Te Polokalama Foʼou ʼo Te Fakatahi Makehe ʼAho Tahi
Koʼeni te kupu tāfito ʼo te polokalama ʼo te fakatahi makehe ʼaho tahi ʼaē ka fai ʼi Sepetepeli 1999: “Tou Sivisivi Te ʼu Meʼa Loloto ʼa Te ʼAtua.” (1 Ko. 2:10) Koteā te ʼu meʼa maʼuhiga ʼaē ka tou ako ai?
Tokolahi te hahaʼi ʼe nātou kumi he faʼahiga ʼatamai mālama, kae ʼe mole nātou fīmālie ʼi te ʼu meʼa ʼaē ʼe nātou maʼu. Ko te Tohi-Tapu ʼe ina fakamālohiʼi tatou, pea ʼe ko te meʼa ʼaia ʼaē ka talanoa anai kiai te tēhina taupau faka silikosipisio ʼi tana akonaki ʼaenī, “Ko Te Sivisivi ʼo Te Folafola ʼa Te ʼAtua ʼe Ina Fakafimālieʼi Tatou.” Ko te tēhina taupau ʼaē ʼe ina ʼaʼahi te fakatahi, ʼe ina fakahā anai te pikipikiga ʼo tatatou sivisivi te ʼu meʼa loloto ʼa te ʼAtua pea mo tatatou faka mafola ia te logo lelei heʼe ina lagaʼi anai te fehuʼi ʼaenī, “E Feafeaʼi Takotou Manatu ʼo ʼUhiga Mo Te Faka Mafola ʼo Te Puleʼaga?”
ʼE lava tokoni feafeaʼi te ʼu mātuʼa ki ʼanatou fānau ke nātou sivisivi fakalelei te Tohi-Tapu? ʼE fai anai te ʼu tokoni ʼaoga ʼi te akonaki ko tona kupu tāfito ʼaenī, “Koutou Akoʼi Te Folafola ʼa Te ʼAtua Ki Takotou Fānau.” ʼE fakamālohiʼi te kau tūpulaga Kilisitiano mokā nātou fakatahi mo ʼihi ʼo te kokelekasio ʼaē kua popoto ʼi te faʼahi fakalaumālie. Ko he ʼu faʼifaʼitaki ʼo ʼuhiga mo tona ʼu fua lelei kia nātou ʼe fakahā anai ʼi te akonaki ʼaenī, “Ko Te Kau Tūpulaga ʼe Nātou Ako Mai Ia Nātou Matutuʼa.”
He koʼe ʼe tonu ke tou kumi te ʼu koloā fakalaumālie ʼaē ʼe fufū? Ko Sehova ʼe ko Ia ʼaē ʼe ina Fakahā te ʼu meʼa fakalilo. Ko te tēhina ʼaē ʼe ina ʼaʼahi te fakatahi ʼe ina fakamahino anai pe koteā te ʼu meʼa ʼaē neʼe fakahā e Sehova ʼi te temi muʼa pea mo te temi ʼaenī ʼi tana akonaki, “ ʼE Fakahā Māmālie e Sehova Te ʼu Meʼa Loloto.” ʼE ina fakamālohiʼi anai tatatou loto ʼaē ke tou haga “kumi te ʼu meʼa loloto ʼa te ʼAtua.”
Koutou fakatuʼutuʼu ʼi te temi nei ke koutou kau ai. Ko nātou ʼaē ʼe nātou fia papitema moʼo fakahā kua nātou foaki tonatou maʼuli kia Sehova, ʼe tonu ke nātou foimo fakahā ki te taupau pelesita. ʼAki te ʼu meʼa ʼaē ka tou logo ki ai, ʼe fakamālohiʼi ai anai totatou holi ʼaē ke tou sivi loloto te Folafola ʼa te ʼAtua. Koia ʼaua naʼa tou tō ʼi te ʼaho ako makehe ʼaia!