Ke Tuputupu Tatatou Faka Mafola Ia Te Puleʼaga
1 Ko tatatou gāue faka mafola ʼe maʼuhiga ʼaupito ʼi te temi ʼaenī. Ko te maʼuli ʼo te hahaʼi peʼe ko tonatou mate ʼe fakalogo anai ki tanatou tali te logo lelei. (1 Pe. 4:5, 6, 17; Fkhā. 14:6, 7) Ko te tupuʼaga la ʼaia, ʼaē ʼe tonu ke tou kumi tuʼumaʼu ai ke tou faka mafola fakapotopoto te Puleʼaga. Ko te ʼu faʼahi fea ʼaē ʼe ʼaoga ai ke tou tuputupu?
2 Tou Teuteu Fakalelei: ʼI takotou fakaʼaogaʼi Te Minisitelio ʼo te Puleʼaga, koutou fili he faʼifaʼitaki ʼe koutou tokagaʼi ʼe ʼaoga ki te hahaʼi tokolahi ʼi tokotou telituale. ʼE maʼuhiga ke tau ʼakotou ʼu palalau mo te ʼu ʼaluʼaga kehekehe ʼi te telituale. Peʼe lagi koutou leleiʼia he faʼifaʼitaki ʼa koutou totonu, ʼo koutou fakaʼaogaʼi te ʼu manatu pea mo te ʼu vaega ʼo te Tohi-Tapu ʼaē ʼe koutou fakatokagaʼi ʼe lelei. ʼE ʼaoga anai ke koutou tokakaga ki ʼakotou ʼuluaki palalau ke uga ai te fia logo. (Vakaʼi te tohi Comment raisonner, ʼi te ʼu pasina 9 ki te 15.) E lagi ʼe koutou fakatuʼutuʼu ke koutou fai he fehuʼi ʼe fakatupu ai hana fakakaukau peʼe ke koutou fehuʼi ki ai pe koteā tana manatu ʼo ʼuhiga mo he faʼahiga meʼa ʼe ʼaoga ki te telituale. Kapau kua koutou ʼiloʼi takotou faʼifaʼitaki, koutou fai mo he tahi ʼi tokotou famili peʼe ko he tahi kau faka mafola ʼe feala ke ina foaki atu he ʼu manatu ke feala ai hakotou tuputupu.
3 Tou Palalau Mo Te Hahaʼi: Ko tatatou fakatuʼutuʼu, ko te fakahā ʼo he logo maʼuhiga. ʼE feala tatatou fai te faʼahi ʼaia mo kapau ʼe tou kamata he fai palalau ʼe ʼaoga. Kapau ko ia ʼaē ʼe palalau mo tatou ʼe ina lagaʼi he fehuʼi peʼe ina fakahā mai tana manatu, tou fakalogo fakalelei ki te meʼa ʼaē ʼe ina ʼui mai. Ko tana ʼu tali ʼe tokoni anai kia koutou ke koutou fakahā age te vaega faka Tohi-Tapu ʼo ʼuhiga mo te ʼamanaki ʼaē ʼe koutou maʼu. (1 Pe. 3:15) Kapau ʼe mole ʼalutahi tana manatu mo te Tohi-Tapu, ʼe feala hakotou ʼui age fakapotopoto: “Tokolahi ʼe manatu tahi mo koutou. Kae, koʼeni te tahi faʼahi ʼe ʼaoga ke koutou fakatokagaʼi.” ʼOsi ʼaia pea koutou lau he vaega ʼe ʼalutahi mo te manatu ʼaē neʼe koutou talanoa kiai, pea koutou faka fealagia ke ina fakahā atu tana manatu.
4 Tou Fai He Polokalama ʼe ʼAoga: Ko te teuteu fakalelei ʼe mole hona ʼaoga mokā ʼe mole koutou palalau mo te hahaʼi. Ia ʼaho nei kua māhani tatatou maʼu he tokosiʼi ʼi tonatou ʼu ʼapi mokā ʼe tou fai faka mafola. Kapau ʼe hoko te faʼahi ʼaia ʼi tokotou telituale, koutou fakatonutonuʼi tokotou polokalama ke feala ai hakotou faka mafola ʼi te ʼu ʼapi ʼi te temi ʼaē ʼe lahi ai te hahaʼi ʼi tonatou ʼapi. ʼE lagi koutou fakatokagaʼi anai ko te temi ʼaē ʼe lelei ke tou maʼu ai te hahaʼi, ko te ʼu fakaʼosi vāhaʼa; ko ʼihi e lagi ʼe faigafua tonatou maʼu atu lolotoga te vāhaʼa kae ʼi te afiafi. ʼI ʼihi kolo ʼe fakatokagaʼi e te kau fai faka mafola ʼe lelei te fagonogono ʼi te ʼu ʼaho mālōlō koteʼuhi ʼe lahi te hahaʼi ʼe maʼu atu ki tonatou ʼapi. ʼI te agamāhani, ko te hahaʼi ʼe mole hoha tanatou manatu pea e lagi ʼe nātou lotolelei ʼo palalau ʼi te taʼi temi ʼaia. ʼE lelei anai ke koutou faigaʼi ke tau ʼakotou ʼuluaki palalau pea mo koutou faka ʼalutahi ʼakotou ʼu manatu mo te manatu faka Tohi-Tapu.
5 Koutou Tokakaga ʼo Palalau Fakapotopoto: ʼI te ʼosi ʼo takotou palalau mo he tahi, koutou fai te fehuʼi ʼaenī: ‘Neʼe ʼau uga koa tona loto? Neʼe ʼau tuku koa he faigamālie ke ina fakahā mai tana manatu pea mo ʼau tokaga ki te meʼa neʼe ina ʼui mai? Neʼe ʼau tali fakapotopoto koa? ʼO mulimuli ki te ʼu ʼaluʼaga, neʼe ʼau fakaʼaogaʼi koa he palalau ʼe lelei?’ E lagi ʼaoga ke koutou gāue mo he kau fai faka mafola ʼe faiva peʼe ko he pionie, pea ke koutou fakalogo fakalelei ki tana fai faka mafola, ke feala ai hakotou tuputupu ʼo koutou faiva ʼi te minisitelio.
6 Kapau ʼe koutou faiva ʼi takotou gāue, ʼe feala anai hakotou fakahā te ʼu moʼoni ʼo te Puleʼaga ʼaē ʼe feala ke ‘hāofaki ai koutou, pea mo nātou ʼaē ʼe fakalogo kia koutou.’—1 Tim. 4:16; Taag. 22:29.