Te ʼu Fehuʼi ʼa Te Kau Lautohi

Ia Hepeleo 2:​14 (MN ), he koʼe koa ʼe fakahigoaʼi ia Satana “ko ia ʼaē ʼe ina maʼu te puleʼaki moʼo fakatupu te mate”?

Moʼo fakanounou, neʼe fia ʼui e Paulo ko Satana ʼe feala ke ina fai he meʼa fakahagatonu peʼe ina fakaʼaogaʼi tana ʼu tagata gāue moʼo fakatupu te mate ʼo te hahaʼi. ʼO mulimuli ki te manatu ʼaia, neʼe fakahigoaʼi e Sesu ia Satana “ko he fai fakapō ʼi tana kamata.”​—Soane 8:​44, MN.

ʼE feala ke hoko ai he ʼu mahino hala ia Hepeleo 2:14, koteʼuhi ʼe fakaliliu fēnei e ʼihi Tohi-Tapu, ko Satana ʼe ina maʼu te “pule ki te mate.” (King James Version; Revised Standard; New International Version; Jerusalem Bible) ʼE hage ʼe fakaliliu e te ʼu Tohi-Tapu ʼaia ko Satana ʼe ina maʼu te fealagia faʼifaʼitaliha moʼo matehi ʼo he tahi ʼe loto ki ai. Kae ʼe hala te manatu ʼaia. Kanapaula neʼe feiā, kanaʼauala kua fualoa tana molehi ʼo te kau atolasio ʼa Sehova ʼi te kele.​—Senesi 3:​15.

Ko te kupu faka Keleka “kraʹtos tou tha·naʹtou” ʼaē neʼe fakaliliu ʼi ʼihi Tohi-Tapu ʼaki te kupu “pule ki te mate” pea “ ʼe ina maʼu te puleʼaki moʼo fakatupu te mate” ʼi te Tohi-Tapu Traduction du monde nouveau. Ko te tou tha·naʹtou ʼe haʼu mai te kupu ʼe faka ʼuhiga ki te “mate.” Ko te kraʹtos ʼe faka ʼuhiga tāfito ki te “mālohi.” ʼE ʼui e te Theological Dictionary of the New Testament, “ko tona faka ʼuhiga ʼe ʼi ai te mālohi pea mo te mahino ki te mālohi ʼaia, kae ʼe mole faka ʼuhiga ki tona faʼahiga fakaʼaogaʼi.” Koia, ia Hepeleo 2:​14, ʼe mole ʼui e Paulo ko Satana ʼe ina maʼu te mālohi katoa ki te mate. Kae ʼe ina ʼui ko Satana ʼe ina lavaʼi peʼe feala hana matehi ʼo he tahi.

ʼE fakahoko feafeaʼi e Satana “te puleʼaki moʼo fakatupu te mate”? ʼI te tohi ʼo Sopo, ʼe tou maʼu ai te ʼaluʼaga ʼe mole hoko tuʼumaʼu. ʼE fakamatala ai ko Satana neʼe ina fakaʼaogaʼi he afā moʼo ‘fakatupu ai te mate’ ʼo te fānau ʼa Sopo. Kae koutou fakatokagaʼi, neʼe feala kia Satana ke ina fai te faʼahi ʼaia he neʼe fakagafua age e te ʼAtua, pea neʼe ina maʼu te fealagia ʼaia koteʼuhi neʼe ʼi ai te fihifihia neʼe tonu ke fakatokatoka. (Sopo 1:​12, 18, 19) ʼIo, neʼe mole feala kia Satana ke ina matehi ia Sopo. Neʼe mole fakagafua age kiai ia te faʼahi ʼaia. (Sopo 2:6) ʼE ʼasi mai ai, tatau aipe mo kapau neʼe feala ke fai e Satana he puleʼaki moʼo matehi ʼo he ʼu hahaʼi agatonu, kae ʼe mole tonu ke tou matataku, ʼi hana lava matehi tatou ʼi he temi pe ʼe loto kiai.

ʼE feala ke matehi e Satana he tahi ʼaki tana hahaʼi gāue ʼaē ʼi te kele. Koia, tokolahi te kau Kilisitiano neʼe matehi nātou ʼuhi ko tanatou tui, ko ʼihi neʼe fakapogi e te hahaʼi aga fekai peʼe neʼe matehi hala ia nātou ʼuhi he neʼe fakatotonu e he ʼu hahaʼi ʼo he puleʼaga, peʼe ko he ʼu tuʼi fakamāu aga fakakākā.​—Apokalipesi 2:​13.

Tahi ʼaē meʼa, ʼi ʼihi temi ʼe matehi e Satana te hahaʼi heʼe ina fakaneke tonatou ʼu vaivaiʼaga. ʼI te temi ʼo te kau Iselaele, neʼe tokoniʼi e te polofeta ko Palaame ia te kau Moapite ke nātou fakahalaʼi te kau Iselaele ke nātou “heʼe agatonu kia Sehova.” (Faka au 31:16) Pea neʼe mamate ai te toko 23 000 tupu kau Iselaele. (Faka au 25:9; 1 Kolonito 10:8) Ia ʼaho nei, ko ʼihi ʼe nātou tō ki te ʼu “kākā” ʼa Satana pea ʼe nātou fai te ʼu felāveʼi fakasino heʼeʼaoga, peʼe ko he tahi age ʼu aga heʼe faka lotu. (Efeso 6:​11, MN ) ʼIo, ko te hahaʼi ʼaia ʼe mole mamate aipe ʼi te moʼi temi ʼaia ʼaē ʼe nātou agahala ai. Kae ʼe feala pe ke mole nātou maʼu te maʼuli heʼegata, pea ki te faʼahi leva ʼaia ʼe matehi ai nātou e Satana.

Logola ʼe tou ʼiloʼi te fealagia ʼa Satana ke ina fakamamahiʼi tatou, kae ʼe mole tonu ke tou matataku fakavale kia te ia. ʼI te temi ʼaē neʼe ʼui ai e Paulo ko Satana ʼe ina maʼu te puleʼaki moʼo matehi ʼo he tahi, neʼe ina toe ʼui pe foki ko Kilisito neʼe mate koteʼuhi ke ina “faka pulinoa ia [Satana] . . . pea ke ina hāofaki ia nātou fuli ʼaē ʼi tanatou matataku ki te mate, neʼe faka popūlaʼi nātou ʼi tonatou maʼuli katoa.” (Hepeleo 2:​14, 15, MN ) Ei, neʼe foaki e Sesu te totogi, ʼo ina faka ʼāteaina te hahaʼi fakalogo mai te popūla ki te agahala pea mo te mate.​—2 Timoteo 1:​10.

ʼIo, ʼe tou ʼiloʼi ko Satana ʼe ina lava matehi he tahi, kae ʼe tou falala ko Sehova ʼe feala ke ina fakatokatoka te kovi fuli neʼe fakatupu e Satana pea mo tana kau gāue. ʼE fakapapauʼi mai e Sehova, ko Sesu ʼaē kua fakatuʼuake ʼe ina “maumauʼi [anai] te ʼu gāue ʼa te Tevolo.” (1 Soane 3:8, MN ) ʼAki te mālohi ʼo Sehova, ʼe fakatuʼuake anai e Sesu te kau mate pea ʼe ina faka pulinoa ai anai te mate. (Soane 5:​28, 29) ʼOsi ʼaia, pea ʼe fakagata leva anai e Sesu ia te ʼu meʼa ʼaē ʼe fai e Satana ʼaki tona mālohi, ʼi te temi ʼaē ka ina lī anai ia ia ki te vanu pea mo tauteaʼi ki te fakaʼauha heʼegata.​—Apokalipesi 20:​1-​10.