Ko Te ʼu Fono Gāue ʼo Novepeli
Vāhaʼa ʼe Kamata ʼi Te 7 Novepeli
Katiko 15
10 mn: Ko te ʼu logo ki te kokelekasio pea mo te ʼu Tonu ʼo Te Minisitelio ʼo te Puleʼaga. Fakahā he puani e tahi peʼe lua ʼi te ʼu nusipepa fakamuli ʼe feala ke fakaʼaogaʼi mokā tou tufa te ʼu nusipepa. Vakaʼi te ʼu fakatuʼutuʼu moʼo fakatuputupu ʼo te gāue faka mafola ʼi te ʼaho 11 ʼo Novepeli.
18 mn: “Ko Te Folafola ʼa Te ʼAtua ʼe Mālohi.” ʼO fai ʼaki he ʼu fehuʼi pea mo he ʼu tali. Fakamatala te maʼuhiga ʼo te lau tuʼumaʼu ʼo te Tohi-Tapu ʼo fakatafito ki te ʼuluaki palalau ʼo te kiʼi kaupepa Tou Vakaʼi Te Tohi-Tapu ʼi Te ʼAho Fuli—1994.
17 mn: “Ko Te Tohi-Tapu—Ko Te Matapuna ʼo Te Fakafimālie Pea Ko Te Falalaʼaga ʼi He Mālama Tokakovi.” Fai palalau mo nātou ʼaē ʼi te fono. Fakatuʼutuʼu ke fai he ʼu faʼifaʼitaki e lua ʼo fakahā ai peʼe feafeaʼi te fakaʼaogaʼi ʼo te ʼu manatu ʼaē ʼi te alatike.
Katiko 26 pea mo te faikole fakaʼosi.
Vāhaʼa ʼe Kamata ʼi Te 14 Novepeli
Katiko 172
10 mn: Ko te ʼu logo ki te kokelekasio. Lau te falā pea mo te ʼu fakamālo ʼo ʼuhiga mo te ʼu meʼa ʼofa.
17 mn: “Ko Te Aga Fea Koa ʼAē ʼe Koutou Fakahā?” Akonaki. Fakaʼaogaʼi te ʼu manatu ʼo Te Tule Leʼo (fakafalani) ʼo te ʼaho 15 ʼo Sepetepeli 1977, ʼi te pasina 561, ʼi te ʼu palakalafe 4 pea mo te 5.
18 mn: “Ke Tuputupu Tatatou Faka Mafola Ia Te Puleʼaga.” ʼO fai ʼaki he ʼu fehuʼi pea mo he ʼu tali. Fakaafe ia nātou ʼaē ʼi te fono ke nātou fakamatala pe neʼe feafeaʼi tanatou maʼu te ʼu fua lelei ʼi tanatou fakaʼaogaʼi te ʼu manatu ʼe foaki mai ʼi Te Minisitelio ʼo te Puleʼaga.
Katiko 106 pea mo te faikole fakaʼosi.
Vāhaʼa ʼe Kamata ʼi Te 21 Novepeli
Katiko 42
12 mn: Te ʼu logo ki te kokelekasio. Te ʼu Fakamanatu ʼo ʼUhiga Mo Te Temi Vela. ʼO fai ʼaki he ʼu fehuʼi pea mo he ʼu tali. Faka ʼalutahi te alatike mo te meʼa ʼe ʼaoga ki te kokelekasio. Fakamahino peʼe feafeaʼi te faiga ʼa te kau fai faka mafola, ke nātou foaki tanatou pepa tānaki gāue ʼi te temi totonu. Fakahā te maʼuhiga ʼo te kau tuʼumaʼu ʼaē ki te gāue, ʼo feiā aipe ʼi te temi mālōlō. Kapau ko he kau fai faka mafola ʼe mole ina foaki tana pepa tānaki gāue ʼi te temi totonu, ʼe tonu anai ke ina foimo foaki ki te sikalaipe ʼo te kokelekasio, ke feala ai hana fakatahiʼi mo te ʼu pepa tānaki gāue ʼo te māhina ka hoa mai.
15 mn: Te ʼu logo ʼe ʼaoga ki te kokelekasio. Peʼe ko he akonaki ʼe fai e he tagata ʼāfea ʼo fakatafito ki te alatike ʼo Te Tule Leʼo (fakafalani) ʼo te ʼaho 1 ʼo Sepetepeli 1994 ʼi te pasina 29, ko tona kupu tāfito “Ke koutou leleiʼia takotou gāue taputapu.”
18 mn: “Tou Tokoni Kia Nātou Ke Nātou Fagono ‘ ʼi He Tahi Temi.’ ” Fai palalau mo nātou ʼaē ʼi te fono. Fai he ʼu faʼifaʼitaki e lua neʼe teuteuʼi fakalelei ʼo fakahā ai peʼe feafeaʼi te fakaʼaogaʼi ʼo te Tohi-Tapu mokā tou kamata he ako faka Tohi-Tapu.
Katiko 79 pea mo te faikole fakaʼosi.
Vāhaʼa ʼe Kamata ʼi Te 28 Novepeli
Katiko 135
10 mn: Ko te ʼu logo ki te kokelekasio. Fakahā he ʼu faʼahiga fakahā ʼo te ʼu nusipepa foʼou.
17 mn: “Te ʼu Fua Lelei ʼe Tou Maʼu ʼi Tatatou Gāue Mo Niʼihi.” ʼO fai ʼaki he ʼu fehuʼi pea mo he ʼu tali. Fakaloto mālohiʼi ia tatou fuli ke tou lagolago ki te ʼu fono ʼo ʼuhiga mo te gāue faka mafola ʼaē ʼe fakatuʼutuʼu e te kokelekasio kae ʼaua naʼa tou fai tuʼumaʼu he ʼu fakatuʼutuʼu takitokotahi ʼo ʼuhiga mo te fai faka mafola. Ko te gāue tahi mo te kūtuga fai faka mafola ʼe ina foaki mai te ʼu tapuakina lahi, te faiva lahi ʼi te gāue, pea mo te fefakaloto mālohiʼi ʼaki.
18 mn: Ko te tufa ʼo te tohi Te Tagata ʼAē ʼe Lahi Tokotahi ʼi Tesepeli. ʼE lahi te ʼaoga ʼo te tohi ʼaia. Ko te lauʼi teau miliona hahaʼi ʼe nātou ʼui ko nātou ko te ʼu tisipulo ʼa Sesu pea ʼe nātou tui ki tana ʼu akonaki. ʼE ʼaoga ke ʼiloʼi e te hahaʼi te kehekehe ʼo Sesu mo te ʼu tagata fuli ʼaē—ʼe fakalogo kiai tonatou maʼuli. Ko te tohi Te Tagata ʼAē ʼe Lahi Tokotahi, ʼi te kapite 133, ʼe ʼui fēnei: “ ʼE lave loloto ʼaupito kia tatou mokā tou fakakaukau atu ki tana kātaki fakaofoofo, tana aga fakatagata, tona poto ʼaē ʼe mole hona fakatatau, tona poto ʼaē ʼi te akonaki ki te hahaʼi, tona lotomālohi, tona ʼofa mamahi pea mo tana ʼiloʼi te agaaga ʼo te hahaʼi ʼaē neʼe ina fakahā ʼi tana nofo ʼi te kele.” ʼE fakahā lelei e te Tohi-Tapu ia ia ohage (1) he Fakamoʼoni (Soane 18:37), (2) he Fakamaʼuli (Gāue 4:12), pea mo (3) he Hau (Fkhā. 11:15). Ko he kaugā faka mafola faiva ʼe ina fai he faʼifaʼitaki ʼo ina fakaʼaogaʼi he ʼu puani ʼi te ʼu manatu ʼaē ʼe tuʼu ʼi ʼoluga. Fakaloto mālohiʼi ia tatou fuli ke tou kau ki te tufa ʼo te tohi ʼaenī ʼi Tesepeli.
Katiko 114 pea mo te faikole fakaʼosi.