Tou Fakahāhā Te Mālama Totonu ʼo ʼUhiga Mo Sesu
1 ʼI tesepeli, ʼe tou fakahā anai te tohi Le plus grand homme de tous les temps ʼi te minisitelio. Koteā anai te meʼa ka tou talanoa ki ai moʼo kamata ʼo he felogoi faka tohi-tapu ʼe ʼaoga pea ʼe feafeaʼi anai hatatou fakahā te tohi lelei ʼaia?
2 Tou fakaʼaogaʼi tatatou ʼu kiʼi pepa lotu foʼou: Ko ʼihi kau faka mafola neʼe fua lelei tanatou fai faka mafola ʼaki tanatou fakaʼaogaʼi te ʼu kiʼi pepa lotu moʼo fakasiosio lelei ai te fia logo ʼa he tahi ʼi muʼa ʼo te fakahā age ki ai he tohi. ʼE feafeaʼi koa hatatou faiga ʼi te faʼahi ʼaia? ʼAki te fakahā ʼo tatatou kiʼi pepa lotu ʼaē Ko te malamanei ʼo te temi ʼaenī ʼe hāo anai koa?
ʼI te ʼosi fakamālo ki he tahi, ʼe feala ke tou ʼui age:
◼ “ ʼE mātou fehuʼi ki te hahaʼi peʼe nātou ʼio ki te ʼui ʼaē ko Sesu Kilisito, neʼe ko ia pe ko te tagata ʼaē ʼe lahi tokotahi ʼo te ʼu temi fuli. [Tuku ke tali mai.] ʼE moʼoni ʼe tokolahi te ʼu tagata neʼe nātou talatuʼu ki te ʼaluʼaga ʼo te temi, pea ko ʼihi neʼe nātou kau ki te fakahaʼele ki muʼa ʼo te temi nei, kae kotou fakatokagaʼi muʼa te meʼa ʼe fakaue e Sesu Kilisito tokotahi. [Lau ia Soane 17:3.] ʼE mole he tahi atu ʼe ia te ia te mālohi moʼo foaki ʼo te maʼuli heʼegata ki te tagata. [Avahi te kiʼi pepa lotu ʼi te pasina 3.] ʼI te temi neʼe nofo ai Sesu ʼi te kele, neʼe ina fakahāhā ia te ʼu faʼahiga meʼa ka hoko ʼi muʼa ʼo te fakaʼosi ʼo te mālama ʼaenī. Kae neʼe ina fakaloto mālohiʼi foki tana ʼu tisipulo ke nātou fakafiafia, koteʼuhi ʼaē ko tonatou hāofaki kua ōvi mai.” ʼI te ʼosi fai palalau ki he ʼu faʼahi ʼo te fakaʼiloga ʼo te haʼu ʼa Kilisito, tou fakatokagaʼi ia ia ʼe felogoi mo tatou ki te pasina fakaʼosi ʼo te kiʼi pepa lotu ʼe hā mai ai ʼihi ʼu manuʼia ʼe foaki mai anai e te Puleʼaga.
3 Ko te kau tūpulaga peʼe ko te kau faka mafola foʼou, ʼe feala anai tanatou fakahāhā te ʼu paki ʼo te kiʼi pepa lotu moʼo kamata ai tanatou ʼu ʼuluaki palalau.
Ko te fakaʼaoga ʼo te kiʼi pepa lotu “Ko te malamanei ʼo te temi ʼaenī ʼe hāo anai koa?”, ʼe feala anai hatatou avahi ʼi te ʼu pasina 3 pea mo 4, pea mo ʼui age:
◼ “Koutou sio mai ki te ʼu paki ʼaenī e lua: ʼi te temi tau, ko he vakalele ʼe ina laku ifo te ʼu foʼi pulu; ʼi heni, ko he tamasiʼi ʼe pakupaku. [Hiki atu ki te pasina 5.] Sio mai muʼa ki ʼihi ʼu paki ʼo he mafuike pea mo he mahaki ʼi te lopitali. [Fai he kiʼi mālōlō.] ʼE fakahā mai e te Tohi-Tapu ko te ʼu meʼa fakamataku ʼaia kua vave nei pe tona pulihi.”
4 Kapau ko ia ʼaē ʼe felogoi mo tatou ʼe hage ʼe fia logo mai, tou lau age ia Fakahā 21:3, 4, ʼo lau totonu ʼi te Tohi-Tapu, peʼe lau ʼi te pasina 6 ʼo te kiʼi pepa lotu. ʼAki te hā ʼo tana fia logo, ʼe feala ke tou faka maʼuhigaʼi niʼihi manatu. ʼOsi ʼaia pea tou fakahā fakafiafia te tohi Le plus grand homme, pea tou fai he ʼu fakatuʼutuʼu ke feala ai hatatou liliu mai ʼo ʼaʼahi ia ia.
5 Tou fai he ʼu fakatafito moʼo fai ʼo he ʼaʼahi ki ʼamuli: Kapau neʼe tou tuku he kiʼi pepa lotu, te tohi Le plus grand homme peʼe ko he tahi atu tohi, peʼe kapau neʼe feala ke fai hatatou felogoi lelei, ʼe feala hatatou ʼui age: “ ʼI taku toe liliu mai, ʼe ʼau fakaʼamu ke ʼau fakahā atu anai he puani ʼe ʼaoga ʼo ʼuhiga mo te faʼahi ʼaē neʼe tupu ai Sesu.” Tou tohi fakalelei te ʼaʼahi pea mo te faʼahi ʼe fia logo ia ki ai.
6 Ko te Puleʼaga ʼe ina fakaue mai te ʼamanaki moʼoni e tahi ki te malamanei. Tou fakahā tatatou holi ke tou fakahā kia nātou fuli ʼe felāveʼi mo tatou te “mālama totonu ki te meʼa fakalilo ʼa te ʼAtua, ia: Kilisito”. — Kol. 2:2.