Tou Faʼifaʼitaki Kia Sehova ʼo Tou Tokaga Fakamalotoloto Ki Te Hahaʼi
1 Ko Sehova ʼe ko te faʼifaʼitaki lahi tokotahi ʼaē ʼe ina fakahā te tokaga fakamalotoloto ki te hahaʼi. ʼI tona ʼuhiga Pule ʼo te ʼAtulaulau, ʼe tokaga ʼaupito ia ki te ʼu meʼa ʼaē ʼe ʼaoga ki tana hahaʼi ʼaē neʼe ina fakatupu. (1 Pe. 5:7) Neʼe fakaloto mālohiʼi e Sesu tana kau tisipulo ke nātou maʼuliʼi te ʼu kalitate ʼo tana Tāmai, ʼaē ʼe ina fakahopo te laʼā pea mo ina fakatō te ʼua ki te hahaʼi faitotonu pea mo te hahaʼi heʼe faitotonu. (Mat. 5:45) ʼE feala ke koutou faʼifaʼitaki kia Sehova ʼo koutou fakahā takotou tokaga fakamalotoloto ki te hahaʼi—ʼo koutou teuteu lelei ke koutou fakahā te logo ʼo te Puleʼaga ki te hahaʼi ʼaē ʼe felāveʼi mo koutou. Kapau ʼe koutou fakamāmāhani mo te ʼu kaupepa ʼaē ka fakaʼaogaʼi ʼi te minisitelio lolotoga te māhina ʼo Sūlio, pea ʼe koutou tokalelei anai moʼo foaki ʼo he tokoni fakalaumālie ki te hahaʼi. Ko te ʼu manatu ʼaē ʼe hoa mai, ʼe nātou foaki atu anai he ʼu manatu ke feala ai hakotou teuteuʼi takotou fai faka mafola pea mo hoko atu ai mo he ʼu ʼaʼahi.
2 Mokā koutou tufa te kaupepa “ ʼE tokaga moʼoni koa te ʼAtua kia tatou?” ʼe feala ke koutou ʼui fēnei:
◼ “Neʼe mole heʼeki ke fehuʼi koa la pe koʼe ʼe fakagafua e te ʼAtua ke mamahi te hahaʼi mo kapau ʼe tokaga moʼoni kia nātou? [Tuku ke fai atu hana tali.] Ko te kaupepa ʼaenī ʼe mole gata pe ʼi tana foaki mai he tali ʼe lelei ʼo ʼuhiga mo te fehuʼi ʼaia, kae ʼe ina toe fakahā mai foki neʼe fakapapau e te ʼAtua ʼe ina pulihi anai te ʼu meʼa kovi fuli ʼaē neʼe fai e te tagata ki te malamanei pea mo te kele.” Lau te palakalafe 23 ʼi te pasina 27. Koutou fakahā age te paki ʼaē ʼe tuʼu ʼi lalo, pea koutou lau ia Pesalemo 145:16 ʼaē ʼe tuʼu ʼi te palakalafe 22. Koutou foaki age te kaupepa ki te falā 50. Kapau ʼe ina toʼo te kaupepa, pea koutou lagaʼi he fehuʼi ke koutou ʼōmai ʼo tali kiai ʼi hakotou tahi ʼaʼahi, ohage la: “ ʼE koutou fia ʼiloʼi koa la peʼe fakahoko feafeaʼi anai e te ʼAtua tana fakatuʼutuʼu ʼaē ko te foaki ʼo he ʼu tapuakina ki te malamanei, pea mo ina fakaliliu te kele ko he palatiso?”
3 Ka koutou toe liliu ʼo ʼaʼahi ia ia ʼaē neʼe ina toʼo te kaupepa “ ʼE tokaga moʼoni koa te ʼAtua kia tatou?” ʼe feala ke koutou kamata te fai palalau ʼo koutou ʼui fēnei:
◼ “ ʼI tatā fai palalau talu mai ai, neʼe tā vakaʼi ai ko te ʼAtua ʼe tokaga moʼoni kia tatou pea ʼe ina fakatuʼutuʼu ke ina pulihi te ʼu meʼa kovi fuli ʼaē neʼe fai e te tagata ki te malamanei pea mo te kele.” Tou avahi te kaupepa ʼi te paki ʼo te pasina 2 mo te 3 pea tou ʼui fēnei: “Neʼe fakaʼosi tatā fai palalau ʼaki te fehuʼi ʼaenī, ʼE fakahoko feafeaʼi anai e te ʼAtua tana fakatuʼutuʼu ʼaē ko te foaki ʼo he ʼu tapuakina ki te malamanei, pea mo ina fakaliliu te kele ko he palatiso? Koteā koa tau manatu?” Tuku ke fai atu hana tali. Koutou fuli age ki te pasina 17, pea koutou lau te palakalafe 2 pea mo Taniela 2:44. ʼOsi ʼaia pea koutou lau te palakalafe 12 ʼi te pasina 18. Koutou fehuʼi age ki ai peʼe ina fia vakaʼi mo koutou te faʼahi 9 ʼo te kaupepa. Kapau ʼe lotolelei kiai, pea koutou ako te kapite ʼaia mo ia.
4 Koʼeni te faʼahiga fai moʼo fakaʼaogaʼi ʼo te kaupepa “Mokā Mate He Tahi ʼe Tou ʼOfa Mamahi Ai.” Koutou fakahā age tona takafi pea koutou ʼui age:
◼ “Ia ʼaho nei ʼe mātou tufa te kaupepa ʼaenī ʼaē ʼe ina foaki he loto fīmālie pea mo he ʼamanaki ki te lauʼi miliona hahaʼi kua mamate ʼo kau ai mo he tahi ʼe ke ʼofa mamahi ai. Neʼe mole heʼeki ke fehuʼi koa la pe koteā te ʼamanaki ʼa te hahaʼi ʼaē kua mamate? [Tuku ke fai atu hana tali.] ʼE ʼui fakalelei mai e te Tohi-Tapu ʼe fakapapau e te ʼAtua ke ina fakatuʼuake nātou.” Lau ia Soane 5:28, 29. Koutou avahi te kaupepa pea koutou talanoa ki te ʼu puani ʼaē ʼe tuʼu ʼi te palakalafe fakaʼosi ʼi te pasina 28 pea mo te ʼuluaki palakalafe ʼo te pasina 31. Koutou fakahā age te ʼu paki ʼaē ʼe tuʼu ai. Koutou tuku ki ai te kaupepa ki te falā 50. ʼE feala ke koutou teuteuʼi he ʼaʼahi, ʼo koutou fai age te fehuʼi ʼaenī, “ ʼE lava feafeaʼi koa hatatou ʼiloʼi papau ʼe pulihi katoa anai te mate?”
5 Kapau neʼe koutou tuku te kaupepa “Mokā Mate He Tahi ʼe Tou ʼOfa Mamahi Ai,” ʼe feala ke koutou fakaʼaogaʼi te faʼifaʼitaki ʼaenī ʼi takotou fai te ʼaʼahi:
◼ “ ʼI tatā felāveʼi fakamuli, neʼe tā palalau ki te ʼamanaki taulekaleka ʼo ʼuhiga mo te fakatuʼuake. Ko te kaupepa ʼaē neʼe ʼau tuku atu, ʼe ina fakamahino mai pe koʼe ʼe feala ke tou ʼiloʼi papau ʼe pulihi katoa anai te mate. Neʼe mole ke fakatokagaʼi koa la ʼe ko he meʼa fakaloto fīmālie pea mo fakaloto fiafia te ʼu fakapapau ʼa te ʼAtua?” Tuku ke fai atu hana tali. Pea koutou fuli age ia te pasina 31 ʼi te kaupepa, pea koutou lau te lua palakalafe pea mo te tolu, pea mo Fakahā 21:1-4. Koutou faka maʼuhigaʼi te ʼamanaki ʼaē ʼe tou fakatalitali kiai, te maʼuli fiafia pea mo heʼegata. ʼO mulimuli ki tana fia logo pea mo te ʼu ʼaluʼaga ʼaē ʼe koutou palalau kiai, koutou fakaafe ia ia ke koutou ako fakatahi te Tohi-Tapu ʼaki te tohi Te ʼAtamai Mālama peʼe koutou fai age he tahi fehuʼi moʼo fakahoko ʼo he tahi ʼaʼahi.
6 ʼE feala ke koutou ʼui age te manatu ʼaenī mokā koutou fakahā te kaupepa “Fiafia Kite Mauli Heegata Ite Kele”:
◼ “Tokolahi te hahaʼi ʼe nātou feʼuiʼaki pe koteā te ikuʼaga ʼo te maʼuli. Neʼe nātou feʼuiʼaki fēnei: ‘Koteā koa te tupuʼaga ʼo taku ʼi te kele? Koteā anai toku ka haʼu? Koteā te meʼa ʼaē ka hoko kia ʼau ʼi te temi ka haʼu?’ ʼI tau manatu ʼe tou maʼu ʼifea te ʼu tali ki te ʼu fehuʼi ʼaia? [Tuku ke fai atu hana tali.] Koʼeni te meʼa ʼaē ʼe ʼui mai e te Tohi-Tapu. [Lau ia Pesalemo 36:9.] ʼE mole fakapotopoto koa la te ʼui ʼaē ʼe gata pe ki te Tupuʼaga ʼo te tagata, te fealagia ʼaē ke ina fakamahino mai pe koʼe ʼe tou maʼuʼuli ʼi te kele? [Tuku ke fai atu hana tali.] ʼE fakahā mai e te kaupepa ʼaenī te fakatuʼutuʼu lahi ʼaē ka fai anai e te ʼAtua maʼa tatou.” Tou fakahā age te paki 47 ki te 49, pea tou lau te ʼu manatu ʼaē ʼe tuʼu ai, pea tou fakamahinohino te ʼu paki; ʼosi ʼaia pea tou tuku age te kaupepa ko tona totogi fakaʼofa ko te falā 50. Kapau ʼe ina tali, pea tou fehuʼi age: “ ʼE lava feafeaʼi koa hatatou ʼiloʼi papau ʼe mole heʼeki fetogi te fakatuʼutuʼu ʼa te ʼAtua ʼaē ke maʼuli te tagata ʼo heʼegata ʼi te Palatiso ʼi te kele?” Tou fakatuʼutuʼu he ʼaho ke tou toe liliu ai ʼo ʼaʼahi ia ia.
7 Kapau neʼe koutou tuku te kaupepa “Fiafia Kite Mauli Heegata Ite Kele!” ʼe feala ke koutou ʼui fēnei ʼi takotou ʼaʼahi:
◼ “ ʼI taku haʼu talu mai ai, neʼe ʼau fiafia ʼaupito ʼi tatā fai palalau ki te manatu ʼa te Tohi-Tapu, ʼaē ʼe tuʼu ai te fakatuʼutuʼu moʼoni ʼo ʼuhiga mo te maʼuli ʼa te tagata.” Tou fakahā age te paki ʼo te takafi ʼo te kaupepa, pea tou fehuʼi age, “ ʼE lava feafeaʼi koa hatatou ʼiloʼi papau ʼe mole heʼeki fetogi te fakatuʼutuʼu ʼa te ʼAtua ʼaē ke maʼuli te tagata ʼo heʼegata ʼi te Palatiso ʼi te kele?” Tou fakahā age kia ia ʼe feala ke fai hana ako Tohi-Tapu ʼe mole totogi. Tou fakahā age te tohi Te ʼAtamai Mālama, pea mo tou fakahā age peʼe feafeaʼi tatatou fakaʼaogaʼi ia te tohi ʼaia moʼo akoʼi ohage he tokoni moʼo ako ʼo te Tohi-Tapu.
8 ʼE tonu ke hā ʼi totatou minisitelio tatatou holi fakamalotoloto ʼaē ke tou tokoni ki te hahaʼi ʼe lotolelei ke nātou “maʼu te ʼatamai mālama totonu ʼo te moʼoni.” (1 Tim. 2:4) Koia, koutou fakatuʼutuʼu ʼi takotou polokalama ke koutou toe ʼaʼahi te hahaʼi fuli ʼaē neʼe koutou tuku kiai he kaupepa. Kapau ʼe koutou tokaga moʼoni kia nātou, pea ʼe koutou faiga anai ke hāo ia nātou ʼaē ʼe toʼetoʼe pea mo lotomamahi ʼuhi ko te ʼu meʼa fakalialia ʼaē ʼe fai e te lotu hala. (Esk. 9:4, 6) Tahi ʼaē meʼa, ʼe koutou maʼu anai te fiafia pea mo he loto fīmālie, he kua koutou ʼiloʼi ia Sehova pea mo koutou faʼifaʼitaki kia ia, ʼo koutou tokoni moʼoni ki te hahaʼi.—Vakaʼi ia Filipe 2:20.