Kamata He ʼu Faipalalau ʼAki He ʼu Kiʼi Pepa Lotu

Talu mai Sanualio ʼo te 2018, kua tohi te ʼu faipalalau ʼi te ʼuluaki pasina ʼo te Kaupepa Ako Te Maʼuli Fakakilisitiano Mo Te Faifakamafola. Neʼe fakalotomalohiʼi ai tatou ke tou haga faipalalau mo te hahaʼi, kae mole ki te tufa pe ʼo he tohi. Moʼo tokoni ki ai, neʼe tuku mai te ʼu ʼata viteo ʼe ha ai pe ʼe feafeaʼi he kamata ʼo he faipalalau ʼaki pe te fakaʼaogaʼi ʼo te Tohi-Tapu. ʼE fakaʼuhiga koa ʼe mole kei tou fakaʼaogaʼi te ʼu tohi moka ʼe tou fai te ʼu matapa? Kailoa ia. ʼE feala pe hatatou fakaʼaogaʼi leleiʼi te ʼu kiʼi pepa lotu. Koʼeni te ʼu tokoni ki te faʼahi ʼaia:

1. Fai te fehuʼi ʼae ʼi te ʼuluaki pasina mo ʼona tali kehekehe.

2. Fakaha age te tali ʼo te Tohi-Tapu ʼae ʼi te pasina lua. Kapau ʼe feala, lau mo faipalalau ki ʼihi fakamahino ʼo te kiʼi pepa lotu.

3. Tuku age te kiʼi pepa lotu mo fakalotomalohiʼi ia ia ke ina lau fuli.

4. ʼI muʼa ʼo takotou mavae, fakaha age mo fai te fehuʼi ʼae ʼi te pasina fakamuli “Tou Fai Te Fehuʼi ʼAeni,” pea mo fakatuʼutuʼu ke kotou toe liliu ki ai ʼo tali ʼaki te Tohi-Tapu.

ʼI takotou toe liliu, faipalalau ki te tali ʼo te Tohi-Tapu, pea mo lagaʼi he tahi fehuʼi ke kotou toe liliu ʼo tali ki ai. ʼE feala hakotou lagaʼi he fehuʼi mai tatatou tuʼasila ʼae ʼi te Neti, peʼe ʼi he tohi peʼe ko he kaupepa ʼi tona pasina fakamuli. ʼI tona temi totonu, fakaha age te kaupepa ako Te ’u Logo Lelei Mai Te ʼAtua peʼe ko he tahi age tohi ako.