Koutou Fakaʼaogaʼi Te ʼu Kaupepa ʼAē ʼe Malave Ki Te ʼAtamai Pea Mo Te Loto ʼo Te Hahaʼi
1 ʼE tonu ke tou fakahā te moʼoni ʼo te Tohi-Tapu ke malave ki te ʼatamai pea mo te loto ʼo te hahaʼi. Ko Sesu ʼi tana fakahā te moʼoni kia nātou ʼaē neʼe nātou fakalogo kia ia, neʼe ina filifili he ʼu meʼa neʼe fia logo kiai te hahaʼi pea mo uga nātou ke nātou fai he ʼu gāue. (Luka 24:17, 27, 32, 45) Kapau ʼe tou loto ke ʼi ai he ʼu fua ʼo totatou minisitelio, pea ʼe tonu ke tou faiga mālohi ke tou ʼiloʼi te ʼu meʼa ʼaē ʼe ʼaoga ki te hahaʼi ʼi te faʼahi fakalaumālie.
2 Ko te ʼu kaupepa ʼe feala ke ʼaoga lelei ke malave ki te ʼatamai pea mo te loto ʼo te hahaʼi ʼaē ʼe tou felāveʼi mo nātou ʼi te minisitelio. Koutou fakakaukauʼi lelei pe ko ai ʼaē ka ina tali anai te moʼoni ʼaki te ʼu kaupepa ʼaenī ʼaē ka tou fakahā anai ʼi ʼAukusito:
—ʼE tokaga moʼoni koa te ʼAtua kia tatou? Ko te hahaʼi ʼaē ʼe tau mo he ʼu fihifihia faka paʼaga pe neʼe hoko kia nātou he meʼa fakaʼofaʼofa, ʼe nātou leleiʼia anai te logo fakaloto fīmālie ʼo te kaupepa ʼaia ʼo ʼuhiga mo he ka haʼu ʼaē ʼe mole toe ʼi ai anai te mamahi.
—Koteā ʼAē ʼe Fakamaʼua Mai e Te ʼAtua Kia Tatou? ʼE fakahā lelei mai e te kaupepa ʼaia pe koteā te meʼa ʼaē ʼe tonu ke fai e te hahaʼi moʼo fai te finegalo ʼo te ʼAtua. ʼE tokoni lelei anai kia tatou ke tou kamata he ʼu ako Tohi-Tapu mokā tou ʼolo anai ʼo ʼaʼahi ia nātou ʼaē ʼe fia logo.
—Mokā Mate He Tahi ʼe Tou ʼOfa Mamahi Ai. ʼE tokolahi te hahaʼi ʼaē ʼe nātou teuteuʼi te kau mate, ʼe nātou fia fai ki te kaupepa ʼaia, ke feala hanatou tuku ki te ʼu famili ʼaē ʼe ʼi ai hanatou mate. Ko te kau fai faka mafola ʼaē ʼe nātou faka mafola ʼi te ʼu tānuma, ʼe nātou fakaʼaogaʼi te kaupepa ʼaia moʼo fakaloto fīmālieʼi te hahaʼi lotomamahi. Ko te ʼu tuagaʼane e toko lua neʼe nā fai palalau mo te famili e ko te toko fitu, neʼe nātou faikole ʼi te vaʼe falemaka. ʼAki te fai palalau ʼaia ʼo ʼuhiga mo te logo fakaloto fīmālie ʼaē ʼe tuʼu ʼi te kaupepa ʼaia, neʼe kamata e te faʼe ʼo te famili ʼaia tana ako Tohi-Tapu ʼi te ʼapogipogi ake!
—Te ʼu laumālie ʼo te kau mate—ʼE feala koa hanatou tokoniʼi koutou peʼe nātou fakahalaʼi koutou? ʼE nātou maʼuʼuli moʼoni koa? ʼE tokolahi te hahaʼi ʼaē ʼe nātou feʼekeʼaki peʼe maʼuli moʼoni te ʼu laumālie. Ko te ʼu meʼa ʼaē ʼe fakahā ʼi te kaupepa ʼaia ʼe nātou fakamoʼoni anai, ʼe maʼuli moʼoni te ʼu laumālie pea ʼe feala ke nātou fai he ʼu meʼa ki te hahaʼi. ʼE nātou ʼiloʼi ai anai pe koteā te meʼa ʼaē ʼe tonu ke nātou fai moʼo puipui ia nātou mai te ʼu laumālie.
3 ʼE tonu ke koutou ʼiloʼi lelei te ʼu kaupepa fuli ʼaia, pea ke koutou ʼiloʼi peʼe feafeaʼi tona fakaʼaogaʼi ʼi tokotou telituale. Kapau ʼe koutou fia maʼu he ʼu faʼifaʼitaki, koutou vakaʼi te pasina fakaʼosi ʼo Te Minisitelio ʼo Te Puleʼaga ʼo Sūlio 1998. ʼOfa pe ke tapuakina e Sehova takotou faiga ʼaē ke koutou lave ki te ʼatamai pea mo te loto ʼo te hahaʼi.—Maleko 6:34.