Te Fakamaʼamaʼa ʼo Te Fakatahi Faka Tisitilike 1995
1 Ko he ʼu lakaga fakaofoofo te kau ʼaē ki te ʼu kātoaga fakalaumālie, peʼe ko te ʼu fono ʼo te kokelekasio, mo te ʼu fakatahi faka silikosikilipisio, mo te fakatahi makehe ʼaē e ʼaho tahi, peʼe ko te ʼu fakatahi faka tisitilike! Koteā tona tupuʼaga? Koteʼuhi ko te fakakaugā mo te ʼu hahaʼi ʼaē ʼe nātou manavasiʼi ki te ʼAtua ʼe ko he meʼa fakafimālie, pea ʼe fakamanatu mai e te ʼu ʼaluʼaga fakalaumālie ʼaē ʼe fakahā ifo ʼi te ʼu lakaga ʼaia te ʼu meʼa ʼaē ʼe maʼuhiga tāfito.
2 ʼI te ʼu taʼu ʼaenī kua hili, ko te lauʼi afe hahaʼi neʼe ʼōmai ki te ʼu fakatahi fakalaumālie ʼaia. ʼI te vaha ʼo te ʼu taʼu 1985 ki te 1994, ko te lahi ʼo te ʼu kokelekasio ʼi te malamanei neʼe tuputupu ʼi te 50 ki te teau, ʼo tuputupu te ʼu kokelekasio e 49 716 ʼo liliu ko kokelekasio e 75 573. ʼAki te fakaviliviliʼi e Sehova te gāue ʼo te tānaki ʼo te hahaʼi, ʼe toe muli kiai te lahi ʼo te ʼu fakatahi faka tisitilike pea mo te ʼu fakatahi faka silikosikilipisio. (Is. 60:22) ʼI te temi pe ʼaia, neʼe tou mamata ki te tuputupu ʼo te hahaʼi ʼaē ʼe kau ki te ʼu fakatahi faka tisitilike ʼi Niu-Kaletonia ʼo liliu te toko 1 658 ko te toko 3 499 hahaʼi. Ko te gāue ʼaē neʼe fakatupu ʼaki ai ʼo ʼuhiga mo te fakatuʼutuʼu ʼo te ʼu fakatahi ʼaia neʼe lahi ʼaupito. Mai tona ʼaluʼaga ʼaē ʼe tou fakatahitahi ke tou maʼu he ʼu fua lelei ʼi te ʼu kātoaga fakalaumālie ʼaia, ʼe ko he aga fakapotopoto te fakamaʼamaʼa ʼi te ʼu fakatuʼutuʼu fakasino ke lahi age tona ʼaoga.
3 Ko Te Tahi ʼu Fakatuʼutuʼu ʼe Tonu Ke Fai: ʼE tou haga kia Sehova ʼo tou kumi tana tapuakina ʼi tatatou haʼele ki muʼa. ʼE tou fiafia ʼi tatatou sio ʼaē ʼe ina foaki ki tana hahaʼi te ʼatamai fakapotopoto pea mo mahino gafua ʼaē ʼe ʼaoga kia nātou. ʼE tonu ke tou ʼio, ʼaki te kalasi ʼo te tagata kaugana agatonu, ko Sesu Kilisito ʼe ina takitaki te ʼu meʼa ke maui mālie, ʼo ʼuhiga mo te fakahoko ʼo te fakatuʼutuʼu ʼa Sehova ʼi he ʼaluʼaga fakaofoofo. (Mat. 24:45-47; Kol. 1:9, 10) ʼI te lolotoga anai ʼo tatatou ʼu fakatahi faka silikosikilipisio ʼi ʼApelili, pea lagi mo tatatou ʼu fakatahi tisitilike ʼo te taʼu 1995 ʼi te māhina ʼo ʼAukusito, ʼe tou ʼahiʼahiʼi ai anai he ʼu fakamaʼamaʼa foʼou. ʼE mole ʼi ai anai he selevisi ki te kai. ʼE tou tahi ʼōmai anai mo tana meʼa kai pea mo tana meʼa ʼinu. ʼE tou vakaʼi ai anai peʼe tonu ke fakatuʼu te potu ʼaia ki tatatou ʼu fakatahi fuli. ʼE lagi ʼe koutou fia ʼiloʼi peʼe ʼi ai anai he fua lelei ʼo te fakatuʼutuʼu ʼaia. Lagi ko te ʼu fakamanatu ʼe hoa mai ʼo ʼuhiga mo te ʼu fetogi neʼe hoko ʼi te ʼu taʼu ʼaenī, ʼe ko he fakamanatu lelei anai ʼo ʼuhiga mo te ʼu lelei neʼe kua tou maʼu ʼi te fakamaʼamaʼa ʼo te gāue ʼi te ʼu fakatahi.
4 Ko Te ʼu Fetogi ʼUluaki Moʼo Fakamaʼamaʼa: ʼI muʼa ʼo te fakatuʼu ʼo te ʼu faʼahiga fakatahi faka tisitilike ʼe kua fakamaʼamaʼa tona ʼu fakatuʼutuʼu, neʼe fakamaʼua he gāue lahi ʼo te ʼu tēhina pea mo tuagaʼane ʼe lauʼi teau moʼo teuteuʼi te fakatahi, ohage la ʼi te selevisi ʼaē ki te kai, mo te selevisi kia nātou ʼe fia gāue, pea mo te selevisi ki te tali kāiga ki totatou ʼu tēhina. Mai tona ʼaluʼaga ʼaē ʼe felāveʼi totatou ʼu tēhina mo te ʼu meʼa ʼe nātou hoha kiai pea mo te ʼu fakamaʼua ʼo te maʼuli ʼo te ʼaho fuli pea mo te tuputupu tuʼumaʼu pe ʼaē ʼo te kautahi, neʼe ʼaoga moʼoni ia ke fai te ʼu fakatonutonu moʼo fakamaʼamaʼa te selevisi ki te meʼa kai lolotoga te ʼu fakatahi pea neʼe mātou fakahoko te ʼu faʼahi ʼaia ʼi te ʼu taʼu pe ʼaenī. Neʼe ko he ʼu fakatonutonu lelei ʼaia, pea neʼe maʼamaʼa age te gāue pea neʼe faka fealagia ai ke lahi age te tokaga ki te faʼahi fakalaumālie ʼo te fakatahi, ʼaki he kau gāue ʼe nātou lava fakalogo pea mo nātou fiafia lahi age ki te polokalama. (Teu. 31:12) Ko nātou ʼaē ʼe kau ʼi te lotolotoiga ʼo tatou ʼaē neʼe gāue agatonu lolotoga te ʼu taʼu, ʼe nātou manatuʼi lelei te ʼu fakatonutonu ʼaia pea ʼe nātou fakafetaʼi ʼo ʼuhiga mo te takitaki ʼaē ʼe tuku ifo. Kae koteā he tahi age gāue ʼe feala ke molehi ke faka fealagia ai he maʼu ʼo he tahi age ʼu lelei ʼi te polokalama fakalaumālie?
5 Ko Te ʼu Fetogi Neʼe Fakatuʼutuʼu Fakatomuʼa: Lolotoga te ʼu taʼu ʼaē neʼe teuteuʼi ai te ʼu meʼa kai ʼo fakamaʼamaʼa tona fai, neʼe hā ai “ ʼe siʼisiʼipe te ʼu meʼa ʼaē ʼe ʼaoga” moʼoni. (Vakaʼi ia Luka 10:38-42.) Kae, ko te fakatahi ʼo te ʼu meʼa ʼaia ki te kaugamālie ʼo nātou ʼaē ʼe kau ki te fakatahi neʼe toe hā ai te toe gāue lahi ʼo feiā mo he tokoni lahi, ʼo feiā mo te ʼu meʼa gāue ʼe maʼuhiga tona totogi. Pea neʼe fakamaʼua foki he kau gāue tokolahi ke nātou fakaʼaluʼalu pea mo lagolago ki te ʼu fakatuʼutuʼu. Neʼe tonu ai ke ʼi ai he tānakiʼaga ʼo te meʼa kai ʼo feiā mo he faʼahi ʼe tufa ai te meʼa kai.
6 Ko te gāue ʼaki he lotolelei ʼo nātou ʼaē neʼe tokoni ki te ʼu faʼahi kehekehe ʼaenī neʼe maʼuhiga ʼaupito pea ʼe fakamālo lahi kia nātou. Kae, ʼaki te fakamaʼamaʼa foʼou ʼaenī, ko te kau gāue ʼaia ʼaē ʼe lauʼi teau ʼaē neʼe tokakaga ki te totogi ʼo te ʼu meʼa, mo tona teuteuʼi, mo tona vaevae, ʼo feiā mo tona tufa neʼe nātou lava fakaʼaogaʼi tonatou temi ki he tahi ʼu fakatuʼutuʼu faka teokalatike maʼuhiga, ʼo feiā mo he fakafiafia lahi age ki te fakatahi mo te ʼu tēhina ʼi te ʼu fakatahi ʼaia. Ko te kau gāue ʼaia ʼaē neʼe gāue ki te selevisi ki te Meʼa Kai kua nātou lava tokoni ki ʼihi selevisi, ohage ko te selevisi ki te Fakatalitali ʼo te hahaʼi pea mo te selevisi Fakamaʼa. Ko te faʼahi ʼaia ʼe ina fakamaʼamaʼa anai te kavega ʼa te takitokotahi pea ʼe mole fakamaʼua anai ki he tokolahi ke nātou gāue ʼo ʼosi tauhala ʼi te afiafi, peʼe kamata kae kei uhuuhu, peʼe lolotoga te ʼu fakatahi, ohage la ko te selevisi ki te Meʼa Kai.
7 Tou Lagolago Te ʼu Fakatuʼutuʼu: ʼE fakamālo lahi te Sosiete ki te lagolago lelei, kia koutou ʼu tēhina mo tuagaʼane, he neʼe koutou gāue “ ʼaki te loto katoa” lolotoga te ʼu taʼu ʼi te fakatuʼutuʼu ʼo te ʼu fakatahi, ʼo kau kiai mo te selevisi ʼo te kai. (1 Fkma. 29:9) Ko te faʼahi ʼaia neʼe tokoni ʼi te ʼu faʼahi e lahi. ʼAki te faʼahi ʼaia, neʼe tou lava lue he ʼu fale ʼe lelei age pea neʼe nātou lava tokakaga lelei ki te ʼu meʼa ʼaē ʼe totogi ʼo te fakatahi. Neʼe ina toe faka fealagia foki kia nātou ʼaē neʼe kau ki te fakatahi ke nātou nonofo ʼi te faiʼaga ʼo te fakatahi lolotoga te temi mānava nounou ʼo te hili hoʼatā, ke nātou maʼu ai he meʼa kai ʼe feʼauga, pea ke nātou kau ai ki te polokalama fakalaumālie. Tokolahi te ʼu tēhina pea mo te ʼu tuagaʼane neʼe nātou manatu ko tanatou totogi te meʼa kai ʼi te fakatahi neʼe ko he faʼahiga kau ʼaia ʼa nātou ki te tokoni ʼo te totogi ʼo te ʼu meʼa ʼo te fakatahi, pea mo lagolago ki te ʼu gāue ʼa te Sosiete pea mo te gāue faka mafola. Kae, kua tonu leva ke mahino kia tatou ʼe gata pe anai ki te ʼu meʼa ʼofa ʼe tokoni ki te totogi ʼo te ʼu meʼa ʼaia. Koia, ʼe mahino ia ʼe tou loto ke tou tuku keheʼi he falā maʼa te fakatahi pea mo tou fakatuʼutuʼu fakatomuʼa te lahi ʼo totatou ʼu meʼa ʼofa, ke feala hanatou tatau mo te ʼu meʼa ʼaē neʼe foaki ʼi muʼa atu ki te meʼa kai peʼe ki te ʼu meʼa ʼofa. (Vakaʼi te Réveillez-vous! ʼo te ʼaho 22 ʼo Sūlio, 1985, ʼi te pasina 25, fakafalani) ʼE mahino ia ko te agaʼofa pea mo te lagolago ʼaē neʼe fakahā e te ʼu tēhina pea mo te ʼu tuagaʼane ʼi te tokoni ki te meʼa ʼofa ʼaia ʼe hoko atu pe anai ia. Neʼe ko he faʼahiga fakahā ʼaia ʼo tanatou loto fakafetaʼi ʼi he ʼu ʼaluʼaga ʼe ʼaoga.—Taag. 11:25; Luka 16:9.
8 Te ʼu Fakatuʼutuʼu Ki Tatatou Kai: Kae ʼaki te ʼu fakatuʼutuʼu foʼou ʼaia, ʼe ʼaoga anai ki te hahaʼi takitokotahi pea mo te ʼu famili ke tahi haʼu mo te meʼa kai ʼo te hoʼatā. ʼE tou faka maʼuhigaʼi te lelei ʼo te polokalama fakalaumālie. ʼE mole ko he aga fakapotopoto anai te lahi fau ʼo te tokaga ki te meʼa kai fakasino. ʼE maʼuhiga ke tahi “ ʼiloʼi papau te ʼu meʼa ʼaē ʼe maʼuhiga tāfito” ʼi te faʼahi ʼaia. (Filp. 1:9, 10a) ʼI te ʼu taʼu pe ʼaenī kua hili, ko te ʼu fakatahi lalahi ʼo te hahaʼi ʼa Sehova ʼi Polonia, mo Lusia, pea mo Ukraine, ʼo feiā mo te tahi ʼu koga meʼa, neʼe fai he ʼu fakatuʼutuʼu ʼo he selevisi ki te meʼa kai kae neʼe hoko ʼo maui mālie pe. ʼI te ʼu fakatahi ʼaia, neʼe tahi ʼōmai ia nātou ʼaē ʼe kau ki te fakatahi mo tanatou meʼa kai ki te hoʼatā. ʼE tou fakatokagaʼi anai kapau ʼe tou ʼaumai he meʼa kai ʼe fakafeauga pe, pea ʼe tokoni anai ki hatatou nofo ʼalaʼala, ʼo feala ai kia tatou ke lahi age hatatou tokakaga ki te polokalama ʼo te hili hoʼatā. Koia, ʼe tonu ai ke tahi haʼu mo he meʼa kai ʼe feʼauga lelei. Ohage la, ʼi te haga ʼa Sesu ʼo fafaga te hahaʼi, neʼe ina foaki pe kia nātou te ʼu meʼa e lua, te moʼi pane pea mo te moʼi ika. (Mat. 14:16-20; vakaʼi mo Luka 10:42a.) ʼO ʼuhiga mo te potu ʼaia, ʼe mātou fiafia ʼi he tuku atu ʼo he ʼu manatu ʼe lagi ʼaoga anai koteʼuhi ʼe tou tokagaʼi te temi kai ʼaē ʼe nounou pea mo te ʼu faʼahiga fale ʼaē ʼe tou fakaʼaogaʼi.
9 Mai tona ʼaluʼaga ʼaē ʼe mole ʼi ai anai he ʼu fakatuʼutuʼu ki te selevisi ʼo te meʼa kai ʼi tatatou fakatahi faka silikosikilipisio ʼaē ka hoa mai, ʼo lagi feiā pe anai ʼo ʼuhiga mo te fakatahi faka tisitilike, ʼaki he fakatuʼutuʼu fakalelei ko nātou ʼaē ʼe nātou kau ki te fakatahi ʼe nātou lava ʼinu kafe anai mo tonatou famili. ʼAki he mālōlō feʼauga ʼi te po ʼi muʼa ʼo te ʼaho ʼo te fakatahi, ʼe tou lava ʼala vave moʼo maʼu ʼo he temi feʼauga moʼo maʼu ʼo te meʼa ʼaē ʼe ʼaoga ki te kai ʼo te uhu pea mo tou kaku tautonu ki te fakatahi ke tou fakafiafia ki te fakatahi mo ʼihi ʼe nātou kau ki te fakatahi ʼaia. Ko te tahi lelei ʼo te fakatuʼutuʼu foʼou ʼaia, ʼe mole ʼaoga anai he avahi uhuuhu ʼo te ʼu matapā ʼo te ʼu fale ʼaē ʼe fakatahi kiai pea mo leʼoleʼo ʼuhi ko te ʼōmai vave ʼa te kau gāue ki te selevisi ki te meʼa kai, ʼo nātou ʼōmai mo tonatou ʼu famili. ʼO mole hage ko tona fai ʼi muʼa atu, ʼe mole ʼaoga anai te fakavilivili ki te fale ʼaē ʼe fakatahi kiai moʼo kumi ʼo he ʼu hekaʼaga, koteʼuhi kua fakatuʼutuʼu te ʼu hekaʼaga ke feʼauga moʼo tali ʼo te hahaʼi ʼaē ʼe ʼōmai ki te fakatahi.
10 Ko te mālōlō ʼo te hoʼatā ʼe nounou age anai ai ʼo mole hage ko te ʼu fakatahi ʼi muʼa atu. Kae, ʼe maʼu pe anai he temi faigamālie moʼo ʼai he kiʼi kai ʼe maʼamaʼa, pea mo fai palalau mo ʼihi ʼi te fakatahi. Ko totatou ʼu tēhina pea mo tuagaʼane ʼaē ʼe nonofo ʼi Niumea peʼe ko nātou ʼaē ʼe nonofo ōvi kiai ʼe faigafua anai hanatou teuteuʼi he kiʼi meʼa kai maʼa nātou fuli ʼo te famili ki te kai ʼo te hoʼatā. ʼE hage pe anai te kai ʼaia ʼo te hoʼatā ko te faʼahiga kai ʼa nātou ʼaē ʼe ako, e lagi ko he kasikutu pea mo he koga ʼo he foʼi meʼa mata, mo he moʼi kato, pea mo he meʼa ʼinu. Tokolahi te hahaʼi ʼe feiā pe tanatou kai hoʼatā ʼi tanatou ʼu gāue.
11 ʼE mahino ia ko te potu ʼaia ʼe faigataʼaʼia anai kia nātou ʼaē ʼe ʼōmai mai te vao pea mo te ʼu motu, pea ʼe ʼaoga anai ke fai he ʼu fakatuʼutuʼu fakatomuʼa ʼo tanatou meʼa kai ki te hoʼatā. Ki ʼihi ʼe nātou feʼaugaʼia pe anai he meʼa kai ʼaki te ʼu meʼa mata pea mo te ʼu lauʼakau, pea ko te faʼahi ʼaia ʼe feala pe hanatou toʼo mai ʼio nātou. Ko ʼihi meʼa ʼe ʼaoga ki te kai ʼo te ʼu hoʼatā fuli, ʼe feala pe he toʼo mai he koloā. Lagi ko ʼihi meʼa, ohage ko te moʼi pepa holoholo pea mo te ʼu ipu pepa maʼa nātou ʼaē ʼe feʼoloʼaki ʼe feala pe hanatou toʼo mai ʼio nātou.
12 Mai tona ʼaluʼaga ʼaē ko te fale ʼo te fakatahi, ʼi tona fakahagatonu, ʼe ko he Fale ʼo te Puleʼaga, ʼe ko he aga fakapotopoto anai ke ʼaua naʼa liliu te kiʼi temi mālōlō ʼo te hoʼatā ko he faʼahiga pique-nique. Ohage ko tatatou mole kakai lolotoga te ʼu fono ʼi te Fale ʼo te Puleʼaga, ʼo toe feiā pe ʼe mole tou kakai anai lolotoga te temi ʼo te fakatahi. ʼE mole gafua anai ke ʼaumai te ʼu meʼa faʼo ʼaisi lalahi ki te ʼu koga meʼa ʼaē ʼe fai ai te fakatahi. ʼE feala pe ke nātou fakatupu tuʼutāmaki pea ʼe mole feala ia ke tuku ki te ʼu faʼahi ʼaē ʼe feʼaluʼaki ai te hahaʼi peʼe hili ki he hekaʼaga. ʼE lagi lelei age anai te fakaʼaogaʼi ʼo he pepa palasitike peʼe ko he kato taki meʼa moʼo feʼāveʼaki ai te meʼa kai ʼaē neʼe teuteuʼi ki te kai ʼo te hoʼatā ʼi te fale. Kapau ko he meʼa ʼe ʼaoga, ʼe feala ke ʼai he meʼa faʼo ʼaisi ʼi te lalo hekaʼaga, kae mole hili ki he hekaʼaga e lagi feala pe ke fakaʼaogaʼi.
13 ʼE toe ʼaoga pe foki ke tokakaga ʼo filifili lelei te ʼu faʼahiga meʼa ʼe ʼai kiai te meʼa ʼinu ʼaē ka ʼave ki te fakatahiʼaga. E lagi feala pe ke ʼave te ʼu meʼa ʼinu vela ʼi he ʼu telemosi. Ko te ʼu faʼahiga meʼa sioʼata fuli ʼe feala pe ke fakatupu tuʼutāmaki. E lagi lelei age ke fakaʼaogaʼi he ʼu meʼa ʼaiʼaga meʼa ʼinu palasitike peʼe aluminium.
14 Ko Te Tahi ʼu Lelei: ʼE tou sio moʼoni ai ki te agapoto ʼo te ʼu taʼi fakatonutonu mokā tou ʼahiʼahiʼi anai ʼi ʼApelili. ʼE tou lava tuku fuli he tokaga katoa ki te ʼu lelei fakalaumālie ʼaē ka tou maʼu—te ʼuhiga moʼoni ʼo tatatou fakatahi. Ko te ʼu lelei ʼaia ʼe maʼu ʼaki te fakatahi ʼe tou fakafiafia kiai, ʼo feiā mo te polokalama totonu. Koia, ʼe mole tou mavae anai ʼi te fakatahiʼaga ʼi te temi kai ʼo te hoʼatā moʼo kumi meʼa kai, kae ʼe lelei age hakita ʼaumai he meʼa kai mo kita. Ko te faʼahi ʼaia ʼe ina faka fealagia anai he fakafiafia ki te fakatahi mo totatou ʼu tēhina pea mo tuagaʼane, pea ʼe ina toe faka fealagia ke tou kau ki te koga ʼo te polokalama ʼaē ʼe fai ʼi te hoʼatā.
15 ʼI tanatou ʼosi fakaloto fīmālieʼi ʼi te faʼahi fakalaumālie ʼi te polokalama ʼo te hili hoʼatā, ko ʼihi ʼe lagi nātou fiafia anai te hoko atu ʼo te fakatahi mo tonatou ʼu kaumeʼa faka Kilisitiano pea mo fai palalau ki te ʼu meʼa lelei ʼaē neʼe nātou logo kiai, kae nātou lolotoga kakai mo tonatou ʼu kaumeʼa pea mo tonatou famili.
16 ʼE tou fiafia moʼoni ki te kātoaga fakalaumālie ʼo te ʼu fakatahi ʼaia, mokā tou maʼu he ʼu tohi foʼou, mo he akonaki maʼuhiga pea mo he ʼu tokoni ʼaoga. Ko te ʼu lelei ʼaia ʼe manatuʼi e tatou takitokotahi, ʼo kau kiai mo te fiafia ʼo tatatou kau ki te hahaʼi ʼa te ʼAtua ʼaē ʼe fakatahi. ʼE ʼui fēnei e te Tāʼaga Lea 10:22: “Ko te tapuakina ʼa Sehova—ko ia ʼaia ʼe ina fakakoloaʼia, pea ʼe mole maʼu ai he ʼu mamahi.” ʼE hoko te faʼahi ʼaia koteʼuhi ʼi totatou ʼuhiga hahaʼi ʼa Sehova, ʼe mole tou kau ki te ʼu fakatahi ʼaki hatatou kumi he ʼu meʼa fakasino pea mo he fakafimālie. ʼE tou kau ki te ʼu fakatahi ʼaia ʼaki te manatu lelei ʼaē ke tou maʼu, ʼi te ʼaluʼaga ʼo te fealagia, he ʼu lelei fakalaumālie lahi, pea ʼe fakapale lahi anai tatou e Sehova ʼo ʼuhiga mo te faʼahiga manatu ʼe tou fakahā ʼi te ʼu fakatahi ʼaia.—1 Tim. 6:6-8; Hep. 11:6.
17 Ko te ʼu lakaga ʼaia ʼaē ʼe maʼu ai he ʼu fakaloto mālohi ʼe nātou toe fakamanatuʼi mai foki te tuputupu ʼo te taʼukai fakalaumālie. (Soane 4:35, 36) Ko te ʼu ʼuluaki palalau ʼo te kapite 54 ʼo te tohi ʼa Isaia ʼe nātou fakaafe te kautahi ʼa Sehova ʼaē ʼe hage he fafine ʼohoana ke teuteu ki he ʼu tuputupu fakafiafia. ʼE ʼamanaki hoko anai he tahi tuputupu, pea mo he tahi fakalahi, pea mo he mālohi kua fakafoʼou, ohage ko te meʼa ʼaē neʼe tala faka polofeta e Isaia: “Fakalahi te potu ʼo tou fale fehikitaki. Pea ke faoʼi te ʼu lā ʼo tou tapenakulo taulekaleka. ʼAua naʼa ke fakatatāʼofi ia koe. Faoʼi tau ʼu maea ʼo te fale fehikitaki, pea ke ke fakamālohiʼi te ʼu faʼo ʼo tou fale fehikitaki. Koteʼuhi ʼe ke mapā anai ki te toʼomataʼu pea mo te toʼohema.” Ko te hoko ʼo te lea faka polofeta fakaofoofo ʼaia neʼe ʼiloga ia ʼaki te mafola ʼo te tauhi moʼoni ʼaē ʼe tou sio kiai ʼi te temi nei.—Is. 54:1-4.
18 ʼE ʼiloga moʼoni ia ko he fakafuafua lelei ia te maʼuliʼi ʼo te fakatuʼutuʼu foʼou ʼaia ʼo ʼuhiga mo te fakamaʼamaʼa ʼo te ʼu fakatahi pea ʼaki he siʼisiʼi ʼo te hoha, ʼe tou lava fakafiafia fuli anai ki te polokalama fakalaumālie ʼaē neʼe teuteuʼi. ʼE tou falala ko te faʼahi ʼaia ʼe ina maʼu anai foki te tapuakina ʼa Sehova, koteʼuhi ʼe ina faka fealagia anai he poto lelei ʼe lahi age ʼo ʼuhiga mo te fakaʼaluʼalu ʼo he tahi tuputupu. ʼAki tatatou tokakaga ʼaē ki te meʼa ʼaē ʼe ʼaoga, ʼe tou lava fakafiafia katoa anai ki te ʼu ʼaho ʼaē neʼe tou fakatahi fakafiafia ai mo totatou ʼu tēhina mo tuagaʼane pea mo tatatou maʼu te ʼu meʼa lelei ʼi te faʼahi fakalaumālie. ʼE tou faikole fakamalotoloto ke tapuakina e Sehova tatatou ʼu faiga fuli ke tou hoko atu tatatou ʼōmai ʼaē ki tona laupapa pea ke fafaga tatou.—Vakaʼi ia Teutalonome 16:14, 15.
[Talanoa ʼo te pasina 6]
Te ʼu Lelei ʼi Te Mole ʼi Ai ʼo He ʼu Fakatuʼutuʼu Ki Te Selevisi ʼo Te Meʼa Kai
◼ ʼE siʼisiʼi te gāue ʼi muʼa ʼo te polokalama, pea mo te lolotoga ʼo te polokalama pea mo te hili ʼo te polokalama, ʼo fealagia ai he fakatahi mo te ʼu tēhina pea mo te ʼu tuagaʼane
◼ ʼE mole he ʼu meʼa ki te selevisi ʼo te meʼa kai ʼe tonu ke tokaga kiai
◼ ʼE hahaʼi age anai ia nātou ʼaē ʼe nātou tokakaga katoa ki te polokalama fakalaumālie
◼ ʼE hahaʼi age anai ia nātou ʼaē ʼe nātou tokoni ki ʼihi selevisi
◼ ʼE lahi age te temi moʼo faiga ki te tahi ʼu meʼa faka teokalatike
Te ʼu Manatu ʼo ʼUhiga Mo Te Meʼa Kai Ki Te Hoʼatā
◼ Ko he ʼu meʼa kai ʼe maʼamaʼa, mo faigafua tona gaohi pea mo lelei
◼ Ko he ʼu meʼa neʼe fakamoho, mo he ʼu fuaʼi ʼakau mata
◼ Ko he ʼu meʼa faʼo ʼaisi veliveli mo kapau ʼe ʼaoga
◼ Ko he ʼu meʼa ʼinu, te ʼu meʼa mālie, peʼe ko he ʼu hina vai ʼe mole feala ke foa
Te ʼu Meʼa ʼAē ʼe MOLE Tonu Ke ʼAumai Ki Te Fale ʼo Te Fakatahi
◼ He kava
◼ He ʼu meʼa sioʼata
◼ He ʼu meʼa faʼo ʼaisi lalahi