Te ʼu Fakatahi—Ko He ʼu Temi Fakafiafia!
1 Ko te ʼu fakatahi ʼa te kau Fakamoʼoni ʼa Sehova, ʼe ko he ʼu lakaga ʼe nātou fakafiafia lahi ai. Lolotoga ni ʼu taʼu e teau tupu, neʼe tokoni te ʼu fakatahi ʼaia ki te tuputupu ʼaē neʼe hoko ʼi totatou kautahi. Mai he ʼu kamata veliveli, neʼe tou sio ki te ʼu tapuakina lahi ʼa Sehova ki tatatou gāue ʼaē ʼe fai ʼi te malamanei katoa. ʼI tatatou ʼuluaki fakatahi ʼi te ʼu temi ʼaenī, ʼi Chicago, Illinois, ʼi te 1893, ʼi te toko 360 ʼaē neʼe kau kiai, ko te toko 70 neʼe nātou papitema moʼo fakahā kua nātou foaki tonatou maʼuli kia Sehova. Ko te ʼu Fakatahi Faka Tisitilike ʼo te taʼu ʼaenī kua ʼosi “Tou Maʼuliʼi Te Folafola ʼa Te ʼAtua,” ʼi te malamanei katoa neʼe kau kiai te toko 9 454 055, pea neʼe papitema te toko 129 367. ʼI tupuʼaga lelei leva ke tou fakafiafia!
2 ʼO feiā ʼi te ʼu temi faka Tohi-Tapu, ko te ʼu fakatahi ʼo te hahaʼi ʼa te ʼAtua, neʼe ko he ʼu lakaga maʼuhiga ke akoʼi nātou e Sehova. ʼI te temi ʼo Esitalasi pea mo Nehemia, neʼe fakalogo te hahaʼi ki te lau ʼo te Lao “mai te māfoatā ʼo kaku ki te fetapā.” (Neh. 8:2, 3) Neʼe “fiafia lahi” ai te hahaʼi, heʼe ʼi te lakaga ʼaia neʼe nātou mahino lelei ai ki te Lao. (Neh. 8:8, 12) ʼO feiā mo tatou, ʼe tou fakafiafia heʼe ko te ʼu fakatahi ʼe nātou tuku mai he fealagia lelei ke foaki mai e Sehova “ ʼi tona temi totonu,” he ako lelei pea mo he meʼa kai fakalaumālie ʼaki “te tagata kaugana agatonu mo poto.” (Mat. 24:45, MN ) Mai tona ʼuhiga ʼaē neʼe ʼui e Sesu ʼe tonu ki te tagata ke maʼuli “ ʼaki te folafola fuli ʼe haʼu mai te gutu ʼo Sehova,” koia ʼe maʼuhiga ai te ʼu fakatahi ki totatou maʼuli fakalaumālie.—Mat. 4:4, MN.
3 Tou Faiga Mālohi Ke Tou Kau Kiai: ʼE tonu kia tatou fuli ke tou fakatuʼutuʼu takitokotahi ke tou kau ʼi te taʼu ʼaenī ki te Fakatahi Faka Tisitilike “Te Kau Faiako ʼo Te Folafola ʼa te ʼAtua.” Tou fakatuʼutuʼu ke tou ʼōmai fakatomuʼa ʼi te ʼaho fuli pea mo tou nonofo ʼo aʼu ki te “Ameni!” ʼo te faikole fakaʼosi. Moʼo fakahoko te faʼahi ʼaia, ʼe lagi tonu anai ke tou fakatuʼutuʼu lelei totatou temi. ʼE lagi faigataʼa hakita toʼo he ʼu ʼaho mālōlō ki te fakatahi. Kae ʼe tonu ke tou lototoʼa, ʼo mole tou tuku feiāʼi. Kapau ʼe tonu ke tou maʼu hotatou nofoʼaga pea mo he meʼa feʼaluʼaki, pea ʼe tonu ke tou fai he ʼu fakatuʼutuʼu fakatomuʼa. ʼE ʼaoga anai te ʼu faiga ʼaē ka tou fai!
4 Ko te hahaʼi ʼa Sehova ʼe mole nātou lau peʼe ko te fia ʼaē ka nātou fakaʼaogaʼi, mo kapau ʼe nātou fia maʼu te ʼu tapuakina ʼo te fakatahi. Koutou fakatokagaʼi te ʼu faʼifaʼitaki ʼa ʼihi neʼe nātou lotomālohi ke nātou kau ki te Fakatahi Faka Malamanei ʼa te kau Fakamoʼoni ʼa Sehova ʼi te 1958, ʼi New York, ko tona kupu tāfito ko Te Finegalo ʼo te ʼAtua. Ko te tēhina neʼe ina pupunu tana matani gāue laga fale lolotoga vāhaʼa e lua, ke ʼalu ʼo tokoni ki te fakatahi pea mo kau kiai. Ko te tēhina ʼi te ʼu motu ʼo Iles Vierges, neʼe ina fakatau tana ʼu eketa e lua ʼo tona moʼi kele, ke feala kia nātou toko ono ʼo tona famili ke nātou kau ki te fakatahi ʼaia. Ko te taumatuʼa kei tūpulaga, neʼe nā fakatau tonā vaka ke feala hanā ʼolo ki te fakatahi, mo tanā ʼu tamaliki e toko tolu, ʼaē neʼe māhina lua te muli kae taʼu fitu ia ia ʼaē ʼe lahi. Neʼe ʼui age ki te tautēhina e toko tolu ʼi Californie, kapau ʼe mole nātou ʼōmai ki tanatou gāue, pea ʼe fakamavae anai nātou. Kae ko te faʼahi ʼaia neʼe mole ina tāʼofi tanatou ʼolo ki te fakatahi maʼuhiga ʼaia.
5 ʼE Fakapale e Sehova Tatatou ʼu Faiga Fakamalotoloto: ʼE sio ia Sehova ki te ʼu faiga ʼo tana hahaʼi, pea ʼe ina tapuakinaʼi nātou. (Hep. 6:10) Ohage la, ʼi te fakatahi ʼaē neʼe fai ʼi te 1950 “Te Tuputupu ʼo Te Teokalasia,” neʼe logo te hahaʼi ki te akonaki maʼuhiga “Te ʼu Tuʼu ʼo Te ʼu Faʼahiga Meʼa Foʼou.” Ko te tēhina ko Frederick Franz neʼe ina fakatupu te fia logo ʼa te hahaʼi fuli ʼaki te fehuʼi ʼaenī: “Ko te hahaʼi ʼo te fakatahi faka malamanei ʼaenī, ʼe nātou fiafia anai koa ʼi hanatou ʼiloʼi, ʼi henī ʼi te afiafi ʼaenī, ʼe nofo mo tatou ʼihi ʼo te ʼu tama ʼaliki ʼo te kele foʼou?” Hili kiai taʼu e 50, ʼe kei tou fiafia ʼi te fakamahino lelei ʼaia ʼo te Pesalemo 45:16.
6 ʼI tana ʼosi kau ki te fakatahi faka tisitilike ʼo te taʼu ʼaenī kua ʼosi, neʼe loto fakafetaʼi te pule famili ʼo ina tohi fēnei: “ ʼU tēhina, ʼe mātou fia fakahā atu neʼe hāofaki mātou e te fakatahi ʼaia. Neʼe mavae tomatou famili ki te kolo lahi ʼuhi ko te gāue, kae neʼe mātou lotovaivai ai ʼi te faʼahi fakalaumālie. . . . Neʼe mole kei mātou fai tomatou ʼu maʼua faka Kilisitiano. Neʼe mole kei mātou ʼolo ki te ʼu fono pea mo te fai faka mafola. . . . Neʼe toe fakaloto mālohiʼi mātou e te fakatahi ʼaia, pea kua mātou toe fai hamatou ʼu fakatuʼutuʼu fakalaumālie, pea mo mātou fakaʼaogaʼi homatou temi moʼo fakahoko te ʼu fakatuʼutuʼu ʼaia.”
7 ʼE foaki mai e Sehova te meʼa kai fakalaumālie ʼaē ʼe ʼaoga kia tatou. ʼI tatatou ʼu fakatahi ʼe ina tufa mai he ʼu tuʼuga meʼa kai. ʼE feala anai ʼaki tatatou loto fakafetaʼi ki te fakatuʼutuʼu ʼaia, ke tou fai te ʼu palalau ʼaē neʼe fai e Kolonelio, ʼi te temi ʼaē neʼe ʼaʼahi ia ia e te ʼapositolo ko Petelo: “ ʼI te lakaga ʼaenī, ʼe mātou tutuʼu fuli ia muʼa ʼo te ʼAtua moʼo fagono ki te ʼu meʼa fuli ʼaē neʼe fakatotonu atu e Sehova ke ke tala mai.” (Gaue 10:33, MN ) Tou fakatuʼutuʼu ke tou ‘tuʼutuʼu ia muʼa ʼo te ʼAtua’ ʼi te ʼu ʼaho fuli ʼaē ka fai ai te Fakatahi Faka Tisitilike ʼo te taʼu ʼaenī “Te Kau Faiako ʼo Te Folafola ʼa Te ʼAtua,” pea mo tou fakafiafia!