Tou Faiga Ke Hā Tatatou Aga Ke Hoholo Ai Tatatou Haʼele Ki Muʼa
1 ʼI te temi nei, tokolahi ia tatou neʼe kua ʼosi tanatou lau te Annuaire 1992. Ko he meʼa fakafiafia kia tatou tatatou lau te laka ʼo te kau faka mafola ʼo te Puleʼaga ʼi te malamanei ʼi te taʼu 1991: ko tona lahi ko te toko 4 250 000 ʼi te ʼu fenua e 211, ko tona tupu ko te 6,5 ki te 100! ʼE moʼoni, ko te tupu ʼaia ʼe tou sio ki ai ʼi te kele katoa ʼe fakamoʼoni fakamālohi te fakahoko ʼo te ʼu lea faka polofeta ia Isaia 2:2-4 pea mo Mikea 4:1-4.
2 Logope heʼeki katoa te tānaki ʼo te gāue ʼi te taʼu 1992, ʼe hā mai ia ʼe toe lelei age, heʼe ko Sehova ʼaē ʼe ina fai te fakatuputupu taulekaleka ʼaia. Ke hoholo atu tatatou fai te fakaafe ki te hahaʼi ke nātou ʼomai ʼo fakatahitahi mo totatou famili faka malamanei. Ko te lahi ʼo te ʼaho Fakamanatu pea mo te ʼu fakatahi faka tisitilike ʼe hā mai ai ko te ʼu lauʼi miliona hahaʼi ʼe nātou fia logo ki te logo ʼo te Puleʼaga. ʼI te ʼu fenua fuli, ʼe nātou tali te fakaafe ʼaenī: “Koutou ʼomai pea ke tou hake ki te moʼuga ʼo Sehova, ki te ʼapi ʼo te ʼAtua ʼo Sakopo; pea ʼe ina akoʼi anai tatou ki tona ʼu ala, pea ʼe tou haʼele anai ʼi tona ʼu ala foufou.”
3 Ke tou faiga ʼo haʼele ki muʼa: Ko te kautahi ʼa Sehova ʼe haʼele ki muʼa. Tokolahi ʼe ʼomai ki te moʼuga ʼaē ko te kautahi moʼoni ʼo Sehova; koia ʼe ʼaoga tāfito ke tou faiga ke hā tatatou aga ke feala ai te hoholo ʼo tatatou haʼele ki muʼa ʼi te faʼahi fakalaumālie, pea mo faiga ke tokoniʼi nātou ʼaē mole heʼeki faʼa fualoa tanatou ʼiloʼi te moʼoni ke nātou fai feiā. Ko te maʼuhiga ʼaē ʼo te haʼele ki muʼa ʼe hā mai ʼi te lea faka polofeta ʼaē ʼo ʼuhiga mo nātou ʼe tali ki te fakaafe ʼaē ke hake ki te moʼuga ʼo Sehova, ʼe nātou ʼui fēnei ki niʼihi: “ ʼOmai.” Ia Fakahā 22:17, neʼe fakahā ʼe te ʼapositolo ko Soane te ʼu manatu tatau mo te manatu ʼaia: “Pea ko te laumālie pea mo te fafine ʼohoana ʼe nā ʼui tuʼumaʼu: ‘Haʼu! ’ Pea ko ia ʼaē ʼe logo ke ina ʼui: ‘Haʼu! ’ ”
4 Neʼe fakahā e Sesu peʼe feafeaʼi te fakahoko ʼo te fai fakaafe ʼaia. Ko nātou ʼaē ʼe nātou tali leleiʼi tana akonaki, ʼe ina fakaafe nātou ke nātou kau ki tona minisitelio pea mo ina akoʼi nātou ki te faʼahi ʼaia (Mat. 4:19; 10:5-7, 11-14). Ko te ʼu tisipulo ʼa Sesu neʼe nātou maʼu tana ʼu faʼahiga akonaki fakapotopoto ʼi tanatou muliʼi pea mo tokaga lelei ki ai. Neʼe nātou fakahoko ai foki tonatou minisitelio ʼo muliʼi te faʼifaʼitaki ʼaia. ʼI te lelei ʼaupito ʼo tanatou tokaga ki tana ʼu faʼahiga gāue, koia kua fakatokagaʼi ai nātou ʼe tonatou ʼu fili ki te faʼahi ʼaia, nātou foki ʼaia neʼe mole faigataʼa tanatou ʼiloʼi ko nātou ʼaia ko te ʼu tisipulo ʼa Sesu. ʼE fakahā ia Gāue 4:13 te manatu ʼaenī: ‘Koia, ʼi tanatou sio ʼaē ki te palalau fakahagatonu ʼa Petelo pea mo Soane, neʼe nātou mahino ai ko nāua ʼaē neʼe nonofo mo Sesu.’
5 ʼI muʼa ʼo tana liliu ki selo, neʼe fakatotonuʼi age e Sesu ki tana ʼu tisipulo ke nātou haga hoko tonatou minisitelio faka kilisitiano, ko tona ʼuhiga ʼaē ke fai he ʼu tisipulo pea mo akoʼi nātou ohage ko te akonaki neʼe fai age kia nātou. Ia Mateo 28:19, 20, neʼe ina fakahā te akonaki ʼaenī: “Koutou ʼolo pea mo fai he kau tisipulo ʼo te ʼu hahaʼi ʼo te fenua fuli (...), ʼo koutou akonakiʼi ke nātou maʼuliʼi te ʼu meʼa fuli neʼe ʼau fakatotonu atu.” Neʼe ʼiloʼi e Sesu ko te gāue ʼaia ʼe hoholo ʼo aʼu ki totatou temi, koia ʼe hā mai ʼi te fakapapau ʼaē neʼe ina fai age kia nātou: “Pea koʼeni ʼe ʼau nofo mo koutou ʼi te ʼaho fuli ʼo aʼu ki te temi fakaʼosi ʼo te ʼu faʼahiga meʼa ʼo te tuʼu ʼaenī.”
6 Ko te ʼu tisipulo moʼoni ʼa Sesu neʼe nātou fakalogo lelei ki tana ʼu akonaki; neʼe nātou akonaki ki te ʼu tisipulo foʼou te ʼu meʼa fuli neʼe ina fakatotonuʼi age. Kae, ko te tuputupu fakafiafia ʼaē ʼe hoko ʼi te kokelekasio faka malamanei ʼo te kau Fakamoʼoni ʼa Sehova ʼe ina tokoniʼi anai tatou ke tou fakasiosio te ʼu meʼa ʼe ʼaoga tafito kia nātou ʼaē neʼe hoki papitema, mo te kau faka mafola heʼeki papitema pea mo nātou ʼe nātou ako ia te Tohi-Tapu mo tatou pea mo lagi kamata ʼomai ki te ʼu fono.
7 ʼI te kamata ʼo te taʼu gāue 1992, neʼe ko te tagata fai faka mafola e 1 ki te toko 9 neʼe kua taʼu katoa tana kau ki te minisitelio. Tahi ʼaē meʼa, ko te toko 1 ki te 6 kua taʼu tolu tana fai faka mafola; pea ko te 1 ʼi te toko 4 kua taʼu nima. Logope te kua tokolahi ʼo te kau faka mafola neʼe kua lelei tanatou faiva talu tanatou kau ki te kokelekasio, kae ʼe ʼaoga he tokoni kia nātou ʼi he tahi atu ʼu faʼahi ʼe lelei anai ki tanatou haʼele fakalaumālie.
8 Ia Hepeleo 6:1 ʼe ina fakaloto mālohiʼi tatou ke tou ‘haʼele fakavilivili ki te fakapotopoto’. Ko te fakapotopoto faka kilisitiano ʼe lahi age ia ʼi te foaki pe ʼaē ʼo te pepa tānaki gāue. ʼE kau ki ai mo te ako takitokotahi, te ʼolo tuʼumaʼu ʼaē ki te ʼu fono pea mo te faiva ʼi te fai faka mafola. Ko te fakapotopoto ʼe kau ki ai mo te tokoniʼi ʼo totatou kāiga ke nātou maʼu te moʼoni ʼo ʼuhiga mo tonatou maʼuli. ʼE tonu foki ke fakatuputupu tatatou faiva ʼi te ‘fai palalau ʼaki te Tohi-Tapu’. (Gāue 17:2.) Ko he temi loaloaga ia ke tou aʼu ai ki te fakapotopoto, pea ko te meʼa pe ʼaia ʼe fakalogo ki tatatou aga faka lotu pea mo tatatou faiva ʼi te fai faka mafola. Kapau ko tatatou tui ʼe fakalogo kia tatou, ʼe ko he agapoto ia mokā tou tuku ke tokoniʼi tatou e te ʼu tēhina pea mo tuagaʼane ke tou maʼu ai te aga fakapotopoto. ʼE feala foki tatatou muliʼi tanatou aga, tāfito ʼi te fai faka mafola. Ke ʼaua naʼa tou ʼui pe ʼe tou akoʼi meʼa fuli, ʼaki hatatou ʼahiʼahiʼi ni faʼahiga meʼa pea mo he ʼu hāla.
9 Ko te tokoni kia nātou ʼaē ʼe mole heʼeki fakapotopoto: ʼI te kamataʼaga ʼo te fakatuʼutuʼu ʼo te kokelekasio faka kilisitiano, neʼe fai te tonu ʼaē ke tokoniʼi te hahaʼi. Neʼe akoʼi e Sesu tana kau tisipulo (Maleko 3:14; Luka 9:1; 10:1). Pea mo nātou, neʼe nātou akoʼi ʼihi hahaʼi. Ko Timoteo neʼe fakaloto mālohiʼi pea mo tokoniʼi e te ʼapositolo ko Paulo, kae ko te tisipulo ko Apolo neʼe tuputupu ia ʼaki te tokoni ʼa Aquila pea mo Priscille, nāua ʼaia neʼe kua nā aga fakapotopoto nāua (Gāue 18:24-27; 1 Ko. 4:17). Ia ʼaho nei, ko nātou ʼaē, ʼi te kokelekasio faka kilisitiano, ʼaē kua nātou maʼu te fakapotopoto ʼe nātou muliʼi te ʼu faʼifaʼitaki ʼaia. ʼE natou akoʼi pea mo tokoniʼi tonatou ʼu kau fagona mole heʼeki faiva, tāfito nātou ʼaē ʼe foʼofoʼou mai pea mo te kau tūpulaga. Ia Loma 15:1, 2 ʼe ʼui fēnei: “ ʼE tonu, ko tatou ʼaenī ʼe mālolohi, ke tou ʼamo te ʼu vaivaiʼaga ʼonatou ʼaē ʼe mole mālolohi.”
10 Ko te maʼua ʼo te ʼu mātuʼa ko te tokoniʼi ʼo tanatou ʼu fānau ke nātou haʼele ki muʼa ʼi te potu fakalaumālie. Ko tona ʼuhiga, ke nātou fakatuʼutuʼu he ako faka famili, ʼo akoʼi te ʼu fānau ke fai hanatou ako takitokotahi, ʼo fakaloto mālohiʼi nātou ke nātou ʼolo ki te ʼu fono pea mo fai hanatou tali, ʼo feiā foki ki te fakamāhani ʼo taupau te ʼu meʼa ʼe nātou akoʼi (Ef. 6:4; 1 Tim. 5:8). Ko te kau takitaki ʼo te ʼu ako tohi ʼe tonu ke nātou fai he fakatuʼutuʼu moʼo tokoniʼi nātou ʼaē ʼe kau ki te ako tohi peʼe ko te ʼu fono ʼo ʼuhiga mo te fai faka mafola ke nātou haʼele ki muʼa ʼi te potu fakalaumālie. Ko te taupau ki te gāue pea mo ʼihi ʼu tagata ʼāfea, te kau faifekau faka minisitelio peʼe ko niʼihi ʼi te kokelekasio ʼe feala ke nātou foaki he tokoni.
11 Foaki te tokoni ʼaē ʼe ʼaoga: ʼE lagi ʼaoga he tokoni ʼi he faʼahi, ohage la ko te ako takitokotahi. Ko he tahi ʼe loto anai ki he ʼu tokoni moʼo fakatuʼutuʼu hana polokalama ako ʼe ʼaoga. Ko he tahi atu ʼe lagi faigataʼa tana teuteuʼi hana ʼu tali pe ko te ʼu akonaki. Ko ʼihi atu ʼe tonu ke nātou akoʼi peʼe feafeaʼi te kumi ʼo he ʼu manatu faka tohi-tapu.
12 Tokolahi ia nātou ʼe foʼofoʼou ʼi te faka mafola ʼe ʼaoga ke tokoniʼi nātou ʼi te minisitelio. Ko he kau faka mafola ʼe lagi loto anai ke faiva ʼi te gāue faka mafola ʼi te ʼu ʼapi, ʼi te ʼu ʼaʼahi, peʼe ko te faʼahiga kamata pea mo te taki ʼo he ako faka tohi-tapu. ʼE lagi ʼaoga kia ia ke ina fai he ʼu faʼifaʼitaki ʼaē ʼe fakaʼaogaʼi ai te ʼu ʼuluaki palalau ʼe tuʼu ʼi te tohi Comment raisonner peʼe ko Te minisitelio ʼo te Puleʼaga. Ko ʼihi ʼe loto anai ki he ʼu tokoni ʼo ʼuhiga mo te faʼahiga fakatuʼutuʼu pea mo te muliʼi ʼo he polokalama ʼaoga ki te fai faka mafola. Tou fai he ʼu fakatuʼutuʼu ki te fai faka mafola mo te kau faka mafola ʼaē ʼe loto ke tokoniʼi nātou; ʼe ko he tokoni ʼaia kia nātou ʼi he ʼu faʼahi ʼe ʼaoga kia nātou.
13 ʼE tokoniʼi tatou e te Folafola ʼa te ʼAtua ke hā tatatou ʼu faiga ke sio ki ai niʼihi. ʼE ko te tokoni ʼaia neʼe fai e Paulo ki tona kauga gāue ko Timoteo (1 Tim. 4:15). Moʼo hoko atu ʼo te tokoni ʼaia, neʼe palalau tafito te ʼapositolo ki te maʼuhiga ʼāe ʼo te faiga ohage ko he kau ki he faigaoʼi, peʼe hage ko hatatou fia mālo ʼi he tau fakalaumālie (1 Ko. 9:24-27; 2 Ko. 10:5, 6). ʼE tonu ke tou maʼuliʼi fakavilivili te ʼu meʼa fuli ʼe tou ako ʼo ʼuhiga mo te finegalo fakaʼatua, koia ko nātou ʼaē ʼe sio kia tatou ʼe nātou sio anai ki he ʼu faʼifaʼitakiʼaga maʼuli ʼo te tui faka kilisitiano. Kae, ʼe tonu ke tou tuputupu ʼi te fai akonaki, ke feala ai te ʼomai ʼo niʼihi hahaʼi ʼonatou liliu ko te ʼu tisipulo ʼa Sesu Kilisito. — Sake 1:22-25; 1 Tim. 4:12-16.
14 Ko te faʼa kātaki ʼi te ʼu fakataga ʼe tokoni ki tatatou faiga: Ko Sesu Kilisito totonu neʼe ina maʼu he ʼu ako lelei ʼi te ʼu mamahi neʼe tau mo ia (Hep. 5:8). ʼE feala ke tou fai ʼo feiā. Kae, ʼe feala anai tatatou haʼele ki muʼa fakalaumālie ʼaki te taupau ʼo he fakakaukau lelei neʼe tuku mai ʼe Sake 1:2, 3: “Koutou fakaʼaogaʼi ohage ko he fiafia maʼa, toku ʼu tēhina, ʼi te temi ʼe koutou tau ai mo he ʼu fakataga, ʼo koutou manatuʼi ko te maʼuhiga ʼo takotou tui ʼe maʼu ai te faʼa kātaki.” Koia, peʼe tou tau mo he mahaki, mo he ʼu faigataʼaʼia faka ekonomike, mo te maʼuli ʼi he ʼapi kua mavetevete, te fakafeagai ʼa te hahaʼi ʼo te telituale peʼe ko he ʼu faʼahiga meʼa kehekehe pe, ʼe fakamoʼoni mai Sehova ʼe ina foaki mai anai tana tokoni ke feala ai ke hoko tatatou haʼele ki muʼa ʼi te tauhi ʼaē ʼe tou fai kia te ia (1 Ko. 10:13; 2 Ko. 12:9; 1 Petelo 5:8-11). ʼE tou aʼu anai ki te fahaʼi ʼaia mokā ʼe tou pipiki maʼu kia te ia ʼi te temi fua pe, ‘ ʼo palalau ohage ko te ʼu folafola fakataputapu ʼa te ʼAtua pea mo gāue ohage he ʼu tagata ʼe fakalogo ki te mālohi ʼo te ʼAtua, ke feala ai ia meʼa fuli ke faka kolōliaʼi te ʼAtua ʼaki ia Sesu Kilisito’. — 1 Petelo 4:11.
15 Tou tali ke tokoniʼi tatou ke feala ai he hoholo ʼo tatatou haʼele ki muʼa: Kapau ʼe koutou loto ki he tokoni ke koutou haʼele ai ki muʼa ʼi te potu fakalaumālie, ʼe tonu ke koutou lotolelei ʼo tali ke foaki atu ʼe he tahi kua aga fakapotopoto ʼi te kokelekasio. Kapau neʼe mole heʼeki ʼui atu ʼe he tahi ke ina tokoniʼi koutou, ʼaua naʼa koutou tuku ia takotou mataku ke laka ki muʼa ʼo ina tapuʼi koutou ʼi te fahaʼi ʼaia. Koutou kole he tokoni. ʼAua naʼa koutou manavasiʼi ʼi te kole ki he tahi ʼi te kokelekasio ʼe aga fakapotopoto ke ina tokoniʼi koutou. ʼE feala foki ke koutou fakahā te fahaʼi ʼaia ki te tagata takitaki ʼo takotou ako tohi, ki te tagata taupau ki te gāue peʼe ko he tahi pe ʼi te ʼu tagata ʼāfea. — Vakaʼi ia Senesi 32:26; Mateo 7:7, 8.
16 ʼE ko he pilivilesio fakatalakitupua tatatou kau ki te “toe hahaʼi tokolahi” fakamālama ʼe haʼele ki muʼa pea ʼe ʼolo ki te moʼuga ʼaē ko te kautahi ʼo Sehova (Fkhā. 7:9). ʼE ko he pilivilesio foki te fakaafe ʼo te ʼu hahaʼi ke ʼomai ʼo fakatahi mo tatou ʼi te “tuputupu” ʼaenī. Ke tou faiga, ʼaki he loto fakafetaʼi, ʼo fakahā tatatou aga, ke tou haʼele ki muʼa ʼi te potu fakalaumālie pea mo fai te ʼu meʼa fuli moʼo tokoni ki niʼihi hahaʼi ke nātou haʼele ki muʼa mo tatou ʼi te gāue ʼa Sehova!