Tafitoʼaga ʼo Te Kaupepa Ako Te Maʼuli Fakakilisitiano Mo Te Faifakamafola
© 2024 Watch Tower Bible and Tract Society of Pennsylvania
VAHAʼA ʼO TE ʼAHO 6-12 ʼO MAIO
TE ʼU KOLOA ʼO TE TOHI-TAPU PESALEMO 36-37
“ ʼAua Naʼa Ke Ita ʼUhi Ko Te Kau Agakovi”
Kotea ʼAe Ka Pulihi Anai Moka Hoko Mai Te Puleʼaga ʼo Te ʼAtua?
4 Kotea ʼe tou logoʼi ʼo ʼuhiga mo te aga ʼa te hahaʼi agakovi? Neʼe ui e te apositolo ko Paulo, ʼe ʼi ai anai ʼi te ʼu ʼaho fakamuli, “he ʼu temi makehe pea mo faigataʼa.” Pea neʼe ina toe ui fenei: “ ʼE ʼaʼasili kovi age anai te hahaʼi agakovi pea mo kaka.” (2 Tim. 3:1-5, 13) ʼE kotou fakamoʼoni koa ki ai? Tokolahi ia tatou neʼe lagi kua tou felaveʼi mo he tahi neʼe agakovi mai, peʼe ko he tahi ʼe fehiʼa ki totatou lanu, peʼe ko he tahi ʼe faifakapo. ʼE ʼi ai ʼihi ʼe mole natou ufiufi ʼi te fai ʼo te ʼu aga kovi ʼaia. ʼE ʼi ai ʼihi ʼe natou lau ʼe natou fia tokoni ki te hahaʼi, kaʼe ko te ʼu hahaʼi agakovi. Kaʼe tatau aipe pe neʼe heʼeki tou felaveʼi mo he aluʼaga feia, kaʼe ʼe tou logoʼi te tuʼania ʼo ʼuhiga mo te ʼu hahaʼi agakovi feia. ʼE tou lotomamahi moka tou logo ʼe gaohi koviʼi te tamaliki, peʼe ko te kau matutuʼa, peʼe ko te hahaʼi vaivavai. ʼE hage pe te aga ʼa te hahaʼi agakovi ʼaia ko he ʼu manu peʼe ko he ʼu temonio. (Sakp. 3:15) Kae meʼa lelei foki, he ʼe foaki mai e Sehova he ʼamanaki lelei.
ʼE Tapuakiʼi e Sehova Ia Natou ʼAe ʼe Lotofakamolemole
10 Ka tou nofo mo hotatou ita ki he tahi, ʼe tou fakamamahiʼi pe ia tatou. ʼE hage pe tatatou nofo mo hotatou ita ki he tahi ko he kavega mamafa. Pea ʼe loto e Sehova ke tou liʼaki ke tou logoʼi ai te fimalie. (Lau ia Efeso 4:31, 32.) ʼE ina fai mai te tokoni ʼaeni: “Ke ke tuku te ita, ʼei, ke malū ifo tou ita.” (Pes. 37:8) ʼE ko he aga fakapotopoto ia te muliʼi ʼo te tokoni ʼaia. Koia ka tou nofo mo hotatou ita ki he tahi pea ʼe fakatupu kovi ki totatou maʼuli fakasino pea mo te faʼahi ʼo te fakakaukau. (Taag. 14:30) ʼE hage pe tatatou iita ki he tahi ko hatatou inu he meʼa ʼe kona. ʼE tou fakamamahiʼi pe ia tatou totonu kae ʼe mole ko ia ʼae neʼe agahala kia tatou. Koia ka tou lotofakamolemole ki ʼihi pea ʼe tou maʼuli lelei anai. (Taag. 11:17) ʼE tou logoʼi ai anai te tokalelei ʼo te loto pea mo tou lava hoko atu ia tatatou tauhi kia Sehova.
“Fakafiafia . . . Ia Sehova”
20 Pea “ko te kau agavaivai ʼe natou maʼu anai te kele.” (Pesalemo 37:11a) Kae ko ai koa te “kau agavaivai” ʼaia? Ko te kupu ʼae neʼe fakaliliu ʼaki te kupu “agavaivai” ʼe ko he kupu ʼe fakaʼuhiga ki “te mamahi, te fia agavaivai, te fakato laloʼi.” Ei ko “te kau agavaivai” ʼe ko natou ʼae fakatalitali ʼaki te agavaivai ke haʼu Sehova ʼo fakatonutonuʼi te ʼu aga heʼe faitotonu fuli ʼae ʼe fai kia natou. “ ʼE natou fiafia moʼoni anai ʼi te mahu ʼo te tokalelei.” (Pesalemo 37:11b) Mo te temi nei pe la, ʼe tou maʼu te tokalelei lahi ʼi te palatiso fakalaumalie ʼi te kokelekasio Fakakilisitiano moʼoni.
Te ʼu Koloa Fakalaumalie
it-2 340
Moʼuga
Tologa, tuʼu maʼu, peʼe maʼoluga. Ko te ʼu moʼuga ʼe tuʼu malohi pea mo tuʼu maʼu. (Esa 54:10; Hap 3:6; vakaʼi mo Ps 46:2.) Koia ʼe fakatatau te faitotonu ʼa Sehova ki “te ʼu moʼuga ʼo te ʼAtua” (Ps 36:6), neʼe fia fakaha e te tagata faipesalemo ko te faitotonu ʼa Sehova ʼe mole feala ke fetogi. Ko te ʼu moʼuga ʼe maʼoluga, koia ko te faitotonu ʼa te ʼAtua ʼe maʼoluga age ʼi te faitotonu ʼa te tagata. (Vakaʼi mo Esa 55:8, 9.) ʼE ui ia Fakaha 16:20, hili te huaʼi te fitu ipu ʼo te hauhau ʼo te ʼAtua, “neʼe puli te ʼu moʼuga.” Ko tona fakaʼuhiga ʼe pulihi anai e te ʼAtua te ʼu meʼa ʼe lalahi ohage ko te ʼu moʼuga.—Vakaʼi mo Sel 4:23-26.
VAHAʼA ʼO TE ʼAHO 13-19 ʼO MAIO
TE ʼU KOLOA ʼO TE TOHI-TAPU PESALEMO 38-39
ʼAua Naʼa Kotou Tukugakoviʼi Fau Ia Koutou Totonu
Ke Ke ‘Sio Fakahagatonu Ki Muʼa’ Ki Te Ka Haʼu
12 Lau ia 1 Soane 3:19, 20. ʼI ʼihi temi, ʼe feala ke tou tukugakoviʼi tatou. (Loma 3:23) Ko ʼihi ʼe natou tukugakoviʼi natou ʼuhi ko te ʼu meʼa ʼae neʼe natou fai ʼi muʼa ʼo tanatou iloʼi te moʼoni. Peʼe ko ʼihi ʼi te hili ʼo tanatou papitema. ʼE moʼoni, tatau aipe pe ʼe tou faiga ke tou fai te meʼa ʼae ʼe lelei, kae “ ʼe lahi te ʼu lakaga ʼe tou lakahala fuli ai.” (Sakp. 3:2; Loma 7:21-23) ʼE mahino ia, ʼe mole ko he meʼa lelei te tukugakoviʼi ʼo kita, kae ʼe feala pe ke fua lelei kia tatou. Kotea tona tupuʼaga? He ʼe feala ke uga ai tatou ke tou fai ni fetogi ʼi totatou maʼuli pea mo fakamalohiʼi tatou ke mole tou toe fai te hala ʼaia.—Hep. 12:12, 13.
13 ʼI te tahi fahaʼi, ʼe feala ke tou tukugakoviʼi fau ia tatou. ʼE feala pe ke tou haga tukugakoviʼi tatou, kae neʼe kua tou fakahemala ki ʼatatou agahala, pea neʼe kua fakamolemole mai ia Sehova kia tatou. ʼE kovi te faʼahi ʼaia, he ʼe feala ai ke fakatupu tuʼutamaki kia tatou. (Pes. 31:11; 38:4, 5) Ko he tuagaʼane neʼe ina tukugakoviʼi ia ia ʼuhi ko te ʼu agahala ʼae neʼe ina fai ʼi te temi muʼa. Neʼe ina ui fenei: “Kia au neʼe mole he ʼuhiga ʼo taku gaue kinakina maʼa Sehova, he ʼe lagi ʼe mole haofaki anai ia au.” Ko te tokolahi ia tatou ʼe manatu feia. Kae ʼe tonu ke tou mahino lelei ko te taʼi manatu ʼaia ʼe ko he hele fakatupu tuʼutamaki kia tatou. Fakakaukauʼi age muʼa te fiafia ʼa Satana mo kapau ʼe tou fakagata tatatou tauhi ʼae kia Sehova, kae neʼe kua ina fakamolemole mai.—Vakaʼi mo 2 Kolonito 2:5-7, 11.
ʼE Maʼuhiga Koa Totatou ʼu ʼAho Kia Sehova?
ʼE HAGE te ʼu ʼaho ʼo totatou maʼuli ʼe siʼisiʼi pea mo vaʼiganoa. Neʼe fakakaukauʼi e te tagata faipesalemo ia te nounou ʼo te maʼuli pea koia neʼe faikole fenei ai: “Fakailo mai toku gataʼaga, E Sehova, pea mo te fakafuafua ʼo toku ʼu ʼaho, ke au mahino ki toku vaʼiganoa. Koʼeni, ko toku ʼu ʼaho neʼe ke fai ke siʼisiʼi ʼaupito; pea ko te loaloaga ʼo toku maʼuli ʼe hage ia ʼe noa ʼi ʼou muʼa.” Neʼe hoha ia Tavite ʼo faigaʼi ke fiafia te ʼAtua ʼi tona faʼahiga maʼuli, ʼi tana ʼu palalau mo tana aga. ʼI tana fakaha ki te ʼAtua ia tana fakalogo ki ai, neʼe ina ʼui fenei: “ ʼE ʼau fakatalitali mo haga atu kia te koe.” (Pesalemo 39:4, 5, 7) Neʼe fagono e Sehova. Neʼe ina fakafuafua te ʼu gaue ʼa Tavite pea neʼe ina fakapale ʼo fakafuafua tatau ki ai.
ʼE faigafua te maʼumaʼua ʼi te minuta fuli pe ʼo te ʼaho pea mo tatatou tau mo he maʼuli ʼe lahi ʼaupito te ʼu gaue. ʼE feala ke tupu ai he toe tuʼania, tafito la ʼi te lahi ʼaupito ʼo te meʼa ʼe tonu ke fai mo te ʼu meʼa ʼe tonu ke hoko ʼi te maʼuli ʼi he kiʼi temi siʼisiʼi. ʼE tou hoha koa ohage ko Tavite—ke tou fakahoko totatou maʼuli ke tali e te ʼAtua? Ko te faʼahi ʼe tou ʼiloʼi papau, ko Sehova ʼe sio mai kia tatou pea mo ina sivisivi fakalelei ia tatou takitokotahi. Ko Sopo, ko he tagata neʼe manavasiʼi ki te ʼAtua, neʼe ina iloʼi kua hili ki ai taʼu ʼe 3 600, ko Sehova ʼe sio ki tona ʼu ala pea mo ina lau fuli tana ʼu gaue. Neʼe fehuʼi fenei e Sopo: “Ka fakaui maʼua mai anai, ʼe ʼau tali feafeaʼi age anai ki ai?” (Sopo 31:4-6, 14) ʼE feala hatatou fai he puleʼaki ke maʼuhiga totatou ʼu ʼaho kia mata ʼo te ʼAtua ʼo tou fakamuʼamuʼa te ʼu meʼa fakalaumalie, ʼo tou fakalogo ki tana ʼu fakatotonu, pea mo tou fakaʼaogaʼi fakapotopoto totatou temi. Tou vakaʼi fakaleleiʼi age muʼa te ʼu faʼahi ʼaia ʼe tolu.
Toe Fakamalohiʼi ʼAu Felogoi Mo Sehova
Palalau tuʼumaʼu kia Sehova. ʼUhi ko te tautea ʼo tou loto, ʼe lotomahino tau Tamai mo kapau ʼe faigataʼa tau faikole age. (Loma 8:26) Kae logo meʼa fuli, ke ke “kataki ʼi te faikole” pea mo ke fakaha kia Sehova ʼe ke loto ke ke liliu ko hona kaumeʼa. (Loma 12:12) ʼE manatuʼi e Andrej: “Neʼe au ufiufi ʼosi pea neʼe tautea toku loto. Kae ka au faikole, ʼe malulu mai te ʼu koga ʼaia. ʼE fimalie ai toku loto.” Kapau ʼe mole ke iloʼi he palalau ke ke fai kia Sehova, ʼe feala ke ke metitasio ki te ʼu Pesalemo 51 pea mo 65, ʼe tuʼu ai te ʼu faikole neʼe fai e te Hau ko Tavite ʼi tana ʼosi fakahemala.
Te ʼu Koloa Fakalaumalie
ʼE Kotou Tuha Koa Mo Te Falala?
16 ʼE maʼuhiga ʼaupito ia te lotololomi mo kapau ʼe tou loto ke falala mai ʼihi. ʼE tokoni mai ia te kalitate ʼaia ke tou nofo fakalogologo moka tou fia fakaha he meʼa neʼe ui mai kae mole tonu ke iloʼi. (Lau ia Taʼaga Lea 10:19.) ʼE feala ke faigataʼa hatatou lotololomi moka tou fakaʼaogaʼi ia te ʼu fakatahiʼaga ʼi te neti. Kapau ʼe mole tou nofo tokaga pea ʼe feala pe ke tou fakaha he ʼu manatu ʼe mole tonu ke iloʼi ʼo sisio ki ai te tokolahi. Ka tou ʼosi fakaha te ʼu manatu ʼaia pea ʼe mole kei tou lava puleʼi ia tona faʼahiga fakaʼaogaʼi ʼae e ʼihi peʼe ko te ʼu nunuʼa ʼae ka hoko anai. ʼE toe tokoni mai ia te lotololomi ke tou nofo fakalogologo moka fakaneke tatou e ʼotatou fili ʼe tou fakaha he ʼu meʼa ʼe feala ke fakatupu tuʼutamaki ki ʼotatou tehina mo tuagaʼane. ʼE feala ke hoko te fahaʼi ʼaia moka fakafehuʼi tatou e te kau polisi ʼi he fenua ʼe tapuʼi ai tatatou gaue. ʼI te taʼi ʼu aluʼaga ʼaia pea mo ʼihi atu, ʼe tonu ke tou mulimuli ki te pelesepeto ʼaeni ke tou ‘mapunuʼi totatou gutu.’ (Pes. 39:1) Tatau aipe pe ʼe tou faipalalau mo totatou famili peʼe mo ʼotatou kaumeʼa peʼe mo ʼotatou tehina mo tuagaʼane peʼe ko ʼihi atu, kae ʼe tonu ke tou tuha mo te falala. Koia ʼe maʼuhiga ai ke tou lotololomi.
VAHAʼA ʼO TE ʼAHO 20-26 ʼO MAIO
TE ʼU KOLOA ʼO TE TOHI-TAPU PESALEMO 40-41
He Koʼe ʼe Tonu Ke Tou Tokoni Ki ʼIhi?
ʼE Fiafia Ia Natou ʼAe ʼe Lotofoaki
16 Ko ia ʼae ʼe lotofoaki moʼoni ʼe mole ina foaki pea mo ina fakaʼamu ke toe liufaki mai. Neʼe ui fenei e Sesu: “Ka ke fai he kaitahi, fakaafe te kau masisiva, mo te kau maʼimoa, mo te ʼu ketu pea mo te kau kivi. Pea ʼe ke fiafia ai anai, koteʼuhi ʼe mole feala ke natou liufaki atu.” (Luka 14:13, 14) ʼE toe ui fenei ʼi te Tohi-Tapu: “E manuia anai te tagata manavaofa,” pea ʼe “Manuia ae e tokaga ki te masiva!” (Taag. 22:9; Pes. 41:2) ʼE tonu ke tou lotofoaki ʼuhi he ʼe tou fia tokoni moʼoni ki ʼihi.
17 Neʼe toe fakaʼaogaʼi e Paulo ia te ʼu palalau ʼae neʼe fai e Sesu ʼi tana ui ʼae “ ʼe lahi age te fiafia moka kita foaki, ʼi takita tali.” Neʼe mole fia palalau ia Paulo ʼo ʼuhiga pe mo te ʼu koloa fakamalama. He ʼe feala pe ke tou toe foaki ki te hahaʼi he ʼu fakalotomalohi peʼe ko he ʼu tokoni ʼe maʼu ʼi te Tohi-Tapu peʼe ko he gaue ʼe tou fai maʼa natou. (Gaue 20:31-35) Pea kapau ʼe tou tokagaʼi ia te ʼu palalau ʼae neʼe fai e Paulo pea mo ʼana gaue, ʼe tou mahino ai ʼe tonu ke tou foaki lahi totatou temi, totatou malohi pea mo totatou ʼofa.
18 Neʼe tokagaʼi e te kau popoto ʼae ʼe natou sivi ia te aga ʼa te hahaʼi, ʼe tou fiafia moka ʼe tou lotofoaki. Pea neʼe natou toe ui, ka fai e te hahaʼi he meʼa ʼe lelei ki ʼihi ʼe natou logoʼi ai he fiafia lahi. Neʼe toe ui e te kau popoto, kapau ʼe tou tokoni ki ʼihi, pea ʼe tou maʼu ai ia he fakatuʼutuʼu mo he ʼuhiga moʼoni ʼo totatou maʼuli. Koia ʼe ui ai e ʼihi kau popoto, ko te hahaʼi ʼae ʼe gaue kae mole totogi ʼe lelei age tonatou maʼuli malolo pea mo natou fiafia. ʼE moʼoni, ʼe mole tou punamaʼuli tatou ki ai koteʼuhi ko totatou Tupuʼaga ʼofa, ia Sehova, neʼe ina ui tuʼumaʼu pe ko te lotofoaki ʼe ina fakatupu ia te lotofiafia.—2 Tim. 3:16, 17.
ʼE Tokoni Atu Anai Ia Sehova Kia Koe
7 Ohage pe ko tana fai ki ʼana kaugana ʼi te temi muʼa, kapau ʼe ke mahaki, ʼe fakafimalieʼi pea mo tokoni atu anai ia Sehova kia koe. Neʼe tohi fenei e te Hau ko Tavite: “Manuia ae e tokaga ki te masiva! I te aho o te malaia e haofaki ia ia e [Sehova]; e taupau ia ia e [Sehova] pea e ina fakatologa tona mauli.” (Pes. 41:2, 3) ʼE mahino ia, neʼe mole fia ui e Tavite ko he tahi ʼe agalelei ʼi te temi ʼaia pea mo tokaga ki ʼae ʼe veliveli, ʼe maʼuli anai ʼo talu ai. Koia, ʼe tokoni feafeaʼi ia Sehova ki he tahi ʼe agalelei? Neʼe fakamahino fenei e Tavite: “ ʼE fakamalohi ia ia e [Sehova] i tona moeaga o te mamahi, e ke faitoo ia ia i ona mahaki fuli.” (Pes. 41:4) ʼE iloʼi lelei e Sehova te mamahi ʼe felaveʼi mo ʼana kaugana pea ʼe mole ina galoʼi anai ia natou. ʼE feala ke ina foaki kia natou te malohi pea mo te poto. Neʼe toe fakatupu e Sehova te tagata ʼi hona aluʼaga ʼe feala ai hana faitoʼo ia ia totonu.
Ke Tou Faʼifaʼitakiʼi Te Agaʼofa Mo Te Manavaʼofa ʼo Sehova
17 ʼE moʼoni, ʼe fua lelei kia koe ia tau agaʼofa. Kae ko te tupuʼaga tafito ʼo tau fakaha ia te agaʼofa, ko tau fia faʼifaʼitakiʼi mo fia fakakololiaʼi ia Sehova. Ko Sehova ʼe ko te Matapuna ʼo te ʼofa mo te agaʼofa. (Taag. 14:31) ʼE ko te faʼifaʼitaki lelei tukupau ia kia tatou. Koia, tou fai ia meʼa fuli ʼe tou lavaʼi ke tou faʼifaʼitakiʼi ia te ʼAtua ʼaki tatatou fakaha ia te agaʼofa. He ʼe tou fakaovi ai anai ki ʼotatou tehina mo tuagaʼane pea mo tou felogoʼi lelei ai mo te hahaʼi.—Kal. 6:10; 1 Soa. 4:16.
Te ʼu Koloa Fakalaumalie
it-1 1260
Sehova
ʼE fakamaʼuhigaʼi ʼi te Tohi-Tapu katoa ia te pule faʼitaliha ʼa Sehova, ʼo ha mai ai ko te ʼuluaki fakatuʼutuʼu ʼa Sehova ko te fakatapuha ia tona huafa. Koia ʼe tonu ke pulihi ia te ʼu aluʼaga fuli ʼae neʼe ʼulihi ai tona huafa. Kae ʼe mole gata ai, ʼe maʼua ki te kau ʼaselo fuli ʼi te lagi pea mo te hahaʼi fuli ʼi te kele ke natou fakamaʼuhigaʼi ia tona huafa maʼoniʼoni. ʼE tonu ke natou fakaʼapaʼapa ʼaki he loto ʼe lelei ki te ʼuhiga tuʼi ʼaliki ʼo Sehova pea mo fiafia ʼi te tauhi kia te ia mo tonatou loto katoa. Ko te koga la ʼaia neʼe ui e Tavite ʼi te Pesalemo 40:5-10, ʼi tana faikole kia Sehova, ke fakatapuha ia te huafa ʼo Sehova. (Tou tokagaʼi ia Hep 10:5-10 neʼe ui e te apositolo ko ʼihi koga ʼo te Pesalemo ʼaeni neʼe fakahagahaga kia Sesu Kilisito.)
VAHAʼA ʼO TE ʼAHO 27 ʼO MAIO–2 ʼO SUNIO
TE ʼU KOLOA ʼO TE TOHI-TAPU PESALEMO 42-44
Tou Tokaga Lelei Ki Te Ako ʼAe ʼe Haʼu Mai Te ʼAtua
Ko He ʼu Puani ʼAoga ʼo Te Lua Koga ʼo Te ʼu Pesalemo
42:4, 5, 11; 43:3-5. Kapau ʼe hoko he aluʼaga fakatemi ʼe mole feala hatatou fakatahi ai mo te kokelekasio, ʼe tou maʼu anai he lotomalohi mo kapau ʼe tou manatuʼi ia te ʼu fiafia ʼae neʼe tou maʼu ʼi tatatou fakatahi mo te kokelekasio. Logo la ʼi te kamata, ʼe lagi tou lotomamahi ʼaupito anai ʼi tatatou to kehe, kae ʼe ina toe fakamanatuʼi mai ko te ʼAtua ʼe ko totatou holaʼaga pea ʼe tonu ke tou fakatalitali ki ai ke ina fakaʼateainaʼi tatou.
w12 15/1 15 ¶2
Kotea ʼAe ʼe Tonu Ke Tou Fai Ke Tou Fiafia ʼi Te Ako Ia Tohi-Tapu Pea Ke Fua Lelei Kia Tatou
FAIKOLE: Ko te ʼuluaki koga ʼe tonu ke tou fai ko te faikole. (Pes. 42:8) Kotea tona tupuʼaga? He ʼe ka tou ako ia te Tohi-Tapu ʼe tou fakahoko ai tatatou tauhi kia Sehova. Koia ʼe tonu ai ke tou kole kia Sehova ke ina avahi ʼotatou loto pea mo foaki mai tona laumalie maʼoniʼoni. (Luka 11:13) Neʼe ui fenei e Barbara, kua fualoa tana misionea: “Tuʼumaʼu pe ʼe au faikole ʼi muʼa ʼo taku lau pea mo ako ia te Tohi-Tapu. ʼE au logoʼi ʼe hage ʼe nofo ia Sehova ʼi ʼoku tafa pea ʼe fiafia ʼi te meʼa ʼe au fai.” Ka tou faikole ʼi muʼa ʼo tatatou ako ia te Tohi-Tapu, ʼe tou teuteuʼi ai ʼotatou loto ke tou tali ai te meʼa kai fakalaumalie ʼe foaki mai.
“Ke Malohi ʼOu Nima”
11 ʼE toe feala ke fakamalohiʼi tatou e Sehova ʼaki te ʼu ako ʼae ʼe tou maʼu ʼi ʼatatou fono mo ʼatatou fakatahi lalahi, pea mo te ako fakateokalatike. ʼE feala ʼaki te ʼu ako ʼaia, ke tou tauhi ki te ʼAtua mo he loto ʼe lelei, ke tou fai hatatou ʼu fakatuʼutuʼu pea ke tou fakahoko ʼotatou maʼua Fakakilisitiano. (Pes. 119:32) ʼE ke loto koa ke ke maʼu te malohi ʼaki te ako ʼae ʼe foaki atu e Sehova?
12 Neʼe tokoni ia Sehova ki tana hahaʼi ke natou malo ʼi te kau Amaleke mo te kau Etiopea. Pea neʼe ina foaki age kia Neemia mo te kau Sutea ia te malohi ke natou fakaʼosi ia te laga ʼo te ʼu kaupa ʼo Selusalemi. ʼO toe feia pe, ʼe foaki mai anai e te ʼAtua ia te malohi ke tou hoko atu tatatou faifakamafola, logo la totatou lotohoha, mo te fakataga pea mo te fakafisi ʼa ʼihi ki te logo. (1 Pet. 5:10) ʼE mole pulihi fakamilakulo anai e Sehova ʼotatou faigataʼaia. ʼE tonu foki mo tatou ke tou fai he ʼu faiga. ʼO feafeaʼi? ʼE tonu ke tou lau te Folafola ʼa te ʼAtua ʼi te ʼaho fuli, ke tou teuteuʼi ʼatatou fono pea ke tou kau ki ai ʼi te vahaʼa fuli, ke fai tuʼumaʼu tatatou ako tokotahi, mo te ako fakafamili pea ke tou fakaha tatatou falala kia Sehova ʼi te faikole. ʼAua naʼa tou tuku he meʼa ke ina fakaleluʼi tatou mai te ʼu fakatuʼutuʼu ʼa Sehova moʼo fakamalohiʼi pea mo fakalotomalohiʼi ʼo tatou. Kapau ʼe ke sio ifo kua vaivai ʼou nima ʼi he tahi ʼo te ʼu aluʼaga ʼaia, faikole ki te ʼAtua ke tokoni atu. Pea ʼe ke sio anai pe ʼe fakatupu feafeaʼi e te laumalie ʼo te ʼAtua ia ‘koe, ia te fia fai mo te faʼafai ʼo tona finegalo.’ (Flp. 2:13) Kae ʼe feala koa ke ke fakamalohiʼi te ʼu nima ʼo niʼihi?
Te ʼu Koloa Fakalaumalie
it-1 417
Kuli Vao
ʼE tautau palalau ʼi te Tohi-Tapu ki te ʼu kuli vao moʼo fakata ki he aluʼaga. Ohage la, neʼe fakaʼofaʼofa ʼosi te aluʼaga ʼo Sopo, koia neʼe ui ai ʼi te Tohi-Tapu neʼe “liliu ko te tehina ʼo te ʼu kuli vao.” (Sop 30:29) Ne’e fakamatala e te tagata faipesalemo te to ʼa te hahaʼi ʼa te ʼAtua ʼi te tau, pea neʼe ina ui fenei: “Neʼe ke laliki matou ʼi te potu ʼae ʼe maʼuʼuli ai te ʼu kuli vao.” (Ps 44:19) Neʼe lagi talanoa ki te koga meʼa ʼae neʼe fai ai te tau pea ʼomai te ʼu kuli vao ʼo kai te ʼu sino mate ʼo te kau solia. (Vakaʼi mo Ps 68:23.) Neʼe ʼa takai e te kau papilone ia te kolo ko Selusalemi ʼi te taʼu 607 I.M.T.S. Neʼe hoko ai te toe hoge meʼa kai ʼo tupu ai te gaohi koviʼi e te ʼu faʼe ʼanatou fanau totonu. Koia neʼe palalau ai ia Selemia ki te agakovi ʼo tana hahaʼi, mo tanatou mole hage ko te ʼu kuli vao fafine ʼae ʼe tokaga lelei ki ʼonatou kiʼi ʼuhi.—Tgl 4:3, 10.
VAHAʼA ʼO TE ʼAHO 3-9 ʼO SUNIO
TE ʼU KOLOA ʼO TE TOHI-TAPU PESALEMO 45-47
Ko Te Hiva Ki Te Faiʼohoana ʼo Te Hau
Tou Fiafia Ki Te Faiʼohoana ʼo Te Akeno
8 Lau ia Pesalemo 45:14, 15. Ko te fafine ʼohoana kua “fakamataleleiʼi ki tona ʼohoana” pea “e gigila katoa” ki te faiʼohoana fakaʼaliʼaliki. Ia Apokalipisi 21:2, MN, ʼe fakatatau ai te fafine ʼohoana ki he kolo, ia te Selusalemi Foʼou. ʼE gigila te kolo ʼaia ʼi selo ʼaki “te kololia o te Atua” pea ʼe tatau tona gigila mo ʼae ʼo “he foi maka mauhiga lahi, o he foi maka ko te sasepe ae e malama o hage ko te kilisitale.” (Apk. 21:10, 11) ʼE fakatalakitupua te fakamatalatala ʼo te taulekaleka ʼo te Selusalemi Foʼou ʼi te tohi ʼo Apokalipisi. (Apk. 21:18-21) Pea ko te fafine ʼohoana ʼe “gigila katoa” ia. ʼE ko te taʼi faiʼohoana fakaʼaliʼaliki la ʼaia ʼi te lagi ʼae ʼe tou fakatalitali ki ai.
9 ʼE ʼave te fafine ʼohoana ki tona ʼOhoana, ia te Hau Fakamesia. ʼE ina teuteuʼi pea mo fakamaʼa ia te fafine ʼohoana ʼaki “te folafola.” Pea ko te fafine ʼohoana ʼe “maonioni mo hee mele.” (Efe. 5:26, 27) ʼE tonu foki ke tuha tona teu mo te aluʼaga ʼaia. Pea ʼe feia tona teu ʼohoana. “E ina kofu he kofu nee lalaga aki te aulo” pea “e ave ia ia kia mua o te hau, aki he kofu nee teuteui ke matalelei.” ʼO ʼuhiga mo te faiʼohoana ʼo te Akeno, “neʼe fakatotonu [ki te fafine ʼohoana] ke ina kofuʼi te lino manifi gigila pea mo mamaʼa, he ʼe ko te lino manifi ʼe ina fakatata ia te ʼu gaue faitotonu ʼa te kau maʼoniʼoni.”—Apk. 19:8, MN.
Kotea ʼe Ui Ia Apokalipesi ʼo ʼUhiga Mo Totatou Ka Haʼu?
10 Kotea ka fai e Sehova ki te ʼohofi ʼaia? ʼE ina ui fenei mai: “ ʼE hake anai toku ita.” (Esk. 38:18, 21-23) ʼE talanoa te kapite 19 ʼo Apokalipesi ki te ʼu aluʼaga ka hoko ki ʼamuli. ʼE fekauʼi ifo e Sehova ia Tona ʼAlo ke ina puipui tana hahaʼi pea mo tauʼi ʼona fili. ʼE kau anai “te ʼu kautau ʼae ʼi te lagi,” ia te kau ʼaselo agatonu ʼo feia mo te toko 144 000 mo Sesu ki te fakahoko ʼo te tau ʼaia kia Koke ʼo Makoke. (Apk. 17:14; 19:11-15) ʼE fakaʼosi feafeaʼi anai te tau ʼaia? ʼE fakaʼauha anai ʼo talu ai ia te hahaʼi mo te ʼu puleʼaga fuli ʼae ʼe fakafeagai kia Sehova.—Lau ia Apokalipesi 19:19-21.
11 Fakakaukauʼi age muʼa koe ia te aluʼaga ʼe logoʼi e te ʼu kaugana agatonu ʼa Sehova ʼi te kele ʼi tanatou sio ʼae ki te pulihi ʼo te ʼu fili fuli ʼo te ʼAtua. ʼI te temi ʼaia, ʼe natou fiafia lahi anai. ʼE kalaga fakafiafia anai te lagi moka pulihi ia Papiloni Lahi. Kae ʼe ʼi ai te tahi faʼahi ʼe natou toe fiafia lahi ai anai. (Apk. 19:1-3) ʼE ko he aluʼaga maʼuhiga ʼaupito ʼe talanoa ki ai te tohi ʼo Apokalipesi, ʼe ko “te ʼohoana ʼo te Akeno.”—Apk. 19:6-9.
12 ʼE hoko anai ʼafea te faiʼohoana? ʼE katoa anai te toko 144 000 ʼi selo ʼi muʼa pe ʼo te kamata ʼo te tau ʼo Alamaketone. Kae ʼe mole ko te temi anai ʼaia ʼe fai ai te ʼohoana ʼo te Akeno. (Lau ia Apokalipesi 21:1, 2.) ʼE tonu muʼa ke hoko te tau ʼo Alamaketone pea ke pulihi te ʼu fili fuli ʼo te ʼAtua. Hili ʼaia, pea ʼe hoko anai te faiʼohoana.—Pes. 45:3, 4, 13-17.
it-1 1041
Tau
Ka ʼosi anai te tau ʼaia, ʼe maʼuli anai te hahaʼi ʼi te tokalelei lolotoga taʼu ʼe afe. ʼE ui fenei ʼi te Pesalemo: “ ʼE . . . fakagata [e Sehova] te ʼu tau ʼi te kele katoa. ʼE ina fasiʼi te nahau pea mo maumauʼi te tao. ʼE ina tutu te ʼu saliote tau.” Neʼe kua hoko te fakapapau ʼaia ʼi te temi ʼae neʼe maumauʼi e Sehova ia te ʼu mahafu tau ʼo ʼonatou fili pea mo fakatuʼu ia te tokalelei ʼi te fenua ʼo Iselaele. ʼE pulihi anai e Kilisito ia te kau fakafeagai ʼi Alamaketone, pea ʼe maʼu anai ia te tokalelei ʼi te kele katoa. (Ps 46:8-10) Ko natou ʼae ka natou maʼu anai ia te maʼuli heʼe gata, ʼe ko natou ʼae ʼe natou fai “ni huo fuli kele ʼaki ʼanatou heleta pea mo ni hele tuʼusi ʼakau ʼaki ʼanatou tao” pea ʼe “mole natou toe ako anai te tau,” “ ʼe ko Sehova ʼo te ʼatu kautau, ʼae neʼe ina fakaha tonu atu.”—Esa 2:4; Mik 4:3, 4.
Te ʼu Koloa Fakalaumalie
Kotea ʼAe Ka Pulihi Anai Moka Hoko Mai Te Puleʼaga ʼo Te ʼAtua?
9 Kotea ʼae ka ina fetogi anai ia te ʼu kautahi aga fakakaka? Hili Alamaketone, ʼe kei maʼu anai koa he kautahi ʼi te kele? ʼE ui fenei ʼi te Tohi-Tapu: “ ʼO mulimuli ki tana fakapapau, ʼe tou fakaatalitali ki he lagi foʼou mo he kele foʼou, pea ʼe maʼu ai anai te faitotonu.” (2 Pet. 3:13) Ko te lagi ʼafea ʼe ko te ʼu puleʼaga kaka. Ko te kele ʼafea ʼe ko te hahaʼi ʼae neʼe fakalogo ki te ʼu puleʼaga kaka ʼaia. Ka pulihi anai natou ʼaia, ko ai ʼae ka ina fetogi anai natou? “He lagi foʼou mo he kele foʼou.” Ko te lagi foʼou ʼe ko he puleʼaga foʼou, ʼe faʼufaʼu e Sesu Kilisito pea mo te toko 144 000 ʼae ka kauga hau anai mo ia. Ko te kele foʼou, ʼe ko te hahaʼi ʼae ka puleʼi anai e te Puleʼaga ʼo te ʼAtua. ʼE faʼifaʼitakiʼi lelei anai e Sesu mo ʼona kauga hau, ia Sehova ʼAtua, ia ia ʼae ko te ʼAtua ʼo te tokalelei. (1 Ko. 14:33) ʼE tou mahino ai, ʼe fakatuʼutuʼu lelei anai te “kele foʼou.” ʼE ʼi ai anai he ʼu tagata agalelei ʼe natou tokakaga anai ki te ʼu gaue. (Pes. 45:17) ʼE takitaki anai e Sesu pea mo te toko 144 000 ia te ʼu tagata ʼaia. ʼI te temi ʼaia, ʼe fetogi anai e te kautahi ʼa te ʼAtua ia te ʼu kautahi aga fakakaka fuli. Pea ko te kautahi ʼaia ʼe mole feala anai ke liliu ʼo aga fakakaka.
VAHAʼA ʼO TE ʼAHO 10-16 ʼO SUNIO
TE ʼU KOLOA ʼO TE TOHI-TAPU PESALEMO 48-50
ʼU Matuʼā: Kotou Fakamalohi Te Falala ʼo Tokotou Kiʼi Famili Ki Te Kautahi ʼa Sehova
ʼE Kotou Fiafia Anai ʼi Te Tauhi Moʼoni
11 Ka tou ako ia te Tohi-Tapu pea mo akoʼi ʼatatou fanau, ʼe tou tauhi kia Sehova. Neʼe mole gaue ia te kau Iselaele ʼi te aho ʼo te Sapato, kae neʼe tonu ke natou tokakaga tafito ki tanatou felogoi mo Sehova ke malohi tuʼumaʼu. (Eke. 31:16, 17) Neʼe natou akoʼi ki ʼanatou fanau te ʼu gaue ʼa Sehova pea mo tona manavaʼofa. ʼE toe feia pe mo tatou, ʼe tonu ke tou toʼo he temi ke tou lau pea mo ako ia te Tohi-Tapu. He ka tou fai ia te faʼahi ʼaia, ʼe tou fakahoko ai tatatou tauhi kia Sehova pea mo fakaovi ki ai. (Pes. 73:28) Pea ka tou ako ia te Tohi-Tapu mo totatou kiʼi famili, ʼe tokoni ai ki ʼatatou fanau ke natou felogoi totonu mo ia pea mo ʼoʼofa ai.—Lau ia Pesalemo 48:13.
w11 15/3 19 ¶5-7
Ko He Aluʼaga Fakatupu Fiafia Ki Te ʼu Famili
“Kotou foliʼi ia Sione, ʼei, kotou foliʼi katoa. Kotou lau ʼona tule. Kotou tokagaʼi lelei ʼona kaupa. Kotou vakavakaʼi ʼona tule malohi, Ke feala ai hakotou fakamatala ki te ʼu taʼiake ʼae ka hoa mai.” (Pes. 48:12, 13) Neʼe fakalotomalohiʼi e te tagata faipesalemo ia te kau Iselaele ke natou vakavakaʼi fakalelei ia Selusalemi. Kotou fakakaukauʼi age muʼa ia te ʼu famili ʼae neʼe olo ʼi te taʼu fuli ki te ʼu ʼaho lalahi pea mo sisio ki te fale lotu taulekaleka. ʼE mahino ia neʼe natou fia “fakamatala ki te ʼu taʼiake ʼae ka hoa mai” ia te ʼu meʼa ʼe neʼe natou sisio ki ai.
Neʼe mole iloʼi e te fineʼaliki ʼo Sepa, neʼe makehe ʼaupito ia te ʼafio ʼa te hau ko Salomone, pea ko tona poto neʼe lahi age ʼi te ʼu fakamatala ʼae neʼe kua logo ki ai. Kotea ʼae neʼe fakamoʼoni ki ai? “Neʼe mole pe la au tui ki te ʼu fakamatala ʼaia ʼo kaku ki taku hoki haʼu ʼo sio mata ki ai.” (2 Klk. 9:6) Ko te ʼu meʼa ʼae ʼe tou “sio mata ki ai” ʼe feala ke malave ki ʼotatou loto.
ʼE feafeaʼi hakotou tokoni ki ʼakotou fanau ke natou “sisio mata” ki te taulekaleka ʼo te kautahi ʼa Sehova? Kapau ʼe feala, kotou olo ʼo ʼaʼahi te Petele. Neʼe maʼuli ia Mandy mo Bethany ʼi he koga meʼa ʼe vaha ia kilometa ʼe 1 500 ki te Petele ʼo tonā fenua. Pea neʼe tautau ʼave naua ʼe tanā ʼu matuʼā ʼo ʼaʼahi te Petele. Neʼe nā ui fenei: “ ʼI te kamata, neʼe ma manatu ʼe ko he koga meʼa fakamataku, ʼe maʼuʼuli ai te ʼu tehina mo tuagaʼane kua matutuʼa. Kae neʼe ma felaveʼi mo ni tupulaga ʼe natou fiafia ʼi te gaue kinakina maʼa Sehova. Neʼe ma mahino ai ko te gaue ʼae ʼe fakahoko e te kautahi ʼa Sehova ʼe mole gata pe ʼi toma fenua. Pea ka ma toe liliu kio matou kua ma lotomalohi ʼosi.” Neʼe malave ʼosi ki te loto ʼo Mandy pea mo Bethany ʼi tanā olo ʼae ʼo sio mata ki te kautahi ʼa Sehova, koia neʼe nā fakatotonu ai ke nā liliu ʼo pionie. Pea neʼe fakaafe leva naua ke nā gaue ʼi te Petele.
Ke Hage Takotou Aga Ko He Hahaʼi ʼo Te Puleʼaga ʼo Te ʼAtua!
5 Ke ako te hisitolia. Ko he tahi ʼe fia kau ki te puleʼaga ʼo he fenua, ʼe lagi tonu ke ina ako tona hisitolia. Mai tona ʼaluʼaga ʼae ʼe tou fia fakalogo ki te Puleʼaga ʼo te ʼAtua, pea ʼe tonu ke tou faiga ʼo ako ia meʼa fuli ʼo ʼuhiga mo te Puleʼaga ʼaia. ʼE tonu ke tou faʼifaʼitakiʼi te ʼu foha ʼo Kole ʼae ʼi te temi ʼo te Iselaele ʼafea. Neʼe natou ʼoʼofa ki te kolo ʼo Selusalemi mo tona fale lotu, pea mo natou leleiʼia te palalau ki te hisitolia ʼo te kolo ʼaia, mole ʼuhi ko tona matalelei kae ʼuhi ko “te kolo aia o te hau lahi” ʼae ko Sehova. Neʼe akoʼi ai ki te hahaʼi te ʼu Lao ʼa Sehova pea mo natou tauhi ai kia te ia. Ko te hahaʼi ʼae neʼe puleʼi e “te hau lahi” neʼe ko te hahaʼi ʼae neʼe ʼofainaʼi e Sehova. (Lau ia Pesalemo 48:2, 3, 10, 13, 14.) ʼI totatou temi, ʼe toe maʼu e te ʼAtua ʼi te kele tana hahaʼi kua ina fakatuʼutuʼu. Ohage ko te ʼu foha ʼo Kole, ʼe tonu ke tou fia ako te hisitolia ʼo te hahaʼi ʼa te ʼAtua pea mo palalau ki ai. Kapau ʼe lahi te ʼu meʼa ʼae ʼe tou ako ʼo ʼuhiga mo te hahaʼi ʼa Sehova pea mo feafeaʼi tana tokoni kia natou, pea ʼe toe moʼoni lahi age kia tatou te Puleʼaga ʼo te ʼAtua. ʼE malohi ai anai tatatou fia fakamafola te logo lelei ʼo te Puleʼaga.—Sel. 9:24; Luka 4:43.
Te ʼu Koloa Fakalaumalie
it-2 799
Te ’u Koloa
Ko te Puleʼaga ʼo Iselaele, neʼe ko he Puleʼaga neʼe koloaʼia, koia neʼe maʼu lahi tanatou meʼa kai mo tanatou vai (1Ha 4:20; Ekl 5:18, 19), pea neʼe mole natou masiva. (Taa 10:15; Ekl 7:12) Neʼe ko te loto ʼaia ʼo Sehova ke natou maʼu koloa ʼuhi ko tanatou gaue kinakina (vakaʼi Taa 6:6-11; 20:13; 24:33, 34), kae neʼe fakatokaga natou e Sehova ke ʼaua naʼa galo kia natou, ko ʼonatou koloa ʼe haʼu mai ia ia, pea ke ʼaua naʼa natou tuku tanatou falala ki ʼonatou koloa. (Tet 8:7-17; Ps 49:6-9; Taa 11:4; 18:10, 11; Sel 9:23, 24) Neʼe ina fakamanatuʼi age ko ʼonatou koloa ʼe fakatemi pe ia (Taa 23:4, 5), pea ʼe mole feala ke foaki he koloa ki te ʼAtua moʼo haofaki he tahi mai te mate (Ps 49:6, 7), pea ʼe mole maʼuhiga te ʼu koloa ki te kau mate (Ps 49:16, 17; Ec 5:15). Neʼe fakamahino age kapau ʼe natou manumanū ki te ʼu koloa ʼe natou fai anai he ʼu aga kaka ʼe fehiʼa ki ai ia Sehova. (Taa 28:20; vakaʼi mo Sel 5:26-28; 17:9-11.) Neʼe fakalotomalohiʼi natou ke natou ‘fakamaʼuhigaʼi ia Sehova ʼaki ʼonatou koloa.’—Taa 3:9.
VAHA’A ’O TE AHO 17-23 ’O SUNIO
TE ʼU KOLOA ʼO TE TOHI-TAPU
Kotea ʼe Feala Ke Kotou Fai Ke ʼAua Naʼa Kotou Fai He Agahala Mamafa
ʼE Feafeaʼi Hau Puipui Ia Tou Loto?
4 Ia Taaga Lea 4:23, ʼe fakaʼuhiga te kupu “loto” ki “te takele o te loto.” (Lau ia Pesalemo 51:8.) ʼE toe fakaʼuhiga te kupu loto ki ʼatatou manatu, mo te ʼu meʼa ʼae ʼe tou logoʼi, mo te tupuʼaga ʼae ʼe tou fai ai he faʼahi pea mo ʼatatou fakaʼamu. Ko te ʼuhiga moʼoni ʼo totatou loto kae ʼe mole ko te meʼa ʼae ʼe ha ki tuʼa.
5 Ke tou mahino ki te maʼuhiga ʼae ke tou tokakaga ki totatou ʼuhiga ʼo loto, ʼe tou vakaʼi anai pe ʼe feafeaʼi hatatou tokakaga ki totatou malolo fakasino. ʼUluaki, ke lelei totatou malolo fakasino, ʼe tonu ke tou kai ia he meʼa kai ʼe ʼaoga kia tatou, pea mo tou faigaoʼi tuʼumaʼu. ʼO toe feia pe, ke lelei totatou maʼuli fakalaumalie, ʼe tonu ke tou lau tuʼumaʼu ia te Tohi-Tapu mo te ʼu tohi Fakatohi-tapu pea mo tou fakaha ʼe tou tui kia Sehova. ʼE tou fakaha tatatou tui moka ʼe tou maʼuliʼi te ʼu faʼahi ʼae ʼe tou ako mo tou palalau ʼo ʼuhiga mo tatatou tui. (Loma 10:8-10; Sakp. 2:26) Lua, kapau ʼe tou tokagaʼi pe ia totatou agaaga ʼo tuʼa, ʼe feala pe ke tou manatu ʼe lelei totatou malolo fakasino, kae ʼe ʼi ai te mahaki ʼe lolotoga mafola ʼi totatou sino. ʼO toe feia pe, kapau ʼe tou falala pe tatou ki ʼatatou agamahani fakalaumalie, ʼe feala pe ke tou manatu ʼe malohi ia tatatou tui, kae ʼe ʼi ai he ʼu holi kovi ʼe tuputupu ia tatou. (1 Ko. 10:12; Sakp. 1:14, 15) ʼE tonu ke tou manatuʼi, ko Satana ʼe ina fia ʼulihi ia tatou ʼo ina faigaʼi ke tou maʼu ia tana faʼahiga manatu. ʼE feafeaʼi koa ia tana fai te faʼahi ʼaia? Kae kotea ʼae ʼe feala ke tou fai moʼo puipui ʼo tatou?
ʼE Feala Ke Tou Nonofo Maʼa
5 ʼE tokoni mai anai ia Sehova ke tou tauʼi ia te ʼu manatu heʼe ʼaoga mo kapau ʼe tou kole tuʼumaʼu ia tana tokoni. ʼE ina foaki mai ia tona laumalie maʼoniʼoni ke tou maʼu te malohi ke feala hatatou nonofo maʼa. ʼI ʼatatou faikole, ʼe feala ke tou kole kia Sehova ke ina leleiʼia ʼatatou manatu. (Pes. 19:15) ʼE tou kole kia te ia ʼaki he agavaivai ke ina sivisivi ʼotatou loto naʼa ʼe ʼi ai he ʼu holi ʼe kovi ʼo tupu ai hatatou fai he agahala. (Pes. 139:23, 24) Kotou haga kole ia te tokoni ʼa Sehova ke feala hakotou liʼaki te aga heʼe ʼaoga pea mo kotou fai ia te meʼa ʼae ʼe totonu tatau aipe pe ʼe faigataʼa.—Mat. 6:13.
6 ʼI muʼa ʼo tatatou iloʼi ia Sehova, neʼe lagi tou fai ia he ʼu meʼa neʼe mole ina leleiʼia pea ʼe lagi kei tou tauʼi ia te ʼu holi kovi ʼaia. Kae ʼe feala kia Sehova ke tokoni mai ke tou fetogi pea mo fai ia te ʼu meʼa ʼae ʼe ina leleiʼia. Ohage la, hili pe ʼo te fai e te Hau ko Tavite ia te ʼu felaveʼi fakasino mo Pate-Sepa, neʼe fakahemala pea mo faikole kia Sehova ke ina foaki age ia “he loto maʼa” pea mo tokoni age ke fakalogo. (Pes. 51:12, 14) Koia, kapau ʼi te temi muʼa neʼe tou maʼu ni holi malohi ki te ʼu aga heʼe ʼaoga pea ʼe kei tou lolotoga tauʼi nei, ʼe feala ke tokoni mai ia Sehova ke lahi age tatatou fia fakalogo kia te ia pea mo fai ia te meʼa ʼae ʼe totonu. ʼE feala ke tokoni mai ke tou lolomi ʼatatou manatu heʼe haohaoa.—Pes. 119:133.
Te ʼu Koloa Fakalaumalie
pb KO TOEKE
Ko Toeke
Neʼe ko te tagata Etomite ʼae neʼe gaue tafito ʼi tona ʼuhiga tagata taupau ovi ʼo te Hau ko Saulo, neʼe maʼu tuʼulaga. (1Sa 21:7; 22:9) Ko Toeke neʼe lagi ko te poloselite. Koteʼuhi “neʼe tonu ke nofo ia muʼa ʼo Sehova” ʼi Nope, lagi ʼuhi ko he fakapapau neʼe ina fai, peʼe ko he mahaki heʼe maʼa peʼe lagi ko te kilia, neʼe sio ia Toeke ki te Pelepitelo Lahi ko Ahimeleke ʼi tana foaki age kia Tavite te pane ʼo te fakafofoga pea mo te heleta ʼa Koliate. Ki muli age, ʼi te palalau ʼae ʼa Saulo ki tana ʼu kaugana ʼo ui age neʼe natou fonofono kia te ia, neʼe fakaha age e Toeke te ʼu meʼa ʼae neʼe sio ki ai ʼi Nope. ʼI tana ʼosi pauʼi e te pelepitelo lahi pea mo te ʼu pelepitelo ʼae ʼo Nope pea ʼi tana ʼosi fai fehuʼi kia Ahimeleke, neʼe fakatotonu e Saulo ki tana ʼu tagata ʼave logo ke natou matehi te kau pelepitelo. ʼI tanatou fakafisi ki te faʼahi ʼaia, ko Toeke, ʼi te fakatotonu ʼa Saulo, neʼe ina matehi te toko 85 pelepitelo, ʼo mole fakameʼameʼa. ʼI te kua ʼosi ʼo te agakovi ʼaia, neʼe fakaʼauha e Toeke ia Nope, ʼo tamateʼi tona ʼu hahaʼi fuli, te hahaʼi matutuʼa pea mo te kau tupulaga, ʼo feia pe mo te ʼu faga manu.—1Sa 22:6-20.
Ohage ko tona fakaha ʼi te kiʼi talanoa ʼae ʼe tuʼu ʼi te kamata ʼo te Pesalemo kapite 52, neʼe tohi fenei e Tavite ʼo ʼuhiga mo Toeke: “ ʼE masila ʼalelo ohage ko he mataʼi tele, ʼe ina fakatuʼutuʼu te ʼu gaue ʼae ʼe kovi pea mo ina fakahoko. ʼE ke leleiʼia age te kovi ʼi te lelei, ʼe ke leleiʼia age te loi ʼi te palalau ki te meʼa ʼae ʼe totonu. ʼI gutukaka leva! ʼE ke leleiʼia te ʼu palalau fuli ʼae ʼe fakatupu lavea.”—Ps 52:2-4
VAHA’A ’O TE ʼAHO 24-30 ʼO SUNIO
TE ʼU KOLOA ʼO TE TOHI-TAPU
ʼE Nofo Ia Sehova ʼi ʼOu Tafa
Kotou Popoto—Kotou Manavasiʼi Ki Te ʼAtua!
10 ʼI te tahi lakaga, neʼe hola ia Tavite kia Akisi, te hau ʼo te kolo Filisitini ʼo Kate, te kolo ʼo Koliate. (1 Samuele 21:10-15) Neʼe ui e te ʼu tagata kaugana ʼa te hau, ko Tavite ʼe ko he fili ʼo tonatou fenua. Pea kotea ʼae neʼe fai e Tavite ʼi te lakaga ʼaia neʼe ʼamanaki tuʼutamaki ai tona maʼuli? Neʼe faikole fakamalotoloto kia Sehova. (Pesalemo 56:1-4, 11-13) Logo la neʼe fai loi ʼe ko ia, ko he tagata vale ke ʼaua naʼa matehi, kae neʼe mahino lelei kia Tavite neʼe ko Sehova ʼae neʼe ina haofaki moʼoni ia ia, pea neʼe ina tapuakinaʼi tana ʼu faiga. Ko te tui ʼa Tavite ʼaki tona loto katoa kia Sehova pea mo tana falala ʼae kia te ia, neʼe ha ʼaki ai ʼe ko he tagata neʼe manavasiʼi moʼoni ki te ʼAtua.—Pesalemo 34:4-6, 9-11.
11 Ohage ko Tavite, ʼe tou lava fakaha tatatou manavasiʼi ki te ʼAtua, ʼo tou falala ki tana fakapapau ʼae ʼe tokoni mai anai ke tou maʼu puleʼaki ki totatou ʼu fihifihia. Neʼe ui fenei e Tavite: “Tuku tou maʼuli kia Sehova, pea ke ke falala kia te ia, pea ʼe ina fai puleʼaki anai.” (Pesalemo 37:5) ʼE mole fakaʼuhiga leva, ke tou tuku kia Sehova ke ina maʼu he ʼu puleʼaki ki tatatou ʼu fihifihia, kae tou nonofo noa pe tatou. Neʼe mole faikole ia Tavite ke tokoni age te ʼAtua kia ia, kae mole ina fai e ia he ʼu puleʼaki ʼo ʼuhiga mo tona maʼuli. Kailoa, kae neʼe ina fakaʼaogaʼi tona ʼu fealagia fakasino pea mo fakaʼatamai ʼae neʼe foaki age e Sehova, pea mo kumi he ʼu puleʼaki moʼo fakatokatoka tona ʼu fihifihia. Neʼe ina iloʼi kapau neʼe falala pe ia ki tona malohi fakatagata, pea ʼe mole anai hona fua. ʼE tonu ke tou mulimuli ki tana faʼifaʼitaki, ʼo tou fai ia meʼa ʼae ʼe tou lavaʼi, kae ke tou tuku kia Sehova ia te ʼu faʼahi ʼae ʼe mole tou lavaʼi. ʼI tona fakahagatonu, ʼe teitei pe ke tou lava fai ia meʼa fuli ʼuhi ko tatatou falala ʼae kia Sehova. ʼE ko te ʼu aluʼaga takitokotahi ʼaia, ʼae ʼe tou maʼu ai te manavasiʼi ki te ʼAtua. ʼE tou maʼu anai he fakalotofimalie ʼi te ʼu palalau fakamalotoloto ʼaeni ʼa Tavite: “ ʼE kaumeʼa Sehova mo natou ʼae ʼe manavasiʼi kia te ia.”—Pesalemo 25:14.
cl 243 ¶9
ʼE Mole He Meʼa ʼe Feala Ke Ina “Fakamavae Tatou Mai Te ʼOfa ʼo Te ʼAtua”
9 ʼE fiafia ia Sehova moka tou faʼa kataki. (Mateo 24:13) ʼE faiga e Satana ke ina fakamamaʼo tatou mai te ʼAtua, koia ka tou agatonu kia te ia ʼi te ʼaho fuli, ʼe feala ai ke ina tali ki te ʼu loi ʼae ʼe fai age e tona fili. (Taʼaga Lea 27:11) Kae ʼe tou tonu ke tou faʼa kataki, he ʼe ʼi te ʼaho fuli ʼe ʼahiʼahiʼi tatatou agatonu ʼuhi ko te mahaki, peʼe ko te ʼu fihifihia fakapaʼaga, peʼe ko te lotohoha. ʼE feala ke tou lotovaivai koteʼuhi neʼe mole hoko tatatou ʼu fakaʼamu. (Taʼaga Lea 13:12) Koia ʼe maʼuhiga ai kia Sehova tatatou faʼa kataki. Koia neʼe kole ai te hau ko Tavite kia Sehova ke ina tanaki ʼona loʼimata ʼi he “ ʼaiʼaga vai” pea mo ui: “ ʼE mole tuʼu koa la ʼi tau tohi?” (Pesalemo 56:8) ʼEi, ʼe taupau e Sehova ʼotatou loʼimata ke ina manatuʼi, ʼo feia mo te ʼu mamahi ʼe tou tau mo ia ke tou nonofo agatonu kia te ia. ʼE maʼuhiga kia ia tatatou agatonu.
Ka Tou ʼOfa Kia Sehova Pea ʼe Tokoni Mai Ke Tou Tauʼi Te Mataku
16 ʼE iloʼi e Satana ʼe tou leleiʼia te maʼuli. Pea ʼe manatu ʼe tou liʼaki anai ʼatatou felogoi lelei mo Sehova kae ke tou maʼuʼuli. (Sopo 2:4, 5) Kae ʼe faihala Satana ia. ʼE ko “ia ʼae ʼe feala ke ina fakatupu te mate,” koia ʼe faiga ai ke tou matataku ki te mate ke tou liʼaki ai ia Sehova. (Hep. 2:14, 15) ʼI ʼihi temi, ʼe fakamatakuʼi tatou e te hahaʼi ke natou matehi tatou mo kapau ʼe tou nofo agatonu kia Sehova. ʼE natou fai te faʼahi ʼaia, he ʼe puleʼi natou e Satana. Peʼe ʼi ʼihi temi, ʼe feala ke tokagaʼi e Satana ʼe ʼaoga he faitoʼo fakavilivili kia tatou. Pea ʼe feala ke ina fakaʼaogaʼi te faʼahi ʼaia, ke tou maumauʼi ai te ʼu lao ʼa Sehova. ʼE feala ki te ʼu toketa peʼe ko natou ʼo te famili ʼae ʼe mole tauhi kia Sehova ke natou uga tatou ke tou tali ia te toto. Pea kapau ʼe tou fai te faʼahi ʼaia, ʼe tou maumauʼi anai te lao ʼa te ʼAtua. Peʼe lagi fakaneke anai tatou e he tahi ke tou fai he tahi age faitoʼo ʼe fakafeagai ki te ʼu pelesepeto Fakatohi-tapu.
17 Tatau aipe pe ʼe tou fia maʼuʼuli kae ʼe tou iloʼi ʼe ʼofa anai ia Sehova ia tatou maʼia pe ʼe tonu ke tou mamate. (Lau ia Loma 8:37-39.) Ka mamate te ʼu kaumeʼa ʼo Sehova, ʼe ina manatuʼi natou, ʼe hage pe kei natou maʼuʼuli. (Luka 20:37, 38) ʼE fakaʼamu ia ke ina fakatuʼuake natou. (Sopo 14:15) Neʼe momoli mai e Sehova ia tona ʼAlo ke tou ‘maʼu ai te maʼuli heʼe gata.’ (Soa. 3:16) ʼE tou iloʼi ʼe ʼofa mamahi mo tokaga lelei ia Sehova kia tatou. Koia ʼe mole tonu ke tou lituʼa kia Sehova moka ʼe tou mahahaki peʼe faiga e he tahi ke ina matehi tatou. Kae tou tuku tatatou falala kia te ia he ʼe tou maʼu ai ia te fakalotofimalie mo te poto pea mo te malohi. Pea ko te aluʼaga ʼaia, neʼe fai e Valérie pea mo tona ʼohoana.—Pes. 41:3.
Te ʼu Koloa Fakalaumalie
it-2 645-646
Iloʼi Fakatomuʼa, Finegalo Fakatomuʼa, Hinoʼi Fakatomuʼa
ʼI te temi ʼae neʼe lavakiʼi ai e Sutasi Isekaliote ia Sesu, neʼe ina fakahoko ia te ʼu lea fakapolofeta neʼe fai e te ʼAtua. Neʼe ina fakamoʼoni ai ʼe maʼu e Sehova pea mo Sesu ia te fealagia ʼae ke nā iloʼi ia te ʼu aluʼaga ʼae ka hoko ki ʼamuli. (Ps 41:9; 55:12, 13; 109:8; Gau 1:16-20) Kae ʼe mole feala leva ke tou ui neʼe ko te finegalo ʼo te ʼAtua ke fai e Sutasi ia te faʼahi ʼaia. Neʼe tala fakatomuʼa ʼi te ʼu lea fakapolofeta, ʼe lavakiʼi anai ia Sesu e hona kaumeʼa, kae neʼe mole fakaha pe ko ai. ʼE ʼi ai mo te tahi atu ʼu pelesepeto Fakatohi-tapu ʼe tou tui papau ai neʼe mole feala ke finegalo e te ʼAtua ia te ʼu gaue ka fakahoko anai e Sutasi ki ʼamuli. Neʼe ui fenei e te apositolo ko Paulo: “ ʼAua naʼa ke foimo hili ʼou nima ki he tagata. ʼAua naʼa ke kau ki te ʼu agahala ʼa ʼihi. Kae taupau ia koe ke ke maʼa.” (1Ti 5:22; vakaʼi mo 1Ti 3:6) Neʼe loto e Sesu ke ina filifili fakalelei ia tana ʼu apositolo ʼe toko 12, koia neʼe faikole ai ki tana Tamai ʼi te po katoa, ʼi muʼa ʼo tana fakaha tana tonu. (Luk 6:12-16) Kapau neʼe finegalo mai muʼa e te ʼAtua, ʼe lavakiʼi anai e Sutasi ia Sesu, neʼe mole he ʼuhiga ʼo tana kole te takitaki pea mo te tokoni ʼa te ʼAtua, pea ʼe hage pe neʼe kau te ʼAtua ki te ʼu agahala ʼae neʼe fai e Sutasi.
ʼI te temi ʼae neʼe filifili ai e Sesu ia Sutasi ko hana apositolo, neʼe mole iloʼi ʼe ina lavakiʼi anai ia ia ki ʼamuli. Kae neʼe tuku e Sutasi ke tauaka ʼi tona loto ia he manatu ʼe mole lelei, ʼo tupu ai leva tana mole nofo agatonu. Neʼe fakafisi leva ki te takitaki ʼa te ʼAtua kae ina tali leva te takitaki ʼa Satana, ʼo tupu ai leva tana kaihaʼa pea mo tana kakaʼi ia Sesu. (Hep 12:14, 15; Soa 13:2; Gau 1:24, 25; Skp 1:14, 15; vakaʼi SUTASI N° 4.) Pea neʼe tokagaʼi leva e Sesu te kua fetogi te loto ʼo Sutasi koia neʼe ina iloʼi ai ko ia ʼae ka ina lavakiʼi.—Soa 13:10, 11.