Ko Te ʼu ʼAʼahi: Ko He Faʼahi ʼe Tonu Ke Fai
1 Ko te kau gāue ʼo te logo lelei ʼaē ko tatou neʼe tou maʼu te fakatotonu ʼaē ko te fai ʼo ni ʼu tisipulo (Mat. 28:19, 20). Koia ʼe ʼaoga ai ke fai te ʼu ʼaʼahi. ʼE koutou leleiʼia koa te faʼahi tafito ʼaia ʼo totatou minisitelio faka kilisitiano? Ko te fakapotopoto ʼi te ʼu ʼaʼahi ʼe ko he faʼahi ʼe tonu ke tou lagaʼi. — Taag. 22:29.
2 Ko te kilisitiano takitokotahi ʼaē kua foaki tona maʼuli ki te ʼAtua ʼe tonu ke hage kia ia ko hona maʼua te kau ki te gāue ʼaē ko te fai ʼo ni tisipulo. ʼE lagi feala anai ke tou fakafisi ki ni faʼahiga meʼa ʼe tou loto ki ai moʼo fakahāhā te falala ki te Puleʼaga. Ko te ʼu ʼaʼahi ʼe ko he faʼahi ʼaia ʼe tou fakafimālie ai te ʼu faʼahi fakalaumālie ʼa te ʼu hahaʼi fakamalotoloto.
3 Tou mulimuli ki te fia logo: ʼE tonu ke tou liliu ʼo ʼaʼahi te hahaʼi fuli neʼe fia logo ki te logo ʼo te Puleʼaga, tatau aipe pe neʼe mole nātou loto ki tatatou ʼu tohi. Tokolahi ʼe nātou fakahā tanatou fia logo ʼo fai palalau ki he ʼu manatu faka tohi-tapu. Neʼe fakahā mai e Sesu mo tana ʼu tisipulo ʼe feala hatatou taupau te fia logo ʼa he tahi ki te logo lelei ʼo te Puleʼaga ʼaki he ʼu fai palalau totonu, ʼe fakatafito ki te Tohi-Tapu. — Maleko 10:21; Gāue 2:37-41.
4 Ko totatou loto, mokā tou toe liliu mai, ʼe ko te kamata ʼo he ako faka tohi-tapu. ʼE lagi feala ke tou fakahā age ki ai pe ʼe feafeaʼi te fai ʼo he ako faka tohi-tapu ʼi te ʼapi. Koutou ʼiloʼi papau ʼe fakalogo mai Sehova ki takotou ʼu faikole ʼaē ʼe koutou fai ake koteʼuhi ko takotou fia maʼu he tahi fakamalotoloto ke fai hana ako. ʼE tapuakina anai e Sehova te ʼu faiga fakamalotoloto ʼe koutou fai ʼi tana gāue. He koʼe ʼe mole koutou kumi te tokoni ʼa Sehova pea mo fai ha kotou fakatuʼutuʼu ke kamata ha kotou ako faka tohi-tapu?
5 Tou fakaʼaoga leleiʼi te ʼu kiʼi pepa lotu: ʼE feala ke kamata he ʼu ako faka tohi-tapu ʼaki te ʼu kiʼi pepa lotu. Tokolahi neʼe kamata tanatou ʼu fai palalau ʼaki te paki ʼi te kiʼi pepa lotu. Koutou lau he palakalafe e tahi mo ia ʼe fakalogo mai. Ka fai he fehuʼi, koutou siʼisiʼi muʼa, pea koutou fakaafe ia ia ʼaē ʼe palalau mo koutou ke fai mai hana tali. Koutou kumi te ʼu vaega pea koutou vakaʼi pe ʼe feafeaʼi tona maʼuliʼi. ʼE feala anai takotou palalau ki te tohi ʼe koutou loto ke fai ai he ako faka tohi-tapu.
6 Tou fakaʼaogaʼi te tohi Comment raisonner: ʼE feala hatatou fai he ʼu ʼaʼahi fakapotopoto ʼaki te tokoni ʼa te tohi Comment raisonner. Koutou vakaʼi te pasina ʼo te tanakiʼaga peʼe ko te kumiʼaga: ko te meʼa ʼaia ʼe tokoniʼi ai koutou ke koutou fili he ʼu manatu ʼaoga ke koutou palalau ki ai mokā hoko atu takotou ʼu fai palalau. Ko te faʼahi ʼaē “Textes bibliques souvent mal compris” ʼe ʼaoga anai kia koutou moʼo tali ki ni fakatuʼutuʼu ʼe fai atu. ʼE fakahā mai e te ʼu pionie ʼe kamata tanatou ʼu ako faka tohi-tapu ʼaki tanatou fakaʼaogaʼi te ʼu manatu ohage ko te meʼa ʼi te pasina 399 ʼo te tohi Comment raisonner, ʼi te fehuʼi ʼaē: “Comment les Témoins de Jéhovah arrivent-ils à leur explication des Écritures? ” ʼE nātou fakahā kia ia ʼaē ʼe fia logo ʼe tou tuku te Tohi-tapu ke tali ki te fehuʼi ʼaia. Ko te faʼahi ʼaia ʼe fakapotopoto: he neʼe feala ai te kamata ʼo he ʼu ako faka tohi-tapu.
7 Ohage ko Sesu pea mo tana kau ʼapositolo, ʼe tonu ke tou fakahā he loto fakamalotoloto ki te ʼu ōvi ʼa Sehova (Luka 9:11). Ko te ʼofa ki totatou kāiga ʼe fakaloto malohiʼi ai tatou ke tou fakahā kia nātou te ʼu moʼoni ʼo ʼuhiga mo te Puleʼaga (2 Ko. 2:17). Kapau ʼe tou ʼuluaki manatu ʼo foaki ia meʼa fuli ʼe tou feala ke nātou maʼu ai te ʼu lelei fakalaumālie, ʼe tou lagaʼi anai te faʼahi ʼaē ko te fai ʼo te ʼu ʼaʼahi.