He Koʼe ʼe Nātou Fai Te ʼu Fakatahi ʼAia?

ʼI TE taʼu fuli, ko te toko lauʼi afe kau Fakamoʼoni ʼa Sehova ʼo te malamanei katoa ʼe nātou maʼopoʼopo ʼi tonatou ʼu fakatahi lalahi. ʼI te ʼu fakatahi ʼaia, ʼe nātou fakakaugā mo tonatou ʼu tēhina mo tuagaʼane pea mo nātou fakalogo ki he polokalama ako ʼo te Tohi-Tapu ʼe lelei ʼaupito. Ko ʼihi, ʼe nātou faiga mālohi ke nātou kau ʼi te ʼu fakatahi ʼaia. Ohage la ʼi te taʼu ʼaenī kua hili ʼi Malawi, ko te taumatuʼa ʼe kua taʼu 60 tupu, mo tanā tama mo tona ʼohoana pea mo tanā kiʼi toe, neʼe nātou ʼolo ʼi tanatou ʼu lelue ia kilometa e 80 ke feala hanatou kau ki he fakatahi. Neʼe nātou mavae ʼi tonatou kiʼi kolo ʼi te hola ono uhu, pea neʼe nātou tau ki te fakatahi hili kiai hola e 15.

ʼI Mozambique, neʼe ʼolo te kiʼi kūtuga ʼi tanatou ʼu lelue lolotoga ʼaho e tolu ke nātou kau ki he fakatahi. ʼI te tahi po, neʼe nātou momoe ʼi tuʼa, pea neʼe nātou logo ki te gugulu ʼo te ʼu laione neʼe fakaōvi age kia nātou. Logope la tanatou faiga ʼaē ke nātou kapu te ʼu manu ʼaia ʼaki te ʼu fafie vela, kae neʼe nonofo ōvi age pe te ʼu laione kia nātou ʼo aʼu ki te māfoatā. Ko te tahi Fakamoʼoni ʼa Sehova neʼe toe ʼalu pe foki mo ia ki te fakatahi, neʼe felāveʼi mo te laione ʼi te ala. Neʼe tuʼu fakalogologo pea neʼe mole gaūgaūe ʼo aʼu ki te mavae ʼo te laione. ʼI te fakatahi, neʼe fakamatala fakafiafia e te kau Fakamoʼoni ʼaia ʼa Sehova, “neʼe hāofaki [nātou] mai te gutu ʼo te laione.”​—2 Timoteo 4:​17.

Tokolahi te kau Fakamoʼoni ʼa Sehova ʼe nātou faiga mālohi ke nātou kau ʼi te ʼu fakatahi lalahi pea mo te ʼu fono faka Kilisitiano ʼaē ʼe fai ai te tauhi ki te ʼAtua ʼi te vāhaʼa fuli. Koteā tona tupuʼaga? ʼI te ʼu alatike ʼaē ka hoa mai, ʼe fakamahino atu anai kia koutou pe koʼe ʼe maʼuhiga ke tou fakatahi tuʼumaʼu.