Tou Fakamanatu Te Mate ʼAē ʼe Ina Foaki Ia Te ʼAmanaki Ki Te Maʼuli Heʼegata
1 Ko te ʼaho 6 ʼo ʼapelili 1993, ʼi te ʼosi to ʼo te laʼā, ʼe tou fakamanatu ai te mate ʼo te Fakatafitoʼaga ʼo te maʼuli (Gāue 3:15). ʼE ʼaoga ia ke manatuʼi te maʼuli ʼo Sesu pea mo fakamanatu ia tona mate. ʼE moʼoni, ʼaki te taʼataʼa neʼe liligi e Sesu ʼe feala ai hatatou ʼamanaki ki te maʼuli heʼegata.
2 Ko te ʼaho Fakamanatu ʼe ina fakahā ia te maʼuhiga ʼo te mate ʼo Kilisito ʼi te fakahoko ʼo te fakatuʼutuʼu ʼa Sehova. Neʼe kau ki te fakatuʼutuʼu ʼaia ke ʼi ai he sakilifisio fakatagata haohaoa moʼo totogi ʼo te hōloga ʼo Atama. Ko te hahaʼi ʼe lauʼi miliale, ʼe haga tui ki te sakilifisio ʼaia, ʼe feala anai hanatou maʼu te maʼuli heʼegata ʼi he palatiso ʼi te kele. — Soane 3:16.
3 Ko nātou fuli ʼaē ʼe ʼoʼofa ki te moʼoni pea mo te maʼuli ʼe nātou talitali ki te ʼaho Fakamanatu, ʼo fakalogo ai foki ki te fakatotonu ʼa Sesu (Luka 22:19). Koteā koa te meʼa ke tou fai takitokotahi moʼo fakahā ai ʼe tou faka maʼuhigaʼi te sakilifisio faitotogi ʼo Kilisito? Kapau ʼe tou mahino lelei ki te maʼuhiga ʼo te toʼotoʼoga ʼo te ʼaho Fakamanatu, ʼe tou fai anai he ʼu fakatuʼutuʼu ʼo ʼuhiga mo te faʼahi ʼaia. Koteā te ʼu teuteu ʼe tou fai ʼo ʼuhiga mo te toʼotoʼoga makehe ʼaia?
4 ʼE ʼaoga ke teuteu: ʼE moʼoni, ʼe tou fakatokaga anai ke ʼomai fuli totatou famili ki te ʼaho ʼaia. ʼE tou fia teuteuʼi foki tatatou fakakaukau ʼo lau pea mo metitasio ki te ʼu vaega ʼo te Tohi-Tapu ʼe tuʼu mai ʼi te kaletalio 1993 ki te temi ʼaia ʼo te ʼaho 1 ki te ʼaho 6 ʼo ʼapelili. ʼI muʼa atu pe ʼo te ʼaho 6 ʼo ʼapelili, ʼe lelei age ke tou fakasiosio te maʼuhiga ʼo te ʼaho Fakamanatu lolotoga tatatou ako takitokotahi peʼe faka famili. Tou fakatuʼutuʼu ke tou ʼomai fakatomuʼa pea ke tou nonofo ʼi he kiʼi temi ʼi te ʼosi ʼo te toʼotoʼoga, moʼo fakatalitali ʼo te hahaʼi ʼaē neʼe hoki ʼomai ki te fono.
5 Lolotoga te ʼu vāhaʼa ki muʼa atu ʼo te ʼaho Fakamanatu, tou fakaafe te hahaʼi fuli ʼe lotolelei ʼaē ʼe tou ʼiloʼi. ʼO ʼuhiga mo te faʼahi ʼaia, ko te ʼu kokelekasio neʼe nātou maʼu, ʼi te pepa ʼe ʼaumai ʼi te taʼu, te ʼu pepa fai fakaafe. Ka ʼe tou fakaʼaogaʼi, vakaʼi naʼa galo ke tou fakahā te faʼahi pea mo te hola ʼe fai ai te toʼotoʼoga. Tou fai he lisi ʼo te ʼu hahaʼi ʼe tou fia fakaafe. ʼE ʼi ai koa hanatou motokā? Kapau ʼe mole ʼi ai, koteā te meʼa ʼe tonu ke tou fai moʼo tokoniʼi ʼonatou ʼaia? Kapau ʼe ava tatatou motokā, he koʼe ʼe mole tou faka felogoi ki te ʼu tagata ʼāfea pe ʼe ʼaoga ke tou ʼolo ʼo ʼaumai he tahi?
6 Ko te ʼu tagata ʼāfea ʼe tonu anai ke nātou fai he ʼu teuteu makehe ʼo ʼuhiga mo te ʼaho Fakamanatu, heʼe ko te toʼotoʼoga maʼuhiga ʼaia ʼo te taʼu, pea ʼe tokolahi anai ʼe ʼomai kiai (1 Ko. 14:40). ʼI he vāhaʼa ki muʼa atu ʼo te ʼaho 6 ʼo ʼapelili, ko te ʼu tagata ʼāfea ʼe nātou fakatuʼutuʼu anai he fono mo te ʼu tēhina ʼaē ʼe fia foaki anai tanatou tokoni ʼi te ʼaho Fakamanatu. ʼE nātou fakatokaga anai ke ʼiloʼi fuli e te ʼu tagata ʼaia te ʼu fakatuʼutuʼu ʼo ʼuhiga mo te ʼu hekaʼaga pea mo te feʼāveʼaki ʼo te pane pea mo te vino. ʼI te temi nei, kapau neʼe hinoʼi atu koutou ke koutou kau ki te kau gāue fakatalitali peʼe ko te ʼu tagata feʼāveʼaki, koutou muliʼi fakalelei te ʼu fakatuʼutuʼu ʼa te ʼu tagata ʼāfea. ʼAki te faʼahi ʼe tuʼu ʼi te pasina 7, ko te ʼu tagata ʼāfea ʼe nātou fakatokaga anai peʼe ko te ʼu fakatuʼutuʼu ʼo ʼuhiga mo te kau gāue fakatalitali, te ʼu tagata feʼāveʼaki, te pane pea mo te vino pea mo ia ʼaē ka ina fai te akonaki neʼe fai fakatomuʼa.
7 Ia ʼaho nei, ʼe tokosiʼi te ʼu tēhina ʼo Kilisito kei toe ʼi te kele, pea, ʼi he temi ka haʼu, ko te toʼotoʼoga ʼo te ʼaho Fakamanatu ʼe mole ʼaoga anai tona toe fai (1 Ko. 11:25, 26). Kae, ʼi te temi ʼe tonu ke tou fai fakafiafia ai, tou fakamanatu te mate ʼaē ʼe ina foaki ia te ʼamanaki ki te maʼuli heʼegata ohage ko tona fakatotonuʼi mai.