“Akonakiʼi (...) Te ʼu Meʼa Fuli Pe Neʼe ʼAu Fakatotonu Atu”
1 Ko te gāue ʼaē ko te fai ʼo ni tisipulo ʼe kau ki ai mo te ako. ʼI muʼa ʼo te liliu ʼa he tahi ko he tisipulo ʼa Kilisito, ʼe tonu ke akoʼi ki ai ke ina “taupau te ʼu meʼa fuli” ʼaē neʼe fakatotonu e Sesu (Mat. 28:19, 20). Ko te ako faka tohi-tapu ʼi te ʼu ʼapi ʼe ko he meʼa lelei ʼaia moʼo fakahoko ʼo te faʼahi ʼaia.
2 ʼE mole faigafua tuʼumaʼu te kamata ʼo he ʼu ako faka tohi-tapu. Kapau ʼe koutou faigataʼaʼia te faʼahi ʼaia, ʼaua naʼa koutou lotovaivai. ʼAki te faiga pea mo te holi fakamalotoloto ʼaē ke fakahā te moʼoni ʼaē ʼe tou aʼu ai ki te faʼahi ʼaia. — Kal. 6:9.
3 Taupau te fia logo: ʼE lagi ko he tahi neʼe mole faʼa fia logo ʼi takotou ʼuluaki fai palalau. Kapau neʼe koutou tuku ki ai he kiʼi pepa lotu, he kaupepa peʼe ko he ʼu nusipepa. ʼE feala ke kamata hakotou ako faka tohi-tapu ʼaki he meʼa ʼi te ʼu meʼa gāue ʼaia. Kapau ʼe lahi tana fia logo ki te moʼoni, ʼe lagi feala anai, ʼi he tahi ʼaʼahi ke fakatokagaʼi ia ki he tahi tohi ʼe ʼaoga.
4 Ko te teuteu ʼe ko te tafitoʼaga ʼaia ʼo te fealagia. He koʼe ʼe mole koutou fakatuʼutuʼu ke koutou fakaʼaogaʼi he vaega ʼe tuʼu ʼi he kiʼi pepa lotu, he kaupepa peʼe ko he nusipepa ʼaē ʼe koutou fia fakaʼaogaʼi lolotoga te ʼaʼahi? ʼE faigafua anai foki takotou fakapipiki te tohi ʼaia pea mo te fai palalau, pea lagi ʼo lau ai foki mo he palakalafe e tahi peʼe lua.
5 ʼE feala ke koutou ʼui age:
◼ “ ʼE mātou fakahā te lea faka polofeta fakatalakitupua ʼe hoko ʼi te temi nei.” Lau ia Mateo 24:3, ʼosi ʼaia pea fakapipiki te vaega ki te ʼu paki pea mo te ʼu fakamahino ʼe tou maʼu ʼi te pasina 24 ʼo te kaupepa “Voici”. ʼE feala ke toe fakaʼaogaʼi te faʼahi ʼaia mokā ʼe tou fakahā te kiʼi pepa lotu Ko te malamanei ʼo te temi ʼaenī ʼe hāo anai koa?
6 ʼI te temi ʼaē ʼe koutou sisio ai ki he tahi ʼe fia logo mai, koutou fakamaʼua ia koutou ke koutou tokaga fakatavili ki ai. Koutou faiga ʼo toe liliu ki ai ʼi te lolotoga vāhaʼa. Ko te fai palalau ʼe lagi kei tuʼu maʼu ʼi tona ʼatamai. ʼI te ʼu ʼaʼahi fuli, koutou fakasiosio he ʼu palakalafe ʼo te tohi ʼaē neʼe koutou tuku ki ai. ʼOsi ʼaia, fakahā age te tohi Mauli Heegata pea hoko atu te fai palalau ʼo toe fakaʼaogaʼi te faʼahi ʼe tuʼu ʼi ʼoluga.
7 ʼE kei lahi foki te gāue ʼi te gāueʼaga ʼaē neʼe fakahā e Sesu (Mat. 9:37, 38). Lolotoga tatatou ako te ʼu hahaʼi ʼe loto lelei, ʼe tou maʼu anai te mālohi ʼuhi ko Sesu ʼe ‘nofo mo tatou ia ʼaho fuli ʼo aʼu ki te fakaʼosi ʼo te ʼu faʼahiga meʼa ʼo te tuʼu ʼaenī’.