Te Aga Faka Kakā ʼe Pulihi Anai

“Ke ke amanaki lelei [kiā Sehova], pea ke ke tauhi tona ala . . . E ke sio anai e motuhi te kau agakovi.”—PESALEMO 37:34.

ʼE KOTOU tuʼania koa naʼa mole feala hakotou hao mai te aga faka kakā peʼe ko tona pulihi kātoa? Tokolahi ʼe natou maʼu ia te taʼi manatu ʼaia. ʼI te hisitolia ʼo te tagata, neʼe ina faigaʼi pē ke ina fakatuʼu he ʼu faʼahiga takitaki kehekehe. Kae, neʼe mole feala ke ina pulihi kātoa ia te aga faka kakā. ʼE feala anai koa ʼi he ʼaho ki te hahaʼi fuli ke natou aga fakahagatonu?

ʼE fakahā ʼi te Tohi-Tapu ʼe hoko anai ia te faʼahi ʼaia. ʼE hā mai ʼi te Tohi-Tapu, kua vave pulihi pē e te ʼAtua ia te aga faka kakā ʼi te kele. ʼO feafeaʼi? ʼAki tona Puleʼaga ʼaē ʼe ʼi selō, ʼe ina fetogi kātoa anai ia te kele. Ko te Puleʼaga pē ʼaia neʼe akoʼi age e Sesu ki tana kau tisipulo ke natou faikole kiai. ʼI te faikole ʼo te Tamai ʼaē ʼe ʼi selō, neʼe ʼui fēnei e Sesu: “Ke aumai tau pule, ke fai tou finegalo i te kelekele.”—Mateo 6:10, Tauhi Foou.

ʼE fakakikite fēnei ʼi te Tohi-Tapu ʼo ʼuhiga mo te Pule ʼo te Puleʼaga, ʼaē ko Sesu Kilisito: “E ina haofaki anai te masiva ae e tagi, pea mo te tagata fakaofaofa ae e mole ina mau he tokoni. E ofa anai ia ia i te gaegae mo te masiva, pea e ina fakamauli anai te mauli o te kau masiva; e ina fakaateainai anai natou i te kaka mo te fakamalohi.” (Pesalemo 72:12-14) Kotou tokagaʼi ʼe maʼu e Sesu ia te lotomahino ʼo ʼuhiga mo nātou ʼaē ʼe mamahi ʼuhi ko te aga faka kakā pea ʼe ina tauʼi anai. ʼE ko he manatu faka lotomalohi.

ʼAki te Pule agaʼofa pea mo mālohi ʼaia, ʼe pulihi anai e te Puleʼaga ʼo te ʼAtua ia te aga faka kakā ʼi te kele. ʼO feafeaʼi? ʼAki tana pulihi ia te ʼu tupuʼaga e tolu ʼo te aga faka kakā.

Te Fakaneke ʼo Te Agahala

ʼI te temi ʼaenī, ʼe tonu ke tou tauʼi ʼotatou vaivaiʼaga ʼaē ʼe ina uga tātou ke tou fai ia te meʼa ʼaē ʼe tou loto kiai. (Loma 7:21-23) Kae ʼe ʼi ai pē ʼihi hahaʼi agalelei ʼe natou fia fai ia te ʼu meʼa ʼaē ʼe lelei. ʼE natou tui ki te maʼuhiga ʼo te sākilifisio faitotogi ʼa Sesu pea ʼe feala ke fakamolemole ʼanatou agahala.a (1 Soane 1:7, 9) ʼE feala ke maʼu e te hahaʼi ʼaia ia te ʼu fua lelei ʼo te fakatuʼutuʼu ʼofa ʼaē neʼe fai e te ʼAtua ohagē pē ko tona ʼui iā Soane 3:16: “He nee ofa lahi osi te Atua ki te malamanei nee ina foaki ai tona Alo ulutokotahi, o tupu ko he tahi pe e tui kia ia ke aua naa mate ia, kae ke ina mau te mauli heegata.”

ʼE fakahoko anai e Sehova ia he ʼaluʼaga fakaofoofo maʼa te hahaʼi agatonu. ʼI te mālama foʼou kā hoko mai, ʼe ina pulihi anai ia te agahala, mo ina taki anai ia te hahaʼi ki te maʼuli haohaoa pea mo faitotonu. (Esaia 26:9; 2 Petelo 3:13) ʼE mole toe fakaneke anai e te agahala ia he tahi ke aga faka kakā. ʼAki te takitaki ʼo te Puleʼaga ʼo te ʼAtua, ʼe fakaʼāteaina anai ia te hahaʼi agatonu mai tanatou pōpula ki te aga faka kakā.

Te Fakaneke ʼo Te Mālama ʼAenī

Tokolahi iā ʼaho nei, ʼe natou faigaʼi ke natou fakamamahiʼi ʼihi atu. ʼE natou gaohi koviʼi ia te kau māsisiva, pea ʼe natou fakaneke ʼihi ke natou toe aga faka kakā mo nātou. ʼE fakatokagaʼi fēnei ʼi te Tohi-Tapu ʼo ʼuhiga mo nātou ʼaia: “Ke siaki e te tagata agahala tona ala, pea mo te tagata agakovi ana manatu.” Pea kapau ʼe fakahemala he tahi neʼe aga faka kakā, ʼe fakapapau ʼi te Tohi-Tapu, ko te ʼAtua “e mole piko i te fakamolemole.”—Esaia 55:7.

Kae, ʼe maʼua anai ki te ʼAtua ke ina pulihi ia nātou ʼaē ʼe mole natou fia fetogi tanatou aga. ʼAki te Puleʼaga ʼo te ʼAtua, ʼe hoko moʼoni anai ia te fakapapau faka Tohi-Tapu ʼaenī: “Ke ke amanaki lelei [kiā Sehova], pea ke ke tauhi tona ala . . . E ke sio anai e motuhi te kau agakovi.” (Pesalemo 37:34) Mai tona ʼaluʼaga ʼaē kua pulihi anai ia te kau agakovi ʼaē ʼe mole fia fetogi, ʼe mole toe mamahi anai ia te ʼu kaugana agatonu ʼa te ʼAtua ʼuhi ko te aga faka kakā.

Te Fakaneke ʼa Satana, Te Tēvolo

ʼE mole he tahi ʼe kovi age iā Satana, te Tēvolo. Kae kua vave fakagata pē e Sehova ia Satana ke ʼaua naʼa ina fakaneke ia te hahaʼi. Pea ki muli age, ʼe fakaʼauha anai e te ʼAtua ia Satana ʼo talu ai. ʼE mole toe feala anai ki te ʼāselo agakovi ʼaia ke ina fakaneke te hahaʼi ke natou aga faka kakā.

Kae ʼe feala pē ke ʼui e ʼihi ko te fakatuʼutuʼu ʼa te ʼAtua ke ina pulihi ia te ʼu tupuʼaga fuli ʼo te aga faka kakā ʼe ko he moemisi ia. ʼE feala pē ke kotou feʼekeʼaki fēnei: “ ʼE feala koa ki te ʼAtua ke ina fakahoko ia te ʼu fetogi ʼaia? Kapau ʼe ina fealagia, he koʼē heʼeki ina fakahoko?” ʼE ko he ʼu fehuʼi maʼuhiga pea ʼe foaki mai ʼi te Tohi-Tapu ia he ʼu tali ʼe lelei.b ʼE matou fakaafe atu koutou ke kotou vakavakaʼi peʼe koteā ʼaē ʼe akoʼi mai ʼi te Tohi-Tapu ʼo ʼuhiga mo te kā haʼu, ʼi te temi ʼaē kā pulihi ai anai ia te aga faka kakā ʼo talu ai.

[ʼU nota]