Tou Tauhi Kia Sehova ʼAki He Loto Faka Sakilifisio
“Kapau ʼe fia muli mai he tahi ia te ʼau, ke fakafisi ia kia ia totonu pea ke ina toʼo tona pou fakamamahi pea ke muli tuʼumaʼu ia te ʼau.” — Mateo 16:24.
1. Neʼe feafeaʼi te fakahā e Sesu te kua ōvi mai ʼo tona mate?
ʼI TE ʼeu koga meʼa ʼo te moʼuga ʼo Helemone ʼaē ʼe niveʼia tona tumutumu, ʼe kaku ia Sesu Kilisito ki te lakaga maʼuhiga ʼo tona maʼuli. ʼE mole kei maʼu he taʼu katoa pea hoko tona mate. Ko ia ʼe ina ʼiloʼi kae ko tana kau tisipulo ʼe mole nātou ʼiloʼi te faʼahi ʼaia. Kua hoko mai leva te temi ʼaē ke ina fakaʼilo kia nātou. ʼE moʼoni, neʼe kua talanoa ia Sesu ki tona mate ʼi muʼa atu, kae ko tana hoki fakamahinohino leleie (Mateo 9:15; 12:40). ʼE tou lau fēnei ʼi te tohi ʼa Mateo: “Pea talu mai te lakaga ʼaia, neʼe kamata fakahāhā ai e Sesu ki ʼana tisipulo ʼe tonu kia te ia ke ʼalu ki Selusalemi, ʼo tali te ʼu mamahi lahi mai te kau tagata ʼāfea pea mo te kau pelepitelo pule pea mo te kau sekelipa, pea ʼe matehi ai pea mo toe fakatuʼuake ʼi te tolu ʼaho.” — Mateo 16:21; Maleko 8:31, 32.
2. Neʼe feafeaʼi te aga ʼa Petelo ʼi te fakahā age e Sesu te mamahi ka ʼamanaki hoko kia ia, pea neʼe koteā te tali ʼa Sesu?
2 ʼE kei toe pe te kiʼi temi siʼisiʼi ʼa Sesu pea hoko tona mate. Koia, ko Petelo ʼe ōfo ʼi te taʼi manatu ʼaia ʼe hage ʼe heʼeʼaoga. ʼE mole ina tali te manatu ʼaē ko te Mesia ʼe matehi anai. Koia, ʼe fakafihiʼi e Petelo ʼo akonakiʼi tana Pule. ʼI te uga ʼo ia e te ʼu manatu lelei, ʼe ina fakatotonu fakamālohi: “Agalelei kia te koe, ʼAliki; kailoa, ʼe mole hoko anai kia te koe he meʼa feiā.” Kae ko Sesu neʼe ina tekeʼi te agalelei ʼa Petelo ʼaē neʼe tuʼu kovi, ʼio ohage ko he tahi ʼe ina moloki te ʼulu ʼo he gata kafo kona. “Haʼu ʼi ʼoku tuʼa, Satana! ʼE ko koe ko te maka fakatupu tūkia kia te ʼau, heʼe mole ke maʼu te ʼu manatu ʼa te ʼAtua, kae ko te ʼu manatu ʼa te tagata.” — Mateo 16:22, 23.
3. a) Neʼe feafeaʼi te fakaliliu e Petelo ia ia totonu kae mole ko tona loto ʼaia ko he meʼa gāue ʼa Satana? b) Neʼe feafeaʼi te liliu ʼa Petelo ko he maka faka tūkia ki te fakaʼaluʼalu ʼo te faʼahiga maʼuli faka sakilifisio?
3 Ko Petelo neʼe ina fakaliliu ia ia totonu, kae mole ko tona loto ʼaia, ko he meʼa gāue ʼa Satana. Ko te tali ʼa Sesu neʼe fai ʼaki he lototoʼa ohage ko tana tali kia Satana ʼi te toafa. ʼI ai ko te Tevolo neʼe ina faigaʼi te fakahalaʼi ia Sesu ʼaki he maʼuli fīmālie, ko he tuʼulaga faka hau kae mole kinakina tona maʼu (Mateo 4:1-10). ʼI te temi nei, ko Petelo ʼe ina fakaloto mālohiʼi ia ia ke fakafīfīmālie. ʼE ʼiloʼi e Sesu ʼe mole ko te finegalo ʼaia ʼo tana Tāmai. Ko tona maʼuli ʼe tonu ko he maʼuli faka sakilifisio, kae mole ko he maʼuli fakafīfīmālie (Mateo 20:28). Ko Petelo kua liliu ia ko he maka fakatupu tūkia ki te fakaʼaluʼalu ʼaia; ko te faka ʼuhiga tonu ʼo tona agalelei ko he helea. Koia, ʼe mahino lelei ai ia Sesu kapau neʼe ina fai he fakakaukau ke maʼuli ʼo hāo mai te sakilifisio, neʼe feala pe ke hāla mai te ʼofa ʼo te ʼAtua ʼi tana to ʼaē ki te mate ʼi te pipiki ki he hele ʼa Satana.
4. He koʼe koa ko te maʼuli fakafīfīmālie ʼe mole ko he maʼuli ʼaia maʼa Sesu mo tana kau tisipulo?
4 Koia, ko te manatu ʼa Petelo neʼe ʼaoga ke fakatonutonuʼi. Ko tana ʼu palalau ʼaē kia Sesu ʼe ina fakahā ko he fakakaukau fakatagata, kae neʼe mole ko te manatu ʼa te ʼAtua. Ko he maʼuli ʼi te fakafīfīmālie, ʼi he ʼaluʼaga ʼe hāo mai te mamahi, neʼe mole ko he maʼuli ia maʼa Sesu; ʼo toe feiā aipe ʼe mole ko he faʼahiga maʼuli maʼa tana kau tisipulo, koia neʼe ʼui ai e Sesu kia Petelo pea mo tana kau tisipulo: “Kapau ʼe fia muli mai he tahi ia te ʼau, ke fakafisi ia kia ia totonu pea ke ina toʼo tona pou fakamamahi pea ke muli tuʼumaʼu ia te ʼau.” — Mateo 16:24.
5. a) Koteā te faigataʼaʼia ʼe tau mo te faʼahiga maʼuli faka kilisitiano? b) Koteā te ʼu meʼa maʼuhiga e tolu ʼe tonu ke teuteu ki ai te kilisitiano?
5 Tuʼumaʼu aipe, ko Sesu neʼe toe liliu ki te kupu tāfito: te filifili ʼo te maʼuliʼi ʼo te maʼuli faka kilisitiano. Ko te kau kilisitiano, ʼi te ʼaluʼaga ʼo tanatou fia liliu ko he kau tisipulo ʼa Sesu, ʼe tonu ke nātou tauhi kia Sehova ʼaki he loto faka sakilifisio, ohage ko tonatou Pule (Mateo 10:37-39). Koia, ʼe ina lau meʼa e tolu ʼe tonu ke fai e he kilisitiano: 1) ke fakafisi kia ia totonu, 2) ke ina toʼo tona pou fakamamahi pea 3) ke mulimuli tuʼumaʼu ia te Ia.
“Kapau ʼe fia muli mai he tahi ia te ʼau”
6. a) ʼE feafeaʼi te fakafisi ʼa he tahi kia ia totonu? b) Ko ai ʼaē ʼe tonu ke tou fakafiafiaʼi, ia tatou totonu?
6 Koteā te fakafisi kia kita totonu? Ko he tahi ʼe fakafisi katoa kia ia totonu, ko tona faka ʼuhiga ʼe ina tali he faʼahiga mate kia ia totonu. Ko te ʼuhiga tāfito ʼo te kupu faka keleka ʼaē ʼe fakaliliu ki te “fakafisi” ʼe ko te “ ʼui kailoa”; ʼe faka ʼuhiga ki te “fakafisi katoa”. Koia, kapau ʼe koutou fili te maʼuli faka kilisitiano, ʼe feala takotou fakafisi katoa ki te ʼu meʼa ʼe koutou loloto kiai, tokotou fīmālie, takotou ʼu holi, takotou ʼu fiafia, te ʼu meʼa ʼe koutou loto kiai. Ko tona ʼuhiga tāfito, ʼe koutou foaki tokotou maʼuli katoa pea mo te ʼu meʼa fuli ʼa koutou ke fakapipiki kia Sehova. Ko te fakafisi kia kita totonu, ʼe faka ʼuhiga lahi age ia ʼi te fakafisi ʼaē ki he ʼu faʼahiga fiafia ʼi te temi nei ʼo feiā mo he temi pe. ʼE faka ʼuhiga ia ko he tahi ʼe tonu ke fakafisi ki tona ʼuhiga ʼo ia totonu maʼa Sehova (1 Kolonito 6:19, 20). Ko he tahi kua fakafisi kia ia totonu kua situʼa ki te fakafiafia ʼo ia totonu kae ke fiafia maʼa te ʼAtua (Loma 14:8; 15:3). ʼE faka ʼuhiga ʼi te temi fuli pe ʼo tona maʼuli, ʼe ina ʼui kailoa ki tana ʼu holi ʼo ia totonu kae ʼe ʼio kia Sehova.
7. Koteā te pou fakamamahi ʼa te kilisitiano, pea ʼe feafeaʼi tana fua?
7 Koia, ko te fua ʼo te pou fakamamahi ʼe ʼi ai tona ʼu ikuʼaga maʼuhiga. Ko te fua ʼo he pou ʼe ko he kavega pea mo he fakatā ʼaia ʼo te mate. Ko te kilisitiano kua ina tali te mamahi mokā ʼe hoko kiai, peʼe fakalainoaʼi peʼe fakamamahiʼi peʼe ʼave ki te mate ʼuhi pe heʼe ko ia ko te tisipulo ʼa Sesu Kilisito. Neʼe ʼui fēnei e Sesu: “Ko ʼaē ʼe mole ina tali tona pou fakamamahi pea mo muli mai ia te ʼau ʼe mole tau ia mo ʼau.” (Mateo 10:38). ʼE mole ko te hahaʼi fuli ʼaē ʼe nātou mamahi ʼaē ʼe nātou fua te pou fakamamahi. Ko te hahaʼi agakovi ʼe lahi tonatou ʼu “mamahi” kae mole ko te pou fakamamahi (Pesalemo 32:10). Kae, ko te maʼuli faka kilisitiano ʼe ko he maʼuli ʼo te fua tuʼumaʼu ʼo te pou fakamamahi ʼo te gāue faka sakilifisio maʼa Sehova.
8. Koteā te faʼifaʼitaki ʼi te maʼuli neʼe tuku e Sesu ki tana kau tisipulo?
8 Ko te ʼaluʼaga fakamuli ʼaē neʼe talanoa kiai ia Sesu ʼe ko te mulimuli tuʼumaʼu ia te ia. ʼE mole fakamaʼua pe e Sesu ke tou tali pea mo tui ki te meʼa ʼaē neʼe ina akonakiʼi kae ʼo feiā aipe, ʼi totatou maʼuli katoa, ke tou mulimuli tuʼumaʼu ki te faʼifaʼitaki ʼaē neʼe ina tuku mai. Pea koteā ʼihi ʼu faʼahi ʼi te ʼu potu maʼuhiga neʼe ʼiloga ʼi tona maʼuli? ʼI tana foaki te fakatotonu fakamuli ʼaē ki tana kau tisipulo, neʼe ina ʼui fēnei: “Koutou ʼolo pea mo koutou fai he kau tisipulo (...) ʼo koutou akonakiʼi ia nātou ke nātou taupau te ʼu meʼa fuli pe neʼe ʼau fakatotonu atu.” (Mateo 28:19, 20). Ko Sesu neʼe fagonogono pea neʼe ina akonakiʼi te logo lelei ʼo te Puleʼaga. Ko te meʼa ʼaia neʼe foimo fai e tana kau tisipulo, ʼi tona fakahagatonu, ʼi te kokelekasio katoa ʼo te temi muʼa. Ko te gāue ʼaia neʼe fai fakamalotoloto fakatahi kiai mo te mole nātou kau ʼaē ʼi te mālama, neʼe fakatupu ʼaki te fehiʼa pea mo te fakafeagai ʼa te mālama, ʼaē ko te fua ʼaia ʼo te ʼamo ʼo tanatou pou fakamamahi tatau aipe peʼe mamafa ʼaupito. — Soane 15:19, 20; Gāue 8:4.
9. Neʼe feafeaʼi te aga ʼa Sesu ki te hahaʼi?
9 Ko te tahi faʼahi maʼuhiga ʼo te maʼuli ʼo Sesu neʼe ko tana aga ʼaē ki te hahaʼi. Neʼe agalelei pea neʼe “agamālū pea mo agavaivai”. Koia, ko nātou ʼaē neʼe nātou fakalogo neʼe nātou logoʼi ʼe fakafoʼou nātou ʼi te laumālie pea mo fakaloto mālohiʼi ʼi tana ʼafio (Mateo 11:29). Neʼe mole ina fakakinauʼi nātou ke nātou muliʼi tona ala peʼe ina fakatuʼu he tuʼuga lao ʼo ʼuhiga mo te aga ʼaē ʼe tonu ke nātou fai; pea neʼe mole ina ʼai fakakinau ia nātou he loto ʼo tupu ai hanatou liliu ko hana kau tisipulo. Logope tanatou maʼuli faka sakilifisio, neʼe nātou tāu mo te fiafia fakamalotoloto. ʼE ko he toe kehekehe ia mo nātou ʼaē ʼe nātou maʼu te faʼahiga maʼuli fakamālama ʼo te loto faʼitaliha ʼe fakaʼiloga ʼaki “te ʼu ʼaho fakamuli”! — 2 Timoteo 3:1-4.
Tou tuputupu pea mo taupau te loto faka sakilifisio ʼa Sesu
10. a) Ohage ko tana fakamatala ia Filipe 2:5-8, neʼe feafeaʼi te fakafisi ʼa Kilisito kia ia totonu? b) Kapau ko tatou ko te kau tisipulo ʼa Kilisito, ʼe tonu ke feafeaʼi te ʼaluʼaga ʼo totatou faʼahiga manatu?
10 Ko Sesu totonu neʼe ina tuku te faʼifaʼitaki ʼi te fakafisi kia ia totonu. Neʼe ina toʼo tona pou fakamamahi pea mo ina haga fua aipe mo fai te finegalo ʼo tana Tāmai. Neʼe tohi fēnei e Paulo ki te kau kilisitiano ʼi Filipe: “Koutou taupau te loto ʼaia neʼe ia Kilisito Sesu, logope tana maʼuli ʼi te natula ʼo te ʼAtua, neʼe mole manatu ia ki he faʼao tuʼulaga, ke liliu ai ʼo tatau mo te ʼAtua. Kailoa ia, kae neʼe ina fakaʼosi ia ia totonu, pea mo liliu ai ko he kaugana, ʼo hā ohage he tagata. Kae laka age ia, ʼi tana liliu leva ʼaē ʼo tagata, neʼe ina haga ʼo fakamālaloʼi ia ia totonu pea neʼe talagafua ʼo aʼu ki te mate, ʼio, ki te mate ʼi te pou fakamamahi.” (Filipe 2:5-8). Ko ai ʼaē ʼe feala ke fakafisi katoa kia ia totonu? Kapau ʼe koutou kau kia Kilisito Sesu pea ko koutou ko hana tisipulo, ʼe tonu ke koutou taupau te faʼahiga manatu ʼaia.
11. Ko te finegalo ʼo ai ʼaē ʼe tonu ke maʼuliʼi ʼi te faʼahiga maʼuli faka sakilifisio?
11 Ko te tahi ʼapositolo ko Petelo ʼe ina ʼui mai koteʼuhi ko Sesu neʼe mamahi pea neʼe mate maʼa tatou, ko te kau kilisitiano ʼe tonu ke nātou teuteu ia nātou totonu, ohage ko he kau solia, ʼaki te manatu ʼaē neʼe maʼu e Kilisito. ʼE ina tohi fēnei: “Koia, ʼuhi ko Kilisito neʼe mamahi ʼi te kakano, mo koutou foki koutou teuʼi te faʼahiga manatu ʼaia, koteʼuhi ko ia ʼaē neʼe mamahi ʼi te kakano neʼe ina veteki ia ia mai te ʼu agahala, ke maʼuli ʼi te toega ʼo tona temi ʼi te kakano, mole ki te ʼu holi ʼo te tagata kae maʼa te finegalo ʼo te ʼAtua.” (1 Petelo 3:18; 4:1, 2). Ko te faʼahiga maʼuli faka sakilifisio ʼa Sesu neʼe ina fakahā lelei ai te ʼaluʼaga ʼo tana manatu ʼo ʼuhiga mo te finegalo ʼa te ʼAtua. Neʼe agatonu ki tana fakapapau, ʼo ina faka takimuʼa aipe te finegalo ʼo tana Tāmai ʼi ʼaē ʼa ʼana, ʼo tatau aipe ʼi tana kaku ki te mate fakaufiufi. — Mateo 6:10; Luka 22:42.
12. Neʼe koviʼi koa e Sesu te faʼahiga maʼuli faka sakilifisio? Koutou fakamahinohino.
12 Logope ko te maʼuli faka sakilifisio ʼo Sesu neʼe ko he ala maʼa ia neʼe faigataʼa pea mo kinakina tona muliʼi, neʼe mole ina koviʼi ia. Kailoa ia, ko Sesu neʼe fiafia ia ʼi tana talagafua ki te finegalo fakaʼatua. Kia ia, ko te fai ʼo te gāue ʼo tana Tāmai neʼe hage ia ko he meʼa kai. Neʼe ina maʼu ia te fīmālie mai ai, ohage ko te fīmālie ʼe maʼu mai he meʼa kai lelei (Mateo 4:4; Soane 4:34). Koia, kapau ʼe koutou loto moʼoni ke koutou fīmālie ʼi tokotou maʼuli, ʼe mole feala ke koutou fai he tahi meʼa age ʼe lelei ʼi te muliʼi ʼo te faʼifaʼitaki ʼa Sesu ʼaki te fakatuputupu ʼo tana ʼu faʼahiga manatu.
13. ʼE feafeaʼi koa te haga ʼo te ʼofa ʼo uga tatou ki te loto faka sakilifisio?
13 ʼIo, koteā te mālohi ʼaē ʼe ina uga te loto faka sakilifisio? ʼE fakanounou pe e te kupu e tahi: ko te ʼofa. Neʼe ʼui fēnei e Sesu: “ ‘ ʼE tonu ke ke ʼofa kia Sehova, tou ʼAtua, ʼaki tou loto katoa, pea mo tou nefesi katoa, pea mo tou laumālie katoa.’ Koʼena te folafola ʼaē ʼe lahi tokotahi pea mo ʼuluaki. Pea koʼeni te lua, ʼaē ʼe tatau mo ia: ‘ ʼE tonu ke ke ʼofa ki tou kāiga ohage pe ko koe totonu.’ ” (Mateo 22:37-39). ʼE mole feala ki he kilisitiano ke faiga kia ia totonu, pea mo talagafua ʼi te moʼi temi pe ʼaia ki te ʼu palalau ʼaia. Ko tona fiafia pea mo tana faiga kia ia totonu ʼe tonu ke ina takitaki ʼuluaki pea tāfito e tona ʼofa ʼaē kia Sehova pea mo tana ʼofa ʼaē ki tona kāiga. Ko te faʼahiga maʼuli ʼaia neʼe maʼuliʼi e Sesu, pea ko te meʼa ʼaia ʼe ina ʼamanaki ke fai e tana kau tisipulo.
14. a) Koteā te ʼu maʼua ʼe fakamatala ia Hepeleo 13:15, 16? b) Koteā ʼaē ʼe ina ʼeke tatou ke hoko tatatou fagonogono fakamalotoloto te logo lelei?
14 Neʼe mahino kia Paulo te lao ʼaia ʼo te ʼofa. Neʼe ina tohi fēnei: “ ʼAki ia ia, tou momoli tuʼumaʼu ki te ʼAtua he sakilifisio fakavikiviki, ko tona faka ʼuhiga ko te fua ʼo te ʼu laugutu ʼaē ʼe nātou fai te fakahā ia muʼa ʼo te hahaʼi ki tona huafa. ʼAua naʼa galo ke koutou fai te meʼa ʼaē ʼe lelei pea mo vaevae mo ʼihi, heʼe ko te ʼu sakilifisio ʼaia ʼaē ʼe leleiʼia e te ʼAtua.” (Hepeleo 13:15, 16). ʼE mole momoli e te kau kilisitiano he ʼu sakilifisio manu kia Sehova peʼe ko he tahi age pe meʼa ʼe tatau; koia, ʼe mole ʼaoga kia nātou he ʼu pelepitelo ʼi he fale lotu moʼo fakahoko tanatou tauhi. ʼAki ia Kilisito Sesu, ko ʼatatou ʼu sakilifisio fakavikiviki ʼe ina momoli. ʼE tou fakahā tāfito totatou ʼofa ʼaē ki te ʼAtua ʼaki te sakilifisio fakavikiviki ʼaia, ʼaē ko te faʼahiga talanoa ʼaia ia muʼa ʼo te hahaʼi ki tona huafa. Ko totatou faʼahiga maʼuli agaʼofa ʼaē ʼe fakatafito ki te ʼofa ʼaē ʼe ina fakaloto mālohiʼi tāfito ia tatou ke tou faka mafola te logo lelei ʼaki he loto faiga, ʼo tou holi tuʼumaʼu aipe ke tou foaki ki te ʼAtua te fua ʼo totatou ʼu laugutu. ʼI tona faʼahiga fai ʼaia ʼe tou toe fakahā aipe foki te ʼofa ki te kāiga.
Ko te loto faka sakilifisio ʼe ina ʼaumai te ʼu tapuakina maʼuhiga
15. Koteā te ʼu fehuʼi loloto ʼo ʼuhiga mo te faʼahiga maʼuli faka sakilifisio ʼe feala ke tou vakaʼi takitokotahi?
15 Tou tuʼu muʼa pea mo tou fakakaukauʼi te ʼu fehuʼi ʼaē ʼe hoa mai: Ko te faʼahiga maʼuli ʼo te temi nei ʼe ina fakahā ʼaki koa he faʼahiga maʼuli faka sakilifisio? ʼE fakahaga koa taku ʼu faiga ki te faʼahiga maʼuli ʼaia? ʼE utu koa e toku famili te ʼu fua fakalaumālie mai taku tuku faʼifaʼitaki? (Vakaʼi ia 1 Timoteo 5:8.) Kae feafeaʼi ki te ʼu fānau ʼe hāla mo tāmai pea mo faʼe pea mo te ʼu fafine vitua? ʼE nātou maʼu koa mo nātou he ʼu lelei ʼi toku loto faka sakilifisio? (Sake 1:27.) ʼE feala koa ke ʼau fakalahilahi te temi ʼaē ʼe ʼau fakaʼaogaʼi ki taku sakilifisio fakavikiviki ki te hahaʼi? ʼE feala koa ke ʼau kaku ki te pilivilesio ʼo te pionie, peʼe gāue ʼi te Petele, peʼe ki te gāue misionea, peʼe feala koa ke ʼau fetogi koga meʼa ke ʼau kaku ki he koga meʼa ʼe lahi ʼaupito ai te ʼaoga ʼo te kau faka mafola ʼo te Puleʼaga?
16. ʼE feafeaʼi he fealagia ki he fakakaukau lelei ke tokoni kia tatou ki te takitaki ʼo he faʼahiga maʼuli faka sakilifisio?
16 Ko te meʼa ʼe tau hoko, ʼe mole fakamaʼua he poto ke feafeaʼi moʼo fakakaku totatou ʼu faiva katoa ki te gāue ʼaē kia Sehova ʼaki he loto faka sakilifisio. Ohage la, ko Janet, ko te pionie katoa ʼi Ekuatole, neʼe gāue ʼaho katoa ʼi te gāue fakamālama. Neʼe mole tuai, pea ʼaki tana fai ʼaia neʼe faigataʼa te fakakatoa te ʼu hola ʼaē neʼe maʼua ke ina fai, ʼaki he lotolelei. Neʼe ina fakatotonu ke ina fakamahino te faigataʼaʼia ki tona pule gāue pea neʼe ina faka ʼui ke fakasiʼisiʼi tona ʼu hola gāue. ʼI tana mole tali te faʼahi ʼaia, neʼe ina ʼave ai ia Malia ʼaē neʼe kumi gāue ʼe fai kogaʼi ʼaho koteʼuhi neʼe faiga ke liliu ko he pionie. Ko nāua ʼaia neʼe nā faka ʼui ke nā gāue kogaʼi ʼaho te tokotahi, fakatahiʼi ʼaia ko te gāue ʼe fai ʼi te ʼaho katoa. Ko te pule neʼe ina tali te meʼa ʼaē neʼe nā faka ʼui. ʼI te temi nei kua nā pionie katoa tokolua. ʼI tana sio ki te fua fakatalakitupua ʼaia, ko Kaffa ʼaē kua gaʼegaʼe foki mo ia ʼi te gāue ʼaho katoa ʼi te fale gāue ʼaia pea mo faiga ʼi te temi pe ʼaia ki tana gāue ʼi tona ʼuhiga pionie, neʼe ina toʼo ai ia Magali pea neʼe ina faka ʼui ke nā fai ohage ko te ʼu ʼuluaki tuagaʼane. Ko te meʼa ʼaē neʼe nā faka ʼui neʼe tali. Koia, ko tuagaʼane e fā kua feala tanatou gāue, kae mole ʼui ko he tuagaʼane e lua neʼe teu ke nā mavae ʼi te gāue pionie. Ko te faiga pea mo te fakakaukau lelei neʼe maʼu ai te ʼu lelei.
17-21. Neʼe feafeaʼi te toe vakaʼi e te taumatuʼa tana ʼu faiga ʼi tonā maʼuli, pea koteā tona fua neʼe hoko kiai?
17 Kae, tou fakatokagaʼi muʼa te faiga ki te faʼahiga maʼuli faka sakilifisio ʼaē neʼe fai e Evonne lolotoga te ʼu taʼu e hogofulu kua hili. Neʼe ina tohi te ʼu kupu ʼaē ʼe hoa mai ki te Sosiete Watch Tower ʼi maio ʼo te taʼu 1991:
18 “ ʼI ʼoketopeli ʼo te taʼu 1982, ko toku famili pea mo ʼau neʼe mātou ʼaʼahi te Petele ʼo Brooklyn. Ko te sio ʼaē ʼi ai neʼe ina fakatupu ia ʼau he fia gāue ʼi ai. Neʼe ʼau lau te tohi, pea neʼe ʼi ai te fehuʼi maʼuhiga: ‘Koteā toku ʼu hola ʼi te gāue faka mafola ʼi te ʼu māhina e ono kua hili? Kapau ko ʼakotou ʼu hola ʼe mole fakalaka ʼi te hola e hogofulu, koutou fakamahino tona tupuʼaga.’ Neʼe feala ai taku fakakaukau ʼe mole he tupuʼaga tāfito ʼo te siʼisiʼi ʼo toku ʼu hola, koia neʼe ʼau fai ai te fakatuʼutuʼu pea neʼe ʼau fakakaku lolotoga māhina e nima.
19 “Logope neʼe feala ke ʼau fakakaukauʼi he ʼu takuʼaki ke mole ʼau pionie ai, ʼi taku lau te Annuaire des Témoins de Jéhovah 1983, neʼe mahino ai kia ʼau ko ʼihi neʼe laka age te ʼu kavega neʼe nātou fakalaka ai ʼi ʼaē ʼo ʼoku ko te faiga ʼaia ke liliu ʼo pionie. Koia, ʼi te ʼaho ʼuluaki ʼo ʼapelili 1983 neʼe ʼau mavae ʼi taku gāue pea neʼe ʼau liliu ʼo pionie vaeluaʼi temi, pea neʼe ʼau hu ki te kūtuga ʼaē ʼe pionie katoa ʼi te ʼaho 1 ʼo sepetepeli ʼo te taʼu 1983.
20 “Ki muli age, neʼe ko he meʼa fakafiafia kia te ʼau te ʼohoana mo he tagata faifekau faka minisitelio ʼi ʼapelili 1985. Hili taʼu e tolu, ko te akonaki ʼo te fakatahi faka tisitilike ʼo ʼuhiga mo te kau pionie neʼe ina uga toku ʼohoana ke fanafana mai ʼo ina faka ʼui mai: ‘ ʼE ke ʼiloʼi koa la he tupuʼaga ʼo haku mole pionie ʼi te ʼuluaki ʼaho ʼo sepetepeli?’ Hili te taʼu e lua pea haʼu ai ʼo kau mo ʼau ki te gāue pionie.
21 “Ko toku ʼohoana neʼe kau ki te laga ʼo te Petele ʼo Brooklyn lolotoga te vāhaʼa e lua pea neʼe ina faka ʼui ke kau ʼi te ʼu gāue laga fale ʼi te malamanei. Koia ʼi maio ʼo te taʼu 1989 neʼe ma ʼolo ai ki Niselia lolotoga te māhina e tahi ko te tokoni ki te laga ʼo te filiale. ʼI te ʼapogipogi age neʼe ma folau ki Siamani, ʼi ai neʼe fai ai te pepa ke feala ai tamā hu ki Poloni. ʼE ma ōfo ʼi tamā kau ʼaē ʼi te toe laga fale maʼuhiga pea mo tukupau pea mo te kau ki te faʼahiga gāue foʼou ʼaia ko te gāue katoa.”
22. a) ʼE feafeaʼi he fealagia, ohage ko Petelo, ke tou liliu ʼo mole ko he meʼa neʼe tou ʼamanaki kiai ko he maka fakatupu tūkia? b) Ko te gāue kia Sehova ʼaki he loto faka sakilifisio ʼe mole fakalogo kiteā?
22 Kapau ʼe mole feala ke koutou pionie, ʼe feala koa hakotou fakaloto mālohiʼi nātou ʼaē ʼe nātou kau ʼi te kau pionie ke nātou taupau tanatou pilivilesio pea mo feala pe ke nātou tokoni ki ʼihi ke nātou liliu ohage ko nātou? Peʼe koutou hage ko ʼihi ʼi tanatou tonu ʼe lelei ʼanatou manatu, ohage ko Petelo, ʼo feala ke nātou ʼui ki te kau faifekau ʼaē ʼe gāue katoa maʼa Sehova ke nātou mālōlō pea ke nātou nonofo fīmālie, ke nātou agalelei kia nātou, ʼo mole nātou manatu ʼe feala pe ke nātou liliu ko he ʼu maka fakatupu tūkia? ʼE moʼoni, kapau ʼe faigataʼaʼia te maʼuli haohaoa ʼo he pionie peʼe mole kei tokaga ia ki te ʼu maʼua faka kilisitiano, ʼe lagi ʼe tonu ke ina tuku faka temi muʼa tana gāue. Ko te gāue ʼaki he loto faka sakilifisio ʼe mole fakalogo ki te ʼuhiga ohage ko he pionie, peʼe gāue ʼi te Petele, peʼe ʼi he tahi age pe gāue. Kailoa ia, ʼe fakalogo ia ki te ʼuhigaʼi tagata — peʼe feafeaʼi tatatou manatu, pe koteā ʼe tou fai, peʼe feafeaʼi tatatou aga ki te hahaʼi, pea mo feafeaʼi totatou maʼuli.
23. a) ʼE feafeaʼi he fealagia ke hoko atu tatatou maʼu ʼo te fiafia ʼi totatou ʼuhiga kaugā gāue mo te ʼAtua? b) Koteā te fakapapau ʼe tou maʼu ia Hepeleo 6:10-12?
23 Kapau ʼe tou maʼu moʼoni he faʼahiga maʼuli faka sakilifisio, ʼe tou maʼu anai te fiafia ʼi totatou ʼuhiga kaugā gāue mo Sehova (1 Kolonito 3:9). ʼE tou maʼu anai te fīmālie ʼaē ko te ʼiloʼi ʼe tou lolotoga fakafiafiaʼi te loto ʼo Sehova (Tāʼaga Lea 27:11). Pea ʼe tou ʼiloʼi papau ʼe mole galoʼi anai tatou e Sehova peʼe ina liaki anai tatou ʼi te temi fuli pe ʼe tou nofo agatonu ai kia te ia. — Hepeleo 6:10-12.
[Nota ʼi te lalo pasina]
a ʼI te lea faka keleka, ko he “maka fakatupu tūkia” (σκάνδαλον, skandalon) neʼe “ko te higoa [ʼuluaki] ʼo te koga ʼo he hele ʼaē neʼe fakapipiki ki ai he mounu, koia ko te hele totonu pe”. — Vine’s Expository Dictionary of Old and New Testament Words.
Koteā koa takatou ʼu manatu?
◻ Neʼe feafeaʼi te liliu ʼa Petelo ʼo mole ko hona loto katoa ko he maka faka tūkia ki he fakaʼaluʼalu ʼo he faʼahiga maʼuli faka sakilifisio?
◻ Koteā te faka ʼuhiga ʼo te fakafisi kia kita totonu?
◻ ʼE feafeaʼi ki he kilisitiano hana fua tona pou fakamamahi?
◻ ʼE feafeaʼi hatatou fakatuputupu pea mo taupau ʼo he loto faka sakilifisio?
◻ Koteā te mālohi ʼaē ʼe ina ʼeke ki te loto faka sakilifisio?
[Paki ʼo te pasina 10]
Kua feala koa hakotou fakafisi kia koutou totonu, ʼo koutou fua tokotou pou fakamamahi, pea mo koutou mulimuli tuʼumaʼu ia Sesu?