ʼE Tonu Ke Tou ʼAʼahi Tuʼumaʼu Te Hahaʼi
1 Neʼe koutou tali lelei koa te ʼuluaki tala atu ʼo te logo lelei? Kapau neʼe mole koutou tali lelei ʼi te moʼi temi pe ʼaia, pea ʼe mahino ia, ʼi te temi nei ʼe koutou loto fakafetaʼi he neʼe ʼōmai tuʼumaʼu te kau Fakamoʼoni ʼa Sehova ʼo ʼaʼahi koutou, ʼo aʼu ki takotou tali he ako Tohi-Tapu. ʼE ko he meʼa lelei hatatou manatuʼi te faʼahi ʼaia mokā tou gāueʼi liuliuga tatatou telituale.
2 Ko te maʼuli ʼa te hahaʼi ʼe fetogi tuʼumaʼu. ʼE hoko kia nātou he ʼu fihifihia pea mo he ʼu ʼaluʼaga foʼou, ʼe nātou logo ki he ʼu tuʼutāmaki ʼi tonatou fenua peʼe ʼi te malamanei, ʼe nātou tau mo he ʼu faigataʼaʼia faka paʼaga, peʼe nātou mahaki pe neʼe mate he tahi ʼi tonatou famili. ʼE lagi nātou fia ʼiloʼi ai leva te tupuʼaga ʼo te ʼu tuʼutāmaki ʼaia. ʼE tonu ke tou maʼu te fakasiosio tonu ke tou ʼiloʼi te ʼu meʼa ʼaē ʼe mamahi ai te fakakaukau ʼa te hahaʼi, pea mo tou fakaloto fīmālieʼi nātou ʼaki te logo ʼaē ʼe tou tala.
3 ʼE Ko He Gāue ʼe Ina Hāofaki Te Hahaʼi: Koutou fakakaukauʼi age muʼa te gāue ʼaē ʼe fai e te ʼu tagata hāofaki hahaʼi, ʼi he koga meʼa neʼe hoko ai he tuʼutāmaki. Tatau aipe peʼe gāue ʼihi ʼi he koga meʼa ʼe tokosiʼi ai te hahaʼi ʼaē neʼe hāo ʼi te tuʼutāmaki, kae ʼe mole nātou fakatuatuai anai peʼe nātou tuku anai tanatou gāue ʼuhi pe heʼe tokolahi age te hahaʼi ʼaē ʼe hāofaki e tonatou ʼu kaugā gāue ʼi he tahi koga meʼa. ʼE mole heʼeki ʼosi tatatou gāue ʼaē ko te hāofaki ʼo te hahaʼi. ʼI te taʼu fuli, ʼe maʼu te lauʼi teau afe hahaʼi ʼaē ʼe nātou fia hāo ʼi “te fakamamahi lahi.”—Fkhā. 7:9, 14.
4 “Ko ia ʼaē ʼe fetapā ki te huafa ʼo Sehova ʼe hāo anai ia.” (Loma 10:13-15) ʼAki te ʼu palalau ʼaia, ʼe tou mahino fuli ai ki te ʼaoga ʼaē ke tou haga fai tatatou gāue fai faka mafola. Talu mai te ʼuluaki fai ʼo tatatou telituale, kua lalahi ake te ʼu fānau pea kua feala ʼi te temi nei ke nātou fakakaukau lelei ʼo ʼuhiga mo tonatou ka haʼu pea mo te ʼaluʼaga ʼo te maʼuli. ʼE mole feala ke tou ʼiloʼi pe ko ai anai ʼaē ka fakalogo. (Tnk. 11:6) Neʼe tokolahi ia nātou ʼaē neʼe fakafeagai ʼi te temi muʼa kua nātou tali te moʼoni ʼi te temi nei. ʼE ko hatatou gāue ke tou haga foaki kia nātou te fealagia ʼaē ke nātou logo pea ke hāofaki nātou mai te mālama ʼāfea ʼaenī, kae mole tonu ke tou fakamāuʼi nātou. Ohage ko te meʼa ʼaē neʼe fai e te ʼu ʼuluaki tisipulo ʼa Sesu, ʼe tonu ke tou “ ʼolo tuʼumaʼu” ki te hahaʼi pea mo uga tanatou fia logo ki te logo ʼo te Puleʼaga.—Mateo 10:6, 7.
5 ʼE fakahā e Sehova tona manavaʼofa he kei hoko atu pe tatatou fai faka mafola. (2 Pet. 3:9) ʼI tatatou fakagafua ʼaē ki te hahaʼi ke nātou logo liuliuga ki te logo lelei, ʼe tou faka maʼuhigaʼi ai te ʼofa ʼo te ʼAtua, pea mo tou fakavikiviki ai kia te ia.