Tou Faka Mafola Fakapotopoto ʼi Te ʼu ʼApi
1 Ia ʼaho nei, ko te “logo lelei” kua faka mafola ʼi te kele katoa (Mat. 24:14). ʼE hoko tafito te fahaʼi ʼaia ʼuhi ko te minisitelio ʼi te ʼu ʼapi. — Gāue 20:20, 21.
2 Ko tatatou ʼu ʼuluaki palalau ʼe tonu ke ʼi ai hona ʼuhiga ki te ʼu hahaʼi ʼe felāveʼi mo tatou. Ko te ʼu tagata, te ʼu fafine, pea mo te kau tūpulaga ʼe mole tatau te meʼa ʼaē ʼe nātou loto ki ai. Koia ʼaē ʼe ʼaoga ai ke tou teuteu ʼo ʼuhiga mo he ʼu faʼahiga palalau faka tohi-tapu ʼe ʼaoga tafito ki te ʼu hahaʼi ʼo totatou telituale.
3 Tou fakaʼaoga leleiʼi te ʼu tohi: Ko te tohi Mauli O Heegata ʼe tuʼu ai te ʼu akonaki kehekehe ʼe ʼaoga anai ki te hahaʼi ʼe tokolahi ʼi te ʼu koga meʼa kehekehe. Ko te ʼu fakatā, tatau aipe pe ko te ʼu paki, peʼe ko ʼatatou ʼu palalau, ʼe ko he tokoni fakapotopoto ʼaia. Ko te tohi ʼaia ʼe feala ai ke ina uga te loto pea mo tokoniʼi te hahaʼi ke nātou mahino ki te maʼuhiga ʼo fai he ʼu tonu, ko tona ʼuhiga ʼaē ke fetogi te ʼu meʼa ʼe nātou tui ki ai, tanatou aga, tanatou fakakaukau pea mo tonatou maʼuli. ʼAki tatatou ʼiloʼi lelei te ʼu manatu ʼo te tohi Mauli O Heegata, ʼe feala ai anai hatatou palalau fakapotopoto ki he ʼu faʼahiga manatu kehekehe. Ko he faka fealagia ʼaia kia tatou ke tou mahino ki te fia logo ʼo ia ʼaē ʼe palalau mo tatou.
4 Ko te fakapotopoto ʼaē ʼi te minisitelio, ʼe tonu ke tou fakahā ki te ʼu hahaʼi ʼe tou fia tokoniʼi fakamalotoloto nātou (Filp. 2:4). Tou faigaʼi ʼo fakatuʼutuʼu te fai palalau ki he faʼahi ʼo te Puleʼaga ʼe lelei kia ia ʼaē ʼe palalau mo tatou, pea ʼe ʼalu tahi mo te ʼu meʼa ʼe ʼaoga kia ia. Tou kumi ke tou mahino ki tana faʼahiga fakakaukau ʼo uga ia ke fakahā mai tana manatu ʼaki he ʼu fehuʼi ʼaoga mo te meʼa ʼe tou palalau ki ai. Tou fakalogo lelei ki tana ʼu tali. Ko tana ʼu palalau ʼe ko he faka fealagia ʼaia kia tatou ke tou ʼiloʼi pe ko te manatu fea ʼaē ʼe ʼaoga kia ia. ʼE tou fia tokoniʼi te hahaʼi ke nātou mahino ki te maʼuhiga ʼo te logo ʼo te Puleʼaga pea mo fakahā kia nātou pe ʼe feafeaʼi te ako ke lahi ta kita mahino ki te faʼahi ʼaia. Ko he tagata pea mo tona ʼohoana neʼe nā fakamatala neʼe nā tali he ako faka tohi-tapu heʼe ko te tagata Fakamoʼoni ʼaē neʼe ʼaʼahi age kia nāua neʼe ina fakahā ʼe lotomoʼoni ia ʼo tokoniʼi nāua.
5 ʼI te ʼu telituale ʼaē kua tuʼa lahi tona ʼaʼahi: ʼE ko meʼa maʼuhiga ʼaupito ke lelei tatatou gāue fakapotopoto ʼi he telituale kua tuʼa lahi tona ʼaʼahi. Ko he minisitelio fakapotoptoto lahi age ʼe tokoniʼi ai tatou ke loloto te gāue ʼe fai ʼi totatou telituale (w88 15/7 pp. 15-20). ʼE feala ke tou manatuʼi te aga ʼa ia ʼaē ʼe palalau mo tatou ʼi tatatou felogoi fakamuli ʼi tona muʼa matapā, pea fakaʼaogaʼi te faʼahi ʼaia, kae ʼaua naʼa tou hage ko he tahi neʼe mole heʼeki felāveʼi mo ia. ʼE feala pe ke tou fakamanatuʼi age tatatou ʼaʼahi fakamuli, pea fakatafito ki ai tatatou ʼu palalau. Ko te ʼu ʼuluaki palalau ʼe tuʼu ʼi te ʼu numelo ʼāfea ʼo te Minisitelio ʼo te Puleʼaga pea mo te tohi Comment raisonner ʼe feala ke fakaʼaoga ki te hahaʼi ʼo te telituale.
6 Ko Sehova ʼe ina fakaava te matapā ke tokolahi te hahaʼi ʼe nātou maʼu te ʼu manuʼia ka foaki mai anai e te Puleʼaga. Ko te minisitelio ʼo Sesu neʼe fakapotopoto koteʼuhi neʼe ʼofa ia ki te hahaʼi (Maleko 6:34). ʼE tou faigaʼi koa ia meʼa fuli ʼo muliʼi tona faʼifaʼitaki (1 Petelo 2:21)? Ke tou kau tafito pea mo fakapotopoto ki te minisitelio ʼi te ʼu ʼapi. — 2 Tim. 4:5.