼae ʼe heʼeki kaku ki tona taʼu teau.”
Peʼe “tuʼania ʼo ʼuhiga mo.”
Peʼe lagi “vikiʼi he taula ʼatua.”
Peʼe “tuʼania ʼo ʼuhiga mo.”
ʼE fakaʼuhiga ki te ʼAtua.
ʼE fakaʼuhiga ki ni ʼoloto neʼe fai ai he tauhi taula ʼatua. Ko “ia ʼae ʼe tuʼu ʼi te lotomalie” lagi ko he fakatata.
Peʼe “atolasio kia te au.”