Ko Te Kau Faka Mafola ʼo Te Puleʼaga ʼe Nātou Fakamatala

ʼO Kaku Ki Te ʼu Koga Meʼa Mamaʼo ʼo Groenland

TALU mai te ʼu taʼu ʼe fualoa, neʼe fakaʼaogaʼi e te kau Fakamoʼoni ʼa Sehova te ʼu nusipepa ʼaē ko Te Tule Leʼo pea mo te Réveillez-vous! moʼo faka mafola te logo lelei. ʼE vikiʼi e te ʼu nusipepa ʼaia te poto ʼa Sehova ohage ko tona tuʼu ʼi tana Folafola, te Tohi-Tapu. ʼE nā mulimuli pe ki te ʼu meʼa ʼaē ʼe hoko ʼi te malamanei ʼaē ʼe fakamatala ʼi te ʼu lea faka polofeta ʼo te Tohi-Tapu, pea ʼe nā fakahā te tokoni fakapotopoto ʼa te Tohi-Tapu ʼo ʼuhiga mo te ʼu fihifihia ʼo te ʼu temi ʼaenī.—Sake 3:17.

ʼI te taʼu 1994, neʼe fai e te kau Fakamoʼoni ʼa Sehova te fakatuʼutuʼu makehe moʼo tufa ia Te Tule Leʼo pea mo te Réveillez-vous! ki te hahaʼi fuli ʼaē neʼe felāveʼi mo nātou. Lolotoga te fasiga taʼu māfana, neʼe nātou fai te ʼu fakatuʼutuʼu moʼo ʼaʼahi niʼihi ʼi te ʼu potu mamaʼo ʼaē ʼo Groenland. Ko te kūtuga fai faka mafola ʼo te Puleʼaga neʼe nātou folau ia kilometa e 4 000 tupu ʼi te vaka ʼi te potu hihifo ʼo Qaanaaq (Thule), ʼo nātou aʼu ki te tahi ʼu hahaʼi ʼe nonofo ʼi te ʼu potu taupotu ʼosi ʼo te potu tokelau ʼo te kele. Neʼe vāhaʼa fitu tanatou folau ʼaia. ʼI te potu hahake, ko te taumatuʼa Fakamoʼoni neʼe nā aʼu ki te koga meʼa ʼi Ittoqqortoormiit pea neʼe ko te ʼuluaki fakatuʼutuʼu neʼe fai ʼo ʼuhiga mo te gāue fai faka mafola.

ʼI te kamata ʼo te taʼu ʼaia, lolotoga te māhina ʼo ʼApelili, ko Te Tule Leʼo pea mo te Réveillez-vous! e 7 513 neʼe tufa ki te hahaʼi ʼo Groenland. Ko tona faka ʼuhiga, ʼi tona fakafuafua, ko te kau fai faka mafola e toko 127 ʼo te Puleʼaga neʼe nātou tufa takitokotahi te ʼu nusipepa e 59—ko te nusipepa e tahi ki te toko fitu. ʼI te māhina ʼaia, neʼe tā ʼi te nusipepa Réveillez-vous! te ʼu alatike ʼe fefakahoahoaʼaki te kupu tāfito ʼaenī “Ko Te Kosea ʼo Te Huhu—Ko Te Tuʼania ʼa Te Hahaʼi Fafine Fuli.” Ko te Fakamoʼoni, ʼaē neʼe ina tufa te ʼu nusipepa e 140, neʼe ina tuku te ʼu nusipepa ʼo te numelo ʼo te Réveillez-vous! ki te tahi ʼe gāue ʼi te televisio. Hili ʼaho e lua, neʼe fakahā e te polokalama foʼou ʼi te televisio te ʼu alatike ʼo ʼuhiga mo te kosea ʼo te huhu. ʼO fakahā te nusipepa ʼi te televisio, ʼo ina fakahā te ʼu pasina pea neʼe ina vikiʼi te lelei ʼaupito ʼo te fakaliliu ʼi te lea ʼo Groenland. Neʼe ina toe faka maʼuhigaʼi foki mo te ʼu manatu ʼaoga ʼaē neʼe foaki e te nusipepa Réveillez-vous! ohage ko he fakatokagaʼi fakatomuʼa ʼo te mahaki.

Neʼe fakafehuʼi ia te Fakamoʼoni ʼaē neʼe ina tuku te ʼu nusipepa ki te fafine ʼo te televisio ʼi te polokalama televisio ʼaia. Neʼe ina tali ki te ʼatu ʼu fehuʼi ʼo ʼuhiga mo te kau Fakamoʼoni ʼa Sehova pea neʼe palalau ʼo ʼuhiga mo te lahi ʼaē ʼo te tufa ʼo te ʼu nusipepa ʼi te māhina ʼaia. Neʼe ina toe fakamahino te poto ʼaē ʼe maʼu ʼi te Tohi-Tapu pea neʼe ina fakahā ko te tokoni fakapotopoto ʼaia ʼe ʼaoga moʼo tauʼi te ʼu fihifihia ia ʼaho nei.

Neʼe fakaʼosi te polokalama ʼaki te fakafehuʼi ʼo te pelesita ʼo te Sosiete ʼo te Kosea ʼi Groenland. Neʼe ina fakatokagaʼi ko tana hoki sio nei ki he nusipepa ʼe lelei feiā pea mo lahi ai te ʼu fakamatala ʼo ʼuhiga mo te mahaki ʼaia, ʼi tana lea. Koia, neʼe ina fakaafe ia nātou fuli ʼaē e nātou fia mahino ki te faʼahi ʼaia ʼo ʼuhiga mo te kosea ʼo te huhu ke nātou lau te ʼu alatike ʼo te nusipepa Réveillez-vous! Neʼe ina ʼui ʼe ʼi ai te tupuʼaga lelei ke nātou fakamālo ai ki te kau Fakamoʼoni ʼa Sehova ʼo ʼuhiga mo tanatou ʼu taʼi fakatuʼutuʼu ʼaia.

Ohage ko tona fai ʼaē ʼi Groenland, ʼe haga faka mafola te kau Fakamoʼoni ʼa Sehova te logo lelei “ ʼi te ʼu meʼa katoa ʼaē neʼe fakatupu ʼaē ʼe ʼi te lalo lagi.” (Kolose 1:23; Gāue 1:8) ʼAki te fakaʼaogaʼi ʼaē ʼo te ʼu tohi faka Tohi-Tapu, ʼaē ʼe kau ai Te Tule Leʼo pea mo te Réveillez-vous!, ʼe tokoni te ʼu tohi ʼaia ki te ʼu faʼahiga hahaʼi kehekehe ke nātou tauʼi te ʼu fihifihia ʼo te ʼu ʼaho ʼaenī pea mo foaki aipe kia nātou he ʼamanaki ʼo he temi ka hau ʼe lelei age.

[Mape ʼo te pasina 8]

(Vakaʼi te nusipepa)

Qaanaaq (Thule)

Ittoqqortoormiit

Nuuk (Godthåb)