Tou Fagonogono ʼi Te ʼu Potu Fuli ʼAē ʼe ʼi Ai Te Hahaʼi
1 ʼI tana mahino ki te tuʼulaga ʼo te laumālie ʼo te ʼAtua ʼi tona minisitelio, neʼe tala fēnei e te ʼapositolo ko Paulo: “Ko te ʼAtua ʼaē ʼe ina fakatuputupu.” Neʼe ina toe mahino foki ki te faʼahi ʼaenī: “Ko tatou ko te ʼu kaugā gāue ʼa te ʼAtua.” (1 Ko. 3:5-9) Ko te gāue ʼaenī ʼe ko te pilivilesio taulekaleka. ʼE lava feafeaʼi hatatou fakahā ki te kaugamālie ʼe tou leleiʼia te maʼua ʼaē ko te ʼu kaugā gāue ʼa te ʼAtua? ʼAki tatatou tala te logo lelei kia nātou fuli ʼaē ʼe felāveʼi mo tatou ʼi tonatou ʼu ʼapi pea mo te tahi ʼu potu.
2 Neʼe fakatotonu mai ke tou “fai ni ʼu tisipulo ʼi te hahaʼi.” (Mateo 28:19) Kapau ʼe tou felogoi pe mo te tokosiʼi ʼi tatatou kau ki te minisitelio, ʼe feala ke tou lotovaivai fakavilivili pea mo tou logoʼi ai ʼe siʼisiʼi te meʼa ʼaē ʼe tou fai. Tahi ʼaē meʼa, ʼe tou leleiʼia tatatou minisitelio mo kapau ʼe feala ke tou maʼu he tokolahi pea mo tou fai palalau mo nātou. Ko te faʼahi ʼaia ʼe feala ke liliu ko he fihifihia, mai tona ʼaluʼaga ʼaē ʼe ʼaoga ke tou fai he ʼu fakatuʼutuʼu ke tou ʼolo ki te ʼu potu fuli ʼaē ʼe ʼi ai te hahaʼi ke feala ai hatatou felāveʼi mo nātou.
3 Te ʼu Faʼifaʼitaki ʼe ʼAoga: ʼE feala ke tou fagonogono ki te hahaʼi ʼi te ʼu fakatauga meʼa, ʼi te ʼu lotoʼā, ʼi te ʼu koga meʼa ʼe mālōlō ai te hahaʼi, pea mo te ʼu koga meʼa ʼe talitali ai te hahaʼi ki te kā. Mokā koutou heheka ʼi te kā, kua koutou teuteu koa ke koutou fai fagonogono ʼi loto? Ko te ʼu Fakamoʼoni e toko lua neʼe heheka ʼi te kā kua fonu, neʼe nā fai palalau ki te paki ʼo ʼuhiga mo te Palatiso ʼi te tohi Te ʼAtamai Mālama, ʼo nā palalau ki te fakapapau ʼa te ʼAtua ʼo ʼuhiga mo te ka haʼu. ʼI he temi neʼe mole nā ʼamanaki kiai, ko he tūpulaga neʼe heka ʼo ōvi age kia nāua neʼe logo ki tanā fai palalau pea neʼe ōfo ʼi te meʼa ʼaē neʼe logo kiai. ʼI muʼa ʼo tanā mavae ʼi te kā, neʼe ina toʼo te tohi pea neʼe ina kole age ke ʼalu age he tahi ʼo ʼaʼahi ia ia ʼi tona ʼapi.
4 ʼE lahi te ʼu kaugā fai faka mafola ʼe nātou maʼu te fiafia ʼi te fai ʼo te fagonogono faigamālie. Ko he tuagaʼane neʼe ʼalu ki te ʼu fale koloā ʼi te hili hoʼatā pea neʼe fakaōvi ki te hahaʼi ʼaē neʼe kua ʼosi tanatou faifakatau kae ʼe hage ʼe mole nātou fakavilivili. Neʼe ina tufa te ʼu tohi fuli ʼaē neʼe tuku ʼi tana kato. Ko he tagata neʼe heka ʼi tana motokā neʼe fiafia ʼi tana maʼu te ʼu tohi mai te tuagaʼane ʼaia. Neʼe kua ʼalu ki te ʼu fono ʼi he temi ki muʼa atu, pea ko tanā fai palalau neʼe ina toe uga ai tana fia logo.
5 ʼE ko he pilivilesio te fakavikiviki ʼo te huafa ʼo Sehova. ʼAki tatatou fakahā tatatou faiva ʼi te gāue fai faka mafola, ʼe tou fakahā ai ʼe mole galo ia tatou te fakatuʼutuʼu ʼo ʼuhiga mo te agaʼofa ʼa te ʼAtua kia tatou. Mai tona ʼaluʼaga ʼaē “ko te temi ʼaenī ʼe ko te temi faigamālie” moʼo tokoni ki te hahaʼi, tou ʼolo ki te ʼu potu fuli ʼaē ʼe ʼi ai te hahaʼi pea mo fagonogono kia nātou ʼo ʼuhiga mo te “ ʼaho ʼo te hāofaki” ʼo Sehova.—2 Ko. 6:1, 2.