ʼU Fānau—ʼE Koutou Fakafiafia Mātou!
1 Kau talavou pea mo finemui, ʼe koutou ʼiloʼi lelei koa te fakatotonu ʼa Sehova ke koutou kau ki te ʼu gāue ʼo te kokelekasio? (Teu. 31:12; Pes. 127:3) ʼE ko he meʼa fakafiafia takotou nonofo ʼi tomatou ʼu tafa ke tou tauhi fakatahi kia Sehova! ʼE koutou fakafiafia tomatou loto ʼi takotou heheka maʼu ʼi te ʼu fono ʼo fakalogo lelei. ʼE mātou fiafia tāfito mokā koutou faiga ke koutou tali ʼaki takotou ʼu palalau ʼa koutou totonu. ʼE leleiʼia e te kokelekasio katoa mokā koutou fai hakotou akonaki peʼe ko he kiʼi fai palalau ʼi te Ako ʼo Te Minisitelio Faka Teokalatike, mokā koutou fakatahi fakamalotoloto mo mātou ʼi te gāue fai faka mafola, pea mokā mātou logo neʼe koutou fai faka mafola ʼaki he lototoʼa ki takotou ʼu kaugā ako pea mo takotou ʼu hahaʼi faiako.—Pes. 148:12, 13.
2 ʼE mātou loto ke koutou ʼiloʼi ʼe mātou fiafia ia koutou ʼi tamatou sisio ʼaē ki takotou aga fakaʼapaʼapa, mo takotou teu maʼa, takotou aga maʼa, pea mo takotou fakaʼapaʼapa ki te hahaʼi lalahi. ʼE lahi ʼaupito tamatou fiafia mokā koutou fakahā ʼe koutou ‘manatuʼi takotou Tupuʼaga Lahi’ ʼo fai he ʼu fakatuʼutuʼu faka teokalatike.—Tnk. 12:1; Pes. 110:3.
3 Koutou Fakahā Mai Takotou ʼu Fakatuʼutuʼu: Ko te tama ʼe taʼu valu, neʼe ina ʼui fēnei ki te tagata taupau faka tisitilike: ‘ ʼUluaki, ʼe ʼau fia papitema, pea ʼe ʼau fia tokoni ki te kokelekasio ʼi te fai fakatagi peʼe ko te fai ʼo te ʼu mikolo, mo ʼau tali te hahaʼi, mo tokoni ki te fakatau ʼo te ʼu tohi, mo lautohi ʼi te ako tohi pea mo te ako ʼo Te Tule Leʼo. Pea ʼe ʼau fia liliu ko he tagata faifekau faka minisitelio, pea ki muli age ko he tagata ʼāfea. ʼE ʼau toe fia pionie pea mo kau ki te ako ʼo te kau pionie. Ki muli age, ʼe ʼau fia ʼalu ki te Petele, mo liliu ko he tagata taupau faka silikosikilipisio peʼe faka tisitilike.’ Neʼe ina fakahā ai tana leleiʼia te pilivilesio ʼaē ke tauhi ki te ʼAtua!
4 ʼI takotou lahilahi ake pea mo tuputupu ʼi te faʼahi fakalaumālie, ʼe mātou fiafia ʼi tamatou sio ʼaē ʼe koutou fakahoko takotou ʼu fakatuʼutuʼu. (Vakaʼi ia Luka 2:52.) ʼI te taʼu fuli, ko te toko lauʼi afe ia koutou ʼu tūpulaga ʼe koutou liliu ko he ʼu kaugā fai faka mafola ʼe mole heʼeki papitema, pea ki muli age ʼe feala ke koutou papitema ʼo koutou liliu ko he ʼu kaugana kua foaki tonatou maʼuli kia Sehova. ʼE toe ʼāsili tamatou fiafia mokā mātou sio ʼe koutou toʼo ki muli age te selevisi pionie vaeluaʼi temi pea mo koutou hū ki te selevisi pionie katoa. ʼE moʼoni, ʼu fānau, ʼe mātou fiafia ia koutou pea ʼe vikiʼi totatou Tāmai ʼaē ʼe ʼi selo ʼuhi ko koutou. Ke lahi te ʼu tapuakina ʼaē ʼe foaki atu e Sehova kia koutou!—Taag. 23:24, 25.