Ko He Temi Moʼo Fefakaloto Mālohiʼaki
1 ʼI te ʼaho fuli, ʼe ʼahiʼahiʼi te tui ʼa te hahaʼi ʼa Sehova. Kua ʼiloʼi e te Tevolo kua nounou tona temi, koia ʼe ina faigaʼi ʼi te temi fakaʼosi ʼaenī ke ina maumauʼi tatatou nofo agatonu kia Sehova. (Apk. 12:12) ʼE maʼuhiga ke tou “haga maʼu te mālohi ʼi te ʼAliki pea mo te mālohi ʼo tona māfimāfi,” ke feala hatatou “tekeʼi te ʼaho ʼo te agakovi pea ʼi [tatatou] ʼosi fai katoa ia meʼa fuli, ke [tou] tuʼu mālohi.”—Ef. 6:10, 13, MN.
2 Ko te fakatahi mo totatou ʼu tēhina mo tuagaʼane, ʼe ko he fakatuʼutuʼu neʼe fai e Sehova moʼo tokoni kia tatou ke tou mālolohi. Neʼe mahino ki te ʼapositolo ko Paulo ʼe maʼuhiga te faʼahi ʼaia. Neʼe fia fakatahi mo tona ʼu tēhina Kilisitiano, ke feala hanatou “fefakaloto mālohiʼaki.” (Loma 1:11, 12, MN, kiʼi nota ʼi te lalo pasina.) Moʼo fakaloto mālohiʼi ʼo tatou ke tou fai te finegalo ʼo te ʼAtua, neʼe fakatuʼutuʼu e te Kolesi Pule he ʼu temi faigamālie ke tou fefakaloto mālohiʼaki ʼi te Fakatahi Faka Tisitilike ʼaē ka hoko mai “Te Kau Fai Faka Mafola Faiva ʼo Te Puleʼaga.” ʼO ʼuhiga mo totatou Filiale, ʼe fai anai he fakatahi ʼi Port-Vila, ʼi Vanuatu, (ʼi te ʼaho 23 ki te ʼaho 25 ʼo ʼAukusito) te ʼu fakatahi e lua ʼi Niumea (ʼi te ʼaho 6 ki te ʼaho 8 ʼo Sepetepeli pea mo te ʼaho 13 ki te ʼaho 15 ʼo Sepetepeli) pea mo te fakatahi ʼaho lua ʼi Uvea ʼi te ʼaho 5 ki te ʼaho 6 ʼo ʼOketopeli, ʼi te taʼu 2002.
3 Koutou Kau Ki Te Fakatahi: Koutou fakatuʼutuʼu ke koutou kau ki te ʼu ʼaho fuli ʼo te Fakatahi. ʼE ‘ ʼaoga anai kia tatou’ mo kapau ʼe tou ʼolo ki te fakatahi ʼi muʼa ʼo te ʼuluaki katiko, pea mo tou nonofo ai ʼo aʼu ki te “Ameni” ʼo te faikole fakaʼosi. (Isa. 48:17, 18) Ko te tokolahi ʼe tonu anai ke nātou vakaʼi fakatomuʼa ʼo ʼuhiga mo tanatou gāue, ke feala hanatou ʼōmai ki te ʼu ʼaho e tolu ʼo te fakatahi. ʼE moʼoni, ʼe mole lagi faigafua hakita kole age ki te patolo he ʼu ʼaho mālōlō, kae ʼe fakapapau mai e Sehova, ʼe tokoni mai anai kia tatou ke tou fai tona finegalo. (1 Soa. 5:14, 15) Kapau ʼe mole heʼeki tou fai he ʼu fakatuʼutuʼu ʼo ʼuhiga mo te motokā, pea mo te nofoʼaga, pea ʼe tonu ke tou fai ʼi te temi nei. Tou falala ko Sehova ʼe ina tapuakina anai tatatou ʼu faiga ke tou kau ki te ʼu ʼaho e tolu.—Taag. 10:22.
4 Koutou Fakaʼamu Ki Te ʼu Fakaloto Mālohi: Ka ʼosi he fakatahi faka tisitilike, neʼe lagi koutou ʼui fēnei: “Neʼe lelei ʼosi te fakatahi!” He koʼe neʼe koutou leleiʼia te fakatahi? Koteʼuhi ʼi totatou ʼuhiga agahala, ʼe feala ʼaki te temi ke tou liliu ʼo vaivavai, pea ʼe ʼaoga kia tatou he fakaloto mālohi ʼi te faʼahi fakalaumālie. (Isa. 40:30) Neʼe ʼui fēnei e te tahi tuagaʼane: “Ko te tuʼu ʼaenī, ʼe ina fakaloto vaivaiʼi ʼau, pea ko te ʼu fakatahi ʼe nātou tokoni mai ke ʼau haga manatuʼi taku ʼu fakatuʼutuʼu fakalaumālie, ʼo ina toe tuku mai te mālohi fakalaumālie ʼaē ʼe ʼaoga kia ʼau. ʼE hage ʼe tō tonu mai te fakaloto mālohi ʼaia, ʼi te temi ʼaē ʼe ʼaoga ʼaupito ai kia ʼau.” ʼE mahino ia, kua hoko kia koutou he ʼu meʼa feiā.
5 ʼE mole gata pe te ʼu fakaloto mālohi ʼi te ʼu akonaki pea mo te ʼu fakafehufehuʼi ʼaē ʼe fai ki te ʼu tēhina mo tuagaʼane, kae ʼe toe ʼi ai foki mo te tahi ʼu koga maʼuhiga ʼi tatatou ʼu fakatahi. Neʼe ʼui fēnei e te tahi tēhina: “ ʼE ʼau leleiʼia tāfito te ʼu fakamahino lelei pea mo ʼaoga ʼo te ʼu pelesepeto faka Tohi-Tapu. ʼE toe lelei ʼaupito mo te ʼu kiʼi gaoʼi ʼaē ʼe nātou fakahā mai te ʼu faʼifaʼitaki lelei pea mo kovi ʼo te temi muʼa. ʼE ʼi ai te tahi meʼa ʼe ʼau leleiʼia, ʼe ko te ʼu tohi foʼou, pea ʼe ʼau foimo lau atu aipe mokā ʼau liliu ki toku ʼapi.”
6 Ko te ʼu fakatahi ʼe ko he fakatuʼutuʼu maʼuhiga mai ia Sehova lolotoga ‘te ʼu ʼaho fakamuli pea mo faigataʼa ʼaenī.’ (2 Tim. 3:1) ʼE nātou tokoni mai ke tou tokagaʼi te tokoni fakaʼatua ʼaenī: “Koutou nonofo ʼalaʼala, koutou nonofo maʼu ʼi te tui, koutou aga fakatagata, koutou liliu ʼo mālolohi.” (1 Ko. 16:13, MN ) Koia, tou faiga mālohi ke tou kau ki te ʼu ʼaho fuli ʼo te fakatahi, pea mo tou fakaʼaogaʼi te ʼu fefakaloto mālohiʼaki ʼo te Fakatahi Faka Tisitilike “Te Kau Fai Faka Mafola Faiva ʼo Te Puleʼaga.”
[Talanoa ʼo te pasina 3]
Fakatuʼutuʼu Ke Koutou Kau Ki Te ʼu ʼAho e Tolu
■ Koutou fakaʼui hokotou ʼu ʼaho mālōlō.
■ Koutou fakaʼui hokotou nofoʼaga ʼi te koga meʼa ʼaē ka fai ai te fakatahi.
■ Koutou vakaʼi peʼe feafeaʼi hakotou ʼolo ki te fakatahi.