ʼE ʼAoga Koa Te Nofo Agatonu?
“ ʼE LAHI fau tau totogi tau assurance mahaki,” ko te ʼui ʼaia ʼa Karl, te tagata fakafofoga ʼo te assurance.a “Kapau ʼe ke haʼu ki toku fale assurance, ʼe ke tāʼofi anai hau falā lahi ʼi te taʼu, ko tau 21 600.”
Neʼe tali age e Jens, “ ʼE lagi moʼoni. Kae kua fualoa taku totogi taku assurance ʼi te fale ʼaia. Neʼe nātou tokoni ʼaupito mai kiā au ʼi te ʼu temi kua hili, pea ʼe au fia agatonu kiā nātou.”
Neʼe tali maʼa Karl, “Ko te agatonu ʼe ko he kalitātē lelei ʼaupito. Kae ko tau agatonu ʼaia ʼe lahi ai te puli ʼo tau falā!”
Neʼe tonu ia Karl. Ko te agatonu ki he tahi ʼe feala pe ke fakatupu ai he puli falā. ʼE toe fakamaʼua kiai he temi, mo he mālohi, pea mo he ʼu meʼa ʼi te loto. ʼE ʼaoga koa te nofo agatonu?
ʼE Lahi Age Tona Vikiʼi ʼi Tona Maʼuliʼi
ʼI te sivi neʼe fai ʼi Siamani e te Institut Allensbach, ko te toko 96 ʼi te teau ʼo te hahaʼi ʼaē neʼe nātou tali ki te sivi ʼaia, neʼe nātou faka ʼuhigaʼi te nofo agatonu ʼe ko he kalitātē lelei. ʼI te lua sivi neʼe fai ki te kau tūpulaga, ʼo te taʼitupu ʼaē ʼe taʼu 18 ʼo aʼu ki te taʼu 24, neʼe ʼasi ai ko te toko lua ʼi te toko tolu neʼe nātou ʼui ko te nofo agatonu ʼe ko he meʼa ʼe lelei.
Logola ʼe lahi te vikiʼi ʼo te nofo agatonu, kae ʼe siʼisiʼi tona maʼuliʼi. Ohage la ʼe lahi te ʼu fenua Eulopa, ʼe ko he agamāhani ki te ʼu taumātuʼa peʼe ki he famili hanatou mole feagatonuʼaki. Ko te meʼa ʼe tau hoko, ko te ʼu kaumeʼa ʼe mole nātou feagatonuʼaki. Pea kua teitei pe ke puli ia te feagatonuʼaki ʼa he patolo mo hana tagata gāue, peʼe ko he fale koloā mo te ʼu hahaʼi ʼaē ʼe ʼōmai ʼo faifakatau ai. Koteā tona tupuʼaga?
ʼUhi ko te maʼumaʼua ʼa te hahaʼi, koia ʼe mole maʼu he temi peʼe ko he mālohi moʼo fakahoko te ʼu fakamaʼua ʼo te nofo agatonu. Ko te hahaʼi ʼaē neʼe lotomamahi ʼi hanatou ʼu felogoi mo he tahi, kua lagi nātou lotolotolua ki te agatonu ki he tahi kehe. ʼE lagi filifili e te tahi faʼahiga hahaʼi ia te faʼahiga maʼuli ʼaē ʼe mole fakamaʼua te nofo agatonu, ohage ko te tahi maʼuli pe maʼa kita heʼe nounou te maʼuli.
Logola he faʼahiga ʼaluʼaga ʼo te kalitātē ʼaia, kae ko te agatonu ʼe ko he kalitātē ʼe lahi age tona vikiʼi ʼi tona maʼuliʼi. Koia tou vakavakaʼi te ʼu fehuʼi ʼaenī: ʼE ʼaoga koa te nofo agatonu? Kapau ʼe ʼaoga, ko ai ʼaē ʼe tonu ke tou agatonu ki ai, pea e feafeaʼi hatatou agatonu? Koteā te ʼu fua lelei ʼo te agatonu?
[Kiʼi nota]
a Neʼe fetogi ʼihi higoa ʼi te alatike ʼaenī pea mo ʼaē ʼe hoa mai kiai.
[Fakamatala ʼo te pasina 3]
Ko te agatonu ʼe ko he kalitātē ʼe lahi age tona vikiʼi ʼi tona maʼuliʼi