Te Kau Tūpulaga ʼe Nātou Fakafiafia Te Loto ʼo Sehova

Neʼe teuteuʼi tāfito te ʼu alatike ako ʼaenī maʼa te kau tūpulaga ʼa te kau Fakamoʼoni ʼa Sehova. Koia, ʼe mātou fakaloto mālohiʼi te kau tūpulaga ke nātou akoʼi fakalelei te alatike ʼaenī pea mo fai hanatou ʼu tali faʼifaʼitaliha ʼi te kokelekasio mokā fai Te Tule Leʼo.

“Ke ke fakapotopoto Ê toku foha pea mo ke fakafiafia toku loto, ke feala haku tali kia ia ʼaē ʼe manukinuki kia te ʼau.”—Tāʼaga Lea 27:11.

1, 2. (a) Kapau ʼe koutou holi ki te ʼu meʼa ʼo te mālama, pea ʼe faka ʼuhiga koa ʼe mole feala ke koutou liliu ko he ʼu Kilisitiano? Koutou fakamahino. (Loma 7:21) (b) Koteā te ako ʼe tou maʼu mai te faʼifaʼitaki ʼa Asafe? (Vakaʼi te talanoa ʼi te pasina 13.)

KOUTOU fakakaukauʼi age muʼa ʼe koutou lolotoga kumi hokotou ʼu mutuʼi meʼa ʼi te ʼu fale koloā. ʼI takotou kumikumi ʼaia ʼe koutou fakatokagaʼi te teu ʼe koutou mataleleiʼia. ʼE koutou mataleleiʼia tona lanu pea mo tona faʼahiga tui, pea ʼe mole faʼa totogi kovi. Kae ka koutou fakaōvi atu ki te teu ʼo siosioʼi fakalelei, ʼe koutou punamaʼuli heʼe koutou fakatokagaʼi ʼe mole lelei tona tui, pea ʼe maumau vave. Logola te matalelei ʼo te teu, kae ʼe mole tologa. ʼE koutou totogi anai koa he teu ʼe mole tologa?

² Koutou fakatatau te ʼaluʼaga ʼaia mo he ʼaluʼaga ʼe feala ke hoko kia koutou ʼi tokotou ʼuhiga tūpulaga Kilisitiano. Ko te ʼu meʼa ʼo te malamanei, ka tou sio fakavilivili kiai, pea ohage pe ko te ʼu teu, ʼe lagi ʼe hage ʼe matalelei mai kia koutou. Ohage la, ko tokotou ʼu kaugā ako ʼe feala ke nātou ʼolo ki ni ʼu fakafiafia, ke nātou fakaʼaogaʼi te toloke, ke nātou ʼinu, ke nātou fakatahi mo he taʼahine peʼe ko he tama, pea mo fai ni ʼu felāveʼi fakasino heʼeʼaoga. ʼI te temi ʼaia ʼe koutou fia fai koa ki te faʼahiga maʼuli ʼaia? ʼE koutou holi koa ke koutou ʼahiʼahiʼi tonatou faʼahiga maʼuli ʼaē ʼe nātou lau, ʼe nātou faʼifaʼitaliha? Kapau koia, ʼaua leva naʼa koutou ʼui ʼe mole lelei tokotou loto pea ʼe mole feala ke koutou liliu ko he ʼu Kilisitiano. ʼE fakahā lelei e te Tohi-Tapu, ko te mālama ʼe mālohi tana fakahala—māʼiape la mo he tahi ʼe fia lelei ki te ʼAtua ʼe feala pe ke fakahalaʼi.—2 Timoteo 4:10.

3. (a) He koʼe ʼe vaʼiganoa te kumi ʼo te ʼu meʼa ʼo te malamanei? (b) ʼE fakamatalatala feafeaʼi e te Kilisitiano te vaʼiganoa ʼo te ʼu meʼa ʼo te malamanei?

³ ʼI te temi nei koutou vakavakaʼi fakalelei te ʼu meʼa ʼaē ʼe fakahā atu e te malamanei, ohage ko he teu neʼe koutou fia toʼo. Koutou fai te ʼu fehuʼi ʼaenī, ‘e feafeaʼi te faʼufaʼu pea mo te takitaki ʼo te tuʼu ʼo te ʼu faʼahiga meʼa ʼaenī?’ ʼE ʼui e te Tohi-Tapu “e fakamole te malama-nei.” (1 Soane 2:17) Ko he faʼahiga fakafiafia mai te malamanei ʼe faka temi pe ia. Pea tahi, ko te aga heʼe lotu ʼe ina taki pe ki te ʼu ikuʼaga kovi. ʼE mahino ia ʼe mole hona fua lelei kia koutou. Ko te tuagaʼane Kilisitiano, neʼe ina faʼa kātakiʼi te meʼa ʼe ina higoaʼi “ko te ʼu mamahi tupu mai he fakaʼaogaʼi kovi ʼo tona temi finemui,” ʼe ina ʼui fēnei: “ ʼE lagi feala ke ʼasi mai te malamanei ʼe fakatupu fiafia pea mo lelei. Pea ʼe ina fia fakaʼasi atu kia koutou, ʼe feala ke koutou muliʼi tana ʼu faʼahiga fakafiafia heʼe mole ʼi ai hona ikuʼaga kovi. Kae ʼe mahino lelei ʼe mole feala te faʼahi ʼaia. ʼE fakaʼaogaʼi kākā anai koutou e te mālama, pea ka kua ina ʼosi fakaʼaogaʼi koutou, ʼe ina līaki anai koutou.”a Koteā te ʼuhiga ʼo hakotou maumauʼi tokotou temi tūpulaga ki he faʼahiga maʼuli pulinoa feiā?

Puipui Mai Ia “Ia ʼAē ʼe Agakovi”

4, 5. (a) ʼI muʼa ʼo tana mate, koteā te kole neʼe fai e Sesu kia Sehova? (b) He koʼe neʼe mata tonu te faikole ʼaia?

⁴ ʼI tanatou mahino ko te tuʼu ʼo te ʼu faʼahiga meʼa ʼaenī ʼe mole hona ʼaoga kia nātou, ko te kau tūpulaga ʼaē ʼi te kau Fakamoʼoni ʼa Sehova ʼe nātou faiga ke nātou tekeʼi te faka kaugā mo te hahaʼi ʼo te mālama. (Sakopo 4:4) ʼE koutou kau koa ʼi te kau tūpulaga agatonu ʼaia? Kapau koia, ʼe mātou vikiʼi koutou. ʼE moʼoni, ʼe mole faigafua te tekeʼi ʼo te fakahala ʼa te hahaʼi pea mo fakahā he aga ʼe kehe mo nātou, kae ʼe ʼi ai tokotou tokoniʼaga.

⁵ ʼI muʼa ʼo tana mate, neʼe kole e Sesu kia Sehova ke ina “leʼoleʼo” tana ʼu tisipulo “ ʼuhi ko ia ʼaē ʼe agakovi.” (Soane 17:15, MN ) Neʼe fai e Sesu te kole ʼaia heʼe ʼi ai tona tupuʼaga tāfito. Neʼe ina ʼiloʼi ʼe mole faigafua anai ki tana kau tisipulo tanatou nofo agatonu, peʼe nātou tūpulaga peʼe matutuʼa. Koteā tona tupuʼaga? ʼUhi he neʼe ʼiloʼi e Sesu, ʼe tonu anai ke tauʼi e tana ʼu tisipulo he fili fakapulipuli ʼe mālohi—“[te] agakovi,” ia Satana te Tevolo. ʼE ʼui e te Tohi-Tapu ko te laumālie agakovi ʼaia ʼe “hage he laione e gugulu, e feʼaluʼaki o kumi he tahi ke ina kai.”—1 Petelo 5:8.

6. ʼE tou ʼiloʼi feafeaʼi ʼe mole ʼofa Satana ki te kau tūpulaga?

⁶ ʼI te hisitolia, neʼe gaohi koviʼi ʼosi e Satana te hahaʼi. Koutou fakatokagaʼi te ʼu malaʼia fakamataku neʼe fai e Satana kia Sopo pea mo tona famili. (Sopo 1:13-19; 2:7) ʼE lagi kei koutou manatuʼi te ʼu meʼa neʼe hoko kia koutou, ʼe ko he fakamoʼoni ʼaia ʼo te agamālohi ʼa Satana. ʼE feʼaluʼaki te Tevolo, pea ʼe ina kumi he tahi ke ina kai, ʼe mole ʼofa ia ki te kau tūpulaga. Ohage la ʼi te kamataʼaga ʼo te ʼuluaki sēkulō ʼo totatou temi, neʼe fai e Helote he fakatuʼutuʼu moʼo matehi te ʼu tamasiʼi tagata fuli ʼo Petelehemi ʼaē neʼe taʼu lua peʼe veliveli ifo. (Mateo 2:16) Neʼe lagi ko Satana ʼaē neʼe ina fakaneke ia Helote—neʼe ko he faigaʼi ʼaia ke matehi te kiʼi tamasiʼi ʼaē ka liliu anai ʼi he ʼaho ko te Mesia ʼaē neʼe fakapapauʼi e te ʼAtua, pea ʼe ina fakahoko anai te tautea ʼa te ʼAtua kia Satana! (Senesi 3:15) ʼE ʼiloga lelei, ko Satana ʼe mole ʼofa pe la ki te kau tūpulaga. Ko tana fakatuʼutuʼu pe e tahi ke ina kai ni hahaʼi e tokolahi. Pea ʼe moʼoni tāfito te faʼahi ʼaia ia ʼaho nei, heʼe ko Satana kua lī ifo mai te lagi ki te kele, pea ʼe “ ʼita lahi, he kua ina ʼiloʼi kua nounou tona temi.”—Apokalipesi 12:9, 12, MN.

7. (a) E feafeaʼi te kehekehe ʼo Sehova pea mo Satana? (b) Koteā te manatu ʼa Sehova ʼo ʼuhiga mo tokotou maʼuli fiafia?

⁷ ʼO mole tatau ia mo Satana ʼaē ʼe “ ʼita lahi,” ko Sehova ia ʼe “manavaʼofa.” (Luka 1:78, MN ) ʼE ko ia te faʼifaʼitaki moʼoni ʼo te ʼofa. ʼIo, ʼe ʼiloga lelei te kalitate lahi ʼaia ʼi totatou Tupuʼaga, koia ʼe ʼui fēnei ai e te Tohi-Tapu: “Ko te ʼAtua ʼe ʼofa.” (1 Soane 4:8, MN ) ʼI kehekehe leva ʼo te ʼatua ʼo te ʼu faʼahiga meʼa ʼo te tuʼu ʼaenī pea mo te ʼAtua ʼaē ʼe koutou maʼu te pilivilesio ke koutou tauhi ki ai! Ko Satana ʼe ina kumi ke ina kai he tahi, kae ko Sehova ia “e mole loto ia ke mate niʼihi.” (2 Petelo 3:9) ʼE maʼuhiga kia ia te maʼuli ʼo te hahaʼi fuli—ʼo kau ai mo koutou. Ka fakaloto mālohiʼi koutou e Sehova ʼi tana folafola ke mole koutou kau ki te malamanei, ʼe mole faiga ia ke ina toʼo takotou fakafiafia ʼi tokotou maʼuli peʼe ina faka tuʼakoi takotou ʼāteaina. (Soane 15:19) Kailoa, ʼe ina leʼoleʼo koutou mai ia ia ʼaē ʼe agakovi. ʼE loto e takotou Tāmai ʼaē ʼe ʼi selo ke koutou maʼu he meʼa ʼe lelei age ʼi te ʼu fakafiafia faka temi ʼo te malamanei. Ko tona loto ke koutou maʼu “te mauli mooni”—te maʼuli heʼegata ʼi he kele ka liliu ko he palatiso. (1 Timoteo 6:17-19) ʼE loto Sehova ke fua lelei tokotou maʼuli, pea ʼe ina uga koutou ki te maʼuli ʼaia. (1 Timoteo 2:4) Pea tahi, ʼe fai atu e Sehova he fakaafe makehe. Koteā te fakaafe ʼaia?

“[Koutou] Fakafiafia Toku Loto”

8, 9. (a) Koteā te meʼa ʼofa ʼe tou lava foaki kia Sehova? (b) ʼE manukinukiʼi feafeaʼi e Satana ia Sehova, ohage ko te faʼifaʼitaki ʼa Sopo?

⁸ Neʼe kua koutou totogi koa he meʼa ʼofa maʼa hokotou kaumeʼa lelei, ʼosi ʼaia pea koutou sio ki tana fiafia pea mo tana loto fakafetaʼi ki te meʼa ʼaē neʼe koutou foaki age? Neʼe lagi koutou fakakaukauʼi fualoa pe koteā anai he meʼa ʼe ina leleiʼia. Koutou fakatokagaʼi age te fehuʼi ʼaenī: Koteā te faʼahiga meʼa ʼofa ʼe feala ke koutou foaki maʼa tokotou Tupuʼaga ko Sehova ʼAtua? ʼE feala ke mata faikehe te faʼahiga manatu ʼaia. Koteā te meʼa ʼe lava foaki e he tagata efu maʼa te Māfimāfi? Koteā te meʼa ʼe koutou lava foaki kia te ia kae kua ina maʼu pe? ʼE tali fēnei te Tohi-Tapu ia Tāʼaga Lea 27:11: “Ke ke fakapotopoto Ê toku foha pea mo ke fakafiafia toku loto, ke feala haku tali kia ia ʼaē ʼe manukinuki kia te ʼau.”

⁹ ʼE mahino ia ʼe lagi koutou ʼiloʼi ʼi takotou ako te Tohi-Tapu, ʼe ko Satana te Tevolo ʼaē ʼe ina manukinukiʼi ia Sehova. ʼE ina ʼui ʼe tauhi pe te hahaʼi ki te ʼAtua, ʼuhi heʼe ʼi ai tona tupuʼaga, kae mole nātou ʼoʼofa kia te ia. ʼE ʼui e Satana kapau ʼe maʼuli mamahi te ʼu kaugana ʼa te ʼAtua, pea ʼe nātou foimo līaki anai te tauhi moʼoni. Ohage la, koutou fakatokagaʼi te meʼa neʼe ʼui e Satana kia Sehova ʼo ʼuhiga mo te tagata agatonu ko Sopo: “Neʼe mole koa la ke fakatuʼu he ʼa moʼo puipui ʼo ia, pea mo tona ʼapi, pea mo te meʼa fuli pe ʼa ʼana, ʼi te fenua katoa? Ko te gāue ʼo ʼona nima, neʼe ke tapuakinaʼi, pea ko tana faga manu kua mafola ʼi te kele. Kae, moʼo fetogi, fakalelei muʼa, ka ke faoʼi atu tou nima ki ai, pea ke fā ki te ʼu meʼa fuli ʼa ʼana, pea ke sio pe ʼe mole anai laukovi kia te koe ki tou fofoga.”—Sopo 1:10, 11.

10. (a) ʼE tou ʼiloʼi feafeaʼi neʼe mole gata pe ki te agatonu ʼa Sopo ʼaē neʼe fakafihiʼi e Satana? (b) Koteā tokotou tuʼulaga ʼi te fihi ʼo ʼuhiga mo te pule faʼitaliha?

¹⁰ Ohage ko tona fakahā ʼi te fakamatala ʼa te Tohi-Tapu, neʼe mole fakafihiʼi pe e Satana te agatonu ʼa Sopo, kae neʼe kau ai mo te agatonu ʼa te hahaʼi fuli ʼaē ʼe nātou tauhi ki te ʼAtua—pea ʼe koutou kau ai. ʼIo, ʼo ʼuhiga mo te hahaʼi fuli, neʼe ʼui fēnei e Satana kia Sehova: “Ko meʼa fuli ʼe maʼu e te tagata [neʼe mole ko Sopo tokotahi pe kae ko te hahaʼi fuli], ʼe ina foaki anai ia ki tona maʼuli.” (Sopo 2:4) ʼE koutou mahino koa ki tokotou tuʼulaga ʼi te fihi maʼuhiga ʼaia? Ohage ko tona fakahā ia Tāʼaga Lea 27:11, ʼe ʼui e Sehova ʼe ʼi ai te meʼa ʼe feala ke koutou foaki age kia te ia—ʼe ko he meʼa ʼe feala ai kia te ia ke fakatafito kiai tana tali ki te ʼu tukugakovi ʼa Satana. Koutou fakakaukauʼi muʼa—ko te Pule Faʼitaliha ʼo Te ʼAtulaulau ʼe ina kole atu ke koutou kau ki te tali ʼo te fihi lahi e tahi. ʼE ko he gāue pea mo he pilivilesio fakatalakitupua ʼe tuku atu kia koutou! ʼE lava koa ke koutou fai te meʼa ʼaē ʼe kole atu e Sehova? Neʼe fai e Sopo te faʼahi ʼaia. (Sopo 2:9, 10) ʼO toe feiā mo Sesu pea mo te tokolahi ʼi te lolotoga ʼo te hisitolia, ʼo kau ai mo te kau tūpulaga. (Filipo 2:8; Apokalipesi 6:9) ʼE feala mo koutou ke koutou tali ki te fihi ʼaia. Kae ʼe tonu ke mahino kia koutou, ʼe tonu ke koutou filifili pe ko ai ʼaē ka koutou lagolago kiai. ʼE koutou fakahā anai ʼaki takotou aga, peʼe koutou lagolago ki te manukinuki ʼaē neʼe fai e Satana peʼe ko te tali ʼa Sehova. Ko ai ʼaē ka koutou filifili ke koutou lagolago anai ki ai?

ʼE Tokaga Sehova Kia Koutou!

11, 12. ʼE malave koa kia Sehova mo kapau ʼe koutou fili ke koutou tauhi age kia te ia peʼe kailoa? Koutou fakamahinohino.

¹¹ ʼE maʼuhiga koa kia Sehova te filifili ʼaē ka koutou fai? ʼE mole heʼeki feʼauga pe koa te hahaʼi ʼaē kua agatonu kia te ia, ke feala ai kia ia ke ina foaki he tali ʼe lelei kia Satana? ʼE moʼoni, neʼe ʼui e te Tevolo ʼe mole he tahi ʼe tauhi kia Sehova mo tona loto katoa, kae kua fakahā te hala ʼo te tukugakovi ʼaia. Kae ʼe loto e Sehova ke koutou lagolago ki tona tuʼulaga pule faʼifaʼitaliha, koteʼuhi ʼe tokaga kia koutou takitokotahi. Neʼe ʼui fēnei e Sesu: “E mole ko te finegalo o tautou Tamai i Selo, ke puli he tahi o natou liliki aeni.”—Mateo 18:14.

¹² ʼE mahino ia, ʼe fia ʼiloʼi e Sehova pe ko ai ʼaē ka koutou lagolago ki ai. Tahi ʼaē meʼa maʼuhiga, ʼe malave kia te ia te meʼa ʼaē ka koutou fai. ʼE fakahā lelei e te Tohi-Tapu, ʼe malave ʼaupito ki te loto ʼo Sehova te ʼu gāue lelei peʼe kovi ʼa te hahaʼi. Ohage la, neʼe “mamahi” te loto ʼo Sehova ʼi te agatuʼu tuʼumaʼu ʼaē ʼa te kau Iselaele. (Pesalemo 78:40, 41) ʼI muʼa ʼo te Tulivio ʼo te temi ʼo Noe, ʼi te ‘kua lahi ʼaupito ʼo te agakovi ʼa te tagata,’ “neʼe mamahi ai [te] loto” ʼo Sehova. (Senesi 6:5, 6) Koutou fakakaukauʼi age muʼa pe koteā tona faka ʼuhiga. Kapau ʼe koutou fai he meʼa ʼe kovi, pea ʼe feala ke koutou fakaloto mamahiʼi tokotou Tupuʼaga. ʼE mole ʼui leva ko te ʼAtua ʼe vaivai peʼe mulimuli ki te ʼu meʼa ʼaē ʼe mamahi kiai tona loto. Kae ʼe ʼofa kia koutou pea mo tokaga ki tokotou maʼuli fiafia. ʼI te tahi age faʼahi, ka koutou fai te meʼa ʼaē ʼe lelei, pea ʼe fiafia ai te loto ʼo Sehova. ʼE mole fiafia pe, ʼuhi heʼe maʼu hana tali kia Satana, kae kua feala ʼi te temi ʼaia ke ina Fakapale koutou. Pea ʼe ko he faʼahi ʼe ina fia fai maʼa koutou. (Hepeleo 11:6) Ko Sehova ʼAtua ʼe ko hakotou Tāmai ʼofa!

Te ʼu Tapuakina Lahi ʼi Te Temi Nei

13. ʼE tou maʼu feafeaʼi te ʼu tapuakina ʼi tatatou tauhi ʼaē kia Sehova ʼi te temi nei?

¹³ ʼE mole tou maʼu pe anai te ʼu tapuakina ʼaē ʼi te tauhi kia Sehova ʼi te ka haʼu. Tokolahi te kau tūpulaga ʼi te kau Fakamoʼoni ʼa Sehova, neʼe tapuakinaʼi nātou ʼi te temi nei ʼaki te fiafia pea mo te fīmālie. ʼE tohi fēnei e te tagata fai pesalemo: “Ko te ʼu fakatotonu ʼa Sehova ʼe totonu, ʼo nātou fakafiafia te loto.” (Pesalemo 19:8) ʼE ʼiloʼi lelei age e Sehova ʼi te tagata, te meʼa ʼaē ʼe lelei kia tatou. ʼAki te polofeta ko Isaia, neʼe ʼui fēnei e Sehova: “Ko ʼau, Sehova, ko ʼau tou ʼAtua, ia Ia ʼaē ʼe ina akoʼi koe ke ʼaoga kia te koe, ia Ia ʼaē ʼe ina taki koe ʼi te ala ʼaē ʼe tonu ke ke haʼele ai. Kanapaula neʼe ke tokagaʼi moʼoni taku ʼu fakatotonu. Pea ko tou tokalelei ʼe hage anai ia ko te liuʼa, pea ko tau faitotonu ʼe hage anai ko te ʼu peau ʼo te tai.”—Isaia 48:17, 18.

14. ʼE lava tokoni feafeaʼi atu te ʼu pelesepeto ke koutou tekeʼi te mamahi ʼo te huʼi maʼua?

¹⁴ Kapau ʼe koutou maʼuliʼi te ʼu pelesepeto faka Tohi-Tapu, pea ʼe tokoni anai kia koutou ke koutou tekeʼi he ʼu tuʼuga lotomamahi. Ohage la, ʼe ʼui e te Tohi-Tapu ki te hahaʼi ʼaē ʼe nātou manako ki te paʼaga ʼe “nātou fehukiʼaki ia nātou totonu ʼaki te ʼu mamahi lahi.” (1 Timoteo 6:9, 10, MN ) Neʼe heʼeki hoko koa la ni ʼu mamahi feiā ki te hahaʼi ʼaē ʼe maʼuʼuli mo koutou, ohage ko tona ʼui e te vaega? Ko ʼihi ʼu tagata mo fafine kei tūpulaga neʼe lahi tonatou tuʼu maʼua, ʼuhi pe ko tanatou fia maʼu te ʼu mutuʼi meʼa totogi kovi ʼe ʼiloa tonatou ʼu fakaʼiloga, pea mo te ʼu meʼa gaoʼi foʼou. ʼE ko he faʼahiga maʼuli popūla ʼaia mokā ʼe koutou toʼo he ʼu meʼa ʼe mole koutou lava huʼi, heʼe koutou tuʼu maʼua ai anai ʼi he temi loaloaga!—Tāʼaga Lea 22:7.

15. ʼE puipui feafeaʼi koutou e te ʼu pelesepeto faka Tohi-Tapu mai te ʼu mamahi ʼaē ʼe tupu ʼi te ʼu felāveʼi fakasino heʼeʼaoga?

¹⁵ Koutou toe fakatokagaʼi mo te ʼu felāveʼi fakasino heʼeʼaoga. ʼI te taʼu fuli ʼi te malamanei katoa, ʼe lahi ʼaupito te kau finemui ʼe nātou faitatama kae mole heʼeki nātou ʼohoana. Ko ʼihi ʼe nātou fānau ka mole heʼeki nātou loloto kiai peʼe mole heʼeki nātou popoto ʼi te gaohi tamaliki. Ko ʼihi ʼe nātou fakatō fatu, pea nātou maʼuli mo te agahala ʼaia ʼi tonatou leʼo ʼo loto. Pea ʼe ʼi ai te kau tūpulaga pea mo te kau finemui ʼe nātou maʼu te ʼu mahaki mai te ʼu felāveʼi fakasino heʼeʼaoga, ohage ko te SITA. ʼIo, ki he tahi ʼe ina ʼiloʼi ia Sehova, ko te ikuʼaga kovi ʼi te ʼu meʼa fuli ʼaia, ʼe ko tana maumauʼi tana ʼu felogoi lelei mo Sehova.b (Kalate 5:19-21) Koia la ʼaē, ʼe ʼui fēnei ai e te Tohi-Tapu: “Koutou hola mai te [“folonikasio,” MN ].”—1 Kolonito 6:18.

Tou Tauhi Ki “Te ʼAtua Fiafia”

16. (a) ʼE tou ʼiloʼi feafeaʼi ko Sehova ʼe loto ke koutou fakafiafia ʼi tokotou temi tūpulaga? (b) He koʼe ʼe fai e Sehova te ʼu fakatuʼutuʼu ke koutou muliʼi?

¹⁶ ʼE fakamatalatala e te Tohi-Tapu ko Sehova ʼe ko “te ʼAtua fiafia.” (1 Timoteo 1:11, MN ) ʼE toe loto ke koutou maʼuli fiafia foki. ʼI tona fakahagatonu, ʼe ʼui fakalelei fēnei e tana Folafola: “Fakafiafia ʼi tou temi tūpulaga. Ke ke fakafiafia ʼi tau kei tūpulaga.” (Tagata Tānaki 11:9, Today’s English Version) Kae ko Sehova ʼe mole gata pe tana sio ʼi te temi ʼaia, ʼe feala ke sio ki te ʼu ikuʼaga ʼo te aga ʼaē ʼe lelei peʼe ko ʼaē ʼe kovi. Koia la ʼaē ʼe ina fakaloto mālohiʼi ai koutou fēnei: “Ke ke manatuʼi tou Tupuʼaga lahi ʼi te ʼu ʼaho ʼo tou temi tūpulaga, ia muʼa ʼo te hoko mai ʼo te ʼu ʼaho faigataʼa, peʼe ko te ʼu taʼu ʼaē ka ke ʼui ai anai: ‘ ʼE mole ʼau maʼu ai he fiafia e tahi.’ ”—Tagata Tānaki 12:1.

17, 18. ʼE fakahā feafeaʼi e he tūpulaga tana fiafia ʼi tana tauhi kia Sehova, pea ʼe koutou lava maʼu feafeaʼi te fiafia ʼaia?

¹⁷ Ia ʼaho nei, tokolahi te kau tūpulaga kua nātou fiafia ʼaupito ʼi tanatou tauhi kia Sehova. Ohage la, ko Lina ʼe taʼu 15, ʼe ina ʼui fēnei: “ ʼE ʼau loto falala pea ʼe ʼau maʼu te fakaʼapaʼapa. ʼE haohaoa toku sino koteʼuhi ʼe mole ʼau suluka pea mole ʼau fakaʼaogaʼi te toloke. ʼI te kokelekasio ʼe ʼau maʼu ai te takitaki lelei, ʼe tokoni mai ke ʼau tauʼi te ʼu fakahala mālohi ʼa Satana. ʼE ʼau mata malimali koteʼuhi ʼe ʼau maʼu ʼi te Fale ʼo Te Puleʼaga te faka kaugā fakaloto mālohi. Pea ʼi te ʼu meʼa fuli ʼaia, ʼe ʼau maʼu te ʼamanaki mālohi, ko te maʼuli heʼegata ʼi te kele.”

¹⁸ Tokolahi te kau tūpulaga ohage ko Lina, ʼe nātou kau ki he tau lahi ʼuhi ko te tui, pea ʼe nātou fiafia ai. ʼE nātou mahino ai ko tonatou maʼuli—logola ʼi ʼihi temi ʼe faigataʼa—ʼe ʼi ai tona ʼuhiga moʼoni pea mo tonatou ka haʼu moʼoni. Koia, koutou haga tauhi ki te ʼAtua ʼaē ʼe tokaga moʼoni ke koutou maʼuli fīmālie. Koutou fakafiafia tona loto, pea ʼe ina fakafiafia anai koutou ʼi te temi nei pea mo he temi ʼe mole ʼiloʼi hona gataʼaga!—Pesalemo 5:11.

[Kiʼi nota]

ʼE Kei Koutou Manatuʼi Koa?

• Koteā te ʼu tuʼutāmaki ʼe koutou maʼu mai ia Satana ia “Ia ʼaē ʼe agakovi”?

• ʼE koutou lava fakafiafia feafeaʼi te loto ʼo Sehova?

• ʼE fakahā feafeaʼi e te Tohi-Tapu ko Sehova ʼe tokaga kia koutou?

• Koteā te ʼu tapuakina ʼe koutou maʼu mai takotou tauhi kia Sehova?

[Talanoa ʼo te pasina 13]

Ko He Tagata Faitotonu Neʼe Teitei Pe Ke Tūkia

Ko Asafe neʼe ko te Levite fai musika ʼiloa ʼi te fale lotu ʼo Sehova ʼi te Iselaele ʼāfea. Neʼe ina fai pe la mo te ʼu hiva neʼe hivaʼi ʼi te tauhi. Kae logola tona ʼu pilivilesio maʼuhiga, neʼe ʼi ai te temi neʼe fakaʼamu ai Asafe ki te maʼuli heʼe lotu ʼo te hahaʼi ʼo tona temi, ʼaē neʼe hage neʼe nātou maʼuʼuli fīmālie logola tanatou maumauʼi te ʼu lao ʼa te ʼAtua. Ki muli age, neʼe ʼui fakalelei fēnei e Asafe: “Neʼe teitei pe ke hēʼia toku ʼu vaʼe, neʼe meihiʼi pe ke ʼau heke. . . . Neʼe ʼau fakaʼamu ki te ʼu tagata ʼaē ʼe nātou laupisi pe kia nātou, ʼi taku sio ki te tokalelei ʼo te kau agakovi.”—Pesalemo 73:2, 3.

Ki muli age, neʼe ʼalu ia Asafe ki te sagatualio ʼo te ʼAtua pea neʼe faikole ʼo ʼuhiga mo te faʼahi ʼaia. ʼI tana kua maʼu te sio fakalaumālie ki te fihifihia ʼaia, neʼe mahino ai kia ia, ʼe fehiʼa Sehova ki te agakovi pea ʼi tona temi totonu ko te kau agakovi pea mo te kau faitotonu, ʼe nātou tahi utu pe anai te meʼa ʼaē neʼe nātou to. (Pesalemo 73:17-20; Kalate 6:7, 8) ʼIo, ko te kau agakovi ʼe nātou nonofo ʼi te kele ʼe momole. Pea ki muli age, ʼe nātou higa anai mokā ʼe fakaʼauha e Sehova te faʼahiga tuʼu heʼe lotu ʼaenī.—Apokalipesi 21:8.

[Paki ʼo te pasina 15]

ʼE tokaga moʼoni ia Sehova ke koutou maʼuli fīmālie, kae ʼe fakatuʼutuʼu ia Satana ke ina kai koutou

[Paki ʼo te pasina 16]

Tokolahi te kau tūpulaga ʼe nātou maʼu te fiafia lahi mo tonatou ʼu kaumeʼa Kilisitiano ʼi tanatou tauhi kia Sehova