Fakatahi Faka Tisitilike 1992 “Kau Kavelogo ʼo Te Mālama”
1 Neʼe ʼui e Sesu ko tana kau tisipulo ʼe “ko he mālama anai ʼo te malamanei”. (Mat. 5:14.) ʼO kehe ia mo te ʼu fakapōʼuli fakalaumālie pea mo te ʼu aga ʼaē ʼi te mālama kua hoholo ia ʼi te ʼaho mo te ʼaho (Is. 60:2; Lom. 1:21). Ko tatou ko te kau kavelogo ʼo te mālama, kua lahi ʼaupito totatou maʼua ʼi te temi ʼaenī kua tou ōvi ai ki te fakaʼosi ʼo te tuʼu ʼaenī. ʼAki tatatou ʼiloʼi lelei totatou maʼua ʼi te gāue ʼaia, ʼe tou talitali ʼaki te fakaʼamu ke tou kau ki te fakatahi faka tisitilike 1992 “Kau kavelogo ʼo te mālama”. ʼE kamata te fakatahi ʼi te feliaono ʼaho 28 ʼo ʼaukusito.
2 Ko te fakatahi ʼe ʼaho tolu: ʼE kamata te fakatahi ʼi te hola 10 h 20 ʼo te feliaono pea fakaʼosi ʼaki te katiko pea mo te faikole ʼi te hola 16 h 15 ʼo te ʼahotapu. Ko te kau kaugana ʼa Sehova ʼe nātou loto anai ke nātou nonofo ʼi te fakatahi ʼaia mo mulimuli ki te polokalama katoa. Neʼe kua koutou fakatuʼutuʼu koa ke koutou ʼolo ki te fakatahi ʼaia ʼe ʼaho tolu? ʼAua naʼa galo ke koutou faikole kia Sehova ke ina tapuakina takotou faiga.
3 Mai te akonaki neʼe kamata ai te fakatahi ʼi te ʼaho ʼaia, ʼi te feliaono uhu, ʼo aʼu ki te akonaki fakaʼosi ʼi te ʼahotapu hili hoʼatā, ko te polokalama katoa ʼaia ʼe tonu ke ina uga tatou ke tou tokaga lelei. ʼE lahi te ʼu manatu ʼe tou vakaʼi anai ʼaki he ʼu akonaki, he ʼu faʼifaʼitaki, he ʼu fehuʼi pea mo he gaoʼi. Koutou faigaʼi ke koutou heheka ʼi muʼa ʼo te kamata ʼo te polokalama ʼi te feliaono. Ko te ʼuluaki ʼaho, ʼe loaloaga anai te temi ʼe ʼaoga moʼo tau ʼo te ʼu motokā, pe ʼe ko te kumi ʼo he ʼu nofoʼaga, pea mo ʼihi atu meʼa. Koutou faigaʼi ke koutou ʼomai fakavilivili. Kapau ʼe tou fakalogo ki te ʼu akonaki fuli pea mo tou nonofo ki te katiko pea mo te faikole fakaʼosi, ʼe tou maʼu anai he fua lelei ʼi te polokalama ʼaia pea ʼe tou fakahā ai tatatou fakafetaʼi ki te pilivilesio ʼe tou maʼu ko te kau kavelogo ʼo te mālama.
4 Ke fakalogo lelei ʼo kotou taliga: Neʼe ʼui fēnei e te pesalemo: “ ʼE hoholo atu nei taku fakalogo ki tau ʼu fakamanatu. ʼE ʼau ʼofa ki tau lao! ʼI te ʼaho katoa ʼe ʼau tokaga ki te meʼa ʼaia.” (Pes. 119:95b, 97). ʼI te temi fuli pe ʼe tou fakatahi ai ke akoʼi tatou e Sehova, ʼe ʼaoga ke tou fakasiosio pea mo tou fakalogo ʼo mole gata ʼaki pe ʼotatou taliga, kae ʼaki foki totatou loto. ʼE toe maʼuhiga foki te fahaʼi ʼaia mokā ʼe tou kau ki he fakatahi lahi ohage ko te fakatahi faka tisitilike. ʼE lahi te ʼu fakatahi ʼe tou sisio ki ai pea mo te ʼu faʼahiga meʼa ʼe tou logo ki ai. ʼE mole ko he meʼa lelei mokā ʼe tou fakaʼaoga totatou temi pea mo he falā mo kapau ʼe tou liliu mai te fakatahi ʼaia, pea tou ʼolo ki totatou ʼapi mole kei tou manatuʼi pe ʼe feafeaʼi tatatou liliu ko te kau kavelogo ʼo te mālama! ʼE tonu ke tou faigaʼi ke ʼaua naʼa feʼaluʼaki tatatou fakakaukau mokā ʼe tou fia mulimuli ki te polokalama. ʼE feafeaʼi hatatou ʼiloʼi neʼe hu te akonaki ki totatou loto pea mo tatatou ʼatamai ʼi te ʼosi ʼo te fakatahi?
5 Ko te fakalogo ʼe ko he meʼa lelei ʼe tonu ke ia tatou pea ke tou maʼuliʼi. Ko te kupu “fakalogo” ko tona ʼuhiga “ko he holi ke logo”. Vakaʼi te ʼu manatu ʼaenī: 1) Koutou faigaʼi ke lelei takotou mālōlō ke feala ai ha kotou ʼomai ʼo ʼalaʼala ʼi te fakatahi ʼaia. ʼE ʼaoga ki te fahaʼi ʼaia ke ʼi ai ha kotou polokalama lelei pea mo he fetokoniʼaki faka famili. Kapau ʼe koutou gaʼegaʼe koteʼuhi neʼe mole feʼauga takotou moe, kapau ʼe kotou fia kakai koteʼuhi neʼe mole koutou kakai ʼi te uhu, pe ʼe kapau ʼe hoha tokotou loto koteʼuhi neʼe koutou fakavilivili, ʼe mole lahi anai ni meʼa ʼe koutou manatuʼi. 2) Koutou palalau ʼo ʼuhiga mo te kupu ʼaē ka tou vakaʼi anai ʼi te fakatahi ʼaia. ʼI he ʼu vahaʼa ki muʼa atu ʼo te fakatahi, lolotoga takotou ako faka famili, he koʼe mole koutou fehuʼi kia nātou fuli pe koteā te ʼuhiga kia nātou te kau kavelogo ʼo te mālama. ʼI te fakatahi, koutou lau ʼi te ʼaho fuli te fahaʼi ʼe ʼaoga ki te polokalama ʼi muʼa ʼo tona kamata. 3) Koutou teuteuʼi lelei pea ʼaua naʼa koutou kakai pea mo ʼiʼinu lolotoga te ʼu akonaki. Neʼe sioʼi ʼihi neʼe kakai ʼi te ʼu fale pe ʼe ko te ʼu malaʼe fai gaoʼi lolotoga ʼo te polokalama. ʼE mole ko he aga fakaʼapaʼapa ʼaia, heʼe feala ai ke ʼaua naʼa fakalogo niʼihi pea tou fakahā ai ʼe mole tou lavaʼi totatou taupau. — Vakaʼi Te Tule Leʼo ʼo te ʼaho 15 ʼo novepeli 1991, ʼi te ʼu pasina 8 ki te 18.
6 ʼE fia palalau te Sosiete ki te ʼu nota. Kapau ʼe tohi fakalelei, ʼe tokoni anai kia tatou ke tou mulimuli ki te ʼu akonaki pea mo tou manatuʼi te ʼu meʼa ʼaē ʼe tou fakalogo. ʼI tona ʼuhiga ʼaē ko tatatou manatu ʼe haʼele vave ia ʼi tatatou palalau, ko te meʼa lelei ʼe ʼaoga ke fai ke ʼaua naʼa feʼaluʼaki tatatou fakakaukau ʼe tonu ke tou tohi he ʼu nota. Neʼe ʼui fēnei e te tagata faitohi ʼe “faigataʼa tuʼumau te fakalogo ki he akonaki ʼi tona fai”. ʼE lagi ʼe koutou manatuʼi neʼe logona te ʼu ʼuluaki kilisitiano heʼe nātou ʼomai mo te ʼu koga maka ki te ʼu fono ʼo nātou tohi ai te ʼu vaega ʼaki te vai tohi. Meʼa lelei, heʼe feala tatatou fai te fahaʼi ʼaia ʼaki he kaupepa pea mo he peni. Ko te tohi lelei ʼo te ʼu nota, ko te tohi pe ʼo te ʼu puani tāfito ke feala ai hatatou manatuʼi, pea ʼaua naʼa lahi te meʼa noa ʼe tohi ʼi ai. Ka tou fai feiā ʼe mole feala anai ke tou to kehe pea mo galo ia tatou te ʼu manatu maʼuhiga ʼe fakahā mai e te tagata fai akonaki. Koutou tohi te ʼu manatu tāfito pea fakaʼaogaʼi he ʼu manatu nounou. ʼE ʼaoga anai takotou ʼu nota mokā ʼe koutou lau ʼi te afiafi pe ʼaia, pea ʼosi ʼaia pea toe lau ʼi muʼa ʼo te toe fakamanatu e te kokelekasio te ʼu puani ʼo te polokalama ʼi te fono gāue.
7 Te ʼu katiko pea mo te ʼu faikole fakamalotoloto: Ko te ʼu fakavikiviki ʼe tou hiva kia Sehova pea mo te ʼu faikole ʼe tou fai ki ai ʼe ko he faʼahi tāfito ʼaia ʼo tatatou tauhi (2 Fkma. 30:21, 27). ʼE tonu ke tou kau ki te ʼu katiko pea mo te ʼu faikole, ʼe ko he ʼu fahaʼi maʼuhiga ʼaia ʼo te fakatahi. Lolotoga ʼo te ʼu ʼaho ʼaia e tolu ʼo te fakatahi faka tisitilike “Kau kavelogo ʼo te mālama”, ʼe tou hiva anai te ʼu katiko e 18 ʼo fakavikiviki kia Sehova pea ʼe tou fai fakatahi anai te ʼu faikole e valu ki tatatou Tāmai ʼi selo. ʼE ko te ʼu pilivilesio moʼoni ʼaia fakatalakitupua. ʼE foaki mai e Sehova kia tatou te ʼu hola ʼo laka age ʼi te ʼu hola e 12 fai akonaki pea mo te ʼu fakatuʼutuʼu fakalaumālie. Lolotoga ʼo te ʼu kiʼi minuta ʼaē neʼe tuku ki te katiko pea mo te faikole, ʼe tou fakamālo anai kia Sehova ki tana ʼu meʼa ʼofa pea mo tou fakavikiviki ki ai. Ka tou faikole kia Sehova ʼi te lotolotoiga ʼo te hahaʼi, ʼe tou loto koa ke ina ʼui ʼe tou manatu pe kia tatou pea mo aga pauʼu, koteʼuhi he neʼe mole tou kau ki te katiko pea mo te faikole koteʼuhi neʼe mole lelei ta kita teuteu ia meʼa fuli? ʼI te taʼu ʼaenī, ʼe lahi te ʼu tohi ʼi te fakatahi ʼaia, ke feala ai kia nātou ʼaē ʼe nonofo ʼi tonatou ʼu hekaʼaga ʼe nātou maʼu anai hanatou ʼu tohi. ʼO tatau aipe, mole he tahi ʼe tuʼu ʼo mavae ʼi tona hekaʼaga ʼo ʼalu ʼo kai ʼi muʼa ʼo niʼihi kae mole heʼeki ʼosi te fakatahi. — Mat. 7:12; Lom. 12:10; Filp. 2:1-4.
8 Fai te ʼu meʼa fuli moʼo faka kolōliaʼi te ʼAtua: ʼI te taʼu fuli, ʼe fakahā mai te maʼuhiga ʼaē ke ia tatou he ʼu aga fakaʼapaʼapa lolotoga ʼo te ʼu fakatahi. Tokolahi ʼe tonu ke fai he ʼu fakamālo, he neʼe nātou muliʼi leleiʼi te ʼu fakamanatu neʼe foaki age. ʼO mulimuli pe ki tatatou fakaōvi ki te temi fakamuli, ʼe tou tau ai mo he ʼu faigataʼa ia ʼo lahi age ʼi te fahaʼi ʼe tou gāue ai pea ʼi te fale ako te felōgoʼi ʼaē mo nātou ʼaē ʼe hage tanatou maʼuli ko te fakahā mai ʼaē ia 2 Timoteo 3:1-5. ʼE feala ke hoko kia tatou he talatuʼu mai te ʼu hahaʼi ʼaia mokā ʼe mole tou nonofo fakatokaga. ʼE mole tou loto anai ke ‘palalau kovi mai he tahi kia tatou ohage he kau fakapō’. (1 Petelo 2:12.) ʼE tonu ke tou faigaʼi he fakasiosio ʼo lahi age ki totatou ʼuhiga faka kilisitiano. Ko te ʼu tagata ʼāfea ʼe nātou tuʼania ia tonatou ʼu tēhina pea mo tonatou ʼu tuagaʼane (Filp. 2:4). ʼE tonu ke nātou tokoniʼi pea mo fakamālo kia nātou ʼuhi ko te lelei ʼo tanatou aga. ʼE mole tonu ke nātou lotolotolua ʼo foaki ki te ʼu tēhina pea mo te ʼu tuagaʼane, ʼaki te loto ʼofa, he ʼu tokoni ʼe ʼaoga, tatau aipe pe ʼe mole nātou ʼiloʼi lelei ia nātou takitokotahi. Ko te faigataʼa ia fuli ʼe tonu ke fakahā ki te pilo ʼo te kau Faʼufaʼu ʼo te fakatahi.
9 Koteā koa te meʼa ʼe tonu ke tou manatuʼi? ʼE tonu ke tou fakaʼapaʼapa ki te ʼu meʼa ʼa ʼihi. Ko te selevisi nofoʼaga neʼe nātou faigaʼi ke maʼu he ʼu koga fale ke tou momoe ai ʼi te ʼu ʼapi ʼo ni tēhina pea mo ni tuagaʼane. Kapau ʼe mole lelei tatatou aga pe ʼe tou tuku maveuveu te koga fale, ʼe mole toe tali anai te kau Fakamoʼoni ʼa Sehova e he tahi ki tona ʼapi mokā hoko he ʼu fakatahi ki muli mai.
10 Ko te maʼuli foʼou ʼaē ʼe tuʼu ia Efesi 4:24 ʼe fakatatau ki he kofu ʼe ʼai ʼi te ʼosi ʼo ta kita lituʼa ki te maʼuli ʼāfea. Ko te fetogi ʼaia ʼo te maʼuli ʼe tonu foki ke hā ʼi ʼotatou teu. Neʼe sioʼi ʼihi ʼu tēhina pea mo tuagaʼane, kae tāfito te kau tūpulaga, neʼe mole nātou tokaga ki ʼonatou ʼu teu, ko ʼihi neʼe mole nātou aga fakaʼapaʼapa. Ko ʼihi ʼe nātou huʼi ʼonatou sulie pea nātou hilihili ʼonatou vaʼe ki te hekaʼaga ʼaē ʼi ʼonatou muʼa pe ʼe nātou ʼeva kiliʼi vaʼe. ʼE fēnei koa tatatou aga ʼi te Fale ʼo te Puleʼaga? Tahi ʼaē meʼa, ko ʼihi ia nātou ʼe kau ki te papitema ʼe nātou tui te ʼu kofu sino ʼe tuʼu ai te ʼu lea faka laupisi pea mo te ʼu paki ʼo te mālama pe ʼe ko he ʼu paki ʼo te ʼu meʼa kehekehe. Ko te ʼu tagata ʼāfea ʼaē ʼe nātou fai te ʼu fehuʼi mo nātou ʼe kau ki te papitema ʼe tonu ke nātou fakatokaga ke mahino lelei kia nātou te ʼuhiga ʼo te teu fakaʼapaʼapa ki te ʼaho ʼaia. — Vakaʼi Te Tule Leʼo ʼo te ʼaho 1 ʼo sunio 1985, pasina 30, pea mo Te Tule Leʼo ʼo ʼaho 15 ʼo ʼoketopeli 1973, pasina 639.
11 Te ʼu meʼa puke leʼo pea mo fai ʼata: Logope te fakagafua ʼaē ʼo te ʼu meʼa fai paki ʼe mātou kole atu kia nātou fuli ʼaē ʼe nātou fakaʼaogaʼi te ʼu faʼahiga meʼa ʼaia ke ia nātou te fakaʼapaʼapa ki niʼihi, ke nātou fili fakatomuʼa te ʼu meʼa ka nātou haga ʼo faka ʼata, ke nātou fakaʼapaʼapa ki te loto ʼonatou ʼaē ʼe mole loto ki te fahaʼi ʼaia, lolotoga tanatou kakai pe ʼe ko tanatou fakalogo ʼaē ki te polokalama, pe ʼe ko te lolotoga ʼo te ʼu faikole. Ko ia ʼaē ʼe fai faka ʼata pe ʼe puke foʼi fime ʼe mole tonu ke nātou fakapoipoi kia nātou fuli ʼaē ʼi te fakatahi. ʼE mole tapu ia te puke ʼo te ʼu akonaki ʼi te fahaʼi ʼaē ʼe koutou nonofo ai. Kae ʼi te lolotoga ʼo te fakatahi, ʼe mole lelei ke feʼaluʼaki he tahi ʼi muʼa ʼo te hahaʼi moʼo tāʼofi te polokalama. Kapau ʼe ʼaoga, ʼe tonu ko nātou ʼe gāue fakatalitali ʼe nātou ʼolo anai kia nātou ʼaē ʼe mole nātou taupau te ʼofa faka kilisitiano ʼi te fahaʼi ʼaia. Koutou manatuʼi ke ʼaua naʼa ʼi ai he meʼa fai paki ‘vidéo’ pe ʼe ko he tahi atu meʼa ʼe fakapipiki ki te hila ʼaē ʼo te fale fakatahi, pea ke ʼaua naʼa ʼi ai he meʼa ʼi te ʼu meʼa ʼaia ʼe tuku ʼi te fahaʼi ʼaē ʼe tou feʼaluʼaki ai.
12 Ki te ʼu mtuʼa: ʼE mātou fia fakahā atu te maʼuhiga ʼaē ki te ʼu mātuʼa ke nātou fakatokaga tuʼumaʼu ki tanatou ʼu fānau, tatau aipe ʼi te ʼu fahaʼi ʼe fai ai te fakatahi pe ʼe ko te fale ʼaē ʼe nātou momoe ai (Taag. 29:15b; Luka 2:48). Lolotoga te polokalama, koutou tokaga ki takotou ʼu fānau ke nātou fakalogo pea toʼo hanatou ʼu nota. Ko te temi mālōlō ʼe ko he temi lelei ʼaia ke fai palalau ai mo niʼihi ʼo ni tahi atu kokelekasio.
13 Moʼo fakatā te maʼuhiga ke ʼiloʼi tuʼumaʼu pe ʼe ʼifea takotou ʼu fānau, tou palalau muʼa ki te meʼa neʼe hoko ki te tagata fai takisi, neʼe ʼi te kolo neʼe hoko ai te fakatahi, neʼe ina fakamatala ki te tēhina neʼe ina ʼave te ʼu taʼahine e lua ʼi te fale ʼaē ʼe fai ai te fakatahi. Neʼe nā fakatuʼutuʼu ke nā ʼolo ʼi te hoʼatā ʼaia, pea neʼe nā ʼui age ki te tagata fai takisi ʼe mole ʼiloʼi anai ʼe tana ʼu faʼe tana pupuli ʼo aʼu ki te hola nima. Ko te tagata fai takisi neʼe ina tuʼania ia nāua, kae neʼe feafeaʼi koa tana ʼu faʼe? Ko he meʼa kovi foki mokā neʼe hoko he meʼa kia nāua, ʼo feiā ai foki mo te ufiufi ka tau anai mo te huafa pea mo te kaugana ʼa ʼAtua!
14 Ko takotou faifaitahi ʼe kole atu: ʼO ʼuhiga mo te tāʼofi ʼaē ʼo te ʼu hekaʼaga. Koutou manatuʼi KE TOU TĀʼOFI PE TE ʼU HEKAʼAGA MOʼO TOTATOU FAMILI PEA MO NĀTOU ʼAĒ NEʼE ʼOMAI MO TATOU ʼI TE MOTOKĀ. Ko ʼihi fahaʼi ʼe tāʼofi kia nātou ʼaē kua matutuʼa pea mo nātou ʼe mole feala tanatou haʼele ʼi te lolotoga ʼo te fakatahi. ʼE mātou kole atu ke koutou fakasiosio ki te ʼu pano pea mo muliʼi te ʼu fakatuʼutuʼu ʼa nātou ʼaē ʼi te gāue fakatalitali. Ko ʼihi tēhina matutuʼa neʼe nātou ʼolo ʼo kumi honatou ʼu hekaʼaga koteʼuhi neʼe toʼo tonatou hekaʼaga e te kau tūpulaga. Ke ia koutou te fakaʼapaʼapa kia nātou ʼaē kua matutuʼa. ʼE mātou fakahemala ki te mole feala ʼaē ʼo te tali ʼo te ʼu kole ʼa nātou ʼaē ʼe nātou tau mo he ʼu faigataʼa ia ohage ko te ʼu mahaki pea mo nātou loto ke tāʼofi age honatou ʼu hekaʼaga pe ko honatou ʼu koga fale.
15 ʼE kole atu ke ʼaua naʼa lahi fau te ʼu meʼa ʼe koutou ʼaumai ki te fakatahi. Kapau ʼe mole hu he meʼa ʼi lalo ʼo takotou hekaʼaga, ʼe lagi lelei age tona tuku io koutou. Ko te ʼu kiʼi ʼaisi feʼāveʼaki ʼe mole gafua tona ʼaumai ki te ʼu fakatahi ke faigafua ai te feʼaluʼaki, pea kapau ʼe koutou hilihili ki te hekaʼaga ʼi tokotou tafa, ʼe koutou māpunuʼi anai te hekaʼaga ʼaia.
16 Ko te kau gāue ʼa Sehova ʼe nātou leleiʼia tanatou fakatahi ki he fale ʼe maʼa ʼo feala ai tanatou mulimuli ki te polokalama fakalaumālie neʼe lelei tona teuteuʼi. ʼE tou leleiʼia anai te faʼahi gāue neʼe fakatuʼutuʼu ki te ʼu fakatahi ʼaia. ʼAki te lotolelei pea mo te lahi ʼa te falā ʼa te Sosiete neʼe fakaʼaogaʼi ki te fahaʼi ʼaia, neʼe fai te ʼu fakatuʼutuʼu ke feʼauga te ʼu hekaʼaga, pea mo he mikolo lalahi totogi kovi, mo he selevisi ki te kai ke lelei pea mo ʼihi atu faʼahiga selevisi ke lelei ai tatatou nonofo ʼi te fakatahi pea mo tokoni kia tatou ʼi te ʼu meʼa fakalaumālie.
17 Koutou kau ki te fakatahi faka tisitilike “Kau kavelogo ʼo te mālama”: Ko te kau ki te fakatahi faka tisitilike “Kau kavelogo ʼo te mālama”, ʼe tou fiafia anai ʼi tatatou logo pe koteā ʼaē ʼe ʼui ai ko he fakaʼapaʼapa lahi pea mo he pilivilesio ʼaē ko te kau ki te kau kavelogo ʼo te mālama. ʼE fakamanatu mai foki ʼe ko te maʼua mamafa ʼaia. Ko tatatou faigaʼi he fakasiosio lahi age ki te meʼa ʼe tou fakalogo ki ai ʼi te fakatahi, ʼe tou liliu anai ko te kau kavelogo ʼo te mālama fakapotopoto pea ʼe tou mahino lelei ai leva ki totatou maʼua. Koutou faigaʼi he ʼu fakatuʼutuʼu ʼi te temi nei ke koutou kau ki te fakatahi ʼaia, mai te katiko ʼi te feliaono ʼo aʼu ki te faikole fakaʼosi ʼi te ʼahotapu hoʼatā.
[Talanoa ʼo te pasina 6]
Fakatahi faka tisitilike — Tokoni ke manatuʼi
Meʼa nofo: ʼE mātou lelei ia takotou kau ki te selevisi kumi ʼo te meʼa nofo. Fakamomoli fakavilivili takotou ʼu foaki pea mo takotou ʼu kole meʼa nofo. Kapau neʼe koutou fakatuʼutuʼu ke koutou nonofo ʼi te kolo ʼaē ʼe fai ai te fakatahi kae mole heʼeki koutou fai he ʼu fakatuʼutuʼu, koutou fai te fahaʼi ʼaia fakavilivili. Kapau ʼe koutou fakafisi ki takotou kole ʼo ʼuhiga mo te meʼa nofo, faitohi pe ʼe telefoni fakatomuʼa ki te selevisi fakatuʼutuʼu ʼo te meʼa nofo, ke feala ai tana foaki te meʼa nofo ʼaia ki he tahi age.
Ko te ʼu sikalaipe ʼo te ʼu kokelekasio ʼe nātou fakatokaga ki te ʼu Kole pea mo te ʼu Foaki meʼa nofo ke fai mo ʼave fakatomuʼa ki te tuʼasila ʼaē ʼe tonu ke ʼave ki ai.
Saliote toho tamaliki: ʼI ʼihi ʼu fahaʼi, ʼe tapu te fakaʼaogaʼi ʼo te ʼu saliote toho tamaliki ʼi te ʼu fakatahi. Ko te ʼu fakatuʼutuʼu ki te hāofaki ʼe mole ina fakagafua ke tuku ʼi te ʼu haʼele aga pe ʼe ʼi loto ʼo te ʼu atu hekaʼaga. ʼE lahi te ʼu hahaʼi ʼe feala ke nātou feʼiʼaki, ko te ʼu meʼa toho tamaliki ʼe fakatupu ai te ʼu tuʼutāmaki ki te ʼu toe kei liliki ʼo feiā ai foki kia nātou ʼe fetokaʼi anai ʼuhi ko te ʼu toe. Ke koutou fakatokaga ke ʼaua naʼa koutou ʼaumai te ʼu faʼahiga meʼa ʼaia ki te fakatahi. Kae, ko te ʼu hekaʼaga toe pe ʼe ko te ʼu hekaʼaga ʼaē ʼe nātou nonofo ai ʼi te motokā, ʼe feala ke fakapipiki e te ʼu mātuʼa ki he hekaʼaga ʼi ʼonatou tafa. Ko te logotahi ʼi te fahaʼi ʼaia ʼe ʼaoga ʼaupito.
Papitema: Ko nātou ʼaē ʼe kau ki te papitema ʼe nātou faiga anai ʼo nātou heheka ʼi te ʼu hekaʼaga ʼaē ʼi muʼa, ʼi muʼa ʼo te kamata ʼo te fakatahi ʼi te moeaki uhu. Ke nātou tahi mo ia te teu maʼanu mata fakaʼapaʼapa pea mo he tupenu holoholo. ʼI te ʼosi fai ʼo te akonaki ʼo te papitema pea mo te faikole, ko te taupau pelesita ʼe ina fakahā anai he ʼu fakatuʼutuʼu kia nātou ʼaē ʼe kau ki te papitema, pea ʼosi pea ina fakahivaʼi te katiko. ʼI te fakaʼosi, ko nātou ʼe kau ki te gāue fakatalitali ʼe nātou taki anai ia nātou ʼe kau ki te papitemi ki te fahaʼi ʼaē ʼe fai ai pe ʼe ki te ʼu motokā ʼaē ʼe ʼave ki ai nātou. Ko te papitema ko te fakatā ʼo te foaki ʼo kita, koia ʼe ko he meʼa ʼa kita tokotahi pea mo Sehova, ʼe mole fai he ʼu fakatuʼutuʼu ke fai he ʼu fai “papitema faka kaūga” ʼo he tokolua ʼe fetagihi pe ʼe nā tapiki lolotoga te hu ʼaē ki te vai.
Selevisi ʼa nātou ʼe fia gāue: Ko te tokoni ʼa nātou ʼe fia gāue ʼe ʼaoga ki te fakaʼalu lelei ʼo te fakatahi faka tisitilike. Tatau aipe pe ʼe koutou gāue ʼi he koga ʼo te fakatahi ʼaia, ko takotou tokoni ʼe ko he meʼa lelei ia. Kapau ʼe feala takotou tokoni, koutou ʼolo kia ia ʼaē neʼe hinoʼi ki te fahaʼi ʼaia mokā koutou aʼu mai ki te fakatahi. Ko te ʼu toe ʼaē mole heʼeki katoa tonatou taʼu 16 ʼe feala tanatou kau ki te gāue ʼi te fakatahi, kae ʼe tonu ke nātou gāue tahi mo tanatou matuʼa, tanatou faʼe pe ʼe ko he tahi atu kua aga fakapotopoto.
Pepa fakaʼiloga: Koutou ʼai tokotou pepa fakaʼiloga, ʼi te fakatahi ʼo tatau aipe mo takotou ʼu feʼaluʼaki haʼele pea mo takotou liliu. ʼE feala ai takotou tuku he faʼifaʼitaki lelei.
Te ʼu fakatokaga: Pe ʼe ko he fahaʼi pe ʼe tau ai takotou motokā, māpunuʼi tuʼumaʼu te ʼu matapā ʼo kalaviʼi pea ʼaua naʼa tuku he ʼu faʼahiga meʼa ʼo feala ai ke sio ki ai nātou ʼaē ʼe feʼaluʼaki ʼi te ala. Kapau ʼe feala, māpunuʼi takotou ʼu meʼa ʼi te tau muli ʼo takotou motokā. ʼAua naʼa tuku fakahāhā he meʼa maʼuhiga ʼi tokotou hekaʼaga.