Kotou Fakaʼaogaʼi Lelei Tokotou Temi ʼi Te Minisitelio
1 ʼE mahino ia, ʼe lahi te ʼu gāue ke tou fai ʼi tatatou minisitelio, pea kua nounou te temi ʼaē kei toe. (Soa. 4:35; 1 Ko. 7:29) Kapau ʼe tou fakatuʼutuʼu lelei tatatou gāue pea mo fai fakatomuʼa hatatou polokalama, pea ʼe tou fakaʼaogaʼi lelei anai totatou temi ʼi te minisitelio.
2 Kotou Teuteuʼi: ʼI muʼa ʼo takotou ʼolo ki te fono ki te fai fakamafola, kotou vakaʼi pe kotou maʼu ia te ʼu tohi ʼaē ʼe ʼaoga anai kiā koutou pea mo kotou maʼu loto ia te ʼu palalau ʼaē kā kotou fai. ʼI te fakaʼosi ʼo te fono ʼaki te faikole, kotou foimo ʼolo aipē ki te telituale. Ko he faʼahi, ʼe feala ai anai kiā koutou pea mo nātou ʼaē ʼe kotou ʼolo fakatahi ke lahi takotou ʼu gāue ʼi te temi ʼaē ʼe kotou fai fakamafola ai.
3 Kapau neʼe kua hinoʼi atu koutou ke kotou takitaki ia te fono ki te fai fakamafola, kotou kamata tautonu. Ke nounou te fono, ʼo mole fakalaka iā minuta e 10 peʼe 15. ʼI muʼa ʼo te ʼolo ʼo te kau fai fakamafola, kotou vakaʼi pe kua natou tahi ʼiloʼi tona hoa pea mo te telituale ʼaē kā natou ʼolo ʼo gāue ai.
4 ʼI Te Minisitelio: Kā kua ʼosi te fono ki te fai fakamafola, ʼaua naʼa kotou fakatuatuai he mole hona ʼaoga, kae kotou foimo ʼolo ki takotou telituale. Kapau ʼe kotou fakatuʼutuʼu ke tuku tautonu takotou fai fakamafola, pea ʼe lagi lelei ke kotou fai he puleʼaki ʼo ʼuhiga mo tokotou ʼave ke ʼaua naʼa tupu ai he tuku tautonu ʼo te fai fakamafola ʼa nātou ʼaē neʼe ʼolo fakatahi mo koutou. Kā kotou fai fakamafola mo niʼihi, kotou manatuʼi ia nātou ʼaē ʼe lagi fakatalitali atu ke fakaʼosi takotou fai palalau. ʼE lagi tonu anai ʼaki he aga fakaʼapaʼapa ke kotou fakagata te fai palalau mo he tahi ʼe kei fia hoko ʼatu te fai palalau mo koutou, peʼe kotou fakatuʼutuʼu ke kotou toe liliu mai ʼo ʼaʼahi ia ia ʼaē neʼe fia logo.—Mat. 10:11.
5 Kā kotou fai ʼaʼahi, ʼe mole kotou feʼoloʼaki noa anai mo kapau ʼe kotou ʼaʼahi he tahi ʼi tokotou koga meʼa ʼi muʼa ʼo hakotou fai he tahi ʼaʼahi. ʼE lagi feala pē anai hakotou fai telefoni ki niʼihi ia nātou ʼaia ke kotou ʼiloʼi ai pe kotou maʼu atu anai nātou. (Taag. 21:5) Kapau ʼe kotou ʼiloʼi ʼe fuafualoa anai te fai ʼo te ʼaʼahi, pea ʼe lagi lelei kiā nātou ʼaē ʼe kotou ʼolo fakatahi ke natou fai fakamafola ʼi he telituale ʼe ovi atu peʼe ke natou fai he tahi age ʼaʼahi.
6 ʼE tou māʼuʼuli nei ʼi te temi ʼe fai ai ia te toe taʼukai lahi fakalaumālie. (Mat. 9:37, 38) Kua vave fakaʼosi anai ia te gāue. Koia, ʼe tou loto ai ke tou fakaʼaogaʼi lelei ia totatou temi ʼi te minisitelio.